1. Isiyani Yesu yaahimilyaawe aacaka wuumaleloni ulumwenhu ni isiyani yaahimenryaawe attharyaawe wiira apanke?

 MAHUKU vakaani Yesu hinakhwa, attharyaawe acese yahonkoha co: “Isiyani inhala uthoonyera . . . wiira uhophiya ukati woomalamala ulumwenku?” (Mat. 24:3) Atthunaka ayo attharyaayo yaakohale wiira acuwele uwakati Yerusalemu ni itempulu yaahalaaya ukwanyulaciya. Yesu khaawaakhunle aahimyeeraka paahi ukwanyulaciya wosittatti yo Yerusalemu, masi ahooluma ukati “unhalaaya umalamalihiya ulumwenku,” ula ukati unkhaleehuula. Aacaka ukati wo wuumaleloni ituninya, Yesu aheera co: “Nno nihuku nno awula wo iyo iwooreeyo khaavo nocuwela, hataa malayikha wiirimu ni hataa mwaana a Nluku. Masi Apaapa paasi phincuwela.” Wuuluma wawe Yesu ala moolumwaala, ahowiirela attharyaawe wiira yahaana ‘yiiwehawehaka’ ni ‘uhiitthaala.’—Mark. 13:32-37.

2. Nlattuni yaakhanlyaaya itthu yofayita makristau yakhala ukati wo maapostolu ukhala woohiitthaala?

² Makristau o ukati wo maapostolu yahaana uhiitthaala. Wiira yoopole ukumyaaya, yahaana upanka iyo itthwiiyo. Yesu ahaahimerya isiyani yaalamuliyaaya uweheeha wiira acuwelele ukati waahalaaya waattamela ukanyulaciya wosittatti yo Yerusalemu. uyo enre: “Moonaka isittatti yo Yerusalemu inaruukureeriye naanatoropa, ncuwele wiira uri wakhiviru ukati unhalaaya ukwanyulaciya.” Ukati makristau waahalaaya woona ikhumelelaka iyo itthwiiyo, ayo yahaana yapankaka itthu Yesu yaahimilyaawe, ‘utthawela mmamyaakoni.’ (Luka 21:20, 21) Atthu yeewelenle itthu yaahimilyaawe Yesu, phopweele ukati anatoropa o Roma wankanyulacilyaaya Yerusalemu.

3. Nhina ula mwahoola, ninhala wiitthucani?

³ Woohipica, ila ituninya yoohilokeela inaahala umala. Masi ihinakhumelela iyo itthwiiyo, nihaana nihiitthaalaka. Nhina ula mwahoola, ninaahala woona mananna ninlamuliyeehu  uwehera ratta citthu ninooneehu cikhumelelaka ntuninyani, manannani hiiva ninhaleehu wiiwehaweha wiira nihiitthaale ni mananna oovarela nteko saana ukati vakaani unhaleela.

4. Nlattuni hiiva ninlamuliyeehu ucuwelela citthu cinkhumelela ntuninyani ni mananna inatiri co mbiiblyani cineerannyaaya?

⁴ Hi nihaana isariya yoopheela ucuwela citthu cinkhumelela ntuninyani ni woona mananna cineerannyaaya inatiri co mbiiblyani. Wootakihera, Yesu hooluma citthu caahala ukhumelela ni caahala unikavihera ucuwela wiira ila ituninya ya Sotwaniila ihaattamela mmahuku waahalaaya ukwanyulaciya. (Mat. 24:3-14) Apostolu Peturu hohimya wiira hiiva nihaana uwacera mananna cineerannyaaya inatiri wiira wamini wihu ulipe. (2 Pet. 1:19-21) Ilivuru yoomalela yo mbiiblyani impacera nimoolumo aneera: “Moolumo a Yesu Kristu yaahimeeriyaawe ni Nluku, wiira oonihere ipottha ca Nluku citthu cinhala wiirannya woohipica.” (Apoka. 1:1) Vano, ikhanle itthu yomaana ucuwelela citthu cinkhumela ntuninyani ni mananna cinerannyehaaya inatiri co mbiiblyani. Ni hiiva pooti unicivela waahimerya akhunanihu nnyo citthunnyo.

5. Isiyani hiiva nihinlamuliyeehu upanka ni isiyani ninlamuliyeehu upanka? (Nwehe ciicammo ilatarato.)

⁵ Wakhalaka wiira nimmulumana ntthu inatiri co mbiiblyani, nihaana niikhikiceraka wiira nihuulume itthu inoopuweleehu mmuru wihu. Kontha isiyani? Kontha citthu cinoolumaceehu pooti umalamaliha waataaniya wo wanlokoni. Wootakihera, atthunaka hiiva ninaacuwela wiira ahooleli o ntuninyani aneera wiira ampheela umalamaliha ikhotto ni iyo itthwiiyo inaahala uwaana nnema ni mpuha. Uhiya umananiha uhimya itthu inoopuweleehu mmuru wihu wiira ukhanle wiirannya inatiri imphwanyannya nhina 1 Atesalonika 5:3, wanhala ureera waavya itthu yoomalela ikumiheriye mmalivuruni wihu nhina uyo mwahooyo. Myaha ninwoopaneehu atthu nhina wiirannya wonatiri, nihaana ukumiha mmalivuruni cinakheleehu. Commo, ninaahala ukavihera nloko nihu ukhala nowaataniya.—1 Akor. 1:10; 4:6.

6. Isiyani nineetthucereehu 2 Peturu 3:11-13?

⁶ Nsome 2 Peturu 3:11-13. b Apostolu Peturu honikavihera uwehera ratta inatiri co mbiiblyani ninsomeehu. Uyo heera wiira nihaana “niwehereraka ni nihiliyalaka nihuku na Yehova.” Nlattuni? Kahi nlattu woopheela ucuwela nihuku ni iwoora Yehova nohalaawe uwaana ikhotto yo Harmacetom, masi nlattu woopheela uvarela nteko ratta ukati unhaleela wiira nikhale “atthu o meettelo owaarya ni upanka citthu cinthooyera unswalela Nluku.” (Mat. 24:36; Luka 12:40) Nimoolumacero makhwawe, nimpheela upanka citthu comaana ni wiikurumica wiira miteko ninonvareleehu Yehova, ninvara nlattu wonfenta cinene. Masi napheelaka ukhitiri upanka iyo, hiiva nihaana wiiwehaweha mwaneeneehu wiira nihiitthaale.

7. Manannani ninhaleehu woonihera wiira ninawiiweheeha? (Nwehe Luka 21:34.)

⁷ Yesu ahaahimerya attharyaawe wiira yahaana yawehawehaka kahi pahi citthu cinkhumelela ntuninyani, masi ciicammo yahaana  yiiweheehaka asineennyaaya. Iyo inaavaranaca niitthu yantikhiye nhina Luka 21:34. (Nsome. c) Moone itthu Yesu yenryaawe: “Mwiiweheehe ratta.” Ntthu neeweheeha naawacera citthu caahala umalamaliha upatthannyaawe ni Yehova, ni nawaavya mananna oonyema nnyo citthunnyo. Naayo manannaayo, uyo khanhala uhiya ufentiya ni Nluku.—Miru. 22:3; Yuda 20, 21.

8. Ikanoni Paulu yaavahilyaawe makristau?

⁸ Apostolu Paulu ahowiirela makristau wiira yahaana wiiwehaweha. Wootakihera, uyo ahowiirela makristau o Efesu co: “Nweheehe saana meettelweenyu wiira nhikhale khampa alolo, masi nkhale atthu oocuwelaca.” (Efesu 5:15, 16) Ukhuma nenne nokhalayi, Sotwani naamananiha umalamaliha upatthaniihu ni Yehova. Phimaana, Ibiiblya inaanivaha ikano ineera co: “Ncuwele isiyani Yehova impheelaawe,” kontha commo phinhaleehu ukhitiri unyema itapha ca Sotwani.—Efesu 5:17.

9. Ninhala ucuwela cani itthu Yehova impheelaawe wiira nipanke?

⁹ Ibiiblya khinooluma khula itthu inhala uhonona upatthaniihu ni Yehova. Ikwaha cinci, hi nihaana nilakelaka upanka awula uhipanka citthu Ibiiblya ihinoolumaaya saana. Wiira nilakele upanka citthu comaana, nihaana nicuwelelaka “isiyani Yehova impheelaawe.” Ninhala ukhitiri iyo itthwiiyo, nasomaka Ibiiblya khula nihuku ni nakumihaka ukati wiira nuupuwele insomeehu. Pooti ukhalaka wiira Ibiiblya khinvaha ikano yowoonannya nhina itthu impheeleehu ulakela. Hataa ukhalaka commo, hi nimpheela ukhala “atthu oocuwelaca.” Itthu inhala unikavihera ulakela saana ukhanle utotha ucuwela isiyani Yehova impheelawe wiira nipanke ni ukhalana “moopuwelelo a Yesu Kristu.” (1 Akor. 2:14-16) Nihaana nihiliyalaka wiira citthu cowoopiha cikhwawe cinawiithoonya, masi cikiina cinaarika cinene ucuwelela.

10. Citthuni cowoopiha ninlamuliyeehu unyema?

¹⁰ Citthu cinlamuliyeehu unyema cikhanle: waattikhela makwikhwi athiyana awula alopwana anhikhanle amwaarihu awula awannyihu, uhapaliya ni ulya venci, wuuluma citthu cinaawereeha nrima akhunanihu, waathukana atthu oohinamaana, woona ipornografia, woona ifilime ni iporokaraama co TV cowaattakaniya ni citthu coohinamaana cikhwawe. (Isaa. 101:3) Nwananiihu Sotwani ukati wotheene nokhala amananihaka unihapusa wiira ninhiye Yehova. (1 Pet. 5:8) Neetthaalaka, Sotwani pooti unikhaliha atthu ananttima, owootha, okhwilu, oothanya, owiithenca ni ooviruwaca. (Akalas. 5:19-21) Atthunaka wiipaceroni, nnyo citthu coohinamaanannyo pooti uhikhala cuulupale wanrimani wihu. Masi nahiyaka cuunuwaka wanrimani wihu, nnyo citthunnyo pooti wuunuwa ni unipanka pusya.—Tiya. 1:14, 15.

11. Itthuni yowoopiha nihinkhitiriihu waakuva woona, ni nlattuni?

¹¹ Moone ntakihero no citthu cowoopiha atthunaka nihinkhitiriihu waakuva woona. Muupuwele wiira nyuuva nnanvarana nteko ntthu hiri Saahiti a Yehova. Atthunaka nyuuva nnopheela wiira uyo aawehere saana Masaahi a Yehova ni nlattu wo iyo, nyuuva nnamoonihera unamaana ni nnanwacera. Mahuku makiina, nyuuva nnanlyana nkhayi. Masi woohipica, nyuuva nnaapanka iyo itthwiiyo mahuku menci ni atthunaka ikwaha cikhwawe, uyo naawopanani mwaha oolumaka urupihana woohiloka ni cikiina coohinamaana. Atthunaka nyuuva wuupaceroni  khacinhala wuucivelani nnyo myahannyo. Masi nuukatyaaya, nyuuva nnaalamalela ni cinaapacera wuucivelani. Vano nihuku nimoca, uyo nawuulattulani wiira mwanlyaane uwannyawe ni nyuuva nnaatthuna. Wuumaleloni, nyuuva nnaapacera wuupuwela khampa mpatthaniinyu cinoopuwelaawe ni khannohala upica upanka citthu mpatthaniinyu cimpakaawe. Khweeliini, hi nimpheela waawacera saana atthu otheene. Masi nihaana nuupuwelaka wiira atthu ninweettaneehu anaaniiriha upanka citthu ayova cimpankaaya. (1 Akor. 15:33) Hiiva neeweheehaka khampa Yesu cinryaawe, khaninhala ukhalana apatthani ahineettela malamulo a Yehova. (2 Akor. 6:15) Noonaka citthu cowoopiha, nihaana ninyemaka woohipicapica.

12. Atthari a Yesu isiyani yaalamuliyaaya upanka ukati waaweheraraaya ukwanyulaciya isittatti yo Yerusalemu?

¹² Yesu khaaweherera wiira attharyawe akhale anonkomacile paahi yawehereraka ukwanyulaciya isittatti yo Yerusaleemu. Uyo ahaavaha nteko woolalyeera ihapari comaana u “Yerusalemu, u Yuuta wothene ni u Samariya, ni mpaka micoko coottayi nviralyaaya ituninya.” (Mite 1:6-8) Uyo waari nteko mwinci! Nlattu wo wiikurumica wuulalyeerani, ayo yahovarela nteko saana ukatyaaya.

13. Nlattuni ninlamuliyeehu uvarela nteko saana ukatiihu? (Nwehe Akolosu 4:5.)

 ¹³ Nsome Akolosu 4:5. d Wiira niiweheehe, nihaana niwehaceraka mananna ninvareleehu nteko ukatiihu. “Citthu cinkhumelelaka uwakati wahaaweherereehu” pooti uniphwanya otheene cihu. (Ekles. 9:11) Phimaana, hiiva pooti ukhwa woohipica.

14-15. Manannani hiiva ninlamuliyeehu uvarela nteko saana ukatiihu? (Nwehe Maberewu 6:11, 12.) (Nwehe ciicammo ilatarato.)

¹⁴ Hi ninhala uvarela nteko saana ukatiihu napankaka itthu inoncivela Yehova ni nalipihacaka upatthaniihu nuuyova. (Joau 14:21) Nihaana ‘nikhalaka olipa,’ ni ‘utepa uvara cinene nteko wa Apwiiya.’ (1 Akor. 15:58) Vano nakhwaaka awula ila ituninyeela yaphiyaka umwiiso, khaninhala uttharuwa mena vakaani.—Mat. 24:13; Aroo. 14:8.

¹⁵ Ilelo, Yesu nawaaholela attharyawe ukati unlalyeraaya ihapari comaana co Umwene ntuninyani motheene. Yesu ahaakhuluveliha wiira anhala ukhala naayo mpaka wiimaleloni, ni ilelo uyo napanka itthu ikhuluvelihilyawe. Uyo nawaahoolela attharyawe ukati unlalyeeraaya ihapari co Umwene ntuninyani motheene. Nlattu wo mphwinko woothotokanihiya wa Yehova, ninawiitthucihiya mananna oovara uyo ntekooyo. (Mat. 28:18-20) Hi ninnopanka itthu Yesu inwehereraawe wiira nipanke. Ninawiikurumica uvara nteko woolalyeera ni wiitthuciha, ni khanineetthaala ukati unonweherereehu Yehova umalamaliha ila ituninyeela. Neettelaka ikano imphwanyannya nhina Maberewu 6:11, 12, ninaahala uvaresesa niweherero nirineehu “mpaka wuukhiceroni.”—Nsome. e

16. Isiyani inlamuliyehu ulakela upanka?

¹⁶ Yehova holakela nihuku nohalaawe umalamaliha ituninya yoohiloka ya Sotwani. Naphiyaka nno nihukunno, Yehova naahala wiirannyeeha citthu cotheene himilyaawe. Khweeliini, ikwaha ikiina hiiva pooti wooniha toko wiira nno nihukunno ninaapicapica. Masi nihuku na Yehova ‘khaninhala upica.’ (Habak. 2:3) Phimaana, nihaana ulakela ukhala woohiitthaala ukati unonweherereehu Yehova. Khaninlamuliya uhiya ‘unweherera nivilelaka Nluku moopoliihu.’—Mik. 7:7.