1. “Nnema na Nluku” nikhanle isiyani, ni innikhumelela isiyani nakhalanaka nno nnemanno? (Nwehe Afilipo 4:6, 7.)

 IHAAVO inanna yo nnema atthu o ntuninyani ahirinaaya: “nnema na Nluku.” Nno nnemanno ukhanle wiicoona ratta unkhalanaaya paahi atthu arina upatthani womaana ni Yehova. Nakhalanaka nnema ninnivahaawe Nluku, hi ninaakhala woohoova. (Nsome Afilipo 4:6, 7. b) Ciicammo, ninaakhalana upatthani womaana naatthu akhwaawe anonfenta Yehova ni itthu yootepa ureera, ukhalaka wiira ninampatthanana “Nluku nannema.” (1 Atesal. 5:23) Nancuwelaka, namwiiwelelaka ni nankhuluvelaka Yehova, nnema ninvahaawe ninaahala umaaliha nrimeehu yanikhumelelaka masakha.

2. Nincuwela cani wiira unaakhitirya hiiva ukhalana nnema na Nluku?

² Niireke wiira hiivano pooti ukhalana nnema yanikhumelelaka masankiho muukumini wihu, toko iretta coomwaryeela, ihasara, ikhotto ni ulupatthiya? Masakha otheene ayo pooti uniiriha hiiva woova. Hataa ukhalaka commo, hiiva nihaana nuupuwelaka ikano Yesu yaavahilyaawe attharyaawe: “Nhikhale nimasukhuli wanrimani winyu ni nhoove.” (Joau 14:27) Mayamunna ni mayanuunu enci anaatthara ikano ya Yesu, ni yakaviheriyaka ni Yehova, ayo anaakhitiri ukhalana nnema hataa yakhalanaka masakha moolupale.    

3. Iretta coomwaryeela manannani cinrukunusaaya makhalelweehu?

³ Iretta coomwaryeela pooti urukunusa cinene makhalelweehu. Wootakihera, iretta yo COVID-19 ihorukunusa makhalelo aatthu  enci. Anamasoma ahoonelela wiira atthu enci yaakohakohiye yaheera wiira waanawaarika urupa nlattu wo COVID-19. Nlattu woretta yokoronaviiru, nihenciva nummeru naatthu ankhala nimasukhuli, ooriipiya nrima, oolya citthu coohapala toko isuruma, oohapaliya, ahenciva ananrokottole mmapuwani ni atthu oomananiha wiiciiva. Wakhala wiira ihomwaryeela iretta nipuro ninkhaleenyu, nnohala ukhitiri cani uvukula masukhuliinyu ni ukhalana nnema na Nluku?

4. Kontha isiyani ucuwela inatiri ya Yesu yo mahuku ookhicera unaanivaha nnema?

⁴ Yesu aheera wiira uwakati wo mahuku ookhicera canhala umwaryeela iretta “khula nipuro.” (Luka 21:11) Ucuwela iyo itthwiiyo unhala univaha nnema cani? Unaanivaha nnema kontha hiiva khanintuthuwa noonaka ikwerere cimwaryeelaka. Ninaacuwela wiira citthu cotheene cinkhumelela ilelo Yesu aheera wiira canhala wiirannya. Phimaana, unaareera utthara ikano Yesu yaavahilyaawe atthu yaahala ukhala mahuku ookhicera: “Nhituthuwe.”—Mat. 24:6.

5. a) Toko cinthoonyeraaya Afilipo 4:8, 9, cakhumelelaka iretta coomwaryeela, hiiva nihaana nilompaka nilepelaka isiyani? b) Manannani wiiwa awudiyu obiiblya cinhalaaya wuukaviherani?

⁵ Yakhumelelaka iretta yoomwaryeela, hiiva pooti ukhala nimasukhuli ni woova. Iyo itthwiiyo yahaakhumelela anuunwiihu aneehaniya Desi. c Ahaalwaaya, mwanrokoraya ni hataa ameetikwaaya yahokhwa nlattu woretta yo COVID-19. Ayo yahoova uphwanya iretta yo koronaviiru ni waavaha anumwanaya yuuluvanle. Ni nlattu woretta yo koronaviiru, ayo yaanawoova ukumihiya nteko ni uhikhalana mananna owaaliha amucyaaya ni uliva inupa yaalukaryaaya. Ayo yahokhala nimasukhuli ni khayaakhitiri urupa. Masi anuunwiihu Desi yahokhitiri uhokoleela ukhalana nnema. Ayo yaholompa yanlepelaka Yehova wiira aakavihere uhiya wuupuwela citthu cooriipiha nrima ni ukhala oomaala. (Nsome Afilipo 4:8, 9. d) Anuunwiihu yeewelelaka awudiyu obiiblya yookaravariya, waakhala khampa yaanaamwiiwa Yehova awuulumanaka. Ayo aheera: “Ncu noomaalya no mayamunna ansoma Ibiiblya yookaravariya naanaakimaaliha ni naanaakupusera wiira Yehova naakiwacera.”—Isaa. 94:19.

6. Manannani usoma wo veekha ni mikutthaano cinhalaaya wuukaviherani?

⁶ Iretta coomwaryeela pooti urukunusa makhalelweehu, masi khaninlamuliya uhiya upanka usoma wo veeka ni urwaa umikutthaanoni. Citthu cinwiirannyeela mayamunneehu ni mayanuunwiihu cinhimiya mmavidiyuni ni mmalivuruni cihu cinaathoonyera wiira ayo mayamunnaayo anaakhitiri umwiiwelela Yehova hataa yaakhumelelaka masakha. (1 Pet. 5:9)  Ciicammo, mikutthaano pooti wuukaviherani ucariha mmuru winyu moopuwelelo omaana o mbiiblyani. Ni nnyo mikutthaanonnyo cinaanikavihera ulipihana. (Aroo. 1:11, 12) Moopuwelaka mananna Yehova cinaakaviheraawe aswalyaawe uvilela iretta, woova ni wiicoona ukhala veekha, waamini winyu unaatepa ukhala woolipa ni nnaakhuluvela wiira uyo naahala wuukavihera nyuuva ciicammo.

7. Itthu yankhumelenle apostolu Joau inniitthuciha isiyani?

⁷ Nhihiye uwuulumana mayamunna ni mayanuunu o wanlokoni. Nlattu woretta coomwaryeela, pooti ukhalaka wiira khaninkhitiri woonanaca nimayamunneehu co ni co. Uyo ukatyuuyo, hiiva pooti wiicoona khampa apostolu Joau. Uyo ampheela cinene umoona co ni co mpwanaawe eehaniya Gaio. (3 Jo. 13, 14) Masi Joau ancuwela wiira uyo ukatyuuyo khaahala ukhitiri woonanaca nimpwanaawe. Waanookhalaru commo, uyo khaahiile umuulumana mpwanaawe amwantikhelaka iwarakha. Mwaahikhitiriki woonanaca nimayamunneenyu o wanlokoni, mmananihe uwuulumana nimananna makhwaawe, khampa telefooni, ichamada yovidiyu awula imensagem. Naahihiyeke uwuulumana mayamunneehu o wanlokoni, ninaakhalana nnema ni khanineecoona ukhala veekha. Wakhala wiira nyuuva nnawiicoona ukhala nimasukhuli menci, mwaalepele mahumu wuukaviherani ni ntthune wuukaviherani.—Isai. 32:1, 2.

8. Manannani caahaleehu wiicoona yanikhumelelaka ihasara?

⁸ Yookhumelelakani ihasara, toko ucara maaci, uttettemela itthaya awula uvya inupa, nyuuva pooti uviriha ukati mwinci nnari nimasukhuli. Ni akhwaaka ntthu nyuuva anfenteenyu nlattu wohasara ikhumelenle, awula mwahaleelaka citthu cinyu, nyuuva pooti ucukula, uvelavela ni urusiya. Wiicoona commo khunthoonyera wiira nyuuva nkhanle ntthu owuucivelani mihakhu awula uhikhalana waamini mwinci. Nyuuva nhaana isariya yo wiicoona commo mahuku oopacera kontha ihookhumelelani itthu yoosankiha venci. (Jó 1:11) Masi hataa yookhumelelakani ayo masankihwaayo, nyuuva pooti ukhalana nnema. Manannani?

9. Moolumoni a Yesu annitthenkaca ihinaaya unikhumelela ihasara?

⁹ Nhiliyale wiira Yesu ahohimya wiira wanhala ukhumelela uttettemela wotthaya ni ihasara cikhwaawe ihinaaya umalamalihiya ila ituninyeela. (Luka 21:11) Woovirikana naatthu o ntuninyani anoopuwela wiira khacinhala waakhumelela ihasara, hiiva ninaacuwela wiira cinaahala utepa unikhumelela ihasara cinhala urukunusa makhalelweehu. Yesu ahohimya wiira canhala “winciva citthu cinvirikaniha malamulo.” Hi ninawoona nnyo citthu cikhumelelaka, toko ikhirini, inttewo ni anammalukuni. (Mat. 24:12) Yesu kheerale wiira nnyo citthunnyo caahala uwiirannyeela atthu ahinonswalela Yehova paahi. Khweeliini, atthu enci anonswalela Yehova cinawaakhumelela ihasara. (Isai. 57:1; 2 Akor. 11:25) Pooti ukhalaka wiira Yehova khampanka miiriirya wiira anikhikicere canikhumelelaka ihasara. Masi hataa ukhalaka commo, uyo naanivaha citthu cotheene cimpheeleehu wiira animaalihe ni nikhalane nnema.

10. Nlattuni nineereehu wiira wiitthenkaca nenna co unthoonyera umwaamini Yehova? (Nwehe Miruku 22:3.)

¹⁰ Yanikhumelelaka ihasara, hi khaninhala utepa usanka wakhalaka wiira niheetthenkaca khalayiiru wiira nicuwele itthu yoopanka. Masi niireke wiira wiitthenkaca khalayiiru unthoonyera wiira khanimmwaamini Yehova? Mena. Khweeliini, neetthenkacaka ihinaaya ukhumelela ihasara ninthoonyera wiira ninaamwaamini Yehova ni ninankhuluvela wiira naahala uniwacera. Masi manannani? Nuulumo na Nluku ninhimya wiira hiiva nihaana niitthenkacaka wiira nitthawe citthu cowoopiha. (Nsome Miruku 22:3. e) Mumphwinkoni wa Yehova cinaakumiheriya myaha,  mikutthaano, moopusero ni mahimyo annikavihera ukati umpheeleehu wiira niikhikicere ihinaaya ukhumelela ihasara. f Niireke wiira ninankhuluvela Yehova? Nankhuluvelaka, ninaahala utthara ayo malakiherwaayo nenna co—ihinaaya ukhumelela ihasara.

11. Ntakihero naanuunwiihu Margaret ninwiitthucihani isiyani?

¹¹ Muupuwele itthu yaawiirannyenle anuunwiihu aneehaniya Margaret. Nlattu wo mooro waapahakacale citthu wakhiviru nuuwannyaya, ayo yahaana yakhumaka wapuwani wowaakuvyaaca. Ukhala wiira atthu enci yaanaamananiha ukhuma nno nipuronno wowaakuvyaaca, khaavo aakhitiri uvira mmaparapaarani. Mwiisi wahoripeliha mapuro otheene ni anuunwiihu Margaret khayaakhitiri ukhuma nkaaroni waya. Masi ayo yahokhitiri woopwa kontha yaheetthenkaca khalayiiru. Munrupani waya, ayo yahaana maapa yaathoonyera iphiro ikhwaawe yaahalaaya uvira wiira akhume nne nipuronne. Ayo yahotteha khalayiiru uvira iyo iphirweeyo wiira yakhumelelaka ihasara acuwelele mananna oovira. Anuunwiihu Margaret yahokhitiri woopwa kontha yaheetthenkaca khalayiiru.

12. Nlattuni nineeweleleehu malakihero ankhikicera ukumiihu?

¹² Ahooleli wiira anikhikicere yakhumelelaka ihasara, pooti unihimyeera iwoora ihinlamuliyeehu ukhuma wapuwani, pooti uniruma uthama nipuro ninkhaleehu awula pooti uniirela itthu ikhwaawe. Atthu akiina khaneewelela ayo malakiherwaayo kontha khampheela uhiya uttuli mihakhu caya. Masi isiyani inlamuliyaaya upanka makristau? Ibiiblya ineera: “Nlattu wa Apwiiya, mwiiwelele khula mphwinko waapinaatamu urina ukhulupale. Mmwiiwelele mwene, ukhala wiira khanle nkhulupale. Ni nwiiwelele makovernatoore, anrumiya nimwene.” (1 Pet. 2:13, 14) Mphwinko woothotokanihiya wa Yehova ciicammo unaanivaha malakihero annikavihera ukhala saana. Wootakihera, hi ninaakurumiciya waahimyeera mahumu nummeru nihu notelefooni ni waacuweliha nipuro ninkhaleehu. Napankaka commo, ninaahala waakavihera mahumu wiira acuwele cowiira cakhumelelaka ihasara. Niireke wiira mahumu o wanlokoni winyu anaacuwela nipuro ninkhaleenyu ni ahaana nummeru notelefooni ninvareleenyu nteko nna co? Hiiva ciicammo pooti uvahiya malakihero makhwaawe, toko uhikhuma wapuwani, utthawela nipuro nookhuluvelya, maphwanyero iyoolya ni ukati unlamuliyeehu waakavihera akhunanihu. Naahiiweleleke ayo malakiherwaayo unawoopiha hiiva uhonona ukumiihu awula uhonona ukumi wo mahumu. Nhiliyale wiira ayo mayamunnaayo ahaana nrintti muulupale wooniwacera otheene cihu. (Mabere. 13:17) Anuunwiihu Margaret  aheera: “Mi khweeliini kinoona wiira utthara malakihero o mahumu ni o mumphwinkoni wa Yehova uhoopola ukumyaaka.”

13. Mayamunna enci ahiile inupa caya isiyani inaakavihera ukhalana nnema ni utteeliya nrima?

¹³ Mayamunneehu ni mayanuunwiihu enci yaahiyale inupa caya nlattu wookhumelela ihasara, ikhotto awula inttewo yahokhitiri wiilemaleliha makhalelo makhwaawe ni khayaahiile uvara miteko co mminepani. Khampa makristau oopacera yaatthawale nlattu woolupatthiya, ayo mayamunnaayo khanhiya “ulalya ihapari comaana co nuulumo na Nluku.” (Mite. 8:4) Ulalyeera unawaakavihera ayo mayamunnaayo uhoolelihera umwene wa Nluku, uhiya wuupuwela cinene masakha anakhumelela. Nlattu woopanka commo, ayo anaakhitiri ukhalana nnema ni utteeliya nrima.

14. Manannani ulupatthiya cinrukunusaaya makhalelweehu?

¹⁴ Nlattu woolupatthiya, hiiva pooti uhaleela citthu cinci cinnikhaliha ninnema. Wootakihera, hi ninaakhala ootteeliya cinene nakhalaka ootaphuwa wiira nithukumane nimayamunneehu, nilalyeere moolumo a Nluku ni ninaakhala nihoovaka utthukeliya nkhattya. Nanceraka ukhottihiya upanka nnyo citthunnyo, hi pooti ukhala nimasukhuli menci ni pooti wancera woova nlattu woohicuwela isiyani inhala uniirannyeela. Wiicoona commo khuntakhala, masi ratta! Yesu aheera wiira ulupatthiya pooti unihiiha waamini. (Joau 16:1, 2) Vano isiyani inlamuliyeehu upanka wiira nikhalane nnema nalupatthiyaka?

15. Kontha isiyani khaninlamuliya woova ulupatthiya? (Nwehe Joau 15:20; 16:33.)

¹⁵ Ibiiblya ineera: “Atthu otheene ampheela ukhala yanswalelaka Nluku, wamoca ni Yesu Kristu, ciicammo anaahala ulupatthiya.” (2 Tim. 3:12) Munna mmoca neehaniya Andrei wahonrika cinene ukupali wiira Masaahiti a Yehova otheene yaakhala ilapwaawe yanhala ulupatthiya. Uyo oopuwenle co: “Ila ilapweela ahaavo Masaahiti a Yehova enci. Akhulupale ookuvernu khanhala ukhitiri waatthuka otheene.” Masi wuupuwela commo khawammalihale munneehu Andrei, masi waanootepa umwiiriha ukhala nimasukhuli. Mayamunnna akhwaawe yaholakela unkhuluvela Yehova ni khayoopuwela wiira khayaahala utthukiya. Ayo yaanaacuwela wiira atthunaka yanhala utthukiya, masi khayaalamuliya ukhala nimasukhuli khampa Andrei. Vano munna Andrei aholakela waatakiha ayo mayamunnaayo ni unkhuluvela Yehova. Khawavinre ukati mwinci ni uyo ahancera ukhalana nnema. Nna co, unanntteela nrima hataa yankhumelelaka masakha. Iyo itthwiiyo pooti uniirannyeela  hiiva ciicammo. Ninaacuwela wiira Yesu heera wiira hi ninaahala ulupatthiya, masi uyo ciicammo hokhuluveliha wiira ninaahala ukhitiri uhihiya umwiiwelela Nluku.—Nsome Joau 15:20; 16:33. g

16. Malakiheroni anlamuliyeehu wiiwelela ntekweehu woolalyeera wakhottihiyaka?

¹⁶ Ntekweehu woolalyeera wakhottihiyaka awula nakhottiheriyaka uvara miteko cikhwaawe co mminepani, hiiva pooti waakhela malakihero o Peteli ni mahumu pooti univaha malakihero. Hiiva ninvahiya ayo malakiherwaayo wiira nikhikiceriye, wiira nihihiye waakhela iyoolya yo mminepani ni wiira nihihiye ulalyeera ihapari ca Nluku. Phimaana, mwiiwelele ayo malakiherwaayo hataa nhicuwelelaka nlattuni unvahiyeenyu. (Tiya. 3:17) Ciicammo, nhaahimyacere atthu akhwaawe isiiri co mayamunna ni mayanuunu awula nhaahimyeere mananna cinvariyaaya nteko woolalyeera atthu uhinaaphwanela ucuwela.—Ekles. 3:7.

17. Toko maapostolu, isiyani nyuuva ilakenleenyu upanka?

¹⁷ Itthu imoca yuulupale immwiiriha Sotwani waalupattha Masaahiti a Yehova ukhalaka wiira ayo anawaalalyeera atthu ‘yaavahaka usaahiti wa Yesu.’ (Apoka. 12:17) Nhinhiyerere Sotwani ni atthu o ntuninyani inhoolelaawe yowoopopihakani. Ulalyeera ni waapanka eetthuci hataa nilupatthiyaka unaaniphwanyiha utteeliya nrima ni nnema. Ahooleli ottiini ayuuta yahaakhottiha maapostolu ulalya moolumo a Nluku. Masi waanookhalaru commo, ayo maapostolwaayo yahothanla umwiiwelela Nluku uhiya uwiiwelela apinaatamu. Ayo khayaahiile ulalya ni wahaatteela nrima cinene nlattu woopanka commo. (Mite. 5:27-29, 41, 42) Ninaacuwela wiira ntekweehu woolalya wakhottihiyaka awula nahiihiyaka uvara miteko cihu cikiina, hi nihaana niikhikiceracaka ni khaninlamuliya wiitthaala uwakati woolalya. (Mat. 10:16) Masi neekurumicaka ulalya moolumo a Nluku, ninaahala ukhalana nnema nlattu woocuwela wiira ninaapanka itthu inoncivela Nluku ni ninvara nteko unoopola ukumi waatthu.

18. Tipani nohala uniphwanyiha nnema neekhweeli?

¹⁸ Hi ninaakhuluvela wiira hataa yanikhumelelaka masakha, ninaahala ukhalana nnema. Ni uyo phuukati hiiva ninlamuliyeehu wuupuwela wiira ninaapheela cinene nnema na Nluku, nnema Yehova paahi ninnivahaawe. Phimaana, munkhuluvele camwaryeelaka iretta, yookhumelelakani ihasara awula mwalupatthiyaka. Nvaresese mphwinko woothotokanihiya wa Yehova, nhiliyale wuupuwela iparakha comaana cinweherereehu. Mwapankaka commo, “Nluku nannema naahala ukhala ninyuuva.” (Afili. 4:9) Nhina mwaha nkiina ninhaleehu usoma, ninaahala wiitthuca isiyani ninlamuliyeehu upanka wiira naakavihere mayamunneehu anaakhumelela masakha wiira ayo akhalane nnema na Nluku.