1. Isiyani inkhumelelaka neemelaka nuupuwelaka niweherero Yehova ninnivahaawe nookhalana ukumi woohimala?

 YEHOVA naakhuluveliha wiira atthu ammwiiwelela anaahala ukhalana “ukumi woohimala.” (Aroo. 6:23) Mweemele ni muupuwele: Yehova naanifenta cinene, phimaana nopheela ukhala nihiivano mpaka. Neemelaka nuupuwelaka nno niwehereronno, khweeliini ninaahala utepa unfenta Yehova.

2. Niweherero noohala ukhalana ukumi woohimala ninnikavihera cani?

² Niweherero Nluku ninnivahaawe noohala ukhalana ukumi woohimala ninaanikavihera yanikhumelelaka masakha muukumini wihu. Hataa awananiihu yanoopopihaka uniiva, hiiva khaninhala uhiya unswalela Yehova. Kontha isiyani? Kontha ninaacuwela wiira hiiva nakhwaaka ninswalelaka Yehova, uyo naahala ununwenliha ni khaninhala uweherera-tho ukhwa. (Joau 5:28, 29; 1 Akor. 15:55-58; Mabere. 2:15) Masi isiyani innikupaliha wiira ninaahala ukhalana ukumi woohimala? Nttwee noone citthu cinnikupaliha.

3. Nlattuni ninkupaliihu wiira Yehova naahala univaha ukumi woohimala? (Nwehe Isaalimu 102:12, 24, 27.)

³ Hiiva ninaakupali wiira Yehova naahala uniiriha ukhala mpaka kontha uyova phumpale ukumi ni haana ukumi woohimalela. (Isaa. 36:9) Vano moone iveerusu cikhwaawe co mbiiblyani cinthoonyera wiira ukumi urinaawe Yehova khupacenre ni khunhala umalela. Isaalimu 90:2 ineera wiira Yehova Nluku haavo “ukhuma nenne-nenne ni naahala ukhala mpaka uhoolo uhimmalela.” Iveerusu cikhwaawe co Isaalimu 102 ciicammo cinaahimya iyo itthwiiyo. (Nsome Isaalimu 102:12, 24, 27. b) Ni porofeeta Habakuki hantikha co amwaacaka Yehova:  “Oo Yehova, weeva uhaavo ukhuma nenne-nenne, keera? Oo Nlukwaaka owaarya, weeva khunkhwa.”—Habak. 1:12.

4. Ikhanle itthu yootakhala wanirikaka ukupali wiira Yehova haavo ukhuma nenne nokhalayi? Ntaphulele.

⁴ Nyuuva unawuurikani ukupali wiira Yehova “khanle Nluku ukhuma nenne nokhalayi ni naahala ukhala mpaka”? (Isai. 40:28) Wakhala wiira unawuurikani, nyuuva khanri veekha. Eliwu aheera co amwaacaka Yehova: “Myaakha caa khaavo ncuwela.” (Jó 36:26) Cihaavo citthu cikhwaawe cinnirika ucuwelela. Masi khunakhala wiira nnyo citthunnyo khacinakhala cokhweeli. Wootakihera, atthu enci khancuwelela mananna inergia cinvaraaya nteko, masi iyo khinthoonyera wiira inergia khiivo. Inanna imocaaru, Yehova haavo ukhuma nenne nokhalayi ni naahala ukhala mpaka. Hiiva pooti unirika ucuwelela iyo itthwiiyo, masi ikhanle ikhweeli. (Aroo. 11:33-36) Hataa citthu cotheene wiirimu ni vathi cihinaaya wumpiya—toko ncuwa ni itthonttwa—Yehova ahaavo. Yehova naanikhuluveliha wiira uyo ‘phumpile ituninya niikuru cawe ni phaatanle irimu.’ (Jer. 51:15; Mite. 17:24) Citthuni cikhwaawe cinniiriha ukupali wiira hiiva ninaahala ukhala mpaka?

5. Isiyani Atamu ni Hawa yaahalaaya ukhalana unari wiira yahomwiiwelela Yehova?

⁵ Niireke wiira Yehova ompile citthu cikumi cotheene wiira cikhale mpaka? Mena. Apinaatamu paahi phumpiye wiira akhale mpaka. Hataa ukhalaka commo, Yehova ahomwiirela Atamu co: “Mwiri uncuweleliha ankhili omaana ni oohinamaana, uhilyeeni, kontha nihuku ninhalaa ulya, weeva khweeliini unaahala ukhwa.” (Upha. 2:17) Unari wiira Atamu ni Hawa yahomwiiwelela Yehova, ayo khayaahala ukhwa. Pooti ukhalaka wiira nuuwakatyaaya, Yehova anhala waatthunihera ulya “mwiri wookumi.” Commo, Yehova aanaahala waavaha nikhuluveliho wiira yanhala ukhala mpaka woohiweherera-tho ukhwa. c—Upha. 3:22.

6-7. a) Isiyani inthoonyera wiira apinaatamu khayumpiye wiira akhwe? b) Isiyani nyuuva impheeleenyu upanka upeephoni? (Nwehe ilatarato.)

⁶ Apinaatamu pooti ukhala myaakha 70 ni 80. Masiyentista makhwaawe ahoonelela wiira ukooko unaakhitiri usunka citthu cinci. Mwaakha wo 2010, irevista imoca yo masiyentista yaheera wiira ukooko unaakhitiri usunka citthu cookhalaka 2,5 milhões de gigabytes; iyo inaalikana niividiyu cookaravariya cookhalana iwoora imiliyau  cene. Watakanihaka, nnyo iwoorannyo cinaapwaha myaakha 300. Masi pooti ukhalaka wiira ukooko unaakhitiri usunka citthu cinci uvikana nnyo. Mananna ukooko ciryaaya unaanithoonyera wiira Yehova numpile wiira nikhale ukati mwinci, kahi myaakha 70 awula 80 paahi.—Isaa. 90:10.

⁷ Yehova ciicammo numpale wiira hiiva nipheele ukhala mpaka. Ibiiblya ineera wiira Yehova honihela wanrima ‘upheela ukhala mpaka.’ (Ekles. 3:11) Phimaana, ninooneehu ukhwa khampa nwananiihu. (1 Akor. 15:26) Wootakihera, niireke ntthu awerennyaka cinene khiivo impankaawe-tho ni noweherera ukhwa paasi? Mena. Uyo nampheelaca meetiku wiira avonihiye iretta inonwerya. Otheene cihu ninawiikhikicera wiira nihikhwe. Ni ntthu nonfenteehu akhwaaka, hataa ukhalaka wiira ahooluvala, hi ninaakhala oocukulaca cinene. (Joau 11:32, 33) Unari wiira Yehova numpale wiira nikhale uwakati vakaani paahi, khweeliini uyo khaahala uniiriha upheela ukhala mpaka. Masi ihaavo itthu ikhwaawe innikupaliha wiira ninaahala ukhala mpaka. Nttwee noone citthu cipankalyaawe Yehova khalayi ni cimpankaawe nnaco cinthoonyera wiira uyo kharukunusale moopuwelelwaawe.

8. Isiyani Isaiya 55:11 inniitthucihaaya nhina itthu ilakenlyaawe Yehova?

⁸ Atamu ni Hawa yahovara matampi, phimaana hiiva ninkhweehu. Unookhalaru commo, Yehova nanlelo naapheela upanka itthu ilakenlyaawe. (Nsome Isaiya 55:11. d) Uyo  nanlelo naapheela waavaha ukumi woohimala atthu ammwiiwelela. Iyo itthwiiyo inoonannya hiiva neemelaka nuupuwelaka citthu Yehova cihimyalyaawe ni cipankilyaawe wiira eerannyeehe itthu ilakenlyaawe.

9. Isiyani Yehova khuluvelihalyaawe? (Nwehe Daniele 12:2, 13.)

⁹ Yehova hokhuluveliha wiira naahala uwunweleliha atthu akhwile ni waavaha niweherero nookhalana ukumi woohimala. (Mite. 24:15; Titu 1:1, 2) Jó, nswali a Yehova ookhuluvelya aanaakupaleela wiira Nluku naapheela waahokolosera ukhala akumi ale akhwile. (Jó 14:14, 15) Porofeeta Daniele aanaacuwela wiira apinaatamu anaahala wunwelelihiya wiira akhale mpaka. (Isaa. 37:29; nsome Daniele 12:2, 13. e) Ayuuta yaakhala uwakati wa Yesu yaanaacuwela wiira aswali ookhuluvelya a Yehova yaanaahala ukhalana ukumi woohimala. (Luka 10:25; 18:18) Yesu ahooluma nno niwehereronno ikwaha cinci ni uyo ahonwelelihiya ni Yehova.—Mat. 19:29; 22:31, 32; Luka 18:30; Joau 11:25.

10. Wunwelelihiya waatthu wiirannyaale khalayi unthoonyera isiyani? (Nwehe ilatarato.)

¹⁰ Yehova phumpale ukumi ni haana ikuru yoowunweleliha atthu akhwile. Yehova ahonvaha ikuru porofeeta Eliyasi wiira amunwelelihe mwaana a nankhweli o Sarefá. (1 Mam. 17:21-23) Uwakati nkhwaawe, Yehova ahonkavihera porofeeta Elisewu umunwenliha mwaana a nthiyana nsunamita. (2 Mam. 4:18-20, 34-37) Yehova uwunweleliha wawe ayo atthwaayo ni akhwaawe unaathoonyera wiira uyo haana ikuru yoowunweleliha atthu akhwile. Ukati Yesu waaryaawe watuninyani, ahothoonyera wiira Athumwaane yahonvaha ikuru yoowunweleliha atthu ookhwa. (Joau 11:23-25, 43, 44) Nnaco, Yesu ri wiirimu ni hovahiya “ukhulupale wotheene wiirimu ni vathi.” Phimaana, uyo pooti wiirannyeeha inatiri yoowunweleliha atthu otheene ari mmahiye ni waavaha niweherero nookhala mpaka.—Mat. 28:18; Joau 5:25-29.

11. Manannani wiivaherera wa Yesu cinniirihaaya uphwanya ukumi woohimala?

¹¹ Kontha isiyani Yehova hiyalyaawe wiira Yesu eeviye nimananna oowerya? Yesu haakhula eeraka co: “Nluku haafenta cinene apinaatamu, phimaana haavaha Mwanawe mmoca, wiira ntthu nhala umwaamini hitankanyiye, masi aphwanye ukumi woohimala.” (Joau 3:16) Wiivaherera wawe Yesu wiira anoopole uhokhitiriha wiira Yehova anilevelele matampiihu ni anivahe ukumi woohimala. (Mat. 20:28) Apostolu Paulu hotaphulela iyo itthu yofayiteeyo, eeraka co: “Ukhala wiira ukhwa uwaale nlattu wa nlopwana mmoca, wunwelelihiya waatthu ookhwa ciicammo unwa nlattu wa nlopwana mmoca paasi. Kontha, toko cinkhwaaya atthu otheene nlattu wa Atamu, ciicammo atthu otheene anaahala waakhela ukumi nlattu wa Kristu.”—1 Akor. 15:21, 22.

12. Manannani Yehova cinhalaawe uvarela nteko umwennyaawe wiira eerannyeehe itthu impheelaawe?

¹² Yesu ahowiitthuciha attharyaawe ulompa wiira Umwene wa Nluku uwe ni yiirannye watuninyani itthu impheelaawe mwaneene Nluku. (Mat. 6:9, 10) Itthu impheelaawe Nluku phi ila: apinaatamu ukhala watuninyani mpaka. Wiira yiirannye iyo itthwiiyo, Yehova honthanla Yesu wiira akhale Mwene o Umwene wa Nluku. Nanlelo Yehova nawaathukumaniha atthu 144.000 o watuninyani wiira nkhayi ni Yesu yiirannyeehe itthu impheelaawe.—Apoka. 5:9, 10.

13. Isiyani Yehova impankaawe wiira yiirannye ile impheelaawe, ni manannani ninlamuliyeehu ukavihera wiirannya?

 ¹³ Yehova naatthenkaca “mphwinko muulupale” waatthu wiira ahooleliye nuumwennyaawe. (Apoka. 7:9, 10; Tiya. 2:8) Ayo atthwaayo ilelo ankhala ituninya yoohiiwananiya nlattu woothanyaniya ni nlattu wokhotto. Masi ale ampanka mphantte wo mphwinko muulupale anawiikurumica wiira uthanyana uhikhale wanrimani waya. Unkhala khampa ayo atthwaayo anaahana ikatana caya cokhotto wiira akhalihe ikaruma coolimela. (Mik. 4:3) Uhiya urwaa ukhottoni wiira awiive atthu, ayo anawiitthuciha moolumo a Nluku ni itthu impheelaawe waapankela apinaatamu wiira yaakavihere atthu uphwanya “ukumi weekhweeli.” (1 Tim. 6:19) Nlattu wookavihera Umwene wa Nluku, ayo pooti ulupatthiya naamucyaaya ni waathwa nsurukhu, masi Yehova khanhiya waakavihera uphwanya citthu cinaathwa. (Mat. 6:25, 30-33; Luka 18:29, 30) Citthu cotheene nnyo cinthoonyera wiira Umwene wa Nluku khweeliini uhaavo ni khunhala uhiya wiirannyeeha itthu impheelaawe Yehova.

14-15. Manannani Yehova nohalaawe wiirannyeeha inatiri yoomaliha ukhwa wiira uhikhale-tho?

¹⁴ Yesu nnaco khanle mwene wiirimu ni heetthenkaca wiira eerannyeehe inatiri Yehova cipankilyaawe. (2 Akor. 1:20) Ukhuma mwaakha wo 1914, Yesu neera aatthemaka awanannyaawe.  (Isaa. 110:1, 2) Woohipica, uyo ni makristau oothanliya 144.000 anaahala waamalamaliha atthu oohinamaana watuninyani.—Apoka. 6:2.

¹⁵ Ukati wo myaakha 1.000 Yesu unhalaawe ulamulela, uyo naahala uwunweleliha atthu ookhwa ni waakavihera ale ammwiiwelela Nluku ukhala oohipahuwa. Unavinre uttehiya woomalela, atthu otheene Yehova nohalaawe uwoona ukhala anasariya anaahala “ukhala watuninyani ni ankookhala mpaka.” (Isaa. 37:10, 11, 29) Ukhwa “phi nwanani oomalela nhala umalamalihiya.”—1 Akor. 15:26.

16. Isiyani inlamuliya uniiriha unswalela Yehova?

¹⁶ Toko nonaleehu nhina ula mwahoola, niweherero nihu nookhalana ukumi woohimala ninlipiheriya nnuulumoni na Nluku. Nno niwehereronno pooti unikavihera utepa unvaresesa Yehova ala mahuku ookhicera ni oorikarikaala. Wiira nintteelihe nrima Yehova, nihaana ninswalelaka kahi wiira niphwanye ukumi woohimala. Itthu yuulupale inlamuliya uniiriha unvaresesa Yehova ni Yesu ukhaleke waafenta wihu. (2 Akor. 5:14, 15) Nno nifentonno ninaahala unikurumica utakiha makhalelo a Yehova ni a Yesu ni wiikurumica uvara cinene nteko woolalyeera. (Aroo. 10:13-15) Neetthucaka uhitepa wiivaha ifayita naasineeneehu, hi ninaahala ukhala anamavaha ni upatthaniihu ni Yehova unaahala uvira utepaka ulipa mpaka.—Mabere. 13:16.

17. Isiyani khula ntthu inlamuliyaawe uthanla upanka? (Nwehe Matewus 7:13, 14.)

¹⁷ Niireke hiiva ninaapanka mphantte waatthu anhala ukhala mpaka? Yehova naanivaha uwakati wiira nikhale nhina ikhurupu yaayo atthwaayo. Vano, khula ntthu iriyariihu haana athanlaka weetta munttalani wookumi. (Nsome Matewus 7:13, 14. f) Masi ukumi woohimala unweherereehu unhala ukhala cani? Mwaha nkiina unhaleehu usoma unaahala waakhula nno nikohonno.