MWAHA WOOSOMIYA 1
”Anontotha Yehova khiivo itthu yomaana inhala waahaleela”
IVEERUSU YO MWAAKHA WO 2022:“Anontotha Yehova khiivo itthu yomaana inhala waahaleela.”—ISAA. 34:10.
NCIPO 4 “Jeová É o Meu Pastor”
NINHALA WIITTHUCANI? *
Hataa ukhalaka wiira Davidi aakhala nimasankiho, uyo aanawoona wiira khiivo itthu yanhaleela (Nwehe iparaagarafu 1-3) *
1. Isiyani yankhumelenle Davidi?
DAVIDI aanaatthawa wiira oopole ukumyaawe kontha Sawuli, mwene o Isarayeli, aananlupattha wiira amwiive. Ukati Davidi waatthawaawe aheemela isittatti yo Nobe. Nwo, Davidi ahonlepela nankuttho Aimeleque iphaawu thanu wiira akhuure. (1 Sam. 21:1, 3) Wahoolo, Davidi ni anatoropaawe yahotthawela nnikhukuni. (1 Sam. 22:1) Isiyani yampiihile Davidi nno nipuronno?
2. Citthuni coohinamaana Sawuli caapankilyaawe? (Nwehe 1 Samuweli 23:16, 17)
2 Sawuli ahaana nttima ninci. Uyo aanankhalela nttima Davidi nlattu woocuwelaciya ni woofentiya naatthu. Sawuli ciicammo ancuwela wiira ahokhottiya ni Yehova nlattu wookhala ntthu oohiiwelela ni ancuwela wiira Davidi phaahala ukhala mwene wanipuroni nawe. (Nsome 1 Samuweli 23:16, 17. *) Masi Sawuli nanlelo aari mwene o Isarayeli. Uyo ahaana anatoropa enci ni atthu enci yaanankavihera. Phimaana, Davidi ahaana atthawaka. Niireke Sawuli oopuwela wiira ihaavo yaakhalaawe ukhitiri upanka wiira ihiirannye itthu yaapheelaawe Yehova ni wiira Davidi hikhale mwene? (Isai. 55:11) Ibiiblya khinaakhula nno nikohonno. Masi pooti wankupaliihu ila itthwiila: Sawuli aathukelela mooro; khaavo ntthu nohala umwaanana Yehova ni ukhitiri untthema!
3. Unookhalaru wiira Davidi yahonkhumelela masakha menci, uyova eecoona cani?
3 Davidi aari ntthu owiiyeviha. Uyo khaathanlile ukhala mwene o Isarayeli. Yehova phanthanlale wiira akhale mwene. (1 Sam. 16:1, 12, 13) Sawuli aamoona Davidi khampa nwanannyaawe muulupale. Masi Davidi khoopuwenle wiira Yehova phaakumihacale masakha otheene yankhumelela. Davidi khaattekutta nlattu woohikhalana iyoolya ni nlattu wookhala nnikhukuni. Uhiya commo, pooti ukhalaka wiira Davidi neepithale nhina nno nikhukunno, phantikhilyaawe moolumo oveerusu yonantano: “Anontotha Yehova khiivo itthu yomaana inhala waahaleela.”—Isaa. 34:10.
4. Makohoni anhaleehu waakhula nhina ula mwahoola, ni nlattuni ayo ukhanlyaaya makoho ofayita?
4 Atthu enci anonswalela Yehova ilelo inawaathwa iyoolya ni citthu cikhwaawe. * Ni nlattu woretta yo koronaviiru (COVID-19), cinaatepa waathwa nnyo citthunnyo. Ni wantepaaya waattamela ukati wo masakha moolupale, makhalelo anaavira yatepaka urika. (Mat. 24:21) Nuupuwelaka iyo itthwiiyo, nhina ula mwahoola ninaahala waakhula makoho macese: Nlattuni uneereehu wiira ‘khiivo itthu yomaana yanhaleela’ Davidi? Kontha isiyani nihaana nikhalaka ootteeliya nicitthu cirineehu? Nlattuni ninlamuliyeehu ukhuluvela wiira Yehova naahala uniwacera? Ni manannani ninlamuliyeehu wiitthenkaca nenna co wiira nirwee navilele masakha oohoolo?
“KHIIIVO ITTHU INHALA UKITHWA”
5-6. Toko cinthoonyeraaya Isaalimu 23:1-6, nlattuni uneereehu wiira ‘khiivo itthu yomaana yanhaleela’ Davidi?
5 Davidi heera wiira ale anonswalela Yehova “khiivo itthu yomaana inhala waahaleela.” Isiyani yaapheelaawe uhimya? Davidi ahooluma itthu toko iyo nhina Isaalimu ikapiitulu 23. Phimaana, iyo isaalimwiiyo pooti unikavihera ucuwela isiyani Davidi yaaphenlyaawe uhimya. (Nsome Isaalimu 23:1-6. *) Davidi pacenre iyo isaalimwiiyo eeraka co: “Yehova khanle Makampucyaaka. Khiivo itthu inhala ukithwa.” Vano, Davidi ahancera wuuluma citthu caarina ifayita muukumini wawe, toko iparakha caarinaawe nlattu wontthuna Yehova khampa Makampucyaawe. Yehova aananhoolela Davidi ‘wiira hihiye weettela isariya’ ni uyo aari ni Davidi ukati wo masankiho ni ukati wahaakhalaawe ni masankiho. Davidi oopuwela wiira unswalela Yehova waakhala khampa urupa ‘mapuro amphwanyannya malasi oopipila.’ Masi Davidi ancuwela wiira hataa ukhalaka commo, yanhala unkhumelela masakha ni anhala ulupatthiya naawanannyaawe. Ukati nkhwaawe Davidi aakhala ooriipiya nrima cinene. Uyo ukatyuuyo, waakhala khampa uyo eetta “mapuro ooripela” cinene. Masi uyo ancuwela wiira khiivo yaalamuliyaawe woova, kontha Yehova aari Makampucyaawe.
6 Vano nlattuni uneereehu wiira ‘khiivo itthu yomaana yanhaleela’ Davidi? Davidi ahaana citthu cotheene caapheelaawe wiira hihiye ukhalana upatthani woolipa ni Yehova. Wiira untteele nrima, Davidi pooti wahaakhalanaawe mihakhu cinci. Uyo waanantteela nrima nlattu wo citthu caavahiyaawe ni Yehova. Itthu yaatepaawe woona ukhalana ifayita waari uvahiya iparakha ni ukhikiceriya ni Yehova.
7. Khampa cinhimyaaya Luka 21:20-24, itthuni yoorika yaakhumelenle makristau yaakhala ncoko wo u Yuuta?
7 Moolumo Davidi yantikhalyaawe anaathoonyera mananna cinreeraaya uwehera ratta mihakhu. Khunnanara ukhalana mihakhu, masi unnanara uhoolelihera nnyo citthunnyo khampa itthu yoopacera muukumini wihu. Iyo ikhanle itthu yeetthucalyaaya makristau yaakhala u Yuuta. (Nsome Luka 21:20-24. *) Yesu ahohimya wiira isittatti yo Yerusalemu yanhala ‘urukuryeeriya naanatoropa.’ Ni ahohimya wiira ukati waahalaaya wiirannya iyo itthwiiyo, atthu yahaana ‘yatthawelaka mmamyaakoni.’ Utthawela mmamyaakoni wanhala woopola ukumyaaya. Masi ayo yahaana yahiyaka uttuli citthu cinci. Khalayi, irevista Ukhalenla yawaacaka makristau yaakhala ncoko wo u Yuuta ule ukatyuule, yaheera co: “Ayo yahohiya uttuli imatta caya ni inupa caya, ni yahohiya uttuli mihakhu caya cotheene caarinaaya mmapaani waya. Yakhuluvelaka wiira yanhala ukhikiceriya ni ukaviheriya ni Yehova, yahohoolelihera unswalela ni uleva citthu cotheene atthunaka caahalaaya woona ukhalana ifayita.”
8. Itthu yaawiirannyenle makristau yaakhala ncoko wo Yuuta inniitthuca isiyani?
8 Itthu yaawiirannyenle makristau yaakhala ncoko wo Yuuta inniitthuciha isiyani? Irevista Ukhalenla iromoliye nhina iparaagarafu 7 yaheera co: “Mananna anwehereehu mihakhu pooti uttehattehiya wahoolo. Niireke mihakhu phi itthu yuulupale cinene, awula itthu yuulupale ukhanle woopoliya atthu otheene anonswalela Nluku? Nihaana niitthenkacaka wiira uyo ukatyuuyo, nirwee napanke yotheene inhaleehu ukhitiri, khampa caapankilyaaya mayamunneehu yaatthawile ncoko wo Yuuta.” *
9. Moolumo a apostolu Paulu amphwanyannya nhina Maberewu 13:5, 6, annikupaliha isiyani?
9 Nnaakhitiri wuupuwela mananna ayo makristawaayo caarikalyaaya uhiya citthu cotheene uttuli ni upacera-tho makhalelo makiina? Ayo yahaana yakhuluvelaka ni yaaminiki wiira Yehova anhala waakavihera uphwanya citthu caahala waathwa. Ni itthu ikhwaawe yaahala waakavihera ayo makristawaayo, yaari ikano apostolu Paulu yaavahilyaawe maberewu uhinaphiya ukati anatoropa o Roma waarukurenryaaya isittatti yo Yerusalemu. Uyo enre co: “Nhikhale oociveliya ni nsurukhu cinene muukumini winyu; ni nkhale ootteeliya nrima nicitthu cirineenyu. Kontha uyo heera: ‘Mi akinhala wuuhiya ni akinhala wuunyanyala.’ Wiira nikhale oolipa nrima cinene ni niire coo: ‘Yehova phi nikavihero naka; akinhala woova. Pinaatamu nohala ukiirihani?’” (Mabere. 13:5, 6) Makristau yaatthanre iyo ikannweeyo khawaatepile waarika uhiya mihakhu caya uttuli, uthama u Yuuta ni wiilemaleliha makhalelo makhwaawe. Ayo yankhuluvela wiira Yehova anhala waakavihera uphwanya citthu caahala waathwa. Moolumo a apostolu Paulu anaanikavihera hiiva ciicammo ukupali wiira Yehova khanhala uhiya unikavihera uphwanya citthu cinnithwa, toko iyoolya ni citthu cikhwaawe.
“NITTEELIYE NRIMA NINNYO CITTHUNNYO”
10. Isiyani yaamwiiriha apostolu Paulu ukhala wantteelaka nrima?
10 Apostolu Paulu ahonvaha Timotiyu ikano yoolattanaca niiyo. Iyo ikanweeyo hiiva ilelo ciicammo nihaana neettelaka. Uyo enre co: “Nakhalana itthu yoolya ni itthu yoowara, nitteeliye nrima ninnyo citthunnyo.” (1 Tim. 6:8) Niireke iyo itthwiiyo maanaaya wiira khunreera ukhalana nsurukhu mwinci wiira nithume iyoolya yomaana, wiira niteke inupa yooreera awula ukati nkhwaawe uthuma ikuwo cooreera? Mena! Iyo kahi phi itthu apostolu Paulu yaapheelaawe uhimya. Uyo aapheela uhimya wiira hiiva nihaana nitteeliyaka nrima, hataa nikhalanaka citthu cinci awula vakaani. (Afili. 4:12) Iyo phi itthu yaamwiiriha Paulu ukhala wantteelaka nrima. Itthu yootepa ukhalana ifayita muukumini wihu ukhanle upatthani urineehu ni Yehova, kahi mihakhu atthunaka cirineehu.—Mabere. 3:17, 18.
Khiivo itthu yomaana yaahalenle asarayeli myaakha 40 caakhanlyaaya yeettaka muuthakoni. Hiiva unaanitteela nrima nlattu wo citthu cirineehu? (Nwehe iparaagarafu 11) *
11. Moolumo a Moceesi anniitthuciha isiyani nhina utteeliya nrima nicitthu cirineehu?
11 Pooti ukhalaka wiira ihaavo itthu impheeleehu cinene ukhalana. Masi niireke Yehova nowehera ukhala itthu hiiva khweeliini impheeleehu? Muupuwele itthu Moceesi yaawiirenlyaawe asarayeli uviriha waya myaakha 40 yakhalaka muuthakoni: “Yehova, Nlukwaa, khanhiya wuucaaliha nhina citthu cotheene cimpankaa. Uyo naacuwela saana-saana nkwaha waarinaa weettaka ula uthako muulupalyoola. Yehova, Nlukwaa, aari ni weeva myaakha 40 cotheene civinre, ni khiivo itthu yuuthwaale.” (Deut. 2:7) Yehova khaahiile waawacera asarayeli ule ukatyuule. Myaakha 40 caavinre, ayo khayaathwa iyoolya kontha yahaana manaa. Ciicammo, ikuwo caawanryaaya ukati waakhumaaya Wiciipitu khacaathanle myaakha 40 cotheene caavirihalyaaya muuthakoni. (Deut. 8:3, 4) Pooti ukhalaka wiira ahaavo asarayeli yoonale uyeva nnyo citthunnyo. Masi Moceesi ahowuupusera wiira ayo yahaana citthu cotheene caapheelaaya. Hiiva nihaana nintakihaka Moceesi ni unitteeleke nrima nicitthu cirineehu. Nasukhurweelaka citthu cotheene Yehova cinnivahaawe, hataa citthu cakaani cinnikaviheraawe uphwanya ni naweheraka nnyo citthunnyo khampa iparakha cinnivahaawe, ninaahala untteeliha nrima Yehova, Nlukwiihu.
NKUPALI WIIRA YEHOVA NAAHALA WUUWACERANI
12. Isiyani inthoonyera wiira Davidi ankhuluvela Yehova ni khaakhuluvela ucuwelaca wawe?
12 Davidi ancuwela wiira Yehova khanle Nluku ookhuluvelya ni naawacera ale anonfenta. Ukati Davidi waakhalaawe nimarikariko ni wantikhilyaawe Isaalimu ikapiitulu 34, uyo ankhuluvela wiira ‘nlayikha na Yehova naanankhalenla.’ (Isaa. 34:7) Wiira wawe commo, Davidi atthunaka aalattaniha nlayikha na Yehova ni natoropa nokhala woohiitthala wiira amoone nwanani awaaka. Davidi aari natoropa oolipa nrima ni Yehova ahonkhuluveliha wiira uyo anhala ukhala mwene. Waanookhalaru commo, Davidi kheekhuluvenle nlattu woocuwela uttikha maluku, toko campwesilyaawe Koliyasi, awula nlattu woocuwela uvarela nteko ikatana ukhottoni. (1 Sam. 16:13; 24:12) Uyo ankhuluvela Yehova. Davidi ancuwela wiira nlayikha na Yehova “ninaawaakiha ale ammoova Nluku.” Ilelo, ninaacuwela wiira Yehova khanhala upanka miiriirya wiira anikhikicere yanikhumelelaka marikariko, masi ninaakupali wiira otheene ale anonkhuluvela Yehova khanhala waaphwanya masakha oohimala.
Ukati wo masakha moolupale, Gogue naahala unilupattha mmawannyihu. Masi unaanitteela nrima nlattu woocuwela wiira Yesu ni malayikhaawe anaahala woona citthu cotheene cinhala wiirannya ni anaahala unaakiha (Nwehe iparaagarafu 13)
13. Ukati unhaleehu utupheliya ni Gogue, nlattuni unhaleehu ukhala toko khanirina ntthu oonaakiha? Ni nlattuni nihinlamuliyeehu woova? (Nwehe ilatarato yo wakaapani.)
13 Woohipica, ninaahala uttehiya wakhala wiira ninankhuluvela Yehova awula mena. Ikhurupu yaatthu o ntuninyani inhala wiihaniya Gogue yaatuphelaka apoovu a Nluku, unhala ukhala khampa wiira khanirina ntthu oonaakiha. Uyo ukatyuuyo, nihaana nirwaaka ukhuluvela wiira Yehova naahala ukhitiri unaakiha. Atthu o ntuninyani anhala unoona khampa ikhontwaa cihirina makampuci. (Ezek. 38:10-12) Ayo atthwaayo anhala wuupuwela wiira anaahala waakuva unitthema, kontha khanirina ikaputthi ni khaniitthucile waana ikhotto. Ayo aatthwaayo khanhala ucuwela wiira malayikha a Yehova anhala ukhala owiitthenkaceene wiira anaakihe. Masi hi ninaacuwela kontha nihaana waamini. Muupuwele mananna ayo atthwaayo cinhalaaya ukhala yoonelelaka wiira malayikha menci wiirimu ari mphantteehu!—Apoka. 19:11, 14, 15.
MWIITTHENKACE NENNA CO WIIRA MWALIPE WAHOOLO
14. Isiyani inlamuliyeehu upanka wiira niitthenkace nenna co ni nirwee nalipe wahoolo?
14 Isiyani inlamuliyeehu upanka wiira niitthenkace nenna co ni nirwee nalipe wahoolo? Yoopacera, khaninlamuliya utepa uvaha ifayita cinene mihakhu, kontha wahoolo nihaana nirwaaka uhiya uttuli nnyo citthunnyo. Ciicammo, nihaana nitteeliyaka nrima nlattu wo citthu cirineehu ni nlattu wo itthu yuulupale cinene muukumini wihu ukhanle upatthaniihu ni Yehova. Nancuwelaka cinene Nlukwiihu, ninaahala utepa ukhuluvela wiira naahala unaakiha natupheliyaka ni Gogue.
15. Citthuni cankhumelenle Davidi caamwiiriha unkhuluvela Yehova?
15 Nttwee noone itthu ikhwaawe yankavihenre Davidi ukati wamphanyilyaaya masakha. Iyo ikhanle itthu inhala unikavihera hiiva ciicammo yaniphwanyaka masakha. Davidi enre co: “Nttehe ni moone wiira Yehova khanle namaana; ootteeliya phi ule nototha ukhikiceriya ni Yehova.” (Isaa. 34:8) Ayo moolumwaayo anthoonyera wiira Davidi ancuwela wiira anhala ukaviheriya ni Yehova. Davidi khaahiya unkhuluvela Yehova. Phimaana, Yehova khanhiile Davidi. Ukati Davidi waaryaawe mmirawo ni waamwaattakanannyaawe Koliyasi, aheera co: “Ilelo vaa, Yehova naahala ukikavihera wiira kiwiive.” (1 Sam. 17:46) Wahoolo, mwene Sawuli ahomananiha umwiiva Davidi ikwaha cinci, masi Yehova aari ni Davidi. (1 Sam. 18:12) Davidi ancuwela wiira Yehova khaahala unhiya veekha ni anhala unkavihera uvilela masakha yankhumelela.
16. Manannani caahaleehu “untteha” Yehova ni woona unamaana urinaawe?
16 Nankhuluvelaka Yehova nenna co, ninaahala utepa ukupali wiira uyo naahala unikavihera wahoolo. Wootakihera, narwaaka ulepela untekoni wihu uleviya wiira nirwee noone nthukumano wosirikwiitu awula ikonkereesu, nihaana nimwaaminiki ni ninkhuluvelaka Yehova. Ciicammo, nihaana nimwaaminiki Yehova ukati woolepela untekoni wihu uvukuliya ukati unkhaleehu nivaraka nteko wiira nikhitiri urwaa umikutthaanoni ni wuulalyeerani. Vano wakhalaka wiira niholepela untekoni wihu masi khanitthuniheriye ni nihokumihiya nteko, ninhala upankani? Niireke ninaahala umwaamini Yehova ni unkhuluvela wiira uyo khanhala unihiya nikhwaaka itala ni naahala unikavihera uphwanya citthu cinnithwa? (Mabere. 13:5) Mayamunna enci anvara nteko wowiivahereriya ukati wotheene anaattonka citthu ciwiirannyenle cinthoonyera wiira Yehova ahaawacera ukati waakhumelenlyaaya marikariko. Yehova khanle Nluku ookhuluvelya.
17. Nhimye iveerusu yo mwaakha wo 2022. Nlattuni uthanliyaaya iyo iveeruswiiyo?
17 Ukhala wiira Yehova ri ni hi, khaninlamuliya woova citthu cinhala uniirannyeela wahoolo. Nanhooleliheraka Yehova muukumini wihu, uyo khanhala unihiya. Ikhanle itthu yuulupale ni yofayita wiitthenkaca nenna co wiira nirwee navilele masakha anhala unikhumelela wahoolo. Mphwinko wo Mahumu Unhoolela wiira unuupusere mananna cinreeraaya wiitthenkaca nenna co, uhothanla Isaalimu 34:10 wiira ikhale iveerusu yo mwaakha wo 2022: “Anontotha Yehova khiivo itthu yomaana inhala waahaleela.”
NCIPO 38 Jeová Vai Dar-te Força
^ par. 5 Iveerusu yo nantano ikumihiye nhina Isaalimu 34:10: “Anontotha Yehova khiivo itthu yomaana inhala waahaleela.” Aswali a Yehova enci ilelo kharina mihakhu cinci. Vano nlattuni nineereehu wiira “khiivo itthu yomaana inhala waahaleela”? Ni kontha isiyani wiiweeha ayo moolumwaayo unaahala unitthenkaca wiira navilele citthu cinhala unikhumelela wahoolo?
^ par. 2 1 Samuweli 23:16 Vano Jonataa, mwaana a Sawuli, ahoonanaca ni Davidi ncoko wo Horesa, ni ahonkavihera ulipa makhuva ankhuluvelaka Yehova. 17 Uyo ahomwiirela Davidi co: “Uhoove, kontha apaapa Sawuli, khanhala wuuvara. We unaahala ukhala mwene o Isarayeli, ni mi kinhala ukhala mwene wakhumaka weeva; apaapa Sawuli, ciicammo anaacuwela iyo itthwiiyo.”
^ par. 4 Nwehe “Makoho Aanamasoma” nhina irevista Ukhalenla yo 15 yo Setembro yo 2014.
^ par. 5 Isaalimu 23:1 Yehova khanle Makampucyaaka. Khiivo itthu inhala ukithwa. 2 Uyo naakipankiha urupa mapuro amphwanyannya malasi oopipila. Ni naakipiiha mapuro oomiceriya ni maaci wiira kimumule. 3 Uyo naakilipiha. Nlattu wo ncina nawe, uyo naakihoolela wiira kihihiye weettela isariya. 4 Hataa keettaka mapuro ooripela, khiivo inhalaaka woova, kontha we uri ni mi; ikopwaa inaakiphwanyiha nnema. 5 Unaakitthenkacera meeca uhoolo waatthu ankilupattha. Unaattikitthela makhura oonukhela mmuru waka; ikoophu inwureryaaka ihocara sana-saana. 6 Khweeliini, unamaana ni nifento nookhuluvelya cikhanle citthu cinhala ukhala muukumini waka mahuku otheene, ni mi akinhala uhiya ukhala inupa ya Yehova mahuku otheene anhalaaka ukhala nuukumi.
^ par. 7 Luka 21:20 Masi moonaka isittatti yo Yerusalemu inaruukureeriye naanatoropa, ncuwele wiira uri wakhiviru ukati unhalaaya ukwanyulaciya. 21 Vano, ale anhala ukhala ncoko wo Yuuta atthawele mmamyaakoni, ale anhala ukhala nsittatti, akhume, ni ale anhala ukhala mmamattani, ahikele nhina isittatti, 22 kontha ayo anhala ukhala mahuku oweetteliya isariya, wiira ciirannye citthu cotheene cantikhiye. 23 Ahotakhaliya athiyana anhala ukhalana asaana owaamwa ayo mahukwaayo! Kontha anaahala uwa masakha moolupale va watuninyani va, ni ayo masakhaayo anaahala waaphwanya apoovu otheene ala. 24 Ni anaahala wiivakaciya niikatana ni anaahala urwaaniya ootthukiyeene nlaponi motheene; ni isittatti yo Yerusalemu inaahala unyakelaciya naapoovu amalaponi, mpaka wanhalaaya umala mahuku avahaceriyaaya amalaponi ulamulela.
^ par. 8 Nwehe irevista Ukhalenla 1 yo Maio yo 1999, ipaagina 19.
