MWAHA WOOSOMIYA 25
Nhinkakathule “nanka ntthu mwankani va”
“Ratta! Nhinthanye nanka ntthu mwankani va.”—MAT. 18:10.
NCIPO 113 A Paz Que Vem de Deus
NINHALA WIITTHUCANI? *
1. Isiyani Yehova impankilyaawe khula ntthu iriyariihu?
YEHOVA honwaana khula ntthu wanlokoni wawe wiira answalele. (Joau 6:44) Mweemele ni muupuwele ratta iyo itthwiiyo. Yehova haaweha atthu otheene ntuninyani ni hoona mirima caya; ni ukati wuuwehalyaaweni nyuuva, uyo howoonani wiira nhaana nrima womaana, nrima woohala unfenta uyova. (1 Ikor. 28:9) Yehova nawuucuwelani, nawuuwacerani ni nawuufentani. Ucuwela iyo itthwiiyo unaanimaaliha!
2. Yesu oolumale isiyani innikavihera woona wiira Yehova naaniwacera otheene cihu?
2 Yehova nawuuwacerani venci, ni uyo nawaawacera mayamunneenyu o wanlokoni otheene. Yesu ahonlattaniha Yehova ni makampuci nowacera ikhontwaa cawe. Wakhala wiira makampuci haana ikhontwaa 100 ni hoona wiira ikhontwaa imoca ihorimela, isiyani inhalaawe upanka? Uyo naahala “uhiya mmamyaakoni ikhontwaa 99 wiira arwee atothe ikhontwaa inrimenle.” Ni aphwanyaka ikhontwaa yaarimenle, uyo khanhala ucaceraca iyo ikhontweeyo nlattu woorimela, masi nohala ukhala ootteeliya nrima. Nno nlattaniheronno ninniitthuciha isiyani? Ninniitthuciha wiira Yehova nawoona ukhalana ifayita khula ikhontwaawe. Yesu aheera: “Apaapaaka ari wiirimu khampheela wiira arimele hataa ntthu mmoca mwankaani va.”—Mat. 18:12-14.
3. Isiyani inhaleehu woopela mwaha nhina ula mwahoola?
3 Khweeliini, hiiva khanimpheela upanka itthu yaahala unvololiha munneehu awula nrokorihu o wanlokoni. Isiyani inlamuliyeehu upanka wiira nihaakakathule akhunanihu? Ni isiyani inlamuliyeehu upanka akhunanihu yanipankaka itthu yooniriipiha nrima? Nhina ula mwahoola, ninaahala waakhula ayo makohwaayo. Masi nihinaaya woopela mwaha ayo makohwaayo, nttwee noone phaapani akhanle ‘atthu ankaani’ Yesu yaaromonlyaawe nhina Matewus ikapiitulu 18.
‘ATTHU ANKAANI’ YESU AWUULUMALYAAWE PHAAPANI?
4. ‘Atthu ankaani’ Yesu awuulumalyaawe phaapani?
4 ‘Atthu ankaani’ Yesu awuulumalyaawe akhanle attharyaawe. Hataa yakhalaka owuuluvala, ayo ankhala ‘atthu ankaani’ kontha anawaaminnyeela wiitthucihiya ni Yesu. (Mat. 18:3) Hataa yakhalanaka ilema coovirikana ni hataa yoonuwelaka mapuro oovirikanaca, otheene anaamwaamini Yesu Kristu. Phimaana, Yesu nawaafenta otheene caya.—Mat. 18:6; Joau 1:12.
5. Yehova nokhala cani amoonaka ntthu aaripihaka nrima awula aakakathulaka ale anonswalela?
5 Khula ntthu “mwankaani” Yehova naamoona ukhalana ifayita. Wiira nicuwele inanna Yehova cinoopuwelaawe, muupuwele inanna nyuuva cinaawehereenyu asinamwane. Hiiva otheene ninawaawacera ratta asinamwane. Nimpheela waakhikicera kontha ninaacuwela wiira ayo kharina ikuru ni ankhili toko ntthu muulupale. Hiiva khunnicivela umoona ntthu ahuvihiyaka, ni khunnicivela hataa vakaani ni mpaka ninaarusiya venci namoonaka ntthu anhuvihaka mwanhima. Inanna imocaaru, Yehova mpheela unikhikicera ni uyo naakhala ooriipiya nrima ni khunoncivela hataa vakaani umoona ntthu aaripihaka nrima awula aakakathulaka ale anonswalela!—Isai. 63:9; Mark. 9:42.
6. Toko cihimiyaaya nhina 1 Akorintu 1:26-29, atthu o ntuninyani anaawehera cani ale anonswalela Yehova?
6 Isiyani-tho inthoonyera wiira atthari a Yesu unawaaphwanela wiihaniya ‘atthu ankaani’? Mwiikohe co: ‘Ntuninyani, phaapani anooniya ukhala atthu oolupale?’ Mathaciri, atthu oocuwelaciya ni akhulupale. Ni commo kahi phiryaaya atthari a Yesu. Phimaana atthu o ntuninyani anwoona atthari a Yesu ukhala “ankaani,” awula oohitepa ukhalana ifayita. (Nsome 1 Akorintu 1:26-29. *) Masi Yesu kahi phinniweheraawe commo.
7. Manannani Yehova cimpheelaawe wiira naawacere mayamunneehu?
7 Yehova nawaafenta atthu otheene anonswalela—ale yancenre uswalela khalayi ni hataa naale yancenre unswalela mphiyaaruni. Mayamunna ni miyanuunwiihu otheene Yehova naawoona ukhalana ifayita. Phimaana, hiiva ciicammo nihaana nawoonaka ukhalana ifayita. Nimpheela uthoonyera ‘ufenta mphwinko wo mayamunna wotheene.’ (1 Pet. 2:17, niwehero.) Nilakele ni naamini upanka yotheene inhaleehu ukhitiri wiira naakhikicere ni naawacere mayamunneehu. Wakhalaka wiira nihonriipiha nrima munna mmoca awula nihopanka itthu ihincivenle, khaninlamuliya ukhala khampa wiira khiivo yiirannyeele, ni khaninlamuliya wuupuwela wiira ntthuuyo phinlamuliya ulevaca ni uliyala itthu imuulumenleehu awula impankaleehu. Isiyani inwiiriha atthu akiina waakuva urusiya? Mayamunna akiina nlattu wo nipuro nuunuwenlyaaya awula mananna cuunuwihiyaaya, khaneecoona ukhalana ifayita, phimaana ayo pooti waakuva utthekeliya. Akhwaawe, yiitthucale ikhweeli mphiyaaruni ni khanaaya wiitthuceeha uwacera saana citthu cinvonyaaya akhunanaya. Hataa ukhalaka commo, hiiva nihaana niikurumicaka wiira nimmalihe nanrokottole. Masi ntthu oohipica utthekeliyooyo ciicammo haana eekurumicaka urukunusa makhalelwaawe. Upanka commo, unaahala unkavihera ukhala ninnema wanrimani wawe ni naahala waakavihera akhunanawe ukhala saana.
MWAWEHERE AKHWIINYU UKHALA OOLUPALE WUUPWAHANI NYUUVA
8. Moopuweleloni aayuuta yaakenle atthari a Yesu?
8 Nlattuni Yesu waawuulumalyaawe ayo ‘atthu ankannyaayo’? Kontha attharyaawe yaahonkoha co: “Tipani khanle khweeliini muulupale muumweneni wo wiirimu?” (Mat. 18:1) Ayuuta enci ule ukatyuule yaapheela wooniya ukhala atthu oolupale. Namasoma mmoca oopenle mwaha ayo moopuwelelwaayo heera co: “Ule ukatyuule, alopwana yaakhala yatothaka uttitthimihiya, uhisimiya ni utikhinaciya naatthu.”
9. Isiyani atthari a Yesu yaalamuliyaaya upanka?
9 Yesu ancuwela wiira ayuuta enci waanaacivela utotha usinttana ni, phimaana attharyaawe yahaana yiikurumicaka cinene wiira ahikhalane ayo moopuwelelwaayo. Uyo ahowiirela: “Ule khanle muulupale iriyariinyu akhale toko mwankaani, ni ule nohoolela akhale toko nanteko.” (Luka 22:26) Hiiva nineekhaliha toko mwanhima ‘naaweheraka akhwiinyu ukhala oolupale unipwaha hiiva.’ (Afili. 2:3) Neekurumicaka upanka iyo, ninaahala ukhitiri unyema waakakathula akhunanihu.
10. Ikanoni ya apostolu Paulu inlamuliyeehu otheene cihu weettela?
10 Khula ukati, inaakhalaka itthu inwiiriha mayamunneehu otheene ukhala oolupale univikana hiiva. Khunrika woonelela iyo wakhalaka wiira ninaaweheha makhalelwaaya omaana. Nihaana neettelaka ikano apostolu Paulu yaavahilyaawe mayamunna o Korintu: “Tipani nookhaliha oovirikana naakhwaa? Khweeliini, isiyani irinaa ihaakhenlyaa? Wakhala wiira khweeliini unowaakhela citthu cotheene cirinaa, nlattuni uneettitthihacaa wiikhalihaka khampa khuwaakhenle?” (1 Akor. 4:7) Noonelelaka wiira unaaniciva utikhinaciya awula neecoonaka ukhalana ifayita waapwaha akhwiihu, unawoopiha. Wootakihera, munna nocuwela utaphulela saana myaha wanlokoni ni nrokorihu nocuwela waakuva umphwanya ntthu onsomiha Ibiiblya, ahaana yanttottopelaka Yehova nlattu wo citthu cinkhitiryaaya upanka.
MWAALEVELELE AKHWIINYU “NINRIMEENYU WOTHEENE”
11. Nlattanihero na mwene niipotthaawe ninniitthuciha isiyani?
11 Umaliha wawe waahimyera attharyaawe wiira yahaana yanyemaka waakakathula akhwaaya, Yesu ahaattonkela nlattanihero nimoca: nlattanihero na mwene niipotthaawe. Uyo mwennyooyo aholevelela ipotthaawe yaalokihaawe nsurukhu mwinci wahaahalaaya ukhitiri uliva. Wahoolo, iyo ipottheeyo khayaatthunale unlevelela nkhunanaya yanlokihaaya nsurukhu vakaani. Ukati mwene weewalyaawe iyo, ahoruma wiira ipottha yaakhottile unlevelela nkhunanaya itthukeliye nkhattya. Isiyani ineetthuceehu? Yesu ahohimya: “Apaapaaka o wiirimu anaahala wuutafitini inanna imocaaru, mwaahinleveleleke munneenyu ninrimeenyu wotheene.”—Mat. 18:21-35.
12. Isiyani atthunaka inhala ukhumelela naahaaleveleleke akhunanihu?
12 Ile ipottha yoohinamaaneele yaheewaanela masakha ni yahaawaanela masakha akhunanaya. Woopacera, iyo ipottheeyo khayaathoonyenre nifento ni khayanwacenre saana nkhunanaya. Iyo “yahontthukiiha nkhunanaya nkhatteya mpaka waahalaawe uliva nsurukhu wanlokihaaya.” Yoonayeeli, uyo ahaariipiha nrima akhunanawe. “Ukati ipottha cikiinannyo wonnyaaya itthu yaakhumelenle, cahoriipiya nrima cinene.” Inanna imocaaru, citthu cimpankeehu pooti waapanka pusya akhunanihu. Wakhalaka wiira haavo munna nitthekenle ni hiiva ninaakhotta unlevelela, isiyani inhala ukhumelela? Yoopacera, hiiva ninanriipiha nrima munneehu nlattu woohinwacera ni woohinthoonyera nifento. Yonayeeli, mayamunna akiina o wanlokoni unaahala uwuula muru yoonaka wiira khanimmuulumiha saana uyo munnooyo.
Nyuuva nnopheela ukhala niicuku wanrimani winyu awula unlevelela nkhunaninyu? (Nwehe iparaagarafu 13-14) *
13. Itthu yaakhumelenle arokorihu anvara nteko weepiyoneeru inniitthuciha isiyani?
13 Naalevelelaka mayamuna ni miyaanunwiihu, atthu otheene wanlokoni anaakhala saana. Iyo phi itthu yoonelenlyaaya arokorihu anhaleehu uwiihana Crystal, anvara nteko weepiyoneeru. Nrokorihu mmoca o wanlokoni ahaatthekela. Arokorihu Crystal aneera: “Ukati nkiina, citthu coolumaawe uyo nuunuuyo caanaakihoma khampa mwaalo. Ukati woorwaa ncoko waalalyeereehu, mi akaapheelaka unkelana ikaaro imoca. Kahancera uhiikurumica wuulalyeerani ni khawaakitteela nrima.” Arokorihu Crystal yoopuwela wiira yahaana isariya yonviruwela uyo nrokorihuuyo. Masi ayo khayaakhanle yancukulaka uyo nrokorihuuyo ni khayaahoolelihenre wiicoonela uthunku ayova. Uhiya commo, ayo yaheeyeviha ni yahotthara ikano yo mbiiblyani inttonkiya nhina mwaha uneera: “Mwaalevelele akhwiinyu ninrimeenyu wotheene” nhina irevista Ukhalenla 15 yo Outubro yo 1999. Arokorihu Crystal yahokhitiri unlevelela uyo nrokorihuuyo. Ayo aneera: “Nna va, kinaacuwela wiira otheene cihu nineera neekurumicaka uhiya meettelo okhalayi, ni Yehova naanilevelela niiraati khula nihuku. Waaminnyaaka unlevelela, waakhala khampa kaahoorula nritti muulupale waarinaaka. Vano wahancera ukitteela nrima tootho.”
14. a) Toko cinthoonyeraaya Matewus 18:21, 22, isiyani atthunaka yanrika apostolu Peturu? b) Isiyani inhala unikavihera wakhala wiira hiiva ciicammo inaanirika iyo itthwiiyo?
14 Hiiva ninaacuwela wiira nihaana naalevelelaka akhwiihu ni khanintikhina wiira iyo phi itthu yooreera upanka. Hataa ukhalaka commo, waalevelela akhwiihu pooti unirika. Apostolu Peturu atthunaka yahomwiira iyo itthwiiyo. (Nsome Matewus 18:21, 22. *) Wakhala wiira nyuuva unawuurikani waalevelela akhwiinyu, isiyani inhala wuukaviherani? Itthu yoopacera, muupuwele ikwaha Yehova cuulevelenlyaaweni. (Mat. 18:32, 33) Hataa ukhalaka wiira khunniphwanela uleveleliya, Yehova nawaamini unilevelela. (Isaa. 103:8-10) Vano, ninlamuliya wuupuwela wiira “hiiva ciicammo nihaana nifentanaka.” (1 Jo. 4:11) Itthu yonayeeli inhala unikavihera ukhanle wuupuwela isiyani inhala ukhumelela nanlevelelaka nkhunanihu. Nanlevelelaka ntthu, hiiva ninankavihera uyo ntthuuyo, ninaakavihera wanlokoni ukhala wiiwananiya, ninaakhikicera upatthaniihu ni Yehova ni ninaarula nrintti muulupale mmakhatani wihu. (2 Akor. 2:7; Akol. 3:14) Itthu yoneeraru ukhanle unlompa ule nonilepela waalevelela akhwiihu. Nhinhiye Sotwani amalihaka nnema nirineehu ni mayamunneehu. (Efesu 4:26, 27) Nihaana nikaviheriyaka ni Yehova wiira nikhitiri ukhakhala ninnema wanlokoni.
NHIKAKATHUWE NLATTU WO CITTHU CIMPANKAAYA AKHUNANINYU
15. Nuupuwelaka itthu inhimyaaya Akolosu 3:13, isiyani inlamuliyeehu upanka munneehu anitthekelaka?
15 Vano wakhalaka wiira munna o wanlokoni holuma awula hopanka itthu ihuucivenleni, isiyani inlamuliyeenyu upanka? Mwiikurumice upanka inhaleenyu ukhitiri yotheene wiira mummalihe nanrokottole. Munlompe Yehova ni munhimyere citthu cotheene cinwiirani wanrimani winyu. Munlepele wiira uyo ancaalihe munna ootthenkeleni. Ciicammo, munlepele wuukaviherani woona makhalelo omaana rinaawe uyo munnooyo—makhalelo ammwiiriha Yehova unfenta. (Luka 6:28) Moona wiira khannokhitiri uleva itthu yuupankilyaaweni, muupuwele mananna omaana oorwaa umuulumana. Khula ukati unaareera hiiva wuupuwela wiira ntthu nitthekenle khapankile imweeni. (Mat. 5:23, 24; 1 Akor. 13:7) Nhiliyale iyo itthwiiyo ukati unhaleenyu umuulumana. Vano wakhalaka wiira uyo khampheela uwuulumanani wiira mummalihe uyo nanrokottolyooyo, isiyani inreera upanka? ‘Nhihiye unvilela.’ Nhimoocye munneenyu awula nrokorinyu. (Nsome Akolosu 3:13. *) Ni itthu yuulupale cinene phi ila: nhikhale muncukulacaka uyo ntthuuyo. Kontha upanka commo unaahala uhonona upatthiinyu ni Yehova. Nhihiye hataa itthu yuukakathulakani. Mweekurumicaka upanka citthu cotheennnya, nyuuva nnaahala uthoonyera wiira nnaahoolelihera unfenta cinene Yehova uvikana itthu ikhwaawe.—Isaa. 119:165.
16. Isiyani otheene cihu inlamuliyeehu ukavihera?
16 Hiiva ninoona ukhala iparakha yuulupale cinene unswalela Yehova niiwananaka khampa “nikhoto nimoca, ninhooleliya ni makampuci mmoca”! (Joau 10:16) Ilivuru Organizados Para Fazer a Vontade de Jeová ipaagina 165, ineera: “Ukhala wiira nyuuva nnaaphwanyera ifayita wiiwananiya uphwanyileenyu wanlokoni, nhaana nkaviheraka wiira wiiwananiya urivo wanlokoni uhimale.” Phimaana, nihaana niitthucaka ‘waawehera mayamunneehu khampa Yehova cinaaweheraawe.’ Otheene cihu Yehova naanoona ukhalana ifayita. Niireke nyuuva ciicammo munnowoona ukhalana ifayita mayamunneenyu ni miyanuunwiinyu? Yehova nawoona ni cinancivela citthu cotheene cimpankeehu wiira naakavihere ni naawacere mayamunneehu.—Mat. 10:42.
17. Isiyani ilakenleehu upanka?
17 Hi ninawaafenta venci mayamunneehu. Phimaana, niholakela “uhipanka itthu yaahala uvukula waamini wa munneenyu awula yaahala unkakathula.” (Aroo. 14:13) Ninaawoona mayamunneehu ukhala oolupale univikana hiiva ni khaninhala uhiya waalevelela ninrimeehu wotheene. Nhinhiye nanka ntthu ookakathulakani. Uhiya commo, nlakele uttharatthara “citthu cimmwaana nnema ni citthu cinaalipiha akhunanihu.”—Aroo. 14:19.
NCIPO 130 Nihaana nilevelelanaka
^ par. 5 Ukhala wiira naatthu o matampi, ikwaha cikiina pooti wuuluma awula upanka itthu inhala waariipiha nrima mayamunna awula miyanuunwiihu o wanlokoni. Isiyani impankeehu yanikhumelelaka iyo itthwiiyo? Niireke ninawiikurumica upanka yotheene inkhitiriihu wiira nimmalihe nanrokottole? Ninawaakuvela ulepela nsammaha? Awula ninoopuwelaka co: ‘Wakhala wiira uyo nookiviruwela, iyo yawawe; mi akincuwela’? Ninawaakuvaka urusiya nlattu wo khula itthu akhwiihu inoolumaaya ni impankaaya? Ninaamananihaka wiivaha isariya neeraka co: ‘Mi phiryaaka co’ awula ‘ala phi makhalelwaaka’? Awula ninawaaminnyeelaka wiira nihovonya ni nihaana niikurumicaka urukusa makhalelweehu?
^ par. 6 1 Akorintu 1:26 Nlattu wo wiihaniya winyu nyuuva mayamunna, nnaakhitiri woona wiira iriyaryaaya ale yiihaniye, khayincivale atthu oocuwelaca cinene uhoolo waapinaatamu, khayincivale akhulupale ni atthu ankhuma mmatthokoni coopuhiya. 27 Masi, Nluku hothanla citthu cootirikhyaaca co ntuninyani wiira awoonihace ihaaya atthu oocuwelaca; ni Nluku hothanla citthu coololovaca co ntuninyani wiira oonihace ihaya citthu cokuru. 28 ni Nluku hothanla citthu coohikhalana nttitthimiho co ntuninyani ni citthu coothanyiya, citthu cihirina ifayita, wiira amalamalihe citthu cirina ifayita, 29 wiira hikhale ntthu nhala wiittitthihaca uhoolo wa Nluku.
^ par. 14 Matewus 18:21 Vano, Peturu ahomwaattamela Yesu ni ahonkoha: “Pwiiya, munnaaka akitthekelaka, kinleveleleke mpaka ikwaha kavi? Mpaka ikwaha 7?” 22 Yesu aamwaakhunle co: “Mi akinwiirela wiira unlevelele mpaka ikwaha 7, masi mpaka ikwaha 77.”
^ par. 15 Akolosu 3:13 Nhihiye uvilelana ni ulevelelana niiraati, hataa ntthu akhalanaka isariya yonviruwela nkhunanawe. Toko Yehova cuulevelenlyaaweni niiraati, nyuuva nhaana mpankaka ciicammo.
^ par. 56 ILATARATO yo ipaagina: Nrokorihu mmoca nonviruwela nrokorihu nkiina. Wahoolo, anawoopaca mwaha ni anammaliha nanrokottole. Ayo anaaliyala itthu yaakhumelenle ni ananswalela Yehova waatteelaka nrima.
