MWAHA WOOSOMIYA 4
Nlattuni nihinhiyeehu wuupuwelela ukhwa wa Yesu Kristu?
“Nhihiyerere upanka ila nkuupuwelelaka.”—LUKA 22:19.
NCIPO 20 Yehova honivaha mwanawe
NINHALA WIITTHUCANI? *
1-2. a) Nihukuni nintepeehu umuupuwela ntthu khwile? b) Isiyani Yesu yaawiirenlyaawe attharyaawe?
WAKHALAKA wiira ntthu anfenteenyu hokhwa, nyuuva nnaacuwela wiira unaarika unliyala uyo ntthuuyo, hataa uviraka ukati mwinci. Khula mwaakha, naphiyaka nihuku naakhwilyaawe, nyuuva atthunaka nnaamuupuwela cinene.
2 Khula mwaakha, naphiyaka nihuku Yesu naakhwilyaawe, atthu enci ntuninyani motheene anaathukumana wiira yuupuwele nno nihukunno. (1 Pet. 1:8) Otheene cihu ninaacuwela iparakha cinweherereehu wahoolo nlattu Yesu wooleva ukumyaawe wiira anoopole muukhwani ni wiira nileveleliye matampiihu. (Mat. 20:28) Ni Yesu nopheela wiira attharyaawe yuupuwelele ukhwa wawe. Uhiyu wawe woomalela hineeviya, Yesu ahothoonyera iyo itthwiiyo ukati wenryaawe co: “Nhihiyerere upanka ila nkuupuwelelaka.”—Luka 22:19.
3. Isiyani inhaleehu wiitthuca nhina ula mwahoola?
3 Nhina atthu otheene anoopuwelela ukhwa wa Yesu khula mwaakha, khayincivile ale anweherera urwaa ukhala wiirimu. Enci anoopuwelela ukhwa wawe anweherera uphwanya ukumi woohimala watuninyani. Nhina ula mwahoola, ninaahala woona nlattuni ninlamuliyeehu wuupuwelela ukhwa wa Yesu Kristu, hataa niwehereraka urwaa ukhala wiirimu awula watuninyani. Ciicammo, ninaahala woona ifayitani imphwanyeehu noopuwelelaka ukhwa wa Yesu Kristu. Vano nttwee nipacere woona nlattuni makristau oothanliya unlamuliyaaya ukhala wanuupuweleloni a nookhwa a Yesu Kristu.
KONTHA ISIYANI MAKRISTAU OOTHANLIYA ANAWUUPUWELELA UKHWA WA YESU KRISTU?
4. Nlattuni makristau oothanliya unkhuuraaya iphaawu ni unwuryaaya iviinyu wanuupuweleloni?
4 Makristau oothanliya anawuupuwelela ukhwa wa Yesu Kristu khula mwaakha. Ayo phinkhuura iphaawu ni phinwurya iviinyu cintthenkaciya wanuupuweleloni. Masi nlattuni unkhuuraaya iphaawu ni unwuryaaya iviinyu wanuupuweleloni? Wiira nicuwele, nihaana nuupuwelaka itthu yeerannyeele uhiyu woomalela wa Yesu watuninyani. Yesu nkhayi naattharyaawe yahopanka isukuhuulu ya ayuuta yeehaniya Paasikuwa. Umaliha waya iyo isukuhuulwiiyo, Yesu ahopaceriha upanka nkutthaano woyoolya yoohiyu ya Apwiiya, uneehaneehu ilelo Nuupuwelelo na nookhwa a Yesu Kristu. Uyo ukatyuuyo, Yesu ahaavaha iphaawu ni iviinyu maapostolu ookhuluvelya 11 ni ahowiirela wiira akhuure iphaawu ni awurye iviinyu yaavahilyaawe. Ciicammo, Yesu ahaahimyeera maleehano meeli—nleehano nonaanaano ni nleehano no wuumweneni. * (Luka 22:19, 20, 28-30) Nlattu wo ayo maleehano meelyaayo, maapostolu ni makristau vakaani oothanliya ni Nluku anaahala ukhala mamwene ni anankuttho wiirimu. (Apoka. 5:10; 14:1) Makristau oothanliya ahanle watuninyani paahi phinkhuura iphaawu ni phinwurya iviinyu wanuupuweleloni, kontha ayo anaapanka mphantte nhina maleehano meeli Yesu yaahimenryaawe attharyaawe.
5. Iparakhani cinwehereraaya makristau oothanliya, ni isiyani inlamuliyaaya upanka wiira yaakhele nnyo iparakhannyo?
5 Masi ihaavo itthu ikhwaawe inwiiriha makristau oothanliya ulemeliha Nuupuwelelo. Ukati wo wuupuwelela ukhwa wa Yesu Kristu unkhala ukati makristau oothanliya unoopuwelaaya cinene iparakha cinwehereraaya wahoolo. Yehova haakhuluveliha iparakha yookhalana ukumi woohimala wiirimu yavaraka nteko ni Yesu ni nkhayi ni makristau oothanliya akhwaawe. Ni anaaweherera iparakha ikhwaawe yookhala nkhayi ni Yehova Nluku! (1 Akor. 15:51-53; 1 Jo. 3:2) Makristau oothanliya anaacuwela wiira yapheelaka uphwanya nnyo iparakhannyo, ahaana yahihiyaka umwiiwelela Yehova mpaka wankhwaaya. (2 Tim. 4:7, 8) Makristau oothanliya anaakhala ootteeliya cinene nlattu wo wuupuwela niweherero nirinaaya. (Titu 2:13) Vano “ikhontwaa cikiina”, nlattuni unlamuliyaaya wuupuwelela ukhwa wa Yesu Kristu?—Joau 10:16.
KONTHA ISIYANI IKHONTWAA CIKIINA CINAWUUPUWELELA UKHWA WA YESU KRISTU?
6. Nlattuni ikhontwaa cikiina unoopuwelelaaya ukhwa wa Yesu Kristu khula mwaakha?
6 Ikhontwaa cikiina, awula makristau anweherera ukhala watuninyani anawuupuwelela ukhwa wa Yesu Kristu, masi khankhuura iphaawu ni khanwurya iviinyu. Ayo unawaatteela nrima nlattu paahi wo woona Nuupuwelelo. Ikwaha yoopacera atthu anweherera ukhala watuninyani yaalattuliyaaya woona Nuupuwelelo waari mwaakha wo 1938. Irevista Ukhalenla 1 yo Março yo 1938, yaheera co: “Ale akhanle ikhontwaa cikiina ahaana isariya yo woona uyo nkutthaanooyo upankiyaka . . . Uyo uhaana ukhalaka ukati ayova ciicammo untteeliyaaya nrima.” Ale akhanle ikhurupu yokhontwaa cikiina unawaatteela nrima nlattu wo woona Nuupuwelelo na nookhwa a Yesu, khampa ntthu cinkhalaawe ootteeliya nrima nlattu wo woona ifesta yokacamentu, hataa ukhalaka wiira uyo kahi phinthela.
7. Kontha isiyani makristau ari nhina ikhurupu yokhontwaa cikiina unawaacivela uviriyana mwaha wo Nuupuwelelo?
7 Makristau ari ikhurupu yokhontwaa cikiina ciicammo unawaacivela wuupuwela cinene iparakha cinwehereraaya wahoolo. Ayo unawaacivela uviriyana mwaha wo Nuupuwelelo. Uyo mwahooyo unawuuluma itthu Yesu nkhayi ni makristau 144.000 inhalaawe waapankela atthu otheene ntuninyani ukati unhalaawe ukhala myaakha 1.000 alamulelaka ituninya. Yesu Kristu wamoca ni makristau oothanliya anaahala ukhaliha ituninya ipeephoni ni anaahala umaliha upahuwa wa apinaatamu. Atthu enci anoona Nuupuwelelo unawaattela nrima yoopuwelaka mananna cinhalaaya ukhala makhalelo watuninyani ceerannyaaka inatiri cimphwanyannya nhina Isaiya 35:5, 6; 65:21-23; ni Apokalipise 21:3, 4. Itthu inhala unikavihera ulipihaca nweherero urineehu ni ulakela wihu uhihiya unswalela Yehova, ukhanle wuupuwela mananna cinhaleehu ukhala wapeephoni wamoca naasimuciihu ni asipatthaniihu.—Mat. 24:13; Akalas. 6:9.
8. Isiyani-tho inwiiriha makristau ari ikhurupu yokhontwaa cikiina woona Nuupuwelelo?
8 Itthu ikhwaawe inwiiriha makristau ari ikhurupu yokhontwaa cikiina wuupuwelela ukhwa wa Yesu, ukhalaka wiira ayo ampheela uthoonyera wiira anawaafenta ni anawaakavihera makristau oothanliya. Ibiiblya yahohimya wiira makristau oothanliya ni makristau okhurupu yokhotwaa cikiina yanhala uvara nteko nkhayi. Nttwee noopele mwaha inatiri tthaaru.
9. Inatiri imphwanyannya nhina Zakariya 8:23 inthoonyera cani mananna makristau okhurupu yokhontwaa cikiina cinaawaceraaya makristau oothanliya?
9 Nsome Zakariya 8:23. * Iyo inatiriiyo inaathoonyera ratta-raatta mananna makristau okhurupu yokhontwaa cikiina cinaawaceraaya mayamunnaaya ni mayanuunwaaya akhanle makristau oothanliya. Moolumo “nyuuta” ni “nyuuvaca” anaaca ikhurupu yo makristau oothanliya ahanle watuninyani. (Aroo. 2:28, 29) “Alopwana khuumi oluuka cotheene co khula ilapo” anaaciya makristau okhurupu yokhontwaa cikiina. Ayo ‘anawaavarelela niikuru cinene’ awula anawaavaresesa makristau oothanliya, ni ananswalela Yehova nkhayi naayo. Phimaana, ayo anawiikurumica wiira yoone nkutthaano unoopuweleliya ukhwa wa Yesu. Coo, anaathoonyera wiira anawaakavihera makristau oothanliya ninrimaaya wotheene.
10. Manannani Yehova cineerannyeehaawe inatiri iri nhina Ezekiyeli 37:15-19, 24, 25?
10 Nsome Ezekiyeli 37:15-19, 24, 25. * Yehova nawiirannyeeha itthu inhimyaaya iyo inatiriiyo. Uyo nawaapankiha makristau oothanliya wiiwanana ni uvara nteko nkhayi ni makristau okhurupu yokhontwaa cikiina. Iyo inatiriiyo inawuuluma ikopo piili. Ale anweherera uphwanya ukumi woohimala wiirimu phikhanle ikopo “ya Yuuta” (ukhala wiira nloko na Yuuta phaarina mamwene oothanliya ni Yehova). Ni ale anweherera uphwanya ukumi woohimala watuninyani phikhanle ikopo “ya Efraim.” * Yehova anhala ukumaniha nnyo ikhurupu piilinnyo wiira cikhale “ikopo imoca.” Maanaaya wiira nnyo ikhurupu piilinnyo cinvara nteko nkhayi camwiiwelelaka mwennyaaya, Yesu Kristu. Iyo phi itthu inooneehu yiirannyaaka khula mwaakha. Makristau oothanliya ni makristau okhurupu yokhontwaa cikiina anoonaka nkhayi Nuupuwelelo, kahi khampa ikhurupu piili coovirikana masi khampa “nikhotto nimoca, ninhooleliya ni makampuci mmoca.”—Joau 10:16.
11. Ale aneehaniya “ikhontwaa” nhina Matewus 25:31-36, 40, anlamuliya waakavihera cani mayamunnaawe Kristu?
11 Nsome Matewus 25:31-36, 40. * Phaapani akhanle “ikhontwaa” cinoolumiya nhina nnyo iveerusunnyo? Akhanle atthu aneettela isariya ankhala ukati wo mahuku ookhicera ni anweherera ukhalana ukumi woohimala watuninyani. Yesu ciicammo howiihana ayo atthwaayo “ikhontwaa cikiina.” Ayo atthwaayo ahaana nrintti muulupale wowaakavihera makristau oothanliya nanlelo ari watuninyani. Ayo anaakavihera yeekurumicaka uvara nteko woolalya ihapari comaana ni waapanka eetthuci atthu otheene.—Mat. 24:14; 28:19, 20.
12-13. Manannani makhwaawe makristau okhurupu yokhontwaa cikiina anaakaviheraaya mayamunnaawe Kristu?
12 Khula mwaakha, cahaleelaka isumana vakaani wiira nuupuwelele ukhwa wa Yesu, inawiirannyaaka itthu yooreera. Mayamunna okhurupu yokhontwaa cikiina anawaakavihera makristau oothanliya uvara nteko woolalyeera ntuninyani motheene yaalattulaka atthu wiira yowoone Nuupuwelelo. (Nwehe ikwaaturu “ Nheetthenkaca wiira muupuwelele ukhwa wa Yesu?”) Makristau okhurupu yokhontwaa cikiina ciicammo anaakavihera utthenkaca nkutthaano wo wuupuweleliya ukhwa wa Yesu mmalokoni uryaaya, hataa ukhalaka wiira ayo malokwaayo khaavo makristau oothanliya. Ayo anoona ukhala iparakha yuulupale waakavihera mayamunnaawe Kristu ayo manannaayo. Makristau okhurupu yokhontwaa cikiina anaacuwela wiira khula itthu impankaaya wiira yakavihere makristau oothanliya, Yesu nowehera khampa wiira anompankela uyova.—Mat. 25:37-40.
13 Citthuni-tho cikhwaawe cinlamuliya uniiriha otheene cihu woona nkutthaano wo wuupuweleliya ukhwa wa Yesu, hataa ukhalaka wiira ninweherera ukhalana ukumi woohimala wiirimu awula watuninyani?
KONTHA ISIYANI OTHEENE NIHAANA NOONAKA NKUTTHAANO WO WUUPUWELELIYA UKHWA WA YESU
14. Manannani Yehova ni Yesu cithoonyenryaaya wiira anaanifenta?
14Woona nkutthaano wo wuupuweleliya ukhwa wa Yesu ankhala mananna oothoonyera wiira ninansukhuru Yehova ni Yesu. Yehova honipankela citthu cinci coothoonyera wiira naanifenta. Masi ihaavo itthu yuulupale inipankenlyaawe. Nlattu woonifenta, Yehova honveleeliha mwanawe wiira ahuve ni akhwe nlattu wawihu. (Joau 3:16) Hiiva ciicammo ninansukhuru Yesu Kristu. Khaavo ankhanyererihile Yesu uvaha ukumyaawe wiira anoopole. Masi uyo vahile nlattu woonifenta. (Joau 15:13) Hiiva khaninhala ukhitiri unliva Yesu ni Yehova nlattu wo mananna cinifentilyaaya. Masi hiiva pooti uthoonyera nhina citthu cimpankeehu wiira ninawaasukhuru. (Akol. 3:15) Phimaana, nineekurumiceehu woona nkutthaano wo wuupuweleliya ukhwa wa Yesu. Uyo nkutthaanooyo unaanikavihera wuupuwela mananna Yehova ni Yesu cinifentilyaaya ni noonaka uyo nkutthaanooyo ninaathoonyera wiira hiiva ciicammo ninawaafenta.
15. Manannani woopoliya wihu cinaaphwanyihaaya ifayita makristau oothanliya ni ikhontwaa cikiina?
15Hiiva ninaavaha ifayita cinene woopoliya wihu. (Mat. 20:28) Woopoliya wihu unawaaphwanyiha ifayita cinene makristau oothanliya kontha phinkhitiriha waaphwanyiha nweherero wookhalana ukumi woohimala wiirimu. Makristau oothanliya yaaminiki wiivaherera wa Yesu wiira anoopole, Yehova naawoona ukhala atthu osariya ni naawaakhelela khampa asaanaawe. (Aroo. 5:1; 8:15-17, 23) Woopoliya wihu ciicammo unawaaphwanyiha ifayita makristau okhurupu yokhontwaa cikiina. Ayo yaaminiki wiivaherera wa Yesu wiira anoopole, Yehova naawoona ukhala atthu ooreera, naatthuna uswali waya ni ayo anaaweherera woopwa ukati wo “masakha moolupalse.” (Apoka. 7:13-15) Phimaana, hataa ukhalaka wiira nyuuva nnoweherera ukhalana ukumi woohimala wiirimu awula watuninyani, nyuuva pooti uthoonyera wiira nnaavaha ifayita cinene woopoliya wihu moonaka nkutthaano wo wuupuweleliya ukhwa wa Yesu Kristu khula mwaakha.
16. Isiyani-tho inniiriha woona nkutthaano wo wuupweleliya ukhwa wa Yesu Kristu?
16 Itthu ikhwaawe inniiriha woona nkutthaano wo wuupuweleliya ukhwa wa Yesu ukhanle umpheela umwiiwelela Yesu. Otheene cihu nimpheela wiiwelela nrumo Yesu nivahilyaawe, hataa niwehereraka uphwanya ukumi woohimala wiirimu awula watuninyani. Uhiyu wawe woomalela, Yesu aheera: “Nhihiyerere upanka ila nkuupuwelelaka.”—1 Akor. 11:23, 24.
WUUPUWELELA UKHWA WA YESU UNNIPHWANYIHA IFAYITANI?
17. Manannani wuupuwelela ukhwa wa Yesu cinlipihacaaya upatthaniihu ni Yehova?
17Ninaatepa ulipihaca upatthaniihu ni Yehova. (Tiya. 4:8) Khampa conneehu, wuupuwelela ukhwa wa Yesu unaaniiriha wuupuwela nweherero Yehova univahilyaawe ni mananna cinifentalyaawe. (Jer. 29:11; 1 Jo. 4:8-10) Ni noopuwelaka nnyo citthunnyo ninaatepa unfenta Yehova ni upatthaniihu nuuyo unaatepa ukhala woolipa.—Aroo. 8:38, 39.
18. Wuupuwela makhalelo a Yesu unaanikavihera ulakela upanka isiyani?
18Ninaatepa ulakela untakiha Yesu. (1 Pet. 2:21) Wiira nitthenkace nrimeehu nihinaphiya nihuku no Nuupuwelelo, ninaasomaka mbiiblyani citthu ceerannyeele mahuku oomalela a Yesu watuninyani. Vano mwaha untaphuleliyaka wankutthaanoni unoopuweleliya ukhwa wa Yesu unaanikavihera wuupuwela mananna Yesu cinifentalyaawe. (Efesu 5:2; 1 Jo. 3:16) Nasomaka ni noopuwelaka citthu caamwiirannyenle Yesu, ninaatepa ulakela ‘utthara meettelwaawe.’—1 Jo. 2:6.
19. Isiyani inlamuliyeehu upanka wiira upatthaniihu ni Yehova uvire utepaka ulipa?
19Ninaatepa ulakela uhihiya ukhala apatthani a Yehova. (Yuda 20, 21) Upatthaniihu ni Yehova unaatepa ukhala woolipa namwiiwelelaka, neekurumicaka uttitthimiha ncina nawe ni nantteelihaka nrima. (Miru. 27:11; Mat. 6:9; 1 Jo. 5:3) Woona nkutthaano wo wuupuweleliya ukhwa wa Yesu unaanikavihera ulakela uthoonyera meettelo anoncivela Yehova. Napankaka iyo, unkhala khampa nimmwiirela Yehova co: ‘Mi akimpheela uhiya wuuswalelani Pwiiya!’
20. Isiyani inniiriha woona nkutthaano wo wuupuweleliya ukhwa wa Yesu Kristu?
20 Hataa niwehereraka ukhalana ukumi woohimala wiirimu awula watuninyani, otheene cihu nihaana noonaka nkutthaano wo wuupuweliya ukhwa wa Yesu Kristu. Nihuku no Nuupuwelelo, hiiva ninawuupuwela ukhwa wa ntthu nonfenteehu cinene, Yesu Kristu. Ciicammo, ninawuupuwela inanna Yehova cinifentilyaawe unveleeliha wawe mwanawe wiira anoopole. Nno nifentonno khaavo ntthu nkhawaawe aahala ukhitiri unithoonyihera. Nantano, ukhwa wa Yesu Kristu unhala wuupuweleliya uhiyu wo Icumaa, nihuku 15 mweeri wo Abril wo 2022. Hi ninanfenta cinene Yehova. Phimaana, khiivo itthu ikhwaawe inooneehu utepa ukhalana ifayita uvikana nkutthaano wo wuupuweleliya ukhwa wa Yesu Kristu.
NCIPO 16 Jeová Escolheu o Nosso Rei
^ par. 5 Ninoona ukhala iparakha yuulupale wuupuwelela ukhwa wa Yesu Kristu, hataa niwehereraka urwaa ukhalana ukumi woohimala wiirimu awula watuninyani. Nhina ula mwahoona ninaahala woona mbiiblyani nlattuni ninlamuliyeehu wuupuwelela ukhwa wa Yesu Kristu ni ninaahala wiitthuca ifayitani cimphwanyeehu noopuwelelaka ukhwa wawe.
^ par. 4 Mwapheela ucuwela nleehano nonaanaano ni nleehano no wuumweneni isiyani, nwehe mwaha uneera “Vocês se tornarão ‘um reino de sacerdotes’” nhina irevista Ukhalenla yo 15 yo Outubro yo 2014, ipaagina 15 mpaka 17.
^ par. 9 Zakariya 8:23 Yehova aatoropa eenre co: “Mahuku yaale, alopwana khuumi oluuka cotheene co khula ilapo anaahala uvarelela niikuru cinene, iyee, anaahala uvarelela niikuru cinene nlempe nohancu ya nlopwana nyuuta, yiiraka: ‘Nimpheela urwaa nkhayi ni nyuuvaca, kontha niheewa wiira Nluku ri ni nyuuva.’”
^ par. 10 Ezekiyeli 37:15 Kahaakhela-tho nuulumo na Yehova, neera co: 16 “Mwaana a pinaatamu, ucise ikopo ni wantikhe iyo ikopweeyo co: ‘Ya Yuuta ni yaapoovu o Isarayeli ari nkhayi nuuyo.’ Ciicammo, ucise ikopo ikhwaawe ni wantikhe co: ‘Ya Yusufu — ikopo ya Efraim — ni yaatthu otheene o nloko no Isarayeli ari nkhayi nuuyo.’ 17 Vano, ukumanihe ikopo coopiili wiira cikhale ikopo imoca paahi mmatatani waa. 18 Apoovwaa yookohaka, yiiraka: ‘Khunhala unihimyera nnya citthunnya maanaaya isiyani?’, 19 uwaakhule co: ‘Cole phineeraawe Nkhulupale Pwiiya Yehova: Kinaahala ucisa ikopo ya Yusufu iri mmatatani wa Efraim ni iri mmatatani wo maloko o Isarayeli ari wamoca nuuyo, ni kinaahala ukumaniha niikopo ya Yuuta, wiira kikhalihe ikopo imoca; ayo anhala ukhala ikopo imoca mmatatani waka.’” 24 Nswalyaaka Davidi phinhala ukhala mwennyaaya, ni otheene anhala ukhalana makampuci mmoca. Ayo anaahala weettela malamulwaaka ni anaahala wiiwelela marumwaaka. 25 Anhala ukhala nlaponi invahilyaaka nswalyaaka Yakopi, ilapo ikhanlyaaya anhiyataateenyu. Anhala ukhala iyo ilapweeyo mahuku otheene, wamoca naasaanaaya ni asiculaya; ni nswalyaaka Davidi phinhala ukhala nhoolelyaaya mpaka.
^ par. 10 Mwapheela wiiweeha inatiri ya Ezekiyeli inooluma ikopo piili, nwehe ilivuru A Adoração Pura de Jeová É Restaurada! ipaagina 130 mpaka 135, iparaagarafu 3 mpaka 17.
^ par. 11 Matewus 25:31 Mwaana a Pinaatamu wanhalaawe uwa nuuttitthima wawe, wamoca ni malayikha otheene, naahala wonkoma wahiceni wawe yoottitthima. 32 Ni atthu olapo cotheene anaahala uthukumanihiya uhoolo wawe, ni uyova naahala uwaawanyaniha khampa makampuci cinaawanyanihaawe ikhontwaa ni ipuri. 33 Ni naahala weesa ikhontwaa moono wonlopwana, masi ipuri moono wonthiyana. 34 Vano Mwennyooyo naahala uwiirela ale anhala ukhala moonwaawe wonlopwana: “Nwaace, nyuuva ncaalihiye ni Apaapa, ni mwaakhele Umwene utthenkaceriyeenyu yumpiyeru ituninya. 35 Kontha yahokivola itala, masi nyuuva mwahokivaha iyoolya; nahokivola ntthona, masi nyuuva mwahokivaha maaci wiira kiwurye. Mi kaari mmalaponi, masi nyuuva mwahokaakhelela saana; 36 kahothaaleliya, masi nyuuva mwahokiwariha. Kahowerennya, masi nyuuva mwahokiwacera saana. Mi kaari nkhattya, masi nyuuva mwahokootola.” 40 Mwene nohala uwaakhula co: “Kinoohimyeerani ikhweeli: Itthu mumpankenleenyu khula munnaaka mwankaani, ni miiva nhokipankela yeeyo itthwiiyo.”
