Yehova enre wiira apoovu o Isarayeli yahaana yakhalaka atthu owaarya. Wiira aakavihere apoovu upanka iyo itthwiiyo, uyo ahaalakihacera eeraka co: “Uhivire umwaruselaka citthu cowoothiya nhina apoovwaa. Uhimpanke pusya nkhunanaa. Mi ki Yehova.”—Lev. 19:2, 16.

Nuulumo “uhimpanke pusya” nimphattuwaca nluukani iheperewu. Vano isiyani nno nuulumonno ninnihimyeraaya? Ilivuru imoca yootaphulela myaha ca ayuuta ineera: “Ula mphantte woversiikuluula unaarika kontha khanincuwela itthu yaapheelaaya uhimya nuulumo nimphattuwaca nluukani iheperewu. Niiluuka iheperewu nno nuulumonno neera ‘uhimweemelele nkhunanaa uhoolo wawe awula nseresere wawe.’”

Anamasoma Ibiiblya okhalayi aneera wiira nno nuulumonno atthunanka ninaalikanaca niitthu ihimiye nhina iveerusu 15, ineera: “Nhihiye weettela isariya ukati woohukhumu. Nhinthanye mmasikhiini mpheelaka uhoolelihera unwacera thaciri. Munhukhumu khula ntthu mweettiheraka isariya.” (Lev. 19:15) Neettiheraka ala moolumwaala, wiiriya waya nhina iveerusu 16 “Uhimpanke pusya nkhunanaa,” unkhala toko asarayeli yaanaakurumiciya uthoonyera ukati wotheene isariya, ukati woohukhumwiya ntthu utripunali, ukati wompanka nakoso awula wookhalakhala watthokoni. Khweeliini ninaacuwela wiira hi khaninlamuliya upanka nnyo citthunnyo. Masi ihaavo itthu inoolumiya nhina iveerusu 16 inlamuliyeehu wuupuwela.

Nwehe itthu inoolumiya wiipaceroni iveerusu 16. Nhina mphantte woopacera iyo iveeruswiiyo, Yehova enre wiira khaavo aalamuliya ‘uvira amwaruselaka citthu cowoothiya.’ Umwarusela citthu cowoothiya khunakhala paahi uwuuluma pusya akhunanihu. (Miru. 10:19; Ekles. 10:12-14; 1 Tim. 5:11-15; Tiya. 3:6) Ntthu mmwarusela citthu cowoothiya naalakela umuuluma pusya uhoolo waatthu akhwaawe, ni uyo ntthuuyo pooti umootherihaca nkhunanawe citthu cihipankilyaawe, hataa acuwelaka wiira ntthu nomootherihaawe pooti wiiviya nlattu wo citthu cimmootherihaawe. Iyo phi itthu yaapankilyaaya alopwana eeli yaamuulumile pusya Nabote, yamootherihaka itthu yootakhala. Nlattu wo citthu caamootherihilyaaya, Nabote ahovonyakaciya nimaluku ni aheeviya. (1 Mam. 21:8-13) Awula, khampa cineeraaya Levitiku 19:16, ntthu nomwarusela citthu cowoothiya naalikanaca nintthu nolupattha ukumi wankhunanawe wiira amwiivihe.

Ciicammo, ntthu amwaruselaka citthu cowoothiya amootherihaka citthu coohinamaana nkhunanawe, nothoonyera wiira nanthanya. Nhina 1 Joau 3:15, ahaavo moolumo aneera co: “Otheene ule nonthanya munnaawe khanle nakhirini, ni nyuuva nnaacuwela wiira nakhirini khanhala uphwanya ukumi woohimala.” Ukati Yehova waakhottihilyaawe asarayeli uvira yamwaruselaka citthu cowoothiya yamuulumaka pusya nkhunanaya, uyo ciicammo aheera: “Uhinthanye munnaa wanrimani waa.”—Lev. 19:17.

Phimaana, nrumo nimphwanyannya nhina Levitiku 19:16 ninaaniitthuciha itthu yuulupale hiiva makristau. Nihaana niikurumicaka wiira nihikhalane moopuwelelo oohinamaana mpaka wanancereehu umuuluma pusya nkhunanihu. Namuulumaka pusya awula namootherihacaka citthu nkhunanihu, ninaahala ‘umpanka pusya’ ni ninhala uthoonyera wiira ninanthanya awula khaninontthuna. Masi ukhala wiira nimakristau, hi khaninlamuliya upanka iyo itthwiiyo.—Mat. 12:36, 37.