1. Isiyani inthoonyera wiira mahukwaala khanivo nifento mmatthokoni?

IBIIBLYA ineera wiira uwakati wo mahuku ookhicera, atthu enci yaahala ukhala “oohaafenta akhunanaya.” Iyo maanaaya wiira atthu enci khayaahala waafenta amucyaaya. (2 Tim. 3:1, 3) Ilelo, hiiva ninawoona iyo inatiriiyo yiirannyaaka. Wootakihera, mmatthokoni cinci unaamwalanaciya. Ayari anaaviruwelana ni asaana khaniicoona ufentiya. Ni hataa atthu ankhalakhala itthoko imoca pooti uhaatanaca. Namasoma mmoca naavaha ikano amuci, neera: “Mayamaama, mayapaapa ni asaana khanoopa mwaha nkhayi, masi khula ntthu nokhala apotolacaka ikomputatooryaawe, itabletyaawe awula telefoonnyaawe. Hataa yakhalaka inupa imoca, ayo khancuwelana saana.”

2-3. a) Toko cinthoonyeraaya Arooma 12:10, phaapani anlamuliyeehu waafenta? b) Isiyani inhaleehu wiitthuca nhina ula mwahoola?

² Hiiva khanimpheela ukhala atthu oohifenta toko ciryaaya atthu ontuninyani. (Aroo. 12:2) Masi hi nimpheela waawacera akhwiihu, awula, nimpheela waafenta akhwiihu. Khanimpheela waafenta paahi amuciihu, masi ciicammo nipheela waafenta amuciihu oominepani, mayamunneehu ni asirokorihu o wanlokoni. (Nsome Arooma 12:10. *) Naafentaka mayamunneehu ni nrimeehu wotheene, hiiva ninawiiwanana. Ni wiiwanana unaanikavihera otheene cihu unswalela Yehova unitteelaka nrima.—Mik. 2:12.

³ Isiyani inhala unikavihera waafenta mayamunneehu ninrimeehu wotheene? Nttwee noone isiyani inniitthucihaaya matakihero o mbiiblyani.

4. Isaalimu 103:8 innithoonyera isiyani?

⁴ Ibiiblya inaathoonyera makhalelo omaana a Yehova. Wootakihera, iyo ineera wiira “Nluku nifento.” (1 Jo. 4:8) Ucuwela iyo unaaniiriha upheela umpatthanana Nluku. Masi Ibiiblya ciicammo ineera wiira Yehova khanle Nluku “oomwinciva nifento nookhuluvelya.” (Nsome Isaalimu 103:8. *) Iyo inthoonyera wiira Yehova naanifenta venci!

5. Yehova nothoonyera cani ikiriri, ni ninlamuliya untakiha cani?

⁵ Isaalimu 103:8 inawuuluma nifento nookhuluvelya na Yehova wamoca niikiriri irinaawe. (Nkw. 34:6) Inanna imoca Yehova cinthoonyeraawe ikiriri, ukhanle unilevelela matampiihu. (Isaa. 51:1) Masi mbiiblyani, ikiriri khunaaciya paahi unlevelela ntthu. Ukhalana ikiriri unaamwiiriha ntthu unkavihera nkhunanawe yamphwanyaka masakha. Yehova neera wiira naapheela venci unikavihera, uvikana mananna nnyari cimpheelakaawe unkavihera mwanawe. (Isai. 49:15) Yaniphwanyaka masakha, ikiriri irinaawe Yehova inankurumica wiira uyo anikavihere. (Isaa. 37:39; 1 Akor. 10:13) Hiiva ninthoonyera wiira ninaawoonela ikiriri mayamunneehu naalevelelaka ni naliyalaka citthu cinnitthekelaaya. (Efesu 4:32) Masi inanna yuulupale ninlamuliyeehu uthoonyera wiira ninaawoonela ikiriri mayamunneehu, ukhanle waakavihera yaaphwanyaka masakha. Nifento nirineehu nanikurumicaka uwoonela ikiriri akhwiihu, hiiva ninthoonyera wiira ninantakiha Yehova, ule verihenle ukhalana uthunku.—Efesu 5:1.

6. Upatthani wa Jonataa ni Davidi waari cani?

⁶ Mbiiblyani, ahaavo matakihero menci aatthu oopahuwa yaarina upatthani woolipa naakhwaaya. Ntakihero nimoca nikhanle na Jonataa ni Davidi. Ibiiblya ineera: “Janataa ni Davidi yahopatthanaca cinene; ni Jonataa ahancera unfenta Davidi toko ciifentaawe.”  (1 Sam. 18:1) Yehova ahonthanla Davidi wiira akhale mwene ukati Sawuli waahalaawe uhiya ulamulela. Nlattu wo iyo, Sawuli ahokela unlupattha Davidi ni aapheela umwiiva. Masi mwaana a Sawuli, eehaniya Jonataa, khaakavihenre athumwaane unlupattha Davidi. Jonataa ni Davidi yahokhuluvelihana wiira upatthannyaaya khawaahala umala ni khayaahala uhiya ukaviherana.—1 Sam. 20:42.

7. Jonataa ni Davidi, isiyani yaahala uwiiriha uhipatthanaca?

⁷ Itthu innitikhiniha cinene noopuwelaka upatthani wa Jonataa ni Davidi, ukhalaka wiira cahaavo citthu cinci caahala uwiiriha uhipatthanaca. Wootakihera, Jonataa aari muulupale cinene umpwaha Davidi; ukati Davidi waayariyaawe, Jonataa aarina myaakha cookhalaka 30. Vano, atthunaka Jonataa aahala wiira co: “Davidi mwankaani cinene; khancuwelaca cinene toko mi. Phimaana khunomphwanela ukhala mpwanaaka.” Masi Jonataa khoopuwela commo. Uyo aananhisima venci Davidi.

8. Woonela winyu, nlattuni uneereehu wiira Jonataa aari mpatthani omaana a Davidi?

⁸ Unari wiira Jonataa ahopheela, uyo pooti waamoonelaawe ihace Davidi. Ukhala wiira Jonataa aari mwaana a Sawuli, uyo atthunaka anhala ukhanyerera wiira uyova phamphwanela ukhala mwene ukati Sawuli waahalaawe uhiya ulamulela. (1 Sam. 20:31) Masi Jonataa aanawiiyeviha ni ananvaresesa Yehova. Phimaana, uyo ahaamini utthara itthu yaalakenlyaawe Yehova, wiira akhumaka Sawuli, Davidi phaahala ukhala mwene. Jonataa ciicammo khaahiile unvaresesa Davidi, hataa uyo aviruweliyaka naathumwaane.—1 Sam. 20:32-34.

9. Niireke Jonataa oopuwela wiira Davidi aari nwanannyaawe? Ntaphulele.

⁹ Jonataa aananfenta cinene Davidi. Phimaana, Jonataa khoopuwela wiira Davidi aari nwanannyaawe. Jonataa ancuwela sana-saana uvarela nteko muura ni nsoka ni uyo aari nakhotto oolipa nrima. Jonataa ni athumwaane, Sawuli, yaacuweliya ukhala alopwana “owaakuva cinene waavikana asaaka ni yaari okuru cinene waavikana akharamu.” (2 Sam. 1:22, 23) Unari wiira ahopheela, Jonataa anhala wiittitthihaca nlattu wo citthu caakhitinryaawe upanka. Masi uyo khaari nlopwana onttima ni oncivela usinttana. Uhiya commo, Jonataa anaatikhinaca ulipa nrima wa Davidi ni unkhuluvela wawe Yehova. Khweeliini, ukati Davidi waamwiivilyaawe Koliyasi, Jonataa phancenryaawe unfenta Davidi khampa ciifentaawe. Vano hiiva? Ninlamuliya uthoonyera cani wiira ninawaafenta mayamuneehu toko Jonataa canfentaawe Davidi?

10. Waafenta akhunananihu venci ninrimeehu wotheene maanaaya isiyani?

¹⁰ Ibiiblya ineera: “Nfentane venci ninrimeenyu wotheene.” (1 Pet. 1:22) Yehova naanivaha ntakihero nomaana wiira nintakihe. Uyo naanifenta cinene; phimaana nanvaresesaka, khiivo itthu inhala ukhitiri unimwalaniha nuuyo. (Aroo. 8:38, 39) Nuulumo neekereeku nitaphuleliye “venci” nhina 1 Peturu 1:22, ninaaca wiikurumica cinene uthoonyera nifento. Ukati nkiina, unaanirika waafenta mayamunneehu ni asirokorihu. Akhunanihu yanipankaka itthu ihinicivenle, hiiva khaninlamuliya uhiya ‘uvilelana ni nifento, niikurumicaka cinene wiira nihihiye wiiwanana unvahiyeehu ni nnepa, wiiwanana unwaana nnema.’ (Efesu 4:1-3) Napheelaka wiira nihihiye ukhala nnema wanlokoni, khaninlamuliya uweheeha citthu cinvonyaaya mayamunneehu. Nihaana niikurumicaka waawehera mayamunneehu  khampa Yehova cinaaweheraawe.—1 Sam. 16:7; Isaa. 130:3.

11. Kontha isiyani pooti unirika waafenta mayamunneehu ninrimeehu wotheene?

¹¹ Ukati nkiina unaanirika waafenta mayamunneehu ninrimeehu wotheene, venci-venci noonaka citthu cinvonyaaya. Unkhala toko wiira iyo phi itthu yaawiirannyeela makristau akhwaawe oopacera. Wootakihera, Evodia ni Sintiki yahiikurumica uvara nteko “nkhayi ni [Paulu] nlattu wohapari comaana.” Masi waahookhalaru commo, ihaavo itthu yaawiiriha uhiiwanana. Phimaana, Paulu ahaakurumica wiira “akhalane moopuwelelo mamocaaru nhina wa Apwiiya.”—Afili. 4:2, 3.

12. Isiyani inhala unikavihera waafenta mayamunneehu ninrimeehu wotheene mahukwaala?

¹² Isiyani inhala unikavihera waafenta mayamunneehu ninrimeehu wotheene mahukwaala? Nihaana naacuwelaka ratta. Naacuwelaka ratta mayamunneehu, khunhala unirika ucuwela itthu inwiira ni khunhala unirika waafenta. Hiiva pooti waapatthanana mayamunneehu, hataa yatepaka ukhala oolupale, amirawo awula okhapila ikhwaawe. Mmuupuwele Jonataa. Uyo ampwaha Davidi myaakha cookhalaka 30. Waahookhalaru commo, uyo ahokhala mpatthani muulupale a Davidi. Nnoonela cani umpatthanana wanlokoni winyu ntthu muulupale cinene owuupwahani nyuuva, awula mmirawo? Mwapankaka commo, nyuuva nnaahala uthoonyera wiira nnaafenta “mphwinko wo mayamunna wotheene.”—1 Pet. 2:17.

13. Nlattuni nintepeehu waapatthanana cinene mayamunna akhwaawe?

¹³ Waafenta mayamunneehu ninrimeehu wotheene, niireke maanaaya wiira nihaana nikhalanaka upatthani woolipa ni mayamunna o wanlokoni otheene? Mena, hi khanaahala ukhitiri iyo. Khinakhala itthu yoonanara uhitepa waapatthanana mayamunna akiina, masi waapatthanana cinene akhwaawe nlattu wowaacivela citthu hiiva cinnicivela. Yesu aheera wiira maapostolu otheene yaari ‘apatthannyaawe,’ masi aatepaawe unfenta aari Joau. (Joau 13:23; 15:15; 20:2) Masi khunakhala  wiira Yesu aamoona Joau ukhalana ifayita cinene waapwaha maapostolu akhwaawe. Wootakihera, ikwaha imoca Joau wamoca ni muulupalyaawe eehaniya Tiyaku, waalepenlyaaya uvahaceriya ukhulupale muumweneni wa Nluku, Yesu aheera: “Wunkoma mono wo nlopwana awula wo nthiyana kahi phi mi kinvaha.” (Mark. 10:35-40) Toko Yesu, khaninlamuliya waawacera saana paahi mayamunna anaapatthananeehu, ni akiinaayo uhaawacera saana. (Tiya. 2:3, 4) Napankaka iyo itthwiiyo, khaninhala ukavihera nloko ukhala nowiiwanana.—Yuda 17-19.

14. Toko cinthoonyeraaya Afilipo 2:3, isiyani inhala unikavihera uhimananiha waasinttanana akhwiihu wanlokoni?

¹⁴ Naafentaka ninrimeehu wotheene mayamunneehu ni asirokorihu o wanlokoni, khaninhala umananiha waasinttanana. Mmuupuwele-tho Jonataa. Uyo khaamananihile unsittanana Davidi, ni khaamananihile unhiiha Davidi ukhala mwene wiira uyova ancere ulamulela. Otheene cihu ninlamuliya untakiha Jonataa. Moonaka ucuwelaca urinaaya mayamunneenyu, nhimananiha waawehera khampa awananiinyu, “masi mwiiyevihaka, mwaawehere akhwiinyu ukhala oolupale wuupwahani nyuuva.” (Nsome Afilipo 2:3. *) Nhiliyale wiira otheene cihu pooti upanka itthu inkavihera nlokoni nihu. Neeyevihaka, ninaahala ukhitiri woona makhalelo omaana arinaaya mayamunneehu ni ninaahala wiitthucera cinene ntakihero naya.—1 Akor. 12:21-25.

15. Itthu yankhumelenle nrokorihu Tanya naasaanaawe iwiitthucihaleni isiyani?

¹⁵ Ikwaha cikiina, anaanikhumelelaka masakha yahaaweherereehu. Uyo ukatyuuyo, Yehova  pooti waakurumica mayamunneehu wiira animaalihe, anifente ni anikavihere. Moone itthu yaamwiirannyenle nrokorihu Tanya naasaanaawe araru. Mwaakha wo 2019, ayo yahorwaa woona ikonkereesu “Nifento Khanimmala” u Estados Unidos. Tanya naattonka itthu yankhumelenle umala waya ikonkereesu nihuku nosaapatu. Uyo neera: “Hi naari nkaaroni narwaaka hotel yaalukamileehu. Neettakoono, ikaaro imoca yahokhuma mphanttyaaya ni yahopwesa ikaaro yeettiheehu. Khaavo aarakanle, masi otheene nahokhuma nkaaroni ni naheemelaca mparapaarani nlattu wootuthuwa. Uyo ukatyuuyo, nakaaro mmoca aheemesa ikaarwaawe ni ahokela uniihana wiira nirwee wakaaroni wawe. Uyo aari munneehu, ciicammo aakhuma wakonkereesuni yaariihu. Ni kahi uyo paahi. Asirokorihu ni mayamunneehu athanu o Suécia yaakhuma ukonkereesuni, ciicammo yaheemela. Asirokorihwaayo yahowa, yahokikapatta miiva ni yahonkapatta mwanaka mwanthiyana—iyo itthwiiyo yahonimaaliha cinene! Mi kahaaleva ayo mayamunnaayo wiira pooti waarwaaya, masi ayo khayaanihiile. Yahokhala ni hiiva mpaka waawilyaaya unikavihera atthu oosipiritaali. Ukati ayo mayamunnaayo wonnyaaya wiira khiivo itthu yaanihaleela, phaarweelyaaya. Ule ukati woorikoole, nahoona wiira Yehova naanifenta. Iyo itthwiiyo ihoniiriha utepa waafenta mayamunneehu ni, venci-venci, ihoniiriha utepa unfenta ni unsukhuru Yehova.” Nyuuva munnokhitiri wuupuwela ukati munneenyu wookavihenryaaweni nnasankile?

16. Isiyani inniiriha waafenta mayamunneehu ninrimeehu wotheene?

¹⁶ Moone citthu comaana cinkhumelela naafentaka akhwiihu ninrimeehu wotheene. Hiiva ninawaamaaliha akhwiihu yapheelaka ukaviheriya. Ninawaakavihera mayamunneehu ni asirokorihu unswalela Yehova nkhayi unitteelaka nrima. Ninaathoonyera wiira nikhanle atthari a Yesu, ni iyo inaawiiriha atthu ooreera nrima utthuna ikhweeli. Ni, venci-venci, ninanttitthimiha Yehova, “Paapa oomwinciva uthunku ni Nluku rina mamaalihero otheene.” (2 Akor. 1:3) Phimaana, nhihiye wiikurumica waafenta mayamunneenyu ninrimeenyu wotheene!