1. Citthuni cinnikhaliha ni masukhuli? Masukhuli pooti uniiriha hiiva wuupuwela isiyani?

WEEVA uhopaca ukhala ni masukhuli? * Atthunaka weeva uneecoona ukhala ni masukhuli nlattu wo wuulumeliya awula upankiya itthu yootakhala ni ntthu nkhwaawe. Awula pooti ukhala ni masukhuli nlattu wo itthu yuulumalyaa awula ipankilyaa. Wootakihera, atthunaka uhovara itampi ni unoopuwela wiira Yehova khanhala wuulevelela. Atthunaka untepa ukhala ni masukhuli nlattu wo wuupuwela co: ‘Masukhuli arinaka anthoonyera wiira waamini waka khulipale. Mi kintthu oohiloka.’ Niireke iyo ikhanle ikhweeli?

2. Matakiheroni o mbiiblyani anthoonyera wiira ukhala ni masukhuli khunoonihera wiira waamini wihu khulipale?

² Woone matakihero anhimiya mbiiblyani. Anumwaane porofeeta Samuweli, Ana, yahaana waamini woolipa. Hataa ukhalaka commo, Ana ahokhala ni masukhuli venci ukati wahaawaceriyaawe ratta naakhattyaawe. (1 Sam. 1:7) Apostolu Paulu ciicammo ahaana waamini woolipa. Waanookhalaru commo, uyo ahokhala ni “masukhuli nlattu wo maloko otheene.” (2 Akor. 11:28) Mwene Davidi ahaana waamini woolipa ni aanaafentiya venci ni Yehova. (Mite. 13:22) Masi ukati waavaralyaawe matampi, Davidi ahokhala ni masukhuli menci. (Isaa. 38:4) Yehova ahaapisiha nrima ni ahaamaaliha ala atthu ararwaala. Nttwee noone isiyani nineetthuceehu ni matakiherwaaya.

3. Nlattuni ninkhaleehu ni masukhuli ntthu anuulumelaka citthu coohinamaana?

³ Akhwiihu yanuulumelaka awula yanipankaka itthu yoohinamaana, hiiva pooti ukhala ni masukhuli. Ninaakhala ni masukhuli  venci, utepa wakhalaka wiira ntthuuyo khanle mpatthaniihu ankhuluveleehu awula mmuciihu. Hiiva pooti ukhala ni masukhuli nlattu wo wuupuwela wiira upatthaniihu nuuyo ntthuuyo khunhala uloka-tho. Ukati nkiina, ntthu pooti unuulumela citthu coohinamaana woohuupuwela—citthu cooniwerya cinene toko uhomakaciya ni soowa awula ikatana! (Miru. 12:18) Ni uhaavo ukati ntthu unnuulumelaawe citthu coohinamaana imweeni, wiira aniwereehe nrima. Nrokorihu mmoca yahonkhumelela iyo. Uyo neera: “Mwaasikhalayi, haavo ntthu aamoonaka ukhala mpatthannyaaka ancerale ukuuluma pusya mwinternetini. Iyo yahokiwerya cinene ni yahokikhaliha ni masukhuli menci. Akaacuweleeha nlattuni waakiveehaawe mmwiitihoni.” Ihopaca wuukhumelela itthu toko iyo? Wakhala wiira ihopaca wuukhumelela, weeva pooti wiitthuca citthu cinci ni ntakihero na Ana.

4. Masakhani oorika yankhumelenle Ana?

⁴ Ana ahovilela masankiho oorika venci. Uyo ahokhala myaakha cinci hikhitiriki waayara asaana. (1 Sam. 1:2) Ule ukatyuule, asarayeli enci yaakupali wiira nthiyana aahirupaleke irukulu, iyo yaathoonyera wiira khavahiye iparakha ni Nluku. Iyo yaanaamwiiriha Ana woona ihaaya cinene. (Upha. 30:1, 2) Itthu yantepiha Ana, ukhalaka wiira awanuwawe yahaana nthiyana nkiina aakhitiri waayara asaana, eehaniya Penina. Penina anwehera Ana khampa nwanani ni “khaahiya umpaca, wiira anwereehe nrima.” (1 Sam. 1:6) Wuupaceroni, Ana khaacuwenle waanana ayo marikarikwaayo. Uyo aari ni masukhuli menci, mpaka aakhala ‘onlaka ni khaakhitiri ulya.’ Ana “aari ooriipiya nrima cinene.” (1 Sam. 1:7, 10) Isiyani yampisihale nrima?

5. Ulompa wankavihenre cani Ana?

⁵ Ana ahonlompa Yehova ni ahonhimyera citthu cotheene caarinaawe wanrimani cankhaliha ni masukhuli. Waamalihalyaawe ulompa, Ana ahonhimyera nankuttho Eli itthu yankhumelela. Eli ahomwiirela Ana: “Urwee ni nnema ni Nluku o Isarayeli oovahe itthu inlepenlyaa.” Vano yaakhumelenle isiyani? Ana “ahokhuma ni aahokela ulya, ni ikhovyaawe khayaathoonyera-tho unriipa nrima.” (1 Sam. 1:17, 18) Ulompa wahonkavihera Ana ukhala saana.

6. Ntakihero na Ana ni ikano iri nhina Afilipo 4:6, 7 inniitthuciha isiyani nhina ulompa?

⁶ Hiiva pooti ukhala ni nnema wanrimani wihu naahihiyeke unlompa Yehova. Ana ahokhala ukati mwinci awuulumanaka Athumwaane o wiirimu. (1 Sam. 1:12) Hiiva ciicammo ninlamuliya ukhala ukati mwinci nanhimyeraka Yehova  masukhuliihu, citthu cinooveehu ni citthu cihinkhitiriihu upanka. Mavekelweehu pooti wahinkhalaaya ooratteliya. Hiiva pooti ukhala ooriipiya venci mpaka wunla ukati unonlompeehu Yehova. Hataa ukhalaka commo, uyo khanoocya uniiwelela. Masi uhiya paasi unlompa Yehova nanhimyeraka masukhuliihu, nihaana ciicammo napankaka itthu ikiina. Nihaana nuupuwelaka ikano iri nhina Afilipo 4:6, 7. * (Usome.) Paulu hohimyeeha wiira ninlamuliya ulompa ninsukhuruku Yehova. Ni khweeliini khacimala citthu ninlamuliyeehu unsukhurwela Yehova: ukumi urineehu, citthu cumpalyaawe, nifento nookhuluvelya ninnithoonyeraawe ni niweherero ninnivahaawe. Isiyani-tho ninniitthucihaaya ntakihero na Ana?

7. Isiyani Ana ni awannyawe yahaahiyaaya upanka?

⁷ Hataa akhalanaka marikariko, Ana khaahiya urwaa wamoca naawannyawe wanupani waaswaleliya Yehova u Silo. (1 Sam. 1:1-5) Ukati Ana waaryaawe utabernaakulu, Eli ahohimya itthu yaawehereraawe. Uyo aaweherera wiira Yehova aakhule nivekelo na Ana, ni iyo yahommaaliha Ana cinene.—1 Sam. 1:9, 17.

8. Mikutthaano cihu cinnikavihera cani? Utaphulele.

⁸ Hiiva pooti uturuwela ukhalana nnema wanrimani wihu naahiloveke umikutthaanoni ceekristau. Ukati umpankiyaaya nivekelo noopacera mmamikutthaanoni cihu, imaara cinci unaalepeliyaka wiira nnepa wowaarya wa Nluku ukhale wamoca ni hiiva. Nnema ikhanle ikhalelo yo nhokorokho wo uyo nnepooyo. (Akalas. 5:22) Phimaana, nakhalaka ni masukhuli nlattu wo marikariko annikhumelela, nihaana uhihiya urwaa umikutthaanoni. Napankaka commo, ninanhiya Yehova ni mayamunneehu wiira anilipihe. Yehova ni mayamunneehu anaahala unilipiha ni unikavihera wiira nihikhale ni masukhuli. Ulompa ni mikutthaano cihu cikhanle citthu Yehova cinvarelaawe nteko wiira animaalihe. (Mabere. 10:24, 25) Woone itthu ikhwaawe ntakihero na Ana ninniitthucihaaya.

9. Isiyani yahaahiile unkhumelela Ana, masi isiyani yaahiile unkhumelela?

⁹ Itthu yankhaliha Ana ni masukhuli khayaakuvale umala. Ukati Ana waakhumalyaawe utabernaakulu aturuwelaka uwaani, nanlelo aakhala ni Penina. Ni Ibiiblya khinhimya wiira Penina ahohiya wuuluma citthu canwereeha nrima Ana. Phimaana, pooti ukhala wiira Ana nanlelo aanawuulumeliya citthu coowerya ni Penina, akhattyaawe. Masi Ana ahokhitiri uhiya ukhala ni masukhuli. Wuupuwele wiira ukati Ana wanhimyenryaawe Yehova citthu cotheene caamwiira, uyo ahohiya ukhala ni masukhuli. Uyo ahotthuna upisihiya nrima ni umaalihiya ni Yehova. Nuukatyaaya, Ana ahaakhela iparakha yo waayara asaana!—1 Sam. 1:19, 20; 2:21.

10. Ntakihero na Ana ninniitthuciha isiyani?

¹⁰ Hiiva pooti uturuwela ukhalana nnema wanrimani wihu, hataa masakheehu yahimalaka. Masakheehu pooti uhimala, hataa nilompaka cinene ni niikurumicaka uhilova umikutthaanoni. Ntakihero na Ana ninniitthuciha wiira khiivo itthu inhala unhiiha Yehova unipisiha nrima. Uyo khanhala uniliyala. Naahihiyeke unswalela, wanihukuni uyo naahala unitthuvela.—Mabere. 11:6.

11. Citthuni cankhaliha Paulu ni masukhuli?

¹¹ Cahaavo citthu cinci cankhaliha Paulu ni masukhuli. Wootakihera, ukhala wiira Paulu aanawaafenta mayamunna, uyo aakhala ni masukhuli nlattu wo masankiho yaakhumelela ayo mayamunnaayo. (2 Akor. 2:4; 11:28) Avaraka ntekwaawe wookhala apostolu, Paulu ikwaha cinci ahowaanana  alupatthi ni ahotthukiya. Uyo yahonkhumelela marikariko menci yankhaliha ni masukhuli, toko “uthwennya.” (Afili. 4:12) Ni noopuwelaka wiira apaketi araru yaakenlyaawe Paulu yahopaca ucama, ninaakhitiri woona wiira uyo aakhala ni masukhuli cinene ankelaka paketi wiira arwee nipuro. (2 Akor. 11:23-27) Paulu aananne cani ayo marikarikwaayo?

12. Isiyani yaakavihenre uwukula masukhuli a Paulu?

¹² Hataa Paulu akhalaka ni masukhuli nlattu wo masankiho yaakhumelela mayamunna, uyo khaamananiha waakavihera veekha cawe. Uyo kheecuunuwiha. Phimaana, ahaathanla atthu wiira yaakavihere mayamunna mmalokoni. Wootakihera, uyo ahaavaha miteko cinci alopwana ookhuluvelya, toko Timotiyu ni Titu. Khweeliini, nteko waavaraaya ayo alopwanaayo wahokavihera uwukula masukhuli a Paulu.—Afili. 2:19, 20; Titu 1:1, 4, 5.

13. Mahumu anlamuliya untakiha cani Paulu?

¹³ Waalepele akhwaa wiira yuukavihere. Toko Paulu, mahumu enci ooreera nrima anaakhala ni masukhuli mayamunna o wanlokoni yaakhumelelaka masankiho. Masi humu mmoca veekha khankhitiri waakavihera mayamunna otheene. Humu akupaliki iyo, naahala waavahacera miteko cikiina mayamunna akhwaawe ankhitiri uvara, ni waalakihera alopwana amirawo wiira acuwele uwacera ikhontwaa ca Yehova.—2 Tim. 2:2.

14. Isiyani Paulu yahoopuwelaawe, ni ntakihero nawe ninniitthuciha isiyani?

¹⁴ Ukupali wiira unaapheela umaalihiya. Paulu aari ntthu owiiyeviha. Phimaana, uyo aanaatotha ulipihiya naapatthannyaawe ni ayo yaananlipiha. Paulu aanaacuwela wiira ahaana apisihiyaka nrima naakhwaawe, ni uyo khoopuwela wiira utotha umaalihiya, unkhala utirikhyaa. Nhina iwarakha yaamwantikhenlyaawe Filemoni, Paulu aheera: “Kahokhala ootteeliya ni oomaalihiya cinene ukati weewalyaaka nuulumiyaka nifento naa.” (File. 7) Paulu ahowuuluma mayamunna akhwaawe yaavaranaawe nteko yankavihenre venci ukati wo masankiho. (Akol. 4:7-11) Nakhalaka atthu owiiyeviha ni nakupaliki wiira ninaapheela ulipihiya naakhwiihu, mayamunneehu ni asirokorihu anaahala unikavihera ni nrima wootteeliya.

15. Ukati Paulu waakhanlyaawe ni masukhuli, isiyani yammaalihale?

¹⁵ Ukhuluvele Nuulumo na Nluku. Paulu aanaacuwela wiira Nuulumo na Nluku naanaahala ummaaliha. (Aroo. 15:4) Nuulumo na Nluku naanaahala unkavihera ucuwela mananna  owaanana khula masankiho yamphwanya. (2 Tim. 3:15, 16) Ukati Paulu waatthukiyaawe u Roma ikwaha yonayeeli, uyo ahoona wiira ukhwa wawe waari wakhiviru. Isiyani Paulu yaapankalyaawe uyo ukati wo masankihooyo? Uyo ahonlepela Timotiyu wiira arwee amootole wowaakuvya ni ancisere “iroolu.” (2 Tim. 4:6, 7, 9, 13) Nlattuni? Atthunaka nnyo iroolunnyo caari Cowantikhiya Cowaarya niiluka iheperewu. Paulu aanaahala uvarela nteko nnyo cowantikhiyannyo ukati woosoma veekha Nuulumo na Nluku. Hiiva ciicammo naahiloveke usoma Ibiiblya, Yehova naahala unimaaliha ni moolumo yantikhalyaawe mbiiblyani—hataa yanikhumelelaka masakhani.

16. Masakhani Davidi yeewaanenlyaawe?

¹⁶ Cihaavo citthu cankhaliha Davidi ni masukhuli. Uyo aheetta uluva ni Pate-Sepa, ahowiiviiha awannyawe Pate-Sepa ni ahomananiha uvitha ikhirini caapankalyaawe. (2 Sam. 12:9) Wiipaceroni, Davidi khaawacenre moopuwelelwaawe yanthoonyera wiira ahopanka itthu yootakhala. Masi upanka commo wahohonona upatthannyaawe ni Yehova, wahonkhaliha ni masukhuli menci ni wahonwereeha irutthu. (Isaa. 32:3, 4) Isiyani yankavihenre Davidi waanana masukhuli yeewaanenlyaawe? Ni isiyani inhala unikavihera navaraka itampi yuulupale?

17. Moolumo ari nhina Isaalimu 51:1-4 anthoonyera cani wiira Davidi khweeliini ahottharuwa?

¹⁷ Ulompe ulepelaka uleveleliya. Nuukatyaaya, Davidi ahonlompa Yehova. Davidi ahottharuwa, ni ahonhimyera Yehova citthu cotheene caapankalyaawe. (Usome Isaalimu 51:1-4. *) Wuupuwele mananna Davidi cantaphuwalyaaya nrima upanka wawe commo! (Isaa. 32:1, 2, 4, 5) Wakhala wiira weeva uhovara itampi yuulupale, uhimananihe uvitha itampyaa. Uhiya commo, unlompe Yehova ni unhimyere citthu cipankalyaa. Wapankaka commo, khunhala utepa ukhala ni masukhuli ni unaahala wuutaphuwa nrima. Masi wapheela wiira upatthannyaa ni Yehova ukhale saana, weeva uhaana upankaka-tho itthu ikhwaawe, uhiya paahi ulompa.

18. Davidi oonenle cani ulakiya?

¹⁸ Utthune ulakiya. Yehova ahonveleeliha porofeeta Natani wiira amuulumane Davidi nlattu  wotampi yaavaralyaawe. Davidi khaamananihale uruna ni ahaamini wiira itthu yaapankalyaawe yaari yootakhala. Uyo ahokupali wiira ahaatthekela awannyawe Pate-Sepa, masi ciicammo ahokupali wiira aatepalyaawe untthekela aari Yehova. Davidi ahotthuna ulakiya ni Yehova, phimaana aholeveleliya. (2 Sam. 12:10-14) Wakhala wiira weeva uhovara itampi yuulupale, uhaana urwaaka uwuulumana mahumu o wanlokoni. Yehova haathanla ayo alopwanaayo wiira aniwacere. (Tiya. 5:14, 15) Uhiya iyo, uhimananihe uruna. Weeva waakuvaka utthuna ulakiya ni utthara ikano cinhalaa uvahiya, unaahala waakuva uturuwela ukhalana nnema wanrimani waa ni utteeliya.

19. Isiyani ninlamuliyeehu ulakela upanka?

¹⁹ Ulakele uhituruwela upanka citthu cootakhala. Mwene Davidi aanaacuwela wiira ahaana akaviheriyaka ni Yehova wiira hituruwele upanka citthu cootakhala caapankalyaawe. (Isaa. 51:7, 10, 12) Ukati waaleveleliyaawe ni Yehova, Davidi aholakela uhiya wuupuwela citthu cootakhala. Nlattu wo iyo, uyo ahokhitiri uturuwela ukhalana nnema wanrimani wawe.

20. Ninhala uthoonyera cani wiira ninaasukhuru uleveleliya wihu ni Yehova?

²⁰ Nanlompaka Yehova ninlepelaka unilevelela, natthunaka ulakiya ni neekurumicaka wiira nihituruwele upanka citthu cootakhala, ninaathoonyera wiira ninaasukhuru uleveleliya wihu nuuyova. Napankaka nnyo citthunnyo, ninaahala uturuwela wiicoona saana. Munna mmoca aavarale itampi yuulupale neehaniya James, naahimyeeha wiira iyo ikhanle ikhweeli. Uyo neera: “Ukati waahimyenryaaka mahumu itampi yaavaralyaaka, waakhala toko kaanooruliya nrintti muulupale mmakhatani waka. Kahoturuwela wiicoona saana wanrimani waka.” Unaanitteela nrima venci nlattu woocuwela wiira “Yehova ri wakhiviru ni ale arina nrima wooriipiya” ni wiira “uyo naawoopola ale ari ni masukhuli”!—Isaa. 34:18.

21. Isiyani ninlamuliyeehu upanka wiira ninhiye Yehova animaalihe?

²¹ Ala mahuku ookhiceraala, atthunaka cinaahala utepa unikhumelela citthu cooniwaanela masukhuli. Phimaana, wakhalaka ni masukhuli, uhipicapice ulepela ukaviheriya ni Yehova. Uhuunyoonye usoma Ibiiblya. Wiitthucere ntakihero na Ana, Paulu ni Davidi. Waalepele Athumwana o wiirimu Yehova, wiira yuukavihere ucuwelela itthu inoohela isukhuli. (Isaa. 139:23) Unhiye Yehova wiira ookavihere waanana masukhulyaa, venci-venci masukhuli anoonaa wiira weeva khunkhitiri waanana. Wapankaka commo, unaahala ukhala toko nasaalimu aamwiipenle ncipo Yehova, eeraka: “Ukati masukhulyaaka utepalyaaya winciva, weeva uhokipisiha nrima ni uhokimaaliha.”—Isaa. 94:19.