MWAHA WOOSOMIYA 2
Nimmwiitthucera isiyani mwanhimaawe Yesu?
“Mi Tiyaku, ipottha ya Nluku ni ya Apwiiya Yesu Kristu.”—TIYA. 1:1.
NCIPO 88 Os Teus Caminhos Quero Entender
NINHALA WIITTHUCANI? *
1. Itthoko yoonuwenlyaawe Tiyaku yaari cani?
TIYAKU, mwanhimaawe Yesu, oonuwihiye watthokoni yaamuci oolipa nhina mminepani. * Yusufu ni Mariya, asithumwaane, yaananfenta cinene Yehova ni yaanawiikurumica unswalela. Tiyaku ciicammo ahokhalana iparakha ikhwaawe: Muulupalyaawe aahala ukhala Mesiya. Khweeliini, Tiyaku ahokhalana iparakha yuulupale nlattu wooyariya iyo itthokweeyo.
Tiyaku oonuwile nkhayi ni Yesu, phimaana ahoncuwela ratta (Nwehe iparaagarafu 2)
2. Citthuni atthunaka caamwiirihile Tiyaku untikhinaca Yesu?
2 Tiyaku ahaana isariya yontikhinaca Yesu, muulupalyaawe. (Mat. 13:55) Wootakihera, ukati Yesu waarinaawe myaakha 12 ancuwela ratta-raatta Cowantikhiya Cowaarya mpaka ahotikhinaciya naale yeetthuciha u Yerusalemu. (Luka 2:46, 47) Tiyaku atthunaka ahovara nteko weekarpinteeru nkhayi ni Yesu. Wakhala wiira yahovaraca nteko nkhayi, pooti waneereehu wiira Tiyaku ahoncuwela ratta-raatta Yesu. Amunna Nathan H. Knorr yaaneeraka co: “Weeva unoncuwela ntthu ratta wanvaranaka nteko.” * Tiyaku khweeliini ahoona wiira Yesu “aavira atepaka ukhala oocuwelaca ni wuunuwa irutthu, uhoolo wa Nluku ni waapinaatamu.” (Luka 2:52) Noopuwelaka citthu cotheenennyo, ninawoona wiira atthunaka Tiyaku aanaahala waakuva ukhala ntthari a Yesu. Masi iyo kahi phi itthu yeerannyeele.
3. Isiyani Tiyaku yaapankilyaawe ukati Yesu wancenryaawe ulalya moolumo a Nluku?
3 Ukati wotheene Yesu ukhanlyaawe watuninyani alalyaaka moolumo a Nluku, Tiyaku khaakhanle nttharyaawe. (Joau 7:3-5) Tiyaku atthunaka aari nkhayi naamuci a Yesu yaamwiirenle wiira “hovahuwa.” (Mark. 3:21) Ni pooti ukhalaka wiira Tiyaku khaari nkhayi naanumwanayaca, Maria, ukati Yesu waakhomeliyaawe wanipottoni.—Joau 19:25-27.
4. Isiyani inhaleehu wiitthuca nhina ula mwahoola?
4 Nuuwakatyaaka, Tiyaku ahancera umwaamini Yesu ni ahokhala humu aavahaceriye miteko cuulupale wanlokoni no makristau. Nhina ula mwahoola, ninaahala wuuluma citthu piili cimmwiitthucereehu Tiyaku: (1) nlattuni ninlamuliyeehu uhihiya ukhala atthu owiiyeviha, ni (2) isiyani ninlamuliyeehu upanka wiira niwiitthucihe ratta akhwiihu.
NHIHIYERERE WIIYEVIHA KHAMPA TIYAKU
Ukati Tiyaku waaphwanyiyaawe ni Yesu, uyo aheeyeviha, ahokupali wiira Yesu aari Mesiya ni ahokhala nttharyaawe ookhuluvelya (Nwehe iparaagarafu 5-7)
5. Uvira waya ukati Yesu wamphwanyilyaawe Tiyaku, isiyani Tiyaku yaalakenlyaawe upanka?
5 Ukatini Tiyaku waakhanlyaawe ntthari a Yesu? Yesu wunwelelihiya wawe, “ahorwaa umphwanya Tiyaku, ni wahoolo waya, ahorwaa waaphwanya maapostolu otheene.” (1 Akor. 15:7) Nuwakatyaaka, Tiyaku aholakela ukhala ntthari a Yesu. Uyo aari nkhayi ni maapostolu yaari u Yerusalemu yaamwaruseliye nnepa wowaarya wa Nluku. (Mite. 1:13, 14) Wahoolo, Tiyaku wahontteela nrima nlattu woovara nteko nhina mphwinko wo mahumu waahoolela. (Mite. 15:6, 13-22; Akalas. 2:9) Ni uhinaphiya mwaakha wo 62, uyo ahorumiya ni Nluku uwantikhela iwarakha makristau oothanliya. Mpaka ilelo, iyo iwarakheeyo inaaniitthuciha citthu cinci, hataa niwehereraka ukhalana ukumi woohimala wiirimu awula watuninyani. (Tiya. 1:1) Toko cittonkalyaawe namasoma ihantisi eehaniya Josefo, nankuttho muulupale eehaniya Ananias omwankaani ahorumiha wiiviya Tiyaku. Tiyaku khaahiile unvaresesa Yehova mpaka ukati waakhwilyaawe.
6. Tiyaku aavirikana cani naahooleli ottiini yaakhala ule ukatyuule?
6Tiyaku aari nlopwana owiiyeviha. Nlattuni uneereehu commo? Moone mananna Tiyaku caavirikanaawe naahooleli ottiini yaakhala ule ukatyuule. Ukati Tiyaku wonnyaawe wiira Yesu aari mwaana a Nluku, uyo aheeyeviha ni ahokupali iyo itthwiiyo. Masi anankuttho o Yerusalemu khayaapankile iyo itthwiiyo. Wootakihera, ayo yahooneeha wiira Yesu ahomunweleliha Laazaru. Waanookhalaru commo, ayo khayaakupanli wiira Yesu aaveleelihiye ni Yehova ni yaholakela umwiiva Yesu ni ciicammo Laazaru. (Joau 11:53; 12:9-11) Ni ukati Yesu wonwelelihiyaawe, ayo yahomananiha uvitha ikhweeli wiira Yesu ahonwelelihiya. (Mat. 28:11-15) Wiicoona waarinaaya ayo ahooleli ottiinnyaayo wahaapankiha unkhotta Mesiya.
7. Kontha isiyani khaninlamuliya wiicoona?
7Itthu ineetthuceehu: Nhiicoone, ni munhiye Yehova uwiitthucihani. Neetthaalaka, wiicoona pooti unikhaliha atthu oohiiwa uhimyeeriya. Moone itthu yaawiirannyenle mafarisewu. Wiicoona waya waahowiiriha uhiwacera citthu caathoonyera wiira Yesu aari mwaana a Nluku. Wiicoona unawoopiha ni pooti unihiiha ukhalana upatthani womaana ni Yehova. (Joau 12:37-40) Nlattu wo wiicoona, mafarisewu khanweherera ukhalana ukumi woohimala wahoolo. (Mat. 23:13, 33) Phimaana, nihaana nitthunaka wiira Ibiiblya ni nnepa wowaarya wa Yehova urukunuse meettelweehu, moopuwelweehu ni unikavihere ulakela upanka citthu comaana! (Tiya. 3:17) Wiiyeviha wahomwiiriha Tiyaku unhiya Yehova urukunusa meettelwaawe. Ni toko cinhaleehu woona, nlattu wo wiiyeviha Tiyaku ahokhitiri wiitthuciha ratta.
NCUWELE WIITTHUCIHA RATTA KHAMPA TIYAKU
8. Isiyani inhala unikavihera ucuwela wiitthuciha ratta?
8 Tiyaku khaasomile icikola cuulupale. Ahooleli ottiini yanwehera Tiyaku khampa canweheraaya apostolu Peturu ni Joau—khampa “alopwana yahooniya ukhala atthu ni yahaasomale.” (Mite. 4:13) Masi waanookhalaru commo, Tiyaku aanaacuwela wiitthuciha ratta. Iyo itthwiiyo ninaakhitiri woona nasomaka ilivuru yo mbiiblyani yantikhilyaawe. Ilelo, pooti ukhalaka wiira khampa Tiyaku, hiiva khanisomile icikola cuulupale. Masi nlattu wookaviheriya ni nnepa wowaarya wa Yehova ni nlattu woolakihaceriya mumphwinkoni wawe, hiiva pooti ucuwela wiitthuciha ratta. Phimaana, nttwee noone isiyani yankavihenre Tiyaku ucuwela wiitthuciha ratta ni manannani cinlamuliyeehu untakiha.
9. Tiyaku eetthuciha manannani?
9Moolumelo ni meetthucihero a Tiyaku khayaarika wiiwannyaa. Phimaana, atthu Tiyaku yaawiitthucihaawe yancuwela isiyani yaalamuliyaaya upanka ni manannani caalamuliyaaya upanka iyo itthwiiyo. Wootakihera, moone mananna Tiyaku ceetthucihilyaawe woohirikarikiha wiira makristau pooti uvilela ni uhikhala atthu ootakhala nrima, hataa yapankiyaka citthu coohinamaana. Uyo ahantikha co: “Ninaawoona ukhala ootteeliya atthu avilenle. Nyuuva nheewa wuulumiyaka uvilela wa Jó ni nhoona mananna caacaalihiyaawe ni Yehova; nhoona wiira Yehova naathoonyera venci uthunku ni uyo nakiriri.” (Tiya. 5:11) Ukati wo wiitthuciha, Tiyaku anvarela nteko Cowantikhiya Cowaarya. Nhina iyo iveeruswiiyo, uyo ahovarela nteko Nuulumo na Nluku wiira aakavihere atthu ucuwela wiira Yehova nawaatthuvela ale anonvaresesa khampa Jó. Ukati wowiitthuciha, Tiyaku khaaromola moolumo oorika ni meetthuciherwaawe yaari oohirika wiiwannya. Coo, uyo khaahoolelihera wiittitthimiha, masi anttitthimiha Yehova.
10. Ukati woowiitthuciha akhwiihu myaha ca Yehova, manannani ninlamuliyeehu untakiha Tiyaku?
10Itthu ineetthuceehu: Mwiitthucihe woohirikarikiha ni nvarele nteko Ibiiblya. Ukati wonsomiha ntthu Ibiiblya, hi khaninapheela unthoonyera wiira ninaacuwelaca cinene, masi nimpheela unthoonyera ucuwelaca urinaawe Yehova ni mananna cinnifentaawe. (Aroo. 11:33) Ninhala ukhitiri upanka iyo itthwiiyo navarelaka nteko Ibiiblya khula ukati nimmwiitthuciheehu ntthu. Wootakihera, ukati wonkavihera ntthu ucuwela itthu yooreera upanka, khaninlamuliya unhimerya isiyani yaahaleehu upanka ninari hiiva. Masi ninlamuliya unthoonyera matakihero o mbiiblyani wiira uyova mwaneene acuwele isiyani Yehova inoopuwelaawe nhina iyo itthwiiyo. Napankaka commo, atthu anaasomiheehu Ibiiblya anaahala ucuwela wiira itthu yuulupale ukhanle untteeliha nrima Yehova, kahi untteeliha nrima ule naasomiha Ibiiblya.
11. Citthuni caarika upanka makristau akhwaawe, ni ikanoni Tiyaku yaavahilyaawe? (Nwehe Tiyaku 5:13-15)
11Tiyaku aanaahimya ikhweeli. Nasomaka iwarakha ya Tiyaku ninaakhitiri woona wiira uyo ancuwela citthu caarika mayamunnaawe ni mayanuunwaawe o wanlokoni. Phimaana, uyo ahaavaha ikano aahimyeeraka itthu yaalamuliyaaya upanka woohaakhuwakhuwa. Wootakihera, yahaavo mayamunna yaapica weettela ikano cikiina. (Tiya. 1:22) Mayamunna akhwaawe yaanawaathanya amasikhini ni waawacera saana ale yaari mathaciri. (Tiya. 2:1-3) Ni yahaavo makristau waarika wiivaraca ukati wo wuuluma. (Tiya. 3:8-10) Makristau yaapanka nnyo citthunnyo yaanaavonya cinene, masi Tiyaku ankhuluvela wiira ayo mayamunnaayo yanhala ukhitiri urukunusa mirima caya. Uyo ahowuulumana sana-saana ayo mayamunnaayo ni ahaavaha ikano, masi woohaakhuwakhuwa. Ciicammo, uyo ahaalipiha ni ahaakurumica utotha ukaviheriya ni mahumu wiira akhitiri urukunusa mirima caya.—Nsome Tiyaku 5:13-15. *
12. Isiyani inlamuliyeehu ukhuluvela?
12Itthu ineetthuceehu: Ncuwele citthu cinaarika akhwiihu ni nkupali wiira ayo anaahala ukhitiri urukunusa meettelwaaya. Nihaana nicuwelaka wiira atthu akhwaawe anaasomiheehu Ibiiblya pooti waarika weettela ikano co mbiiblyani. (Tiya. 4:1-4) Atthu akhwaawe anaasomiheehu Ibiiblya pooti ukhala ukati mwinci ahinakhitiri uhiya citthu coohinamaana caapankaaya ni wancera uthoonyera makhalelo eekristau. Khampa Tiyaku, nihaana niwuulumanaka atthu anaasomiheehu Ibiiblya ni waahimyeera isiyani inlamuliyaaya upanka woohaakhuwakhuwa. Ciicammo, nihaana nakhuluvelaka wiira Yehova naahala waawaana wanlokoni atthu owiiyeviha ni uyo naahala waakavihera ayo atthwaayo urukunusa meettelwaaya.—Tiya. 4:10.
13. Isiyani Tiyaku yaaminnyaawe nhina Tiyaku 3:2 ni niwehero?
13Tiyaku kheecoona ukhala muulupale waavikana akhunanawe. Tiyaku kheecoona ukhalana ifayita waavikana makristau akhwaawe nlattu uyova wookhala mwanhimaawe Yesu awula nlattu wookhalana mirintti cuulupale wanlokoni no makristau. Uyo ahowiihana makristau yaacuwelaawe “asuulupalyaawe oofentiya.” (Tiya. 1:16, 19; 2:5) Tiyaku khaamananiha uthoonyera wiira uyo aari ntthu oohittheka. Uhiya commo, uyo aheehela nhina ukati wenryaawe co: “Otheene cihu ninaatthekaka imaara cinci.”—Nsome Tiyaku 3:2 ni niwehero. *
14. Kontha isiyani unaareera waahimyeera atthu anaasomiheehu Ibiiblya wiira hiiva ciicammo ninaatthekaka?
14Itthu ineetthuceehu: Nhiliyale wiira otheene cihu ninaatthekaka. Khaninlamuliya wuupuwela wiira hiiva ninawaapwaha atthu anaasomiheehu Ibiiblya. Nlattuni? Namananihaka waathoonyera atthu anaasomiheehu Ibiiblya wiira hiiva khaninttheka, ayo anaahala ulolovaca nlattu wo wuupuwela wiira khanhala ukhitiri upanka citthu Nluku cinlepelaawe. Masi hi ninhala waakavihera atthu anaasomiheehu Ibiiblya unswalela Yehova nakupaleelaka wiira ukati nkiina unaarika weettela mattharelelo o mbiiblyani ni naahimyeeraka mananna Yehova cinikavihenryaawe urukunusa makhalelweehu.
Malattanihero yaapankaawe Tiyaku khayaarika wiiweeha ni yaanawaavara nrima atthu (Nwehe iparaagarafu 15-16) *
15. Malattanihero yaapankaawe Tiyaku yaari cani? (Nwehe Tiyaku 3:2-6, 10-12)
15Tiyaku aanaavarela nteko malattanihero wiira aavare nrima atthu. Tiyaku aanaakaviheriya ninnepa wowaarya. Masi pooti ukhalaka wiira uyo ciicammo aheetthucera cinene malattanihero a Yesu, muulupalyaawe. Nhina iwarakha yantikhalyaawe, Tiyaku hopanka malattanihero oohirika ni ofayita.—Nsome Tiyaku 3:2-6, 10-12. *
16. Isiyani inhala wiirannya napankaka nlattanihero nomaana?
16Itthu ineetthuceehu: Mpanke malattanihero anaavara nrima atthu. Nlattanihero nomaana pooti unhula ntthu miitho. Uyo ntthuuyo naahala wiiweeha saana itthu impheeleenyu umwiitthuciha ni khanhala waakuva uliyala. Khaavo ntthu nkhwaawe aapanka malattanihero omaana unvikana Yesu. Ni Tiyaku ahontakiha Yesu. Nttwee noopele mwaha nlattanihero naapankilyaawe Tiyaku ni noone nlattuni nikhanlyaaya nlattanihero nomaana.
17. Nlattuni nineereehu wiira nlattanihero nimphwanyannya nhina Tiyaku 1:22-25 nikhanle nomaana?
17 Nsome Tiyaku 1:22-25. * Nlattanihero noloola naapankilyaawe Tiyaku nikhanle nomaana nlattu wo citthu cinci. Yoopacera, Tiyaku ancuwela isiyani yaapheelaawe wiitthuciha. Uyo aapheela wiitthuciha wiira napheelaka wiira Nuulumo na Nluku nirukunuse makhalelweehu, khuntosa paahi usoma Ibiiblya, nihaana neettelaka citthu cineetthuceehu. Tiyaku aalattanihenre niitthu yaacuweliya naatthu otheene: iloola. Ni nno nlattaniheronno naapheela wiitthuciha isiyani? Khaavo ntthu aahala wiiweha waloolani, woonelela wiira ikhovyaawe ihoonanaraca ni ukhuma woohiivutaca. Inanna imocaaru, hiiva khaninlamuliya usoma Ibiiblya, woona wiira ihaavo itthu yootakhala impankeehu ni uhilakela uhiya upanka iyo itthwiiyo.
18. Citthuni tthaaru cinlamuliyeehu wuupuwela wiira nicuwele upanka malattanihero omaana?
18 Ninhala untakiha cani Tiyaku ni uvarela nteko malattanihero omaana ukati wowiitthuciha? Pooti wampankeehu citthu tthaaru. (1) Nthanle nlattanihero ninhala unkavihera ntthu nonsomiheenyu wiiweeha itthu immwiitthuciheenyu. (2) Mpanke nlattanihero ni citthu atthu cincuwelaaya ratta. (3) Nhimye ratta itthu ineetthucihaaya nno nlattaniheronno. Vano wakhalaka wiira unawuurikani upanka malattanihero omaana, isiyani inhala wuukaviherani? Nyuuva pooti uvarela nteko Índice das Publicações da Torre de Vigia. Nipuro nantikhiye “Ilustrações”, nnaahala uphwanya matakikero menci oohala uvarela nteko. Masi upanka malattanihero unkhala toko wuuluma wamikorofooneni. Ncu na ntthu nooluma wamikorofooneni phintepa wiiwannya cinene uvikana macu aatthu akhwaawe. Inanna imocaaru, malattanihero anaatepa wiiwannyeeha saana itthu impheeleehu wiitthuciha. Phimaana, nihaana nivarelaka nteko malattanihero napheelaka paahi wiitthuciha ipontu yuulupale. Khweeliini, hi ninaapheela ucuwela wiitthuciha ratta kahi wiira nooniye ukhala atthu oocuwelaca, masi wiira naakavihere atthu enci upanka mphantte waamuci ootteeliya a Yehova.
19. Ninhala uthoonyera cani wiira ninaawoona ukhalana ifayita amuciihu oominepani?
19 Ninawaamini wiira hi khanirina iparakha yaarinaawe Tiyaku yookhalana nyeenyeehu oohipahuwa. Masi hi nihaana iparakha yonswalela Yehova nkhayi ni naamuciihu oominepani: mayamunneehu ni mayanuunwiihu makristau. Hiiva ninthoonyera wiira ninaawoona ukhalana ifayita mayamunneehu nathukumanaka naayo mmikutthaanoni cihu, navirihaka ukati nkhayi naayo, nawiitthuceraka ni nalalyeeraka nkhayi naayo. Neekurumicaka untakiha Tiyaku, ninaahala unttitthimiha Yehova ni ninaahala waakavihera atthu arina nrima womaana wiitthuca ikhweeli cawe.
NCIPO 114 Sê Paciente
^ par. 5 Tiyaku ni Yesu yuunuwacile yakhalacaka inupa imoca. Phimaana, Tiyaku aanancuwela saana mwaana a Nluku waavikana atthu akhwaawe yaakhala ule ukatyuule. Nhina ula mwahoola, ninaahala woona citthu Tiyaku ciitthucihalyaawe ni mananna caakavihenryaawe nloko no makristau noopacera nlattu wookhala nlopwana owiiyeviha.
^ par. 1 Nhina ula mwahoola, nimmuuluma Tiyaku khampa mwanhimaawe Yesu. Masi khweeliini uyo aari mwanhimaawe wuumaamani paasi. Tiyaku ciicammo phantikhile ilivuru yo mbiiblyani ineehaneliya ncina nawe.
^ par. 2 Nathan H. Knorr yaari amunna yaapanka mphantte Mphwinko wo Mahumu Unhoolela. Ayo akhwile mwaakha wo 1977.
^ par. 11 Tiyaku 5:13 Haavo ntthu nohuva iriyariinyu? Wakhala wiira haavo, hihiye ulompa. Haavo tteeliye nrima? Paahi, eepe icipo cosaalimu. 14 Haavo nowerennya iriyariinyu? Awiihane mahumu o wanlokoni wiira ayo anlompele ni anttikitthele makhura mwancina na Yehova. 15 Vano nivekelo ninthoonyera waamini ninaahala unvoniha ule nowerennya, ni Yehova naahala unwusa. Ciicammo, wakhala wiira hovara matampi, naahala uleveleliya.
^ par. 13 Tiyaku 3:2 Kontha otheene cihu ninaatthekaka imaara cinci. Ntthu aahitthekeke ni moolumacero khanle nlopwana oohipahuwa, ni naakhitiri weettihera ratta urutthwaawe.
^ par. 15 Tiyaku 3:2 Kontha otheene cihu ninaatthekaka imaara cinci. Ntthu aahitthekeke ni moolumacero khanle nlopwana oohipahuwa, ni naakhitiri weettihera ratta urutthwaawe. 3 Nahelaka iyuuma wamalakuni okhavalu wiira ciniiwelele, ninaakhitiri ciicammo weettiha irutthwaaya yotheene. 4 Nwuupuwele apaketi: hataa yakhalaka oolupale ni hataa yasoviyaka niiphyoo cuulupale, aneettihiya ninsikano mwankaani, ni anaarweehiya nipuro nimpheelaawe ule nweettiha. 5 Inanna imocaaru, nlimi nikhanle mphantte mwankaani wo mwiirutthuni, masi ninawiittottopa nlattu woopanka citthu cuulupale. Mooro vakaani paahi pooti upaha itakhwa yuulupale! 6 Nlimi nihu phiryaaya ciicammo; niri toko mooro. Nhina miphantte cotheene co mwiirutthuni, nlimi phicaranne citthu cootakhala, ukhala wiira ninaapahula irutthu ni pooti upaha ukumi wotheene. Moorwaaya unkhuma nhina Iceena. 10 Malaku mamoca anaakumiha moolumo oovaha iparakha ni moolumo olaphakaca. Miyamunna, khawaareera wiira nnya citthunnya cikhale co. 11 Nhopaca woona waluusi yakhumaka maaci oociva ni maaci oowaawa nipuro nimoca nenno? 12 Miyamunna, nhopaca woona mwiri wo fiiku wiimaka mihokorokho co olivera, awula nhopaca woona mwiri wo uva wiimaka ifiiku? Inanna imocaaru, iluusi yo maaci oowaawa khinkhuma maaci oociva.
^ par. 17 Tiyaku 1:22 Masi, nkhale atthu oweettela nuulumo, ni nhikhale atthu owiiwa paasi, mwiithepyaka ni moopuwelelo owoothiya. 23 Kontha ntthu noviriyana nuulumo na Nluku, masi hineettela, nolikanaca ni nlopwana noweha ikhovyaawe waloolani. 24 Kontha uyo nawiira wiiweha nuurwaa, ni woohipica uyo nawiiliyala mananna ciryaawe. 25 Masi ule nosoma ratta-raatta nlamulo noohipahuwa nimphwanyiha utaphuwa, ni novaresesa nno nlamulonno, khankhala toko ule neewa ni naakuva uliyala itthu yiiwalyaawe, masi nokhala ntthu novarela nteko; ni uyo naahala ukhala ootteeliya niitthu impankaawe.
^ par. 65 ILATARATO: Tiyaku aholattaniha nimooro vakaani mananna cinoopihaaya uvarela nteko pusya nlimi.
