1-2. Yehova hunle cani iphiro wiira hiiva nikhale amucyaawe?

YEHOVA honilattula wiira nipanke mphantte mumphwinkoni waamucyaawe anonswalela. Nno nikhanle nlattulo nomaana! Amuciihu akhanle atthu ootteeliya yiivaherenre wa Nluku ni anaamini woopoliya wihu ni Mwanawe. Nna va ninaakhala ootteeliya ni ninaaweherera waakhela ukumi woohimala uhoolo—wiirimu awula upeephoni watuninyani.

² Nlattu woonifenta, Yehova hopanka itthu yuulupale cinene wiira hiiva nikhale amucyaawe. (Joau 3:16) Hiiva ‘nihothumiya niiperesu.’ (1 Akor. 6:20) Nlattu wonvaha mwanawe wiira anoopole, Yehova hokhitiriha wiira hiiva nikhale apatthannyaawe. Nihaana iparakha yoomwiihana “Paapa” Nkhulupale ooverihela ntuninyani motheene. Toko ciitthucaleehu nhina mwaha woosomiya uvinre, Yehova khanle Nnyari omaana ni khaavo nnyari nkhwaawe nonlikanana.

3. Noopuwelaka citthu cotheene Yehova cinnipankelaawe, isiyani ineekoheehu? (Ciicammo uwehe ikwaaturu “ Kiireke Yehova naakiwacera?”)

³ Hiiva atthunaka ninawiikoha khampa ceekohalyaawe namantikha Ibiiblya mmoca: “Isiyani inhalaaka unvaha Yehova nlattu wo citthu comaana cotheene cinkipankelyaawe?” (Isaa. 116:12) Ninaacuwela wiira hiiva khaninhala ukhitiri unliva Yehova citthu cotheene cinnipankelaawe. Masi nifento nawe ninaaniiriha hiiva upheela ciicammo unfenta. Apostolu Joau hantikha: “Hiiva ninfenta kontha uyo phipacenre unifenta.” (1 Jo. 4:19) Manannani ninlamuliyeehu waathoonyera Apaapeehu wiira ninawaafenta?

4. Toko cinthoonyeraaya Tiyaku 4:8, kontha isiyani nihaana niikurumicaka ukhala apatthani a Yehova?

⁴ Yehova mpheela wiira nimpatthanane cinene ni nimuulumane.  (Usome Tiyaku 4:8. *) Yehova naanisovenriha wiira ‘nihihiye ulompa,’ ni mahuku otheene, uyo naakhalana ukati wiira aniviriyane. (Aroo. 12:12) Yehova khankhotta uviriyana mavekelweehu nlattu woohikhalana ukati awula nlattu wowoocya. Wiira ni hiivano ninfente toko uyo cinnifentaawe, nihaana niviriyanaka citthu cinhimyaawe. Hiiva ninviriyana citthu cinhimyaawe nasomaka Ibiiblya, ilivuru cihu ni naviriyanaka saana mikutthaano ceekristau. Mwaana aahiloveke uwuulumana asitthumwaane, nawaapatthanana venci. Inanna imoca, hiiva naahiloveke umuulumana Yehova, ninaahala ukhala apatthannyaawe.

5. Manannani ninlamuliyeehu ulokihaca mavekelweehu?

⁵ Wuupuwele mananna weeva cimmuulumanaa Nluku. Yehova naanilattula wiira ninlompe ni ninhimyere yotheene inniira wanrimani wihu. (Isaa. 62:8) Waanaareera wiikoha co: ‘Moolumo anonhimyeraka Yehova ukati wonlompa, kiireke ankhala toko moolumo owooneliya? Awula ankhalaka moolumo eekhweeli ookhuma wanrimani waka?’ Khweeliini, weeva unanfenta Yehova cinene ni khumpheela uhiya ukhala mpatthannyaawe. Wiira uhihiye ukhala mpatthani a Yehova, weeva uhaana umuulumanaka khula ukati. Unkhalihe Yehova mpatthannyaa ookhuluvelya ni unhimyere citthu caa cotheene: citthu cinootteeliha nrima ni citthu cinoohela isukhuli. Ukupali wiira khula ukati uyo naahala wuukavihera.

6. Isiyani ninlamuliyeehu upanka napheelaka waapatthanana Apaapeehu o wiirimu?

⁶ Napheelaka waapatthanana Apaapeehu o wiirimu, ninlamuliya ukhala atthu oosukhuru. Hiiva ninaakupali itthu yoolumalyaawe nasaalimu mmoca eerale: “Khacimala citthu cipankalyaa, oo Yehova, Nlukwaaka, khacimala miteko caa cootikhiniha ni citthu cinoopuwelaa unipankela. Khaavo ntthu noolikanana. Kinancale uttonkaca ni wuuluma, akaahala umaliha uttonka cotheene!” (Isaa. 40:5) Uhiya usukhuru wanrimani wihu paahi, hiiva ninaapanka-tho itthu ikhwaawe: nhina citthu cotheene cimpankeehu ni cinoolumeehu ninanthoonyera Yehova wiira ninansukhuru. Iyo phi itthu innikhaliha oovirikana naatthu enci o mahukwaala. Ntuninyani ninkhaleehu, atthu enci khansukhuru citthu Nluku cinaapankelaawe. Khweeliini, itthu imoca inthoonyera wiira ninkhala “mahuku ookhicera,” akhanle atthu oohisukhuru. (2 Tim. 3:1, 2) Hiiva khanimpheela ukhala toko ayo atthwaayo!

7. Isiyani Yehova impheelaawe wiira nipanke, ni nlattuni?

⁷ Khaavo nnyari unoncivela uwoona asaanaawe yaattakanaka, masi mpheela wiira yiiwanane ni apatthanace. Inanna imoca, Yehova mpheela wiira asaanaawe otheene yiiwanane. Phimaana, ufentana wihu phi itthu inthoonyera wiira nikhanle makristau eekhweeli. (Joau 13:35) Hiiva ninaakupali itthu yantikhalyaawe nasaalimu: “Nkoonani! Cinreeraaya, cincivaaya atthu yakhalaka wamoca naasunnaya yiiwananaka!” (Isaa. 133:1) Naafentaka mayamunneehu ni asirokorihu, ninanthoonyera Yehova wiira ninanfenta. (1 Jo. 4:20) Khweeliini, unaanitteela nrima cinene nlattu woopanka mphantte mphwinko waamuci wo mayamunneehu ni asirokorihu ‘ampankelana maana, anoonelana uthunku venci’!—Efesu 4:32.

8. Toko cineeraaya 1 Joau 5:3, itthuni yuulupale inniiriha umwiiwelela Yehova?

⁸ Yehova mpheela wiira asaana awiiwelele asithumwanaya, phimaana uyo mpheela wiira hiiva nimwiiwelele. (Efesu 6:1) Yehova unamphwanela hiiva umwiiwelela, kontha uyo phinumpale, phinlihera ukumiihu ni phikhanle oocuwelaca waavikana anyari otheene. Masi itthu yuulupale inniiriha umwiiwelela Yehova, ukhanle unfenta.  (Usome 1 Joau 5:3. *) Hataa cincivaka citthu coothoonyera wiira nihaana umwiiwelela Yehova, uyo khannikhanyereriha wiira nimwiiwelele. Uyo honihiya wiira nithanle naasineeneehu isiyani impheeleehu upanka. Phimaana, namwiiwelelaka nlattu wonfenta, uyo naakhala ootteeliya venci.

9-10. Kontha isiyani ikhanle itthu yofayita ucuwela ni weettela ikettelo ca Nluku?

⁹ Anyari anaapheela cinene waakhikicera asaanaaya. Phimaana, anyari anawaahelela asaanaaya ikettelo wiira yaakhikicere. Asaana yattharaka nnyo ikettelonnyo, anaathoonyera wiira anawaakhuluvela ni anawaahisimu asithumwanaya. Hataa phimaana ikhanle itthu yofayita cinene ucuwela ni weettela khula nihuku ikettelo ca Apaapeehu o wiirimu. Napankaka commo, ninanthoonyera Yehova wiira ninanfenta ni ninanhisimu. Uhiya commo, umwiiwelela Yehova unaaniphwanyiha ifayita. (Isai. 48:17, 18) Masi ale anonkhotta Yehova ni ankhotta utthara ikettelo cawe anawaakhumelela masakha menci.—Akalas. 6:7, 8.

¹⁰ Upanka citthu Yehova cinnilepelaawe unaanikavihera unyema citthu caahala uhonona irutthwiihu, moopuwelelweehu ni upatthaniihu nuuyova. Yehova naacuwela isiyani inhala uniphwanyiha maana. Aurora, nkhala u Estados Unidos, neera: “Mi kinaacuwela wiira umwiiwelela Yehova, unaanikavihera ukhalana ukumi womaana.” Khula ukati, iyo inkhala ikhweeli. Unaakhitiri wuupuwela mananna weeva cikaviheriyaa  nlattu wo wiiwelela malamulo o nifento a Yehova?

11. Ulompa unaanikavihera hiiva upanka isiyani?

¹¹ Ulompa unaanikavihera umwiiwelela Nluku hataa ukati unnirikaaya umwiiwelela. Ukati nkhwaawe, nlattu wookhala atthu oopahuwa, unaanirikaka umwiiwelela Yehova. Hataa ukhalaka commo, nihaana niikurumicaka wiira nihivare matampi. Nasaalimu ahonlepela Nluku eeraka: “Ukipankihe wanrimani waka upheela uwiiwelela.” (Isaa. 51:12) Denise, nvara nteko weepiyoneeru owiicaaverya, neera: “Koonaka wiira unaakirika umwiiwelela Yehova, kinaalompa ni kinanlepela ikuru wiira kihipanke itthu yootakhala.” Hiiva pooti wankupaliihu wiira Yehova khula ukati naanaakhula nanlepelaka itthu toko iyo.—Luka 11:9-13.

12. Toko cineeraaya Efesu 5:1, isiyani ninlamuliyeehu upanka?

¹² Usome Efesu 5:1. * Ukhala wiira hiiva nikhanle “asaana oofentiya” a Yehova, ninawiikurumica cinene untakiha. Hiiva ninontakiha Nluku naafentaka akhwiihu, naathoonyeraka unamaana ni naalevelelaka. Ale ahinoncuwela Nluku yoonaka meettelweehu omaana, atthunaka anaahala upheela wiitthuca myaha cawe. (1 Pet. 2:12) Utakiha makhalelo a Yehova ciicammo unaahala waakavihera anyari makristau. Anyari yaawaceraka asaanaaya saana toko Yehova cinniwaceraawe, ayo asaanaayo ciicammo anaahala upheela waapatthanana Apaapeehu o nifento.

13. Isiyani inhala unikavihera ulipa nrima?

 ¹³ Wakhalaka wiira mwaana anancivela cinene athumwaane, uyo naawuuluma saana uhoolo waatthu otheene. Inanna imoca, hiiva anaanicivela cinene Apaapeehu, Yehova, ni nimpheela wiira acuweliye naatthu enci. Otheene cihu nineecoona toko mwene Davidi, antikhale: “Mi kinaahala umuuluma Yehova ukitteelaka nrima.” (Isaa. 34:2) Vano wakhalaka wiira weeva ukhanle ntthu owoova cinene, unhala ukhitiri cani ulipa nrima wiira umuulume Yehova? Umananihe wuupuwela cinene mananna Yehova cinkhalaawe ootteeliya anoonaka nimuulumaka. Wuupuwele mananna atthu cinhalaaya uphwanya ukumi womaana yancuwelaka Yehova. Ni uhiliyale wiira Yehova naahala wuulipiha nrima toko caalipihalyaawe nrima mayamunneehu okhalayi.—1 Atesal. 2:2.

 14. Kontha isiyani ulalyeera ihapari comaana ukhanle nteko wofayita?

¹⁴ Yehova khanonthanla ntthu. Phimaana uyo naakhala ootteeliya venci anoonaka naafentaka atthu akiina, woohaathanla. (Mite. 10:34, 35) Inanna imoca yoowaafenta akhwiihu ukhanle waalalyeera ihapari comaana. (Mat. 28:19, 20) Uyo ukhanle nteko wofayita, kontha ale antthuna uviriyana ihapari comaana pooti ukhalana ukumi womaana nna va, ni ukumi woohimala uhoolo.—1 Tim. 4:16.

15-16. Citthuni cinnitteeliha nrima?

¹⁵ Yehova khanle Nnyari oofenta venci ni mpheela wiira amucyaawe akhale ootteeliya. (Isai. 65:14) Ninaacuwela wiira anaahala unikhumelela masakha menci, masi cihaavo citthu cinci cinnitteeliha nrima. Citthuni? Hiiva ninaakupali wiira Apaapeehu anaanifenta venci. Ninaacuwela ikhweeli iri Nnuulumoni na Nluku, Ibiiblya. (Jer. 15:16) Ni ninaapanka mphantte mphwinko muulupale waatthu anonfenta Yehova, anfenta malamulwaawe ni anfentana.—Isaa. 106:4, 5.

¹⁶ Uhiya iyo, hiiva ninaakhala ootteeliya nlattu wookupali wiira ninaahala ukhalana ukumi womaana uhoolo. Woohipica, Yehova naahala umaliha citthu coohinamaana cotheene ni uyo naahala ukhaliha ituninya ipeephoni ukati unhalaaya ulamulela Umwennyaawe. Nihaana niweherero nomaana noohala uwaakhelela amuciihu ni apatthaniihu akhwile. (Joau 5:28, 29) Uyo unhala ukhala ukati wootteeliha nrima! Ni itthu yuulupale cinene phi ila: ninaakupali wiira woohipica, otheene wiirimu ni watuninyani anaahala waattitthimiha, waattottopela ni waaswalela Apaapeehu, toko cinaaphwanelaaya.