1. Toko cinhimyaaya Maberewu 12:1, isiyani ninlamuliyeehu upanka wiira nikhitiri uphiya nipuro nintthimakeleehu?

 IBIIBLYA inaalattaniha makhalelo a nkristau nimasinttaano ootthawiya. Ale ankhitiri uphiya umwiiso, anawaakhela ukumi woohimala. (2 Tim. 4:7, 8) Phimaana, ninlamuliya upanka yotheene inkhitiriihu wiira nihihiyerere utthawa, venci-venci ukhala wiira nipuro nimpheeleehu uphiya niri wakhiviru. Apostolu Paulu hokhitiri uphiya nipuro naatthimakelaawe. Ni uyo hohimya isiyani inhala unikavihera wiira hiiva ciicammo nikhitiri uphiya. Paulu enre wiira nihaana ‘nirulaka khula nrintti unnilemela ni nihaana nihihiyereraka utthawa.’—Nsome Maberewu 12:1. b

2. ‘Urula khula nrintti unnilemela’ maanaaya isiyani?

² Paulu wiirawawe “nirule ciicammo khula nrintti unnilemela”, niireke wiira uyo aapheela uhimya wiira nkristau khanlamuliya ukhalana hataa nrintti mmoca? Mena. Uhiya commo, uyo enre wiira nihaana nihiyaka mirintti coohifayita. Nnyo mirinttinnyo pooti unilolovihaca ni unooceeha. Phimaana, napheelaka uhihiyerera wiikurumica, nihaana niwehawehaka wakhala wiira nihaana nnyo mirinttinnyo ni uhiya woohipica. Masi cihaavo mirintti cikhwaawe hiiva ninlamuliyeehu ukhalana. Ni nnyo cikhanle mirintti cihinlamuliyeehu uhiya. Kontha naahikhalaneke nnyo mirinttinnyo unhala ukhala toko nihoohiya utthawa. (2 Tim. 2:5) Masi mirinttini hiiva ninlamuliyeehu ukhalana?

3. a) Khampa cinhimyaaya Akalasiya 6:5, mirinttini hiiva ninlamuliyeehu ukhalana? b) Ninhala wiitthucani nhina ula mwahoola ni kontha isiyani?

³ Nsome Akalasiya 6:5. c Paulu hohimyaca nrinttini hiiva ninlamuliyeehu ukhalana. Uyo enre: “Kontha khula ntthu nhala ucisa nrinttyaawe.” Paulu aapheela uhimya wiira otheene cihu nihaana  mirintti Yehova nowehereraawe wiira hiiva niwacere. Ula mwahoola, ninaahala woona isiyani inhela nhina uwacera ‘nrinttiihu’ ni manannani ninlamuliyeehu upanka iyo itthwiiyo, ni ciicammo ninaahala woona mirinttini nirineehu coohifayita ni cinnooceeha ni manannani ninlamuliyeehu uhiya. Ukhalana mirintti ni uhiya citthu coohifayita unaahala unikavihera uhihiya utthawa munttalani weekhweeli ni uphiya nipuro nimpheeleehu.

4. Kontha isiyani upanka itthu inkhuluvelihileehu Yehova khinakhala itthu yoorika? (Nwehe ciicammo ilatarato.)

⁴ Wiivaherera wihu wa Yehova. Hiiva neevahereraka wa Yehova, ninankhuluveliha wiira ninhala unswalela uyova paasi ni ninhala upanka paahi citthu cinoncivela mpaka. Phimaana, ninlamuliya upanka iyo itthwiiyo. Upanka cotheene ninkhuluvelihileehu Yehova ukhanle nrintti wofayita, masi khunakhala woolemela. Hiiva ninaacuwela wiira Yehova nipankile wiira otheene cihu hiiva ninswalele uyova. (Apoka. 4:11) Uyo nipankile niitthu inniiriha upheela uncuwela, unswalela ni numpile wiira nikhitiri utakiha makhalelwaawe. Phimaana ninkhitiriihu umwaattamela uyova, ni ikhanle itthu innitteeliha nrima upanka itthu impheelaawe. (Isaa. 40:8) Uhiya commo, hiiva napankaka itthu impheelaawe Nluku ni namwiiwelelaka mwanawe,  hiiva ninaaphwanya “utteeliya waroohoni winyu”.—Mat. 11:28-30.

5. Isiyani inhala wuukaviherani upanka itthu inkhuluvelihileenyu Yehova. (Nwehe 1 Joau 5:3.)

⁵ Manannani nnolamuliyeenyu uwacera uyo nrinttyuuyo? Citthu piili pooti unikavihera. Yoopacera, nhihiyerere ulipihaca unfenta winyu Yehova. Nyuuva nnohala ukhitiri upanka iyo moopuwelaka citthu cotheene comaana cuupankenlyaaweni ni ciicammo cinhalaawe wuupankelani uhoolo. Nyuuva mwatepaka unfenta Yehova, khunhala wuurikani umwiiwelela. (Nsome 1 Joau 5:3. d) Yonayeeli, muntakihe Yesu. Uyo ahokhitiri upanka citthu cotheene cancivela Yehova, kontha anlompa alepelaka ukaviheriya ni khaahiya uweheeha iparakha caahalaawe waakhela uhoolo. (Mabere. 5:7; 12:2) Khampa Yesu, munlompe Yehova munlepelaka wuukaviherani, wuuvahani ikuru ni uhihiyerera wuupuwela ukumi woohimala wahoolo. Mwatepaka unfenta Yehova ni mwantakihaka Yesu, nyuuva nnaahala ukhitiri upanka itthu munkhuluvelihileenyu Yehova.

6. Kontha isiyani ninlamuliyeehu waawacera saana amuciihu? (Nwehe ciicammo ilatarato.)

⁶ Waawacera amuciihu. Muutthawani wihu weekristau, nihaana unfenta Yehova ni Yesu uvikana inanna ninaafenteehu amuciihu. (Mat. 10:37) Masi khunakhala wiira nihaana nihiyaka waawacera amuciihu. Uhiya commo, napheelaka untteeliha nrima Yehova ni Yesu ninlamuliya waawacera saana amuciihu, waafenta ni waahisimu. (1 Tim. 5:4, 8) Napankaka commo, ninaakhala ootteeliya. Yehova naacuwela wiira amuci ankhala ootteeliya wakhalaka wiira anamathelana anaafentana, anaahisimana ni wakhalaka wiira ayari anawaafenta ni anawaalaka saana asaanaaya ni ciicammo wakhalaka wiira asaana anaawiiwelela athumwanaya ni anumwanaya.—Efesu 5:33; 6:1, 4.

7. Manannani nyuuva nnolamuliyeenyu waawacera saana amuciinyu?

⁷ Manannani nnolamuliyeenyu uwacera uyo nrinttyuuyo? Hataa ukhalaka wiira nyuuva nkhanle athiyana ootheliya, alopwana oothela awula mwana owapuwani, itthu yofayita ukhanle weettela itthu inhimyaaya Ibiiblya. Nhipanke itthu inooneenyu mwaaneeneenyu wiira phikhanle yomaana awula ilemaleliye upankiya ncoko unkhaleenyu awula itthu inhimyaaya anamasoma. (Miru. 24:3, 4) Nvarele nteko ratta ilivuru cihu cinoopela mwaha Ibiiblya. Nnyo cinaanikavihera ucuwela mananna hiiva ninlamuliyeehu weettela mattharelelo o mbiiblyani. Wootakihera, nhina mphantte uneera “Ajuda para a familia,” cihaavo myaha cinaakavihera anamathelana, ayari ni asaana anaanana masakha ala mahukwaala. e Mwiikurumice weettela itthu inhimyaaya Ibiiblya, hataa ukhalaka wiira amuciinyu akiina khantthuna weettela. Ayo manannaayo, amuciinyu anaahala uphwanya ifayita cinci ni nyuuva nnaahala utthuveliya ni Yehova.—1 Pet. 3:1, 2.

8. Manannani citthu cinlakeleehu cinniwaanelaaya masakha?

⁸ Waaminnyeela wiira pooti uniphwanya masakha nlattu wo citthu cinlakeleehu upanka. Yehova honivaha utaphuwa wiira nilakele ni nithanle naasineeneehu citthu coohala upanka. Yehova nopheela wiira nithanle upanka citthu comaana, ni unitteele nrima nlattu wo citthu cinlakeleehu upanka. Masi nathanlaka upanka citthu coohinamaana, Yehova khanhala unikhikicera wiira ahiniphwanye masakha nlattu wo citthu coohinamaana cithanlileehu upanka. (Akalas. 6:7, 8) Phimaana, nihaana naaminnyeelaka wiira pooti unikhumelela masakha nlattu woolakela upanka itthu yoohinamaana ni nlattu wo wuuluma awula upanka itthu woohipaca wuupuwela. Nalakelaka upanka itthu yootakhala, hataa ikhalaka isiyani, hiiva pooti unuula muru ni uhinitaphuwa nrima. Masi naaminiki wiira itthu ithanlileehu upanka khayaari yomaana, ninaahala ukhitiri uhivitha  itampi cihu, urukunusa meettelweehu ni uhituruwela-tho upanka iyo itthu yoohinamaaneeyo. Upanka commo unaahala unikavihera uhooceela utthawa weekristau unhala uniphwanyiha ukumi woohimala.

9. Isiyani inhala wuukaviherani wakhalaka wiira ihaavo itthu yoohinamaana ipankileenyu?

⁹ Manannani nnolamuliyeenyu uwacera uyo nrinttyuuyo? Wakhala wiira nyuuva mwaholakela upanka itthu yoohinamaana ni vano nhotharuwa, isiyani nnolamuliyeenyu upanka? Nkupali wiira nyuuva khannohala woorya uturuwela uttuli wiira nrukunuse itthu yoohinamaana ipankileenyu. Nhirihakace ukatiinyu ni ikuru cinyu mmananihaka uthoonyera wiira mwahaana isariya yoopanka iyo itthwiiyo yoohinamaaneeyo ni nhirihakace ukati mwiicukulelihaka nlattu wo iyo itthwiiyo. Uhiya commo, nkupali wiira nhovonya ni mpanke yootthene inkhitiriinyu nna co. Vano moonaka wiira unaatepa wuuriipani nrima nlattu wo itthu ivonyileenyu, mwiiyevihe ni munlompe Yehova mwakupaleelaka wiira nhovonya ni mwanlepelaka wiira ooleveleleni. (Isaa. 25:11; 51:3, 4) Mwaalepele wuulevelelani ale nyuuva mwatthekenleenyu ni wakhalaka wiira ikhanle itthu mahumu inlamuliyaaya ucuwela, mwaahimerye ni mwaalepele wiira yuukavihereni. (Tiya. 5:14, 15) Mwiithucere citthu cinvonyiheenyu ni mpanke yotheene inkhitiriinyu wiira nhaakulele upanka nnyo citthunnyo. Mwapankaka commo, pooti wankupaliinyu wiira Yehova naahala uwoonelani uthunku ni naahala wuukaviherani.—Isaa. 103:8-13.

10. Kontha isiyani uhiicoona uvara miteko sana pooti ukhala nrintti muulupale? (Nwehe Akalasiya 6:4.)

¹⁰ Uhiicona uvara nteko cinene. Neelattanihaka naakhunanihu unaahala uniriipa nrima cinene. (Nsome Akalasiya 6:4. f) Ikwaha cinci, hiiva neelattanihaka naakhunanihu, ninaahala waakhalela nttima awula upheela usinttana. (Akalas. 5:26) Namananihaka upanka citthu khampa akhwiihu ampankaaya nihirina mananna wiira nipanke iyo itthwiiyo toko ayova, ninaahala wiiwaanela masakha mwaaneeneehu. Waakhala wiira “yaahiirannyeeke itthu yaaweherereehu unaawerya nrima,” vano muupuwele inanna waahalaaya utepa uniwerya nrima wakhalaka wiira khanirina mananna owoorya upanka itthwiiyo! (Miru. 13:12) Mwaaminnyeelaka wiira cihaavo citthu cihinhaleenyu ukhitiri upanka, nyuuva khunhala wuuweryaani nrima ni khannohala wooceela utthwa weekristau.—Miru. 24:10.

11. Isiyani nyuuva nnolamuliyeenyu upanka wiira nhimananihe upheela upanka citthu nyuuva cihinhaleenyu ukhitiri?

¹¹ Manannani nnolamuliyeenyu urula uyo nrinttyuuyo? Nvare paasi ile Yehova nopheelaawe wiira nyuuva nvare. Uyo khanhala uwiirelani wiira mpanke itthu nyuuva ihinkhitiriinyu. (2 Akor. 8:12) Ni nkupali wiira Yehova khanlatthaniha itthu nnovareenyu nicitthu atthu akhwaawe ampankaaya. (Mat. 25:20-23) Yehova nawoona ukhalana ifayita nteko nyuuva unonvareleenyu ninrimeenyu wotheene, waamini nyuuva urineenyu ni ulipa nrima winyu nyuuva. Nkupaleele wiira cihaavo citthu cihinhaleenyu ukhitiri upanka hataa mpheelaka, nlattu wo makhalelweenyu. Khampa Barzilai, mwiireke “mena” mwavahiyaka nteko unooneenyu wiira khannohala ukhitiri uwacera nlattu wooweryaaciya awula nlattu wo wuuluvala. (2 Sam. 19:35, 36) Ni khampa Moceesi, nlepele ukaviheriya ni mwaavahacere akhwiinyu miteko cikiina. (Nkw. 18:21, 22) Ukupaleela wiira cihaavo citthu cihinhaleenyu ukhitiri upanka unaahala wuukaviherani unyema mirintti cihinhaleenyu ukhitiri uteesa ni cinhala uwiirihani wooceela utthawa weekristau.

12. Akhunanihu yathanlaka upanka citthu coohiloka, niireke wiira ampanka commo nlattu wawihu? Nttonkace.

¹² Wuupuwela wiira akhwiinyu apankile citthu coohiloka nlattu wawinyu nyuuva. Hiiva khaninlamuliya ulakela itthu inlamuliyaaya upanka akhwiihu ni khaninlamuliya waakhikicera wiira ahaaphwanye  masakha nlattu wo citthu coohinamaana cithanlilyaaya upanka. Wootakihera, mwaana pooti ulakela uhiya unswalela Yehova. Ni iyo itthwiiyo pooti waawereeha nrima cinene asithumwaane. Masi ayari yoopuwelaka wiira uyo hiyale unswalela Yehova nlattu wawaya, uyo unkhala nrintti muulupale uneevahaaya ni khunakhala nrintti Yehova neeraawe wiira ayo ateese.—Aroo. 14:12.

13. Manannani ayari anlamuliyaaya uwehera citthu coohinamaana cinlakelaaya upanka asaanaaya?

¹³ Manannani nnolamuliyeenyu urula uyo nrinttyuuyo? Muupuwele wiira Yehova honvaha utaphuwa khula ntthu wiira alakele mwaaneennyaawe itthu yoohala upanka, toko uthanla unswalela awula mena. Yehova naacuwela wiira nyuuva ayari nkhanle atthu omatampi. Uyo nopheela paahi wiira mpanke ile inhaleenyu ukhitiri upanka. Itthu mwaninyu inhalaawe ulakela upanka ukhanle nrinttyaawe uyova; khunakhala nrinti wawinyu. (Miru. 20:11) Hataa ukhalaka commo, nyuuva pooti wuupuwela citthu cihipankileenyu ratta khampa nnyari. Wakhala commo, munlompe Yehova munhimeryaka mananna cineecooneenyu ni munlepele wiira ooleveleleni. Yehova naacuwela wiira nyuuva khannohala ukhitiri uturuwela uttule wiira mpanke saana ile ihipankileenyu ratta. Masi ciicammo, Yehova khampheela wiira nyuuva mmananihe umwaakiha mwaninyu wiira ahimphwanye masakha nlattu wo citthu coohinamaana cithanlilyaawe upanka. Mwaninyu eekurumicaka wiira anturuwele Yehova, nhiliyale wiira Yehova naahala umwaakhelela nimatata meeli.—Luka 15:18-20.

14. Kontha isiyani utepa uriipiya nrima nlattu wo matampi o khalayi ukhanle nrintti unlamuliyeehu urula?

¹⁴ Uhiliyala itampi cinyu co khalayi. Natthekakavale, hiiva unaaniriipa nrima. Masi Yehova khampheela wiira hiiva nikhale ooriipiya nrima mpaka. Uyo ukhanle nrintti ninlamuliyeehu urula. Masi ninhala ucuwela cani wiira ninaatepa uriipiya nrima nlattu wo matampi avanreehu khalayi? Nakhalaka wiira khanivithile itampi ivanreehu, nihottharuwa ni ninaapanka yotheene inkhitiriihu wiira nihaakulele upanka, nihaana nikupaliki wiira Yehova honilevelela. (Mite. 3:19) Namalaka upanka cotheenennyo, Yehova khampheela unoona hiiva uniriipaka nrima nlattu wo iyo itampiiyo. Uyo naacuwela wiira moopuwelelo khamapa ayo pooti uniwaanela masakha. (Isaa. 31:10) Hiiva natepaka ukhala ooriipiya  nrima, ninaahala wooceela utthawa wihu weekristau.—2 Akor. 2:7.

15. Isiyani inhala wuukaviherani wakhalaka wiira unawuurikani uliyala itampi ivanreenyu khalayi? (Nwehe 1 Joau 3:19, 20.)

¹⁵ Manannani nnolamuliyeenyu urula uyo nrinttyuuyo? Moonaka wiira unawuurikani uliyala itampi ivanreenyu khalayi, mmananihe wuupuwela cinene “ulevelela wa Yehova.” (Isaa. 130:4) Yehova naawiirela ale attharuwile weekhweeli co: “Akinhala wuupuwela-tho itampiinyu.” (Jer. 31:34) Iyo inthoonyera wiira Yehova khanhala wuupuwela matampiinyu okhalayi ni wuuttarusani nlattu wo ayo matampyaayo. Vano wakhala wiira nyuuva anawuuphwanyani masakha nlattu wo matampi yaavanreenyu, nhuupuwele wiira Yehova khoolevelenleeni. Uhuuriipeni nrima wakhala wiira itampi ivanreenyu ihowiirihani uhaleela nteko waavahaceriyeenyu wanlokoni. Yehova khankhala oopuwelaka itampi nyuuva ivanreenyu. Ni nyuuva ciicammo khamwaalamuliya wuupuwela.—Nsome 1 Joau 3:19, 20. g

16. Khampa anamatthawa, isiyani inlamuliyeehu wuupuwela?

¹⁶ Khamana nintthawa napheelaka waakhela ukumi woohimala, nihaana nitthawaka ‘wankhitiriihu waakhela itthuvo.’ (1 Akor. 9:24) Hiiva ninhala ukhitiri upanka iyo nacuwelaka uvirikaniha mirintti ninlamuliyeehu uteesa ni mirintti ninlamuliyeehu urula. Nhina ula mwahoola, nihoona matakihero vakaani o mirintti cinlamuliyeehu uteesa ni mirintti cinlamuliyeehu urula. Masi cihaavo citthu cikhwaawe. Yehova hohimya wiira nihaana nihiitthaalaka wiira ‘nrimeehu uhikhale woolemeliya nlattu woolya ni uwurya cinene ni nlattu wo masukhuli o muukumini.’ (Luka 21:34) Ila niiveerusu cikhwaawe co mbiiblyani pooti wuukaviherani woona marukunuso makhwaawe atthunaka nyuuva anlamuliyeenyu upanka wiira nhooceele utthawa weekristau.

17. Kontha isiyani ninlamuliyeehu ukupaleela wiira ninaahala ukhitiri utthawa mpaka utthema?

¹⁷ Hiiva pooti wankupaliihu wiira ninaahala ukhitiri utthawa munttalani weekhweeli mpaka utthema, kontha Yehova naanivaha ikuru wiira nikhitiri. (Isai. 40:29-31) Masi khaninlamuliya woocya. Mpanke khampa apostolu Paulu eekurumicile venci-cinene wiira akhitiri uphwanya itthuvo. (Afili. 3:13, 14) Khaavo nolamuliya wuutthawelani ayo masinttaano ookumyaayo, masi nkaviheriyaka ni Yehova, nyuuva pooti ukhitiri utthema. Yehova naahala wuukaviherani utteesa mirintti comaana ni urula mirintti cinoorikihelani utthawa ratta. (Isaa. 68:19) Nkaviheriyaka ni Yehova, nyuuva nnaahala ukhitiri uvilela ni uhooceela utthawa weekristau mpaka wanhaleenyu waakhela ukumi woohimala!