1. Kontha isiyani ababilooniya wantikhinacilyaaya porofeeta Daniele?

 POROFEETA Daniele aari mmirawo ukati waakusiyaawe naababilooniya wiira atthukeliye uttayi niilapo yoowannyawe, u Yerusalemu. Uyo aahookhalaru mmirawo, ahaatikhiniha ahooleli o Babilooniya. Ayo yahoona wiira Daniele aari “ntthu omaana, ooreera” ni wiira amucyaawe yaari atthu yaahisimiya. (1 Sam. 16:7) Phimaana, ababilooniya waapheelaaya umwiitthuciha makhalelo o Babilooniya wiira avare nteko uwannyaya amwene.—Dan. 1:3, 4, 6.

2. Yehova anwehera cani Daniele? (Nwehe Ezekiyeli 14:14.)

² Yehova aananfenta Daniele kahi nlattu wooreera awula nlattu woovara nteko uwannyaya amwene, masi Yehova anfenta Daniele nlattu wo makhalelo yaathanlalyaawe ukhalana. Uyo atthunaka aarina myaakha 20 niitthwaaya ukati Yehova waamwiirenlyaawe wiira anlikanaca ni Nowee ciicammo ni Jó. Yehova aamoona ukhala nasariya khampa Nowee ni Jó, alopwana yanvarenle nteko uyova myaakha cinci. (Upha. 5:32; 6:9, 10; Jó 42:16, 17; nsome Ezekiyeli 14:14. b) Daniele ahokhala myaakha cinci answalelaka Yehova. Ni Yehova ahonfenta myaakha cotheenennyo.—Dan. 10:11, 19.

3. Ninhala wiitthucani nhina ula mwahoola?

³ Nhina ula mwahoola, ninaahala woona makhalelo meeli yaamwiirihile Yehova umoona Daniele ukhalana ifayita. Woopacera, ninaahala woopela mwaha ayo makhalelwaayo ni woona ukatini Daniele oonihenryaawe. Ninaahala woona ciicammo isiyani yankavihenre ulipihaca ayo makhalelwaayo. Ni woomalela, ninaahala woona mananna ninlamuliyeehu untakiha. Uhookhalaru wiira ula mwahoola utthenkaciye yuupuweliyaka amirawo, otheene cihu pooti waneetthucereehu ntakihero na Daniele.

4. Manannani Daniele oonihenryaawe ulipa nrima? Ntaphulele.

⁴ Atthu oolipa nrima pooti woova, masi khanhiya upanka itthu yomaana nlattu wowoova. Daniele aari mmirawo oolipa nrima cinene. Nttwee noopele mwaha ikwaha piili oonihenryaawe ulipa nrima. Ikwaha yoopacera, waari cinavinreene myaakha miili ababilooniya anakwanyulacile isittatti yo Yerusalemu. Mwene Nabukodonosor, o Babilooniya, aholoha itthu yowoopiha. Muulohani wawe, uyo ahomoona ttontto muulupale. Uyo aholakela uwiivakaca acuwelaci otheene hataa ni Daniele, wakhalaka wiira khayaahala ukhitiri uhimyaca itthu yaalohilyaawe ni utaphulela maanaaya isiyani. (Dan. 2:3-5) Daniele ahaana apankaka itthu wowaakuvya, kontha atthu enci yanhala wiiviya. Uyo ahorwaa “uwuulumana amwene ni ahaalepela unvaha ukati wiira ahimyace itthu yaalohilyaaya ni wiira ataphulele maanaaya isiyani.” (Dan. 2:16) Ule ukatyuule, uyo ahaana alipaka nrima ni waamini. Ibiiblya khinhimya wiira uyo ahopaca utaphulela citthu coolohiya. Vano, Daniele ahaalepela asipatthannyaawe Sadraki, Mesaki ni Apeteneku wiira “anlompe Nluku owiirimu wiira uyo awoonihere uthunku ni aakavihere ucuwelela iyo isiiriiyo.” (Dan. 2:18) Yehova ahaakhula ayo mavekelwaayo. Akaviheriyaka ni Nluku, Daniele ahokhitiri utaphulela itthu yaalohilyaawe mwene Nabukodonosor. Ukumi wa Daniele, waasipatthannyaawe ni waacuwelaci akiinaayo waahokhikiceriya.

5. Ukatini-tho nkiina Daniele woonihenryaawe ulipa nrima?

⁵ Unavinreene ukati vakaani Daniele nataphulenleene itthu yaalohilyaaya amwene, ulipa wawe nrima wahottehiya-tho. Nabukodonosor aholoha-tho itthu yowoopiha. Alohaka, uyo ahoona mwiri muulupale. Daniele aholipa nrima ni ahaataphulela amwene itthu yaahimyaaya itthu yaalohilyaaya, ni mpaka ciicammo ahaahimyera wiira ayo yanhala uvahuwa ni yanhala uviriha ukati woohilamulela. (Dan. 4:25) Amwene pooti waahalaaya wuupuwela wiira Daniele aari mwiinannyaaya ni uruma wiira eeviye. Masi Daniele aholipa nrima ni ahotaphulela itthu yaalohilyaaya hataa woopihaka uyova wiiviya.

6. Isiyani atthunaka yankavihenre Daniele ulipa nrima?

⁶ Isiyani atthunaka yankavihenre Daniele woonihera ulipa nrima muukumini wawe? Ukati waaryaawe mmirawo, uyo aheetthucera ntakihero nomaana naathumwaane ni naanumwaane. Ayo yaanawiiwelela malakihero Yehova yaavahilyaawe asarayeli, wiira ayari ahaana awiitthucihaka asaanaaya moolumo a Nluku. (Deut. 6:6-9) Daniele  aanaacuwela malamulo khuumi, ni malamulo makiina, toko itthu nsarayeli yaalamuliyaawe ulya awula uhilya. c (Lev. 11:4-8; Dan. 1:8, 11-13) Daniele ciicammo aheetthuca ihantisi yaapoovu a Nluku ni uyo ancuwela itthu yaakhumelela apoovu yaahiiweleleke malamulo a Yehova. (Dan. 9:10, 11) Daniele cahonkhumelela citthu cinci caamwiirihile woona wiira hataa inkhumelelaka isiyani, Yehova ni malayikhaawe okuru yanhala unkavihera.—Dan. 2:19-24; 10:12, 18, 19.

7. Isiyani-tho yankavihenre Daniele woonihera ulipa nrima? (Nwehe ciicammo ilatarato.)

⁷ Daniele ansoma inatiri cantikhiye, uhela nhina inatiri cantikhilyaawe Jeremiya. Nlattu woosoma wawe, uyo ahokupali wiira ukati ayuuta waahalaaya uviriha anari u Babilooniya waahanle vakaani umala. (Dan. 9:2) Woona inatiri ciirannyaaka, khweeliini wahonlipihaca Daniele wiira atepe unkhuluvela Yehova. Ni ule nonkhuluvela Nluku ninrimaawe wotheene naakhitiri woonihera ulipa nrima cinene. (Nwehe ciicammo Arooma 8:31, 32, 37-39.) Itthu yofayita cinene Daniele yaapankaawe waari waalompa Athumwaane o wiirimu, Yehova. (Dan. 6:10) Uyo anlepela uleveleliya ni anhimya mananna ceecoonaawe. Uyo anlepela ukaviheriya. (Dan. 9:4, 5, 19) Daniele aari ntthu toko hiiva, phimaana uyo khaayariye alipaka nrima. Masi uyo aakhitinri ulipa nrima nlattu woosoma Nuulumo na Nluku, ulompa ni unkhuluvela Yehova.

8. Manannani ninhaleehu ukhala atthu oolipa nrima?

⁸ Isiyani inlamuliyeehu upanka wiira nikhale atthu oolipa nrima? Asipaapeehu pooti uniirela wiira nikhale atthu oolipa nrima, masi ulipa nrima khinakhala itthu invahaniya ntthu nimwanawe khampa ilatta. Ulipa nrima unaalikanaca nuwiitthuca uvara nteko wonaanaano. Inanna imoca yowiitthuca uvara nteko wonaanaano ukhanle unweheeha ntthu noorya uyo ntekooyo ni untakiha. Inanna imocaaru, hiiva pooti wiitthuca ukhala atthu oolipa nrima naaweheehaka ale anoonihera ulipa nrima ni naatakihaka. Phimaana, ntakihero na Daniele pooti uniitthuciha ukhala atthu oolipa nrima. Khampa uyo, nihaana nicuwelaka saana Nuulumo na Nluku. Ciicammo, nihaana nikhalanaka upatthani woolipa ni Yehova ni uhihiya umuulumana ninrimeehu wotheene. Nihaana ciicammo ninkhuluvelaka Yehova, nikupaleelaka wiira uyo khanhala uhiya unikavihera. Commo, waamini wihu wattehiyaka, ninaahala woonihera ulipa nrima.

9. Kontha isiyani ikhanlyaaya itthu yomaana hiiva woonihera ulipa nrima?

⁹ Ulipa nrima pooti unikavihera nimananna oovirikana. Moone itthu yaamwiirannyenle Ben. Ucikolani wawe u Alemanha, atthu enci khayaakupali itthu inhimyaaya Ibiiblya wiira citthu cirivo cihowumpiya ni Nluku. Ikwaha imoca, Ben ahokhalana ukati wohimyaca nsaala wawe nlattuni uyo waakupalyaawe wiira citthu cotheene cihowumpiya. Uyo aholipa nrima ni ahaahimerya atthu otheene itthu yaaminnyaawe. Vano isiyani yeerannyeele? Ben naattonka: “Apurusooraaka yaheewelela sana-saana ni ayo yahokusa makhanta yaavarenlyaaka nteko wiira kitaphulele, yahokumiha ikoopiya cinci ni yahaakawela anacikola otheene nsaalammo.” Itthu yankhumelenle Ben inawoonihera wiira, ikwaha cinci, atthu oolipa nrima aanaahisimiya naatthu enci. Nwo ulipa nrimanwo unawaakavihera atthu enci upheela unswalela Yehova. Khweeliini, hi nihaana isariya yoopheela ukhala atthu oolipa nrima.

10. Uvaresesa inkhala isiyani?

¹⁰ Mbiiblyani, nuulumo noluuka iheperewu nintaphuleliya “uvaresesa” awula “nifento noovaresesa”  ninaaca uciveliya cinene nintthu ni ulakela uhinhiya uyo ntthuuyo. Ikwaha cinci ninoolumiya yapheelaka uhimiya mananna Yehova naafentaawe aswalyaawe. Ciicammo, nno nuulumonno ninawuulumiya yapheelaka waaciya mananna aswali a Nluku cinfentanaaya. (2 Sam. 22:26) Nuuwakatyaaya, unvaresesa wihu Yehova pooti ukhala woolipa. Iyo phi itthu yaamwiirannyenle porofeeta Daniele.

11. Ukati Daniele wooluvanlyaawe, isiyani yaahala unrikihela unvaresesa Yehova? (Nwehe ciicammo ilatarato.)

¹¹ Daniele cahonkhumelela citthu cinci caahala unrikihela unvaresesa Yehova. Masi itthu yuulupale yaahala unrikihela unvaresesa Yehova yaakhumelenle ukati waarinaawe myaakha 90. Uyo ukatyuuyo, isittatti yo Babilooniya yahokusiya naatthu o Média ni o Persiya, ni ahancera ulamulela mwene Dariyu. Anantekwaawe uyo mwennyooyo khaacivela Daniele ni khayanhisima Yehova. Vano, ayo yaholakela upanka itthu wiira Daniele eeviye. Ayo yahowiiriha amwene wantikha nlamulo naateeliha uswaleliya anluku akiina awula ntthu nkiina ahikhanle paahi amwene. Itthu Daniele yeereliyaawe wiira apanke waari uviriha mahuku 30 woohinlompa Yehova. Apankaka commo, uyo anhala ukhuluveliya naamwene ni khaahala uphwanyihiya masakha. Masi Daniele ahokhotta weettela nno nlamulonno. Ni nlattu wookhotta, ahovonyeriya munlittini naakharamu. Masi Yehova ahontthuvela Daniele nlattu wonvaresesa wawe ni ahomoopola wiira hikhuuriye naakharamu. (Dan. 6:12-15, 20-22) Manannani hiiva ninlamuliyeehu unvaresesa Yehova khampa Daniele?

12. Isiyani Daniele yaapankilyaawe wiira anvaresese Yehova?

¹² Khampa noonileehu, wiira ninvaresese Yehova, hi nihaana ninfentaka cinene. Daniele aakhitinri uhihiya unvaresa Yehova kontha aananfenta cinene ninrimaawe wotheene. Khweeliini, itthu yankavihenre unfenta cinene Yehova waari wuupuwela makhalelo omaana a Yehova ni wuupuwela mananna uyo cinooniheraawe ayo makhalelwaayo. (Dan. 9:4) Daniele ciicammo anviriha ukati oopuwelaka citthu Yehova campankenlyaawe uyova ni apoovwaawe khalayi. Ni uyo ansukhuru nlattu wo nnyo citthunnyo.—Dan. 2:20-23; 9:15, 16.

13. a) Manannani anttehiyaaya amirawo? Ntakihere. (Nwehe ciicammo ilatarato.) b) Toko cinthoonyiheraaya ividiyu, mwaahala waakhula cani ntthu ookohakani wiira Masaahiti a Yehova anoonela cani uthelanaca alopwanaru awula athiyanaru?

¹³ Khampa Daniele, amirawo anonswalela Yehova ahoorukureeriya naatthu ahinonswalela  Yehova ni ahinhisimu malamulwaawe. Atthu akiina atthunaka khunaacivela ntthu eeraka wiira nanfenta Nluku ni nopheela utthara malamulwaawe. Atthu akiina anawaatarawaca amiraweehu wiira ahiye unvaresesa Yehova. Wootakihera, moone itthu yankhumelenle mmirawo mmoca neehaniya Graeme, nokhala u Austrália. Waaryaawe ucikolani, uyo ahaanana marikariko. Apurusora yaahaakoha anacikola isiyani yaahalaaya upanka unari wiira mpwanaaya haahimerya wiira uyova hoona wiira naaciveliya naalopwana akhunanawe ni holakela wiithoonya wiira khanle ntthu unoncivela uruparupa alopwanaru. Apurusora yaheera wiira ale yaahala unkurumica mpwanaaya uruparupa alopwanaru yeemele ni arwee mphantte mmoca ni ale yahaahala unkurumica mpwanaaya upanka iyo itthwiiyo arwee mphantte nkiina. Graeme heera: “Atthu otheene nsaala yahorwaa mphantte waale yaahala unkurumica mpwanaaya uruparupa alopwanaru; kaahanle mi ni mwaamunnaka paahi.” Itthu yeerannyeele wahoolo waya yahoonihera wiira iyo itthwiiyo yahaarikihile unvaresesa Yehova. Uyo heera: “Mpaka iwoora naakhumileehu, anacikola otheene ni hataa ciicammo apurusooraayo khayaahiyerera uniruwana. Mi kaheekurumica wiira kaakihere itthu yaaminnyaaka nimananna omaana, masi ayo khayeewile hataa nuulumo nimoca koolumilyaaka.” Manannani Graeme ceeconilyaawe uttehiya waya unvaresesa wawe Yehova? Uyo heera: “Mi khawaakicivenle uveehiya, masi wahokitteela nrima kontha kahokhitiri waakihera itthu inaaminnyaaka ni uhihiya unvaresesa Yehova.” d

14. Isiyani inhala unikavihera uhihiya unvaresesa Yehova?

¹⁴ Khampa Daniele, nanfentaka Yehova, ninaahala wiikurumica wiira nihihiye unvaresesa. Ni unfenta wihu unhala ulipa nasomaka makhalelwaawe. Wootakihera, pooti wansomeehu citthu cumpilyaawe. (Aroo. 1:20) Wiira muncerere unfenta winyu ni unhisima winyu, nyuuva pooti usoma myaha coottharana cineera “Será Que Houve Um Projeto?” awula woona ividiyu caya nnyo myahannyo. Nyuuva ciicammo pooti usoma ibroxura “Será Que a Vida Teve Um Criador?” ni “A Origem da Vida — Cinco Perguntas Que Merecem Resposta”. Moone itthu mmirawo mmoca mwanthiyana neehaniya Esther, o Dinamarca, ihimilyaawe aacaka nnyo ibroxurannyo: “Nnyo ibroxurannyo cinaataphulela citthunnyo niisariya. Nnyo khacinooluma citthu weeva cinlamuliyaa waamini paahi woohicuwelela nlattuni; masi nnyo cinaaca uhimya ikhweeli ni wuuhiya weeva ulakela veekhacaa.” Ben romoliye wiipaceroni, heera: “Nnyo myahannyo cihokikavihera ulipihaca waamini waka ni cihokikavihera ukupaleeha wiira Nluku phumpile ukumi.” Mwasomaka nnyo myahannyo khweeliini nnaahala ukupaleela itthu inhimyaaya Ibiiblya, wiira waya co: “Thi weeva Yehova Nlukwiihu, unoophwanela uttitthimihiya, uhisimiya ni ukhalana ikuru, kontha uhumpa citthu cotheene ni nlattu wawaa cihokhumelela ni cihumpiya.”—Apoka. 4:11. e

15. Manannani makiina ninlamuliyeehu ulipihaca upatthaniihu ni Yehova?

¹⁵ Mananna makiina oopheela wuncerera unfenta winyu Yehova ukhanle usoma makhalelo a mwanawe, Yesu. Mmirawo mwanthiyana mmoca o Alemanha, neehaniya Samira, hopanka iyo itthwiiyo. Uyo heera: “Mi kincuwenle Yehova saana nlattu woosoma makhalelo a Yesu.” Samira waaryaawe mwaana waananrika ucuwelela unkhitirya cani Yehova untteela awula unriipa nrima. Masi uyo aanancuwela Yesu ni aanaacuwela wiira uyo waanantteelaka ni waananriipaka nrima. Samira heera: “Mi ahancera ukicivela Yesu kontha uyo anaawacera saana ni aanaafenta asaana”. Ukati Samira waaviraawe anfentaka Yesu, antepa ciicammo unfenta Yehova. Kontha isiyani?  Uyo neera: “Nuukatyaaya mi kahoona wiira Yesu nawaatakiha Athumwaane sana-saana. Ayo akhanle oolattana venci cinene. Ni mi kahoona wiira itthu ikiina yaamwiirihile Yehova unveleeliha Yesu watuninyani, waari upheela wiira apinaatamu awehe makhalelo a Yesu ni nlattu wo woona ayo makhalelwaayo ancuwele saana Yehova.” (Joau 14:9) Nyuuva mwapheelaka ulipihaca upatthaniinyu ni Yehova, nnoonela cani usoma makhalelo a Yesu? Nyuuva mwapankaka iyo itthwiiyo unvaresesa winyu Yehova ni unfenta winyu unaahala winciva.

16. Kontha isiyani ninlamuliyeehu unvaresesa Yehova? (Nwehe Isaalimu 18:25; Mikeya 6:8.)

¹⁶ Atthu owaavaresesa akhunanaya ciicammo anaakhalana apatthani owaavaresesa ayova. (Ruti 1:14-17) Uhiya commo, nanvaresesaka Yehova, hiiva ninaakhalana nnema wanrimani wihu. Kontha isiyani? Kontha Yehova naakhuluveliha wiira naahala unvaresesa ule nohala unvaresesa uyova. (Nsome Isaalimu 18:25; Mikeya 6:8. f) Muupuwele ila itthwiila: hiiva nikhanle atthu ooyevaca neelattaanihaka ni Yehova khanle Mpattusiihu ni Nakuru-Cotheene. Hataa ukhalaka commo, uyo naanikhuluveliha wiira khanhala uhiya unifenta! Ni nakhalanaka upatthani woolipa ni Yehova, khiivo nanka itthu inhala unimwalaniha nuuyova, akhale marikarikoni, awananiihu awula ukhwa. (Dan. 12:13; Luka 20:37, 38; Aroo. 8:38, 39) Phimaana ikhanlyaaya itthu yofayita cinene hiiva untakiha Daniele ni unvaresesa Yehova!

17-18. Isiyani-tho ninlamuliyeehu umwiitthucera Daniele?

¹⁷ Nhina ula mwahoola, hi nihoona makhalelo meeli paahi a Daniele. Masi ahaavo makiina hiiva ninlamuliyeehu umwiitthucera. Wootakihera, Yehova ahomwiiriha Daniele ukhalana iwooni cinci ni uyo ahonvaha ucuwelaca wiira akhitiri utaphulela citthu coolohiya caathoonyera inatiri ca Nluku. Nnyo inatirinnyo, cinci ciheerannya. Cikiina cinooluma itthu inhala wiirannya wahoolo inhala waaphwanya apinaatamu otheene watuninyani.

¹⁸ Nhina mwaha unttharana nuula, ninaahala wuuluma sana-saana inatiri piili ca Daniele. Wiiweeha nnyo inatirinnyo pooti unikavihera otheene cihu ulakela upanka citthu comaana nenna co, hataa nikhalaka atthu oolupale awula amirawo. Nnyo inatirinnyo ciicammo cinaahala wuncerera ulipa wihu nrima ni unvaresesa wihu Yehova wiira nikhale owiitthenkaceene wiira nakhitiri uvilela nattehattehiyaka uhoolo.