MWAHA WOOSOMIYA 25
“Mi kimwaneennyaaka kinaahala utotha ikhontwaa caka”
“Mi kimwaneennyaaka kinaahala utotha ikhontwaa caka ni kinaahala uwacera.”—EZEK. 34:11.
NCIPO 105 “Nluku nifento”
NINHALA WIITTHUCANI? *
1. Nlattuni Yehova wiilattanihalyaawe ni nnyari nthiyana?
“POOTI nthiyana unliyala mwanawe woohimoonela uthunku mwaana nnyanryaawe?” Iyo ikhanle itthu Yehova yaakohalyaawe ukati wa porofeeta Isaiya. Yehova ahaakhuluveliha apoovwaawe: “Hataa yala athiyana ala pooti uliyala, masi miiva akinhala wuuliyala.” (Isai. 49:15) Imaara cinci, Yehova khaneelattaniha ni nnyari nthiyana. Masi ukati wa porofeeta Isaiya uyo aheelattaniha kontha aapheela uthoonyera mananna cinaafentaawe cinene atthu anonswalela. Ayari athiyana enci anaahala ukupali moolumo yoolumalyaawe nrokorihu mmoca neehaniya Jasmin: * “Wakhalanaka mwaana mwankaani, weeva unawanca unfenta uyo mwaanooyo, ni khunhiya unfenta mpaka.”
2. Yehova nokhala cani amoonaka mwanawe mmoca hirwaaka umikutthaanoni ni hirwaaka wuulalyeerani?
2 Yehova naacuwela mwanawe mmoca ahiyaka urwaa umikutthaanoni ni wuulalyeerani, ni iyo inanriipiha nrima cinene. Vano muupuwele mananna Yehova cinkhalaawe oonaka wiira khula mwaakha, ahaavo asaanaawe enci anhiya urwaa umikutthaanoni ni wuulalyeerani. *
3. Isiyani Yehova impheelaawe?
3 Mayamunneehu ni asirokorihu enci ahiile urwaa umikutthaanoni awula wuulalyeerani anaaturuwela wanlokoni, ni hiiva ninaawaakhelela sana-saana! Yehova nopheela wiira ayo aturuwe, ni hiiva ciicammo iyo phi itthu impheeleehu. (1 Pet. 2:25) Masi ninhala waakavihera cani ale ahiile urwaa umikutthaanoni awula wuulalyeerani wiira aturuwele wanlokoni? Nihinaaya waakhula nna nikohonna, waanaareera ucuwela isiyani inwiiriha ulakela uhirwaa umikutthaanoni awula wuulalyeerani.
NLATTUNI ATTHU AKIINA UNHIYAAYA UNSWALELA YEHOVA?
4. Isiyani inaakhumelela atthu akiina nlattu wonteko unvaraaya?
4 Mayamunna akiina anaahiya nteko unvaraaya ukhalaka itthu yuulupale cinene muukumini waya. Munna mmoca nokhala u Ásia neehaniya Hung neera: “Kahancera uvara nteko cinene. Kaheethepya kuupuwelaka wiira kakhalanaka nsurukhu mwinci, phaahalaaka unswalela ratta Yehova. Phimaana, kaanaaviriha iwoora cinci kinari untekoni. Kahancera ulova umikutthaanoni, ni kahohiya khuliiru urwaa usalau. Khweeliini, Sotwani nvarela nteko ila ituninyeela wiira, vakaani-vakaani, aahiihe atthu unswalela Nluku.”
5. Isiyani nrokorihu mmoca yaapankalyaawe nlattu wo masakha yankhumelenle?
5 Mayamunneehu ni asirokorihu akiina ankhala niicuku nlattu wo masakha anaakhumelela. Nrokorihu mmoca neehaniya Anne nokhala u Inglaterra haana asaana 5. Uyo naattonka: “Mwanaka mmoca kannyarale awerennyaka cinene. Wahoolo, mwanaka mwanthiyana ahohiya ukhala Saahiti a Yehova ni mwanaka nkhwaawe mwanlopwana ahancera uwerennya. Kahokhala ni masukhuli menci, mpaka kahohiya urwaa umikutthaanoni ni wuulalyeerani.” Khweeliini, unaaniira uthunku venci ucuwela wiira nrokorihu Anne naamucyaawe, ni hataa ciicammo mayamunneehu akhwaawe anawaakhumelela masakha menci oorika uvilela!
6. Kontha isiyani ntthu hineettela ikano iri nhina Akolosu 3:13 pooti uhiya uthukumana naapoovu a Yehova?
6 Nsome Akolosu 3:13. * Atthu akhwaawe anonswalela Yehova anaakhala ookasiriya nlattu wo itthu ipankiyaaya ni munneehu. Apostolu Paulu ahohimya wiira ukati nkhwaawe naanaahala ukhalana “isariya yonviruwela” munneehu awula nrokorihu. Atthunaka ninoopankiya itthu yoohinamaana; ni naahiivaraceke, hiiva pooti wancera ukhalana icuku awula nruukwa wanrimani wihu. Ni wahoolo, ntthu tthekeliyooyo pooti uhiya uthukumana naapoovu a Yehova nlattu wocuku cirinaawe. Muupuwele itthu yankhumelenle Pablo, munna nokhala u América do Sul. Uyo ahootherihiya upanka itthu yootakhala yahaapankalyaawe ni ahohiihiya uvara miteko co wanlokoni. Pablo aapankale isiyani? Uyo naattonka: “Kahorusiya cinene ni, vakaani-vakaani, kahohiya uthukumana ni mayamunna o wanlokoni.”
7. Isiyani ntthu impankaawe waahintaphuweke nrima nlattu wotampi yaavaralyaawe?
7 Mayamunna akhwaawe khunaataphuwa nrima nlattu wo matampi yaavanryaaya khalayi. Ayo anoopuwela wiira khunaaphwanela ufentiya ni Nluku. Hataa ukhalaka wiira yahottharuwa ni aholeveleliya ni Yehova, ayo khaneecoona wiira unawaaphwanela ukhala wamoca naapoovu a Nluku. Munna mmoca neehaniya Francisco phoopuwelaawe commo. Uyo neera: “Mi kaholakiya wanlokoni nlattu wooraruwa. Wuupaceroni, kanrwaaka umikutthaanoni. Masi wahoolo wahanca ukiriipa nrima. Koopuwela wiira khawaakiphwanela ukhala wamoca naapoovu a Yehova. Nrimaaka khawaakitaphuwa ni kankupali wiira Yehova khaakilevelenle. Wahoolo, kahohiya urwaa umikutthaanoni.” Nnowoona cani mayamunneehu ni asikorokorihu anaakhumelela marikariko yoopenleehu mwaha. Nnaakhitiri uwoonela uthunku? Ni itthu yuulupale cinene, Yehova naawehera cani?
YEHOVA NAAFENTA IKHONTWAA CAWE
Makampuci nsarayeli anwacera saana ikhontwaawe yoorimela (Nwehe iparaagarafu 8-9) *
8. Niireke Yehova nawaaliyala ale yanswalela khalayi nna co ahiile unswalela? Ntaphulele.
8 Yehova khanaaliyala ale yanswalela khalayi nna co ahiile unswalela. Ni uyo khanliyala nteko womaana ayo mayamunnaayo unvarenlyaaya. (Mabere. 6:10) Porofeeta Isaiya hottonkaca nlattanihero nooreera cinene ninthoonyera mananna Yehova cinaafentaawe apoovwaawe. Isaiya hantikha: “Toko makampuci, uyo naahala uwacera ikhontwaa cawe. Ni moonwaawe, uyo naahala uthukumaniha ikhontwaa cawe cankaani, ni naahala ucisa wanikhatani.” (Isai. 40:11) Yehova, Makampuci Muulupale, nokhala cani ikhontwaawe imoca yarimelaka? Yesu hothoonyera mananna Nluku cinkhalaawe ukati waakohalyaawe attharyaawe: “Nnoonela cani? Nlopwana rina ikhontwaa 100 ni yanrimelaka imoca, niireke khanhala uhiya mmamyaakoni ikhontwaa 99 wiira arwee atothe ikhontwaa inrimenle? Ni khweeliini kinawuuhimyerani wiira aphwanyaka iyo ikhontweeyo, inaahala untteeliha nrima cinene uvikana ikhontwaa 99 cihirimenle.”—Mat. 18:12, 13.
9. Makampuci omaana aawacera cani ikhontwaa cawe khalayi? (Nwehe ilatarato iri wakaapani.)
9 Kontha isiyani Yehova unamphwanela ulattanihiya ni makampuci? Kontha khalayi makampuci anwacera ratta ikhontwaa cawe. Wootakihera, Davidi ahomwaattakanana kharamu ni urso wiira akhikicere ikhontwaa cawe. (1 Sam. 17:34, 35) Hataa ihaleelaka ikhontwaa imoca paahi, makampuci omaana ancuwela. (Joau 10:3, 14) Uyo anhiya ikhontwaa cawe 99 muncicini awula anaalepela makampuci akhwaawe wiira awacere ni anrwaa utotha ikhontwaa irimenle. Yesu ahohimya nno nlattaniheronno apheelaka wiitthuciha ikhweeli yuulupale: “Apaapaaka ari wiirimu khampheela wiira arimele hataa ntthu mmoca mwankaani va.”—Mat. 18:14.
Makampuci nsarayeli okhalayi nacisale ikhontwaawe yaarimenle (Nwehe iparaagarafu 9)
YEHOVA NAATOTHA IKHONTWAA CAWE
10. Toko cinthoonyeraaya Ezekiyeli 34:11-16, isiyani Yehova impankaawe wiira akavihere ikhontwaa cawe cirimenle?
10 Yehova naanifenta otheene cihu, hataa naale akhanle ‘ankaani’ arimenle. Nluku ahonruma porofeeta Ezekiyeli uhimya wiira uyo naakhuluveliha utotha ikhontwaa cawe cirimenle ni ukavihera ukhalana upatthani womaana nuuyova. Ezekiyeli ahantikha citthu cinthoonyera mananna Yehova aahalaawe upanka iyo, citthu makampuci nsarayeli caapankesaawe ikhontwaawe yarimelaka. (Nsome Ezekiyeli 34:11-16. *) Woopacera, makampuci aanaakhuma wiira atothe ikhontwaa; iyo ikhanle itthu yaarihakaca ukati mwinci ni waakhala nteko muulupale. Vano aphwanyaka ikhontwaa yaarimenle, makampuci anhokolosera muncicini. Ni wakhala wiira iyo ikhontweeyo ihorakala awula iri niitala, makampuci aanaawacera sana-saana, utthukaca makhwattaaya, uteesa ni uliha. Makampuci anwacera ikhontwaa ca Nluku ilelo, awula mahumu, ahaana yapankaka nnyo citthunnyo wiira yaakavihere ale ahiile unswalela Yehova wanlokoni. (1 Pet. 5:2, 3) Mahumu anaatotha nnyo ikhontwaannyo, anaakavihera wiira cituruwele wanlokoni ni ciicammo anaafenta yakaviheraka wiira cituruwele ukhalana upatthani ni Yehova. *
11. Isiyani makampuci omaana yaacuwelaawe?
11 Makampuci omaana ancuwela wiira ikhontwaa pooti urimela. Ni ikhontwaa imoca yarimelaka, uyo makampucyuuyo khaattarusa. Moone mananna Nluku caakavihenryaawe atthu yanswalela khalayi yaakhumelenle marikariko.
12. Yehova ankavihenre cani Jonas?
12 Porofeeta Jonas ahotthawa nteko waavahiyaawe. Masi Yehova khaamoocaale. Khampa makampuci omaana, Yehova ahomoopola ni ahonkavihera Jonas anvahaka ikuru caapheelaawe wiira ikhitiri avara nteko waarumiyaawe. (Jonas 2:7; 3:1, 2) Wahoolo, Nluku ahomeliha mwiri wiira ankavihere Jonas ucuwela wiira ukumi wa khula ntthu uhaana ifayita. (Jonas 4:10, 11) Nineetthuca isiyani? Mahumu khanlamuliya uwoocya mayamunna ahiile uwa umikutthaanoni awula urwaa wuulalyeerani. Uhiya commo, ayo anaamananiha ucuwela isiyani imwiirihale ntthu uhiya urwaa umikutthaanoni awula wuulalyeerani. Ni uyo ntthuuyo anturuwelaka Yehova, mahumu khanhiya unthoonyera nifento ni unwacera.
13. Nineetthuca isiyani nawehaka mananna Yehova caawacenryaawe itthu yoolumalyaawe nlopwana antikhale Isaalimu 73?
13 Nlopwana antikhile Isaalimu 73 ahokhala niicuku ukati waawoonalyaawe atthu oohinamaana yapuhaka. Uyo aheekoha wakhala wiira unswalela Nluku khweeliini unaaphwanyiha ifayita awula mena. (Isaa. 73:12, 13, 16) Yehova aakhanle cani? Yehova khancacenre uyo nasaalimuuyo. Uhiya commo, Nluku hohiya moolumwaawe uyo nlopwanooyo wiira yantikhiye mbiiblyani. Wahoolo, uyo nlopwanooyo ahocuwela wiira ukhalana upatthani ni Yehova khweeliini phimphwanyiha ifayita uvikana citthu cikhwaawe, ni phimphwanyiha ukumi womaana. (Isaa. 73:23, 24, 26, 28) Nineetthuca isiyani? Ntthu anceraka uhikupali wiira unswalela Yehova unaaphwanyiha ifayita, mahumu khanlamuliya waakuva unhukhumu uyo ntthuuyo. Uhiya umuuluma pusya, mahuku ahaana umananiha ucuwela isiyani immwiiriha uyo ntthuuyo wuupuwela commo. Commo, mahumu phinhalaaya ukhitiri uvarela nteko Ibiiblya wiira anlipihe.
14. Kontha isiyani Eliyasi ampheela ukaviheriya, ni Yehova ankavihenre cani?
14 Porofeeta Eliyasi ahaatthawa apwiyamwene Yesapeli. (1 Mam. 19:1-3) Eliyasi oopuwela wiira uyova paahi phaari porofeeta a Yehova aahanle ni oopuwela wiira aavanre nteko wo mahala. Eliyasi ahokhala ni masukhuli menci mpaka ahonlela ukhwa. (1 Mam. 19:4, 10) Yehova khancacenre Eliyasi. Uhiya commo, Yehova ahonkhuluveliha Eliyasi wiira uyo khaari veekha, ahomwiirela wiira uyo ahaana akhuluvelaka ikuru ca Nluku ni ahonhimyera wiira wahaavo nteko mwinci waalamuliyaawe uvara. Yehova ahonviriyana Eliyasi ratta-raatta ukati waattonkaawe masukhulyaawe ni ahonvaha miteko cikhwaawe. (1 Mam. 19:11-16, 18) Nineetthuca isiyani? Otheene cihu, venci-venci mahumu ninlamuliya uwacera ratta ikhontwaa ca Yehova. Ntthu eeraka wiira noorusiya awula oolumaka wiira khunomphwanela uleveleliya ni Yehova, mahumu ahaana unhiya wiira attonke citthu cotheene cirinaawe wanrimani ni unviriyana. Yamalihaka unviriyana, ayo anaahala umananiha unkavihera woona wiira uyo haana ifayita uhoolo wa Yehova.
NINLAMULIYA UWACERA CANI IKHONTWAA CA NLUKU CIRIMENLE?
15. Toko cinthoonyeraaya Joau 6:39, Yesu aawehera cani ikhontwaa ca Athumwaane?
15 Yehova nopheela wiira niwacere manannani ikhontwaa cawe coorimela? Yesu hothoonyera mananna ninlamuliyeehu uwacera. Uyo ancuwela wiira Yehova noona ukhala cofayita ikhontwaa cawe cotheene. Phimaana uyo ahopanka yotheene yaakhitinryaawe wiira akavihere “ikhontwaa coorimela co nloko no Isarayeli” wiira cinturuwele Yehova. (Mat. 15:24; Luka 19:9, 10) Nlattu wookhala makampuci omaana, Yesu aheekurumica wiira ihikhale nanka ikhontwaa ya Yehova yaahala urimela.—Nsome Joau 6:39. *
16-17. Mahumu anlamuliya wiicoona cani, nhina waakavihera ale ahiile unswalela Yehova? (Nwehe ikwaaturu “ Ikhontwaa yoorimela ineecoona cani?”)
16 Apostolu Paulu ahaakurumica mahumu onloko no Efesu wiira antakihe Yesu. Uyo hantikha: “Nhaana mwaakaviheraka ale alolovile ni nhaana muupuwelelaka moolumo a Apwiiya Yesu, wenryaaya: ‘Uvaha unaatteeliha nrima cinene uvirikana ni waakhelela.’” (Mite. 20:17, 35) Ni khweeliini uyo phinteko urinaaya mahumu ilelo. Humu mmoca nokhala u Espanha neehaniya Salvador, neera: “Koopuwelaka mananna Yehova cinwaceraawe ikhontwaa cawe coorimela, kinawiicoona ukurumiciya wiira kipanke yotheene inhalaaka ukhitiri wiira kikavihere. Kinaacuwela wiira uyo nopheela miiva kiwacere ikhontwaa cawe cirimenle.”
17 Mayamunna yaahiile urwaa umikutthaanoni awula wuulalyeerani aromoliye nhina ula mwahoola, ahokaviheriya ni ahonturuwela Yehova. Ula ukati unoolumeehuula, ahaavo mayamunneehu enci ahiile unswalela Yehova ampheela uhokolya. Isiyani ninlamuliyeehu upanka wiira naakavihere? Mwaha nkiina unhaleehu usoma unaahala uhimya saana citthu cinlamuliyeehu upanka.
NCIPO 139 Imagina-te no Paraíso
^ par. 5 Nlattuni mayamunna akhwaawe akhanle myaakha cinci yanswalelaka Yehova ulankenlyaaya uhiya nloko? Nluku naawehera cani ayo mayamunnaayo? Ula mwahoola unaahala waakhula ala makohwaala. Ciicammo, ninaahala woona isiyani nineetthuceehu nawehaka mananna Yehova caawacenryaawe atthu yanswalela khalayi yaakhumelenle marikariko.
^ par. 1 Macina makiina ahaakakhanihiya.
^ par. 2 NUULUMO NOOTAPHULELIYA: Yeeriyaka namalalyeera hiile ulalyeera naaciya ntthu khanle mweeri 6 awula civikanne, woohirwaa wuulalyeerani. Unookhalaru commo, ale ahiile urwaa wuulalyeerani nanlelo akhanle mayamuneehu ni asirokorihu, ni hiiva ninawaafenta venci.
^ par. 6 Akolosu 3:13 Nhihiye uvilelana ni ulevelelana niiraati, hataa ntthu akhalanaka isariya yonviruwela nkhunanawe. Toko Yehova cuulevelenlyaaweni niiraati, nyuuva nhaana mpankaka ciicammo.
^ par. 10 Ezekiyeli 34:11 Kontha cole phineeraawe Nkhulupale Pwiiya Yehova: “Mi kimwaneennyaaka kinaahala utotha ikhontwaa caka ni kinaahala uwacera. 12 Kinaahala uwacera ikhontwaa caka toko makampuci nophwanya ikhontwaa cawe caarimenle ni nowacera. Kinaahala woopola mapuro otheene waamwarenlyaaya nihuku no mahutte ni nihuku nopiphi. 13 Kinaahala ukumiha iriyari waapoovu ni uthukumaniha mmalaponi, ni kinaahala urweeha ilapwaaya ni kinaahala uliha mmamyaakoni co Isarayeli, kinaahala urweeha mapuro ari maaci ni mapuro otheene ankhaliya naatthu o ila ilapweela. 14 Mi kinaahala urwaa uliha mapuro omaana ni mapuro unhalaaya ulya unkookhala mmamyaakoni coorekama co Isarayeli. Nwo, nnyo cinhala urupa mapuro omaana ni cinhala ulya mapuro omaana mmamyaakoni co Isarayeli.” 15 “Mi kinaahala uwacera ikhontwaa caka ni mi kimwaneennyaaka kinaahala urwaana wuurupani,” neera Nkhulupale Pwiiya Yehova. 16 “Kinaahala utotha ikhontwaa irimenle, kinaahala uturusa ihapuwale, kinaahala utthukaca nikhwatta naya ile inhala urakala ni kinaahala ulipiha ile inhala woocya, masi kinaahala umalamaliha ikhontwaa yooneneva ni yokuru. Nnya mi kinaahala uhukhumu.”
^ par. 10 Mwaha nkiina unhaleehu usoma unaahala uthoonyera mananna mahumu cinlamuliyaaya upanka nnyo citthunnyo.
^ par. 63 ILATARATO: Khalayi, makampuci anwacera ikhontwaawe yarimelaka. Uyo ankhuma wiira atothe ni ankavihera iyo ikhontweeyo uturuwela muncicini. Iyo phi itthu impankaaya mahumu ilelo.
^ par. 67 ILATARATO: Nrokorihu mmoca hiile unswalela Yehova ri nkarerani. Uyo naawoona Masaahiti a Yehova eeli anatteeliye nrima yanlalyeeraka nipuro ninviravira atthu.
