NLAMULO Moceesi naavahiyaawe ni Nluku naahimya wiira apoovu yaanaatthuniheriya unvaha Yehova maciya ni ikhuntta khampa itthuvo. Ayo asinuni eelyaayo anaaromoliya nhina malamulo yaaruma uvahiya itthuvo Nluku. Nno nlamulonno naahimya wiira ntthu aahikhalaneke ikhuntta, pooti waavahaawe nciya; ni aahikhalaneke nciya, pooti waavahaawe ikhuntta. (Lev. 1:14; 12:8; 14:30) Kontha isiyani iyo yaari itthu yomaana? Kontha ukati nkhwaawe maciya yaanaathwaa cinene. Ni nlattuni waathwaaya?

Maciya ankhala asinuni oothamathama, ni antepa umphwanyannya myeeri cootepa uviha ncuwa ncoko wotheene wo Isarayeli. Khula mwaakha waphiyaka mweeri wo Outubro, maciya o Isarayeli anaathamela uhitto waya, uri ilapo cootepa uviha ncuwa. Vano nnyo ilaponnyo cahiyaka uviha ncuwa, maciya anaahokoleela u Isarayeli. (Nci. 2:11, 12; Jer. 8:7) Iyo maanaaya wiira iyiita asarayeli khayaakhitiri uphwanya maciya wiira avaherere khampa itthuvo.

Masi ikhuntta khacinthamathama ni cinaahuwiya wapuwani. Phimaana, nnyo caanaaphwanyannya khula ukati. (Nwehe Joau 2:14, 16.) Ilivuru Plantas e Animais da Bíblia, * ineera wiira “aliteeya otheene ni isittatti cotheene co ncoko wo Palestina cahaavo ikhuntta coohuwiya. Khula inupa yahaana ihiili yokhuntta, awula yaanaattemuliya isiri yonupa ni upankiya nikhuku nankaani noohala urupa ikhuntta.—Nwehe Isaiya 60:8.

Phimaana, Yehova utthuna wawe utthuveliya inuni cahaahala waarika asarayeli uphwanya, hothoonyera wiira khanle Nluku oofenta ni ooreera nrima.