1. Itthuni innitteeliha nrima inttonkiya nhina 3 Joau 3, 4?

APOSTOLU Joau ahaakavihera atthu enci wiitthuca ikhweeli. Uyo aawehera ayo atthwaayo khampa asaanaawe. Hataa ukhalaka wiira yaanaakhumelela masankiho menci, ayo atthwaayo khayaahiile unswalela Yehova. Munnokhitiri wuupuwela mananna Joau cantteelalyaaya nrima nlattu woowoona yahihiyaka unswalela Yehova? Ilelo, hiiva ciicammo unaanitteela nrima nawoonaka asaaniihu, pooti ukhala asaaneehu yaayanreehu awula ale yaakavihenreehu wiitthuca ikhweeli—unaanitteela nrima nawoonaka yiivahereraka wa Yehova ni yahihiyaka unswalela.—Nsome 3 Joau 3, 4. *

2. Nlattuni Joau wantikhalyaawe iwarakha tthaaru?

² Mwaakha 98, Joau atthunaka akhala wasittatti yo Efesu awula nipuro naattamenle iyo isittattiiyo. Uyo aathunaka aarwaale u Efesu utthukuliya wawe u Patmos. Ule ukatyuule, nnepa wowaarya wahonkurumica Joau wiira antikhe iwarakha tthaaru. Uyo antikhale nnyo iwarakhannyo kontha ahaana aalipihaka makristau wiira ahihiye umwaamini Yesu ni weettela ikhweeli.

3. Makohoni anhaleehu waakhula nhina ula mwahoola?

³ Joau phaari apostolu oomalela, maapostolu akiinaayo yahomala ukhwa. Apostolu Joau aakhala ni masukhuli nlattu waatthu yancenre wiitthuciha citthu cowoothiya mmalokoni. * (1 Jo. 2:18, 19, 26) Ayo atthwaayo yeera wiira yaanancuwela Nluku, masi khayeettela malamulwaawe. Nttwee noopele mwaha ikano Yehova canrumalyaawe Joau wantikha. Ni ukati ninoopeleehu mwaha, ninaahala waakhula  ala makoho mararwaala: Weettela ikhweele maanaaya isiyani? Citthuni cinnirikihela weettela ikhweeli? Isiyani ninlamuliyeehu upanka wiira nikaviherane uhihiya weettela ikhweeli?

4. Toko cinthoonyeraaya 1 Joau 2:3-6 ni 2 Joau 4, 6, isiyani ninlamuliyeehu upanka wiira neettele ikhweeli?

⁴ Napheelaka weettela ikhweeli, nihaana nicuwelaka ikhweeli ciri nnuulumoni na Nluku, Ibiiblya. Ciicammo, nihaana neettelaka malamulo a Yehova. (Nsome 1 Joau 2:3-6; * 2 Joau 4, 6. *) Yesu ahomwiiwelela Yehova sana-saana. Phimaana, inanna imoca yoomwiiwelela Yehova ukhanle wiikurumica cinene utakiha meettelo a Yesu.—Joau 8:29; 1 Pet. 2:21.

5. Isiyani ninlamuliyeehu ukupali?

⁵ Wiira nihihiye weettela ikhweeli, nihaana nikupaliki wiira Yehova phi Nluku eekhweeli ni wiira citthu cotheene cinhimyaawe nnuulumoni nawe, Ibiiblya, cikhanle ikhweeli. Ni nihaana nikupaliki wiira Yesu phinkhanle Mesiya. Atthu enci ilelo khanaamini wiira Yesu phithanliye ni Yehova wiira akhale mwene o Umwene wa Nluku. Joau ahohimya wiira yahaavo “atthu owootha enci” yaamananiha waahapusa ale yahaakupali cinene ikhweeli ca Yehova ni Yesu Kristu. (2 Jo. 7-11) Joau hantikha: “Tipani-tho khanle owootha, hikhanle ule nokhotta wiira Yesu khanle Kristu?” (1 Jo. 2:22) Itthu imoca inhala unikavihera uhithepiya ukhanle usoma Nuulumo na Nluku. Iyo phi itthu inhala unikavihera uncuwela Yehova ni Yesu. (Joau 17:3) Ni napankaka iyo phinhaleehu waamini wiira nihaana ikhweeli.

6. Isiyani yaahala uwiiriha amirawo uhiya weettela ikhweeli?

⁶ Makristau otheene, masi venci-venci amirawo khanlamuliya wiitthaala wiira ahithepiye ni moopuwelelo aapinaatamu. (1 Jo. 2:26) Alexia, * nrokorihu mmoca o França rina myaakha 25, neera: “Ukati waaryaaka ucikolani, mi kaanaakhala oorikarikiya ni citthu cineetthucihiya ntuninyani, toko ile yowiiriyeele wiira ukumi uphattuwacale veekha ni myaha cofilosofiya caasomihiyeehu. Myaha  cikiina caasomihiyeehu caanaakicivela. Masi mi koopuwela wiira kahaana kipacaka woona itthu Ibiiblya inhimyaaa, uhiya ukupali citthu cotheene ceetthucihiyaaka ucikolani.” Alexia ahosoma ilivuru A Vida — Qual a Sua Origem? A Evolução ou a Criação? Cihinavira isumana cinci, Alexia ahokhitiri uphwanya waakhuliya waya makoho otheene yaarinaawe. Uyo neera: “Kahoona ni kahokupali mwaaneennyaaka wiira itthu Ibiiblya inhimyaaya ikhanle ikhweeli. Ni kahocuwela wiira weettela itthu inhimyaaya Ibiiblya phinwaana utteeliya nrima ni nnema.”

7. Isiyani inlamuliyeehu ukhotta, ni nlattuni?

⁷ Makristau otheene, amirawo awula oolupale, khanlamuliya unswalela Yehova ni ukati yooyo upanka citthu cootakhala. Joau hohimyeeha wiira khaninlamuliya weettela ikhweeli, ni ukati yooyo upanka citthu coohinamaana. (1 Jo. 1:6) Wakhala wiira nimpheela untteeliha nrima Yehova ilelo ni wahoolo, nihaana nuupuwelaka wiira uyo nawoona citthu cotheene cimpankeehu. Khweeliini, khaavo matampi ahinooniya, kontha “citthu cotheene ciri woonene ni cinawoonnya uhoolo wa” Yehova.—Mabere. 4:13.

8. Isiyani ninlamuliyeehu ukhotta?

⁸ Nihaana nikhottaka mananna atthu o ntuninyani cinweheraaya itampi. Apostolu Joau hantikha: “Noolumaka neeraka: ‘Khaninatampi,’ ninawiithepya naasineeneehu.” (1 Jo. 1:8) Ukati wa Joau, yahaavo makristau yaahiile ikhweeli ni yaakhanle awanani. Ayo yeera wiira ntthu pooti uvara matampi imweeni ni nanlelo ukhala mpatthani a Nluku. Ilelo, ninkhala naatthu anoopuwela ala manannaala. Atthu enci ilelo aneera wiira anaamwaamini Nluku, masi khankupali itthu Nluku inhimyaawe nhina itampi, venci-venci nhina uraruwa. Itthu Yehova ineeraawe wiira phikhanle itampi, ayo atthwaayo aneera wiira akhanle meettelo khula ntthu nolamuliyaawe uthanla.

9. Ifayitani amirawo cinkhalanaaya yeekurumicaka weettela itthu incuwelaaya wiira phiri ikhweeli?

⁹ Venci-venci amirawo pooti wiicoona ukhanyererihiya uwehera itampi toko cinweheraaya atthu  anaasomanaaya awula anaavaranaaya nteko. Iyo phi itthu yankhumelenle Aleksandar. Uyo neera: “Asithiyana akiina yaasomanaaka yankikhanyereriha waarupana. Ukhala wiira khaavo mwanthiyana anthonkocaaka ucikola, ayo yaakootheriha wiira miiva kaathonkoca alopwana akhwaaka.” Inawuukhumelelani itthu toko iyo? Wakhala wiira inawuukhumelelani, nhiliyale wiira nnaahala waakhela iparakha cinci mwiikurumicaka weettela itthu incuweleenyu wiira phiri ikhweeli. Utthara itthu inhimyaaya Ibiiblya unawuukaviherani wiiwehera ratta, ukhalana ukumi womaana, uhiiwereehaca muru ni ukhalana upatthani womaana ni Yehova. Ni khula ukati unkhotteenyu upanka itthu yoohiloka, nnaatepa wiilipihaca wiira nkhotte mwakhanyererihiyaka ukati nkiina. Nhiliyale wiira mananna atthu o ntuninyani cinweheraaya uruparupa anonkhumakhuma Sotwani. Phimaana, khula ukati unkhotteenyu uraruwa, nyuuva ‘nnantthema Sotwani.’—1 Jo. 2:14.

10. 1 Joau 1:9 innikavihera cani unswalela Yehova ni nrima wootaphuwa?

¹⁰ Hiiva ninawaamini wiira Yehova phinomphwanela uhimya isiyani ikhanle itampi ni isiyani ihikhanle itampi. Ni ninawiikurumica wiira nihivare matampi. Masi wakhala wiira nihovara matampi, hiiva ninanlompa Yehova ni ninanhimyera itampiihu ninlepelaka unilevelela. (Nsome 1 Joau 1:9. *) Ni navaraka itampi yuulupale, hiiva ninaatotha ukaviheriya ni mahumu. Ayo athanliye ni Yehova wiira aniwacere. (Tiya. 5:14-16) Masi ciicammo, khaninlamuliya ukhala ooriipiya nrima nlattu wo matampi avinre. Kontha Apaapeehu onifento anvahale Mwanaya wiira anoopole mmatampini wihu. Ni Yehova eeraka wiira nanlevelela ntthu varale itampi, uyo khweeliini nanlevelela. Commo, hiiva pooti unswalela Yehova ni nrima wootaphuwa.—1 Jo. 2:1, 2, 12; 3:19, 20.

11. Isiyani ninlamuliyeehu upanka wiira nihithepiye ni citthu cinhala uloloviha waamini wihu?

 ¹¹ Nkhotte citthu cineetthucihaaya awanani. Ukhuma ukati wo makristau oopacera, Sotwani khanhiya umananiha uloloviha waamini waatthu ookhuluvelya anonswalela Nluku. Phimaana, nihaana nicuwelaka isiyani ikhanle ikhweeli ni isiyani ikhanle itthu yowoothiya. * Awananiihu anaavarela nteko interneti wiira anihiihe umwaamini Yehova ni waafenta mayamunneehu. Nhiliyale wiira citthu cowoothiya cotheenennyo cinonkhumakhuma Sotwani!—1 Jo. 4:1, 6; Apoka. 12:9.

12. Kontha isiyani nihaana nilipihacaka waamini wihu?

¹² Napheelaka wiira Sotwani hikhitiri unihiiha weettela ikhweeli, nihaana nilipihacaka umwaamini wihu Yesu ni ukhuluvela ukhulupale Yehova unvahacenryaawe Yesu wiira apanke impheelaawe. Ciicammo nihaana naakhuluvelaka ale Yehova yaavahacenryaawe uhoolela miteko cinvariya mumphwinkoni wawe. (Mat. 24:45-47) Hiiva ninhala wuncerera waamini wihu naahihiyeke usoma Nuulumo na Nluku. Napankaka iyo, waamini wihu unaahala ulipa khampa mwiri urina mitithari cookhomaala ni coowiisera. Iyo phi itthu Paulu yaakurumicalyaawe mayamunnaawe yaakhala u Kolosu: “Toko nyuuva cintthunaleenyu Yesu Kristu, Pwiiya, nhihiye weetta wamoca ni uyo, nkhalaka ookhomaalihiya ni oolipihiya ni uyo, ni oolipa nhina waamini.” (Akol. 2:6, 7) Nkristau eekurumicaka ulipihaca waamini wawe, Sotwani ni atthu anaahoolelaawe khanhala ukhitiri unhiiha uyo nkristauuyo weettela ikhweeli.—2 Jo. 8, 9.

13. Isiyani ninlamuliyeehu uweherera, ni nlattuni?

¹³ Hiiva nihaana niwehereraka ulupatthiya naatthu o ntuninyani. (1 Jo. 3:13) Joau naanuupusera wiira “ituninya yotheene iri mmatatani wa Ntakhali.” (1 Jo. 5:19) Ila ituninyeela ukati unviraaya yaattamelaka umwiiso, Sotwani naatepa urusiya. (Apoka. 12:12) Uyo khammananiha unihapusa vakaani-vakaani paahi, toko unitteha wiira niraruwe awula nihapusiye ni citthu cowoothiya cinoolumaaya awananiihu, masi uyo ciicammo naanilupattha venci. Sotwani naacuwela wiira unonhaleela ukati vakaani, phimaana naamananiha unihiiha ntekweehu woolalyeera ni uloloviha waamini wihu. Ukhala wiira ninaacuwela iyo, hiiva khanintuthuwa noonaka ntekweehu woolalyeera ukhottihiyaka niikuvernu colapo cinci. Hataa ukhalaka commo, mayamunneehu ni asirokorihu ankhala nnyo ilaponnyo nanlelo anaavilela. Uvilela waya unthoonyera wiira hataa “Ntakhali” aniwaanelaka masakhani, hiiva pooti ukhitiri untthema ni uhihiya weettela ikhweeli!

14. Manannani ninlamuliyeehu waakavihera mayamunneehu uhihiya weettela ikhweeli?

¹⁴ Wiira naakavihere mayamunneehu ni asirokorihu uhihiya weettela ikhweeli, nihaana nawoonelaka uthunku. (1 Jo. 3:10, 11, 16-18) Nihaana nifentanaka kahi paahi ukati unkhaleehu saana, masi ninlamuliya ufentana ciicammo ukati wo masankiho. Wootakihera, nyuuva nnaacuwela munna khweliye ni mpheela umaalihiya ni ukaviheriya? Muhiiwa wiira ahaavo mayamunna yaakhumelenle ihasara ni ampheela ukaviheriya uteka Isalau caya co Umwene ni inupa caya? Hiiva ninthoonyera wiira ninawaafenta ni ninaawoonela uthunku mayamunneehu ni asirokorihu kahi paahi ni citthu cinoolumeehu, masi ciicammo ni citthu cimpankeehu.

15. Toko cinthoonyeraaya 1 Joau 4:7, 8, isiyani ninlamuliyeehu upanka?

¹⁵ Nafentanaka, ninthoonyera wiira ninawaatakiha Apaapeehu o wiirimu, Yehova. (Nsome 1 Joau 4:7, 8. *) Inanna imoca yoothoonyera wiira ninawaafenta akhwiihu ukhanle ulevelelana. Wootakihera, ntthu anitthekelaka ni anilepelaka wiira ninlevelele, hiiva ninthoonyera wiira ninanfenta nanlevelelaka ni naliyalaka itthu inipankalyaawe. (Akol. 3:13) Munna mmoca neehaniya Aldo yahonkhumelela  iyo, ukati munna nkiina ankhuluvelaawe waawuulumalyaawe pusya atthu okhapila ya Aldo. Aldo neera: “Mi kaholompa ikwaha cinci kinlepelaka Yehova wiira akikavihere unwehera ratta ule munnoole.” Aldo ahopanka-tho itthu ikhwaawe. Uyo ahonlattula ule munnoole wiira akhumace nkhayi wuulalyeerani. Anari nkhayi wuulalyeerani, Aldo ahonhimyera ule munnoole mananna caakhanlyaawe ooriipiya nrima nlattu wo itthu yaakhumelenle. Aldo neera: “Uyo munnooyo ahokiviriyana ni ahokilepela nsammaha. Nlove nawe ukati woolumacaawe naathoonyera wiira ahottharuwa. Nahancera wiiwanana ni naholiyala itthu yaakhumelenle.”

16-17. Isiyani ninlamuliyeehu ulakela upanka?

¹⁶ Apostolu Joau anaafenta venci mayamunnaawe makristau ni ampheela cinene wiira ayo akhalane waamini woolipa. Ikano caavahalyaawe nhina iwarakha tthaaru caawantikhenlyaawe cinaathoonyera iyo. Khweeliini, unaareera ucuwela wiira alopwana ni athiyana ooreera nrima toko Joau ahothanliya wiira yalamulele wamoca ni Kristu wiirimu!—1 Jo. 2:27.

¹⁷ Niikurumice weettela ikano cofayita ciitthucaleehu nhina ula mwahoola. Nlakele uhihiya weettela ikhweeli, mmwiiwelelaka Yehova nhina citthu cotheene cimpankeenyu. Nsome Ibiiblya ni nkhuluvele itthu inhimyaaya. Nlipihace umwaamini winyu Yesu. Nkhotte moopuwelelo aapinaatamu ni citthu cowoothiya cineetthucihaaya awananiihu. Khannolamuliya unswalela Yehova ni ukati yooyo upanka citthu coohinamaana. Mwaakhottele ale anookhanyererihani upanka citthu coohiloka. Mweettele malamulo a Yehova. Mwaakavihere mayamunneenyu ukhalana waamini woolipa ni uhihiya weettela ikhweeli mwaalevelelaka ale yuutthekenleni ni mwaakaviheraka ale ampheela ukaviheriya. Napankaka citthu cotheenennyo, hataa yanikhumelelaka masakha, khaninhala uhiya weettela ikhweeli.