1. Manannani Yehova ikwaha cinci cinaakhulaawe mavekelo aale anonswalela?

 NYUUVA mwancuwela wiira Yehova pooti wuukurumicani wiira aakhule mavekelo ampankiya? Hataa nyuuva nkhalaka humu, nrumiya o wanlokoni, piyoneeru, namalalyeera, mmirawo, owuuluvala, munna awula nuunu. Ntthu nonfenta Yehova alepelaka ukaviheriya nuuyo, Nlukwiihu ikwaha cinci nawaakurumica mahumu ni aswali ookhuluvelya wiira “akhitiri wamaaliha akhwaya”. (Akol. 4:11) Khweeliini, ikhanle iparakha yuulupale unswalela Yehova nimayamunnehu ayo manannaayo! Hi pooti waakavihera ni waalipiha mayamunneehu camwaryeelaka iretta, caakhumelelaka ihasara ni yalupatthiyaka

2. Nlattuni unnirikelaaya wakavihera akwihu ukati wo iretta cinci?

² Pooti ukhala itthu yoorika waakavihera akhwiihu camwaryeelaka iretta coovahaniya. Wootakihera, hiiva ninaapheela uwootola asipatthaniihu, masi unawoopiha upanka iyo itthwiiyo. Atthunaka hiiva ninaapheela unlattula ntthu naanana masankiho wiira alye uwannyihu. Atthunaka hiiva ninaapheela waakavihera akhwiihu, masi iyo khinakhala itthu yoohirika upanka wakhala wiira mmuciihu phinaanana ayo marikarikwaayo. Hata ukhalaka commo hi ninpheela wakavihera mayamunneehu, ni Yehova naatteliya venci napankaka inkhitiriihu wiira naakavihere. (Miru. 3:27; 19:17) Vano, nipankeke isiyani wiira nikavihere?

3. Itthu yaapankilyaaya mahumu o wanlokoni naarokorihu Desi inniitthuciha isiyani? (Nwehe Jeremiya 23:4.)

³ Itthu mahumu inlamuliyaaya upanka. Wakhala wiira nyuuva mwaahumu, mwiikurumice waacuwela saana mayamunneenyu o  wanlokoni. (Nsome Jeremiya 23:4. b) Desi, arokorihu aromoliye mwaha uvinre, aheera: “Mahumu okhurupu inlalyeeraaka yankikhumanaka ni mayamunna akhwaawe wuulalyeerani ni yanvirihaka ukati yanithukanaka.” c Naayo manannaayo, mahumu khuwaarikenle waakavihera anuunwiihu Desi ukati wokoronaviiru ni waakhwilyaaya asithumwanaya nlattu wo iyo iretteeyo.

4. Kontha isiyani mahumu waakhitinryaaya waakavihera anuunwiihu Desi, ni isiyani mahumu aneetthucaaya?

⁴ Arokorihu Desi aheera: “Ukhala wiira mahumu yaari apatthannyaaka khuwakirikenla waahimerya iwasiwaasi caka ni mananna keecoonaaka.” Nineetthucani? Wakhala wiira nyuuva humu, mwaakavihere ni mwaawehawehe mayamunna ihinakhumelela itthu yoorika. Mwaapatthanane. Cakhumelela iretta cuulupale ni waahikhitiryeeke waathotola uwannyaya, mwaavye mananna makiina oowuulumana. Arokorihu Desi yahoolumaca-tho yeeraka: “Ikwaha cikiina, mahumu enci yankilikarela awula yankantikhela imensagem nihuku nimocaaru. Iveerusu caakisomenlyaaya cahokivara nrima, waahookhalaru wiira nnyo iveerusunnyo kancuwela itthu yaahimyaaya.”

5. Manannani mahumu anhalaaya ucuwela itthu ampheelaaya mayamunna, ni manannani anhalaaya waakavihera?

⁵ Itthu inhala unikavihera ucuwela itthu mayamunna impheelaya ukhanle waakohakoha, masi woohikelakela isiri caya. (Miru. 20:5) Niireke ayo ahaana iyoolya yowaatosera, mirette ni citthu cikwaawe? Ihaavo inhala uwiiriha uhaleela ntekwaaya awula kharina nipuro nookhala? Niireke ayo anaapheela ukaviheriya wiira awaceriye naaholeli ookuvernu? Arokorihu Desi yahokaviheriya nimayamunna yavahiyaka citthu caatthwa, masi itthu yaatepile waakavihera ukati waananaaya marikariko, waari ufentiya ni ulipihiya nimahumu. Ayo aheera: “Mahumu yanlopaka wamoca nimiiva. Mi akinoopuwela itthu yaahimilyaaya, masi kinawuupuwela mananna keeconnyaaka. Waakhala khampa Yehova aakiirela: ‘We khuri veekha.’”—Isai. 41:10, 13.

6. Manannani mayamunna o wanlokoni anhalaaya waakavihera akhwaaya? (Nwehe ilatarato.)

⁶ Itthu atthu akiina inlamuliyaaya upanka. Hiiva ninweherera wiira mahumu yaawacere mayamunna o wanlokoni. Masi Yehova nopheela wiira otheene cihu nikaviherane ni  nilipihane. (Akalas. 6:10) Hataa nipankaka itthu vakaani wiira ninkavihere ntthu nowerennya, iyo pooti unlipiha venci. Mwanhima pooti uveleliha iwarakha awula idesenyu wiira anlipihe munneehu. Ntthu o wanlokoni apheelaka ukaviheriya, mmirawo pooti wiivaherera wiira ankavihere uthumathuma citthu upacari awula upanka itthu ikhwaawe impheelaawe. Atthu akhwaawe pooti waapya iyoolya ni unrwaanela uwannyawe ule nowerennya. Masi khweeliini wakhalaka ukati woretta coomwaryeela, atthu otheene wanlokoni anaapheela ulipihiya. Atthunaka hiiva pooti uhaakuva ukhuma camalaka mikutthaano wiira niwoopane mwaha vakaani mayamunna, hataa cikhalaka mikutthaano co mwinternetini. Ciicammo, mahumu anaapheela ulipihiya. Mayamunna akiina anawaavelelihera iwarakha yaasukhuruku mahumu, nlattu woovara nteko mwinci ukati woretta. Ikhanle itthu yomaana uhihiya “ulipihana ni ukurumicana”!—1 Atesal. 5:11.

7. Manannani ihasara cinrukunusaaya makhalelo a ntthu?

⁷ Yakhumelelaka ihasara pooti urukunusa makhalelo antthu woohipica. Atthu akhwaawe pooti uhaleela citthu carinaaya, inupa caya ni mpaka pooti ukhwa ntthu yanfentaaya. Wooripiha nrima, ihasara commo pooti waakhumelela mayamunneehu. Vano, nipankeke isiyani wiira naakavihere?

8. Manannani mahumu ni ahooleli itthoko cinlamuliyaaya wiitthenkaca ihinakhumelela ihasara?

⁸ Itthu mahumu inlamuliyaaya upanka. Mahumu, mwaakavihere akhwiinyu wiitthenkaca ihinakhumelela ihasara. Mwaavye ucuwela wakhala wiira mayamunna otheene o wanlokoni anaacuwela itthu yoohala upanka wiira akhale ookhikicirya ni anaakhitiri walikarela mahumu. Anuunu Margaret, ahimiye nhina mwaha uvinre, aheera: “Wankutthaanoni mphantte uneera ‘Cohimiya co Wanlokoni,’ mahumu yahoniirela wiira nanlelo wanawoopiha uvya itakwa yo ncoko waakhaleehu. Yahoniirela wiira aholeli ookuvernu yahimyaka wiira nikhume mmawannyihu, nahaana nikhumaka woohipica.” Nnyo ikanonnyo cahohimiya ukati womaana, kontha uvira waya isumana thanu yahovya itakhwa. Wuuswalini wa amuci, nyuuva pooti woopela mwaha itthu khula ntthu inlamuliyaawe upanka yakhumelelaka ihasara. Nyuuva ni asaneenyu mwakhalaka owiitthenkaceene, khannohala utepa usanka yakhumelelaka ihasara.

9. Manannani mahumu cinlamuliyaaya wiitthenkaca ihinakhumelela ni inakhumelenle ihasara?

⁹ Wakhala wiira nyuuva nkhanle nholeli okhurupu yo wuulalyeerani, nhaana nkhalanaka manummeru otelefooni o mayamunna otheene ari nkhurupuni winyu. Nhiweherere ukhumelela ihasara wiira mpanke iyo. Vano, yakhumelelaka ihasara mwaalikarele anamalalyeera okhurupu iriinyu wiira ncuwele itthu impheelaaya. Woohipica, munhimerye munna ntthenkaca ikhurupu yo mahumu, ni uyo naahala unhimerya mootoli osirikwitu. Uyo nteko woovariya nkhayiiyo phinkavihera. Uvyaaca waya, mootoli osirikwiitu aanuunwiihu Margaret ahoviriha iwoora 36 woohirupa. Uyo aari nimiteko cinci aatthenkacaka miteko co mahumu, ukhala wiira mahumwaayo yaamananiha uwuulumana ni waakavihera mayamunna 450 yaahiile inupa caya. (2 Akor. 11:27) Commo, atthu otheene yaapheela nipuro nookhala yahophwanya.

10. Kontha isiyani ikhanlyaaya itthu yofayita mahumu waawacera mayamunna? (Nwehe Joau 21:15.)

¹⁰ Waalipiha mayamunna ni waamaaliha ale ari nimasukhuli ukhanle nrintti uvahaceriyaaya mahumu. (1 Pet. 5:2) Yakhumelela ihasara, itthu yoopacera impankaaya ukhanle uwehaweha wakhala wiira mayamunna ari ookhikicerya, ahaana iyoolya, ikuwo ni nipuro noorupa. Masi uhoolo waya, mayamunna anaahala upheela  ulipihiya. (Nsome Joau 21:15. d) Amunna Harold, anvara nteko nhina Ikhurupu yo Mahumu Inhooleli Ipeteli ni awoonananne mayamunna ni mayanuunu enci owaakhumelela ihasara, aheera: “Unaavira ukati mwinci uhinaliyala. Vakaani-vakaani, mayamunna anaaturuwela makhalelwaaya okhalayi. Masi unukheliya nintthu khwaale, nhakhu urihyaale awula ntthuuyo wuupuwela wiira aahanle vakaani ukhwa, cinkhala citthu cimpica uliyaliya. Wuupuwela nnyo citthunnyo pooti uwiiriha mayamunna uturuwela ucukulaca. Masi wiicoona commo khunakhala uhikhalana waamini. Iyo ikhanle itthu immwiira khula pinaatamu.”

11. Manannani amuci cimpheelaaya ukaviheriya yaakhumelelaka ihasara?

¹¹ Mahumu, ntthare ikano iri nhina Arooma 12:15, ineera: “Nwunlane ale anonla.” Mwaamaalihe mayamunna yaakhumelenle ihasara ni nwoonihere wiira ayo anaafentiya ni Yehova ni nimayamunna. Nhaana mwiikurumicaka cinene waakavihera amuci o wanlokoni uhihiya ulompa, usoma Ibiiblya, urwaa umikutthaanoni ni wuulalyaani. Ciicammo, mwaakurumice ayari waamaaliha asaanaaya. Ni nyuuva ayari nhaana mwiikurumicaka waakavihera asaaniinyu ucuwela wiira hataa cuurihyaakani citthu cinci caarineenyu, ihaavo itthu ihinhala waarihya. Nwuupusere wiira Yehova khanhala uhiya ukhala mpatthannyaaya ni khanhala waahiya. Mwaahimyeere wiira khula ukati ayo anaahala ukaviheriya naamucyaaya amphwanyannya ntuninyani motheene, mayamunnaaya ni mayanuunwaaya akristau—1 Pet. 2:17.

12. Isiyani atthu akhwaawe inlamuliyaaya upanka wiira akavihere yakhumelelaka ihasara? (Nwehe ilatarato.)

¹² Itthu atthu akiina inlamuliyaaya upanka. Yakhumelelaka ihasara wakhiviru nincoko unkhaleenyu, mwaakohe mahumu inanna nyuuva cinhaleenyu ukavihera. Atthunaka nyuuva pooti uwaakhelela wapuwani winyu ale yaakhumelenle ihasara awula ale awaale ukavihera utekateka. Nyuuva ciicammo pooti ukavihera nteko wookaweliya iyoolya ni citthu cikhwaawe anamalalyeera ampheela ukaviheriya. Vano manannani nyuuva cinhaleenyu ukavihera yakhumelelaka ihasara uttayi nincoko unkhaleenyu? Nyuuva pooti waalompela ale yaakhumelenle ihasara. (2 Akor. 1:8-11) Nyuuva ciicammo pooti ukavihera nteko wookaviheriya mayamunna nvahaka micanko cinvahiya wiira cikaviheriye miteko cihu ntuninyani  motheene. (2 Akor. 8:2-5) Mwakhalana inanna yoorwaa mpaka nipuro noottayi nikhumelenle ihasara wiira nkavihere, mwaakohe mahumu tokooni wiira ncuwele isiyani inlamuliyeenyu upanka. Mwapankaka commo ni mwalattuliyaka urwaa, nnaahala wiitthucihiya mananna oopheela ukavihera saana.

13. Marikarikoni mayamunna anaananaaya mapuro unkhottihiyaaya ntekweehu woolalyeera?

¹³ Mapuro unaateelihiyaaya ntekweehu woolalyeera, makhalelo o mayamunna anaakhala ootepa urikarikaca. Uhiya ulupatthiya, ayo pooti waathwa nsurukhu, uwerennya ni ukhweliya. Nlattu woolupatthiya, mahumu pooti waarikela waathotola mayamunna ni ciicammo waalikarela wiira yaalipihe. Iyo phi itthu yankhumelenle munna Andrei oolumiye nhina mwaha uvinre. Arokorihu amoca ari ikhurupwaawe yo wuulalyeerani yaanawaanana marikariko nlattu woothwennya. Ayo ciicammo yahaapanka asitente niikaaro. Ayo yahooperariya ikwaha cinci ni nlattu wo iyo itthwiiyo, khayaalamuliya uvara nteko. Waahookhalaru wiira yaanaalupatthiya ni hataa wakhalaka ukati wokoronaviiru, mayamunna yahopanka yotheene yaakhitinryaaya wiira yaakavihere arokorihu. Ni Yehova ahoona citthu cotheene.

14. Manannani mahumu anhalaaya uthoonyihera wiira anankhuluvela Yehova?

¹⁴ Itthu mahumu inlamuliyaaya upanka. Andrei aholompa ni ahopanka itthu yaakhitiryaawe. Manannani Yehova aakhunlyaawe mavekelo a Andrei? Uyo ahaaruma mayamunna enci yaarina citthu wiira yaakavihere ale anuunwaale. Akiina yaanaakusa usipiritaali, akiina yaavaha nsurukhu wiira yaakavihere. Yehova ahaakurumica ayo mayamunnaayo wiira apanke ile yaakhitiryaaya ni ahaacaaliha nlattu wo wiiwanana ni ulipa nrima waarinaaya. (Mabere. 13:16) Mahumu, wakhala wiira ncoko unkhaleenyu unawaateelihiya nteko woolalyeera, mwaavahacere mirintti mayamunna akhwaawe. (Jer. 36:5, 6) Ni itthu ikhanle yofayita cinene ukhanle unkhuluvela Yehova. Uyo naahala wuukaviherani wiira nkhitiri waakavihera mayamunna ni mayanuunu.

15. Isiyani inlamuliyeehu upanka wiira nikhale owiiwanana ntekweehu woolalyeera waateelihiyaka?

¹⁵ Itthu atthu akiina inlamuliyaaya upanka. Uwakati unlupatthiyeehu, atthunaka nihaana nipankaka mikutthaano niikhurupu cooyevaca. Phimaana, ikhanle itthu yofayita cinene waavya ukhalana nnema nimayamunna. Nwananiihu khanle Sotwani, khanahimwe mayamunneehu. Nhiweherere wiira mayamunna citthu cotheene cimpankaaya khanhala uvonya.  Ni mwakhalana nanrokottole nimunneenyu, mummalihe woohipicapica. (Miru. 19:11; Efesu 4:26) Nlakele waakavihera akhwiinyu. (Titu 3:14) Ukaviheriya waya ale anuunu yaapheela ukaviheriyaale wahovara nrima cinene ni ikhurupwaaya yahotepa wiiwanana khampa amuci.—Isaa. 133:1.

16. Toko cinhimyaaya Akoloso 4:3, 18, manannani hiiva ninlamuliyeehu waakavihera mayamunna anlupatthiya?

¹⁶ Mayamunneehu ni miyanuunwiihu enci ananvarela nteko Yehova hataa yalupatthiyaka niikuvernu. Akiina anaatthukiya nlattu wo waamini waya. Hi pooti wanaalompeleehu ayova, amucyaaya ni ale anleva utaphuwa waya wiira yaakavihere ayo mayamunnaayo nhina mminepani, muukumini waya ni ciicammo wiira yaakavihere utiripunaali. e (Nsome Akolosu 4:3, 18. f) Nhiliyale wiira mavekelo ampankeenyu anawaakavihera ayo mayamunnaayo!—2 Atesal. 3:1, 2; 1 Tim. 2:1, 2.

17. Manannani nnohaleenyu wiitthenkaca nenna co wiira mwakhitiri uvilela mwalupatthiyaka?

¹⁷ Ukhuma nenna co, nyuuva ni amuciinyu pooti wiitthenkaca wiira mwakhitiri uvilela mwalupatthiyaka. (Mite. 14:22) Nhimananihe wuupuwela citthu cootakhala cinhala ukhumelela uhoolo. Uhiya commo, nlipihace upatthaniinyu ni Yehova ni mwaakavihere asaaniinyu upanka iyo itthwiiyo. Mwakhalaka nimasukhuli, munhimyeere Yehova. (Isaa. 62:7, 8) Nkhayi ni amuciinyu, moopele mwaha citthu cotheene cinwiirihani unkhuluvela Yehova. g Nlattu woopanka commo, yakhumelelaka ihasara unkhuluvela winyu Yehova ni wiitthenkaca winyu saana unaahala uwiiriha asaaniinyu ukhala oolipa nrima ni ukhalana nnema.

18. Isiyani ninlamuliyeehu uweherera uhoolo?

¹⁸ Nnema na Nluku ninaanikavihera ukhala woohimasukhuli ni woohoova. (Afili. 4:6, 7) Nlattu nno nnemanno, Yehova naamaaliha nrimeehu, hataa niwerennyaka, cinikhumelelaka ihasara ni nilupatthiyaka. Uyo nawaakurumica mahumu wiira aniwacere. Uyo naanicaaliha wiira nikhitiri ukaviherana. Nnema ninkhalaneehu ilelo ninaahala unikavihera uvilela marikariko moolupale anhala ukhumelela mahukwaala ni anhaleehu ukhalana ukati wo “masakha moolupale.” (Mat. 24:21) Uyo ukatyuuyo, hiiva nihaana nirwaaka wiikurumica uhihiya ukhalana nnema ni waakavihera akhwiihu upanka iyo itthwiiyo. Masi waviraka ukati wo masakha moolupale, marikariko otheene anhala ukhala itthu yoovira, kontha Yehova naahala unipankela itthu impheelaawe nenne nokhalayi—univaha nnema neekhweeli ni noohimala.—Isai. 26:3, 4.