Cihaavo citthu cinthoonyera wiira Yesu khanle nankuttho muulupale mwaakha wo 29, ukati waapattisiyaawe. Nincuwela cani iyo? Nincuwela iyo kontha ukati Yesu waapattisiyaawe, phuukati weevaherenryaawe khampa itthuvo wakhilompini; iyo ikhilompiiyo inthoonyera itthu ‘impheelaawe’ Nluku. Iyo maanaaya wiira ukati Yesu waapattisiyaawe, uyo aheevaherera upanka itthu impheelaaya Athumwaane, awula uvaha ukumyaawe wiira awoopole apinaatamu. (Akalas. 1:4; Mabere. 10:5-10) Iyo ikhilompiiyo ikhumelenle ukati Yesu waapattisiyaawe. Khalayi, ikhilompi yaari itthu yahaalamuliya uhaleela ntempulu. Phimaana, pooti waneereehu wiira itempulu yuulupale yoominepani ciicammo ipacenre ukati waapattisiyaawe Yesu. Iyo itempulwiiyo cikhanle citthu cotheene Yehova cimpankaawe nlattu wo wiivaherera wa Yesu wiira atthu answalele ni mananna ooloka.—Mat. 3:16, 17; Mabere. 5:4-6.

Toko khalayi itempulu caalamuliyaaya ukhalana nankuttho, itempulu yuulupale yoominepani ciicammo ihaana ikhalanaka nankuttho. Wiira ikhitirye iyo, Yesu hothanliya ni Yehova “ni nnepa wowaarya ni niikuru.” (Mite. 10:37, 38; Mark. 1:9-11) Masi nincuwela cani wiira Yesu thanliye ukhala nankuttho muulupale ukati waapattisiyaawe, hinaaya ukhwa ni hinaaya wunwelelihiya? Itthu inhala unikavihera waakhula nna nikohonna, ukhanle wuupuwela ntakihero na Arawu ni anankuttho oolupale akiina.

Nlamulo na Moocesi naahimya wiira nankuttho muulupale ahaana apacaka ukela Nipuro Nowaarya ntabernaakuluni; ni wahoolo, uyo ciicammo ahaana akelaka Nipuro Nootepa Waarya. Yahaavo ikuwo yaakawaniha Nipuro Nowaarya ni Nipuro Nootepa Waarya. Nankuttho muulupale aahula iyo ikuweeyo wiira akele Nipuro Nootepa Waarya nihuku nimoca paahi, Nihuku Noolepela Uleveleliya. (Mabere. 9:1-3, 6, 7) Arawu ni alopwana ookhuluvelya akiina yaapaca uthanliya wiira akhale anankuttho oolupale, vano phaahalaawe ‘uhula ikuwo’ wiira akele Nipuro Nootepa Waarya. Inanna imoca, Yesu pacale ukhala nankuttho muulupale, vano phaahalaawe ‘uhula ikuwo, awula irutthwaawe’ wiira akele wiirimu. Irutthu yeepinaatamu ya Yesu yaari toko nttiyelelo, awula ikuwo. Wiira aakhele ukumi wiirimu, Yesu ahaana apacaka ukhalihiya nankuttho muulupale. (Mabere. 10:20) Phimaana, apostolu Paulu, amwaacaka Yesu, aheera co: “Khampa nankuttho muulupale . . . uyo hokela nheemani muulupale ni oohipahuwa, hipankiye ni matata aapinaatamu,” awula “hokela wiirimu.”—Mabere. 9:11, 24.

Ukatini Nluku waaminnyaawe nleehano no naanaano wiira nancere uvareliya nteko? Ukati Yesu waarwaalyaawe wiirimu wiithoonya uhoolo wa Nluku wiira hovaherera ukumyaawe, uyo ahopanka itthu yoopacera wiira nleehano no naanaano naaminiye. Nnyo citthu tthaarunnyo ciicammo phikhitirihale wiira nleehano no naanaano nancere uvareliya nteko. Masi aapanke citthuni?

Yoopacera, Yesu aheethoonya uhoolo wa Yehova. Yonayeeli, Yesu ahonthoonyera Yehova wiivaherera wawe. Yoneeraru, Yehova ahotthuna wiivaherera wa Yesu. Cihinaaya wiirannya nnya citthu tthaarunnya, nleehano no naanaano naari nihinancera uvareliya nteko.

Ibiiblya khinhimyeeha ukati Yehova waatthunalyaawe wiivaherera wa Yesu. Phimaana, khaninkhitiri ucuwela nihuku nleehano no naanaano nancenryaaya uvareliya nteko. Masi ninaacuwela wiira Yesu ahoturuwela wiirimu yahaleelaka mahuku khuumi nihinaphiya nihuku no Pentekositi. (Mite. 1:3) Uyo ukatyuuyo, Yesu aheethoonya wa Yehova wiira uyo atthune wiivaherera wawe, ni Yehova ahotthuna. (Mabere. 9:12) Itthu yowoonnya yaathoonyenre iyo phiile yiirannyaale nihuku no Pentekositi, mwaakha wo 33. (Mite. 2:1-4, 32, 33) Khweeliini, nleehano no naanaano nahancera uvareliya nteko.

Woohincivihaca, nleehano no naanaano nancerale uvareliya nteko ukati Yehova waatthunalyaawe wiivaherera wa Yesu. Uyo phuukati wancenryaaya uvareliya nteko nleenano no naanaano nitthenkaciye ni Nankuttho Muulupale, Yesu.—Mabere. 7:25; 8:1-3, 6; 9:13-15.