1. Isiyani atthunaka inhala unikavihera unicivela usoma inatiri co mbiiblyani?

 MMIRAWO mmoca neehaniya Ben heera: “Mi unaakicivela usoma inatiri co mbiiblyani.” Nyuuva nnaakupali? Awula nyuuva nnoona wiira usoma inatiri co mbiiblyani ikhanle itthu yoorika? Atthunaka nyuuva pooti woona nnyo inatirinnyo ukhala itthu yoonyoonya usoma, masi nyuuva mwapaceraka wiiweeha nlattuni Yehova rumilyaawe wantikhiya, pooti ukhalaka wiira nnaahala urukunusa moopuwelelweenyu.

2. Nhina ula mwahoola, ninhala wiitthucani?

² Ninaahala woona nhina ula mwahoola kontha isiyani ninlamuliyeehu usoma venci inatiri co mbiiblyani ni manannani ninlamuliyeehu usoma saana. Ciicammo, ninaahala woopela mwaha inatiri piili co nlivuruni ya Daniele ni kontha isiyani wiiweeha nnyo inatirinnyo unhalaaya unikavihera nenna co.

3. Isiyani ninlamuliyeehu upanka wiira niiweehe inatiri co mbiiblyani?

³ Napheelaka wiiweeha inatiri co mbiiblyani, nihaana nikaviheriyaka nintthu. Muupuwele ila itthwiila: Nyuuva nnopheela urwaa nipuro nhinatokweenyu uphiya, masi nyuuva nri nimpatthaniinyu nocuwela saana nno nipuronno. Uyo naacuwela nipuro nriceenyu ni nipuroni ninkhumelelaaya khula iphiro. Khweeliini, ukhalana mpatthani commo wanhala wuutteelihani nrima. Woolikanaca, Yehova nokhala khampa uyo mpatthannyuuyo. Yehova naacuwela sana-saana ukati uriihu ni itthu inhala ukhumelela wahoolo. Phimaana, napheelaka wiiweeha inatiri co mbiiblyani, nihaana wiiyeviha ni unlepela Yehova wiira anikavihere.—Dan. 2:28; 2 Pet. 1:19, 20.

4. Kontha isiyani Yehova rumilyaawe wantikhiya inatiri mbiiblyani? (Nwehe Jeremiya 29:11.) (Nwehe ciicammo ilatarato.)

 ⁴ Khampa ayari ampheelaaya wiira asaanaaya akhale saana, Yehova ciicammo nopheela wiira asaanaawe akhalane niweherero nomaana. (Nsome Jeremiya 29:11. b) Masi, woovirikana naayari apinaatamu, Yehova naacuwela itthu inhala wiirannya wahoolo, ni uyo khanootha. Phimaana, Yehova horuma wantikhiya inatiri mbiiblyani. Commo, hiiva pooti ucuwela citthu cofayita cinhala wiirannya wahoolo. (Isai. 46:10) Nnyo inatirinnyo cikhanle itthuvo Yehova inivahilyaawe. Masi ninhala ucuwela cani wiira inatiri co mbiiblyani cinaahala wiirannya khweeliini?

5. Isiyani mwiitthucenreenyu ntakihero na Max?

⁵ Ucikolani, amiraweehu anrukureeriya naatthu anhisimu vakaani awula ahinhisimu Ibiiblya. Itthu ayo atthwaayo cinoolumaaya pooti waaphwanyiha makoho menci amirawo makristau. Moone itthu yaamwiirannyenle munna mmoca neehaniya Max. Uyo heera: “Kaaryaaka mmirawo, mi kahopacera wiikoha wakhala wiira asipaapaaka yaakiitthuciha ittiini yeekhweeli awula wakhala wiira Ibiiblya khweeliini yaarina moolumo a Nluku.” Isiyani asithumwaane Max yaapankilyaaya? Uyo naattonka: “Ayo yahowiira umaala, masi mi kinaacuwela wiira wanrimani waya yahokhala niiwasiwaasi.” Asithumwaane Max yaahomwaakhula makoho otheene yaarinaawe. Ni Max ahopanka mphanttyaawe. Uyo heera: “Mi kahosomasoma inatiri co mbiiblyani ni kahowoopana mwaha amirawo akhwaawe.” Vano yeerannyeele isiyani? Max heera: “Vano mi akaarina-tho makoho; kahokupaleeha wiira Ibiiblya inhimya moolumo a Nluku!”

6. Isiyani inlamuliyeenyu upanka mwakhalanaka makoho ni kontha isiyani?

⁶ Wakhalaka wiira nyuuva inaawiirannyeelani itthu khampa Max, mpaceraka wiikoha wakhala wiira itthu inhimyaaya Ibiiblya ikhanle ikhweeli, nhikhale nimasukhuli. Masi nhaana upanka itthu, kontha ukhalana makoho ni woohaavya waakhuliya waya unkhala khampa nrenci. Nrenci naahiwehaweheke ni waviraka ukati mwinci pooti utankanya itthu yofayita. Wiira mmalamalihe “nrenci” awula makoho atthunaka anhala umalamaliha waamini winyu, nyuuva nhaana wiikoha co: ‘Kiireke mi kinaakupali citthu coohoolo cinhimyaaya Ibiiblya?’ Wakhala wiira nyuuva khannokupaleeha, nhaana usoma inatiri co mbiiblyani ciirannyeele. Masi manannani nyuuva nnohaleenyu usoma nnyo inatirinnyo?

7. Isiyani yankavihenre Daniele usoma inatiri co mbiiblyani? (Nwehe Daniele 12:10.) (Nwehe ciicammo ilatarato.)

⁷ Daniele honihiyera ntakihero nomaana nomananna oosoma inatiri. Uyo aasoma inatiri nlattu woopheela ucuwela ikhweeli ca Nluku. Daniele ciicammo aari nlopwana owiiyeviha. Uyo ancuwela wiira Yehova paahi phaahala unkavihera wiiweeha inatiri co mbiiblyani amphiyeeraka ni amwiiwelelaka. (Dan. 2:27, 28; nsome Daniele 12:10. c) Ni itthu Daniele yoonihenre wiira khweeliini uyo aari nlopwana owiiyeviha ukhalaka wiira  ahonkhuluvela Yehova. (Dan. 2:18) Daniele ciicammo ansoma sana-saana woohiitthaala. Uyo antotha sana-saana myaha caasomaawe nhina miphantte co mbiiblyani caarivo ule ukatyuule. (Jer. 25:11, 12; Dan. 9:2) Vano manannani ninhaleehu untakiha Daniele?

8. Kontha isiyani atthu akiina khantthuna ukupali inatiri co mbiiblyani ni isiyani impheelaaya?

⁸ Muupuwele nlattuni nnosomeenyu. Nsome nlattu woopheela wiitthuca. Nyuuva nnosoma inatiri co mbiiblyani kontha nnopheela ucuwela ikhweeli? Paahi, Yehova naahala wuukaviherani. (Joau 4:23, 24; 14:16, 17) Masi atthu akiina ansoma inatiri co mbiiblyani yapheelaka citthu cikiina. Atthu akiina ansoma inatiri co mbiiblyani kontha ampheela woonihera wiira Ibiiblya khaanakhala moolumo a Nluku. Ayo atthwaayo anoopuwela co: ‘Wakhala wiira Ibiiblya khanakhala moolumo a Nluku, paahi akinlamuliya weettela inhimyaaya ni pooti wanthanlaaya veekha caka isiyani ikhanle yomaana ni yootakhala.’ Phimaana, nihaana nisomaka Ibiiblya nipheelaka ucuwela ikhweeli. Ihaavo ikhalelo yomaana inlamuliyeehu woonihera wiira niiweehe saana inatiri co mbiiblyani. Ikhaleloni?

9. Ikhaleloni ninlamuliyeehu uthoonyihera wiira niiweehe inatiri co mbiiblyani? Nttonkace.

⁹ Mwiiyevihe. Yehova nankavihera ntthu owiiyeviha. (Tiya. 4:6) Phimaana, nihaana ulompa nilepelaka ukaviheriya ni Yehova napheelaka wiiweeha inatiri co mbiiblyani. Ciicammo, nihaana nikhalaka owiiyeviha wiira nitthune ukaviheriya niipottha yookhuluvelya, kontha iyo phi ikhurupu yo mayamunna Yehova novarelaawe nteko wiira anivahe iyoolya yo mminepa ukati umpheeleehu. (Luka 12:42) Yehova khanakhala Nluku oohithotokaniha citthu cawe. Phimaana, novarela nteko ikhurupu imoca paahi wiira anikavihere wiiweeha saana ikhweeli co mbiiblyani.—1 Akor. 14:33; Efesu 4:4-6.

10. Mwiitthucenre isiyani ntakihero naanuunu Esther?

¹⁰ Nsome sana-saana woohiitthaala. Nthanle inatiri imoca nyuuva inoocivelani ni ntothe ucuwela saana. Iyo phi itthu anuunu aneehaniya Esther ipankilyaaya. Ayo yaapheela ucuwela saana inatiri inooluma uwa wa Mesiya. Ayo anaattonka: “Ukati waarinaaka myaakha 15, mi kaapheela ucuwela wakhala wiira inatiri caamuuluma Yesu cantikhiye hinaaya uyariya. Vano, mi kahopacera utotha mwahooyo. Usoma waka mwaha wooluma iroolu caaphwanyiye u Mar Morto, mi kahoona wiira citthu cinci cantikhiye khalayi, Yesu hinayarya. Phimaana, mi kinaakupali wiira nnyo inatirinnyo Nluku phirumile wantikhiya. Uhookhalaru wiira mi kahaana kituruwelacaka usoma mwaha mmocaaru ikwaha cinci wiira kiiweehe, nna co kinaakupaleeha wiira itthu inhimyaaya Ibiiblya ikhanle ikhweeli.” Anuunu Esther usoma waya inatiri cinci co mbiiblyani, unawaatteela nrima woona wiira phataari wiikurumicilyaaya.

11. Kontha isiyani ikhanlyaaya itthu yofayita ukupali mwaaneeneehu wiira Ibiiblya ikhanle ikhweeli?

¹¹ Noonaka mananna ciirannyeelyaaya inatiri cikiina co mbiiblyani, hi ninaatepa unkhuluvela Yehova ni ukhuluvela ikano nonivahaawe. Uhiya commo, inatiri cinaanikavihera ulipihaca niweherero nihu noohoolo, hataa ukhalaka wiira nna co ninawaanana masakha. Vano, nttwee noopele mwaha woohipica inatiri piili antikhilyaawe Daniele cineerannya mahukweehwaala. Wiiweeha nnyo inatirinnyo unaahala unikavihera ulakela upanka citthu comaana.

12. Manyaa oyuuma ootakaniheriya uloko antaphulela isiyani? (Nwehe Daniele 2:41-43.)

¹² Nsome Daniele 2:41-43. d Nhina itthu yaalohilyaawe mwene Nabukodonosor yaataphulenlyaawe Daniele, manyaawe ttonttooyo yaapankiye “niiyuuma yootakaniheriya uloko wowoolwa”. Ulattaniha wihu iyo inatiriiyo niiveerusu cikiina nlivuruni ya Daniele ni Apokalipise, nihoona wiira manyaayo anlattaniheriya niikuvernu yo u Estados Unidos ni yo Grã-Bretanha. Nnyo ilapo piilinnyo cinvara nteko nkhayi ni cihokhala cokuru ntuninyani motheene. Aacaka nnyo ilaponnyo, Daniele heera wiira ‘uyo umwennyooyo waahala ukhala mphantte nkiinooyo woolipa ni nkiinooyo woohilipa’. Masi nlattuni mphantte nkiinooyo waahala ukhala woohilipa? Kontha atthwaayo, anlattaniheriya nuuloko wowoolwaayo, anaarikihela iyo ikuvernwiiyo ukhala yoolipa khampa iyuuma. e

13. Ikhweelini cofayita cineetthuceehu niiyo inatiriiyo?

¹³ Hi pooti wiitthucera ikhweeli cofayita venci inatiri yo ttontto Daniele itaphulenlyaawe, venci-venci metto cawe uyo ttonttooyo. Wootakihera, ninawiitthuca wiira ikuvernu yo ntuninyani ineehaniya Anglo-Americana inawoonihera ikuru caya nimananna oovirikana. Wootakihera, ikuvernu yo Estados Unidos ni yo Grã-Bretanha caari nhina ilapo citthemile ikhotto yoopacera yo ntuninyani ni ikhotto yonayeeli. Masi nnyo ilaponnyo cinvira citepaka ulolovaca. Ni iyo phi itthu inhala wiirannya mpaka uhoolo unkeleehu, kontha atthwaayo anaavira yatepaka uhiiwanana ni uhaacivela mananna nnyo ikuvernunnyo cinlamulelaaya. Ikhweeli ikiina ineetthuceehu ukhalaka wiira iyo ikuvernu yo ntuninyaniiyo ikhanle yoomalela ni phinhala uphwanyiya ilamulelaka ukati Umwene wa Nluku unhalaaya umalamaliha ikuvernu caapinaatamu. Ilapo cikiina cinaamananiha utthema iyo ikuvernu yo ntuninyaniiyo, masi nnyo khacinhala ukhitiri. Kontha iyo ikuvernwiiyo inhala utankanyiya nuumwene wa Nluku, unlattaaniheriya ninluku ninpwesa manyaa o ttontto. Ayo manyaayo phinlattaniheriya niikuvernu yo ntuninyani ineehaniya Anglo-Americana.—Dan. 2:34, 35, 44, 45.

14. Wiiweeha inatiri yo manyaa oyuuma ootakaniheriya uloko unnikavihera cani ulakela upanka citthu comaana?

¹⁴ Nyuuva nnaakupaleeha wiira inatiri ya Daniele inooluma manyaa oyuuma ni ooloko ilelo inawiirannya? Wakhalaka wiira nnaakupali, iyo inaahala wuukaviherani urukunusa makhalelweenyu. Nyuuva khannohala utotha ukhalana maali awula ukhalana citthu cinci kontha nyuuva nnaacuwela wiira ila ituninya yoohilokeela inaahala umalamalihiya woohipica. (Luka 12:16-21; 1 Jo. 2:15-17) Iyo inatiriiyo ciicammo inaahala wuukaviherani woona wiira ikhanle itthu yofayita ulalyeera ni waasomiha atthu Ibiiblya. (Mat. 6:33; 28:18-20) Mwasomaka ila inatiriila, pooti wiikoha co: ‘Citthu cinlakelaaka upanka cinawoonihera wiira kinaakupali wiira uhanle vakaani uphiya ukati Umwene wa Nluku unhalaaya ukwanyulaca ikuvernu caapinaatamu?’

15. Tipani khanle “mwene ooculu ilapo” ni “mwene oohitto ilapo” ilelo? (Nwehe Daniele 11:40.)

¹⁵ Nsome Daniele 11:40. f Ikapitulu 11 ya Daniele inaawuuluma mamwene meeli, awula  anasiyaasa anaanelana ukhulupale. Nalattanihaka iyo inatiriiyo niinatiri cikiina co mbiiblyani, ninaakhiri woona wiira “mwene ooculu ilapo” ikhanle ikuvernu yo Rússia ni ikuvernu cinkavihera iyo ilapweeyo, ni “mwene oohitto ilapo” ikhanle ikuvernu yo ntuninyani ineehaniya Anglo-Americana. g

16. Isiyani mwene “mwene ooculu ilapo” inaapankaawe apoovu a Nluku?

¹⁶ Apoovu a Nluku ankhala ilapo inlamulelaawe “mwene ooculu ilapo” anaalupatthiya cinene. Mayamunna ni mayanuunu akiina ahaattakaciya ni ahotthukiya nlattu wo waamini waya. Masi uhiya ulolovaca nlattu woolupatthiya, ayo anawiira ulipihaca waamini waya. Kontha isiyani? Ayo anaacuwela wiira iyo itthwiiyo inawiirannyeeha inatiri cinci co nlivuruni ya Daniele. h (Dan. 11:41) Ucuwela iyo, pooti unikavihera ulipihaca niweherero nihu ni uhihiyerera unvaresesa Yehova.

17. Marikarikoni ankhalanaaya apoovu a Nluku ankhala ilapo cinhoolelaawe “mwene oohitto ilapo”?

¹⁷ Khalayi, “mwene oohitto ilapo” ciicammo  ahaalupattha apoovu a Yehova. Ukati wokhotto yo ntuninyani motheene coopiili, mayamunna enci yahotthukeliya ni asaanaaya yahoomolaciya mmacikolani nlattu woohitthuna wiikelakeliha isiyaasa. Masi ilelo, mananna “mwene oohitto ilapo” cinttehaawe waamini wa apoovu a Nluku ikwaha cinci ankhala oohicuwannya. Wootakihera, ukati wo kampaanya yo mwaathanle, nkristau wanrimani waweva atthunaka nawiicoona ukurumiciya uthanla ipartiitu awula unthanla ntthu omphwanela uvotariya. Ninaacuwela wiira uyo khanhala urwaa uvotari, masi mmuru wawe ni wanrimani wawe pooti uthanla ipartiitu awula unthanla nhooleli. Masi wiira nihiikelakelihe nnyo citthunnyo, nihaana niwehawehaka saana moopuwelelweehu!—Joau 15:18, 19; 18:36.

18. Nineecoona cani namoonaka “mwene ooculu ilapo” akakhanacaka ni “mwene oohitto ilapo”? (Nwehe ciicammo ilatarato.)

¹⁸ Ale ahinkupali inatiri co mbiiblyani pooti ukhala nimasukhuli yamoonaka “mwene oohitto ilapo” ‘akakhanacaka’ ni “mwene ooculu ilapo.” (Dan. 11:40.) Ooyeeli caya ahaana ikaputthi cuulupale cinkhitiri umalamaliha ukumi wotheene watuninyani. Masi hiiva ninaacuwela wiira Yehova khanhala uhiya yiirannyaaka iyo itthwiiyo. (Isai. 45:18) Hi khaninkhala niiwasiwaasi niitthu inhala wiirannya wahoolo. Uhiya commo, ukakhanaca wa “mwene ooculu ilapo” ni “oohitto ilapo” unaalipihaca waamini wihu. Iyo itthwiiyo inaanoonihera wiira niri wiimaleloni ulumwenku.

19. Isiyani inlamuliyeehu wuupuwela nhina inatiri co mbiiblyani?

¹⁹ Hi khanincuwela mananna inatiri cikhwaawe cinhalaaya wiirannya. Hataa Daniele khaacuwela saana itthu yaahimyaaya inatiri cantikhilyaawe. (Dan. 12:8, 9) Masi uhicuwela mananna cinhalaaya wiirannya inatiri khunthoonyera wiira nnyo inatirinnyo khacinhala wiirannya. Pooti wankupaliihu wiira Yehova naahala unikavihera ucuwela itthu nopheelaawe wiira hiiva nicuwele, khampa caapankilyaawe khalayi.—Amos 3:7.

20. Inatirini cinhala wiirannya woohipica ni isiyani inlamuliyeehu uhihiyerera upanka?

²⁰ Ukhuweliya wo “nnema ni mpuha” unaahala wiirannya. (1 Atesal. 5:3) Wahoolo waya, ikuvernu caanasiyaasa co ntuninyani motheene cinaahala urukunuwela ittiini cowootha. (Apoka. 17:16, 17) Vano cinaahala waatuphela apoovu a Nluku. (Ezek. 38:18, 19) Iyo itthwiiyo inhala umalela ukhottoni yo Harmacetom. (Apoka. 16:14, 16) Nikupali wiira nnyo citthunnyo cinaahala wiirannya woohipica. Niwehereraka wiirannya, nttwee noonihere waasukhuru Apaapeehu, nisomaka sana-saana inatiri co mbiiblyani ni naakaviheraka akhwiihu upanka itthu imocaaru.