Mena. Ibiiblya ni hataa ihantisi cinooluma makhalelo o khalayi khacinthoonyera wiira makristau yampanka iyo itthwiiyo.

Inanna iyo iveeruswiiyo citaphuleliyaaya nhina Ibiiblya cinci, inaawiiriha atthu akhwaawe wuupuwela wiira ukati wa Paulu, yahaavo makristau yaapattisiya wiira yaakavihere atthu yaakhwile woohipattisiya. Wootakihera, Ibiiblya ineehaniya Nova Versão Internacional ineera co: “Wakhala wiira atthu ookhwa khweeliini khanhala wunwelelihiya, isiyani inhalaaya upanka ale ampattisiya nlattu waatthu ookhwa?”

Masi moone itthu yuulumalyaaya atthu eeli ansomasoma myaha co mbiibliyani. Namasoma Ibiiblya neehaniya Gregory Lockwood heera wiira khiivo inhimiya mbiiblyani awula mmalivuruni cohantisi inthoonyera wiira ntthu hopattisiya wiira ankavihere ntthu khwile woohipattisiya. Namasoma Ibiiblya nkiina nosomiha icikola cuulupale neehaniya Gordon D. Fee, naarumeleliha iyo itthwiiyo. Uyo hantikha wiira khiivo itthu mbiiblyani awula mmalivuruni cohantisi inthoonyera wiira yahaavo iyo inanna yopattisaniyeeyo. Uyo neera wiira iyo itthwiiyo khinoolumihiya nhina mphantte wo mbiiblyani uneehaniya Novo Testamento ni khiivo itthu inthoonyera wiira iyo itthwiiyo yampankiya ni makristau oopacera awula niikereeca cikiina cancile ukhumelela ukhwa waya maapostolu.

Ibiiblya ineera wiira atthari a Yesu ahaana “[waapanka] eetthuci atthu olapo cotheene, [yaapattisaka] . . . , ni [yawiitthucihaka] wiiwelela citthu cotheene” cirumalyaawe. (Mat. 28:19, 20) Wiira ntthu akhale ntthari a Kristu oopattisiya, uyo haana apacaka wiitthuca myaha ca Yehova ni ca Mwanawe wiira aacuwele, haana uwaamini ni uwiiwelela. Iyo ikhanle itthu ihimpankaawe ntthu khwile ni sikhiye. Ni nkristau ri nkumi khanompankela iyo ntthu khwile.—Ekles. 9:5, 10; Joau 4:1; 1 Akor. 1:14-16.

Vano isiyani Paulu yaapheelaawe uhimya?

Atthu akiina u Korintu khayaakupali wiira atthu ookhwa yanhala wunwelelihiya. (1 Akor. 15:12) Paulu ahomananiha waathoonyera wiira ayo yaari moopuwelelo owoothiya. Uyo aheera wiira “[aanawaanana] ukhwa khula nihuku.” Ninaacuwela wiira uyo nanlelo aari nkumi. Masi hataa cankhumelelaka citthu cinci cowoopiha, uyo ankupali wiira akhwaaka, anhala wunwelelihiya niirutthu yoominepani ni yokuru, khampa Yesu cunwelelihiyaawe.—1 Akor. 15:30-32, 42-44.

Akorintu yahaana yacuwelaka wiira yakhalaka makristau oothanliya, yanhala waakhumelela masankiho khula nihuku ni yanhala ukhwa; vano phaahalaaya wunwelelihiya. ‘Upattisiya mwa ncina na Yesu Kristu’ unkhala ciicammo upattisiya “muukhwani wawe.” (Aroo. 6:3) Paulu aapheela uhimya wiira, toko Yesu, makristau oothanliya yaanaahala waakhumelela masakha ni yaanaahala ukhwa wiira yunwelelihiye ni arwee yakhale wiirimu.

Uvira waya myaakha miili Yesu napattisiye mmaacini, uyo ahowiirela maapostulwaawe eeli: “[Nyuuva] nnaahala upattisiya nimpattiso kipattiseriyaaka.” (Mark. 10:38, 39) Yesu khaaca upattisiya mmaacini. Uyo aapheela uhimya wiira, nlattu woohihiya umwiiwelela Nluku, uyo anhala ukhwa. Paulu hantikha wiira makristau oothanliya yanhala ‘uhuva wamoca ni Kristu, wiira ciicammo attitthimihiye nkhayi nuuyova.’ (Aroo. 8:16, 17; 2 Akor. 4:17) Iyo maanaaya wiira ayo ciicammo yahaana yakhwaaka toko, wiira yunwelelihiye ni arwee yakhale wiirimu.

Noopuwelaka citthu cotheene nnyo, unawoonannya wiira moolumo a Paulu anlamuliya utaphuleliya ratta, toko co: “Waahikhale commo, isiyani inhalaaya upanka ale ampattisiya wiira akhwe? Wakhala wiira atthu ookhwa khweeliini khanhala wunwelelihiya, vano nlattuni atthu ampattisiyaaya wiira akhwe?”