KHALAYI nlopwana apheelaka uthela, uyova awula amucyaawe yahaana yaalivaka amucyaawe nthiyana aapheelaawe unthela. Ayo pooti waavahaaya nhakhu waakhalanaaya, mihuwo awula nsurukhu. Ukati nkhwaawe, ntheli pooti waathanlaawe waaliva amucyaawe nthiyana aavarelaka nteko. Wootakihera, Yakopi wiira anthele Rakeli ahoviriha myaakha 7 aavarelaka nteko athumwaane. (Upha. 29:17, 18, 20) Nlattuni ntheli ahaana alivaka?

Namasoma neehaniya Carol Meyers heera: “Amucyaawe nthiyana aapheela utheliya yahaana yaliviyaka kontha uyo nthiyanooyo atheliyaka, anhala uhiya waavarela nteko amucyaawe, venci-venci amucyaawe nthiyana yakhalaka anamalima.” Pooti ukhalaka wiira nsurukhu waaliviyaaya amucyaawe nthiyana waanaakavihera itthoko coopiili waatanaca. Nwo waatanacanwo waanaahala waalipiha amuci wiira akaviherane yakhumelelaka itthu. Uhiya commo, nsurukhu waaliviyaaya amucyaawe nthiyana aatheliya waathoonyera wiira uyo nthiyanooyo ahopakaneliya ni anhiya uhooleliya naathumwaane, masi aahala wancera uhooleliya naawanuwawe.

Uliviya amucyaawe nthiyana aapheela utheliya khawaathoonyera utumihiya nthiyanooyo. Ilivuru ineera niimakhuwa Apoovu o Isarayeli—Makhalelwaaya ni Malamulwaaya, * inhimya co: “Yaliviyaka nsurukhu amucyaawe nthiyana aapheela utheliya atthunaka waakhala khampa uyo nthiyanooyo naathumiya. Masi uyo waari nsurukhu paahi waalivaniya, kahi nakoso.”

Ilapo cikhwaawe mahukwaala, ahaavo alopwana anaaliva amucyaawe nthiyana nompheelaaya unthela. Ayari makristau mwanaya apheelaka utheliya ni yalakelaka unlanla ntthu nohala unthela, ayo khanlamuliya ulanla nsurukhu mwinci wiira ‘ureera waya nrima ucuweliye naatthu otheene.’ (Afili. 4:5; 1 Akor. 10:32, 33) Yapankaka commo, ayo khanthoonyera ‘waaciva nsurukhu.’ (2 Tim. 3:2) Uhiya commo, ayari makristau yaahilepeleke nsurukhu mwinci, nlopwana nohala unthela mwanaya khanhala upica unthela nlattu wooweherera uphwanya nsurukhu ulanliyaawe. Uyo ciicammo khanhala uhiya ukhala piyoneeru wiira aphwanye nteko woopokheriya nsurukhu mwinci unhala unkhitiriha waaliva amucyaawe nthiyana nompheelaawe unthela.

Ilapo cikhwaawe, malamulo ookuvernu phinhimya wiira ntthu nopheela uthela haana aalivaka amucyaawe nthiyana nopheelaawe unthela. Ni ayo malamulwaayo phinhimya nsurukhu unlamuliyaawe uliva. Ayari makristau ankhala nnyo ilaponnyo ahaana yiiwelelaka ayo malamulwaayo ni uttharihelela. Kontha isiyani? Kontha Nuulumo na Nluku nineera wiira makristau ahaana ‘yawiiwelelaka akhulupale anhoolela’ ni weettela malamulo ahinvirikaniha ikano ca Nluku.—Aroo. 13:1; Mite. 5:29.