Uwakati Yehova waawiirenlyaawe apinaatamu wiira ‘yincive ni awacere ituninya,’ uyo aathoonyera wiira vakaani-vakaani ituninya yanhala ukhala ipeephoni. (Upha. 1:28) Ale anhala uvahiya ituninya ahaana yarwaaka uvarela nteko ayo moolumwaayo. Masi ukhala wiira ijardim yo Eeteni khiivo-tho, wiira hiiva nirwee nakhalihe ituninya ipeephoni, nihaana nirwaaka upacera tootho. Yaviraka ikhotto yo Harmacetom, ninaahala ukhalana nteko muulupale woorehererya ituninya pinaatamu ihononnyaawe. Iyo inthoonyera wiira ninaahala ukhalana nteko mwinci!

Iyo inaanuupusera nteko waavaralyaaya asarayeli uwakati waakhumalyaaya u Babilooniya yarwaaka u Isarayeli. Cahovira myaakha cookhalaka 70 uhikhaliyaka ile ilapweele. Masi porofeeta Isaiya ahohimya wiira yakaviheriyaka ni Yehova, ayo yaanaahala ukhitiri ukhaliha ile ilapweele nipuro nooreera. Uyo enre co: “Itakhwaaya inhala ukhala khampa ijardim yo Eeteni, ni itthayaaya yowuuma  naahala ukhaliha khampa ijardim ya Yehova.” (Isai. 51:3) Iyo itthwiiyo khweeliini iheerannya. Inanna imocaaru, yakaviheriyaka ni Yehova, ale anhala ukhala watuninyani anaahala ukhitiri ukhaliha ituninya ipeephoni. Vano, cihaavo citthu cinlamuliyeenyu upanka nenna co cinthoonyihera wiira nnaapheela ukavihera uyo ntekooyo.

Itthu imoca nyuuva inlamuliyeenyu wiikurumica upanka ukhanle wiikurumica ukwecakweca wapuwani winyu wiira ukhale nipuro nomaana. Nyuuva pooti upanka iyo itthwiiyo, hataa aattamananiinyu yahoonaka ukhala itthu yofayita. Nyuuva ciicammo pooti ukavihera ureeriha Isalau yo Umwene ni Isalau yo Mithukumano Cuulupale. Ni wakhalaka wiira nnaakhitiri, nyuuva pooti wiikurumica wiira mwaakavihere mayamunna yaakhumelenle ihasara. Mwapankaka commo, nnaahala uthoonyihera wiira nnaapheela cinene waakavihera mayamunneenyu ni mayanuunwiinyu. Mwiikohe co: ‘Isiyani miiva inlamuliyaaka wiitthuca upanka nenna co wiira kakavihere upeephoni?’

Uwakati wonwelelihiyaawe mwaana a Jairo, Yesu aheera wiira avahiye itthu wiira alye. (Mark. 5:42, 43) Yaari itthu yoohirika cinene unkavihera mwanthiyana aarina myaakha 12 paahi. Masi vano muupuwele nteko unhaleehu ukhalana uwakati Yesu unhalaawe umwiirannyeeha natiri mpankilyaawe, kontha “unaahala uphiya ukati unhalaaya wiiwa ncu nawe otheene ari mmahiyeni ni anaahala ukhuma.” (Joau 5:28, 29) Hataa ukhalaka wiira Ibiiblya khinhimya citthu cinci coopeephoni, unawoonannya wiira ale anhala wunwelelihiya anaahala upheela ulya, ikuwo ni nipuro noohala ukhala. Nyuuva pooti uthoonyera nenna co wiira nnaapheela urwaa ukavihera. Nttwee noona citthu cinlamuliyeenyu upanka.

Mwacuwelaka wiira mootoli osirikwiitu naawa uthotola wanlokoni winyu, nyuuva pooti wiikurumica wiira mummeele iyoolya. Wakhalaka wiira munneenyu aakavihera u Peteli awula aari mootoli osirikwiitu hohiya nteko waavaraawe ni hothamela nloko niriinyu, nyuuva pooti unkavihera uphwanya nipuro noohala ukhala. Wakhalaka wiira inaahala upankiya ikonkereesu ncoko unkhaleenyu, nyuuva pooti urwaa ukavihera nkhayi nimayamunna ihinaaya ikonkereesu, awula inamalale awula  pooti uwaakhelela mayamunna ankhuma mapuro oottayi.

Toko cinhimyaaya Miteko 24:15, unawoonannya wiira atthu imiliyau cene anaahala wunwelelihiya. Ayo atthwaayo khayaarina uwakati woncuwela Yehova ahinaaya ukhwa. Atthu enci anaahala ukhalana iparakha yoncuwela Yehova uwakati unhalaaya wunwelelihiya. a Nluku naahala waaruma atthu ookhuluvelya anonswalela wiira yawiitthucihe atthu anhala wunwelelihiya. (Isai. 11:9) Nrokorihu mmoca neehaniya Charlotte, varale nteko woolalyeera u Europa, América do Sul ni u África naapheela ukavihera cinene nnyo mitekonnyo. Uyo heera: “Mi kinaapheela cinene waakavihera atthu anhala wunwelelihiya. Kasomaka makhalelwaawe ntthu okhalayi, mi kinawuupuwelaka: ‘Ukumyaawe uyo ntthuuyo waahala ukhala woovirikana unari wiira honcuwela Yehova.’ Mi kinoona upica uphiya uwakati unhalaaka uwiitthuciha atthu myaha ca Yehova.”

Aswali ookhuluvelya a Yehova akhalale hinaaya uwa Yesu va watuninyani va anaahala upheela wiitthucihiya cinene. Muupuwele utteeliya ni iparakha cinhaleehu ukhalana uwakati ninhaleehu umuulumana Daniele, ninhimyeeraka mananna ciirannyaalaaya inatiri cantikhalyaawe cahaacuwelelaawe itthu yaataphulelaaya. (Dan. 12:8) Awula mwiicuupuwele mmwiitthucihaka Rute ni Nowemi wiira ayo akhanle atthu ampanka mphantte waamuci uyariyaawe Mesiya. Khweeliini, inhala ukhala itthu yootepa ureera upanka mphantte nhina uyo ntekooyo woohisuphiya ni woohimarikariko o ila ituninya ninkhaleehwiila!

Isiyani nyuuva inhaleenyu upanka nenna co wiira nthoonyihere ukhala owiitthenkaceene wiira mwaasomihe atthu anhala wunwelelihiya? Itthu inlamuliyeehu upanka ukhanle wiikurumica wiitthuciha saana ni uhihiyerera uvara nteko woolalyeera. (Mat. 24:14) Hataa ukhalaka wiira nyuuva khannokhitiri ulalyeera ukati mwinci toko caapheeleenyu, atthunaka nlattu wo wuuluvala awula itthu ikhwaawe, mwiikurumice upanka inkhitiriinyu nenna co mwapheelaka urwaa waasomiha atthu anhala wunwelelihiya.

Nikoho nofayita ninkhumelela phi nna: Nyuuva nnaapheela ukhala watuninyani inhala uwa? Niireke wiira nyuuva ciicammo nnoona upica uphiya ukati woohala ukhaliha ituninya ipeephoni, waawacera ni waasomiha atthu anhala wunwelelihiya? Nyuuva nnohala uthoonyera wiira nheetthenkaca mweekurumicaka nenna co uvara miteko coolattanaca nimiteko cinhaleenyu uvara upeephoni!