Nyuuva nhosoma ratta irevista Ukhalenla co nantano? Vano mmananihe waakhula ala makohwaala:

Isaalimu 103:8 ineera wiira Yehova khanle “nakiriri” ni ‘umwinciva nifento nookhuluvelya.’ Iyo itthwiiyo innikhuluveliha isiyani?

Nlattu wookiriri cawe, Yehova naapheela cinene unilevelela itampi cihu, ni ninfento nawe nookhuluvelya ninaamwiiriha upheela cinene unikavihera. Hiiva nihaana nintakihaka.—w21.01, ipaag. 21.

Nlattuni Yehova utthenkacilyaawe wiira akhale ahooleli?

Kontha naanifenta. Nlattu wookhala ahooleli watthokoni ya Yehova, citthu cotheene cinaweetta ninnema ni cinaakhala coothotokanihiya. Waari wiira khaavo ntthu vahaceriye uhoolela itthoko, yapheeliyaka ulakeliya upankiya itthu, khaahala ucuwannya tipani aahala ulamuliya ulakela wiira ipankiye ni yeetteliye iyo itthwiiyo.—w21.02, ipaag. 3.

Kontha isiyani makristau ahaana yacuwelaka uvarela nteko ratta aplikatiivu oveleeliheraniya imensagem?

Ntthu apheelaka uvarela nteko aplikatiivu omensagem, haana aathanlaka ratta atthu anhalaawe waaveleelihera imensagem, utepa yakhalaka ikhuru yaatthu enci. (1 Tim. 5:13) Ciicammo, uyo ntthuuyo haana hiitthaalaka wiira haaveleelihere akhunanawe myaha awula ihapari cowoothiya ni hivarele nteko manummeru o mayamunna wiira antafiti nakoswaawe paahi.—w21.03, ipaag. 31.

Isiyani yaamwiirihile Yehova unhiya Yesu ahuvaka hinaaya wiiviya?

Yoopacera, Yesu ahaana ahuvaka wiira awoopole ayuuta nhina mahusi yaalaphakaceriyaaya. (Akalas. 3:10, 13) Yonayeeli, Yehova aanantthenkaca Yesu wiira wahoolo arwee akhale Nankuttho Muulupale. Ni yoneeraru, Yesu uhuva wawe mpaka weeviyaawe, hothoonyera wiira apinaatamu pooti ukhitiri unvaresesa Yehova hataa yahuvaka cinene. (Jó 1:9-11)—w21.04, ipaag. 16-17.

Isiyani inhala unikavihera ukhitiri waalalyeera atthu anrika waaphwanya mmawannyaya?

Ulalyeera iwoora cinooneehu wiira atthu ankhalaka mmawanuwaya awula ulalyeera mapuro ahinthwaa atthu. Ciicammo, pooti wantteheehu ulalyeera niinanna cikhwaawe, toko wantikhela iwarakha.—w21.05, ipaag. 15-16.

Isiyani apostolu Paulu yaaphenlyaawe uhimya ukati wenryaawe: “Ukhala wiira khalayi kaaneettela Nlamulo, mi kihokhwela Nlamulo, wiira kinkhalele nkumi Nluku”? (Akalas. 2:19)

Nlamulo na Moocesi nanthoonyera wiira apinaatamu ahaana matampi ni anaapheela woopoliya. Nno nlamulonno ciicammo naakumiheriye wiira niweettihere apoovu a Nluku mpaka waahalaawe uwa Kristu. (Akalas. 3:19, 24) Nlattu wo iyo, apostolu Paulu ahontthuna Kristu, phimaana uyo ‘ahokhwela Nlamulo,’ awula ahohiya weettela nno Nlamulonno.—w21.06, ipaag. 31.

Manannani Yehova nothoonyeraawe uvilela anreera hiiva utakiha?

Yehova naavilela uthweeliya inaasi ncina nawe, uhaaminiya ukhulupalyaawe, urukunuweliya naasaanaawe, citthu cowoothiya cihinhiyaawe umwarusela Sotwani, uhuva waatthu anonswalela, ukhwa apatthannyaawe, uwoona atthu yaapankaka ikhirini akhunanaya, uwoona apinaatamu yahiyaka utthara meettelo omaana ni uhononiya citthu cumpilyaawe.—w21.07, ipaag. 9-12.

Yusufu aathoonyenre cani uvilela?

Uyo ahovilela uhuvihiya naasuulupalyaawe, wootherihiya upanka itthu yahaapankilyaawe ni utthukeliya nkhattya Wiciipitu.—w21.08, ipaag. 12.

Nhina Ageu 2:6-9, 20-22, uttettemelani wotthaya unaaciya?

Atthu o ntuninyani khacinaacivela ihapari co Umwene wa Nluku. Hataa ukhalaka commo, atthu enci anaatthuna weettela ikhweeli ca Nluku. Woohipica, atthu o ntuninyani anaahala uttettemelihiya ukati unhalaaya ukwanyulaciya ni Nluku.—w21.09, ipaag. 15-19.

Kontha isiyani khaninlamuliya uhiya ulalya moolumo a Nluku?

Yehova nawoona wiikurumica wihu ulalya moolumwaawe ni unantteela nrima cinene. Naahihiyeke ulalya ihapari ca Nluku ninaahala waakhela ukumi woohimala.—w21.10, ipaag. 25-26.

Ikapiitulu 19 yo Levitiku innikavihera cani weettela ikano ineera: “Nthoonyere ukhala owaarya nhina meettelweenyu otheene”? (1 Pet. 1:15)

Iyo iveeruswiiyo atthunaka ikumihiye nhina Levitiku 19:2. Ikapiitulu 19 yo Levitiku inaataphulela mananna menci ninlamuliyeehu weettela muukumini wihu ikano iri nhina 1 Peturu 1:15.—w21.12, ipaag. 3-4.