MWAHA WOOSOMIYA 3
Mphwinko muulupale wokhontwaa cikiina unanttottopela Nluku ni Kristu
“Woopoliya wihu unkhuma wa Nlukwiihu onkomile wahiceni, ni unkhuma wa Mwaakhontwaa.”—APOKA. 7:10.
NCIPO 14 O Novo Rei da Terra
NINHALA WIITTHUCANI? *
1. Isiyani yaamwiirannyenle munna mmoca wiiwa wawe mwaha waataphuleliye wakonkereesuni mwaakha wo 1935?
MUNNA mmoca aarina myaakha 18 ukati waapattisiyaawe mwaakha wo 1926. Athumwaane ni anumwaane yaari Anamasoma Ibiiblya. * Ayo yahowiitthuciha asaanaaya asilopwana araru ni asithiyana eeli unswalela Yehova ni untakiha Yesu Kristu. Ni khampa caapankesaaya Anamasoma Ibiiblya ule ukatyuule, khula mwaakha, nihuku noyoolya yoohiyu ya Apwiiya, uyo mmirawooyo ankhuuraka iphaawu ni anwuryaka iviinyu. Masi makhalelwaawe yahorukunuwa cinene ukati weewilyaawe mwaha weera: “Mphwinko muulupale.” Uyo mwahooyo waataphuleliye mwaakha wo 1935 ni munna Joseph Rutherford, wakonkereesuni yaapankiye u Washington, DC, EUA. Isiyani Anamasoma Ibiiblya yeetthucilyaaya ile ikonkereeswiile?
2. Ikhweelini yootteeliha nrima yaataphulenlyaawe munna Rutherford?
2 Ukati munna Rutherford waataphulelaawe ule mwahoole, uyo ahothoonyera phaapani akhanle “mphwinko muulupale” unoolumiya nlivuruni ya Apokalipise 7:9. Ule ukatyuule, Anamasoma Ibiiblya yoopuwela wiira mphwinko muulupale ikhanle ikhurupu yaatthu yaahala ciicammo urwaa wiirimu, masi khayaahala ulamulela nkhayi ni Yesu, kontha khayaakhanle ookhuluvelya cinene. Avarelaka nteko Ibiiblya, munna Rutherford ahotaphulela wiira mphwinko muulupale khawaathanliye wiira urwee wakhale wiirimu. Uhiya commo, mphwinko muulupale cikhanle ikhontwaa cikiina * ca Kristu cinhala woopwa ukati wo ‘masakha moolupale’ ni cinhala ukhala watuninyani mpaka. (Apoka. 7:14) Yesu hokhuluveliha co: “Ni kihaana ikhontwaa cikiina, cihikhanle co nna ncicinna; nnya ciicammo kihaana kiwaanaka, ni nnya cinaahala wiiwelela ncu naka ni cinaahala ukhala nikhoto nimoca, co makampuci mmoca.” (Joau 10:16) Nnyo ikhontwaa cikiinannyo, akhanle apoovu a Yehova ookhuluvelya anweherera ukhalana ukumi woohimala upeephoni watuninyani. (Mat. 25:31-33, 46) Ninaahala wiitthuca mananna iyo ikhweeliiyo cirukunusalyaaya makhalelo o Masaahiti a Yehova enci, ni hataa makhalelo a mmirawo romoliye wiipaceroni.—Isaa. 97:11; Miru. 4:18.
ITTHU YAARUKUNUSILE MAKHALELO AATTHU ENCI
3-4. Wakonkereesuni yo 1935, isiyani mayamunna enci yaacuwenlyaaya, ni nlattuni?
3 Uwakati muulupale wo ile ikonkereeswiile, yaari iwoora munna Rutherford waawiirenlyaawe atthu otheene yaari wakonkereesuni: “Atthu otheene anweherera wahoolo ukhalana ukumi woohimala watuninyani yeemele!” Ile ikonkereeswiile yahaavo atthu 20.000, ni munna mmoca aarivo nne nihukunne, naattonka wiira encyaayo yaheemela. Vano, munna Rutherford aheera: “Ula phikhanle mphwinko muulupale!” Wiira wawe commo, atthu otheene yahoopa makuphi ni yahotthapa cinene. Ale yeemenle yahoona wiira khayaaweherera urwaa ukhala wiirimu. Ayo yahocuwela wiira khayaathanliye ni nnepa wowaarya wa Nluku. Waaseele, atthu 840 yahopattisiya ni yahokhala Masaahiti a Yehova. Enci yaapattisiye yaari okhurupu yokhontwaa cikiina.
4 Umala waya ule mwahoole, munna romoliye wiipaceroni ni atthu akhwaawe enci, yahohiya ukhuura iphaawu ni uwurya iviinyu nihuku noyoolya yoohiyu ya Apwiiya. Enci yahiicoona khampa munna mmoca ciicoonnyaawe. Uyo enre co: “Ikwaha yoomalela kikhunryaaka iphaawu ni kiwunryaaka iviinyu, waari mwaakha wo 1935. Mi kahoona wiira Yehova khaakivahile niweherero noorwaa ukhala wiirimu. Masi mi kaaweherera ukhala watuninyani ni ukavihera ukhaliha ituninya ipeephoni.” (Aroo. 8:16, 17; 2 Akor. 1:21, 22) Ukhuma ule ukatyuule, mphwinko muulupale uneera wunceryaaka ni unvara nteko nkhayi ni makristau oothanliya ahanle watuninyani.
5. Yehova nowoonela cani ale ahiile ukhuura iphaawu ni uwurya iviinyu wanuupuweleloni?
5 Yehova naawehera cani ale ahiile ukhuura iphaawu ni uwurya iviinyu ukhuma mwaakha wo 1935? Ni Saahiti a Yehova mmoca oonaka wiira khweeliini khanakhala nkristau oothanliya ni ahiyaka ukhuura iphaawu ni uwurya iviinyu wanuupuweleloni, Yehova nonwehera cani? (1 Akor. 11:28) Akiina atthunaka yankhuura iphaawu ni yanwurya iviinyu kontha khayaacuweleeha itthu inwehereraaya. Masi wakhala wiira ayo ahoyoonenela wiira khayaapanka ratta, ahohiya ukhuura iphaawu ni uwurya iviinyu ni yaahihiyeke umwiiwelela Yehova, uyo khweeliini nawaatthuna khampa ikhontwaa cikiina. Hataa ukhalaka wiira ahohiya ukhuura iphaawu ni uwurya iviinyu, ayo nanlelo anaarwaa unuupuweleloni kontha anaasukhurweela cinene citthu cotheene Yehova ni Yesu cinipankenlyaaya.
NIWEHERERO NOMAANA
6. Isiyani Yesu inrumaawe malayikha?
6 Ukhala wiira uwakati wo masakha moolupale uhaattamela, unaareera wuupuwela itthu inhimyaaya ilivuru ya Apokalipise, ikapiitulu 7. Iyo inwuuluma makristau oothanliya ni mphwinko muulupale wokhontwaa cikiina. Nhina iyo iwooniiyo, Yesu naaruma malayikha wiira ahihiyerere uvarelela iphyoo cese cinhala waakwanyulaca atthu oohinamaana. Ayo malayikhaayo anaarumiya wiira ahihiye uvarelela nnyo iphyonnyo, mpaka uwakati Yehova unhalaawe umalihera waatthitta makristau oothanliya otheene, awula wanhalaawe ulakela wiira ayo akhanle atthu ookhuluvelya. (Apoka. 7:1-4) Nlattu woothoonyera ukhala atthu ookhuluvelya, makristau oothanliya anaahala utthuveliya, wanhalaaya ukhalihiya mamwene ni anankuttho wiirimu. (Apoka. 20:6) Ale otheene ampaka mphantte ikhurupu yaamuci a Nluku wiirimu, anoona upica uphiya uwakati unhalaaya uwoona yatthuveliyaka makristau 144.000!
Mphwinko muulupale waatthu anawanre ihancu cootteela ni acisile makutthi, ariuhoolo wohice yowaarya ya Nluku ni uhoolo wo Mwaakhontwaa (Nwehe iparaagarafu 7)
7. Toko cinthoonyeraaya Apokalipise 7:9, 10, phaapani Joau awoonnyaawe, ni ayo atthwaayo ampaka isiyani? (Nwehe ilatarato iri wakaapani.)
7 Vano, apostolu Joau nawoona itthu yootikhiniha: “mphwinko muulupale” unhala woopwa ukhottoni yo Harmacetom. Uyo mphwinkooyo unaavirikana niikhurupu yo makristau oothanliya 144.000, kontha uyo ukhanle mphwinko waatthu enci ni khurina nummeru. (Nsome Apokalipise 7:9, 10. *) Atthu o mphwinko muulupale awanre “ihancu cootteela.” Iyo maanaaya wiira ayo atthwaayo kharina “nnempa nontuniyani” ya Sotwani ni khahiile unvaresesa Nluku ni Kristu. (Tiya. 1:27) Ayo anaakhuwela, yeeraka wiira yoopoliye nlattu wo citthu cotheene cipankilyaawe Yehova wamoca ni Yesu, Mwaakhontwaa a Nluku. Ciicammo, ayo ahoovarelela makutthi. Iyo inthoonyera wiira ayo unawaatteela nrima nlattu Yesu wookhala Mwene thanliye ni Yehova.—Nwehe ciicammo Joau 12:12, 13.
8. Toko cinthoonyeraaya Apokalipise 7:11, 12, isiyani inhalaaya upanka ale ankhala wiirimu yoonaka mphwinko muulupale?
8 Nsome Apokalipise 7:11, 12. * Isiyani impankaaya ale ankhala wiirimu yoonaka mphwinko muulupale? Joau nawoona wiira otheene ale ankhala wiirimu yoonaka mphwinko muulupale, anaatteeliya nrima cinene ni ananttottopela Nluku. Ni ayo anaahala utepa ukhala ootteeliya nlattu wowoona ciirannyaaka citthu coonalyaawe Joau, uwakati mphwinko muulupale unhalaaya woopwa mmasakhani moolupale.
9. Toko cinthoonyeraaya Apokalipise 7:13-15, isiyani atthu o mphwinko muulupale impankaaya mahukwaala?
9 Nsome Apokalipise 7:13-15. * Awaacaka atthu o mphwinko muulupale, Joau heera wiira ayo ‘ahokattha ihancu caya ni ahotteeliha mphomeni wo Mwaakhontwaa.’ Iyo maanaaya wiira ayo unawaataphuwa nrima ni Yehova naawoona ukhala atthu ooloka. (Isai. 1:18) Ayo akhanle makristau owiivaherera wa Yehova ni oopattisiya, anaamini woopoliya wihu ni Yesu, ni arina upatthani womaana ni Yehova. (Joau 3:36; 1 Pet. 3:21) Phimaana, ayo “ananvarela nteko [Nluku] uthana nuuhiyu” watuninyani. Ayo akhanle atthu owiikurumica ni phintepa uvara nteko woolalyeera ni wo wiitthuciha, yahooleliheraka muukumini waya citthu co Umwene wa Nluku.—Mat. 6:33; 24:14; 28:19, 20.
Atthu o mphwinko muulupale anoopweele mmasakhani moolupale ni anari ootteeliya (Nwehe iparaagarafu 10)
10. Atthu o mphwinko muulupale ankupali isiyani, ni iparakhani cinhalaaya woona ciirannyaaka?
10 Atthu o mphwinko muulupale anhala woopwa ukati wo masakha moolupale, anaakupali wiira Nluku khanhala uhiya waawacera, kontha uyo hokhuluveliha “umweesa heemaawe iriyaaryaaya ayo atthwaayo.” Uyo ukatyuuyo, iparakha ikhontwaa cikiina caawehereraaya cinene cinaahala wiirannya: “[Nluku] naarwaa uwuta minthori, khunhala ukhala-tho ukhwa, ikuttho, isontte-sontte, ni hataa yoowerya.”—Apoka. 21:3, 4.
11-12. a) Toko cinthoonyeraaya Apokalipise 7:16, 17, iparakhani cinhalaaya waakhela atthu o mphwinko muulupale? b) Isiyani atthu okhurupu yokhontwaa cikiina inlamuliyaaya upanka nihuku no Nuupuwelelo, ni nlattuni?
11 Nsome Apokalipise 7:16, 17. * Ukati ninoolumeehuula va, ahaavo Masaahiti a Yehova enci anhuva nlattu wotala, inkhumelela nlattu woothwaa nsurukhu ni nlattu wokhotto. Akhwaawe, ahootthukeliya nlattu wo waamini waya. Hataa ukhalaka commo, atthu o mphwinko muulupale anaakhala ootteeliya, kontha anaacuwela wiira wahoolo, anaahala woopwa ukati unhalaaya umalamalihiya ila ituninya yoohinamaaneela; ni anaacuwela wiira anaahala ukhalana iyoolya yinci yomwiirutthuni ni yoominepani. Ayo atthwaayo anaahala woopwa uwakati wo masakha moolupale, ni Yesu naahala waahoolela ni waarwaana “mapuro ari maaci ookumi [woohimala].” Vano mweemele ni muupuwele iparakha yomaana ni ihinlikananiya inwehereraaya atthu o mphwinko muulupale. Uvirikana naatthu ibiliyawu cene akhanle ntuninyani ni akhwile, atthu o mphwinko muulupale khanhala ucuwela ukhwa isiyani!—Joau 11:26.
12 Atthu akhanle okhurupu yokhontwaa cikiina anansukhuru venci Yehova ni Yesu nlattu wowaavaha niweherero nomaana ni nihinlikananiya! Ayo khathanliye wiira arwee yakhale wiirimu. Masi khunakhala wiira Yehova khanwoona ukhala atthu ofayita. Makristau oothanliya ni hataa atthu okhurupu yokhontwaa cikiina, otheene caya ahaana iparakha yonttottopela Nluku ni Kristu. Ni inanna imoca ninlamuliyeehu upanka iyo, ukhanle wuupuwelela ukhwa wa Kristu.
MUNTTOTTOPELE YEHOVA NI YESU NINRIMEENYU WOTHEENE WANUUPUWELELONI
Iphaawu ni iviinyu invirihiya wanuupuweleloni inaanuupusera wiira Yesu khwile wiira oopole ukumiihu (Nwehe iparaagarafu 13-15)
13-14. Isiyani inlamuliya uniiriha otheene cihu urwaa wuupuwelela ukhwa wa Kristu?
13 Myaakha cinvirannya va, waalikeliyaka, unoonannya wiira nhina waatthu 1.000 anwa wanuupuweleloni, ntthu mmoca paahi phinkhuura iphaawu ni phinwurya iviinyu. Iyo inthoonyera wiira maloko menci, khaavo ntthu nokhuura iphaawu ni nowurya iviinyu wanuupuweleloni. Maanaaya wiira atthu enci anrwaa unuupuweleloni anweherera wahoolo ukhala watuninyani mpaka. Vano isiyani inwiiriha ayo atthwaayo urwaa wuupuwelela ukhwa wa Kristu? Itthu inwiiriha wuupuwelela ukhwa wa Yesu, phi itthu imocaaru immwiiriha ntthu urwaa ukacamentuni wampwanaawe. Ale anrwaa ukacamentuni ampheela uthoonyera wiira anawaafenta ni anawaakavihera ale anthelanaca. Inanna imocaaru, atthu okhurupu yokhontwaa cikiina anrwaa unuupuweleloni kontha ampheela uthoonyera wiira ananfenta ni anankavihera Kristu wamoca ni makristau oothanliya. Ayo ciicammo ampheela uthoonyera wiira anansukhuru Yesu Kristu, wiivaherera wawe wiira anoopole ni aniphwanyihe iparakha yookhalana ukumi woohimala watuninyani.
14 Ihaavo itthu ikhwaawe inwiiriha atthu okhurupu yokhontwaa cikiina urwaa unuupuweleloni: ayo ampheela umwiiwelela Yesu. Ukati Yesu waaryaawe ni maapostolwaawe ookhuluvelya wanuupuweleloni noopacera, uyo ahaaruma, awiirelaka co: “Nhihiyerere upanka ila nkuupuwelelaka.” (1 Akor. 11:23-26) Phimaana, atthu okhurupu yokhontwaa cikiina khanhala uhiya upanka Nuupuwelelo mpaka uwakati makristau oothanliya otheene unhalaaya urwaa wiirimu. Ayo ciicammo khanhala uhiya waalattula akhwaaya wiira yoone uyo nkutthaano muulupalyooyo.
15. Manannani otheene cihu ninlamuliyeehu unttottopela Nluku ni Kristu unuupuweleloni?
15 Unuupuweleloni, ninanttottopela Nluku ni Kristu, niipaka icipo ni nilompaka nkhayi. Nantano, mwaha wonuupuwelelo uneera: “Nthoonyere usukhuru itthu yuupankenlyaaweni Nluku ni Kristu!” Uyo mwahooyo unaahala unikavihera utepa unsukhuru Yehova ni Kristu. Ukati unhalaaya uvirihiya iphaawu ni iviinyu, atthu otheene anhala ukhala wanuupuweleloni anaahala wuupuwela isiyani inthoonyeraaya nnyo citthu piilinnyo: irutthu ni iphome ya Yesu. Ciicammo, ninaahala wuupuwela mananna Yehova cinifentilyaawe, unvaherera wawe Mwanawe wiira akhwe ni oopole ukumiihu. (Mat. 20:18) Otheene ale anaafenta Apaapeehu o wiirimu ni anonfenta Mwanaya khanhala upheela ulova unuupuweleloni.
MUNSUKHURU YEHOVA NLATTU WO NIWEHERERO NUUVAHILYAAWENI
16. Isiyani ihinaavirikaniha makristau oothanliya naatthu okhurupu yokhontwaa cikiina?
16 Cihaavo citthu cinci cihinaavirikaniha makristau oothanliya naatthu okhurupu yokhontwaa cikiina. Makristau oothanliya ni atthu okhurupu yokhontwaa cikiina, otheene caya anaafentiya ni Yehova ni ahaana ifayita uhoolo wawe. Kontha Yehova aathumile niiperesu imocaaru: ukumi wa Mwanawe nonfentaawe cinene. Itthu inaavirikaniha, ikhanle paahi iparakha inwehereraaya waakhela uhoolo. Atthu okhurupu coopiili khanlamuliya uhiya unvaresesa Nluku ni Kristu. (Isaa. 31:23) Ni khiivo ikhurupu Yehova intepaawe uvaha nnepa wowaarya, uvikana mananna cinvahaawe ikhurupu ikiineeyo. Khweeliini, uyo nanvaha nnepa wowaarya khula ntthu toko cinomphwanelaaya.
17. Makristau oothanliya ahanle watuninyani, iparakhani inwehereraaya cinene waakhela?
17 Makristau oothanliya khanyarelaniya niweherero noorwaa ukhala wiirimu. Yehova phinhela wanrimani waya nno niwehereronno. Ayo anawuupuwela nno niwehereronno, anaalompela ni anaaweherera cinene ukati unhalaaya waakhela iparakha ikhuluvelihiyaaya yookhala wiirimu. Ayo khancuwela irutthuni inhalaaya ukhalana wiirimu. (Afili. 3:20, 21; 1 Jo. 3:2) Hataa ukhalaka commo, ayo anoona upica uphiya ukati unhalaaya ukhala wamoca ni Yehova, Yesu ni malayikha ni unhalaaya wancera ulamulela muumweneni wa Nluku, wamoca ni makristau oothanliya akhwaawe ari wiirimu nna co.
18. Atthu okhurupu yokhontwaa cikiina, iparakhani cinwehereraaya cinene waakhela?
18 Ale akhanle ikhontwaa cikiina anaaweherera cinene uphiya ukati unhalaaya ukhalana ukumi woohimala watuninyani. Iyo ikhanle itthu impheelaawe khula pinaatamu. (Ekles. 3:11) Ayo anoona upica uphiya ukati unhalaaya ukhaliha ituninya ipeephoni. Ayo anaapheela cinene uteka inupa caya, waala miri caya ni uwuunuwiha asaanaaya nuukumi woohiweryaaciya. (Isai. 65:21-23) Ayo ciicammo anaapheela cinene weetta ntuninyani motheene, yoonaka myaako cooreeraca, itakhwa, ipahari ni ukhalana ukati wowiitthucera citthu Yehova cumpalyaawe. Itthu intepa waatteeliha nrima, ukhanle ucuwela wiira wahoolo, upatthannyaaya ni Yehova unaahala uvira utepaka ukhala woolipa khula nihuku.
19. Isiyani khula ntthu inthoonyeraawe arwaaka unuupuweleloni, ni ula mwaakhoola, Nuupuwelelo ninhala ukhala nihukuni?
19 Yehova honvaha khula ntthu nonswalela niweherero noohoolo nomaana: uphwanya ukumi woohimala. (Jer. 29:11) Urwaa wuupuwelela ukhwa wa Kristu, inkhala inanna yonsukhuru Nluku ni Kristu nlattu wo citthu cotheene cipankilyaaya wiira nikhalane nno niwehereronno. Khweeliini, Nuupuwelelo ukhanle nkutthaano muulupale makristau eekhweeli unkhalanaaya khula mwaakha. Nantano, uyo nkutthaanooyo unhala upankiya ncuwa ninakenle, Isaapatu, nihuku 27 no Março 2021. Enci anaahala ukhitiri woona sana-saana uyo nkutthaanooyo, awula khiivo inhala waarikarikihela. Akhwaawe hataa yalupatthiyaka, khanhala uhiya upanka uyo nkutthaanooyo. Ni akiina anhala wuupuwelela ukhwa wa Kristu nkhattya. Hataa nuupuwelelaka ukhwa wa Kristu nipuroni, nihiliyale wiira Yehova, Yesu ni amuci a Nluku otheene o wiirimu anaahala unoona. Phimaana khula ntthu, khula ikhurupu, ni khula nloko, otheene ninoopheelelani wiira nkhalane Nuupuwelelo nomaana!
NCIPO 150 Utothe woopoliya ni Yehova
^ par. 5 Nihuku 27 no Março, mwaakha wo 2021, ninhala ukhala nihuku nuulupale. Uhiyu wo nno nihukunno, ninaahala wuupuwelela ukhwa wa Yesu Kristu. Atthu enci anhala wuupuwelela ukhwa wa Yesu nno nihukunno, akhanle atthu Yesu yaawiihannyaawe “ikhontwaa cikiina.” Ikhweelini yootteeliha nrima Masaahiti a Yehova icuwenlyaaya mwaakha wo 1935 inwaaca ayo atthwaayo? Iparakhani cootteeliha nrima ikhwontwaa cikiina cinwehereraaya waviraka ukati wo masakha moolupale? Ni manannani ikhontwaa cikiina cinlamuliyaaya unttottopela Nluku ni Yesu wanuupuweleloni?
^ par. 1 Ule ukatyuule, Masaahiti a Yehova yeehaniyaka Anamasoma Ibiiblya.
^ par. 2 MOOLUMO OOTAPHULELIYA: “Ikhontwaa cikiina” anaaciya atthu anthukumanihiya ukati wo mahuku ookhicera. Ayo akhanle atthu anontthara Kristu ni anweherera urwaa ukhalana ukumi woohimala watuninyani. Masi nuulumo “mphwinko muulupale,” anaaciya atthu ampanka mphantte ikhurupu yokhontwaa cikiina anhala ukhala akumi ukati Kristu unhalaawe waahukhumu apinaatamu uwakati wo masakha moolupele ni anhala woopwa ukhottoni yo Harmacetom.
^ par. 7 Apokalipise 7:9 Wahoolo waya mi kihoona mphwinko muulupale, ni khaavo pinaatamu aakhitiri waalikela, wo atthu olapo, o mahimo, o maloko ni oluuka cotheene, aneemenle uhoolo wohice ni uhoolo waya Mwaakhontwaa, anawanre ihancu cootteela, ni yahaana makutthi mmatatani waya. 10 Yaanaakhuwela yakumiheraka vate ncu naya, yiiraka: “Woopoliya wihu unkhuma wa Nlukwiihu onkomile wahiceni, ni unkhuma wa Mwaakhontwaa.”
^ par. 8 Apokalipise 7:11 Malayikha otheene yaahoweemela anarukurenrye ihice, ni anaarukurenrye mahumu ni cowumpiya cikumi cese; ni ayo yahokhoroma mpaka vathi uhoolo waya ihice, ni yahonlompa Nluku, 12 yiiraka: “Amem! Nlukwiihu oocuwelaca, ookhomaala ni nakuru, attottopeliye, attitthimihiye, asukhurweeliye, ni ahisimiye mahuku otheene ni mpaka. Amem!”
^ par. 9 Apokalipise 7:13 Uyo uwakatyuuyo, humu mmoca ahokikoha: “Phaapani ala awanre ihancu cootteelaala, ni ankhuma vayi?” 14 Woohipica, mi kahomwaakhula co: “Pwiiya, thinyu nnocuwela.” Ni uyova ahokiirela: “Alaca phaale ankhuma mmasakhani moolupale, akatthile ihancu caya ni atteelihile mphomeni wo Mwaakhontwaa. 15 Phimaana ayo yeemenlyaaya uhoolo wohice ya Nluku, ni ananvarela nteko uthana nuuhiyu ntempuluni wawe; Ule unkomile wahiceni naahala umweesa heemaawe iriyaaryaaya ayo atthwaayo.”
^ par. 11 Apokalipise 7:16 Khinhala waavola-tho itala, khaninhala waavola-tho ntthona, ni khaninhala waapaha ncuwa ni hataa waavihera nttukhuttha, 17 kontha Mwaakhontwaa, ri wariyari ihice, naahala waahoolela ni waarwaana mapuro ari maaci ookumi. Ni Nluku naahala waawuutaca minthoryaaya otheene.
