MWAHA WOOSOMIYA 1
Nkhale oomaala ni munkhuluvele Yehova
IVEERUSU YO MWAAKHA WO 2021: “Ikurwiinyu inhala ukhala umaala winyu ni ukhuluvela winyu.”—ISAI. 30:15.
NCIPO 3 Jeová, Minha Força e Esperança
NINHALA WIITTHUCANI? *
1. Khampa mwene Davidi, isiyani atthu akiina ninkoheehu?
OTHEENE cihu unaanicivela ukhala ni nnema ni woohimasukhuli. Khaavo ntthu unoncivela ukhala niiwasiwaasi. Masi ikwaha cikhwaawe, atthunaka ninaakhala niiwasiwaasi. Phimaana, atthu akiina ninaakohaka khampa mwene Davidi cankohilyaawe Yehova: “Kinhala ukhala niiwasiwaasi, nimasukhuli, ni ooriipiya nrima khula mahuku mpaka yaakhani?”—Isaa. 13:2.
2. Isiyani inhaleehu usoma nhina ula mwahoola?
2 Wooriipiha nrima, khawankhitirya ukhala woohiwasiwaasi ukati wotheene, masi cihaavo citthu cinlamuliyeehu upanka wiira nihitepe ukhala niiwasiwaasi. Nhina ula mwahoola, woopacera, ninaahala woona citthu cinnikhaliha niiwasiwaasi. Vano, ninaahala woona citthu 6 ninlamuliyeehu upanka wiira nikhale oomaala, awula nihitepe ukhala nimasukhuli ukati unaananeehu masakha.
CITTHUNI CINNIKHALIHA NIIWASIWAASI
3. Citthuni cinnikhaliha ni masukhuli? Niireke wiira ninaakhitiri uhiiha wiira nnyo citthunnyo cihiirannye?
3 Cihaavo citthu cinci cinnikhaliha niiwasiwaasi. Ni khaninkhitiri upanka itthu wiira cihiirannyee citthu cikhwaawe. Wootakihera, khaninkhitiri uhiiha uwela iperesu yocoolya, ikuwo ni inupa. Ciicammo, khaninkhitiri waahiiha ale anaavaraneehu nteko awula anaasomaneehu, wiira ahinikhanyererihe wootha awula uraruwa. Ni khaninkhitiri waahiiha anammalukuni upanka ikhirini. Nnya citthunnya cinaakhumelela kontha ninkhala ituninya atthu enci uhineettelaaya mattharelelo o mbiiblyani. Sotwani, Nluku o ila ituninyeela, naacuwela wiira ‘masukhuli o ula ulumwenkuula’ anaahala waahiiha atthu akhwaawe unswalela Yehova. (Mat. 13:22; 1 Jo. 5:19) Phimaana, khanintikhinihiya noonaka ntuninyani cikhumelelaka citthu cinci cinaakhaliha atthu niiwasiwaasi!
4. Ninkhala cani yanikhumelelaka masakha moolupale?
4 Yanikhumelelaka masakha moolupale, hi atthunaka ninkhala oovelavela. Wootakihera, hi pooti ukhala nimasukhuli nlattu wowoova wiira khaninhala ukhalana nsurukhu wahoolo wiira nithumele citthu cinhala unithwaa. Awula, pooti ukhala noovaka wiira nlattu woowerennya, hi khaninhala ukhitiri-tho uvara nteko, awula wiireliya untekoni wihu wiira mwamumuleke. Ciicammo, hi pooti ukhala nimasukhuli nlattu wowoova upanka itthu yootakhala ni unriipiha nrima Nluku. Uhiya commo, wahoolo Sotwani naahala uwiiriha atthwaawe wiira yaatuphele apoovu a Nluku, ni hiiva pooti ukhala niiwasiwaasi nlattu woohicuwela itthu inhaleehu upanka uyo ukatyuuyo. Atthunaka ninawiikohaka co: “Ikhanle itthu yootakhala ukhala nimasukhuli nlattu wo nnyo citthunnyo?”
5. Isiyani Yesu yaapheelaawe uhimya wiira wawe: ‘Nhiye ukhala nimasukhuli’?
5 Hi ninaacuwela wiira Yesu ahowiirela attharyaawe: ‘Nhiye ukhala nimasukhuli.’ (Mat. 6:25) Niireke wiira Yesu aapheela uhimya wiira khaninlamuliya ukhala nimasukhuli hataa vakaani? Mena! Nhiliyale wiira ahaavo atthu ookhuluvelya yanswalela Yehova khalayi yaakhanle nimasukhuli, masi Yehova khaanyanyanle ayo atthwaayo. * (1 Mam. 19:4; Isaa. 6:3) Khweeliini, Yesu aanawiira unimaaliha. Uyo khampheela wiira nikhale niiwasiwaasi nlattu wo citthu comuukumini wihu, mpaka wahinkhitiriihu unswalela ratta Nluku. Vano, isiyani inlamuliyeehu upanka wiira nihitepe ukhala nimasukhuli?—Nwehe ikwaaturu ineera “ Ninhala upanka cani iyo?”
CITTHU 6 CINHALA UNIKAVIHERA UMAALA AWULA UHITEPA UKHALA NIMASUKHULI
Nwehe iparaagarafu 6 *
6. Toko inhimyaaya Afilipo 4:6, 7, isiyani inhala unimaaliha?
6 (1) Nhihiyerere ulompa. Mwakhalaka nimasukhuli cinene, munlompe Yehova munlepelaka wuukaviherani. (1 Pet. 5:7) Uyo naahala wuuvahani “ineema ya Nluku, invikana moopuwelelo otheene [aapinaatamu].” (Nsome Afilipo 4:6, 7. *) Yehova naahala wuuvahani ikuru cawe cowaarya wiira oomaaliheni.—Akalas. 5:22.
7. Isiyani inlamuliyeehu uhiliyala ukati woolompa?
7 Ukati woolompa, munhimerye Yehova masukhuli otheene arineenyu wanrimani. Nhimyeehe itthu inookhalihani isukhuli ni munhimerye mananna cineecooneenyu. Wakhala wiira unaakhitiryaa umaliha masukhuliinyu, munlepele Yehova wiira ookavihereni ucuwela itthu yoopanka ni wuuvahani ikuru wiira nkhitiri umaliha. Wakhala wiira khawankhitiryaa umaliha itthu inookhalihani isukhuli, munlepele Yehova wiira ookavihereni uhitepa ukhala niiwasiwaasi nlattu wo iyo itthwiiyo. Ukati woolompa, nahimyeehaka itthu innikhaliha isukhuli, khunnirika woona mananna Yehova naakhulaawe nivekelo nihu. Nivekelo ninyu naahaakuveke waakhuliya, nhoocee. Ukati woolompa, Yehova khampheela paasi wiira nihimyeehe itthu innikhaliha isukhuli; masi uyo nopheela wiira nihihiyerere unlompa.—Luka 11:8-10.
8. Ukati wonhimyera Yehova masukhuliinyu, isiyani ciicammo inlamuliyeehu upanka?
8 Ukati wonhimyera Yehova masukhuli arineenyu, mmananihe ciicammo unsukhuru. Unaareera uhoolelihera wuupuwela citthu comaana cirineehu, hataa nikhalaka ni masakha. Mwatepaka ukhala nimasukhuli woohicuwela itthu yonlepela Yehova, nhiliyale wiira Yehova nawaakhula mavekelo oohirikarikaca, toko wiira co: ‘Sontte, ukikavihere!’—2 Ikor. 18:31; Aroo. 8:26.
Nwehe iparaagarafu 9 *
9. Isiyani inlamuliyeehu upanka wiira nikhikiceriye weekhweeli?
9 (2) Nkhuluvele ucuwelaca wa Yehova, kahi ucuwelaca urineenyu. Ukati wa porofeeta Isaiya, apoovu o Yuuta yahoopopihiya naatthu o Asiiriya. Ayo yahoova cinene utupheliya naayo atthwaayo, mpaka yaholepela ukaviheriya naatthu o Wiciipitu. (Isai. 30:1, 2) Yehova ahaahimyera ayuuta wiira, nlattu wo waakhuluvela atthu o Wiciipitu, yaanaahala ukhitiriya. (Isai. 30:7, 12, 13) Yehova ahonruma porofeeta Isaiya wiira aahimyere apoovu o Yuuta isiyani yaalamuliyaaya upanka wiira akhikiceriye weekhweeli. Yehova ahaakhuluveliha, eeraka co: “Ikurwiinyu inhala ukhala umaala winyu ni [ukikhuluvela winyu miiva].”—Isai. 30:15b.
10. Ukatini unlamuliyeehu uthoonyera wiira ninankhuluvela Yehova?
10 Ninhala uthoonyera cani wiira ninankhuluvela Yehova? Muupuwele ala matakiherwaala. Nyuuva nhovahiya nteko woopokheriya nsurukhu mwinci. Masi nnawoona wiira unaahala uvira ukati mwinci nvaraka uyo ntekooyo ni khannohala ukhalana ukati wonswalela Yehova ratta. Awula ntthu nonvaraneenyu nteko naaciveliya ni nyuuva, masi uyo khanakhala ntthu oopattisiya nonswalela Yehova. Awula mmuciinyu nonfenteenyu cinene nawuusankihacani ni naawiirelani: “Uthanle, ukiiwelela miiva awula Nlukwaa.” Cookhumelelakani nnyo citthunnyo, pooti wuurikani ulakela upanka itthu, masi Yehova naahala wuuvahani malakihero ampheeleenyu. (Mat. 6:33; 10:37; 1 Akor. 7:39) Vano nnohala upankani? Nnaahala unkhuluvela Yehova ni utthara malakiherwaawe?
Nwehe iparaagarafu 11 *
11. Matakiheroni o mbiiblyani ninlamuliyeehu usoma wiira nikhitiri ukhala oomaala, hataa nilupatthiyaka?
11 (3) Mwiitthucere matakihero omaana ni oohinamaana. Mbiiblyani, ahaavo matakihero menci anthoonyera wiira ikhanle itthu yofayita umaala ni unkhuluvela Yehova. Ukati woosoma ala matakiherwaala, moone isiyani yaakavihenre atthu yanswalela Nluku uhihiya umaala, hataa yalupatthiyaka venci. Wootakihera, ukati itripunali yuulupale ya ayuuta waakhottihilyaaya maapostolu ulalyeera, ayo khayoovile. Yathoonyeraka ulipa nrima, maapostolu yahiira: “Nihaana uhooleliha umwiiwelela Nluku khampa nhooleli waahiya apinaatamu.” (Mite. 5:29) Hataa wuufulaciya waya, maapostolu khayaakhanle yoovaka. Kontha isiyani? Kontha yaanaacuwela wiira Yehova aari naayova ni uyo aanaatteeliya nlattu wo meettelwaaya. Phimaana, ayo khayaahiile ulalyeera ihapari comaana. (Mite. 5:40-42) Ntakihero nomaana nikhwaawe, nikhanle na ntthari Estevau. Uwakati waapheelaawe wiiviya, Estevau khaahiile ukhala ninnema ni oomaala, mpaka ikhovyaawe yaakhanle toko “ikhove yo nlayikha.” (Mite. 6:12-15) Kontha isiyani? Kontha uyo aanaakupali wiira Yehova aari ootteeliya nlattu wo meettelwaawe.
12. Toko cinhimyaaya 1 Peturu 3:14 ni 4:14, nlattuni ninlamuliyeehu ukhala ootteeliya nalupatthiyaka?
12 Cahaavo citthu caakupaliha maapostolu wiira Yehova aari naayo. Ayo yahovahiya ikuru ni Nluku wiira akhitiri upanka mitikhiniho. (Mite. 5:12-16; 6:8) Mahukwaala, iyo khineerannya. Masi Yehova naanikhuluveliha mbiiblyani wiira, nahuvaka nlattu woopanka citthu comaana, uyo naakhala ootteeliya nlattu wo meettelweehu ni naanivaha nnepaawe wowaarya. (Nsome 1 Peturu 3:14; 4:14. *) Phimaana, nhikhale muupuwelaka isiyani inhaleenyu upanka nanceraka ulupatthiya wahoolo. Masi, ntepe uhoolelihera wuupuwela isiyani inlamuliyeenyu upanka nna va, inhala wuukaviherani utepa ukhuluvela wiira Yehova pooti unikavihera ni unoopola. Toko makristau oopacera, nkhuluvele moolumo a Yesu wenryaawe: “Mi kinaahala wuuvahani moolumo ni ucuwelaca. Ni awananiinyu otheene nkhayi wanhalaaya wuuviriyanani, khanhala ukhitiri uwaakhulani awula wuuvaanyihani.” Ni nihokhuluvelihiya co: “Nlattu woovilela winyu, nnaahala woopola ukumiinyu.” (Luka 21:12-19) Nhiliyale wiira, hataa ntthu ookhuluvelya nonswalela Yehova akhwaaka, Yehova khanonliyala uyo ntthuuyo ni pooti umunweleliha.
13. Isiyani inniitthucihaaya matakihero aatthu yahaamanle ni yahankhuluvenle Yehova?
13 Hiiva ciicammo pooti wiitthucera matakihero aatthu yaheettenle ikano yoomaala ni unkhuluvela Yehova. Usoma ayo matakiherwaayo, unaahala unikavihera uhipanka citthu coohinamaana toko ayo caapankilyaaya. Wootakihera, ukati mwene Asa waapacenryaawe ulamulela, uyuuta yahowa anatoropa enci wiira yaane ikhotto. Asa ahonkhuluvela Yehova, phimaana uyo ahokaviheriya ni Yehova, ni ahaatthema anatoropaayo. (2 Ikor. 14:9-12) Wahoolo, mwene o Isarayeli eehaniya Baasa, ciicammo ahowoopopiha ayuuta uwaanana ikhotto. Masi uyo aarina anatoropa vakaani. Vano Asa uhiya unkhuluvela Yehova toko caapankilyaawe khalayi, uyo ahaaliva anakhotto o Siiriya wiira ankavihere. (2 Ikor. 16:1-3) Ni wahoolo, ukati Asa waawerennyilyaawe cinene, uyo ciicammo khaatothile ukaviheriya ni Yehova.—2 Ikor. 16:12.
14. Citthu caavonnyalyaawe Asa cinniitthuciha isiyani?
14 Wuupaceroni, Asa yamphwanyaka masakha, uyo aanaatotha ukaviheriya ni Yehova. Masi wahoolo, uyo aholakela uwacera mwaneennyaawe masakha yankhumelela. Ukati Asa waakhuluvenlyaawe atthu o Siiriya, woopacera, waakhala toko wiira ahokaviheriya. Masi nnema naarinaaya ayuuta, khanaalokenle cinene. Yehova ahonruma porofeeta mmoca urwaa umwiirela Asa: “Anatoropa a mwene o Siiriya ahokuluphuwa mmatatani waa, ukhala wiira unkhuluvenle mwene o Siiriya, kahi Yehova, Nlukwaa.” (2 Ikor. 16:7) Hiiva ciicammo khaninlamuliya umaliha masakheehu veekha cihu, woohitotha mbiiblyani malakihero a Yehova. Hataa ukhalaka wiira nnopheela ulakela itthu wowaakuvyaaca, mmaale ni munkhuluvele Yehova. Uyo naahala wuukaviherani ulakela upanka itthu yomaana.
Nwehe iparaagarafu 15 *
15. Isiyani ninlamuliyeehu upanka ukati woosoma Ibiiblya?
15 (4) Nhele mmuru iveerusu co mbiiblyani. Ukati woosoma Ibiiblya, nyuuva nnaahala uphwanya iveerusu cinthoonyera ifayitaaya umaala ni unkhuluvela Yehova. Mmananihe uhela mmuru nnyo iveerusunnyo. Unaareera usoma nnyo iveerusunnyo nkumiheraka ncu ninyu vate, awula wantikha nipuro ninhaleenyu waakuva woona. Yehova ahonruma Josuwe usoma ilivuru yo nlamulo khula ukati ni ncu noomaalya. (Jos. 1:8, 9) Upanka iyo, wanhala unkavihera ukhala oocuwelaca, ni ciicammo umaliha woova atthunaka waakhalanaawe nlattu wo nteko waavahaceriyaawe. Inanna imoca, iveerusu co mbiiblyani cinci pooti wuukaviherani umaala ukati wo marikariko yaahala wuukhalihani niiwasiwaasi awula owoova.—Isaa. 27:1-3; Miru. 3:25, 26.
Nwehe iparaagarafu 16 *
16. Manannani Yehova cinaakurumicaawe mayamunneehu o wanlokoni wiira uyo anikavihere ukhala oomaala ni unkhuluvela?
16 (5) Nvirihe ukati wamoca naapoovu a Nluku. Yehova nawaakurumica mayamunneehu wiira uyo anikavihere ukhala oomaala ni unkhuluvela. Umikutthaanoni cihu, hiiva ninaalipihiya ni miphantte cintaphuleliya, ikomentaariyu caakhwiihu ni myaha comaana cinoopeehu ni mayamunneehu ni naasirokorihu. (Mabere. 10:24, 25) Itthu ikhwaawe inhala unikavihera, ukhanle waahimyera asipatthaniihu ookhuluvelya o wanlokoni citthu cinnikhaliha nimasukhuli. “Nuulumo nomaana” nampatthaniihu pooti unikavihera uwukula iwasiwaasi cihu.—Miru. 12:25.
Nwehe iparaagarafu 17 *
17. Toko cinhimyaaya Maberewu 6:19, iparakha co Umwene wa Nluku cinweherereehu cinnikavihera cani uhitepa ukhala niiwasiwaasi ukati wo masakha?
17 (6) Nlipihace niweherero nirineenyu. Iparakha co Umwene wa Nluku cinweherereehu wahoolo, cikhanle “nankura nolipiha irooho.” Nnyo iparakhannyo cinaanikavihera uhitepa ukhala niiwasiwaasi ukati wo masakha. (Nsome Maberewu 6:19. *) Phimaana, muupuwelele inatiri ikhuluvelihilyaawe Yehova wiira wahoolo, iwasiwaasi cotheene cinaahala umala. (Isai. 65:17) Mwiicuupuwele nkhalaka ituninya yo nnema, uhinhalaaya ukhala-tho masakha ni iwasiwaasi. (Mik. 4:4) Nyuuva ciicammo pooti ulipihaca niweherero nirineenyu mwaalalyeeraka akhwiinyu nno niwehereronno. Mwiikurumice uvara cinene nteko woolalyeera ni wo waapanka eetthuci. Mwapankaka commo, nyuuva nnaahala ‘utepa ukhuluvela niweherero nirineenyu mpaka wuukhicerani.’—Mabere. 6:11.
18. Isiyani inhala ukhumelela wahoolo, ni isiyani inlamuliyeehu upanka?
18 Ukati ila ituninyeela unaattamelaaya umwiiso, cinaavira cuncereryaaka citthu cinnikhaliha nimasukhuli. Masi iveerusu yo 2021 pooti unikavihera uvilela ayo marikarikwaayo ni uhihiya umaala, kahi niikuru cihu, masi nlattu wonkhuluvela Yehova. Ula mwaakhoola, nthoonyere ni citthu cinhaleenyu upanka wiira nnawaamini itthu Yehova ikhuluvelihalyaawe: “Ikurwiinyu inhala ukhala umaala winyu ni ukhuluvela winyu.”—Isai. 30:15.
NCIPO 8 Jeová É Um Refúgio
^ par. 5 Iveerusu yo mwaakha wo 2021, inaattonkaca nlattuni unreeraaya unkhuluvela Yehova ukati wo waanana masakha mahukwaala ni wahoolo. Ula mwahoola unaahala woonihera inanna cinlamuliyeehu uvarela nteko iveerusu yo ula mwaakhoola.
^ par. 5 Ahaavo mayamunna ookhuluvelya ankhala nimasukhuli moolupale. Ukati nkiina, ayo masukhulyaawe ankhala iretta yuulupale ni khaanaakhala masukhuli yaacaawe Yesu.
^ par. 6 Afilipo 4:6 Ihikhale hataa itthu yowuuhelani isukhuli, masi nhina wo citthu cotheene, munlompe ni munsontteelele Nluku, munsukhurweelaka, wiira muncuwelihe citthu cinlepeleenyu; 7 ni ineema ya Nluku, invikana moopuwelelo otheene, inaahala usunka nrimeenyu ni moopuwelelweenyu iriyari ya Yesu Kristu.
^ par. 12 1 Peturu 3:14 Unookhalaru commo, hataa nhuvaka nlattu wosariya, nyuuva nnohala ukhala ootteeliya. Masi, nhoove inoovaaya ayo ni nhikhale oosanka. 4:14 Nyuuva mwaatthu ootteeliya mwaruwaniyaka nlattu wo ncina na Kristu, kontha nnepa woottitthima, awula nnepa wowaarya wa Nluku, uri ni nyuuva.
^ par. 17 Maberewu 6:19 Nihaana ula nwehereroola toko nankura nolipiha irooho, ookhuluvelya ni oolipa, ni naakela mpaka nhina, wiithela ikurtina.
^ par. 66 ILATARATO: (1) Nrokorihu naalompa ikwaha cinci nihuku notheene.
^ par. 68 ILATARATO: (2) Ukati woomumula untekoni wiira alye, uyo naasoma Nuulumo na Nluku wiira akhalane ucuwelaca.
^ par. 70 ILATARATO: (3) Uyo nawuupuwela matakihero o mbiiblyani, omaana ni oohinamaana.
^ par. 72 ILATARATO: (4) Uyo naweesa wacileerani iveerusu inonlipiha yantikhalyaawe nnikhantani wiira ahele mmuru.
^ par. 74 ILATARATO: (5) Uyo naaviriha ukati ni mayamunna wuulalyeerani.
^ par. 76 ILATARATO: (6) Uyo nawuupuwela iparakha cinweherereehu coohoolo.
