1. Iparakhani Yehova inivahilyaawe?

 NLUKU umpile irimu ni ituninya honivaha iparakha yuulupale: ulompa. Hiiva pooti wanonlompeehu Yehova ninrimeehu wotheene, khula ukati ni nuulumaka khula iluuka. Hataa nilompaka ninari wakorini usipiritaali awula nkhattya, hi pooti wankhuluveleehu wiira Apaapeehu o wiirimu anaahala univiriyana. Khweeliini, hi ninansukhuru venci Nluku nlattu woonivaha iyo iparakheeyo.

2. Davidi aathoonyenre cani wiira aanaalemeliha ulompa?

² Mwene Davidi aawehera ulompa khampa iparakha yuulupale. Uyo ahomwiipela Yehova co: “Ulompa waka ukhale wootthenkaciya ratta wanoocivelaaya khampa ilumpani.” (Isaa. 141:1, 2) Uwakati wa Davidi, ilumpani yaapahaaya anankuttho yaanaatthenkaciya ratta-raatta. (Nkw. 30:34, 35) Inanna ilumpani yaatthenkaciyaaya saana yahomuupusera Davidi wiira uyova aalamuliya uthanla sana-saana moolumwaawe ukati wonlompa Yehova. Otheene cihu nintakihe Mwene Davidi, kontha nimpheela wiira ulompa wihu untteelihe nrima Yehova.

3. Manannani ninlamuliyeehu unlompa Yehova, ni nlattuni?

³ Nihaana ninlompaka Yehova niihisima. Muupuwele iwooni caathoonyiheriyaawe Isaiya, Ezekiyeli, Daniele ni Joau. Iwooni caathoonyiheriyaaya caakhanle coovirikana. Masi cotheene cinawoonihera wiira ‘Yehova khanle Mwene oohilikananiya. Porofeeta Isaiya ahomoona Yehova nonkomile wahiceni wawe yuulupale ni yoottitthima.’ (Isai. 6:1-3) Porofeeta Ezekiyeli ahomoona Yehova nari nkaaroni wawe yo wiirimu “yowoonnyeela ni yoopharela venci khampa nikhwi.” (Ezek. 1:26-28) Porofeeta Daniele ahomoona “Humu o Mahuku Menci” nawanre ikuwo cootteela ni ukhumaka mooro wahiceni wonkomalyaawe. (Dan. 7:9, 10) Ni apostolu Joau ahomoona Yehova nonkomile wahiceni  yaarina nikhwi nowoonnyeela khampa maluku oopharela aneehaniya esmeralda. (Apoka. 4:2-4) Nnyo iwooninnyo cinaanuupusera wiira Yehova khanle nakuru ni muulupale. Phimaana ,unlompa ninoona ukhala iparakha yuulupale. Ni ukati wonlompa, nimpheela umuulumana niihisima. Masi citthuni cinlamuliyeehu wuuluma ukati wonlompa?

4. Moolumo oopacera o nivekelo Yesu niitthucihilyaawe nhina Matewus 6:9, 10 anniitthuciha isiyani?

⁴ Nsome Matewus 6:9, 10. * Nhina mwaha Yesu waataphulenlyaawe umwaakoni, ahowiitthuciha attharyaawe ulompa niinanna inoncivela Nluku. Yesu aapacenre uwiitthuciha wuuluma citthu cofayita yalompaka. Uyo ahooluma ureerihiya ncina na Yehova, uwa Umwene wa Nluku unhala waamalamaliha awanani a Nluku otheene ni ahooluma iparakha Yehova cinhalaawe waawaanela apinaatamu. Ukati unlompeehu noolumaka nnyo citthunnyo, ninaathoonyera wiira hiiva ninawoona ukhalana ifayita itthu Nluku impheelaawe.

5. Niireke hiiva pooti wanonlompeehu Nluku ninlepelaka citthu cihu?

⁵ Waalakihera wawe nnyo citthu coopacerannyo, Yesu ciicammo aheera wiira pooti wanlepeleehu citthu cihu. Hiiva pooti unlepela Yehova wiira anivahe, iyoolya, anilevelele itampi cihu, anikhikicere wiira nihittehiye wahinhaleehu ukhitiri ulipa mminepani ni anikavihere unnyema Sotwani. (Mat. 6:11-13) Nanlompaka Yehova nilepelaka nnyo citthunnyo, ninthoonyera wiira ninankhuluvela ni nimpheela upanka yotheene inhaleehu ukhitiri wiira nincivelihe.

6. Ukati wonlompa Nluku, niireke ninlamuliya wuuluma paahi citthu Yesu coolumalyaawe nhina nivekelo neetthucihalyaawe? Ntaphulele.

⁶ Yesu khaaphenle wiira attharyaawe atakihere khula nuulumo naahimyalyaawe nhina nivekelo niitthucihalyaawe. Ukati nkhwaawe Yesu waalompalyaawe, ahooluma myaha cikhwaawe connyaawe ukhalana ifayita uyo ukatyuuyo. (Mat. 26:39, 42; Joau 17:1-26) Inanna imocaaru, ukati wonlompa Nluku, hiiva pooti wuuluma khula mwaha unooneehu ukhalana ifayita. Wootakihera, napheelaka ulakela itthu yuulupale, hiiva pooti unlepela ankhili Nluku. (Isaa. 119:33, 34) Navahaceriyaka nteko wophiyaaru  wanlokoni, hiiva pooti unlepela Nluku wiira anivahe ucuwelaca ni nikhitiri uvara uyo ntekooyo. (Miru. 2:6) Ayari pooti waalompela asaanaaya ni asaana pooti waalompela mayapaapaaya ni mayamaamaaya. Ni otheene cihu pooti waalompela atthu anaasomiheehu Ibiiblya ni anaaphwanyeehu wuulalyaani. Masi nanlompaka Yehova khaninlamuliya unlepela citthu paahi.

7. Nlattuni ninlamuliyeehu unttottopela Yehova nanlompaka?

⁷ Unttottopela Yehova ukati unonlompeehu inkhala itthu yofayita. Khaavo ntthu nkhwaawe unomphwanela uttottopeliya cinene ni uttitthimihiya unvikana Yehova. Uyo “khanle namaana ni khula ukati naatthuna ulevelela.” Yehova ciicammo khanle ‘nakiriri, noothunku, khanle Nluku oovilela ni oomwinciva nifento nookhuluvelya.’ (Isaa. 86:5, 15) Otheene cihu nihaana isariya yonttottopela Yehova nlattu wo makhalelwaawe omaana otheene ni nlattu wo citthu comaana cotheene cinnipankelaawe.

8. Citthuni ninlamuliyeehu unsukhurweela Yehova? (Nwehe Isaalimu 104:12-15, 24.)

⁸ Nanlompaka Yehova uhiya uttottopela paahi, hiiva ciicammo nimpheela unsukhuru nlattu wo citthu comaana cotheene cinnivahaawe. Hiiva pooti unsukhuru Yehova nlattu wokoore cinooneehu nhina citthu cumpilyaawe, nlattu wocoolya cumpilyaawe ni nlattu woonivaha apatthani annitteeliha nrima. Apaapeehu Yehova anivahile citthu cotheenennyo kontha anaanifenta ni ampheela unoona unitteelaka nrima. (Nsome Isaalimu 104:12-15, 24. *) Ni itthu yuulupale cinene inonsukhurweeleehu Yehova ikhanle iyoolya yoominepani innivahaawe ni niweherero nomaana noohoolo ninivahilyaawe.

9. Isiyani inhala unikavihera uhiliyala unsukhuru Yehova? (Nsome 1 Atesalonika 5:17, 18.)

⁹ Ukati nkhwaawe, hiiva pooti uliyala unsukhuru Yehova nlattu wo citthu comaana cotheene cinnipankelaawe. Isiyani inlamuliyeenyu  upanka wiira nhiliyale unsukhuru Yehova? Nyuuva pooti wantikha nipuro citthu cinlepenleenyu Yehova ni nuuwakatyaaya, uweha citthu cantikhileenyu wiira moone mananna Yehova caakhunlyaawe ulompa winyu. Moonaka mananna caakhunlyaawe, nyuuva pooti unlompa ni unsukhuru nlattu wo wuukaviherani. (Nsome 1 Atesalonika 5:17, 18. *) Muupuwele co: Nyuuva khunoocivelani ntthu oosukhurukuni nlattu wonkavihera? Inanna imocaaru, hiiva nansukhuruku Yehova, uyo naakhala ootteeliya venci. (Akol. 3:15) Masi ihaavo itthu ikhwaawe yuulupale inlamuliyeehu unsukhurweela Yehova.

10. Toko cinthoonyeraaya 1 Peturu 2:21, nlattuni ninlamuliyeehu unsukhuru Yehova?

¹⁰ Nsome 1 Peturu 2:21. * Hi ninansukhuru venci Yehova nlattu wonveleeliha Mwanawe nonfentaawe wiira aniitthucihe ikhweeli ca Nluku. Nasomaka makhalelo a Yesu, ninawiitthuca ikhweeli cinci ca Yehova ni ninawiitthuca mananna ontteeliha nrima. Naaminiki wiivaherera wa Yesu, ninaakhitiri ukhalana upatthani woolipa ni Yehova ni ninawaatanaca nuuyo.—Aroo. 5:1.

11. Nlattuni unlompeehu mwa ncina na Yesu?

¹¹ Hi ninansukhuru venci Yehova nlattu wookhalana iparakha yonlompa mwa ncina na Mwanawe. Yehova nanruma Yesu wiirannyeeha citthu cinonlepeleehu nanlompaka ni uyo nawaakhula mavekelo ampankiya mwa ncina na Yesu. Iyo phi itthu Yesu yaahimyalyaawe ukati wenryaawe co: “Citthu cotheene cinhaleenyu ulepela mwancina naka, mi kinaahala upanka wiira Apaapa attitthimihiye nlattu wa Mwanaya.”—Joau 14:13, 14.

12. Isiyani-tho inlamuliyeehu unsukhurweela Yehova?

¹² Yehova naanilevelela itampi cihu nlattu Yesu wo wiivaherera wiira anoopole. Ibiiblya immwiihana Yesu “nankutthweehu muulupale” ni ineera wiira uyo “onkomile moono wonlopwana wa Nluku wiirimu.” (Mabere. 8:1) Yesu khanle ‘namakavihera ni ri nkhayi ni Apaapeehu.’ (1 Jo. 2:1) Hi ninansukhuru venci Yehova nlattu woonivaha Nankuttho Muulupale nocuwela upahuwa wihu, uhiicoorya wihu ni “nonilepelela uhoolo wa Nluku!” (Aroo. 8:34; Mabere. 4:15) Unari wiira Yesu kheevaherenre wiira anoopole, khanaahala ukhitiri umphiyeera Yehova ninlompaka, ukhala wiira hiiva naatthu oopahuwa. Khweeliini, wiivaherera wa Yesu ikhanle iparakha yuulupale Yehova inivahilyaawe. Khaavo mananna oothoonyihera sana-saana inanna cinonsukhurwiihu Yehova nlattu woonivaha iyo iparakheeyo!

13. Yesu hinaaya wiiviya manannani caathoonyihenryaawe wiira aanawaafenta attharyaawe?

¹³ Yesu hinaaya wiiviya ahopanka nivekelo nuulupale anlepelaka Yehova wiira “aakhalenle attharyaawe nlattu wa Ntakhali.” (Joau 17:15) Yesu Kristu ulepela wawe iyo itthwiiyo ahothoonyihera nifento cinene! Yesu ancuwela wiira waahala vakaani uphiya ukati waahalaawe uttehiya venci. Masi hataa ukhalaka commo, uyo ahothoonyihera waawacera maapostolwaawe.

14. Manannani ninhaleehu uthoonyihera wiira ninawaafenta mayamunneehu ni mayamunneehu o wanlokoni?

¹⁴ Khampa Yesu, hi khaninlamuliya wiicuupuwela asineeneehu paahi nalompaka. Uhiya commo, nihaana naalompelaka ikwaha cinci mayamunneehu ni mayanuunwiihu o wanlokoni. Napankaka commo, ninaahala wiiwelela  nrumo na Yesu nineera wiira nihaana nifentanaka. Ciicammo, naalompelaka mayamunneehu ninanthoonyera Yehova wiira ninawaafenta mayamunneehu. (Joau 13:34) Nihuupuwele wiira waalompela mayamunneehu unkhala urihakaca ukati. Ibiiblya ineera wiira “ulompa wa ntthu neettela isariya unaaphwanyiha ikuru.”—Tiya. 5:16.

15. Kontha isiyani mayamunneehu anaapheela wiira hiiva naalompele?

¹⁵ Mayamunneehu anaapheela wiira naalompele ukhala wiira anawaakhumelela masakha menci. Hiiva pooti wanonlepeleehu Yehova wiira aakavihere mayamunneehu uvilela iretta, ihasara, ikhotto, ulupatthiya ni masakha makhwaawe anaakhumelela. Ciicammo, hiiva pooti waalompela mayamunna aneekurumica waakavihera ale anthwennya. Pooti ukhalaka wiira nyuuva nnancuwela munneehu amphwanyile masakha moolupale. Nnoonela cani unlompela uyo munnooyo nromolaka ncina nawe? Hiiva ninthoonyera wiira khweeliini ninawaafenta mayamunneehu nanlepelaka Yehova wiira aakavihere.

16. Nlattuni ninlamuliyeehu waalompela mayamunna anwacera maloko?

¹⁶ Mahumu ni arumiya o wanlokoni anaasukhuru cinene naalompelaka, kontha mavekelweehu anawaakavihera venci. Apostolu Paulu ahaalepela mayamunna wiira anlompele. Uyo enre co: “Nkilompele miiva ciicammo wiira kicuwele yo wuuluma katthukulaka malakwaaka, wiira kilipe nrima ukati wo wuuluma ni wo waacuweliha atthu isiiri ya Nluku yo hapari cawe comaana.” (Efesu 6:19) Khampa apostolu Paulu, mahukwaala ahaavo ciicammo mayamunna enci anvara nteko wiira awacere maloko eekristau. Nanlompaka Yehova wiira aakavihere ayo mayamunnaayo, ninaathoonyera wiira khweeliini ninawaafenta.

17-18. Ukatini atthunaka ninhaleehu ulepeliya wiira naalompele akhunanihu, ni isiyani ninlamuliyeehu wuupuwela nalepeliyaka waalompela uyo ukatyuuyo?

¹⁷ Ukati nkhwaawe, hiiva pooti ulepeliya waalompela akhunanihu. Wootakihera, arokorihu anonsomiha ntthu Ibiiblya pooti waalepela arokorihu akhwaawe yaavelenle wiira alompe ahinancera unsomiha Ibiiblya uyo ntthuuyo. Masi arokorihu anveleela pooti ukhalaka wiira khanoncuwela saana ntthu nosomihiya Ibiiblya. Phimaana, phataari ayova ulompa amalihaka usomihiya Ibiiblya uyo ntthuuyo. Ala  manannaala, ayo anaahala ukhitiri uncuwela ukati unhalaawe usomihiya Ibiiblya, anaahala ucuwela mananna cimpheelaawe ukaviheriya ni ayo pooti uromola iyo itthwiiyo uwakati unlompaaya.

¹⁸ Munna alepeliyaka upanka nivekelo unkutthaanoni awula ukati woopheela urweennya wuulalyaani, haana acuwelaka ifayitaaya uyo nkutthaanooyo. Ayo mavekelwaayo khanlamuliya upankiya wiira avahiye ikano mayamunna o wanlokoni awula wiira avahiye mahimyo. Nhina mikutthaano cihu cinci, cinseeleliya iminutu 5 wiira niipiye ncipo ni nipankiye nivekelo. Phimaana, munna nothanliya upanka nivekelo unkutthaanoni khanlamuliya wuuluma cinene, venci-venci ukati woopanka nivekelo noopacera.—Mat. 6:7.

19. Isiyani inhala unikavihera ukhala oolipa ukati unhalaaya umalamalihiya ila ituninyeela?

¹⁹ Nihaana nitepaka ulompa ula ukatyuula, kontha nihuku nohukhumu na Yehova niri wakhiviru. Phimaana, Yesu aheera co: “Nhiitthaale ni nlompe khula ukati wiira nkhitiri woopwa citthu cotheene nnya cinlamuliya ukhumelela.” (Luka 21:36) Nalompaka cinene, waamini wihu unaahala ukhala woolipa ni ninaahala ukhitiri wiitthenkaca wiira nalipe ukati unhalaaya umalamalihiya ila ituninyeela.

20. Isiyani inlamuliyeehu upanka wiira ulompa wihu ukhale khampa ilumpani yoonukhela inoncivela Yehova?

²⁰ Nhina ula mwahoola, niheetthuca wiira ulompa, ikhanle iparakha yuulupale. Niheetthuca wiira ukati woolompa, nihaana nihooleliheraka ulepela wiira yiirannye itthu impheelaawe Yehova. Ciicammo, niheetthuca wiira nihaana ninsukhuruku Yehova nlattu wonveleeliha Mwanawe Yesu Kristu wiira anoopole ni nlattu Yesu wookhala Mweneehu. Nihoopuseriya wiira nihaana naalompelaka mayamunneehu ni mayanuunwiihu o wanlokoni. Ni khaninlamuliya uliyala ulompa nilepelaka citthu cimpheeleehu, toko iyoolya, ikuwo ni ulepela wiira Yehova anikavihere mminepani. Khweeliini, ulompa ninoona ukhala iparakha yuulupale. Phimaana, nihinaaya ulompa, ninawiikurumica wuupuwela sana-saana citthu cinhaleehu uhimya ukati woomuulumana Yehova. Napankaka commo, moolumweehu anhala ukhala khampa ilumpani yoonukhela ‘inontteeliha nrima’ Yehova.—Miru. 15:8.