Nipuro ninsunkiya citthu co khalayi nineehaniya Museu Terras da Bíblia isittatti yo Jerusalém, nihaavo nluku nirina moolumo ninaanyihaceriya wantikhaciya ukhuma mwaakha wo 700 mpaka 600, hinawa Yesu watuninyani. Nno nlukunno niphwanyiye nnikhukunni naavareliya nteko wiira asikhiye atthu, nipuro naattamenle u Hébron, ilapo yo Israel. Moolumo yantikhiye aneera co: “Atakhaliye Hagaf mwaana a Hagav mwancina na Yahweh Sabaot.” Ayo moolumwaayo anrumeleliha cani itthu inhimyaaya Ibiiblya? Ayo moolumwaayo anthoonyera wiira atthu o khalayi yancuwela ni yanvarela nteko ncina na Nluku, Yehova, nantikhiya YHWH niiluuka iheperewu yo khalayi. Ahaavo makhuku makhwaawe atthu waarwaaya ukumanaca ni waatthawelaaya. Uhooneneliya wiira ayo atthwaayo yaanantikha ncina na Nluku wamoca ni macina aatthu mmasirini waya ayo makhukwaayo.

Yoopelaka mwaha iyo itthwiiyo, athiyana oosomasomaca aneehaniya Rachel Nabulsi, anvara nteko wuuniversidade yo Geórgia, aheera: “Ncina YHWH nihantikhiya ikwaha cinci ayo mapurwaayo. Iyo inaaniitthuciha citthu cinci . . . Inniitthuciha wiira YHWH aahaana ifayita muukumi waatthu oosarayeli ni ooyuuta.” Iyo inaarumeleliha Ibiiblya, ukhala wiira mbiiblyani, ncina na Nluku nihantikhiya ikwaha cinci. Nhina macina aatthu enci, ninaakela ciicammo ncina na Nluku.

Moolumo “Yahweh Sabaot,” yantikhiye wanlukuni, maanaaya wiira “Yehova nhooleli aanatoropa.” Iyo inthoonyera wiira ukati wo khalayi, atthu yanvarela nteko kahi paahi ncina Nluku, masi ciicammo moolumo “Yehova nhooleli aanatoropa.” Iyo inaarumeleliha Ibiiblya, kontha mbiiblyani, moolumo “Yehova nhooleli aanatoropa,” anaaromoliya ikwaha 283 nhina Cowantikhiya Cowaarya niiluuka iheperewu, venci-venci nlivuruni ya Isaiya, Jeremiya ni Zakariya.