MWAHA WOOSOMIYA 24
“Ukivahe nrima mmoca wiira koove ncina naa”
“Ukivahe nrima mmoca wiira koove ncina naa. Mi kinawuuttottopela ni nrimaaka wotheene, oo Yehova, Nlukwaaka.”—ISAA. 86:11, 12.
NCIPO 7 Jeová, Nossa Força e Poder
NINHALA WIITTHUCANI? *
1. Umoova Nluku maanaaya isiyani, ni kontha isiyani unaareera umoova Nluku iyo inanneeyo?
MAKRISTAU ananfenta Nluku ni ciicammo anaamoova. Masi atthu akhwaawe pooti wiikoha co: ‘Anwa cani yanfentaka ni ukati yooyo umoova?’ Masi umoova Nluku unaaciya va, khunakhala umoova woonoopiha. Ninhala wuuluma inanna ikhwaawe yoomoova. Atthu arina iyo inanna yowooveeyo ananhisima cinene Nluku. Ni umoova Nluku iyo inanneeyo unaareera, kontha unaanikhottiha upanka itthu inhala waariipiha nrima Apaapeehu owiirimu ni uhonona upatthaniihu naayova.—Isaa. 111:10; Miru. 8:13.
2. Toko cinhimyaaya moolumo a Davidi ari nhina Isaalimu 86:11, citthuni piili cinhaleehu wiitthuca nhina ula mwahoola?
2 Nsome Isaalimu 86:11. * Nasomaka ala moolumwaala, unawoonannya wiira Davidi ancuwela wiira umoova Nluku ikhanle itthu yooreera. Ula mwahoola unaahala unithoonyera isiyani anniitthucihaaya moolumo a Davidi. Yoopacera, ninaahala woona nlattuni ninlamuliyeehu woova ncina na Nluku. Yonayeeli, ninaahala woona manannani ninlamuliyeehu uthoonyera wiira ninawoova ncina na Nluku nhina citthu cimpankeehu khula nihuku.
KONTHA ISIYANI NIHAANA NIHISIMAKA CINENE NCINA NA NLUKU?
3. Isiyani yankhumelenle Moocesi yankavihenre woova ncina na Yehova?
3 Muupuwele mananna Moocesi caakhanlyaawe ukati waakhoromalyaawe nnikhukuni no mwala ni woonalyaawe uttitthima wa Yehova uviraka uhoolo wawe. Iyo atthunaka yaari itthu yooverihela utikhiniha yankhumelenle pinaatamu hinaaya uwa Yesu Kristu watuninyani. Moocesi aheewa ncu, ni nno ncunno atthunaka naari no nlayikha. Neera co: “Yehova, Yehova, Nluku okiriri ni nathunku, oovilela ni oomwiinciva unamaana ni ikhweeli, nwoonihera nifento nookhuluvelya atthu imiliyawu cene, alevelelaka coottheka, ni matampi.” (Nkw. 33:17-23; 34:5-7) Moocesi atthunaka aanoopuwelaka ala moolumwaala aromolaka ncina na Yehova. Hataa phimaana wahoolo Moocesi ahaakurumica apoovu asarayeli woova “nna ncina noottitthima nimphwanela wooviyanna.”—Deut. 28:58.
4. Isiyani inhala utepa uniiriha unhisima Yehova?
4 Noopuwelaka ncina Yehova, ciicammo nihaana namuupuwelaka Mwaneene nno ncinanno. Nihaana nuupuwelaka makhalelwaawe, toko ikuru cawe, ucuwelaca wawe, unasariyaawe ni nifento nawe. Wuupuwela ala makhalelwaala ni makhalelo makhwaawe arinaawe, unaahala uniiriha utepa unhisima Nluku.—Isaa. 77:11-15.
5-6. a) Ncina na Yehova maanaaya isiyani? b) Toko cinhimyaaya Nkwaha 3:13, 14 ni Isaiya 64:8, manannani Yehova cineerannyeehaawe itthu inlakelaawe?
5 Ncina na Nluku maanaaya isiyani? Anamasoma enci anaakupali wiira ncina na Yehova maanaaya wiira “Uyo nawiirannyeeha ile impheelaawe upanka.” Iyo inaanuupusera wiira khiivo nanka itthu inhala unhiiha Yehova wiirannyeeha itthu impheelaawe. Uyo alakelaka wiirannyeeha itthu, inaahala wiirannya. Manannani?
6 Yehova alakelaka upanka itthu, uyo nawiikhaliha khula itthu wiira eerannyeehe ilakenlyaawe. (Nsome Nkwaha 3:13, 14. *) Ilivuru cihu imaara cinci cinaanikurumica wuupuwela iyo ikhalelo yuulupaleeyo. Ni Yehova ciicammo pooti waakhaliha apinaatamu oopahuwa khula itthu impheeliya wiira akhitiri unswalela ni upanka itthu impheelaawe. (Nsome Isaiya 64:8. *) Ala mananna meelyaala, Yehova nawiirannyeeha itthu impheelaawe ni khiivo inonhiiha.—Isai. 46:10, 11.
7. Isiyani ninlamuliyeehu upanka wiira nitepe waatikhinaca ni waahisimu Apaapeehu o wiirimu?
7 Noopuwelaka citthu Yehova cipankalyaawe ni cinikavihenryaawe upanka, ninaahala utepa waatikhinaca ni waahisimu Apaapeehu o wiirimu. Wootakihera, noopuwelaka citthu Yehova cumpalyaawe, hiiva ninaahala utepa untikhinaca. (Isaa. 8:3, 4) Ni noopuwelaka citthu cinnikaviheraawe upanka, ninaahala utepa unhisimu. Khweeliini, ncina na Yehova ninaaphwanela wooviya! Nno ncinanno ninaaca makhalelo otheene arinaaya Apaapeehu, citthu cotheene cipankalyaaya ni cinhalaaya upanka uhoolo.—Isaa. 89:7, 8.
“KINAAHALA ULALYA NCINA NA YEHOVA”
Ukati Moocesi waawiitthucihaawe asarayeli ncipo, uyo ahaalipiha, kontha aahoolelihenre uwiitthuciha ncina na Yehova ni makhalelwaawe (Nwehe iparaagarafu 8) *
8. Toko cinhimyaaya Deuteronomiyu 32:2, 3, Yehova nopheela wiira ncina nawe niirihiye isiyani?
8 Unahanle ukati vakaani wiira asarayeli akele ilapo yaakhuluvelihiyaaya, Yehova ahomwiitthuciha Moocesi ncipo. (Deut. 31:19) Ni Yehova ciicammo ahonruma Moocesi uwiitthuciha asarayeli nno nciponno. (Nsome Deuteronomiyu 32:2, 3. *) Noopuwelaka iveerusu 2 ni 3, ninaakhitiri ucuwela wiira Yehova khampheela wiira ncina nawe nivithiye, ni khampheela wiira atthu yoove uromola nno ncinanno nlattu wookhala nowaarya. Yehova nopheela wiira atthu otheene acuwele ncina nawe! Khweeliini, yaari iparakha yuulupale asarayeli wiitthucihiya myaha ca Yehova ni ncina nawe noottitthima! Toko ipula inrupa vakaani-vakaani cimmiceraaya miri wiira cuunuwe, citthu Moocesi caawiitthucihalyaawe asarayeli cahaalipiha ni cahaatteeliha nrima. Ni hiiva ukati unwiitthuciheehu akhunanihu Ibiiblya, nihaana nintakihaka Moocesi.
9. Ninhala ukavihera cani ureeriha ncina na Yehova?
9 Ukati woolalyeera mmawaani awula mapuro anviravira atthu, nvarele nteko Ibiiblya wiira mwaathoonyere atthu ncina na Nluku, Yehova. Nvarele nteko saana ilivuru cihu comaana, ividiyu cihu ni isayitiihu inonttitthimiha Yehova. Ntekoni, ucikolani awula nnari nkaaroni nrwaaka nipuro nikhwaawe, mwiikurumice waalyalyeera atthu myaha ca Nlukweehu onifento ni mananna uyo ciryaawe. Mwaahimyacere citthu comaana Yehova cimpheelaawe waapankela atthu wahoolo. Mwapankaka commo, nnaahala waakavihera atthu umoona Yehova ni mananna makhwaawe. Ninaahala ukavihera ureeriha ncina na Nluku ni umalamaliha citthu cinoothaceriyaawe Yehova atthu ciitthucalyaaya. Ni myaha co mbiiblyani atthu cinwiitthuciheehu cikhanle myaha comaana ayo cinlamuliyaaya wiitthuca.—Isai. 65:13, 14.
10. Ukati wonsomiha ntthu Ibiiblya, kontha isiyani khuntosa paahi umwiitthuciha malamulo a Yehova?
10 Ukati unonsomiheenyu ntthu Ibiiblya, munkavihere ucuwela ni uvarela nteko ncina na Yehova. Munkavihere uncuwela Nluku Mwaneene nno ncinanno. Niireke umwiitthuciha malamulo paahi unaahala unkavihera uncuwela Yehova ratta? Ninaacuwela wiira namasoma Ibiiblya omaana naahala ucuwela malamulo a Nluku ni utikhinaca. Masi uyo aahiitthuceke unfenta Yehova, unaahala unrika umwiiwelela. Mmuupuwele Eva. Uyo aanaacuwela nlamulo na Nluku. Masi hataa ukhalaka commo, uyo khanfenta weekhweeli Ule aavahale nno nlamulonno. Ni Atamu ciicammo khanfenta . (Upha. 3:1-6) Phimaana, uhiya paahi uwiitthuciha akhunanihu malamulo osariya a Yehova, nihaana nipankaka-tho itthu ikhwaawe.
11. Ukati woomwiitthuciha ntthu malamulo a Yehova, ninhala unkavihera cani unfenta Ule vahale ayo malamulwaayo?
11 Malamulo a Yehova akhanle omaana ni anaanikavihera. (Isaa. 119:97, 111, 112) Masi ntthu nonsomiheehu Ibiiblya khanhala wuupuwela commo aahicuweleke wiira Yehova pankale ayo malamulwaayo nlattu woonifenta. Phimaana, munkonhe ntthu nonsomiheenyu co: “Kontha isiyani Yehova unnirumaawe upanka ila ni unnikhottiihaawe upanka ila? Nna nlamulonna ninniitthuciha isiyani nhina makhalelwaawe?” Makoho toko ala pooti unvara nrima ntthu nonsomiheehu. Ala makohwaala anampankiha ntthu nonsomiheehu Ibiiblya umuupuwela Yehova ni anankavihera ufenta ncina nawe. Ntthu nonsomiheehu Ibiiblya khanhala paahi ufenta malamulo, masi ciicammo naahala unfenta Ule vahale ayo malamulwaayo. (Isaa. 119:68) Waamini wawe unaahala ukhala woolipa, ni uyo naahala ukhitiri uvilela masakha oorika anhala unkhumelela wahoolo.—1 Akor. 3:12-15.
“HIIVA NINHALA WEETTELA NCINA NA YEHOVA”
Uhaavo ukati Davidi waahiilyaawe nrimaawe ukhalaka wowaawanyanihiya (Nwehe iparaagarafu 12)
12. Ukatini Davidi waahiilyaawe ukhalana nrima mmoca, ni nlattu wo iyo isiyani yaakhumelenle?
12 Nhina Isaalimu 86:11, mwene Davidi heera: “Ukivahe nrima mmoca.” Ala akhanle moolumo moolupale. Muukumini wawe motheene, Davidi ancuwela wiira nrima pooti ukhala wowaawanyanihiya. Nkwaha mmoca, neemenle waculu inupaawe, uyo ahomoona nthiyana aatheliye ni nlopwana nkhwaawe arapaka. Ule ukatyuule, nrima wa Davidi waari cani? Niireke waari mmoca awula wowaawanyanihiya? Uyo ancuwela nlamulo na Yehova nineera: “Uhuucivele waacisa amwaara ankhunanaa.” (Nkw. 20:17) Masi unoonannyaa wiira Davidi khaahiile unweheeha ule nthiyanoole. Nrimaawe wahokhala wowaawanyanihiya nlattu woopheela citthu piili: umpheela ule nthiyanoole, Pate-Sepa, ni ciicammo upheela unciveliha Yehova. Hataa wakhalaka wiira aananfenta ni ammoova Yehova, Davidi ahovara matampi moolupale cinene. Uyo ahonanariha ncina na Yehova ni ahaawaanela masakha menci atthu yahaatthekale ni ciicammo amucyaawe.—2 Sam. 11:1-5, 14-17; 12:7-12.
13. Nincuwela cani wiira nrima wa Davidi wahoturuwela ukhala woohaawanyanihiya?
13 Davidi aholakiya ni Yehova ni ahoturuwela ukhalana upatthani womaana ni Yehova. (2 Sam. 12:13; Isaa. 51:2-4, 17) Uyo ahoopuwela masakha ni uhuva wamphwanyale ukati waahiilyaawe nrimaawe ukhalaka wowaawanyanihiya. Moolumo ari nhina Isaalimu 86:11 ciicammo pooti utaphuleliya co: “Ukivahe nrima woohaawanyanihiya.” Niireke wiira Yehova ahonkavihera Davidi ukhalana tootho nrima woolikana ni woohaawanyanihiya? Iyee. Nincuwela iyo kontha Ibiiblya inawuuluma wiira wahoolo Davidi aari nlopwana ‘answalela Yehova, Nlukwaawe ni nrimaawe wotheene.’—1 Mam. 11:4; 15:3.
14. Isiyani ninlamuliyeehu wiikoha, ni nlattuni?
14 Itthu yankhumelenle Davidi inaanilipiha, masi ciicammo inaanithoonyera itthu inlamuliyeehu wuupuwela. Matampi moolupale yaavaralyaawe Davidi anaanithoonyera wiira ilelo khaninlamuliya wiitthaala. Phimaana, hataa nikhalaka wiira nipacenre unswalela Yehova khalayi awula mphiyaaruni, nihaana niikohaka co: ‘Kiireke wiira kinankhottela Sotwani amananihaka waawanyaniha nrimaaka?’
Sotwani naahala upanka yotheene inkhitiryaawe wiira aawanyanihe nrimeenyu. Masi nhinhiye apankaka iyo! (Nwehe iparaagarafu 15-16) *
15. Umoova Nluku unnikhikicera cani wiira nihoone ilatarato cinaathoonyera atthu oohiwara ikuwo ratta?
15 Wootakihera, nyuuva nnopankaka isiyani yakhumelaka ilatarato ya ntthu oohiwara ikuwo ratta nteeveni awula mwinternetini? Ahaavo aneera: ‘Kinawoona, kontha khinakhala ipornografia.’ Niireke wiira Sotwani khanvarela nteko yeeyo ilataratweeyo wiira aawanyanihe nrimeenyu? (2 Akor. 2:11) Nnyo ilataratonnyo cinkhala toko ipaco awula maxato ntthu nonvarelaawe nteko wiira aserule mwiri muulupale. Ukati wooserula, uyo nvarela nteko mphantte wo maxato wiithale ni ukati unonneelihaawe maxato mmwirini, uyo unaaparuwa ni unawiikawaniha. Inanna imoca, ilatarato cinwoonihera atthu oohiwara ikuwo ratta pooti waawanyaniha nrimeehu. Toko mphantte wo maxato uneetha unkhalaaya wooyevayeva, nnyo ilataratonnyo cinkhala toko cankaani ni coohinanara, masi woohipica nnyo pooti waawanyaniha nrima wa ntthu ni unvariha itampi. Phimaana, nhihiye itthu yoohiloka ikelaka wanrimani winyu! Nkhalihe nrimeenyu mmoca wiira moove ncina na Yehova!
16. Ukati unttehattehiyeehu upanka citthu cootakhala, isiyani ninlamuliyeehu wiikoha?
16 Uhiya ilatarato cinaathoonyera atthu oohiwara ikuwo ratta, Sotwani naavarela nteko citthu cikiina wiira anihapuse. Ninlamuliya upanka isiyani? Atthunaka atthu akhwaawe anoopuwela co: ‘Akinhala ukumihiya wanlokoni nlattu woopanka ila itthwiila. Phimaana khitepale utakhala.’ Masi ukhalana ala moopuwelelwaala unawoopiha. Phimaana unaareera wiikoha co: ‘Kiireke ila khinakhala itthu Sotwani invarelaawe nteko wiira aawanyanihe nrimaaka? Isiyani inhala wiirannya kapankaka citthu cootakhala? Kinaahala unanariha ncina na Yehova? Upanka ila itthwiila unaahala ukikavihera ukhala mpatthani a Nluku awula mena?’ Muupuwele ala makohwaala. Munlepele Yehova ucuwelaca wiira nkhitiri waakhula ala makohwaala woohivitha itthu. (Tiya. 1:5) Mwapankaka commo nnaahala wiikhikicera wiira nhipanke citthu coohinamaana. Ciicammo, nnaahala ukhalana ikuru wiira munkhottele Sotwani toko Yesu caakhunlyaawe: “Ukhume va, Sotwani!”—Mat. 4:10.
17. Kontha isiyani nrima wowaawanyanihiya khurina ifayita cinene? Utakihere.
17 Nrima wowaawanyanihiya khurina ifayita. Muupuwele ikhiipa yaanabola oohiiwanana. Akhwaawe ampheela uttitthimihiya veekha caya paahi, akhwaawe khampheela weettela mattharelelo obola ni akhwaawe khampheela unhisima ule nowiitthuciha bola. Woonela winyu, iyo ikhiipeeyo yanhala utthema? Wiira ikhitiri utthema, ikhiipa yotheene ihaana yiiwananaka. Inanna imoca, nrimeenyu unhala utthema wakhalaka wiira moopuwelelweenyu, citthu cimpheeleenyu ni citthu cinwiirani cintthariha malamulo a Yehova ni khacikhanle cowaawanyanihiya. Nhiliyale: Sotwani nopheela waawanyaniha nrimeenyu. Uyo nopheela wiira moopuwelelweenyu, citthu cimpheeleenyu ni citthu cinwiirani cihitthare malamulo a Yehova. Masi wiira munswalele Yehova, nrimeenyu uhaana ukhalaka woohaawanyanihiya. (Mat. 22:36-38) Phimaana, nhinhiye Sotwani aawanyanihaka nrimeenyu!
18. Toko cinhimyaaya Mikeya 4:5, isiyani weeva inlamuliyaa ulakela?
18 Nlompe munlepelaka Yehova toko Davidi caalepenlyaawe: “Ukivahe nrima mmoca wiira koove ncina naa.” Mpanke yotheene inkhitiriinyu wiira mweettele itthu ilepenleenyu. Nhina citthu cotheene cinhaleenyu ulakela, cikhale cankaani awula cuulupale, nthoonyere wiira nnaahisima ncina nowaarya na Yehova. Mwapankaka commo, nyuuva nnaahala ukhala Saahiti a Yehova khweeliini nttottopela nno ncinanno. (Miru. 27:11) Ni otheene cihu ninaahala wuuluma nkhayi ni porofeeta Mikeya, niiraka: “Hiivano, ninhala weettela ncina na Yehova, Nlukwiihu, ukati wotheene, mpaka.”—Mik. 4:5.
NCIPO 41 “Ouve a Minha Oração”
^ par. 5 Ula mwahoola unaahala uniitthuciha nivekelo naapankalyaawe mwene Davidi nantikhiye nhina Isaalimu 86:11, 12. Umoova Yehova maanaaya isiyani? Kontha isiyani nihaana nihisimaka ncina nuulupale na Yehova? Ni umoova Nluku unnikavihera cani ukhotta upanka citthu coohinamaana?
^ par. 2 Isaalimu 86:11 Yehova, ukiitthucihe iphiro caa. Kinaahala weettela ikhweelyaa. Ukivahe nrima mmoca wiira koove ncina naa.
^ par. 6 Nkwaha 3:13 Masi Moocesi ahonkoha Nluku eekhweeli co: “Karwaaka uwoonanana asarayeli kiwiirelaka co: ‘Nluku o mayanhataateenyu hokiruma uwoonananani,’ vano ayo yakikohaka co: ‘Ncina nawe pani?’ kinhala waahimyerani? 14 Vano Nluku ahoowiirela Moocesi: “Mi Kinaahala Wiikhaliha Ile Inhalaaka Ulakela Wiikhaliha.” Ni aheera-tho: “Ila phinlamuliyaa waahimyeera asarayeli: ‘Mi Kinaahala Wiikhaliha hookiruma uwa uwoonananani.’”
^ par. 6 Isaiya 64:8 Masi nna va, nyuuva nkhanle Athumwanihu. Hiiva nikhanle uloko, ni nyuuva nkhanle noolokweehu; otheene cihu numpiye ni matateenyu.
^ par. 8 Deuteronomiyu 32:2 Citthu cineetthucihaaka cinaahala waaphwanya atthu khampa ipula; moolumwaaka anaahala umwaryeela khampa ukame, khampa ipula inrupa vakaani-vakaani immicera malasi ni khampa ipula inrupa venci immicera miri. 3 Kontha kinaahala ulalya ncina na Yehova. Nlalyee ukhulupale wa Nlukweehu!
