MWAHA WOOSOMIYA 3
Isiyani inniitthucihaaya miithori a Yesu Kristu?
“Yesu ahancera wunla.”—JOAU 11:35.
NCIPO 17 “Eu Quero!”
NINHALA WIITTHUCANI? *
1-3. Marikarikoni anniiriha wunla?
NYUUVA nhomoriha miithori mphiyaaruni? Uhaavo ukati hiiva unonleehu nlattu woonitteela nrima, masi ukati mwinci ninonlaka nlattu woocukulaca. Wootakihera, unaarika uvilela akhwaaka mmuciihu awula ntthu notepeehu unfenta. Arokorihu Laura ankhala u Estados Unidos ahantikha co: “Uhaavo ukati waatepaaya ukiriipa nrima koopuwelaka ukhwa wa mwaamwanaka. Uyo ukatyuuyo, nlattu wookiwerya cinene nrima, kaaneekohaka nlattuni miiva kinkhalelaaka nkumi.” *
2 Hiiva ciicammo pooti wunla nlattu wo citthu cikhwaawe. Wootakihera, arokorihu Hiromi, anvara nteko weepiyoneeru u Japão, aheera: “Uhaavo ukati unkilolovacaaya makhuva nlattu woowoona atthu enci yahitthunaka wiitthuca Ibiiblya. Kinanlepelaka Yehova kunlaka wiira akikavihere umphwanya ntthu nhala utthuna wiitthucihiya Ibiiblya.”
3 Nyuuva ihotoko uwiirani itthu iwiirale asirokorihu Hiromi ni Laura? Unkhala toko atthu enci inaawiirannyeelaka iyo itthwiiyo. (1 Pet. 5:9) Hi nimpheela ‘unswalela Yehova unitteelaka nrima’. Masi woohitthuna, ninanswalelaka nunlakoono nlattu wookhweliya, nlattu wooniriipa nrima awula nlattu woonikhumelela citthu cinrikarikiha unswalela wihu Nluku. (Isaa. 6:6; 100:2) Isiyani inhala unikavihera uvilela citthu cotheenennyo?
4. Isiyani inhaleehu wiitthuca nhina ula mwahoola?
4 Wuupuwela mananna Yesu aawacenryaawe marikariko toko ayo pooti unikavihera. Uyo ciicammo cahonkhumelela citthu caamwiirihile wunla. (Joau 11:35; Luka 19:41; 22:44; Mabere. 5:7) Nhina ula mwahoola, ninaahala wuupuwelacera ikwaha Yesu cunlalyaawe ni woona isiyani ineetthuceehu. Ciicammo, ninaahala woona mananna oowacera saana canikhumelelaka citthu cinhala unipankiha wunla.
YESU AHUNLA NLATTU WAASIMPWANAAWE
Muntakihe Yesu ni mwaakavihere ale akhweliye (Nsome iparaagarafu 5-9) *
5. Isiyani nyuuva ineetthuceenyu mwasomaka Joau 11:32-36?
5 Mwaakha wo 32, ahowerennya ni ukhwa mpwanaawe Yesu eehaniya Laazaru. (Joau 11:3, 14) Laazaru ahaana asirokorawe eeli, Maria ni Marta, ni Yesu aanaafenta cinene ooraaru caya. Vano, Maria ni Marta yahoriipiya nrima nlattu wookhwa mwanrokoraya. Ukhwa wawe Laazaru, Yesu ahorwaa u Betânia, waakhalaaya Maria ni Marta. Marta waahimyeeriyaawe wiira Yesu ahowa, ahokhuma athupuluwaka wiira amoonanane. Muupuwele inanna canriipalyaaya nrima ukati waamwiirelaawe Yesu co: “Pwiiya, unari wiira mwahaavo vaa, mwanrokoraka khaakhwa.” (Joau 11:21) Ni, Yesu waamonnyaawe Maria unlaka nkhayi naatthu akhwaawe, nuuyo ciicammo “ahancera wunla”.—Nsome Joau 11:32-36. *
6. Kontha isiyani Yesu ahunla?
6 Yesu onlenleni uyo ukatyuuyo? Ilivuru Estudo Perspicaz das Escrituras ineera co: “Ukhwa wa Laazaru, mpwanaawe Yesu, ni uriipiya nrima waasirokorawe Laazaru, wahomwiiriha Yesu ‘unwerya nrima ni umoriha miithori.’” * Atthunaka Yesu aanawuupuwela mananna caahuvilyaawe cinene Laazaru nlattu woretta yaarinaawe ni canriipilyaaya nrima Laazaru wonnyaawe wiira iyo iretteeyo yanhala umwiiva. Ni khweeliini, umoona Marta ni Maria yacukulacaka nlattu wookhweliya mwanrokoraya, wahomwiiriha Yesu wunla. Wakhala wiira nyuuva hotoka ukhwa mmuciinyu awula mpatthaniinyu, khweeliini nnaacuwela isiyani yaamwiira Yesu. Vano, nttwee noone citthu tthaaru cinniitthucihaaya ntakihero na Yesu.
7. Miithori Yesu yaamorihalyaawe nlattu waasimpwanaawe annikavihera cani uncuwela Yehova?
7Yehova naacuwela sana-saana cinkhaleehu wanrimani. Ibiiblya ineera wiira Yesu khanle nthoonyihero nomaana no makhalelo a Yehova. (Mabere. 1:3) Coo, Yesu wunla wawe unaanikavihera ucuwela wiira Apaapaawe owiirimu ciicammo wahaariipa nrima. (Joau 14:9) Wakhala wiira nnaacukulaca nlattu wookhwa mmuciinyu, nhihiye wuupuwela wiira Yehova ciicammo naacuwela cinkhaleenyu wanrimani ni unanriipa nrima toko nyuuva. Yehova naapheela cinene wuuwacerani ni uwukula masukhuli arineenyu wanrimani.—Isaa. 34:18; 147:3.
8. Isiyani innikhuluveliha wiira Yesu naahala uwunweleliha khweeli atthu akhwaale?
8Yesu naapheela cinene umunweleliha ntthu anfenteenyu khwile. Yesu hinaaya umoriha miithori ahonkhuluveliha Marta wiira Laazaru ‘anhala wunwelela’, ni Marta ancuwela wiira Yesu ooluma ikhweeli. (Joau 11:23-27) Marta aari nswali ookhuluvelya, ni nlattu wo iyo, ancuwela wiira maporofeeta okhalayi Eliyasi ni Elisewu yahotoko uwunweleliha atthu. (1 Mam. 17:17-24; 2 Mam. 4:32-37) Ni atthunaka ahohimyeeriya wiira Yesu ahowunweleliha atthu. (Luka 7:11-15; 8:41, 42, 49-56) Nyuuva pooti ukhuluvela ciicammo wiira nnaahala uwoona-tho amuciinyu ni apatthaniinyu akhwile. Miithori Yesu yaamorihalyaawe ukati waamaalihaawe apatthannyaawe anthoonyera wiira uyo naapheela cinene uwunweleliha atthu akhwile!
9. Toko Yesu, manannani ninlamuliyeehu waakavihera ale akhweliye? Ntakihere.
9Munkavihere ntthu khweliye. Yesu ahonla nkhayi ni Marta ni Maria; masi uyo ciicammo ahaaviriyana ukati wanhimyeeraaya itthu yaawiira ni ahaamaaliha. Hiiva ciicammo pooti untakiha Yesu. Humu mmoca nokhala u Austrália neehaniya Dan, neera: “Mi kahopheela cinene ukaviheriya amwaaraka waakhwilyaaya. Mayamunna enci yaheevaherera ukikavihera ni ukiviriyana khula ukati, uthana ni uhiyu. Ayo yankihiya wuuluma yotheene yaakiira ni khayaathoonyera wuuliya muru miiva kanceraka wunla. Ciicammo, ayo yaanaapanka citthu cikhwaawe wiira akikavihere. Ahaavo mahuku yahaakhitiryaaka upanka hataa itthu, masi ayo yaanaakipakherya nkaaroni waka, yankithumela citthu, yankaapyeela ni khayaahiya ulompa nkhayi ni mi. Ayo ahothoonyera wiira akhanle mayamunnaaka ni apatthannyaaka eekhweeli yeevaherenre ukikavihera ‘ukati wo masankiho.’”—Miru. 17:17.
YESU AHONLA NLATTU WAATTHU YAAKHOTTILE IHAPARI CAALALYAAWE
10. Toko cinhimyaaya Luka 19:36-40, isiyani yeerannyeele ukati Yesu waattamenlyaawe isittatti yo Yerusalemu?
10 Nihuku 9, mweeri wo Nisã wo mwaakha wo 33, Yesu ahorwaa u Yerusalemu. Ukati waakelaawe nsittatti, atthu enci yahorwaa umwaakhelela. Ayo atthwaayo yahomwaatalela ikuwo munttalani waaviraawe; ayo yaamwaakhelenle khampa mwennyaaya. Khweeliini, nno nihukunno Yesu wahontteela cinene nrima. (Nsome Luka 19:36-40. *) Phimaana, atthari a Yesu atthunaka yahokhala ootikhinihiya wonnyaaya itthu yeerannyeele ukela waya nsittatti: “Ukati Yesu waattamenlyaawe u Yerusalemu, ahoweha isittattiiyo ni ahonlela.” Anancanre miithori, Yesu ahohimya isiyani yaahala uwiirannyeela atthu yaakhala u Yerusalemu.—Luka 19:41-44.
11. Nlattuni Yesu waawunlenlyaawe atthu o Yerusalemu?
11 Yesu wahonriipa nrima kontha ancuwela wiira hataa atthu akhwaawe yamwaakhelelaka saana, ayuuta enci khayaahala wiiwelela ihapari caalalyaawe. Nlattu ayo atthwaayo woohitthuna umwiiwelela, isittatti yo Yerusalemu yanhala ukwanyulaciya ni ayuuta yaahala woopwa yanhala ukhalihiya ipottha. (Luka 21:20-24) Moolumo a Yesu yaheerannya. Wooriipiha nrima, atthu enci khayeewelenle ihapari caalalyaawe Yesu. Ncoko nyuuva unlalyeenyu moolumo a Nluku, atthu anaatthuna wiiwelela ihapari cinlalyeenyu? Wakhala wiira atthu enci khampheela wiiwelela, ntakihero na Yesu pooti wuukaviherani? Nttwee noone citthu tthaaru cimmwiitthucereehu Yesu.
12. Miithori a Yesu ukati waawunlenlyaawe atthu o Yerusalemu anniitthuciha isiyani?
12Yehova nawaawacera atthu. Miithori a Yesu ukati waawunlenlyaawe atthu o Yerusalemu anaanithoonyera wiira Yehova ciicammo nawaawacera atthu. Ibiiblya ineera wiira Yehova “khaavo ntthu nompheelaawe umoona atankanyiyaka, masi nawiira uweherera wiira atthu otheene arukunuse mirima caya.” (2 Pet. 3:9) Hiiva ciicammo ninthoonyera wiira ninawaafenta ‘akhunanihu’ neekurumicaka waalalyeera ihapari comaana ca Nluku.—Mat. 22:39. *
Muntakihe Yesu ni mwiikurumice ulalya iwoora coovirikanaca (Nsome iparaagarafu 13-14) *
13-14. Yesu aathoonyenre cani wiira anwoonela uthunku atthu ni ninlamuliya untakiha cani?
13Yesu aanawiikurumica cinene ulalyaa moolumo a Nluku. Yesu aanawaafenta atthu, phimaana uyo aanawaalalyeera moolumo a Nluku khula ukati ni khula nipuro. (Luka 19:47, 48) Nlattuni Yesu waapankaawe commo? Uyo aapanka commo kontha anwoonela uthunku atthu. Ukati nkhwaawe, yaanamphwanya atthu enci yaapheela ukaviheriya ni wiiwa ihapari caalalyaawe, mpaka Yesu ni attharyaawe khayaakhalana ukati wiira alye. (Mark. 3:20) Ni ikwaha ikiina Yesu aholalyeera uhiyu, kontha ahaavo nlopwana aapheela wiiwa ihapari caalalyaawe. (Joau 3:1, 2) Atthu enci khayeettenle citthu Yesu caalalyaawe ni khayaalakenle ukhala attharyaawe. Masi pooti waneereehu wiira khaavo ntthu aheewile ihapari comaana. Hiiva ciicammo nimpheela wiira atthu otheene yiiwe ihapari comaana. (Mite. 10:42) Ni ukati nkiina nihaana nirukunusaka mananna cinlalyeereehu wiira nikhitiri waakavihera atthu otheene wiiwa nnyo ihaparinnyo.
14Nkupali urukunusa mananna oolalyaa ihapari ca Nluku. Wakhalaka wiira khula ikwaha ninlalyeera iwoora imocaaru, pooti uhikhitiri waaphwanya atthu akhwaawe ampheela wiitthuca ikhweeli ca Nluku. Arokorihu aneehaniya Matilda anvara nteko weepiyoneeru, aheera: “Mi naawannyaka ninawiikurumica ulalyeera iwoora coovirikanaca. Uwicisu, hi ninrwaaka ulalyeera mmapacari. Uthana, hi ninlalyeeraka niikariinyu kontha phuukati atthu enci unkhalaaya mmaparapaarani. Vano ucoocilo, ninlalyeera mmawaani ni ninaakhitiriki waaphwanya atthu.” Uhiya ulalyeera ukati unnicivela hiiva, nihaana niikurumicaka ulalyeera ukati unooneehu wiira ninaahala waaphwanya atthu. Pooti wankupaliihu wiira napankaka commo, Yehova unaahala untteela nrima cinene.
YESU AHONLA KONTHA AAPHEELA UTTITTHIMIHA NCINA NA ATHUMWAANE
Muntakihe Yesu ni munlepele Yehova wuukaviherani (Nsome iparaagarafu 15-17) *
15. Toko cinthoonyeraaya Luka 22:39-44, isiyani yankhumelenle Yesu uhiyu wo nihuku nawe noomalela watuninyani?
15 Uhiyu wo nihuku 14 mweeri wo Nisã, Yesu ahorwaa mpaka u Getsêmani. Uphiya wawe nwo, uyo ahonlompa Yehova ninrimaawe wotheene. (Nsome Luka 22:39-44. *) Uyo ukatyuuyo, Yesu “aholepela isontte-sontte, alompaka cinene ni onlaka.” (Mabere. 5:7) Uyo uhiyuuyo, isiyani Yesu yanlepelaawe Nluku? Uyo aholepela ikuru wiira hihiye unvaresesa ni umwiiwelela Yehova. Yehova aheewa ulompa wa Yesu ni ahoruma nlayikha wiira ninlipihe.
16. Nlattuni Yesu waakhanlyaawe ooriipiya nrima ukati waalompaawe u Getsêmani?
16 Ukati woolompa u Getsêmani, Yesu ahonla kontha khaapheela wiira atthu yuupuwele wiira uyo khaahisimu ncina na Nluku. Itthu ikhwaawe yaamunlihale Yesu waari ucuwela wiira uyo ahaana nrintti muulupale—unvaresesa ni unttitthimiha Yehova. Wakhala wiira nyuuva inawuukhumelelani itthu inoorikihelani unvaresesa Yehova, isiyani inwiitthucihaayani miithori a Yesu? Citthu tthaaru.
17. Yehova waakhula wawe mavekelo a Yesu, unniitthuciha isiyani?
17Yehova naaviriyana ulompa wihu. Yehova ahoviriyana ulompa wa Yesu. Kontha isiyani? Kontha itthu Yesu yonlelaawe cinene waari waavaresesa Athumwaane ni waakihera ncina naya. Wakhala wiira hiiva ciicammo iyo phi itthu inonleleehu, Yehova naahala waakhula ulompa wihu nanlepelaka unikavihera.—Isaa. 145:18, 19.
18. Manannani Yesu cinlikanacaawe nimpatthani nocuwela itthu inniira?
18Yesu naacuwela sana-saana cinkhaleehu wanrimani. Yanikhumelelaka masakha, itthu inhala unikavihera ukhanle umuulumana mpatthaniihu nocuwela itthu inniira, utepa wakhalaka wiira uyova ihotoko unkhumelela itthu inikhumelenle. Uyo mpatthannyuuyo khanle Yesu. Uyo naacuwela uriipiya nrima isiyani ni hotoko upheela ukaviheriya. Uyo naacuwela citthu cinniloloviha makhuva ni naahala unikavihera “ukati unhala ureerana.” (Mabere. 4:15, 16) Yesu ahotthuna ukaviheriya ni nlayikha ukati waaryaawe u Getsêmani. Hiiva ciicammo nihaana nitthunaka ukaviheriya ni Yehova. Uyo pooti unikavihera nimananna menci, toko ilivuru cihu, ividiyu, mwaha uneeweehu utaphuleliya unkutthaanoni, mpatthaniihu awula humu o wanlokoni.
19. Isiyani inhala unikavihera canikhumelelaka citthu cinnirikihela unvaresesa Yehova? Ntakihere.
19Nyuuva nnaahala uvahiya “ineema ya Nluku”. Nanlompaka Yehova, uyo naahala univaha ikuru cimpheeleehu. Ninaahala ukhalana “ineema ya Nluku invikana moopuwelelo otheene.” (Afili. 4:6, 7) Iyo ineemeeyo inaahala umaaliha nrimeehu ni inaahala unikavihera uhitepa ukhala nimasukhuli. Iyo phi itthu yaawiirannyenle arokorihu aneehaniya Luz. Ayo aheera: “Mi kinawiicoona ukhala veekha ni unaakiriipa nrima venci nlattu wo iyo itthwiiyo. Uhaavo ukati unkiriipaaya nrima cinene, mpaka kinawuupuwelaka wiira Yehova khankifenta. Masi ukati unkiphwanyaaya ayo moopuwelelwaayo, mi kinaweemela ni kinanhimyeera Yehova inanna cineecoonaaka. Ulompa unaakikavihera uwukula masukhulyaaka.” Moolumo aarokorihu Luz anaathoonyera sana-saana wiira ulompa pooti uniphwanyiha nnema.
20. Miithori a Yesu anniitthuciha isiyani?
20 Wuupuwelacera ikwaha Yesu caamorihilyaawe miithori unaanimaaliha cinene. Nhina ula mwahoola, nihoona citthu cinci cinniitthucihaaya miithori a Yesu! Nihoona wiira nihaana naakaviheraka ale akhweliye, ni nihaana nikhuluvelaka wiira Yehova ni Yesu anaahala unikavihera nakhweliyaka. Ciicammo, niheetthuca wiira nihaana nalalyeeraka ihapari ca Nluku akhunanihu ni nihaana naafentaka kontha iyo phi itthu Yehova ni Yesu anniitthucihaaya upanka. Ni ucuwela wiira Yehova ni mwanawe anaacuwela citthu cinniira unaanimaaliha ni unaahala unikavihera uvilela. Phimaana, nihihiye weettela citthu ciitthucileehu nhina ula mwahoola mpaka nihuku Yehova ninhalaawe wiirannyeeha inatiri yomaana ipankilyaawe ‘yoowuta minthoriihu’!—Apoka. 21:4.
NCIPO 120 Sejamos Humildes Como Jesus
^ par. 5 Yesu cahonkhumelela citthu cinci campankihile wunla. Nhina ula mwahoola, ninaahala wuupuwelacera ikwaha tthaaru Yesu cunlalyaawe ni itthu inniitthucihaaya miithori a Yesu Kristu.
^ par. 1 Macina makiina ahaakakhanihiya.
^ par. 5 Joau 11:32 Maria uphiya wawe nipuro naaryaawe Yesu ni waamonnyaawe, ahokhoroma uhoolo wawe ni ahomwiirela: “Pwiiya, unari wiira mwahaavo vaa, mwanrokoraka khaakhwa.” 33 Ukati woonalyaawe wiira ayuuta yanveleela yaanawunla, Yesu wahomwiira uthunku ni ahokhala ni masukhuli. 34 Vano Yesu ahokoha: “Munsikhile nipuroni?” Ayo yahomwiirela: “Pwiiya, nweeke mowooneke.” 35 Ni Yesu ahancera wunla. 36 Ayuuta umoona waya onlaka, yaheera co: “Mooneke inanna canfentaawe!”
^ par. 6 Nwehe ilivuru Estudo Perspicaz das Escrituras, ivoluume 2 ipaagina 96.
^ par. 10 Luka 19:36 Ukati waaviraawe, ayo yammwaatalela ikuwo caya munttalani. 37 Waattamela wawe iparapaara inkhuma umwaakoni Olivera, atthari otheene yahokhala ootteeliya ni yahancera unttottopela Nluku yakumiheraka macu vate nlattu wo citthu cuulupale connyaaya. 38 Ayo yeera co: “Ooreerihiya thi ule nowa khampa Mwene mwa ncina na Yehova! Nikhale nnema wiirimu ni attottopeliye Nluku uculu!” 39 Masi, mafarisewu akiina yaari iriyari ayo atthwaayo yahomwiirela co: “Mwiitthucihi, uwiirele attharyaa wiira amaale.” 40 Masi uyo ahowaakhula co: “Kimpheela wuuhimyeerani wiira ala yamaala, maluku phinhala ukhuwela yakittottopelaka.”
^ par. 12 Nuulumo noluuka ikereku nitaphuleliye “akhunanihu” nhina Matewus 22:39, ninwaaca atthu ankhala wakhiviru ni hiiva; masi ciicammo ninwaaca atthu otheene anwoonananeehu.
^ par. 15 Luka 22:39 Ukhuma wawe, uyo ahorwaa umwaakoni Olivera, toko caapankesaawe, ni attharyaawe ciicammo yahontthara. 40 Uphiya waya, uyo ahowiirela: “Nhihiye ulompa, wiira nhimore mwattehiyaka.” 41 Vano uyo ahaahiya, aheetta vakaani ni ahokhoroma ni wancera ulompa, 42 eeraka: “Paapa, mwapheela nkumihe ila ikaalisiila uhoolo waka. Ihiirannye itthu impheelaaka; yiirannye itthu nyuuva impheeleenyu.” 43 Vano nahonweela nlayikha nimoca no wiirimu ni nahonlipihaca. 44 Masi Yesu wahonriipa nrima venci, phimaana ahotepa ulompa; ni urettheela wawe wahokhala khampa iphome ittonyeraka vathi.
^ par. 61 ILATARATO: Yesu aamaalihaka Maria ni Marta. Hiiva ciicammo nihaana naamaalihaka atthu akhweliye.
^ par. 63 ILATARATO: Yesu ahokupali umwiitthuciha Nikotemu uhiyu. Hiiva nihaana naasomihaka atthu Ibiiblya iwoora inkhalanaaya ukati.
^ par. 65 ILATARATO: Yesu aholompa wiira akhitiri unvaresesa Yehova. Hi ciicammo nihaana ninlompaka Yehova yanikhumelelaka masankiho.
