1-2. Isiyani yantikhilyaawe nlopwana mmoca, ni ninhala wiitthucani nhina ula mwahoola?

ATTHU enci ilelo aneera wiira anankupali Yesu, masi khaneettela citthu ciitthucihalyaawe. (2 Tim. 4:3, 4) Ninawoona yiirannyaaka itthu yantikhalyaawe nlopwana mmoca: “Unari wiira ilelo ahaavo Yesu nkhwaawe neetthuciha citthu Yesu oniiniini caahimilyaawe. . . , niireke nanhala unkhotta khampa cankhottileehu myaakha 2.000 uttuli? . . . Atthunaka naahala waakhula: ‘Iyee, nanhala unkhotta.’”

² Atthu enci yaakhala iseekulu yoopacera, yahonviriyana Yesu eetthucihaka ni yahomoona apankaka mitikhiniho, masi hataa ukhalaka commo ayo khayaamwaamini. Kontha isiyani? Mwaha woosomiya uvinre, uhothoonyera citthu cese caapankihale ayo atthwaayo unkhotta Yesu nlattu wo citthu coolumalyaawe ni caapankalyaawe. Nhina ula mwahoola, ninaahala woona-tho citthu cese. Ciicammo, ninaahala woona nlattuni atthu ilelo ankhottaaya waakupali atthari a Yesu ni isiyani inhala unikavihera uhihiya waamini urineehu.

3. Isiyani Yesu yaapankaawe yaawiirihile atthu unkhotta?

³ Ukati Yesu waaryaawe watuninyani va, aanawaapatthanana atthu otheene. Uyo aanawaalyana mathaciri ni akhulupale, masi ciicammo aanaaviriha ukati naatthu yaari amasikhini ni yahaawaceriya saana. Ciicammo, Yesu aanaawoonela uthunku atthu yooniya ukhala “anamatampi.” Nlattu wo iyo itthwiiyo, atthu akhwaawe yeecoona weettela isariya yahonkhotta Yesu. Ayo yahaakoha atthari a Yesu: “Kontha isiyani nyuuva nnaalya ni uwurya nkhayi naanamaliviha nsokho ni anamatampi?” Yesu ahowaakhula co: “Atthu oohiwerennya khammwaavya meetiku, masi ale anwerennya phimmwaavya. Mi akiwaale uwiihana ale aneettela isariya wiira arukunuse meettelwaaya, masi anamatampi.”—Luka 5:29-32.

4. Toko cinthoonyeraaya inatiri ya Isaiya, ayuuta yahaana yawehereraka wiira Yesu yanhala unkhumelela isiyani?

 ⁴ Isiyani Ibiiblya inhimyaaya? Mesiya hinatthi uwa watuninyani, porofeeta Isaiya ahohimya wiira uyo khaahala utthuniya naatthu o wantuninyani. Inatiri ya Isaiya yeera co: “Hothanyiya ni usempiya naatthu . . . Waari khampa naahoovitheliya ikhovyaawe. Hothanyiya ni khaninwacenre.” (Isai. 53:3) Toko cinthoonyeraaya iyo inatiriiyo, Mesiya anhala ‘uthanyiya naatthu.’ Phimaana, ayuuta yaakhala iseekulu yoopacera yancuwela wiira Yesu anhala ukhottiya.

5. Atthu enci ilelo anaawehera cani atthari a Yesu?

⁵ Niireke inaanikhumelela iyo itthwiiyo ala mahukwaala? Iyee. Ahooleli ottiini enci anawaahulelaka mikhora cookereeca caya akhulupale o ntuninyani, mathaciri ni atthu anooniya ntuninyani ukhala oocuwelaca. Ayo ahoolelyaayo anawaacivela uwoona atthu toko ayo yakelaka mmattiinini waya, hataa yakhalaka atthu ahintthara meettelo anoncivela Nluku. Ni ayo ahooleli ottiinnyaayo anawaathanya apoovu a Yehova. Makristau eekhweeli anookhalaru atthu owiikurumica ni antthara meettelo anoncivela Nluku, khanoniya ukhala atthu arina ifayita ntuninyani. Toko cinryaawe apostou Paulu, Nluku nothanla “citthu coothanyiya.” (1 Akor. 1:26-29) Masi Yehova naawoona atthu otheene anonswalela ukhalana ifayita venci.

6. Ninhala utakiha cani makhalelo athoonyihenryaawe Yesu, anhimiya nhina Matewus 11:25, 26?

⁶ Isiyani inlamuliyeehu upanka wiira nihihiye waamini wihu? (Nsome Matewus 11:25, 26. *) Nhiihiye nthepiyaka nlattu wo mananna atthu o ntuniyani cinaaweheraaya apoovu a Nluku. Nkupali wiira Yehova naakhuluvela atthu o wiiyeviha paahi upanka citthu cimpheelaawe. (Isaa. 138:6) Ni muupuwele citthu cotheene Yehova cipankilyaawe aavahaceraka atthu ahinooniya usoma cinene ni ucuwelaca ntuninyani.

7. Nlattuni Yesu ahaahukhumu ahooleli ottiini, ni ayo isiyani yaapankilyaaya?

⁷ Yesu ahaahukhumu ahooleli ottiini ule ukatyuule. Athoonyeraka ulipa nrima, Yesu ahaavaanyiha mafarisewu kontha ayo yaanaahoolelihera cinene unyawiha matata, uhiya waawacera asithumwanaya. (Mat. 15:1-11) Atthunaka atthari a Yesu yahokhala ootikhinihiya nlattu wo mananna coolumacilyaawe. Phimaana ayo yahonkoha co: “Pwiiya nnaacuwela wiira ayuuta ahonyoonyiya wiiwa waya itthu yuulumileenyu?” Masi Yesu ahowaakhula eeraka: “Khula mwiri Apaapaaka o wiirimu uhaalilyaaya unaahala ufeliya. Nhaakhalele masukhuli ayo atthwaayo. Ayo akhanle ahooleli oohoona. Ni, ntthu oohoona anhoolelaka oohoona nkhunanawe, ooyeeli ankoowuluwela munlikittini.” (Mat. 15:12-14) Yesu khaahiile uhimya ikhweeli, hataa ukhalaka wiira ahooleli ottiini yaanaarusiya ni Yesu nlattu wo citthu coolumaawe.

8. Yesu aavaanyihale cani moopuwelelo anhimya wiira Nluku cinancivela citthu cineetthucihaaya ittiini cotheene?

⁸ Yesu ciicammo ahovaanyiha citthu cowoothiya ceetthucihiya mmattiinini. Uyo ahovaanyiha moopuwelelo owiiriya wiira Nluku cinancivela ittiini cotheene. Uhiya commo, Yesu aheera wiira atthu enci anhala weettela iphiro inrwaana wuutankanyiyani ni atthu vakaani phaahala weettela iphiro imphwanyiha ukumi woohimala. (Mat. 7:13, 14) Ciicammo, Yesu ahohimya wiira ahaavo atthu yaahala ukhala toko anonswalela Nluku, masi mena. Uyo aheera: “Mwaaweheehe maporofeeta owootha anoophiyeerani aneewarenle nttapala no khontwaa, masi nhina waya akhanlee miici. Nimihokorokho ciimihalyaaya phinhaleenyu waacuwelela.”—Mat. 7:15-20.

9. Citthuni ceetthucihiya mmattiinini Yesu caavanyihalyaawe?

 ⁹ Isiyani Ibiiblya inhimyaaya? Ibiiblya yahohimya wiira Mesiya yanhala uncivela cinene inupa ya Yehova. (Isaa. 69:9; Joau 2:14-17) Ni nlattu woncivela cinene inupa ya Yehova, Yesu ahovaanyiha citthu cowoothiya ceetthucihiya. Wootakihera, mafarisewu yoopuwela wiira irooho khinkhwa; masi Yesu aheetthuciha wiira atthu ookhwa khiivo impankaaya ni ankhala toko anrupa ikhove. (Joau 11:11) Ale yeehaniya masadusewu khayaakupali wiira wahoolo atthu ookhwa anaahala wunwelelihiya; masi Yesu ahomunweleliha mpatthannyaawe eehaniya Laazaru. (Joau 11:43, 44; Mite. 23:8) Mafarisewu yeera wiira citthu cotheene cinaakhumelela atthu Nluku phiwantikhelenle; masi Yesu aheetthuciha wiira apinaatamu pooti uthanla unswalela Nluku awula uhitthuna unswalela.—Mat. 11:28.

10. Kontha isiyani citthu cineetthuciheehu cinaawiiriha atthu enci uhipheela uniiwelela?

¹⁰ Niireke inaanikhumelela iyo itthwiiyo ala mahukwaala? Iyee. Atthu enci anaakhotta ihapari cinlalyeereehu kontha hiiva ninaatthoonyera mbiiblyani wiira citthu cikiina cineetthucihiya mmattiinini cikhanle cowoothiya. Wootakihera, ahooleli okereeca wiira awoopopihace ni yaatthukanihace atthu, waacivela wiitthuciha wiira Nluku nawaapaha atthu umooroni. Masi ale anonswalela Yehova, Nluku oofenta, anawaakavihera atthu woona wiira iyo khinakhala ikhweeli. Ahooleli ikereca ciicammo anawiitthuciha wiira irooho khinkhwa. Masi hiiva ninawaathoonyera atthu wiira iyo khinakhala itthu ineetthucihaaya Ibiiblya. Kontha unari wiira irooho khinkhwa, Nluku khahala ukhuluveliha uwunweleliha atthu ookhwa wahoolo. Ittiini cinci cineetthuciha wiira citthu cotheene cinnikhumelela Nluku phinantikhelenle, masi hiiva nineetthuciha wiira khula ntthu phinlamuliya uthanla meetteloni anhalaawe ukhalana, ni ulakela utthuna awula uhitthuna unswalela Nluku. Ahooleli ittiini ankhala cani yanoonaka nivaanyihaka citthu cowoothiya cineetthucihaaya? Ikwaha cinci, ayo anaarusiya cinene!

11. Toko cinthoonyeraaya moolumo a Yesu ari nhina Joau 8:45-47, Yehova noweherera wiira atthu anonswalela apanke isiyani?

¹¹ Isiyani inlamuliyeehu upanka wiira nihihiye waamini wihu? Wakhalaka wiira inaanicivela  ikhweeli ineetthucihaaya Ibiiblya, hiiva nihaana nitthunaka moolumo a Nluku. (Nsome Joau 8:45-47. *) Hiiva khaniri toko Sotwani, ule hiile weettela ikhweeli. Hi ninaakhotta upanka khula itthu invirikaniha citthu cinkupaliihu. (Joau 8:44) Nluku nopheela wiira atthu anonswalela ‘caaruse citthu coohinamaana’ ni ‘ahihiye weettela citthu comaana,’ toko Yesu.—Aroo. 12:9; Mabere. 1:9.

12. Kontha isiyani mananna caahalaawe wiiviya Yesu yahaapankiha ayuuta enci unkhotta?

¹² Isiyani-tho yaawiirihile ayuuta unkhotta Yesu? Paulu enre co: “Hiiva ninonlalya Kristu aakhomeliye wanipottoni noohuviheriya, ule khottiye naayuuta.” (1 Akor. 1:23) Kontha isiyani mananna caahalaawe wiiviya Yesu yahaapankiha ayuuta enci unkhotta? Kontha ayo yoopuwela wiira Yesu akhwaaka nakhomeliye wanipottoni, waahala ukhala toko wiira uyova nakhirini ni namatampi, kahi Mesiya.—Deut. 21:22, 23.

13. Isiyani yahoopuwenlyaaya ayuuta yankhottile Yesu?

¹³ Ayuuta yankhottile Yesu cahaavo citthu cinci cahoopuwenlyaaya. Ayo khayoopuwenle wiira Yesu khaatthekile, wiira uyo aahowootheraciya ni wiira aatulumwiye woohittheka. Masuwiisi khayanhukhumwale Yesu yeettiheraka isariya hataa vakaani. Ukati wonhukhumu, ayo yaathukumanne wowaakuvyaaca ni khayaatthanre malamulo yaahimya mananna ntthu cinlamuliyaawe uhukhumwiya. (Luka 22:54; Joau 18:24) Unari wiira masuwiisi ooyuuta yaheettela isariya, ayo yanhala uwehera ratta citthu cootheriye Yesu ni yanhala utotha ucuwela sana-saana wakhala wiira caari ikhweeli. Masi uhiya upanka commo, ayo yahaatotha “masaahiti oohala umootherya citthu Yesu, wiira amwiiviihe.” (Mat. 26:59; Mark. 14:55-64) Ni hataa ukati Yesu wonwelelihiyaawe, ale masuwiisyaale nanlelo khayeettela isariya. Ayo yahaaliva “nsurukhu mwinci woparaata” anatoropa yaakhalenla mahiye a Yesu wiira naayo anatoropaayo yoothe ni ahihimye khweeliini nlattuni irutthu ya Yesu wahooniyaaya-tho mmahiyeni weesiyaawe.—Mat. 28:11-15.

14. Inatiri yaattonkacile cani ukhwa wa Yesu?

 ¹⁴ Isiyani Ibiiblya inhimyaaya? Ukati wa Yesu, ayuuta enci khayaatthuna ukupali wiira Mesiya ahaana akhwaaka, masi moone itthu yaahimyaaya inatiri: “Kontha holeva ukumyaawe mpaka wakhwilyaawe, uyo haalikeliya wamoca naatthu oottheka; hocisa matampi aatthu enci. Uyo haalepelela uleveleliya atthu oottheka.” (Isai. 53:12) Phimaana, ayuuta khayaarina isariya yonkhotta Yesu ukati waahukhumwiyaawe ni weeviyaawe khampa nakhirini.

15. Citthuni cinootheriyaaya Masaahiti a Yehova cinwiiriha atthu enci ukhotta ihapari cinlalyaaya?

¹⁵ Niireke inaanikhumelela iyo itthwiiyo ala mahukwaala? Iyee! Yesu ahohukhumwiya woohisariya, ni iyo phi itthu inwiirannyeela Masaahiti a Yehova ilelo. Moone ala matakiherwaala. U Estados Unidos, ukhuma mwaakha wo 1930 mpaka 1950, apoovu a Nluku yahorwaa mmatiripunali ikwaha cinci wiira atthuniheriye unswalela Nluku woohilupatthiya. Uyo ukatyuuyo, masuwiisi akiina yaheetthoonya wiira yaanaanithanya. Isittatti yo Quebec, u Canadá, ikereeca yahaatanaca naahooleli ookuvernu ni wiikurumica wamoca wiira anihiihe ntekweehu woolalyaa ihapari. Anamalalyeera enci yahotthukeliya nkhattya nlattu wo waalalyeera aattamanannyaaya ihapari co Umwene wa Nluku. U Alemanha, amirawo ookhuluvelya enci yaheevakaciya naatthu oopartiitu Nazi. Ni mphiyaaruni, mayamunneehu ni miyanuunnwiihu enci u Rússia ahotthukeliya nkhattya nlattu woovara nteko woolalya ihapari co mbiiblyani; akhulupale anhoolela iyo ilapweeyo aheehana ntekweehu woolalyaa “nteko waatakhali.” Ni hataa Tradução do Novo Mundo da Bíblia Sagrada niiluuka irusso ihokhottihiya ni inooniya ukhala “ilivuru yaatakhali,” nlattu wooromola ncina na Yehova.

16. Toko cinthoonyeraaya 1 Joau 4:1, kontha isiyani khaninlamuliya wiihiya nihapusiyaka ni citthu cowoothiya cinwuuluma pusya apoovu a Yehova?

¹⁶ Isiyani inlamuliyeehu upanka wiira nihihiye waamini wihu? Ncuweleehe ikhweeli. Ukati waataphulelaawe mwahaawe umwaakoni, Yesu ahohimya wiira atthu yanhala ‘uwootherya [attharyaawe] khula itthu yoonanara.’ (Mat. 5:11) Nnyo citthu cowoothiyannyo cinonkhumakhuma Sotwani. Uyo nawaapankiha alupatthi umwaarusela citthu cowoothiya coowuuluma pusya ale inaacivela ikhweeli. (Apoka. 12:9, 10) Hiiva nihaana nikhottaka uviriyana citthu cowoothiya cimmwaruselaaya alupatthiihu. Nihihiye citthu cohinamaana cinootheriyeehu cinipankihaka woova ni cimalihaka waamini urineehu.—Nsome 1 Joau 4:1. *

17. Citthuni caakhumelenle hinaaya Yesu ukhwa ni caawiirihile atthu akiina uhipheela ukhala attharyaawe?

¹⁷ Wahalaka vakaani uphiya ukati waahalaawe wiiviya, Yesu ahovariihiya ni apostolwaawe mmoca. Apostolu nkhwaawe ahonkhotta Yesu ikwaha tthaaru ni maapostolu otheene yahonhiya Yesu veekhacawe uhiyu waatthukiyaawe. (Mat. 26:14-16, 47, 56, 75) Yesu khaakhanle ootikhinihiya nlattu wiirannya waya iyo. Yesu ahohimya nankhalayiiru wiira iyo itthwiiyo yanhala umwiirannyeela. (Joau 6:64; 13:21, 26, 38; 16:32) Atthu akiina woona waya citthu cotheenennyo cinkhumelelaka Yesu, atthunaka yaholakela uhikhala atthari a Yesu ni pooti yahoopuwela co: ‘Wakhala wiira ula phi nrima urinaaya maapostolu a Yesu, mi akimpheela mena vakaani wiikelakeliha ila ikhurupwiila!’

18. Inatirini ciirannyeele uhalaka vakaani uphiya ukati waahalaawe wiiviya Yesu?

¹⁸ Isiyani Ibiiblya inhimyaaya? Myaakha cinci uttuli, Yehova ahohimya nhina Nuulumo nawe wiira Mesiya anhala uvariihiya ni misurukhu 30 coparaata. (Zakar. 11:12, 13) Ni mpatthannyaawe mmoca phaahala unvariiha. (Isaa. 41:9) Porofeeta Zakariya ciicammo ahantikha co: “Unrakalihe  makampuci, ni ikhontwaa cawe cimwarye.” (Zakar. 13:7) Coo, ale khweeliini yaahala ukhalana nrima womaana, khayaahala unhiya Yesu nlattu wookhumelela nnyo citthunnyo. Uhiya commo, waamini waya wanhala utepa ukhala woolipa nlattu wo woona ciirannyaaka nnyo inatirinnyo.

19. Ale arina nrima womaana isiyani incuwelaaya?

¹⁹ Niireke inaanikhumelela iyo itthwiiyo ala mahukwaala? Iyee. Ilelo, Masaahiti a Yehova oocuweliya cinene ahohiya weettela ikhweeli, ahokhala alupatthi ni anaamananiha waahapusa atthu akiina anaamini. Ayo atthwaayo anaavarela nteko citthu toko iteeve ni internet wiira amwarusele ihapari cowoothiya coowuuluma pusya Masaahiti a Yehova. Masi ale arina nrima womaana khanhiya waamini urinaaya nlattu wo nnyo citthunnyo. Uhiya commo, ayo anaacuwela wiira Ibiiblya yahohimya wiira atthu akiina yanhala wiipanka alupatthi.—Mat. 24:24; 2 Pet. 2:18-22.

20. Isiyani inhala unikavihera wiira nihihiye waamini wihu nlattu waatthu ahiile weettela ikhweeli co mbiiblyani? (2 Timotiyu 4:4, 5)

²⁰ Isiyani inlamuliyeehu upanka wiira nihihiye waamini wihu? Nihaana nilipihacaka waamini wihu. Wiira nikhitiri upanka iyo, nihaana nisomaka Ibiiblya, uhihiya ulompa ni wiikurumica venci uvara nteko Yehova unirumalyaawe. (Nsome 2 Timotiyu 4:4, 5. *) Nakhalanaka waamini woolipa, khaninhala ututhuwa neewaka ihapari coowuuluma pusya Masaahiti a Yehova. (Isai. 28:16) Unfenta Yehova, unicivela Nuulumo nawe ni waafenta mayamunneehu phi citthu cinhala unikurumica wiira nihihiye waamini wihu nlattu waatthu ahiile weettela ikhweeli co mbiiblyani.

21. Hataa ukhalaka wiira atthu enci anaakhotta ihapari cinlalyeehu, isiyani Nuulumo na Nluku innikhuluvelihaaya?

²¹ Atthu akiina yaakhala iseekulu yoopacera yahonkhotta Yesu. Masi atthu enci akhwaawe yahotthuna umwiiwelela. Iriyaryaaya ayo atthwaayo, ahaavo nlopwana mmoca aapanka mphantte wa ahoolei otiripunali yuulupale ya ayuuta ni ciicammo wahaavo “mphwinko muulupale waanankuttho” yaatthunale umwiiwelela. (Mite. 6:7; Mat. 27:57-60; Mark. 15:43) Iyo phi itthu inooneehu yiirannyaaka ilelo. Ahaavo atthu enci ahinhiya waamini urinaaya. Nlattuni? Kontha ayo anaacuwela ni cinawaacivela ikhweeli co mbiiblyani. Toko cineeraaya Nuulumo na Nluku: “Ale ninaacivela cinene nlamulo naa ahaana nnema nuulupale; khiivo itthu inaakakathula.”—Isaa. 119:165.