Nnyo iveerusunnyo cinaattonka makhalelo 9 makristau anlamuliyaaya uthoonyera: “Nhokorokho wo nnepa ukhanle: nifento, utteeliya, nnema, uvilela, maana, unamaana, waamini, umaala, wiivaraca.” Masi khunakhala wiira ala phiri paahi makhalelo omaana nnepa wa Nluku unnikaviheraaya ukhalana.

Moone iveerusu cooculu apostolu Paulu cantikhalyaawe, cineera: ‘Miteko cinciveliha irutthu cikhanle: uraruwa, upanka citthu coohiirya, uhinahaaya, waaswalela attontto, ukhwiri, ulupatthana, inttewo, ihace, urusiya venci, uhiiwanana, uhaataana, umwalana, nttima, uhapaliya, uthuka pusya, ni citthu toko nnya.’ (Akalas. 5:19-21) Nuulumo “citthu toko nnya” ninthoonyera wiira cihaavo citthu cikhwaawe cinciveliha irutthu Paulu caahalaawe uromola masi cihiromonlyaawe, toko cile cittonkiye nhina Akolosu 3:5. Inanna imoca, ukati Paulu waattonkaawe makhalelo omaana, uyo heera: “Uvirikaniha nnya citthunnya, khanivo nlamulo.” Niiluuka yoopacera wantikhiya, nuulumo “nnya citthunnya” ciicammo pooti utaphuleliya “citthu toko nnya.” Iyo inthoonyera wiira Paulu khaaphenle uhimya wiira makhalelo 9 aromonlyaawe phikhanle paahi “nhokorokho wo nnepa.”

Hiiva ninkhitiri wiiheeha iyo nalattanihaka makhalelo Paulu aromonlyaawe ni itthu yantikhanlyaawe nwarakhani yo Efesu: “Kontha nhokorokho wo nthuko ukhanle citthu cotheene comaana, cosariya ni ceekhweeli.”(Efesu 5:8, 9) Iyee, “citthu comaana,” wamoca ni citthu “cosariya ni ceekhweeli” cikhanle “nhokorokho wo nthuko,” masi ciicammo cinaapanka mphantte nhina “nhokorokho wo nnepa.”

Inannna imoca, Paulu ahonkurumiya Timotiyu wiira atothe “isariya, unswalela Nluku, waamini, nifento, uvilela ni unamaana.”—makhalelo 6. (1 Tim. 6:11) Makhalelo mararu paahi (waamini, nifento ni unamaana) phinromoliya nhina “nhokorokho wo nnepa.” Masi khweeliini Timotiyu anhala upheela ukaviheriya ni nnepa wowaarya wiira athoonyere makhalelo mararu makiinaayo: isariya, unswalela Nluku ni upisa nrima.—Uwehe ciicammo Akolosu 3:12; 2 Peturu 1:5-7.

Phimaana pooti wankupaliihu wiira nhina Akalasiya 5:22, 23 khanttonkaciya makhalelo otheene makristau anlamuliyaaya uthoonyera. Nnepa wowaarya wa Nluku pooti unikavihera uthoonyera makhalelo 9 o “nhokorokho wo nnepa.” Masi ahaavo makhalelo makhwaawe anlamuliyeehu uthoonyera wiira nikhale makristau ookhomaala ni wiira ‘niwarele meettelo ophiyaaru, yumpiye toko cimpheelaawe Nluku, niisariya yeekhweeli ni nuuvaresesa.’—Efesu 4:24.