OTHEENE cihu ninaakupali wiira ala mahuku ookhiceraala, Yehova ri mowaahoolela apoovwaawe ni ri mowaavaha iyoolya yoominepani wiira ayo akhitiri umpatthanana. (2 Tim. 3:1) Masi niireke ninnomwiiwelela anihimyeraka itthu? Makhalelweehu anaalattanaca ni makhalelo yaarinaaya apoovu asarayeli ukati waakhalaaya muuthakoni. Yeewaka nipalapatta nirumaka, ayo yaalamuliya upanka itthu.

Yehova ahonruma Moocesi upanka mapalapatta meeli oparaata oohaniya niinyutto. Ayo mapalapattaayo yaavareliya nteko wiira ‘alattuliye apoovu ni wiira athoonyeriye waphiyaka ukati woothama.’ (Manu. 10:2) Anankuttho yaalamuliya woopa ayo mapalapattaayo ni mananna oovirikanaca wiira apoovu acuwele isiyani yaalepeliyaaya upanka. (Manu. 10:3-8) Ilelo, apoovu a Nluku ciicammo anaavahiya malakihero ni mananna oovirikanaca. Ninaahala woopela mwaha malakihero mararu annuupusera mapalapatta yoopiya khalayi ukati waasarayeli: nalattuliyaka wiira nirwee umikutthaanoni cuulupale, mahumu yalattuliyaka wiira arwee yasomihiye ni yakumiheriyaka marukunuso wanlokoni.

Yalukamaka nipuro muuthakoni, maloko o Isarayeli yanrukureerya itabernakulu, masi yaakhala ookawanihiya nhina ukhurupu 4. Ukati nkiina, Yehova aanaaruma wiira “apoovu otheene” athukumane wankhora wotabernaakulu waari mphantte unkhuma ncuwa. (Manu. 10:3) Anankuttho wiira yiihane maloko, yahaana yoopaka mapalapatta oomeeli. Asarayeli otheene yankhitiri wiiwa yoopiyaka mapalapatta oomeeli. Asarayeli yaattamenle mphantte waari nkhora wotabernaakulu yaanaakuva uwa cihinavira iminutu cinci. Masi ale yaarina aheemaaya uttayi yanviriha ukati mwinci ni yaalamuliya wiikurumica venci wiira aphiyeere. Hataa ukhalaka cani, Yehova aapheela wiira apoovu otheene athukumane ni aviriyane malakihero yaahalaaya uvahiya.

Ilelo, hiiva khaninthukumana utabernaakulu, masi ninaalattuliya wiira nithukumane naapoovu a Nluku. Hiiva ninthukumana mmakonkereesuni ni ukati wo mikutthaano cuulupale cikhwaawe uneetthucihiyeehu citthu cofayita venci. Ntuninyani motheene, apoovu a Yehova otheene anviriyana myaha cimocaaru. Atthu otheene anonswalela Yehova anlattuliya ni ahinkhotta urwaa anaapanka mphantte ikhurupu yuulupale yaatthu ootteeliya. Akhwaawe, ahaana yeettaka cinene wiira aphiyeere. Masi akhwaawe khaneetta cinene. Hataa ukhalaka cani, uphiyeera wamikutthaanoni cuulupale cinkhalanaseehu ikhanle itthu yofayita!

Masi ale atepale ukhala uttayi cinene, ankhitiri cani woona nnyo mikutthaano cuulupalennyo? Nlattu woocuwelaca uwile phiyaaru, ayo atthwaayo anaakhitiri woona nnyo mikutthaanonnyo khampa wiira ari wonwo. Wootakihera, munna mmoca ahoveleelihiya nipuro ninhooleliya miteko cihu ntuninyani motheene wiira arwee ootole iPeteli yo Benin. Ipeteli yo Benin yahokhitiri woonihera iyo iporokaraameeyo wasittatti yo Níger ineehaniya Arlit,  inkhala muuthakoni uneehaniya Saara. Atthu ookhalaka 21, mayamunneehu, asikorihu naatthu akhwaawe yahokhitiri woona uyo nkutthaanooyo. Hataa yakhalaka uttayi, ayo yaheecoona ukhala wakhiviru naatthu 44.131 yaathukumanne ule nkutthaano muulupalyoole. Munna mmoca hantikha: “Nihosukhuru venci ni nrimeehu wotheene unoonihera ula nkutthaanoola. Iyo ihonithoonyera wiira nyuuva nnaanifenta venci cinene!”

Anankuttho yoopaka nipalapatta nimoca, “ahooleli aatthu 1.000” phaalamuliya paahi uphiyeera waheemani onkutthaano. (Manu. 10:4) Yaphiyeeraka, ayo yanvahiya malakihero ni yaaneetthucihiya ni Moocesi. Iyo yaanaakavihera uvara ratta ntekwaaya woowacera maloko o Isarayeli. Nyuuva nnari nhooleli mmoca, khweeliini mwanhala wiikurumica wiira mphiyeere.

Ilelo, mahumu o wanlokoni khanakhala “ahooleli.” Ayo khammananiha usupha ikhontwaa ca Nluku. (1 Pet. 5:1-3) Masi ayo khweeliini anawiikurumica wiira yaawacere mayamunna o wanlokoni. Phimaana, yeehaniyaka wiira arwee yasomihiye, toko ucikolani yo Miteko co Umwene, mahumu wowaakuvya anaatthuna. Ayo mapurwaayo, mahumu anaalakiheriya mananna oowacera ratta citthu co wanlokoni. Nlattu wo ayo malakiherwaayo, mahumu ni mayamunna otheene o wanlokoni anaakhalana upatthani woolipa ni Yehova. Hataa ukhalaka wiira nyuuva khannapaca usoma nnyo icikolannyo, khweeliini nnaakaviheriya naale apacale usoma.

Ukati nkiina, anankuttho yaanoopa nipalapatta yattettemelihaka. Commo, apoovu yancuwela wiira Yehova apheela wiira athame nipuro nimakalyaaya. (Manu. 10:5, 6) Asarayeli yaathama nipuro naamakalyaaya oothotokanihiya sana-saana, masi waakhala nteko mwinci ni atthu otheene yahaana yiikurumicaka. Ukati nkiina, atthunaka asarayeli waanaarika uthama. Kontha isiyani?

Asarayeli akiina atthunaka yoopuwela wiira nipalapatta khanaapica wiipiya ni yantutuseriya. “Ukati nkiina nihutte naakhalaka noweemela paahi ukhuma uhiyu mpaka uwicisu.” Ikwaha cikhwaawe, ukati waakhalaaya anamakale nipuro khawaari mwinci. Pooti yaakhala “mahuku meeli,” “mweeri mmoca,” awula “ukati mwinci.” (Manu. 9:21, 22) Ni ikwaha cikavi asarayeli waathamalyaaya mapuro yamakaaya? Ilivuru yo Manummeru, ikapiitulu 33, inaahimya mapuro 40 asarayeli waamakalyaaya.

Ukati nkiina, asarayeli yankhitiri umaka nipuro naari ntthuuci. Iyo yaari itthu yomaama “muuthakoni muulupale ni wowoopiha wotheene ule.” (Deut. 1:19) Nlattu wo iyo, asarayeli atthunaka waanaarika utthuna uthamela nipuro nikhwaawe. Akiina atthunaka yoopuwela wiira khayaahala uthamela nipuro nomaana.

Ukati maloko waapaceraaya uthama, atthu akhwaawe atthunaka waanaanyoonya uweherera uphiya ikwahaaya yoothama. Atthu otheene yaaneewa nipalapatta, masi khayaalamuliya ukhuma otheene weemara imoca. Ikwaha yoopacera woopiyaaya nipalapatta, yaalamuliya uthama maloko yaamakale mphantte unkhuma ncuwa, nloko na Yuuta, Isakar ni Zebulau. (Manu. 2:3-7; 10:5, 6) Ala maloko mararwaala yathamaka, anankuttho yaanoopa nipalapatta ikwaha yonayeeli. Iyo yaathoonyera wiira maloko mararu yaari mphantte woohitto, phaalamuliya uthama. Anankuttho phaapankaaya commo mpaka asarayeli otheene uthama nipuro naamakalyaaya.

Pooti ukhala wiira marukunuso makiina akumiheriye mumphwinkoni woothotokanihiya wa Yehova, yahoorikani utthuna. Nyuuva atthunaka mwahokhala oonyoonyiya cinene nlattu wo marukunuso menci akumiheriye yahaaweherereenyu. Awula pooti ukhala wiira waanoocivela cinene ni mwaholemalela mananna caapankiyaaya citthu, ni mwaakupali wiira khiivo yaalamuliya urukunusiya. Atthunaka wahoorikani wiilemaleliha ayo marukunuswaayo ni wahovira ukati mwinci wiira mwiilemalelihe. Hataa ukhalaka commo, neekurumicaka upanka ile incuweleehu ukhala itthu yomaana, ninaahala woona wiira Nluku naanicaaliha.

Ukati wa Moocesi, Yehova ahaahoolela muuthakoni alopwana, athiyana ni asinamwane enci. Unari wiira khayaahooleliya ni Yehova, asarayeli khayaahala woopwa muuthakoni. Ilelo, Yehova naanihoolela ala mahuku ookhiceraala. Uyo naanikavihera wiira nimpatthanane ni wiira nilipihe waamini wihu. Phimaana nyuuva mweewaka mapalapattha yoopiyaka, mwaatakihe asarayeli ookhuluvelya: woohipica, mpanke itthu inlepeliyeenyu!