MWAHA WOOSOMIYA 26
“Nkituruwele”
“Nkituruwele, ni mi kinaahala wuuturuwelani.”—MAL. 3:7.
NCIPO 102 Ajuda Os Que Estão Fracos
NINHALA WIITTHUCANI? *
1. Yehova nokhala cani amoonaka ntthu aahiile unswalela aturuwaka wiira ahokoleele unswalela?
KHAMPA ciitthucaleehu nhina mwaha uvinre, Yehova neelattaniha ni makampuci ooreera nrima nowacera sana-saana ikhontwaa cawe. Uyo naatotha khula ikhontwaa inhala urimela. Yehova ahowiirela asarayeli yaahiile unswalela: “Nkituruwele, ni mi kinaahala wuuturuwelani.” Hiiva ninaacuwela wiira ilelo iyo ciicammo phi itthu Yehova impheelaawe, kontha uyo honikhuluveliha eeraka: “Mi akinrukunusa makhalelwaaka.” (Mal. 3:6, 7) Yesu heera wiira Yehova ni malayikha anaakhala ootteeliya cinene yamoonaka ntthu aahiile unswalela Yehova aturuwaka wiira ahokoleele unswalela.—Luka 15:10, 32.
2. Ninhala wiitthucani nhina ula mwahoola?
2 Ahaavo malattanihero mararu Yesu yeetthucihalyaawe annithoonyera mananna cinlamuliyeehu waakavihera ale ahiile unswalela Yehova. Ninaahala usoma ayo malattaniherwaayo ni wiitthuca makhalelo anlamuliyeehu uthoonyera wiira naakavihere unturuwela Yehova mayamuneehu ahiile urwaa umikutthaanoni awula wuulalyeerani. Ciicammo ninaahala woona nlattuni ukhanlyaaya itthu yomaana wiikurumica upanka iyo.
NTHIYANA NOTOTHA NSURUKHU WANRIHYAALE
3-4. Nthiyana nottonkiya nhina Luka 15:8-10, nlattuni uneekurumicaawe utotha nsurukhu wo dracma wanrimenle?
3 Nihaana niikurumicaka venci wiira nikhitiri waaphwanya ale arimenle ampheela unturuwela Yehova. Nlivuruni ya Luka, Yesu heetthuciha nlattanihero na nthiyana yanrihyaale itthu yofayita cinene: nsurukhu wokhalayi weehaniya dracma. Mphantte muulupale wo nno nlattaniheronno, akhanle mananna nthiyana ceekurumicalyaawe wiira aphwanye nsurukhu wanrihyaale.—Nsome Luka 15:8-10. *
4 Yesu naattonka mananna uyo nthiyanooyo cinkhalaawe aphwanyaka nsurukhu waatothaawe. Ukati wa Yesu, nihuku athiyana naatheliyaaya yanvahiya naanumwanaya misurukhu 10 co dracma. Nsurukhu wanrihyaale ule nthiyanoole atthunaka waari nsurukhu waavahiyaawe nihuku naatheliyaawe. Uyo oopuwenle wiira nsurukhu wanrihyaale atthunaka waamorenle vathi. Phimaana naaparihela isamininnyaawe ni naakela waavya, masi khanoona. Isamininnya khintepa upharela cinene wiira inkavihere uyo nthiyanooyo woona nsurukhu mwankaani unrihyaale. Uvira waya ukati, ule nthiyanoole naaphwanya nsurukhu wanrihyaale. Wantthupini nonkanyenryaawe wiira arihe, uyo nthiyanooyo nawoona itthu yoonnyeelaka: waari nsurukhu waatothawe! Uyo naakhala ootteeliya venci! Naawiihana asimpwanaawe ni aattamanannyaawe ni nawaahimyeera wiira hokhitiri woona nsurukhu wanrihyaale!
5. Kontha isiyani pooti unirika waaphwanya ale ahiile unswalela Yehova?
5 Nno nlattanihero na Yesu nno ninthoonyera wiira napheelaka uphwanya itthu irihyaale nihaana niikurumicaka venci. Iyo phi itthu inkhumelela ukati wo waatotha ale ahiile uwa umikutthaanoni awula urwaa wuulalyeerani. Nihaana niikurumicaka venci wiira naaphwanye. Atthunaka cihovira myaakha cinci ayo woohirwaa umikutthaanoni. Atthunaka ahothamela nipuro nikiina, ni khancuweliya ni mayamunna ankhala nno nipuronno. Masi ula ukati unoolumeehuula, ahaavo atthu ahiile uwa umikutthaano awula urwaa wuulalyeerani ampheela unturuwela Yehova. Ayo anaapheela unswalela Nluku wamoca ni mayamunaaya ni asirokoraya, masi ampheela ukaviheriya.
6. Atthu otheene wanlokoni, anlamuliya ukavihera cani waatotha ale ahiile urwaa umikutthaanoni awula wuulalyeerani?
6 Tipani nlamuliya ukavihera waatotha ale ahiile urwaa umikutthaanoni awula wuulalyeerani? Otheene cihu—mahumu, mapiyoneeru, amuci ni anamalalyeera o wanlokoni. Khanrina mpatthaniinyu awula mmuciinyu hiile unswalela Yehova? Ukati woolalyeera mmawaani awula mapuro anviravira atthu, nhopaca umphwanya ntthu hiile unswalela Yehova? Pooti ukhala wiira uyo naatthuna wootoliya ni mahumu o wanlokoni. Wakhala wiira naapheela, munlepele wiira mwaavahe mahumu o wanlokoni nummeru nawe no telefooni.
7. Citthu cittonkalyaawe munna neehaniya Thomas ciwiitthucihaleni isiyani?
7 Isiyani mahumu inlamuliyaaya upanka wiira akhitiri waaphwanya ale ampheela unturuwela Yehova? Moone itthu impankesaawe humu mmoca o Espanha neehaniya Thomas, * aakavihenre atthu oopwaha 40 unturuwela Yehova. Uyo naattonka: “Woopacera, mi kinawaakoha mayamunna enci wakhala wiira anaacuwela mapuro ankhalaaya mayamunna ahiile urwaa wuulalyeerani. Awula kinawaakoha anamalalyeera wakhala wiira anaamuupuwela munna hiile uwa umikutthaano. Mayamunna enci unawaacivela kaakohaka commo, kontha ayo anawoona wiira anaakavihera waatotha ale ampheela unturuwela Yehova. Vano, karwaaka umootola munna hiile unswalela Yehova, kinankohaka asaanaawe awula amucyaawe. Enci yaanaacisaka umikutthaanoni asaanaaya, ni ayo asaanaayo atthunaka yaari anamalalyeera. Ayo asaanaayo pooti ciicammo ukaviheriya unturuwela Yehova.”
MWAAKAVIHERE UTURUWELA WANLOKONI ASAANA A YEHOVA ARIMENLE
8. Munlattaniheroni ninttonkiya nhina Luka 15:17-24, athumwaane mwaana anonwacera cani mwanaya ttharuwale?
8 Makhaleloni ninlamuliyeehu uthoonyera wiira naakavihere uturuwela wanlokoni ale ahiile unswalela Yehova? Moone itthu inniitthucihaaya nlattanihero Yesu neetthucihalyaawe na mwaana aathamale wapuwani waathumwaane. (Nsome Luka 15:17-24. *) Yesu naattonka itthu inkhumelela uyo mwaanooyo attharuwaka ni aturuwelaka uwaani. Athumwaane anantthawelela wiira arwee yamwaakhelele ni yankapatte, kontha ampheela wiira mwanaya acuwele wiira ananfenta venci. Uyo mwaanooyo nawaahimyera athumwaane mananna cineecoonaawe ni athumwaane anaamoonela uthunku. Vano, athumwaane anaapanka citthu wiira anthoonyere mwanaya wiira uyo nawaakheleliya khampa mwaana owapuwani, woohikhala toko nanteko. Wiira anthoonyere iyo, anaaruma wiira mwanaya ttharuwale apankeliye isukuhuulu ni ananvaha ikuwo comaana.
9. Makhaleloni ninlamuliyeehu uthoonyera wiira naakavihere uturuwela wanlokoni ale ahiile unswalela Yehova? (Nwehe ikwaaturu “ Mananna onkavihera ntthu nopheela uturuwela wanlokoni.”)
9 Yehova khanle toko nnyari himiye munlattaniheroni neetthucihalyaawe Yesu. Mayamuneehu ni asikorihu ahiile urwaa umikutthaanoni awula wuulalyeerani Yehova nawaafenta venci ni nopheela wiira anturuwele. Nintakihaka Yehova, hiiva ciicammo pooti waakavihera. Wiira naakavihere, nihaana nithoonyeraka uvilela, ikiriri ni nifento. Nlattuni ninlamuliyeehu uthoonyera ayo makhalelwaayo ni manannani ninlamuliyeehu uthoonyera?
10. Kontha isiyani nihaana nivilelaka ukati unonkavihereehu ntthu unturuwela Yehova?
10 Nihaana naavilelaka ale ahiile unswalela Yehova kontha pooti uvira ukati mwinci wiira ayo anturuwele Yehova. Enci yaahiile unswalela Yehova anaattonka wiira ahinaaya uturuwela wanlokoni, mahumu ni mayamunna akiina yahowootola ikwaha cinci. Nrokorihu mmoca nokhala u Ásia neehaniya Nancy, hantikha co: “Mpwanaaka o wanlokoni mmoca ahokikavihera venci! Uyo ankifenta khampa nuunwaaka. Ahokuupusera citthu comaana caapankaleehu ni caanikhumelenle nkhayi. Uyo ankiviriyana ukati waattonkaka citthu caakiira wanrimani waka, ni ankivaha ikano woohikoonela ihaaya. Uyo hothoonyera ukhala mpatthani eekhweeli, aatthuna ukikavihera khula ukati waapheelaaka ukaviheriya.”
11. Nlattuni ninlamuliyeehu uthoonyera ikiriri wiira ninkavihere ntthu ri ni masukhuli menci?
11 Umoonela ikiriri ntthu unkhala nrette muulupale. Pooti unkavihera wiicoona ratta ntthu ri ni masukhuli menci. Atthu akiina anhiile Yehova anaakhala myaakha cinci yancukulacaka munna o wanlokoni; ni nlattu wo iyo, ayo pooti uhipheela unswalela Yehova. Akiina pooti wuupuwela wiira anoopankiya itthu yoohinamaana awula khawaceriye niisariya. Ayo mayamunnaayo anompheela ntthu oohala waaviriyana ni uwoonela ikiriri. (Tiya. 1:19) Nrokorihu neehaniya Maria, aakhanle ukati mwinci hirwaaka wuulalyeerani, neera: “Mi kampheela mpatthani oohala unttonkela citthu caakiira, kampheela ntthu oohala ukimaaliha, ukivaha ikano comaana ni ukikavihera.”
12. Ninfento na Nluku ninlattanaca cani ni nkhoyi?
12 Ibiiblya ineera wiira nifento Yehova naathoonyeraawe apoovwaawe ninlattanaca ni nkhoyi. Masi ninfento na Nluku ninlattanaca cani ni nkhoyi? Muupuwele ila itthwiila: Muupuwele wiira nyuuva nhomorela mpahari yo maaci oocaca ni ooririya cinene. Ni nri moottittha mmaacini. Uyo ukatyuuyo, naawa ntthu niikalawaawe ni nawuuvonyerani ikuleti yo mmaacini inlamuliyeenyu uwara wiira nhittitthe. Khweeliini, nyuuva mwanhala unsukhuru uyo ntthuuyo, kontha ikuleti yuuvahalyaaweni inaahala wuukaviherani uhittittha mmaacini. Masi iyo ikuletiiyo paahi khayaahala uwoopolani. Wiira moopwe, nyuuva nhaana nkhumaka mmaacini, kontha maacyaayo akhanle ooririya venci. Phimaana, nyuuva mwaahala upheela wiira ntthu ri nkalawani oovonyereni nkhoyi unhaleenyu uvara ni unhala wuukaviherani uphiya nkalawani. Yehova ahowiirela asarayeli co: ‘Akihiile uwettiherani ni mikhoyi co nifento.’ (Ose. 11:4) Inanna imoca, Nluku naawehera ale ahiile unswalela khampa atthu anttittha mpahari, nlattu wo masankiho ni masukhuli arinaaya. Ni uyo nopheela wiira ayo atthwaayo acuwele wiira nawaafenta ni ahiliyale wiira uyo nopheela waapurula ni nkhoyi wiira anturuwele. Ni Yehova pooti wuurumani nyuuva wiira mwaathoonyere ayo atthwaayo mananna uyo cinaafentaawe.
13. Itthu yankhumelenle Pablo inthoonyera cani wiira waafenta mayamunneehu pooti waakavihera venci?
13 Unaareera cinene uwiirela ale ahiile urwaa umikutthaanoni awula wuulalyeerani wiira Yehova nawaafenta ni hiiva ciicammo ninawaafenta venci. Pablo romoliye nhina mwaha uvinre, ahokhala myaakha coopwaha 30 hirwaaka wuulalyeerani. Uyo neera: “Nihuku nimoca, kakhumaka nluwani waka kahaakumanana arokorihu o wanlokoni ooreera nrima owuuluvala. Ayo yahokuulumana ni nifento mpaka mi kahancera wunla venci toko mwaana. Mi kahowiirela wiira ayo yaaveleelihiye ni Yehova wiira akuulumane. Ule phuukati waalakenlyaaka unturuwela Yehova.”
MWAAKAVIHERE NI NIFENTO ALE ALOLOVILE
14. Toko cinthoonyeraaya nlattanihero na Yesu nhina Luka 15:4, 5, makampuci aapankile isiyani uphwanya wawe ikhontwaa yaarimenle?
14 Kaninlamuliya uhiya waakavihera ale ahiile unswalela Yehova. Toko mwaana aathamale wapuwani nottonkiya munlattaniheroni na Yesu, mayamunna ahiile unswalela Yehova atthunaka ari ooriipiya nrima venci. Ni nlattu wo citthu caakhumelenle ntuninyani ya Sotwani, ayo pooti uhikhalana upatthani woolipa ni Yehova toko caarinaaya khalayi. Phimaana, nihaana naakaviheraka wiira alipihace umwaamini waya Yehova. Munlattaniheroni nokhontwaa yaarimenle, Yesu hohimya wiira makampuci naacisa wanikhatani ikhontwaa yaarimenle ni naaturusela nipuro niri ikhontwaa cikiina. Uyo makampucyuuyo ahorihakaca ukatyaawe ni ikuru cawe atothaka ikhontwaa yaarimenle. Hataa ukhalaka commo, uyo naacuwela wiira iyo ikhontweeyo khinhala uturuwela ukhalana ikuru veekha caya. Uyo naacuwela wiira haana ateesaka mpaka nipuro niri ikhontwaa cikhwaawe.—Nsome Luka 15:4, 5. *
15. Isiyani ninlamuliyeehu upanka wiira naakavihere ale alolovile unturuwela Yehova? (Nwehe ikwaaturu “ Ikaruma yuulupale.”)
15 Atthunaka nihaana nilevaka ukatiihu ni ikuru cihu wiira ninkavihere ntthu aahiile unswalela Yehova waanana marikarikwaawe. Masi nakaviheriyaka ni nnepa wowaarya wa Yehova, Nuulumo nawe ni ilivuru cihu, hiiva ninaahala ukhitiri waakavihera ulipihaca upatthani waarinaaya ni Yehova. (Aroo. 15:1) Ninlamuliya upanka cani iyo? Humu mmoca oocuwelaca neera: “Enci yaahiile unswalela Yehova, ukati unturuwelaaya wanlokoni anampheela ntthu oohala waasomiha Ibiiblya.” * Phimaana, mahumu yoolepelakani wiira munsomihe Ibiiblya ntthu aahiile unswalela Yehova, nnoonela cani utthuna iyo iparakheeyo? Uyo humuuyo ciicammo neera: “Munna nonsomiha Ibiiblya ule aahiile unswalela Yehova, haana athoonyera ukhala mpatthani omaana ni nohala ukhuluveliya ni ntthu nonsomihaawe Ibiiblya.”
AHAAVO UNAATTEELA NRIMA WIIRIMU NI WATUNINYANI
16. Nincuwela cani wiira malayikha anaanikavihera?
16 Cihaavo citthu cinci cikhumelenle cinthoonyera wiira malayikha anaanikavihera waatotha ale ampheela unturuwela Yehova. (Apoka. 14:6) Wootakihera, Silvio nokhala u Equador ahopanka nivekelo anlepelaka Yehova wiira ankavihere uturuwela wanlokoni. Alompakoono, nkhora woowannyawe wahaattiya: yaari mahumu meeli yaawile umootola. Mahumu yahokhala ootteeliya venci nlattu wowancera unkavihera Silvio.
17. Nineecoona cani nankaviheraka ntthu uturuwela wanlokoni?
17 Waakavihera ale alolovile unturuwela Yehova pooti unitteeliha nrima venci. Moone itthu ihimyalyaawe Salvador, piyoneeru eekurumicale venci waakavihera mayamunna yaahiile unswalela Yehova. Uyo neera: “Ukati nkiina, mi kinaakhala ootteeliya nrima mpaka kinawunla. Unaakitteela nrima venci nlattu woovara nteko nkhayi ni Nluku wiira kinkavihere ntthu ukhuma ntuninyani ya Sotwani ni uturuwela wanlokoni.”—Mite. 20:35.
18. Wakhala wiira nyuuva nhohiya uwa umikutthaanoni awula urwaa wuulalyeerani, isiyani inlamuliyeenyu ukupali?
18 Hataa ukhalaka wiira nyuuva nhohiya unswalela Nluku wamoca naapoovwaawe, mwaamini ni nkupali wiira Yehova nawuufentani. Uyo nopheela wiira nyuuva munturuwele. Khweeliini cihaavo citthu cinlamuliyeenyu upanka wiira nturuwele wanlokoni. Masi toko caakhanlyaaya athumwaane mwaana himiye munlattaniheroni na Yesu, Yehova nwoonani upica uturuwela wanlokoni. Ni uyo nawuuwehererani wiira awaakheleleni sana-saana.
NCIPO 103 Os Anciãos São Um Presente de Jeová
^ par. 5 Yehova nawaalattula ale ahiile uwa umikutthaanoni awula urwaa wuulalyeerani. Uyo nwiirela: “Nkituruwele.” Yehova nopheela wiira ayo atthwaayo atthune nno nlattulonno. Ahaavo mananna menci hiiva ninlamuliyeehu waakurumica ayo mayamunnaayo ni waakavihera uturuwela wanlokoni. Nhina ula mwahoola, ninaahala woona manannani.
^ par. 3 Luka 15:8 Awula nthiyanani rina misurukhu 10 co dracma, waahala unrimela nsurukhu mmoca, ahaahala uparihela nthuko, ukweca mpaani wawe ni utotha ratta-raatta mpaka uphwanya uyo unsurukhuuyo? 9 Ni aphwanyaka, uyo nawaathukumaniha asimpwanaawe ni aattamanannyaawe, ni naawiirela: ‘Ntteeliye nrima wamoca ni miiva, kontha kihophwanya nsurukhu wodracma waakirihyaale.’ 10 Inanna imoca, kinawuuhimyerani wiira malayikha a Nluku unawaatteela nrima cinene nlattu wa ntthu mmoca namatampi nottharuwa.”
^ par. 7 Macina makiina ahaakakhanihiya.
^ par. 8 Luka 15:17 Ukati waattharuwalyaawe, uyo aheera: “Khamala ananteko aapaapa arina iyoolya yinci, mi kikhwaaka itala uno uryaakoono! 18 Nikwahanaka uturuwela uwaani waapaapa, ni kinrwaa uwiirela: ‘Paapa, mi kihottheka wiirimu ni kihootthekelani nyuuva. 19 Khunkiphwanela-tho wiihaniya mwaninyu. Nkiwacere khampa nantekweenyu.’” 20 Coo, uyo ahonwa ni ahorwaa waathumwaane. Nari uttayi, athumwaane yahomoona ni yahomoonela ikiriri; phimaana yahontthawelela, yahonkapatta ni yahonvaha ipeecu. 21 Vano mwaanooyo ahowiirela athumwaane co: “Paapa, mi kihottheka wiirimu ni kihootthekelani nyuuva. Khunkiphwanela-tho wiihaniya mwaninyu.” 22 Masi athumwaane yaheerela ipottha caya co: “Mwaakuve! Nwaane ihancu yoorekama, nthanle yomaaneeyo ni munwarihe, munwarihe aneli muntatani nawe ni munwarihe camphali nnyaani wawe. 23 Nwaane ciicammo imoope yooneneveeyo, nhite ni nttwee nilye, ni nitthape, 24 kontha ula mwanakoola ahokhwa masi hoturuwela ukhala nkumi, aahoorimela masi hophwanyiya.” Ni yahokela utthapa.
^ par. 14 Luka 15:4 Nlopwanani iriyariinyu aahala ukhalana ikhontwaa 100, unrimela imoca, ahaahala uhiya uttuli muuthakoni ikhontwaa 99 wiira arwee atothe ikhontwaa irimenle mpaka wanhalaawe uphwanya? 5 Ni aphwanyaka iyo ikhontweeyo, uyo naateesa wanikhatani ni unantteela nrima venci.
^ par. 15 Mayamunna akiina yaahiile unswalela Yehova pooti waasomana ilivuru Continue a Amar a Deus. Itthu inhala waakavihera venci akiina, ukhanle uthanlaca ikapiitulu colivuru Achegue-se a Jeová ni waasomiha nnyo ikapiitulunnyo. Mahumu o wanlokoni naya phinhala ulakela tipani unomphwanela unsomiha ntthu aahiile unswalela Yehova.
^ par. 71 ILATARATO: Mayamunna araru oovirikana anankavihera munna mmoca uturuwela wanlokoni. Wiira ankavihere, ayo khanhiya umuulumana, anankhuluveliha wiira Yehova ni mayamunna o wanlokoni ananfenta ni ananviriyana ratta ratta.
