MWAHA WOOSOMIYA 8
Ikano cinvaheenyu ‘cinawaatteeliha nrima’ akhwiinyu?
“Makhura ni ilumpani cikhanle citthu cintteeliha nrima, khampa upatthani womaana unkhumelela nlattu ntthu woovahiya ikano yooreera.”—MIRU. 27:9.
NCIPO 102 Ajuda Os Que Estão Fracos
NINHALA WIITTHUCANI? *
1-2. Isiyani munna mmoca yiitthucilyaawe nhina uvaha ikano?
KHALAYI, mahumu eeli yahorwaa umootola nuunu aahiile urwaa umikutthaanoni wiira yanlipihe. Humu mmoca ahosoma iveerusu co mbiiblyani cinthoonyera wiira mikutthaano cihaana ifayita. Uyo humuuyo oopuwela wiira ahokhitiri unlipiha uyo nuunuuyo. Masi ukati mahumu waamalihilyaaya wuuluma ni waapheela urwaa, nuunuuyo ahowiirela ayo co: “Miyamunna, nyu khweeliini khannocuwela itthu inkiira.” Ayo mahumwaayo yanvahale ikano uyo nuunuuyo yahicuwelaka itthu yaamwiira. Phimaana, ikano yanvahilyaaya khayankavihenre.
2 Humu ansomenle nrokorihu iveerusu co mbiiblyani heera: “Ule ukatyuule, mi koopuwenle wiira uyo nrokorihuuyo ahonithweela inaasi. Masi weemenlyaaka kuupuwelaka ratta, kahoona wiira uhiya umakela unsomela iveerusu co mbiiblyani nrokorihu, mi kaalamuliya unkohakoha wiira kicuwele itthu yaamwiira. Pooti wankohaaka co: ‘Marikarikoni anookhumelelani muukumini winyu? Isiyani inlamuliyaaka upanka wiira kuukavihereni?’” Uyo humuuyo aheetthuca itthu yofayita ni ilelo khanle humu oofenta ni naakavihera cinene mayamunna.
3. Tipani nvaha ikano wanlokoni?
3 Mahumu phirina nrintti wo waavaha ikano mayamunna o wanlokoni. Hataa ukhalaka commo, atthu akhwaawe o wanlokoni pooti waavaha ikano akhwaaya ukati nkiina. Wootakihera, munna awula nuunu pooti unvaha ikano yo mbiiblyani mpatthannyaawe. (Isaa. 141:5; Miru. 25:12) Awula anuunu pooti waavaha ikano asithiyana o wanlokoni, khampa cinhimyaaya Titu 2:3-5. Ni ayari khanhiya waavaha ikano asaanaaya. Phimaana, hataa ukhalaka toko wiira ula mwahoola unwuuluma mahumu, otheene cihu pooti weettela ikano cinhalaaya uniitthuciha.—Miru. 27:9.
4. Ninhala wiitthucani nhina ula mwahoola?
4 Nhina ula mwahoola, ninaahala waakhula makoho macese: (1) Isiyani inlamuliya uniiriha unvaha ikano ntthu? (2) Niireke khweeliini ihaavo isariya yonvaha ikano ntthuuyo? (3) Tipani unomphwanela unvaha ikano; ni (4) Manannani ninlamuliyeehu unvaha ikano?
ISIYANI INLAMULIYA UNIIRIHA UNVAHA IKANO NTTHU?
5. Isiyani inlamuliya umwiiriha humu waavaha ikano akhunanawe? (Nwehe 1 Akorintu 13:4, 7)
5 Mahumu anawaafenta mayamunnaaya ni mayanuunwaaya o wanlokoni. Ukati nkiina, mahumu pooti umoona munna wiira ihaavo itthu ihimpankaawe ratta, ni ananvaha ikano wiira ankavihere. (Akalas. 6:1) Itthu inwiiriha upanka commo, unkhala unfenta uyo munnooyo. Masi ahinaaya umuulumana ntthuuyo, mahumu ahaana yuulupuwelaka itthu yuulumalyaawe apostolu Paulu aacaka nifento, nhina 1 Akorintu 13:4, 7. * (Nsome.) Nhina nnyo iveerusunnyo, apostolu Paulu heera wiira “ntthu oofenta naavilela ni naapanka citthu comaana . . . Ntthu oofenta naapisera nrima citthu cotheene, naakupali citthu cotheene, naaweherera citthu cotheene, naavilela citthu cotheene.” Wuupuwela nnyo iveerusunnyo unaahala unkavihera humu uvaha ikano ratta ni athoonyeraka nifento. Humu apankaka commo, ntthu naakhela iyo ikanweeyo naahala woona wiira uyo humuuyo nanwacera; phimaana, khunhala unrika utthuna ikano ivahiyaawe.—Aroo. 12:10.
6. Paulu aathoonyenre cani wiira aari humu omphwanela utakihiya ni mahumu ilelo?
6 Apostolu Paulu aari humu unomphwanela utakihiya ni mahumu ilelo. Wootakihera, apostolu Paulu ahaavaha ikano mayamunna o Tesalonika ukati wonnyaawe wiira ayo yampheela uvahiya ikano. Masi nhina iwarakha caawantikhenlyaawe, hinaaya waavaha ikano, Paulu ahoromola waamini waya, unvaresesa waya Nluku ni uvilela waya, ni ahaattottopela nlattu woovara nteko ninifento. Apostolu Paulu ciicammo ahoopuwela citthu caawiirannyeela ayo mayamunnaayo. Uyo ancuwela wiira makhalelwaaya yaari oorika ni yanlupatthiya venci. (1 Atesal. 1:3; 2 Atesal. 1:4) Paulu mpaka aheera wiira ayo makristawaayo yanreera utakihiya ni makristau akhwaawe. (1 Atesal. 1:8, 9) Nkoopuwelani mananna ayo mayamunnaayo caatteelalyaaya nrima wonnyaaya wiira Paulu ahaattottopela cinene! Ayo khweeliini yahokupali wiira Paulu aanaafenta cinene mayamunnaawe. Phimaana, atesalonika yahotthuna ikano caavahiyaaya ni apostolu Paulu.—1 Atesal. 4:1, 3-5, 11; 2 Atesal. 3:11, 12.
7. Nlattuni atthu akiina uhinaakhelelaaya ratta ikano invahiyaaya?
7 Isiyani inhala wiirannya nanvahaka ikano pusya ntthu? Humu mmoca heera: “Atthu akiina khanaakhelela ratta ikano invahiyaaya, kahi nlattu woohaacivela iyo ikanweeyo, masi kontha anoovahiya pusya iyo ikanweeyo.” Iyo itthwiiyo inniitthuciha isiyani? Khunrika utthuna ikano invahiyeehu wakhalaka wiira ntthuuyo nivahile ninifento, kahi narusiye.
NIIREKE KHWEELIINI IHAAVO ISARIYA YONVAHA NTTHU IKANO?
8. Makohoni anlamuliyaawe wiipanka humu hinaaya ulakela urwaa unvaha ikano ntthu?
8 Mahumu ahaana yuulupuwelaka ratta ahinaaya unvaha ntthu ikano. Humu haana eekohaka co: ‘Ihaavo isariya miiva yoorwaa umuulumana uyo ntthuuyo? Itthu ipankilyaawe khweeliini ikhanle itthu yoonanara? Hovonyaniha itthu inhimyaaya Ibiiblya? Awula itthu ilakenlyaawe upanka khinananre, masi inaavirikana paahi ni itthu yaahalaaka ulakela miiva?’ Humu oocuwelaca ‘khanaakuvenla wuulumaca.’ (Miru. 29:20) Humu pooti urwaa unkoha munna nkhwaawe itthu inoonelaawe, wiira acuweleehe wakhala wiira ntthuuyo khweeliini hovonyaniha itthu inhimyaaya Ibiiblya awula mena.—2 Tim. 3:16, 17.
9. Moolumo a apostolu Paulu nhina 1 Timotiyu 2:9, 10 anaakavihera cani mahumu uvaha ikano nhina mawarelo?
9 Muupuwele ila itthwiila: humu mmoca nawoona wiira wanlokoni haavo ntthu hinwara ikuwo ratta. Hinaaya ulakela urwaa umuulumana, uyo humuuyo atthunaka nawiikoha co: ‘Kiireke wiira mawarelwaawe uyo ntthuuyo anaavonyaniha itthu inhimyaaya Ibiiblya?’ Uyo humuuyo khampheela waakhanyereriha akhwaawe utthara moopuwelelwaawe uyova. Phimaana, naamuulumana humu awula nuunu nkhwaawe o wanlokoni ni nankoha noonela cani mawarelwaawe uyo ntthuuyo. Vano, ayo anawuupuwela nkhayi itthu apostolu Paulu yantikhilyaawe nhina mananna cinlamuliyeehu uwara. (Nsome 1 Timotiyu 2:9, 10. *) Apostolu Paulu ahooluma ikano cinaakavihera makristau otheene ucuwela mawarelo omaana ni oothoonyera ihisima. Paulu khantikhile ilista yokuwo makristau cinlamuliyaaya uwara ni cihinlamuliyaaya uwara. Uyo hohimya wiira khula nkristau pooti uthanla uwara ikuwo cinoncivela, masi cihikhale ikuwo cinvirikaniha itthu inhimyaaya Ibiiblya. Vano isiyani mahumu inlamuliyaaya wuupuwela ahinaaya ulakela unvaha ikano ntthu nomoonaaya wiira khanwara ratta? Ayo ahaana yapacaka wuupuwela wakhala wiira mawarelwaawe uyo ntthuuyo anaathoonyera ihisima awula mena.
10. Isiyani inhala unikavihera uwehera ratta citthu akhwiihu cinlakelaaya upanka?
10 Nihaana nuupuwelaka wiira makristau eeli ookhomaala pooti ulakela citthu piili coovirikana, masi woohivonyaniha itthu inhimyaaya Ibiiblya. Hi khaninlamuliya waakhanyereriha akhwiihu upanka citthu niinanna hiiva innicivela.—Aroo. 14:10.
TIPANI UNOMPHWANELA WAAVAHA IKANO AKHWAAWE?
11-12. Isiyani humu inlamuliyaawe wiikoha hinaaya ulakela urwaa unvaha ikano ntthu?
11 Woonannyaaka wiira ihaavo isariya yonvaha ntthu ikano, mahumu ahaana yuupuwelaka tipani unomphwanela unvaha ikano uyo ntthuuyo. Humu hinaaya ulakela urwaa unvaha ikano nuunu ootheliya awula mmirawo o wanlokoni, uyo haana amuulumanaka nhooleli itthoko iryaawe uyo ntthuuyo; atthunaka awannyawe nuunuuyo awula asithumwaane mmirawooyo. Nhooleli itthoko pooti upheelaka utafiti uyo mwahooyo. * Awula nhooleli itthoko pooti ulepela ukhala nkhayi ukati humu unhalaawe unvaha ikano uyo ntthuuyo. Ni wakhalaka wiira ntthu nopheela uvahiya ikano khanle mmirawo nthiyana, pooti ukhalaka wiira anuunu ookhomaala phinaaphwanela urwaa unvaha ikano, khampa cihimiyaaya nhina iparaagarafu 3.
12 Ihaavo itthu ikhwaawe mahumu inlamuliyaaya wuupuwela. Humu hinaaya ulakela urwaa unvaha ikano ntthu, haana eekohaka co: ‘Thi mi unkiphwanela urwaa unvaha ikano ula ntthuula? Awula ntthu nkinaku phinhala umphwanela uvaha iyo ikanweeyo?’ Wootakihera, pooti ukhalaka wiira ntthu nopheela uvahiya ikano khaneecoona ukhalana ifayita. Wakhalaka commo, wanhala ureera uyo ntthuuyo uvahiya ikano ni humu ipacale unkhumelela iyo itthwiiyo. Uyo humuuyo naahala ucuwela ratta itthu immwiira ntthu nopheela uvahiya ikano, ni ula pooti umwaakuvyeela utthuna ikano inhalaawe uvahiya. Masi hataa ukhalaka commo, nihiliyale wiira mahumu otheene ahaana yaalipihaka mayamunna ni asinuunwiihu o wanlokoni ni waakurumica weettela itthu inhimyaaya Ibiiblya. Phimaana, uyo ntthuuyo haana avahiyaka ikano hataa ukhalaka wiira khaavo humu ipacale umwiirannyeela itthu immwiira.
MANANNANI NINLAMULIYEEHU UNVAHA IKANO NTTHU?
Kontha isiyani mahumu ahaana “yaakuvaka uviriyana” (Nwehe iparaagarafu 13-14)
13-14. Kontha isiyani mahumu ahaana yaakuvaka uviriyana?
13 Munviriyane ntthuuyo. Ukati humu uneetthenkacaawe wiira anvahe ikano ntthu, haana eekohaka co: ‘Mi kinancuwela ratta munna nopheelaaka urwaa unvaha ikano? Kinaacuwela khweeliini citthu cinonkhumelela? Ahaavo masakha anonkhumelela miiva ahincuwelaaka? Isiyani impheelaawe nna co?’
14 Unaareera weettela ikano imphwanyannya nhina Tiyaku 1:19 napheelaka unvaha ikano ntthu. Tiyaku neera: “Khula ntthu haana akhalaka owaakuva uviriyana, masi oopica wuuluma ni oopica uviruwa.” Humu pooti wooniha toko wiira naacuwela citthu cotheene cinonkhumelela munna nopheelaawe unvaha ikano. Masi niireke wiira khweeliini naacuwela citthu cotheene cinonkhumelela? Miruku 18:13 ineera: “Waakuvela waakhula uhinatthi wiiweeha citthu cotheene unkhala ulolo ni unaamoonihaca ihaaya ntthu.” Itthu yooreera upanka unkhala unlepela ntthuuyo wiira anihimyeere isiyani immwiira. Phimaana, humu hinaaya wuuluma, haana apacaka unviriyana ntthuuyo. Nnawuupuwela itthu yaamwiirannyenle humu mmoca muulumaleehu wiipaceroni ula mwahoola? Uyo humuuyo heetthuca wiira uhiya waakuvela unsomela ule nuunuule iveerusu cinci co mbiiblyani, uyo ahaana ankohaka co: “Marikarikoni anookhumelelani muukumini winyu?” “Isiyani inlamuliyaaka upanka wiira kuukavihereni?” Mahumu yeekurumicaka wiira acuwele citthu cinaakhumelela mayamunna ni mayanuunu anaahala ukhitiri waalipiha ni waakavihera.
15. Mahumu anlamuliya weettela cani ikano imphwanyannya nhina Miruku 27:23?
15 Mwaacuweleehe mayamunna. Toko conneehu wiipaceroni, wiira ninvahe ntthu ikano comaana khuntosa paahi unsomela iveerusu co mbiiblyani awula unhimyeera isiyani inlamuliyaawe upanka. Mayamunneehu ahaana yacuwelaka wiira ninawaawacera, ninaacuwela masakha anaakhumelela ni nimpheela waakavihera. (Nsome Miruku 27:23. *) Mahumu ahaana yiikurumicaka waapatthanana mayamunna o wanlokoni.
Isiyani inhala unkavihera humu uhinrika unvaha ikano ntthu? (Nwehe iparaagarafu 16)
16. Isiyani inhala waakavihera mahumu uhaarikarika waavaha ikano mayamunna?
16 Mahumu khampheela wiira mayamunna yuupuwele wiira ayo anwuulumana yapheelaka waavaha ikano paahi. Mahumu anaawuulumana mayamunnaaya ni asirokoraya o wanlokoni ni anaapheela cinene ucuwela citthu cinwiirannyeela. Humu mmoca heera: “Nawoopanaka mwaha mayamunna, ninaakhitiri waapatthanana. Ni naapatthananaka, khunhala unirika waavaha ikano.” Ni ntthu nonvaheehu ikano ciicammo khunhala unrika waakhelela ninrimaawe wotheene ikano inonvaheehu.
Kontha isiyani humu haana uhoocya ni uthoonyera unamaana anvahaka ikano ntthu? (Nwehe iparaagarafu 17)
17. Ukatini humu unlamuliyaawe uhoocya ni uthoonyera unamaana?
17 Nhoocye ni nthoonyere unamaana. Ntthu aahitthuneke weettela ikano yo mbiiblyani invahaleehu, nihoocye unwacera. Humu haana eevaracaka wiira hinyoonyiye ni hinviruwele munna khottale ikano ivahiyaawe. Imwaacaka Yesu, Ibiiblya ineera co: “Uyo khanrwaa umalamaliha ntathi wowuntya, ni khanrwaa uttipiha nthupo wosamininnya untthuwa mwiisi uhalaka vakaani uttiphya.” (Mat. 12:20) Yesu khaawoocyaale ni ahaathoonyihera unamaanaawe atthu enci. Humu haana antakihaka Yesu ni unlepela Yehova unkavihera uyo munnooyo wiiweeha ni utthuna ikano ivahiyaawe. Pooti ukhalaka wiira nuuwakatyaaya, uyo munnooyo naahala wuupuwela ikano ivahiyaawe ni ulakela weettela. Uyo humuuyo aahaakuveke woocya ni athoonyeraka unamaana, munna nvahilyaawe ikano naahala waakuva weettela ikano ivahiyaawe. Ni nihiliyale wiira ikano invaheehu ihaana ikhumaka mbiiblyani.
18. a) Ikhweelini yo mbiiblyani ihinlamuliyeehu uliyala, ni isiyani inlamuliyeehu wiikurumica upanka? b) Toko cinthoonyeraaya ilatarato yo wakwaaturuni, isiyani ayari inoopelaaya mwaha?
18 Mwiitthucere citthu cinvonyiheenyu. Nihaana nihiliyalaka wiira nlattu wookhalana matampi, hi khaninhala ukhitiri weettela ukati wotheene citthu cotheene cihimiye nhina ula mwahoola. (Tiya. 3:2) Phimaana, cihaavo citthu cinhaleehu uvonyaniha. Masi navonyaka, nihaana niikurumicaka wiira nihihokoleele-tho uvonyaniha. Nantthekelaka munneehu wanlokoni nlattu wo itthu ipankileehu awula yuulumileehu, uyo khunhala unrika unilevelela oonaka wiira khweeliini ninanfenta.—Nwehe ciicammo ikwaaturu ineera “ Itthu inlamuliyaaya wuupuwela ayari.”
NIITTHUCILE ISIYANI?
19. Isiyani inlamuliyeehu upanka wiira naatteelihe nrima mayamunneehu?
19 Khampa conneehu nhina ula mwahoola, utthuna ni weettela ikano cinvahiyeehu ukati nkiina unaarika. Hi nikhanle atthu oopahuwa, ni akhwiihu anhala univaha ikano ciicammo akhanle atthu oopahuwa. Masi nhihiye wuupuwela citthu ciitthucileehu nhina ula mwahoola. Mwaavahe ikano akhwiinyu nlattu wo waafenta. Mpacere wuupuwela wakhala wiira khweeliini ihaavo isariya yonvaha ikano ntthu ni tipani unomphwanela unvaha ikano. Nhinaaya unvaha ikano ntthuuyo, munkohakohe ni munviriyane ratta; mwapankaka commo phinhaleenyu khweeliini ukhitiri ucuwela itthu immwiira ntthuuyo. Muupuwele mananna cineecoonaawe uyo ntthuuyo. Mwaawacere ni mwaapatthanane mayamunneenyu otheene wanlokoni. Ni nhiliyale wiira itthu impheeleenyu khunakhala paahi waavaha ikano, masi ciicammo ‘waatteeliha nrima.’—Miru. 27:9.
NCIPO 103 Os Anciãos São Um Presente de Jeová
^ par. 5 Unvaha ikano ntthu ukati nkhwaawe unaarika. Vano isiyani inhala unikavihera waavaha akhunanihu ikano cowaalipiha? Nhina ula mwahoola, ninaahala woopela mwaha manannani mahumu cinlamuliyaaya waavaha mayamunna ikano cowaalipiha.
^ par. 5 1 Akorintu 13:4 Ntthu oofenta naavilela ni naapanka citthu comaana. Ntthu oofenta khanonkhalela ihace nkhunanawe, khaneecoona, khaneethenca. 7 Ntthu oofenta naapisera nrima citthu cotheene, naakupali citthu cotheene, naaweherera citthu cotheene, naavilela citthu cotheene.
^ par. 9 1 Timotiyu 2:9 Inanna imocaaru, athiyana ahaana yawaraka ikuwo coohuulihaca muru, ni ahaana yiireerihaka saana ni niihisima; kahi niiwooru awula nimikuhu, ni kahi niikuwo consurukhu mwinci. 10 Masi yiiphwanelihe khampa athiyana anonswalela Nluku, awula ampanka citthu comaana.
^ par. 11 Nwehe mwaha uneera “Ncuweleehe ukhulupale urinaaya mahumu wanlokoni” nhina irevista Ukhalenla yo Fevereiro yo 2021.
^ par. 15 Miruku 27:23 Uhaana ucuwelaka ratta ciryaaya mihuwo caa. Uwacere ratta ikhontwaa caa.
