MWAHA WOOSOMIYA 28
Umwene wa Nluku uhancera ulamulela!
“Umwene wo ntuninyani uhokhala vano Umwenewa Apwiiyeehu ni wa Kristwaaya.”—APOKA. 11:15.
NCIPO 22 “Venha o Teu Reino!”
NINHALA WIITTHUCANI? *
1. Makhalelo o ntuninyani ari cani ala mahukwaala, ni iyo itthwiiyo innikupaliha isiyani?
ATTHU enci yoonaka makhalelo o ntuninyani ilelo, unawaarika ukupali wiira wahoolo ninaahala ukhala saana. Amuci khanwacerana ninifento, atthu anvira yatepaka ukhala ananttewo ni owiicoona, ni atthu enci unawaarika waakhuluvela akhulupale. Masi citthu cotheenennyo cinthoonyera wiira woohipica hi ninaahala ukhala saana. Nineerelani commo? Nineera commo kontha ayo atthwaayo anthoonyera makhalelo yaahimiye wiira atthu phaahalaaya ukhalana uwakati wo “mahuku ookhicera.” (2 Tim. 3:1-5) Khula ntthu nohala weemela ni uweha makhalelo o ntuninyani, naahala ukupali wiira inatiri co mbiiblyani cinhimya makhalelo aatthu ukati wo mahuku ookhicera cinawiirannya. Ni iyo itthwiiyo inthoonyera wiira Yesu hancera ulamulela muumweneni wa Nluku. Masi uhiya inatiri iri nhina 2 Timotiyu 3:1-5, cihaavo inatiri cikhwaawe cinooluma Umwene wa Nluku. Usoma nnyo inatirinnyo ni woona mananna cineerannyaaya unaahala ulipihaca waamini wihu.
Toko ntthu noluttanihacaawe iwarakha yoomyaanihaciya wiira acuwelele itthu yantikhiye nwarakhanimmo, hiiva nakumanihaka inatiri co nlivuruni ya Daniele ni Apokalipise cinaanikavihera ucuweleeha citthu cinhala wiirannya woohipica, khampa Yehova ciiralyaawe (Nwehe iparaagarafu 2)
2. Ninhala wiitthucani nhina ula mwahoola, ni nlattuni? (Ntaphulele ilatarato yo wakaapani.)
2 Nhina ula mwahoola, ninaahala woona (1) inatiri innikavihera ucuwela ukatini Umwene wa Nluku wancenryaaya ulamulela, (2) inatiri cinnikavihera ucuwela wiira Yesu hokhala Mwene o Umwene wa Nluku, ni (3) ninaahala woona inatiri cinthoonyera mananna awanani a Nluku cinhalaaya umalamalihiya. Toko ntthu noluttanihacaawe iwarakha yoomyaanihaciya wiira acuwelele itthu yantikhiye nwarakhanimmo, hiiva nakumanihaka nnyo inatirinnyo cinaahala unikavihera ucuweleeha citthu cinhala wiirannya wahoolo.
NINCUWELA CANI UKATI UMWENE WA NLUKU WANCENRYAAYA ULAMULELA?
3. Ilivuru ya Daniele 7:13, 14 innikhuluveliha isiyani?
3 Inatiri yo nlivuruni ya Daniele 7:13, 14 yahohimya wiira Yesu phaahala umphwanela ukhala Mwene o Umwene wa Nluku. Atthu olapo cotheene ntuninyani waanaahala waatteela nrima nlattu wonvarela nteko ni ulamulela wawe khawaahala umala. Inatiri ikhwaawe yo nlivuruni ya Daniele yahohimya wiira Yesu aahala wancera ulamulela unavinre ule uneehaniya “uwakati saapa.” Niireke unaakhitirya ucuwela ukatini Yesu wancenryaawe ulamulela?
4. Ilivuru ya Daniele 4:10-17 innikavihera cani ucuwela ukati Yesu wancenryaawe ulamulela? (Moone ciicammo niwehero.)
4 Nsome Daniele 4:10-17. * “Uwakati saapa” cikhanle myaakha 2.520. Uyo uwakatyuuyo upacenre waalikeliya mwaakha wo 607 hinawa Kristu, ukati ahooleli o Babilooniya wanhiihilyaaya ulamulela u Yerusalemu mwene oomalela aathanliye ni Yehova. Vano uyo uwakati saapooyo umalenle yaakhani? Umalenle mwaakha wo 1914, ukati Yehova unkhalihilyaawe Mwene Yesu Kristu, ule unomphwanela ukhala mwene o Umwene wa Nluku. *—Ezek. 21:25-27.
5. Kontha isiyani inatiri yo “uwakati saapa” ihaana ifayita?
5 Kontha isiyani iyo inatiriiyo ihaana ifayita? Wiiweeha inatiri yo uwakati saapa unaanikavihera utepa ukhuluvela wiira Yehova naahala wiirannyeeha inatiri cawe woohicerewaca. Yehova aholakela ukati wooreera unkhaliha Yesu Kristu Mwene. Inanna imocaaru, inatiri cikhwaawe cotheene uyo naahala wiirannyeeha oonaka wiira uhophiya ukati wooreera wiirannya. Pooti wankhuluveleehu wiira nihuku na Yehova “khaninhala ucerewa!”—Habak. 2:3.
NINCUWELA CANI WIIRA YESU KRISTU HOKHALA MWENE?
6. a) Nincuwela cani wiira Yesu hancera ulamulela wiirimu? b) Apokalipise 6:2-8 inthoonyera cani wiira Yesu hancera ulamulela?
6 Yesu Kristu ahalaka vakaani umaliha nteko waawalyaawe uvara watuninyani, ahohimya citthu caahala wiirannya ukati waahalaawe wancera ulamulela wiirimu. Nhina citthu cinci, uyo ahooluma wiira caanaahala ukhumelela ikhotto, itala ni uttettemela wotthaya. Ni uyo ahohimya wiira caanaahala ukhumelela ikwerere awula iretta cinci. Iretta yo COVID-19 ikhanle nthoonyero wiira iyo itthwiiyo inneeranya. Citthu cotheenennyo cinkhala nthoonyihero wiira Yesu Kristu hancera ulamulela. (Mat. 24:3, 7; Luka 21:7, 10, 11) Uvira waya myaakha 60 Yesu nakhwile ni nahokolenle wiirimu, uyo ahomoonihera apostolu Joau mathoonyihero makhwaawe wiira nnyo citthunnyo canhala wiirannya. (Nsome Apokalipise 6:2-8. *) Citthu cotheenennyo cinneerannya ukhuma ukati Yesu ukhanlyaawe Mwene wiirimu, mwaakha wo 1914.
7. Nlattuni watuninyani untepaaya ukhumelela citthu cootakhala ukhuma ukati Yesu ukhalihiyaawe Mwene?
7 Nlattuni makhalelo o watuninyani utepalyaaya ukhala oorika ukhuma ukati Yesu ukhanlyaawe Mwene wiirimu? Apokalipise 6:2 inaanikavihera ucuwela. Itthu yoopacera Yesu yaapankilyaawe ukati waakhalihiyaawe Mwene, waari upacera ikhotto. Masi tipani aamwaattakananaawe? Uyo aamwaattakanana Sotwani ni maciinnyaawe. Apokalipise ikapiitulu 12 inaahimya wiira Sotwani ni maciinnyaawe yahotthemiya ni yahoomoleliya watuninyani. Wiirannya waya iyo itthwiiyo, Sotwani hokhala oorusiya venci ni urusiya wawe naamalamalihera apinaatamu watuninyani. Phimaana, cahancera utepa ukhumelela citthu cootakhala watuninyani.—Apoka. 12:7-12.
Hi khunnitteela nrima neewaka ihapari coohinamaana. Masi nnyo ihaparinnyo cinaatepa unikhuluveliha wiira Umwene wa Nluku uhancera ulamulela (Nwehe iparaagarafu 8.)
8. Nlattuni uhintepeehu ukhala oonyoonyiya nlattu wo citthu coohinamaana cinkhumelela mahukwaala?
8 Kontha isiyani iyo inatiriiyo ihaana ifayita? Makhalelo aatthu o mahukwaala anaathoonyera wiira Yesu hancera ulamulela wiirimu. Phimaana, uhiya ukhala oonyoonyiya nlattu wo woona makhalelo oohinamaana aatthu, nihaana nuupuwelaka wiira nnyo citthunnyo cinthoonyera wiira inatiri co mbiiblyani cinneerannya. Umwene wa Nluku uhancera ulamulela! (Isaa. 37:1) Ni wanvireehu nitepaka waattamela ukati wokhotto yo Harmacetom, makhalelo o ntuninyani anaahala uvira yatepaka urikarika. (Mark. 13:8; 2 Tim. 3:13) Khweeliini, nihocaaliya nlattu wonswalela Nluku nonikavihera ucuwela nlattuni cinkhumelelaaya citthu cootakhala ntuninyani!
AWANANI O UMWENE WA NLUKU ANHALA UMALAMALIHIYA CANI?
9. Inatiri iri nhina Daniele 2:28, 31-35 inttonkaca cani ikuvernu yoomalela, ni iyo yaahala ukhumelela ukatini?
9 Nsome Daniele 2:28, 31-35. * Hi ninnoona iyo inatiriiyo yiirannyaaka mahukwaala. Itthu yaalohilyaawe mwene Nabukodonosor yahothoonyera itthu yaahala ukhumelela Yesu anceraka ulamulela “ukati wo mahuku ookhicera”. Nhina atthu ammwaanana Yesu va watuninyani va, ihaavo ikuvernu yoomalela inoolumiya mbiiblyani. Iyo phi ikuvernu inlattanihiya nimanya oyuuma ni ooloko ottontto anlohilyaawe mwene Nabukodonosor. Iyo ikuvernwiiyo ihancera ulamulela watuninyani. Iyo ikhumakhumale waalavaniyaaya Ikhotto Yoopacera yo Ntuninyani, ukati waasikisannyaaya ikuvernu yo Grã-Bretanha (Inglaterra) ni yo Estados Unidos cikumiheraka ikuvernu yuulupale Anglo-Americana. Ttontto anlohilyaawe mwene Nabukodonosor naathoonyera citthu piili cineeriha iyo ikuvernwiiyo uvirikana niikuvernu cikhwaawe.
10. a) Inatiri yo nlivuruni ya Daniele inttonkaca cani ikuvernu Anglo-Americana? b) Isiyani inlamuliyeehu unyema? (Nwehe ikwaaturu ineera “ Ratta nuuloko!”)
10 Itthu yoopacera ineeriha ikuvernu Anglo-Americana uvirikana niikuvernu cikhwaawe cinoolumiya nlivuruni ya Daniele, ukhalaka wiira iyo ikuvernwiiyo khinlattanihiya niitthu imoca, toko iwooru awula iparaata. Masi iyo inlattanihiya niiyuuma yootakaniheriya uloko. Ulokooyo unaaciya “ucuulu wa apinaatamu,” awula apoovu o ntuninyani. (Dan. 2:43, niwehero) Mahukwaala, unawoonannya mananna apoovu cinrukunusaaya moopuwelelo okuvernu cuulupale akhalaka mwaathanle. Apoovu ciicammo anaarukunusa moopuwelelo okuvernu yapankaka manifestação awula yakumiheraka miphwinko cinlepela uwaceriya atthu otheene niisariya. Nnyo citthunnyo cinaarikarikiha ikuvernu upanka citthu cimpheelaaya.
11. Isiyani innikupaliha wiira vano ninkhala ukati wo mahuku ookhicera?
11 Itthu yonayeeli ineeriha ikuvernu Anglo-Americana uvirikana niikuvernu cikhwaawe, ukhalaka wiira iyo phi ikuvernu yoomalela yuulumiye mbiiblyani wiira yaanaahala ukhumelela. Khayuulumiye ikuvernu ikhwaawe yaahala ukhumelela yaviraka iyo ikuvernwiiyo. Iyo inhala umalamalihiya ukhottoni yo Harmacetom wamoca niikuvernu ca apinaatamu cotheene. *—Apoka. 16:13, 14, 16; 19:19, 20.
12. Isiyani-tho inhimiya nhina inatiri ya Daniele innivaha nweherero?
12 Kontha isiyani iyo inatiriiyo ihaana ifayita? Inatiri ya Daniele inawuuluma itthu ikhwaawe inthoonyera wiira ninkhala ukati wo mahuku ookhicera. Myaakha coopwaha 2.500 uttuli, porofeeta Daniele ahohimya wiira yakhumaka ikuvernu yo Babilooniya, canhala ukhumelela ikuvernu cuulupale 4 caahala urukunusa venci makhalelo aapoovu a Nluku. Ciicammo, Daniele ahohimya wiira ikuvernu Anglo-Americana phaahala ukhala yoomalela. Iyo itthwiiyo inaanivaha nweherero, kontha ninaacuwela wiira uhanle vakaani uphiya uwakati Umwene wa Nluku unhalaaya umalamaliha ikuvernu cotheene ni ulamulela ituninya.—Dan. 2:44.
13. a) “Mwene onanaane” ni “mamwene 10” cikhanle isiyani? (Apokalipise 17:9-12) b) Iyo inatiriiyo ineerannya cani?
13 Nsome Apokalipise 17:9-12. * Ikhotto Yoopacera yo Ntuninyani yahowaana masakha menci. Masi iyo itthwiiyo yaheerannyeeha inatiri ikhwaawe yo mbiiblyani yaahimya citthu caahala wiirannya mahuku ookhicera. Ahooleli o ntuninyani yahancera wiikurumica wiira nikhale nnema watuninyani. Phimaana, mweeri wo Janeiro wo 1920, ayo yahotthenkaca mphwinko weehaniya Liga das Nações. Uyo mphwinkooyo wahomalamalihiya ni mweeri wo Outubro wo 1945, wahotthenkaciya mphwinko nkhwaawe uneehaniya Nações Unidas. Ula mphwinkoola uneehaniya “mweene onanaane.” Masi uyo ukhanle mphwinko paasi; khunakhala ikuvernu kontha wiira uvare nteko, uhaana ukaviheriyaka niikuvernu cikhwaawe. Ibiiblya ineehana nnyo ikuvernunnyo “mamwene 10.”
14-15. a) Ilivuru yo Apokalipise 17:3-5 inttonkaca cani “Ibabilooniya Yuulupale”? b) Mahukwaala, isiyani ineerannya mmattiinini cowootha?
14 Nsome Apokalipise 17:3-5. * Nluku ahonthoonyihera apostolu Joau iwooni. Nhina iyo iwooniiyo, Joau ahomoona nthiyana ooraruwa eehaniya “Ibabilooniya Yuulupale,” cikhanle ittiini cowootha cotheene. Iyo iwooniiyo ineerannya cani? Ukhuma nenne nokhalayi, ittiini cowootha cinaakavihera ni cinaavara nteko nkhayi niikuvernu co ntuninyani. Woohipica, Nluku naahala uhela wanrimani waya nnyo ikuvernunnyo “wunlela wiirannyeeha inuupuwelaawe.” Isiyani inhala wiirannya? Nnyo ikuvernunnyo, cikhanle “mamwene khuumi,” cinaahala umalamaliha ittiini cowootha cotheene.—Apoka. 17:1, 2, 16, 17.
15 Nincuwela cani wiira woohipica Ibabilooniya Yuulupale inaahala umalamalihiya? Wiira naakhule nno nikohonno, nihaana nuupuwelaka wiira isittatti yo Babilooniya yokhalayi yaakhikiceriya nimaaci o mmoolokoni Eufrates. Ilivuru yo Apokalipise inaahimya wiira atthu enci ankavihera Ibabilooniya Yuulupale anaalikanaca ni ayo maacyaayo, ukhala wiira anaakhikicera Ibabilooniya Yuulupale. (Apoka. 17:15) Masi ilivuru yo Apokalipise ciicammo inaahimya wiira ayo maacyaayo yaanaahala uwelela, ithoonyeraka wiira atthu enci ankavihera ittiini cowootha yanhala uhiya ukavihera nnyo ittiininnyo. (Apoka. 16:12) Iyo inatiriiyo inneerannya mahukwaala, kontha atthu enci anaalakela ukhuma ittiini caaryaaya ni anvira yatothaka umaliha masakhaaya nimananna makhwaawe.
16. Inatiri inooluma ukhumelelihiya mphwinko Nações Unidas ni umalamalihiya Ibabilooniya Yuulupale innikavihera cani?
16 Kontha isiyani iyo inatiriiyo ihaana ifayita? Ukhumelelihiya waya mphwinko Nações Unidas ni atthu enci uhiya ukavihera ittiini cowootha, unthoonyera wiira ninkhala ukati wo mahuku ookhicera. Unookhalaru wiira atthu enci ahohiya ukavihera Ibabilooniya Yuulupale, iyo inhala umalamalihiya nimananna makhwaawe. Khampa ciitthucileehu, Yehova naahala wiiriha wiira “mamwene khuumi”—ikuvernu cinkavihera mphwinko Nações Unidas—‘cipheele wiirannyeeha inoopuwelaawe.’ Ukati atthu o ntuninyani uhinhalaaya uweherera, nnyo ikuvernunnyo cinaahala umalamaliha ittiini cowootha. * (Apoka. 18:8-10) Umalamalihiya Ibabilooniya Yuulupale unaahala urikarikiha makhalelo o ntuninyani ni uwaana masakha menci. Masi cihaavo citthu piili cinhala waatteeliha nrima apoovu a Yehova. Yoopacera, uhoona-tho ittiini cowootha ntuninyani. Yonayeeli, umalamalihiya ittiini cowootha unaahala waathoonyera wiira uhanle vakaani uphiya ukati unhalaaya umalamalihiya ila ituninya yoohinamaaneela!—Luka 21:28.
NWEHERERE CITTHU COOHOOLO NKHULUVELAKA
17-18. a) Isiyani inlamuliyeehu upanka wiira nilipihace waamini wihu? b) Ninhala wiitthucani nhina mwaha nkhwaawe unttharanaca nuula?
17 Porofeeta Daniele aheera wiira “ucuwelaca weekhweeli” waanaahala “winciva”, ni iyo phi itthu inooneehu yiirannyaaka! Hi ninaakhitiri wiiweeha inatiri cineerannya mahukwaala. (Dan. 12:4, 9, 10) Nnyo inatirinnyo cinawiirannya khampa caahimiyaaya ni iyo itthwiiyo inaaniiriha utepa unkhuluvela Yehova ni ukhuluvela nuulumo nawe. (Isai. 46:10; 55:11) Phimaana, nhihiye ulipihaca waamini winyu nsomaka Ibiiblya ni mwaakaviheraka akhwiinyu ukhalana upatthani woolipa ni Yehova. Nlukwiihu naahala waakhikicera atthu otheene anhala unkhuluvela. Khula ntthu nhala unkhuluvela Yehova naahala ukhikiceriya ni khanhala uhiya ukhalana “nnema noohimala”.—Isai. 26:3.
18 Nhina mwaha woottharanaca nuula, ninaahala woona inatiri cikhwaawe cinwuuluma apoovu a Yehova ala mahuku ookhiceraala. Ninaahala woona wiira nnyo inatirinnyo ciicammo cinaathoonyera wiira ninkhala ukati wo mahuku ookhicera. Ciicammo, ninaahala woona wiira Mweneehu, Yesu Kristu, nawaahoolela apoovu a Nluku.
NCIPO 61 Avancem, Testemunhas!
^ Hi ninkhala ukati unkhumelelaaya citthu cootikhiniha venci. Umwene wa Nluku uhancera ulamulela, khampa caahimyaaya inatiri co mbiiblyani. Nhina ula mwahoola, ninaahala woona nnyo inatirinnyo ni mananna cinlipihacaaya umwaamini wihu Yehova. Ciicammo, ninaahala woona mananna cinnimaalihaaya ni cinhalaaya unikavihera unkhuluvela Yehova mahukwaala ni wahoolo.
^ Daniele 4:10 Nhina iwooni caakiphwanyile kirupaka wankorini waka, mi kahoona mwiri iriyari ituninya, ni waari mwiri woorekama cinene. 11 Uyo mwiryuuyo wahoonuwa ni wahokhomaala, ni irekamelwaaya waanaaphiya wiirimu ni waanawoonnya mapuro oottayi o ntuninyani. 12 Mataakhurwaaya yaari ooreera, waheema mihokorokho cinci ni waanawaaphwanyiha iyoolya atthu otheene. Vathi waya, inama co ntakhwani caanaaphwanya ntthuuci; ni mmirittani waya caakhala inuni co wiirimu. Uyo mwiryuuyo waanaavaha iyoolya citthu cowumpiya cotheene. 13 Ukati waawehaaka iwooni caakiphwanyile wankorini waka, mi kahomoona namakhalenla, owaarya, ni uyo aakhuma wiirimu. 14 Uyo ahokhuwela venci eeraka: “Ukottoliye mwiryuuyo, uthikiliye miritta caya, amorihiye mataakhurwaaya ni cimwaruseliye vathi mihokorokho caya! Inama ciri vathi waya ni inuni cinkhala mmirittani waya citthawe! 15 Masi ihinnye ikhokolwaaya ni mitithari caya vathi. Ikhokolweeyo itthukiye niiyuuma ni niikoopere ni ihinnye iriyari malasi o ntakhwani. Inaanihiye nuukame wo wiirimu, ni itakhwa yo ncoko uryaaya cikawelane inama co ntakhwani. 16 Nrimaaya urukunusiye wiira uhiye ukhala nrima weepinaatamu, ni uvahiye nrima wonama mpaka wanhalaaya uvira uwakati saapa. 17 Ila ikhanle itthu irumilyaaya akhalenli ni ikhanle itthu ilepenlyaaya ale owaarya, wiira atthu otheene ankhala walaponi acuwele wiira Nluku, phiri Nhooleli o umwene waapinaatamu ni uyo umwennyooyo nanvaha ule nonthanlaawe, ni nanvahacera pinaatamu verihenle uyeva.”
^ Nwehe mpantta 32, ipontu 4, nhina ilivuru Mphwanye Utteeliya Uhimmala! ni moone ividiyu O Reino de Deus Começou a Governar em 1914 nsayitini jw.org.
^ Apokalipise 6:2 Ni kahoona ikhavalu yootteela. Ule onkomenle iyo ikhavalwiiyo ahaana muura ni ahovahiya ikofiyo yeemwene. Uyo ahorwaa ni ahovira atthemaka mpaka waahalaawe umalihera utthema wawe. 3 Waahunlyaawe ntthukelo wonayeeli, [. . .] 4 yahokhuma ikhavalu ikhwaawe yookhwiila toko mooro. Ni ule aawenle iyo ikhavalwiiyo ahovahaceriya umaliha nnema watuninyani, wiira apinaatamu yiivanane; ni uyo ahovahiya ikatana yuulupale. 5 Waahunlyaawe ntthukelo noneeraru, [. . .] kahoona ikhavalu yooriipa. Ule onkomenle iyo ikhavalwiiyo aacisile ipalansa mmatatani wawe. 6 Ni kaheewa itthu yaakhala toko ncu naakhuma iriyari cowumpiya cikumi cese ni neera: “Ikhiilu imoca yotiriku intumihiya itenaariyu imoca, ni ikhiilu tthaaru cosevaata cintumihiya itenaariyu imoca. Nhihonone makhura ni iviinyu.” 7 Waahunlyaawe ntthukelo woneecese, [. . .] 8 mi kahoona ikhavalu yookhucuwa. Ule onkomenle iyo ikhavalwiiyo eehaniya Nookhwa; ni Mahiye yaanantthara wakhiviru. Uyo ahovahaceriya mphantte woneecese wolapo wiira awiivakace atthu niikatana yoorekama, niitala, niiretta cowiiva ni nimasene o ntuninyani.
^ Daniele 2:28 Masi, wiirimu haavo Nluku notaphulela isiiri, ni uyo hoothoonyerani nyuuva amwene Nabukodonosor citthu cinhala wiirannya ukati wo mahuku ookhicera. Ila phi itthu ilohileenyu ni iwooni cikhalanneenyu nrupaka wankorini winyu: 31 “Amwene, ukati waweheenyu, mwahomoona ttontto muulupale. Uyo ttonttooyo aari muulupale cinene ni aanawoonnyeela venci; aari uhoolo winyu ni aanawoopiha. 32 Murwaawe uyo ttonttooyo waari wowooru, ikhakaacaawe ni myoono cawe caari coparaata, nthuukwa nawe ni mipaca cawe caari cokoopere, 33 metto cawe caari coyuuma ni manyaawe yaari oyuuma mphantte mmocooyo ni mphantte nkiinooyo yaari ooloko. 34 Munwehakoono uyo ttonttooyo, nahokumihiya nluku wamwaakoni, masi khanaakumihiye ni matata a ntthu. Nno nlukunno nahopwesa ni ahomalamaliha manya oyuuma ni ooloko o ttontto aamooneenyu. 35 Ala manannaala, iyuuma, uloko, ikoopere, iparaata ni iwooru cahomalamalihiya wonkwaha mmoca ni cahoveverusiya khampa malasi owuuma; cahoveverusiya ni khacoonannyeele-tho. Masi, nluku nampwesile uyo ttonttooyo nahotathuwa mwaako muulupale waakhuneela ituninya yotheene.”
^ Mwapheela ucuweleeha inatiri ca Daniele, nwehe irevista Ukhalenla 15 yo Junho yo 2012, ipaagina 14 mpaka 19.
^ Apokalipise 17:9 Ntthu haana akhalanaka ankhili wiira eeweehe ila itthwiila: myuru 7 cikhanle myaako 7 conkomenlyaawe uyo nthiyanooyo. 10 Ni ahaavo mamwene 7. Nhina ayo mamwennyaayo, 5 ahovira, mmoca haavo ni nkiinooyo khanaaya uwa. Masi awaakavale, nohala ulokela ukati vakaani paahi. 11 Nsene naakhumelenle, masi nimalamalaka, nikhanle mwene onanaane ni ninkhuma nhina mamwene 7, ni ninrwaa wuutankanyiyani. 12 Inyaka 10 coonalyaa akhanle mamwene 10. Ayo nanlelo khanavahiya umwene, masi ahovahiya ukhulupale wiira akhale mamwene iwoora imoca paahi nkhayi ninsene.
^ Apokalipise 17:3 Niikuru co nnepa, uyo ahokirwaana muuthakoni. Ni kahomoona nthiyana nonkomale waculu nsene nooseerya naacaranne macina ooveeha ni nahaana myuru 7 ni inyaka 10. 4 Nthiyanooyo ahowara nlaya nonsurukhu mwinci ni ikuwo cookhwiila. Uyo aheereerihaca niiwooru, mikhova ni maluku oopharela, ni mmatatani wawe aacisile ikoophu yowooru yoocara citthu coohiirya ni coonanara cinthoonyera uraruwa wawe. 5 Wayuuci wawe nahantikhiya ncina nootikhiniha: “Ibabilooniya Yuulupale, anumwanaya athiyana ooraruwa otheene ni o citthu coohiirya cimphwanyannya watuninyani.”
^ Mwapheela ucuwela nnyo citthu cooholonnyo, nsome ilivuru O Reino de Deus já Governa! ikapiitulu 21.
