Uyo mwahooyo, niheetthuca wiira uhaavo mwaha muulupale unaahela nhina apinaatamu ni malayikha: ureerihiya ncina na Yehova. Ukhulupale—awula, wakhala wiira mananna nohoolelaawe Yehova akhanle omaana—ukhanle ureerihiya ncina na Yehova. Ciicammo, apinaatamu unvaresesa waya Yehova ikhanle itthu ikiina inhela nhina ureeriha ncina na Yehova.

Kontha isiyani vano ninoolumeehu wiira ureerihiya ncina na Yehova ukhanle mwaha muulupale? Nttwee noone citthu tthaaru.

Yoopacera, Sotwani honanariha ncina na Yehova, ujardim yo Eeteni. Itthu Sotwani yankohilyaawe Hawa inoonihera wiira uyo aahimya wiira Nluku khanakhala namavaha ni nawaathuwa apinaatamu citthu comaana. Uyo ahimyacile itthu yoovirikana cinene niitthu yaahimilyaawe Yehova. Ciicammo, ahomootheriha Yehova ukhala Nluku owootha. Uyo honanariha ncina na Yehova. Ni nna co uyo hokhala “Tiyapu;” nno ncinanno maanaaya wiira “ntthu owootha”. (Joau 8:44) Nlattu Hawa woomwiiwelela Sotwani, uyo khamwiiwelenle Yehova ni ahorukunuwela ukhulupalyaawe. (Upha. 3:1-6) Mpaka ilelo Sotwani khanhiya umootherya citthu Yehova. Ni unawoonannya wiira atthu aneewelela nnyo citthu cowoothiyannyo khammwiiwelela Yehova. Phimaana, apoovu a Nluku anaatepa uhoona isariyaaya citthu cinootheriyaaya ncina Yehova. Ni iyo phi itthu ikhumakhumihile citthu cotheene cootakhala ninooneehu ilelo ntuninyani.

Yonayeeli, wiira cikhale saana citthu cotheene cumpilyaawe, Yehova holakela ureeriha ncina nawe. Ni iyo Yehova noona ukhala itthu yofayita cinene. Phimaana uyo neeraawe: “Mi khweeliini kinaahala ureeriha ncina naka nuulupale.” (Ezek. 36:23) Ni Yesu hoonihera itthu ikhanle yofayita cinene nhina ulompa waaswali ookhuluvelya a Yehova ukati wenryaawe: “Ncina ninyu nireerihiye.” (Mat. 6:9) Ibiiblya inawuuluma ikwaha cinci ifayitaaya ureeriha ncina na Yehova. Moone ala matakiherwaala: “Munvahe Yehova uttitthimihiya wotheene unomphwanela nlattu wo ncina nawe.” (1 Ikor. 16:29; Isaa. 96:8) “Mwiipele ncipo ncina nawe noottitthimihiya.” (Isaa. 66:2) “Nittitthimihe ncina nawe mpaka.” (Isaa. 86:12) Ikwaha imoca mwaneene Yehova ahoolumaca nari wiirimu, amwaakhulaka Yesu nari u Yerusalemu ntempulu wenryaawe: “Paapa, nttitthimihe ncina ninyu.” Vano naheewiya ncu naakhuma wiirimu neeraka: “Mi kihottitthimiha ni kinaahala uttitthimiha-tho.”—Joau 12:28. a

Yoneeraru, itthu impheelaawe kinhala uhiya uvaranaca ni ncina nawe, awula wiireeriha. Muupuwele: Isiyani inhala wiirannya wiimaleloni ulumwenku, caviraka myaakha 1000 nohalaawe ulamulela Kristu? Niireke wiira apinaatamu ni malayikha khanhala uhiyerera ukhala ookawannyaaca nlattu wo ncina na Yehova? Wiira naakhule  ala makohwaala, nttwee nuupuwele citthu piili cinvaranaca nuukhuluvelya waapinaatamu ni ukhulupale wotheene. Niireke wiira caviraka myaakha miili apinaatamu anaahala upheela woonihera ukhuluvelya waya? Mena. Ayo anhala ukhala oottehiyeene ni anhala ukhala oohipahuwa ni anaahala waakhela ukumi woohimala. Waphiyaka uyo ukatyuuyo, niireke wiira nanlelo ukhulupale unhala ukhala woonyakuliheraniya, awula wookawannya? Mena. Atthu otheene watuninyani anaahala ukupaleela wiira ulamulela wa Yehova phiri womaana ni wosariya. Masi niireke wiira ncina na Yehova ninaahala ukhala itthu yootepa ukhalana ifayita?

Camalaka myaakha 1000, atthu otheene anaahala wiitthuca ikhweeli ca Yehova ni ncina nawe ninaahala ureerihiya. Masi ncina na Yehova khaninhala uhiya ukhala nofayita waapoovwaawe wiirimu ni watuninyani. Kontha isiyani? Kontha anaahala woona wiira Yehova khanhala uhiya upanka citthu comaana. Muupuwele ila: ukati Yesu unhalaawe unturuwela Yehova umwene, Nluku nohala “ukhala citthu cotheene ni waatthu otheene.” (1 Akor. 15:28) Wahoolo waya, apinaatamu watuninyani anaahala ulawa “utaphuwa womaana waasaana a Nluku”. (Aroo. 8:21) Ni wiimaleloni, Yehova naahala upanka itthu impheelaasaawe, ukhanle uthukumaniha citthu cotheene umpilyaawe wiirimu ni watuninyani khampa itthoko imoca yowiiwananiya.—Efesu 1:10.

Cakhumelelaka citthu cotheene nnyo, manannani amucyaawe Yehova wiirimu ni watuninyani anhalaaya wiicoona? Khweeliini, aanaahala woona isariyaaya yoorwaanela uhoolo unttottopela Yehova. Nasaalimu Davidi ahorumiya wantikha: “Oottottopeliya akhale Yehova Nluku . . . Wiira ncina nawe nowaarya nittottopeliye mpaka.” (Isaa. 72:18, 19) Mpaka uhoolo unrwaa, khaninhala uhiya ukhalana isariya cinci conttottopela Yehova.

Ncina na Yehova ninaamoonihera sana-saana makhalelwaawe. Ni noopuwelaka ncina nawe, ninawuupuwela nifento nawe. (1 Jo. 4:8) Hi ninaahala wuupuwela wiira Yehova numpile nlattu wonifento nawe, wiira uyo honoopola nlattu wonifento nawe ni uyo nolamulela niisariya ni nlattu wonifento nawe. Ni khaninhala uhiya woona nifento Yehova nirinaawe ni citthu cumpilyaawe. Mpaka uhoolo unrwaa, ninaahala ukhalana isariya yoohihiya umwaattamela Yehova ni wiipela icipo ncina nawe nowaarya.—Isaa. 73:28.