1. Noopuwelaka citthu cotheene Yehova cumpilyaawe, isiyani atthunaka ineekoheehu?

NAWEHAKA ituninya ni irimu Yehova cumpilyaawe, atthunaka ninaakhala ootikhinihiya khampa Davidi caakhanlyaawe. Ikwaha imoca, uyo ahonlompa Yehova ni ahonkoha co: “Koonaka vale irimu caa, cumpiye ni makokhwaa, mweeri ni itthoottwa cumpilyaa, pinaatamu ooweherera ukhwa isiyani iryaawe, wiira weeva umuupuwele, ni mwaana apinaatamu isiyani iryaawe, wiira untafiti?” (Isaa. 8:3, 4) Toko Davidi, hiiva neelattanihaka ni citthu cotheene cumpale Nluku wiirimu ni vathi, ninaakhala ootikhinihiya noonaka wiira Nluku naaniwacera hataa niyevaka. Masi nhina ula mwahoola, ninaahala wiitthuca wiira Yehova uhiya paahi waawacera apinaatamu oopacera, Atamu ni Hawa, uyo ciicammo ahaakhaliha amucyaawe.

2. Isiyani Yehova yampheelelaawe Atamu wamoca ni Hawa?

² Atamu ni Hawa phaari asaana oopacera a Nluku va watuninyani va. Yehova aapheela wiira Atamu ni Hawa akele itthokwaawe yo watuninyani ni yincivihe cinene iyo itthokweeyo. Phimaana Yehova ahowiirela co: “Mwaayare asaana ni mwincive; ncare watuninyani ni nhoolele.” (Upha. 1:28) Atamu ni Hawa yahaana yaayaraka asaana ni uwacera saana myumpi co watuninyani. Unari wiira yahomwiiwelela Nluku ni yahovara saana nteko Yehova waavahacenryaawe, Atamu ni Hawa wamoca naasaanaaya ni asiculaya otheene, khayaahala uhiya upanka mphatte waamuci a Nluku.

3. Nlattuni uneereehu wiira Atamu ni Hawa yahaana ifayita cinene watthokoni ya Yehova?

³ Atamu ni Hawa yahaana ifayita venci nhina waamuci a Yehova. Nhina Isaalimu 8:5 ni niwehero, Davidi hooluma ikhweeli imoca yo mananna Yehova ciwumpilyaawe apinaatamu: “Uhonyeviha vakaani uvikana malayikha, ni uhonvaha uttitthima ni utepa ureera.” Apinaatamu kharina ikuru cinci, ankhili ni ucuwelaca  toko malayikha. (Isaa. 103:20) Unookhalaru commo, Yehova ‘honyeviha vakaani,’ awula hiiva nivirikanne vakaani ni malayikha. Iyo itthu yootepa ureera! Khweeliini, ukati Yehova waawumpilyaawe asithumwanihu oopacera, uyo ahaavaha ukumi womaana.

4. Isiyani yankhumelenle Atamu ni Hawa, ni isiyani inhaleehu woona nhina ula mwahoola?

 ⁴ Wooriipiha nrima, Atamu ni Hawa yahohiya upanka mphantte wamuci a Yehova. Ni toko cinhaleehu wiitthuca nhina ula mwahoola, nlattu Atamu ni Hawa woohiya upanka mphantte waamuci a Yehova, ahaaphwanyiha masakha menci asaanaaya ni ucuulwaaya wotheene. Hataa ukhalaka commo, Yehova nanlelo naapheela wiira apinaatamu ammwiiwelela akhale asaanaawe mpaka. Nhina ula mwahoola, ninaahala woona isiyani Yehova ipankilyaawe inthoonyera wiira naanoona ukhalana ifayita cinene. Ciicammo, ninaahala woona isiyani ninlamuliyeehu upanka inhala uthoonyera wiira khanimpheela uhiya upanka mphantte wamuci a Nluku. Ni woomalihera, ninaahala woona iparakha coohimala cinhalaaya waakhela asaana a Yehova va watuninyani va.

5. Isiyani inlamuliyeehu upanka inhala uthoonyera wiira ninansukhuru Yehova unumpa wawe eelattaaniheraka?

⁵ Yehova numpale eelattaaniheraka. (Upha. 1:26, 27) Yehova unumpa wawe eelattaaniheraka, maanaaya wiira numpile niinanna ninkhitiriihu uthoonyera makhalelo uyova arinaawe, toko nifento, ikiriri, ukhitiri unvaresesa Yehova ni weettela isariya. Ayo akhanle makhalelo annikavihera ukhala atthu Yehova anaapheelaawe iriyari yaamucyaawe. (Isaa. 86:15; 145:17) Neekurumicaka uthoonyera ayo makhalelwaayo, ninanthoonyera Yehova wiira ninansukhuru venci unumpa wawe eelattaaniheraka. (1 Pet. 1:14-16) Ni ciicammo ninaakhala ootteeliya muukumini wihu.

6. Citthu Yehova cumpalyaawe cinthoonyera cani wiira uyo naawoona apinaatamu ukhalana ifayita?

⁶ Yehova honitthenkacera nipuro nomaana noohala ukhala. Hinaaya umumpa pinaatamu oopacera, Yehova ahaatthenkacera ituninya apinaatamu. (Jó 38:4-6; Jer. 10:12) Ukhala wiira Yehova khanle Nluku oofenta cinene, uyo hotthenkaca watuninyani citthu cinci caahala unitteeliha nrima. (Isaa. 104:14, 15, 24) Ikwaha Yehova ceemelaawe wiira oone citthu cumpalyaawe, uyo ahoona wiira “cotheene caari cootepa ureera.” (Upha. 1:10, 12, 31) Ni Yehova hothoonyera wiira apinaatamu ahaana ifayita, waavahacera wawe ‘uwacera’ citthu cooreera cotheene cumpalyaawe watuninyani. (Isaa. 8:6) Itthu Nluku yaapheelaawe waari uwoona apinaatamu waatteelaka nrima ukati unwaceraaya citthu comaana Yehova cumpalyaawe. Nyuuva nnansukhuruku Yehova nlattu wo nno niwehereronno?

7. Josuwe 24:15 inthoonyera cani wiira hiiva nihovahiya uthanla impheeleehu?

⁷ Yehova honivaha uthanla impheeleehu. Hiiva pooti uthanla itthu impheeleehu. (Nsome Josuwe 24:15. *) Nlukwiihu naakhala ootteeliya cinene nathanlaka unswalela uyova. (Isaa. 84:11; Miru. 27:11) Ni khacimala citthu comaana cikhwaawe ninlamuliyeehu uthanla. Nttwee noopele mwaha ntakihero na Yesu.

8. Isiyani Yesu yaapankilyaawe inthoonyera wiira ahothanla uhoolelihera uwacera citthu caakhwaawe?

⁸ Toko Yesu, otheene cihu pooti uthanla uhoolelihera uwacera citthu caakhwiihu, uhiya uhoolelihera citthu cihu. Ikwaha imoca, Yesu ni maapostolwaawe yahoocya cinene; phimaana yahorwaa nipuro wiira yamumule vakaani. Masi uphiya waya, ayo khayaakhitinri umumula. Atthu enci yaapheela wiitthucihiya ni Yesu  yahorwaa mpaka nipuro naaryaawe Yesu ni maapostolu. Uyo ukatyuuyo, Yesu khaaviruwenle ayo atthwaayo. Uhiya commo, uyo ahowoonela ikiriri. Isiyani Yesu yaapankilyaawe? Uyo “ahancera uwiitthuciha citthu cinci.” (Mark. 6:30-34) Hiiva ciicammo nihaana nintakihaka Yesu. Pooti uleva ukatiihu ni wiikurumica waakavihera akhwiihu. Napankaka commo, ninaahala waattitthimiha Apaapeehu o wiirimu, Yehova. (Mat. 5:14-16) Ciicammo, ninaahala unthoonyera Yehova wiira nimpheela ukhala amucyaawe.

9. Iparakhani yuulupale ayari ivahiyaaya?

⁹ Yehova haavaha apinaatamu iparakha yo waayara asaana ni uwiitthuca unfenta ni unswalela uyova. Wakhala wiira nyuuva nhaana asaana, nnaasukhuru Nluku nlattu wo wuuvahani iyo iparakheeyo? Unookhalaru wiira Yehova hovaha malayikha ucuwelaca cinene, uyo khavahile malayikha iparakha yo waayara asaana. Phimaana, ayari ahaana yalemelihaka cinene iparakha irinaaya yo waayara ni uwuunuwiha asaanaaya. Waayara asaana ni ‘uwiitthuciha moopuwelo a Yehova,’ ukhanle nrintti muulupale ayari urennyaaya ni Nluku. (Efesu 6:4; Deut. 6:5-7; Isaa. 127:3) Mphwinko woothotokanihiya wa Yehova unaakumihera ikaruma cinci mwinternetini toko ilivuru, ividiyu, icipo ni myaha, coohala waakavihera ayari uwiitthuciha citthu comaana asaanaaya. Unawoonannya wiira Apaapeehu o wiirimu wamoca ni Mwanaya, Yesu, anawaafenta cinene asaaniihu. (Luka 18:15-17) Ayari yankhuluvelaka Yehova ni yeekurumicaka waawacera asaanaaya, Yehova naakhala ootteeliya cinene. Ni ayo ayaryaayo anawaakavihera asaanaaya ukhala amuci a Yehova mpaka!

10-11. Nlattu wonvaherera mwaamwanawe wiira oonoopele, iparakhani Yehova impheelaawe wiira nakhalane?

¹⁰ Yehova hovaherera ukumi wa mwaamwanawe nonfentaawe cinene wiira nituruwele ukhala amucyaawe. Toko  iparaagarafu 4 coopenlyaaya mwaha, Atamu ni Hawa yahohiya ukhala amuci a Yehova, ni iyo ciicammo phi itthu yaawiirannyenle asaanaaya. (Aroo. 5:12) Atamu ni Hawa yaathanlale imweeni uhimwiiwelela Nluku, phimaana khunaaphwanela uturuwela ukhala amuci a Nluku. Vano asaanaaya ni ucuulwaaya? Yehova nawaafenta cinene apinaatamu otheene ni haavaha Mwanawe, Yesu Kristu khampa moopoli, wiira ale anhala umwiiwelela aturuwele ukhala amucyaawe. (Joau 3:16; Aroo. 5:19) Wiivaherera wa Yesu Kristu uhokhitiriha wiira atthu ookhuluvelya 144.000 akhale asaana a Nluku.—Aroo. 8:15-17; Apoka. 14:1.

¹¹ Ilelo ahaavo ciicammo atthu ookhuluvelya enci aneekurumica upanka impheelaawe Nluku. Ayo atthwaayo anaaweherera ukhala amuci a Nluku yaviraka ihukhumu ya Nluku inhala uwa cinavinre myaakha 1.000. (Isaa. 25:14; Aroo. 8:20, 21) Nlattu wookhalana nno niweherero nomaananno, ayo atthwaayo pooti wammwiihanaaya ‘Paapa’ Mpattusyaaya Yehova. (Mat. 6:9) Ni ale anhala wunwelelihiya upeephoni ciicammo anaahala ukhalana ukati wo wiitthuca itthu Yehova impheelaawe wiira apanke. Yathanlaka umwiiwelela Yehova Nluku, ayo ciicammo anaahala ukhala amucyaawe.

12. Nikohoni vano nimpheeleehu waakhula?

¹² Mpaka va, nihoona wiira Yehova naawoona apinaatamu ukhalana ifayita. Uyo haapanka asaanaawe makristau oothanliya ni naawiihanela atthu o “mphwinko muulupale” iparakha yoohala ukhala asaanaawe upeephoni. (Apoka. 7:9) Isiyani inlamuliyeehu upanka wiira nithoonyere wiira ninaapheela ukhala amuci a Nluku mpaka?

13. Isiyani inlamuliyeehu upanka wiira nipanke mphantte waamuci a Nluku mpaka? (Nwehe Markus 12:30)

¹³ Munfente Yehova munswalelaka ninrimeenyu wotheene. (Nsome Markus 12:30. *) Nlattu  woofenta cinene, Yehova haavaha apinaatamu citthu comaana. Itthu yomaana cinene ukhanle unikavihera hiiva ukhitiri unswalela. Hiiva ninthoonyera wiira ninanfenta Yehova ‘neewelelaka citthu cinrumaawe.’ (1 Jo. 5:3) Oolumaka itthu impheelaaya Athumwaane, Yesu honiruma waapanka eetthuci ni waapattisa. (Mat. 28:19) Ciicammo honiruma ufentana. (Joau 13:35) Ale aneewelela ayo marumwaayo anaahala upanka mphantte waamuci a Yehova mpaka.—Isaa. 15:1, 2.

14. Ninhala waathoonyera cani akhwiihu wiira ninawaafenta? (Nwehe Matewus 9:36-38 ni Arooma 12:10)

¹⁴ Nwoonihere nifento akhunaninyu. Nifento phiikhalelo yuulupale ya Yehova. (1 Jo. 4:8) Yehova phipacenre unifenta hiiva nihinaaya uncuwela. (1 Jo. 4:9, 10) Hiiva ninontakiha Yehova naafenta akhunanihu. (Efesu 5:1) Inanna imoca yo waafenta akhunanihu ukhanle waakavihera uncuwela Yehova ihinaphiya umwiiso ila ituninyeela. (Nsome Matewus 9:36-38. *) Napankaka commo, ninaahala waakavihera ayo atthwaayo wiira ciicammo akhale amuci a Nluku. Ni hataa ukhalaka wiira ntthuuyo hopattisiya, hiiva nanlelo nihaana ninfetaka ni ninhisimaka. (1 Jo. 4:20, 21) Ninhala upanka cani? Inanna imoca ukhanle unkhuluvela uyo ntthuuyo. Awula, apankaka itthu ihincuweleeheehu, khaninhala waakuvela ukupali wiira pankile iyo itthwiiyo nlattu wo wiihoolelihera awula wiithenca. Uhiya commo, nihaana nanhisimaka munneehu ni umoona ukhala muulupale univikana hiiva.—Nsome Arooma 12:10; * Afili. 2:3.

15. Apani anlamuliyeehu uwoonela uthunku ni uwoonihera unamaana?

¹⁵ Nwoonele uthunku ni nwoonihere unamaana atthu otheene. Napheelaka ukhala wamoca naale arina iparakha yoomwiihana Paapa Yehova, nihaana neettelaka citthu cotheene cinhimyaaya Nuulumo na Nluku. Wootakihera, Yesu honiithuciha wiira nihaana niwoonelaka uthunku ni niwooniheraka unamaana atthu otheene, hataa naale akhanle awananiihu. (Luka 6:32-36) Upanka iyo itthwiiyo ukati nkiina pooti unirika. Wakhala wiira unaanirika upanka iyo, nihaana niitthucaka untakihera Yesu nhina citthu cinoopuweleehu ni cimpankeehu. Neekurumicaka umwiiwelela Yehova ni untakiha Yesu, ninawaathoonyera Apaapeehu o wiirimu wiira ninaapheela ukhala amucyaaya mpaka.

16. Ninhala ukhikicera cani makhalelo omaana aamuci a Yehova?

¹⁶ Nkhikicere makhalelo omaana aamuci a Yehova. Iriyari yaamuci pooti ukhalaka wiira mwaana omwankaani naapheela cinene untakiha muulupalyaawe. Wakhalaka wiira mwaana omuulupale naweettela mattharelelo o mbiiblyani, uyo nokhala ntakihero nomaana na mwanhimaawe. Masi mwaana omuulupale anceraka upanka citthu coohinamaana, mwanhimaawe ciicammo pooti untakihera. Iyo phi itthu ineerannya iriyari yaaswali a Yehova. Wakhalaka wiira nkristau khalayi aakhuluvelya hancera uhikupali mattharelelo o mbiiblyani ni holakela uraruwa awula upanka citthu cikhwaawe coohinamaana, iyo itthwiiyo pooti uwiiriha makristau makhwaawe wancera untakiha. Masi atthu ampanka nnyo citthu coohinamaanannyo ciicammo anaananariha makhalelo omaana aaswali otheene a Yehova. (1 Atesal. 4:3-8) Phimaana, nihaana ninyemaka waatakiha atthu ampanka citthu cootakhala ni nihihiye nanka itthu inihiihaka waaswalela Apaapeehu o wiirimu.

17. Moopuweloni oohiloka hiiva ahinlamuliyeehu ukhalana ni kontha isiyani?

¹⁷ Munkhuluvele Yehova kahi mihakhu. Yehova naanikhuluveliha wiira nahooleliheraka muukumini wihu Umwennyaawe ni namwiiwelelaka, uyo naahala univaha iyoolya, ikuwo ni nipuro  nookhala. (Isaa. 55:22; Mat. 6:33) Nlattu wo iyo, khaninlamuliya wuupuwela wiira mihakhu co ila ituninyeela cinaahala unikhikicera awula uniphwanyiha utteeliya. Hiiva ninaacuwela wiira itthu inhala uniphwanyiha nnema neekhweeli ukhanle upanka impheelaawe Yehova. (Afili. 4:6, 7) Hataa ukhalaka wiira nihaana nsurukhu woohala uthumela citthu cinci, nihaana niwehaceraka wakhala wiira ninaahala ukhalana ukati woowacera ni uvarela nteko nnyo citthunnyo. Niireke ninaavaresesa cinene mihakhu cihu? Nihiliyale wiira Nluku nopheela wiira nivare nteko univahalyaawe. Iyo maanaaya wiira khaninlamuliya uhiya citthu cikiina ciniitthaalihaka. Khanimpheela ukhala toko mmirawo aakhottile ipharakha yonvarela nteko ni yookhala mwaana a Yehova nlattu woovaresesa maali vakaani yaarinaawe!—Mark. 10:17-22.

18. Iparakhani cinhalaaya uvahiya ale ammwiiwelela Yehova?

¹⁸ Atthu ammwiiwelela Yehova anaahala waakhela iparakha yuulupale—iparakha yookhalana ukumi woohimala yanswalelaka ni yanfentaka Yehova mpaka! Ciicammo ale anweherera ukhala watuninyani, unaahala waatteela nrima cinene nlattu wo waakhela iparakha yoowacera ni urehererya itthaya Yehova yumpalyaawe wiira nikhale nipuro nooreera ukhaliya naapinaatamu. Woohipica, wanhalaaya uhoolela Umwene wa Nluku, itthaya ni citthu cotheene cirivo vathiva cinaahala urehereriya. Yehova naahala umaliha masakha otheene ankhumelela ukhuma uwakati Atamu ni Hawa waalakenlyaaya uhiya ukhala amuci a Nluku. Yehova naahala uwunweleliha atthu enci akhwile ni ayo atthwaayo anaahala ukhalana ukumi womaana watuninyani inhala ukhalihiya ipeephoni. (Luka 23:42, 43) Ni ukati apinaatamu unhalaaya uhikhalana-tho ipahuwa, otheene caya anaahala ukhalana “uttitthima ni utepa ureera” khampa Davidi cantikhalyaawe.—Isaa. 8:5.

19. Isiyani inlamuliyeenyu ulakela upanka?

¹⁹ Wakhala wiira nyuuva nnoweherera ukhala watuninyani mpaka, nhaana niweherero nooreera. Nluku nawuufentani ni naapheela wiira nkhale mmucyaawe. Phimaana, mwiikurumice unciveliha Nluku. Khula nihuku, muupuwele ni mweese wanrimani iparakha cinkhuluvelihaawe Nluku. Nsukhuru iparakha irineenyu yo waaswalela Apaapeenyu o wiirimu ni nlemelihe niweherero noohoolo nirineenyu, noohala waattottopela mpaka!