1. Ntakiheroni Yesu naavahalyaawe attharyaawe, ni isiyani ayo yaapankilyaaya? (Nwehe ilatarato yo wakaapani.)

UKATI Yesu waavaraawe nteko woolalya ihapari ca Nluku watuninyani, uyo ahowehera ratta nteko waavaraawe ni aapheela wiira attharyaawe antakihe ni ciicammo awehere saana nteko woolalyeera. (Joau 4:35, 36) Ukati waaryaaya ayo attharyaayo nkhayi ni Yesu, yaheekurumica venci ulalya. (Luka 10:1, 5-11, 17) Masi waatthukiyaawe Yesu ni weeviyaawe, attharyaawe yahovololiha makhuvaaya ni wahaanyoonya ulalyeera. (Joau 16:32) Ukati Yesu wonwelelihiyaawe, ahaakurumica attharyaawe uhoolelihera ulalyaa ihapari ca Nluku. Phimaana, Yesu uturuwela wawe wiirimu, attharyaawe yahancera wiikurumica ulalyeera, mpaka alupatthyaaya yahonyoonyiya ni yaheera: “Moone! Nyuuva nhocariha u Yerusalemu citthu cineetthuciheenyu.”—Mite. 5:28.

2. Yehova caalihale cani nteko woolalyeera iseekulu yoopacera?

² Yesu ahohoolela nteko woolalyeera waavaraaya makristau oopacera, ni Yehova ahocaaliha uyo ntekooyo. Phimaana atthu enci yaanaatthuna ihapari caalalyaaya. Wootakihera, nihuku no Petenkositi yo mwaakha wo 33, atthu ookhalaka 3.000 yahopattisiya. (Mite. 2:41) Ni atthu yaakhala atthari a Yesu yanvira yatepaka winciva. (Mite. 6:7) Masi Yesu ahohimya wiira nteko woolalyeera wa attharyaawe wanhala utepa uweettela saana ukati wo mahuku ookhicera.—Joau 14:12; Mite. 1:8.

3-4. Kontha isiyani alalyeeri akhwaawe unawaarika ulalyeera, ni isiyani inhaleehu wiitthuca nhina ula mwahoola?

³ Otheene cihu ninawiikurumica wiira uhininyoonye nteko woolalyeera unvareehu. Mapuro makiina, upanka iyo khunrika. Kontha isiyani? Kontha atthu enci anaapheela usomihiya Ibiiblya. Ni atthu akiina anaapheela cinene wiiwa ihapari cinlalyeehu, mpaka anoona upica wootoliya ni Masaahiti a Yehova. Masi mapuro makhwaawe, anamalalyeera unawaarika cinene ulalya moolumo a Nluku. Yarwaaka wuulalyaani, atthu enci khanaaphwanya mmawanuwaya ni akhwaawe khampheela woopaniya myaha co mbiiblyani.

 ⁴ Wakhala wiira nyuuva nnokhala nipuro noorika ulalya myaha co mbiiblyani, citthu cinoolumiya nhina ula mwahoola cinaahala wuukaviherani. Ninaahala woopela mwaha citthu cimpankesaaya mayamunneehu wiira akhitiri waaphwanya atthu enci oowoopana myaha co mbiibliyani. Ciicammo, ninaahala woona kontha isiyani khunlamuliya uninyoonya nteko woolalyeera, hataa atthu yahipheelaka uviriyana ihapari cinlalyeehu awula yapheelaka.

5. Marikarikoni ankhalanaaya Masaatihi a Yehova?

⁵ Masaahiti a Yehova enci unaavira waatepaka waarikarika waaphwanya atthu mmawanuwaya wiira awoopane myaha co mbiiblyani. Alalyeeri akhwaawe ankhala mapuro uryaaya inupa cirina imuuru cuulupale awula ipereetiyu cookhalana makwarta. Atthunaka makwarta o nnyo ipereetiyunnyo anawaakhottihera ukela atthu ahilattuliye naasineene inupa. Anamalalyeera akiina atthunaka anaakhitiri ukela mmawaani, masi khaavo nomphwanyaaya. Ni ahaavo-tho anamalalyeera anlalyaa mmaaliteeya ahinkhaliya naatthu enci. Ayo pooti ukhalaka wiira anaweetta nkwaha muulupale wiira yamootole ntthu mmoca paahi, ni pooti uhimphwanya uyo ntthuuyo! Wakhala wiira anawuukhumelelani ayo marikarikwaayo, nhoocye. Vano, isiyani inlamuliyeenyu upanka wiira nkhitiri uwacera ratta ayo marikarikwaayo ni wiira uweetteleni saana nteko woolalyeera unvareenyu?

6. Ntekweehu woolalyeera unlattanaca cani ninteko woomenca ihopa?

⁶ Yesu holattaniha nteko woolalyeera ninteko woomenca ihopa. (Mark. 1:17) Mayoomenca ihopa pooti uviriha mahuku menci yaavaraka nteko, masi woohivara nanka ihopa. Hataa ukhalaka commo, ayo khannyoonyiya ni khanhiya waavererya mananna makhwaawe wiira akhitiri umenca ihopa. Ayo anawaakakhaniha iwoora, nipuro ni inanna yoomenca. Inanna imoca, hiiva pooti waavererya mananna makhwaawe oovara ntekweehu woolalyeera.

7. Isiyani inhala ukhumelela nattehaka waakakhaniha iwoora yoorwaa uwootola atthu?

⁷ Nttehe waakakhaniha iwoora yoorwaa uwootola atthu. Hiiva ninhala ukhitiri waaphwanya atthu enci narwaaka uwootola iwoora cinkhalaaya mmawanuwaya. Nhiliyale wiira khula ntthu haana iwoora inhokoleelaawe wapuwani wawe! Anamalalyeera enci anaakhitiri waaphwanya atthu mmawanuwaya yalalyeeraka ucoocilo awula uhiyu. Uyo ukhanle ukati atthu enci uhintepaaya ukhalana iwasiwaasi ni unkhitiryaaya woopa mwaha. Atthunaka unaahala wuucivelani nruku uvahalyaawe humu mmoca neehaniya David. Uyo enre wiira ahoviriha ukati mwinci arwaaka wuulalyeerani woohaaphwanya atthu mmawanuwaya. Masi uyo ni munna anlalyeeranaawe yaholakela uturuwela iwoora ikhwaawe. Uyo neera: “Wahonitteela nrima woona wiira nahokhitiri waaphwanya atthu waaturuwenleehu ikwaha yonayeeli.” *

8. Mananni cinlamuliyeehu utakihera wuulalyeerani itthu inhimyaaya Eklesyaste 11:6?

⁸ Nihinyoonyiye. Iyo phi itthu innikurumicaaya upanka iveerusu inlipihera ula mwahoola. (Nsome Eklesyaste 11:6. *) Humu David romoliye nhina ula mwahoola, khaanyoonyiye. Uyo ahoviriha ukati mwinci woohimphwanya ntthu wiira amoopane myaha co mbiiblyani, masi wahoolo ahomphwnya nlopwana mmoca aapheela woopaniya myaha co mbiiblyani. Uyo nlopwanooyo aheera: “Mi kihoviriha myaakha 8 kikhalaka nna nipuro nna, masi kaari kihinatoko wootoliya ni Masaahiti a Yehova.” Ni munneehu David neera: “Mi kihoonelela wiira nakhitiriki umphwanya ntthu wapuwani, uyo ntthuuyo pooti upheela uviriyana ihapari cinlalyeehu.”

9. Isiyani anamalalyeera akhwaawe impankaaya waarikaka waaphwanya atthu mmawanuwaya?

 ⁹ Nttehe ulalyeera nipuro nikhwaawe. Alalyeeri akhwaawe yoonaka wiira khankhitiri waaphwanya atthu enci mmawaani, anaamananiha ulalyeera mapuro makiina. Wootakihera, ayo anaalalyeera mmaparapaarani awula ulalyeera yavarelaka nteko ikariinyu co wuulalyeerani. Coo, ayo pooti uwuulumana atthu anvira ayo mapurwaayo yaahala urika wuulumaniya mmapuwani waya nlattu wookhala inupa coorikarika ukeliya. Anamalalyeera akhwaawe ahoonelela wiira atthu enci antepa upheela wuulumaniya ni waakhelela irevista yakhalaka mapuro toko mmajardim, mmapacari ni mapuro ciri ilooca cinci. Mootoli osirikwiitu mmoca neehaniya Floiran nokhala u Bolívia, neera: “Ukhuma ncuwa no 13 hora mpaka 15 hora, hi ninaarwaaka mmapacari ni mapuro mwakhaawe antumihaciya citthu. Nnyo iwoorannyo, anamatumiha khantepa uwinciva anamathuma. Hi ninaawoopana mwaha saana ni mpaka ahaavo yancenreehu waasomiha Ibiiblya.”

10. Inannani ikhwaawe yoolalyeera nyuuva inlamuliyeenyu uvarela nteko wiira nkhitiri uwuulumana atthu?

¹⁰ Nttehe inanna ikhwaawe yoolalyeera. Ntanicere co: Nyuuva nhomananiha ikwaha cinci umootola ntthu. Nhotteha urwaa iwoora coovirikanaca, masi khannomphwanya. Niireke ihaavo inanna ikhwaawe yoomuulumana uyo ntthuuyo? Arokorihu aneehaniya Katarína, aneera: “Mi kinaawantikhelaka iwarakha atthu ahinkhitiryaaka waaphwanya mmawanuwaya. Kinwantikhelaka itthu yaahalaaka wuuluma kinaaphwanyile.” Nna ntakihero naanuunu Katarína nna, ninniitthuciha isiyani? Mwarwaaka wuulalyeerani ni mwaaphwanyaka atthu mmawannyaya, mmananihe uwuulumana. Masi mwaahikhitiriki waaphwanya, nttehe inanna ikhwaawe yoohala waalalyeera ihapari.

11. Nlattuni atthu akiina ahimpheelaaya uviriyana ihapari cinlalyeereehu?

¹¹ Ahaavo atthu ahimpheela uviriyana ihapari cinlalyeehu. Ayo khancuwela nlattuni anlamuliyaaya uncuwela Nluku ni wiitthuca myaha co mbiiblyani. Nlattu wo woona masakha menci ntuninyani, ayo khammwaamini Nluku. Ciicammo khampheela wiitthuca Ibiiblya kontha anawoona wiira ahooleli ottiini enci aneehimya weettela Ibiiblya, anaapanka citthu cinci cootakhala. Ahaavo-tho atthu akiina antepa uhoolelihera uwacera miteko caya, itthoko caya awula iwasiwaasi caya cikiina, ni khanoopuwela wiira Ibiiblya inaahala waakavihera. Isiyani inlamuliyeehu upanka wiira utteeliya wihu uhimale, hataa atthu akiina yahipheelaka uviriyana ihapari cinlalyeehu?

12. Ikano iri nhina Afilipo 2:4 innikavihera cani wuulalyeerani?

¹² Nthoonyere waawacera atthu. Atthu enci wiipaceroni yahaaphenle uviriyana ihapari comaana, wahoolo yahorukunusa mirima caya ni yahotthuna univiriyana nlattu wo woona wiira hiiva ninawaawacera. (Nsome Afilipo 2:4. *) Wootakihera, humu David, romoliye, neera: “Ntthu aniirelaka wiira khampheela uviriyana myaha co mbiiblyani, hi ninaasunka munrupani wihu Ibiiblya ni irevista cihu, ni ninankoha ntthuuyo: ‘Isiyani inwiirihani uhipheela uviriyana?’” Atthu anaakhitiri woona wakhala wiira ninawaawacera awula mena. Ayo pooti uhuupuwela citthu cinhaleehu wuuluma, masi inanna caawacenreehu pooti uhiliyala. Hataa ntthuuyo hinihiyaka wuuluma, hiiva pooti uthoonyera wiira ninanwacera nanhisimaka ni naahintthukeleke iyuuci.

13. Ninhala ukhitiri cani ulalya nittharihaka citthu cinaacivela ni cimpheelaaya wiiwa atthu?

¹³ Inanna imoca yoothoonyera wiira ninawaawacera atthu, ukhanle waalalyeera nittharihaka citthu cinaacivela ni cimpheelaaya wiiwa. Wootakihera, inupa inkhalaawe ntthuuyo, ihaavo itthu inthoonyera wiira haana asaana? Nnyari pooti uhalaka uncivela uviriyana ikano co mbiiblyani cinthoonyera mananna o waalaka ratta asaana ni ukhala ootteeliya watthokoni. Mikhora conupa inkhalaawe ntthuuyo, cihaavo ikattiyatto awula cihoolipihaciya cinene? Wakhala commo, atthunaka wanhala ureera woopela mwaha unannyatha mwinci urivo ni ikhirini cimpankaciya. Uyo ntthuuyo pooti unaahala untteela nrima eewaka wiira wanihukuni ikhirini cotheene cinaahala umala. Khula ukati unhaleenyu umphwanya ntthu nopheela uviriyana, munthoonyere manannani cinhalaaya unkavihera ikano co mbiiblyani. Arokorihu Katarína aromoliye nhina ula mwahoola, aneera: “Mi kinaamananiha wuupuwela inanna Ibiiblya cireerihalyaaya makhalelwaaka.” Yapankaka commo, arokorihu Katarína anaakhitiri  wuuluma yathoonyeraka wiira anaakupali itthu inhimyaaya, ni atthwaayo anakhitiri woona iyo.

14. Toko cinthoonyeraaya Miruku 27:17, anamalalyeera anhala ukaviherana cani?

¹⁴ Ntthune ukaviheriya naakhunaninyu. Apostolu Paulu ahomwiitthuciha Timotiyu mananna oolalyeera ni owiitthuciha Ibiiblya. Uyo ciicammo ahonkurumica Timotiyu waalakihera akhunanawe ayo manannaayo. (1 Akor. 4:17) Toko Timotiyu, hiiva ciicammo pooti wiitthucihiya ni mayamunna ni miyaanuunu o wanlokoni yancenre ulalyeera khalayi. (Nsome Miruku 27:17. *) Moone itthu yankhumelenle munneehu mmoca neehaniya Shawn. Uyo ahoviriha ukati mwinci avaraka nteko weepiyoneeru ncoko waakhala atthu enci caacivela cinene ittiini caya. Isiyani yankavihenre munneehu uhihiya ulalyeera wantteelaka nrima? Uyo neera: “Khula ukati waakhitiryaaka, mi kaalalyeeraka nkhayi ni ntthu nkiina. Ukati weetteehu nirwaaka inupa ikhwaawe hi naanaavahana miruku wiira nireherere meetthuciherweehu. Wootakihera, hiiva naanoopelaka mwaha inanna caalalyenreehu inupa yaakhumeehu. Upanka commo, waanaanikavihera woona khampa nahaana nirukunusaka awula mena mananna caahaleehu ulalyeera inupa yaarweehu ukela.

15. Kontha isiyani unaareera cinene ulompa ukati unrweehu wuulalyeerani?

¹⁵ Munlepele Yehova wuukaviherani. Khula ukati unrweenyu wuulalyeerani, nlepele ukaviheriya ni Yehova. Khaavo aahala ukhitiri ulalyeera woohikaviheriya ninnepa wowaarya wa Yehova. (Isaa. 127:1; Luka 11:13) Ukati woolompa, nhimyeehe itthu impheeleenyu ukaviheriya. Munlepele Yehova wiira ookavihereni umphwanya ntthu nohala upheela uviriyana myaha co mbiiblyani ni uncuwela Yehova. Vano mpanke inhaleenyu ukhitiri ni mwiikurumice uwuulumana atthu otheene anhaleenyu waaphwanya.

16. Kontha isiyani usoma Ibiiblya veekha unaanikavihera cinene wuulalyeerani?

¹⁶ Nkumihe ukati wiira nsome Ibiiblya veekha. Nuulumo na Nluku nineera wiira makristau ahaana ‘wiithoonyera asineennyaaya itthu ikhanle yomaana, yooreera ni yoohipahuwa impheelaawe Nluku.’ (Aroo. 12:2) Nasomaka Ibiiblya, ninaatepa uncuwela saana Yehova. Vano narwaaka wuulalyeerani, atthwaayo anaahala woona wiira khweeliini ninaakupali myaha cinlalyeehu. Arokorihu Katarína aromoliye wiipaceroni, aneera: “Mphiyaaruni, mi kihoonelela wiira kihaana kilipihacaka waamini waka citthu cineetthucihaaya Ibiiblya. Phimaama, mi kahancera usoma citthu cinthoonyera wiira Nluku haavo, Ibiiblya ikhanle Nuulumo na Nluku ni citthu cinthoonyera wiira Nluku haana mphwinko woothotokanihiya watuninyani.” Arokorihu Katarína aneera wiira wiikurumica usoma Ibiiblya veekha uholipihaca waamini waya ni uhaakavihera utepa utteeliya wuulalyeerani.

17. Nlattuni Yesu ahowehera ratta nteko woolalyeera waavaraawe?

¹⁷ Khalayi, atthu akiina khayaaphenle uviriyana myaha Yesu caalalyeeraawe. Hataa ukhalaka commo, Yesu khawannyoonyale nteko woolalyeera waavaraawe. Kontha isiyani? Kontha uyo ancuwela wiira atthu otheene yahaana yiiwaka ikhweeli ca Nluku. Ni itthu yaapheelaawe waari waakavihera atthu enci waamini ihapari co Umwene wa Nluku. Yesu ciicammo ancuwela wiira atthu akhwaawe yahaamwiiwelenle wiipaceroni, wahoolo yanhala urukunusa mirima caya ni upheela uviriyana nnyo ihaparinnyo. Moone itthu yaawiirannyenle amucyaawe Yesu. Aahooviriharu Yesu myaakha miraru ni nuusu alalyeeraka ihapari ca Nluku, khaavo mwanhimaawe aakhanle nttharyaawe. (Joau 7:5) Masi Yesu waakhwilyaawe ni onwelelihiyaka, ayo yahokhala attharyaawe.—Mite. 1:14.

18. Kontha isiyani khaninhiya ulalyeera?

¹⁸ Hiiva khaninhiya ulalyeera kontha khanincuwela khweeliini tipani nhala utthuna unswalela Yehova ni tipani hinhala utthuna. Ahaavo ampica  wiitthuca ikhweeli ni ahaavo ahimpica. Ni hataa ale wiipaceroni ahimpheelaka univiriyana, pooti ‘unttitthimiha Nluku’ yoonaka makhalelweehu omaana ni ihisima inaathoonyereehu.—1 Pet. 2:12.

19. Toko cinthoonyeraaya 1 Akorintu 3:6, 7, isiyani inkupaliihu?

¹⁹ Hiiva ntekweehu ukhanle waala ni umicera, masi ninaakupali wiira Nluku phinoonuwiha. (Nsome 1 Akorintu 3:6, 7. *) Munna mmoca nokhala u Etiópia neehaniya Getahun, neera: “Cahovira myaakha coovikana 20 miiva kinari Saahiti a Yehova veekha ncoko woohilalyeeriya cinene waakhalaaka. Masi nna va, niri anamalalyeera 14. Kaatakanihaka amwaaraka ni asaaneehu araru, niri anamalalyeera 13 oopattisiya. Atthu 32 anaawaaka umikutthaanoni cihu khula isumana.” Munna Getahun unantteela nrima nlattu woothoonyera uvilela ukati wanwehereraawe Yehova waakavihera atthu akhwaawe utakaneela mumphwinkoni wawe woothotokanihiya!—Joau 6:44.

20. Ntekweehu woolalyeera unlattanaca cani niikhurupu yaatthu invara nteko woowoopola atthu yakhumelelaka ihasara?

²⁰ Yehova naawoona ukhalana ifayita atthu otheene. Uyo honivaha iparakha yonvarana nteko Mwanawe wiira aawaane wanlokoni nawe atthu olapo cotheene watuninyani va. (Ageu 2:7) Nteko woolalyeera unvareehu unaalattanaca niikhurupu yaatthu invara nteko woowoopola atthu yakhumelelaka ihasara. Ni hiiva niri toko iyo ikhurupwiiyo yeerwaaka uwoopola atthu ari nkalawani inhaleela vakaani uttittha mmaacini menci. Atthunaka atthu vakaani nhina iyo ikhurupwiiyo phinhala ukhitiriki umoopola ntthu mmoca paahi, masi hataa ukhala commo, nteko uvanryaaya otheene caya nkhayi wiira amoopole uyo ntthuuyo uhothoonyera ukhalana ifayita cinene. Ntekweehu woolalyeera phiryaaya ciicammo. Hiiva khanincuwela tipani nohaleehu unkhitiri umoopola nhiya ituninya ya Sotwani. Masi ninaacuwela wiira Yehova pooti unruma khula nlalyeeri wiira amoopole ntthu. Munna Andreas nokhala u Bolívia, neera: “Mi kinoona wiira khula ntthu nosomihiya Ibiiblya mpaka wampattisiyaawe, kaviheriye naanamalalyeera otheene avanre nteko nkhayi.” Hiiva ciicammo nihaana niweheraka ratta nteko woolalyeera unvareehu. Napankaka iyo, Yehova naahala unicaaliha ni ntekweehu woolalya ihapari ni wo waapanka eetthuci unaahala unitteeliha nrima cinene.