Yeerannyaaka iyo itthwiiyo, nloko neekristau ninlamuliya uwehera ntheli nawe nokhalayi khampa noovira ni ntheli nawe nophiyaaru khampa neekhweeli nhina malamulo ookuvernu. Wiira niiweehe ratta iyo itthwiiyo, nttwee noone isiyani Yesu yuulumilyaawe nhina umwalana ni unthela ntthu nkhwaawe.

Nhina Matewus 19:9, Yesu naahimya itthu imoca paahi inonvaha ntthu isariya yo waamwalanana amwaarawe awula awannyawe. Iyo iveeruswiiyo ineera: “Ule nhala waahiya amwaarawe, uhikhanle nlattu wooraruwa,  ni unthela nthiyana nkiina, heetta uluva.” Ayo moolumwaayo annithoonyera wiira (1) uraruwa phi itthu imoca paahi inonvaha ntthu isariya yoomwalanaca naamwaarawe awula naawannyawe ni (2) nlopwana amwalanacaka naamwaarawe hirina iyo isariyeeyo ni anthelaka nthiyana nkhwaawe, uyo heetta uluva. *

Niireke Yesu aapheela uhimya wiira nlopwana eettaka uluva ni amwalanacaka naamwaarawe pooti wanonthelaawe nthiyana nkhwaawe? Mena. Nlopwana eettaka uluva, amwaarawe yaatthekenlyaawe pooti ulakela unlevelela awula mena. Ayo athiyanaayo yalakelaka uhaalevelela awannyaya ni yamwalanacaka, ooyeeli ahaana isariya yoothelana nintthu nkhwaawe, wakhalaka wiira ahomwalanaca waakhulupale ookuvernu.

Masi pooti ukhalaka wiira nthiyana aavanre uluva awannyawe khanhala upheela umwalanaca naayo ni atthunaka naahala uwiirela wiira haalevelela. Vano wakhalaka wiira nlopwanooyo aholakela umwalanaca naamwaarawe hataa ukhalaka wiira holeveleliya? Ukhala wiira nthiyanooyo aholakela waalevelela awannyawe ni uhimwalanaca, nlopwanooyo khankhalana isariya yonthela ntthu nkhwaawe. Yanthelaka ntthu nkhwaawe ahirina isariya yoomwalanaca, ayo aheetta uluva. Yiirannyaaka iyo itthwiiyo, mahumu o wanlokoni anaahala utthenkaca ikhurupu yo mahumu anhukhumu wiira wuulumaceriye uyo mwahooyo.—1 Akor. 5:1, 2; 6:9, 10.

Vano nlopwana amwalanaka naathiyana yaathenlyaawe hirina isariya yoomwalanaca naayo ni aathelaka athiyana akhwaawe, nloko neekristau ninlamuliya uwehera cani ntheli nawe nokhalayi ni nophiyaaru? Niireke ntheli nawe nokhalayi nanlelo ninkhala neekhweeli? Athiyana ahinnye niireke pooti waalevelela awula waakhotta awannyaya? Niireke nloko neekristau ninlamuliya uwehera ntheli nophiyaaru khampa uluva?

Khalayi, hiiva neera wiira athiyana yaahiilyaawe wakhala wiira khakhwile, khatheliye ni ntthu nkhwaawe ni khararuwile, ntheli nophiyaaru na nlopwana unkhala uluva. Masi naweheehaka saana, ninawoona wiira ukati Yesu woolumilyaawe uyo mwahooyo, uyo khaaromonle athiyana nlopwanooyo anaahiyaawe. Uhiya commo, Yesu enre wiira nlopwana amwalanacaka naamwaarawe hirina isariya yoomwalanaca naayo ni aathelaka athiyana akhwaawe, uyo heetta uluva. Yeerannyaaka  iyo itthwiiyo, umwalana ni unthela ntthu nkiina unaamaliha ntheli nokhalayi.

Nlopwana amwalanacaka naamwaarawe ni aathelaka athiyana akhwaawe, athiyana yaahiilyaawe khankhalana mananna onlevelela awula unkhotta uyo nlopwanooyo, ukhala wiira uthelanaca waya uhomala ukati umwalanacilyaaya. Ni nloko neekristau khaninlamuliya uwehera ntheli nawe nophiyaaru khampa uluva hataa ukhalaka wiira athiyana yaahiilyaawe ahaavo nanlelo akumi, khatheliye nintthu nkiina ni khararuwile. *

Nhina ntakihero noopenleehu mwaha wiipaceroni, ninre wiira nlopwanooyo heetta uluva ni homwalanaca naamwaarawe. Vano wakhalaka wiira nlopwanooyo kheettile uluva masi hoolakela paasi umwalanaca naamwaarawe ni waathela athiyana akhwaawe? Awula, isiyani inlamuliya upankiya wakhalaka wiira nlopwanooyo eettile uluva namwalanacileene naamwaarawe ni wahoolo nawaathela athiyana akiina hataa ukhalaka wiira amwaarawe yahonlevelela? Ceerannyaaka nnyo citthu piilinnyo, umwalanaca wawe ni ntheli nawe nophiyaaru unkhala uluva; phimaana ntheli nawe nokhalayi ninaamala. Nhina mmalamuloni ookuvernu ntheli nawe nophiyaaru ninkhala neekhweeli. Irevista Ukhalenla 1 yo Fevereiro yo 1980, ipaagina 32 yaataphulenle uyo mwahooyo yiiraka co: “Uyo nlopwanooyo honthela nthiyana nkhwaawe; phimaana, khanlamuliya unhiya nthiyana nthenlyaawe phiyaaru wiira anhokoleele ule nhiyalyaawe; ntheli nawe nokhalayi nihomala kontha homwalanaca naamwaarawe okhalayi, heetta uluva ni haathela athiyana akhwaawe.”

Urukunusa wihu itthu yaakupaliihu nhina ula mwahoola khunthoonyera wiira nkristau haana ahiyaka uwehera uthelanaca khampa itthu yowaarya, awula wancera wuupuwela wiira uluva khinakhala itampi yuulupale. Nlopwana amwalanacaka naamwaarawe hirina isariya yoomwalanaca naayo ni anthelaka nthiyana nkiina, mahumu ahaana yatthenkacaka ikhurupu yoohukhumu inhala wuulumacera uyo mwahooyo. (Wakhalaka wiira athiyana yaathenlyaawe phiyaaru akhanle akristau, ayo ciicammo ahaana yoolumaniyaka niikhurupu yo mahumu anhukhumu, kontha aheetta uluva.) Hataa ukhalaka wiira ntheli nophiyaaru na nlopwanooyo khunakhala uluva, cinaahala uvira myaakha cinci uyo nlopwanooyo woohivahaceriya mirintti cuulupale wanlokoni, ni khanhala waakuva uvahaceriya mpaka mayamunna o wanlokoni wanhalaaya wancera unhisimu. Ni hinaaya uvahaceriya nteko muulupale wanlokoni, mahumu ahaana yuupuwelaka makhalelo aathiyana ni asaana uyo nlopwanooyo yaahiilyaawe.—Mal. 2:14-16.

Anaakhumelela masakha menci ntthu amwalanacaka naamwaarawe awula naawannyawe hirina isariya yoomwalanaca toko cinhimiyaaya mbiiblyani. Yuupuwelaka iyo itthwiiyo, makristau ahaana yathoonyeraka ucuwelaca, untakiha Yehova ni uwehera uthelanaca khampa itthu yowaarya.—Ekles. 5:4, 5; Mabere. 13:4.