MWAHA WOOSOMIYA 21
Yehova naahala wuuvahani ikuru
“Kalolovaka, phinkhalanaaka ikuru.”—2 AKOR. 12:10.
NCIPO 73 Dá-nos Coragem
NINHALA WIITTHUCANI? *
1-2. Marikarikoni anaakhumelela mayamunneehu enci?
APOSTOLU Paulu ahonkurumica Timotiyu amwiirelaka: “Uvare ratta nteko wa Nluku.” (2 Tim. 4:5) Otheene cihu ninaapheela upanka itthu Paulu yuulumalyaawe. Masi khanimalana marikariko. Mayamunneehu enci wiira alalyeere ahaana yalipaka nrima cinene. (2 Tim. 4:2) Nwuupuwele ale ankhala ilapo unaateelihiyeehu uvara miteko ca Nluku awula unswalela Nlukwiihu, Yehova. Ayo mayamunnaayo khanhiya ulalyaa moolumo a Nluku, hataa yacuwelaka wiira pooti utthukeliya nkhatteya.
2 Mayamunneehu enci anawaakhumelela masakha anwukula utteeliya waya ni anaawaanela masukhuli menci. Wootakihera, ahaavo mayamunneehu aneekurumica uvara nteko ukhuma uwicisu mpaka ucoocilo wiira aphwanye itthu yo waavaha amucyaaya. Ayo mayamunnaayo waanaacivela uviriha ukati mwinci wuulalyeerani, masi waphiyaka wiimaleloni isumana ankhala owoocyaaca. Akhwaawe ahaana ikwerere yoohivoniya awula anaaweryaaciya nlattu wo wuuluvala. Ukati nkiina khankhitiri ukhuma wapuwani waya, ni phimaana khanlalyeera cinene khampa cimpheelaaya. Ni ahaavo-tho ale akhala yacukulacaka venci nlattu wo wuupuwela wiira atthunaka Yehova khanwoona ukhalana ifayita. Nrokorihu mmoca nokhala u Oriente Médio neehaniya Maria, * neera: “Wiikurumica wiira kiimaalihe yakiphwanyaka moopuwelo ankiriipiha nrima ikhanle itthu inkirika cinene ni uhaavo ukati unonlaaka. Iyo itthwiiyo mi khinkicivela kontha kinaacuwela wiira ukati untafityaaka iyo ithwiiyo, waahala ukhala ukati woolalyeera.”
3. Isiyani inhaleehu wiitthuca nhina ula mwahoola?
3 Hataa yanikhumelelaka masakhani, Yehova naanikhuluveliha wiira naahala univaha ikuru. Kahi wiira naanikavihera uvilela paasi, ciicammo naanilipiha wiira nikhitiri uvara saana ntekwaawe. Nhina ula mwahoola, ninahala woona mananna Yehova cinnilipihaawe. Masi nihinaaya woopela mwaha iyo, nttwee noone manannani Yehova canlipihilyaawe Paulu ni Timotiyu wiira avilele masakha yaarinaaya ni wiira avare saana ntekwaawe.
YEHOVA NAANIVAHA IKURU WIIRA NIKHITIRI ULALYEERA
4. Marikarikoni yaaamwiirannyenle Paulu?
4 Apostolu Paulu yaanankhumelelaka masakha menci. Paulu ahopheela cinene uvahiya ikuru ni Nluku, venci-venci ukati waalupatthiyaawe, waavonyakaciyaawe ni maluku ni waatthukeliyaawe nkhatteya. (2 Akor. 11:23-25) Ciicammo hohimya wiira ahaana moopuwelo yanriipiha nrima. (Aroo. 7:18, 19, 24) Uyo aanawaanana “mwiiwa wo mwiirutthuni”. Ni ikwaha imoca Paulu ahonlepela Nluku wiira ankumihe uyo mwiiwooyo.—2 Akor. 12:7, 8.
Isiyani yankavihenre Paulu ukhitiri uvara nteko wa Nluku? (Nwehe iparaagarafu 5-6) *
5. Isiyani Paulu yaakhitinryaawe upanka hataa yankhumelelaka marikariko?
5 Paulu wankhumelenlyaaya masakha menci, ahovahiya ikuru ni Yehova. Phimaana, uyo ahokhitiri uvara saana nteko wa Nluku. Moone citthu Paulu caakhitinryaawe upanka. Uhaavo ukati Paulu wahaakhitinryaawe ukhuma wapuwani wawe nlattu wookhala pereso nipuro naakhalaawe u Roma. Hataa ukhalaka commo, uyo ahokhitiri waalalyeera ihapari comaana ahooleli ayuuta ni ahooleli akhwaawe ookuvernu. (Mite. 28:17; Afili. 4:21, 22) Uyo ciicammo ahaalalyeera anatoropa yankhalenla ni atthu yaarwaa umootola. (Mite. 28:30, 31; Afili. 1:13) Uyo ukatyuuyo, Paulu ahantikha iwarakha, ni mpaka ilelo nnyo iwarakhannyo cinawaakavihera cinene makristau eekhweeli. Ciicammo, Paulu ahaavaha ntakihero nomaana makristau o nloko no Roma. Phimaana Ibiiblya ineera wiira mayamunna o Roma ‘waanaalipa nrima wiira alalyee nuulumo na Nluku woohova.’ (Afili. 1:14) Ukati nkiina, Paulu khaakhitiri uvara nteko wa Nluku toko caapheelaawe, masi aaneekuruimca upanka itthu yaakhitiryaawe. Isiyani yaakhumelenle? Toko Paulu cinryaawe: “Citthu cinkikhumelela, khweeliini ciri mookavihera upiiha uttayi ihapari comaana.”—Afili. 1:12.
6. Toko cinthoonyeraaya 2 Akorintu 12:9, 10, isiyani yankavihenre apostolu Paulu wiira akhitiri uvara nteko wa Nluku?
6 Paulu ancuwela wiira woohikaviheriya ni Yehova, khaahala ukhitiri upanka citthu cotheene caapankilyaawe. Uyo aanaakupali wiira aanaavahiya ikuru ni Nluku. (Nsome 2 Akorintu 12:9, 10. *) Yehova ahonvaha Paulu nnepaawe wowaarya wiira amphwanyihe ikuru. Phimaana, Paulu ahokhitiri uvara nteko wa Nluku hataa alupatthiyaka, atthukeliyaka nkhatteya ni hataa akhalanaka marikariko makhwaawe.
Isiyani yankavihenre Timotiyu ukhitiri uvara nteko wa Nluku? (Nwehe iparaagarafu 7) *
7. Marikarikoni Timotiyu yaarinaawe ukati waavaraawe nteko wa Nluku?
7 Timotiyu hataa akhalaka wiira aari mmirawo cinene nanlikanihaka ni Paulu, uyo ahaana ciicammo akhuluvelaka ikuru ca Nluku wiira akhitiri uvara nteko woolalyaa moolumo a Nluku. Timotiyu ahonveleela Paulu mmikwahani cawe co wuulalyeerani. Ciicammo, Paulu ahonlepela Timotiyu wiira arwee mapuro makhwaawe wiira ootole ni alipihe maloko. (1 Akor. 4:17) Timotiyu atthunaka oopuwela wiira khaahala ukhitiri uvara uyo ntekooyo. Atthunaka phimaana Paulu wanvahilyaawe ila ikannweela: “Uhinhiye hataa ntthu oovyaavyeehacaka nlattu weeva wookhala mmirawo.” (1 Tim. 4:12) Ni uyo ukatyuuyo, Timotiyu aanawaanana mwiiwa wo mwiirutthuni wawe: ‘uweryaaciya ikwaha cinci.’ (1 Tim. 5:23) Masi Timotiyu ancuwela wiira ahaana akhuluvelaka ikuru co nnepa wowaarya wa Yehova. Nnepa wowaarya wa Yehova wanhala umphwanyiha ikuru wiira akhitiri ulalyaa ihapari comaana ni waavarela nteko mayamunnaawe.—2 Tim. 1:7.
YEHOVA NAANIVAHA IKURU WIIRA NIHIHIYE UNSWALELA HATAA NAANANAKA MASANKIHO
8. Manannani Yehova cinnivahaawe ikuru ilelo?
8 Ilelo, Yehova nawaavaha atthu anonswalela “ikuru coovikana ikuru ca ntthu.” Nnyo ikurunnyo phinnikavihera uhihiya unswalela. (2 Akor. 4:7) Nttwee noone citthu cese Yehova cinvarelaawe nteko wiira anivahe ikuru: ulompa, Ibiiblya, mayamunneehu makristau ni nteko woolalyeera.
Yehova nonivaha ikuru nalompaka (Nwehe iparaagarafu 9)
9. Ulompa unnikavihera cani?
9 Ulompa unaaniphwanyiha ikuru. Nhina Efesu 6:18, Paulu naanikurumica unlompa Nluku “khula ukati.” Yehova naahala unaakhula ni univaha ikuru cimpheeleehu. Munneehu Jonnie, nokhala u Bolívia ahooneeha inanna caakaviheriyaawe ni Yehova ukati wamphwanyilyaaya masankiho. Amwaarawe, athumwaane ni anumwaane yahowerennya cinene, otheene weemaara imoca. Munneehu Jonnie wahonrika cinene waawereeha atthu ooraaru. Nuuwakatyaaya, anumwaane yahokhwa; ni wahovira ukati mwinci amwaarawe ni athumwaane ahinaaya uvona. Munna Jonnie oopuwelaka uyo ukatyuuyo, neera co: “Ukati waatepaaka ukhala nimasukhulu itthu yaakikavihera waari ulompa kinhimyereehaka Yehova itthu yaakiira.” Yehova ahonvaha ikuru munneehu Jonnie wiira akhitiri uvilela. Humu mmoca neehaniya Ronald nokhala u Bolívia, ahocuwela wiira anumwaane yahaakela iretta yoowiipakaca, ineehaniya cancro. Woocukuliha nrima, ayo yahokhwa uvira waya mweeri mmoca. Isiyani yankavihenre uvilela uyo humuuyo? Uyo neera: “Kanlompaka Yehova kinaakhitiri unhimyeera yotheene inkiira wanrimani waka ni citthu cotheene cinkihela isukhuli. Kinaacuwela wiira khaavo ntthu nkiina nocuweleeha itthu inkiira unvikana Yehova. Khweeliini, Yehova naakicuwela ratta uvikana inanna cineecuwelaaka mwaaneennyaaka.” Pooti ukhalaka wiira ukati nkiina hiiva ninaasankaka cinene nlattu wo masakha arineehu ni atthunaka khanincuwelaka itthu yonhimyera Yehova ukati wonlompa. Masi Yehova naanilattula wiira ninlompe, hataa ukhalaka wiira unaanirika unhimyera itthu inoopuweleehu ni inniira.—Aroo. 8:26, 27.
Yehova nonivaha ikuru nasomaka Ibiiblya (Nwehe iparaagarafu 10)
10. Toko cinthoonyeraaya Maberewu 4:12, nlattuni unreeraaya usoma Ibiiblya ni wuupuwela cinene insomeehu?
10 Usoma Ibiiblya unaaniphwanyiha ikuru. Paulu ammaalihiya ni amphwanya ikuru asomaka Cowantikhiya Cowaarya. Ni iyo phi itthu hiiva inhala unikhumelela ciicammo nasomaka Ibiiblya. (Aroo. 15:4) Ikhanle itthu yofayita cinene usoma Nuulumo na Nluku ni wuupuwela insomeehu. Napankaka iyo, Yehova naanimwarusela nnepaawe wowaarya wiira nikhitiri woona mbiibliyani itthu inhala unikavihera waanana masakheehu. (Nsome Maberewu 4:12. *) Ronald, romoliye wiipaceroni, neera: “Wiilemaleliha usoma Ibiiblya khula uhiyu uhokikavihera cinene. Mi kinawuupuwela cinene makhalelo a Yehova ni inanna cinaafentaawe atthu anonswalela. Iyo itthwiiyo inaakiphwanyiha ikuru.”
11. Manannani usoma Ibiiblya canphwanyihalyaaya ikuru nrokorihu aariipiye nrima?
11 Wuupuwela cinene itthu insomeehu mbiibliyani unaanikavihera uwehera ratta masakheehu. Moone itthu yankhumelenle nrokorihu mmoca. Uyo aari ooriipiya nrima cinene nlattu wookhwa awannyawe, ni humu mmoca ahonvaha nruku: usoma ilivuru ya Jó. Nrokorihu khaapicile upanka itthu yeereliyaawe. Ukati waasomaawe, uyo aapacile unvaanyiha Jó. Nrokorihu eeciirela co: “Jó! Uyo khaalamuliya uhoolelihera wuupuwela masakhaawe paahi!” Vano, nrokorihu ahoona wiira uyova ciicammo aapanka toko Jó. Usoma iyo ilivuru yo mbiiblyaniiyo wahonkavihera nrokorihu urukunusa moopuwelelwaawe ni ukhalana ikuru wiira avilele ukhweliya wawe.
Yehova nonivaha ikuru ukati unkaviheriyeehu ni mayamunneehu (Nwehe iparaagarafu 12)
12. Manannani Yehova cinaakurumicaawe mayamunneehu wiira anivahe ikuru?
12 Mayamunneehu makristau anaaniphwanyiha ikuru. Inanna ikhwaawe Yehova cinnivahaawe ikuru ukhanle ukurumiciya ni mayamunneehu anaaswalaneehu. Paulu ahowantikhela mayamunnaawe o wanlokoni: “Kinaapheela uwoonananani cinene wiira nilipihane.” (Aroo. 1:11, 12) Nrokorihu Maria romoliye wiipaceroni, neera wiira ukhala ni mayamunna unankavihera cinene. Uyo neera: “Yehova haakurumica mayamunna ni miyanuunu wiira akilipihe. Hataa ukhalaka wiira khayaacuwela masakha yaarinaaka, ayo yahooluma itthu yaakilipihile, awula yahokantikhela iwarakha ni iyo phi itthu yaapheelaaka cinene ule ukatyuule. Itthu ikhwaawe ciicammo inkikavihera ukhanle waahimyera itthu inkiira miyanuunu o wanlokoni apacile ukhalana masakha arinaaka, kontha iyo inaakikavihera wiitthucera ntakihero naya. Ni mahumu khanhiya ukiirela wiira miiva kihaana ifayita cinene wanlokoni.”
13. Ninlamuliya ulipihana cani nakhalaka mmikutthaanoni wihu?
13 Umikutthaanoni phi nipuro nintepeehu ulipihana cinene. Mwarwaaka unkutthaanoni, nnoonela cani wiikurumica waalipiha akhwiinyu? Nrwee ni mmwiirele munna mmoca co: “Munna, nyuuva nnaakicivela cinene” awula “kinaasukhuru citthu cotheene cimpankeenyu.” Wootakihera, nihuku nimoca uhinancera nkutthaano, humu mmoca neehaniya Peter ahowiirela arokorihu arina awanuwaya ahikhanle Masaahiti a Yehova: “Kinaakhala oolipihiya cinene kawoonakani wiira nyuuva nhowa unkutthaanoni. Khannohiya waacisa umikutthaano asaaniinyu 6 ni khula nkutthaano ayo akhala ootthenkaciyeene wiira akomentari.” Arokorihu yahokumiha miithori ni yaheera: “Khanreere ukilipiha, munna. Mi kaanaapheela cinene wiiwa iyo itthwiiyu ilelo.”
Yehova nonivaha ikuru navaraka nteko woolalyaa ihapari (Nwehe iparaagarafu 14)
14. Ulalyeera unnikavihera cani?
14 Ulalyeera unaaniphwanyiha ikuru. Naalalyeera akhwiihu myaha co mbiibliyani, hiiva ninaakhala oolipihiya, hataa ayo atthwaayo atthune awula ahitthune ihapari cinlalyeehu. (Miru. 11:25) Arokorihu aneehaniya Stacy yahoona inanna ulalyeera caavahilyaaya ikuru. Mmucyaaya mmoca ahohiya ukhala Saahiti a Yehova ni nlattu wo iyo, arokorihu Stacy yahokhala ooriipiya nrima cinene. Ayo yaaneekohaka: “Unari wiira kahonkavihera mmucyaaka, anhala uhiya ukhala Saahiti a Yehova?” Arokorihu yaakhala nimasukhuli ukati wotheene ni khayaakhitiri-tho wuupuwela itthu ikhwaawe. Isiyani yaakavihenre arokorihu Stacy uvilela isukhuli yaarinaaya? Ulalyeera! Yarwaaka wuulalyeerani, ayo yaakhala yuupuwelaka mananna o waakavihera atthu yaalalyeeraaya. Ayo aneera: “Ule ukatyuule, Yehova ahokikavihera waaphwanya athiyana oohala waasomiha Ibiiblya ni woohipica, ayo yahokela weettela citthu ceetthucaaya. Iyo yahokilipiha venci. Itthu inkilipiha makhuva cinene ukhanle ulalyeera moolumo a Yehova.”
15. Moolumo a nrokorihu Maria anwiitthucihani isiyani?
15 Mayamunna akhwaawe anawoona wiira nlattu wo marikariko arinaaya khankhitiri uvara cinene nteko woolalyeera. Nyuuva phi itthu inwiirannyeelani? Wakhala wiira iyo phi itthu inookhumelelani, muupuwele wiira Yehova unantteela nrima awoonakani mpankaka itthu inkhitiriinyu. Moone itthu yankhumelenle Maria, moopenleehu mwaha wiipaceroni. Ukati waathamenlyaawe nloko ninoolumiya iluuka ikhwaawe, uyo khaakhitiri ukavihera venci wanlokoni. Nrokorihu Maria neera: “Kahoviriha ukati mwinci wankutthaanoni kikomentariki vakaani, kisomaka iveerusu yo mbiibliyani awula kivahaka ifolyetu paasi wuulalyeerani.” Nrokorihu Maria aanawiilattaniha ni mayamunna akhwaawe yooluma saana iyo iluukeeyo ni aakhala anyoonyiyaka cinene. Masi uyo ahorukunusa moopuwelelwaawe. Ahancera woona wiira hataa yanrikaka wuuluma iyo iluukeeyo, Yehova ampheela cinene umoona uyova avaraka ntekwaawe. Maria neera: “Ikhweeli co mbiibliyani cikhanle comaana ni coohirikarika, ni nnyo ikhweelinnyo pooti urukunusa makhalelo aatthu.”
16. Wakhala wiira nyuuva khannokhitiri urwaa wuulalyeerani, isiyani inhala wuukaviherani ukhalana ikuru?
16 Atthunaka nyuuva waanoocivelani nnarweele wuulalyeerani, masi khannolamuliya ukhuma wapuwani winyu nlattu woowerennya. Nkupali wiira Yehova naawoona marikariko arineenyu. Uyo pooti wuukaviherani wiira nkhitiri waalalyeera atthu anoowacerani. Ni wakhala wiira nnowereehiya usipiritaali, Yehova naahala wuukaviherani waalalyeera ananteko oosipiritaali ni mameetiku. Ciicammo, nhilattanihe citthu cimpankeenyu nna va ni citthu caakhitiriinyu upanka khalayi, kontha upanka commo unaahala wuuriipihani nrima. Nhoolelihere wuupuwela itthu Yehova impankaawe nna co wiira ookavihereni. Mwapankaka commo, nyuuva nnaahala ukhalana ikuru wiira nkhitiri uvilela khula masankiho ni wuutteelani nrima.
17. Toko cinthoonyeraaya Eklesyaste 11:6, kontha isiyani khaninlamuliya uhiya ulalyeera?
17 Hiiva ninawiikurumica wiira naale ikhweeli, masi khanincuwela itthakani co munnepani cinhala umela ni wuunuwa. (Nsome Eklesyaste 11:6. *) Muupuwele ntakihero naarokorihu aneehaniya Barbara. Ayo arina myaakha coovikana 80 ni khula ukati anlalyeera nitelefooni ni wantikhaca iwarakha. Iwarakha imoca yantikhilyaaya, yahoveleeliha nkhayi niirevista Ukhalenla 1 yo Março yo 2014 yeekunya, yaarina mwaha uneera “O que Deus tem feito por você.” Arokorihu Barbara khayaacuwela wiira iyo irevisteeyo yaahala waakhela anamathelana yaahiile ukhala Masaahiti a Yehova. Vano, ayo anamathelanaayo uhosoma waya iyo irevisteeyo ikwaha cinci, yaheera wiira wakhala khampa Yehova aanaawuulumana. Ayo yahopaceriha-tho urwaa umikutthaanoni ni yahoturuwela wanlokoni—uvira waya myaakha 27 anahiile ukhala Masaahiti a Yehova. Vano muupuwele inanna arokorihu Barbara caakhanlyaaya ootteeliya ni oolipihiya woona waya itthu yaakhumelenle nlattu wowarakha yantikhalyaaya!
Yehova nonivaha ikuru avarelaka nteko (1) ulompa, (2) Ibiiblya, (3) mayamunneehu, ni (4) nteko woolalyeera (Nwehe iparaagarafu 9-10, 12, 14)
18. Isiyani inlamuliyeehu upanka wiira naakhele ikuru ca Nluku?
18 Cihaavo citthu cinci Yehova cinvarelaawe nteko wiira anivahe ikuru cawe. Toko conneehu, ulompa, usoma Ibiiblya, mayamunneehu makristau ni nteko woolalyeera. Nvarele nteko nnyo citthunnyo. Napankaka iyo ninaahala uthoonyera ukhuluvela wihu wiira Yehova naakhitiri ni naapheela unikavihera. Nhihiye waakhuluvela Apaapeehu o wiirimu ni nkupali wiira ayo anaahala ‘waakavihera ale arina nrima wonvaresesa uyova paasi.’—2 Ikor. 16:9.
NCIPO 61 Avancem, Testemunhas!
^ par. 5 Hiiva ninkhala ukati woorikarikaca, masi Yehova naanivaha ikuru wiira nivilele. Nhina ula mwahoola, ninaahala woona manannani Yehova cankavihenryaawe apostolu Paulu ni Timotiyu wiira ahihiye unvaresesa, hataa yaaphwanyaka masakha. Ciicammo, ninaahala woopela mwaha mananna macese Yehova nonikaviheraawe ilelo wiira nivilele.
^ par. 2 Nihaakakhanihiya ncina.
^ par. 6 2 Akorintu 12:9 Uyo ahokiirela: “Unamaana woohuphwanela wuuthonyenryaaka unawuutosa, kontha walolovacaka kinawuuvaha ikuru caka.” Phimaana, ukitteelaka nrima, kinaahala wiittottopa nlattu woololova waka, wiira ikuru ca Kristu cikhale wamoca ni miiva toko heema. 10 Phimaana, unaakitteela nrima nlattu woololova waka, wooveehiya, woohitaphuwa, woolupatthiya ni nlattu wookhala ni masankiho nlattu wa Kristu. Kontha, kalolovaka, phinkhalanaaka ikuru.
^ par. 10 Maberewu 4:12 Kontha nuulumo na Nluku nihaana ukumi ni ikuru, ninawiitha uvikana ikatana yoononiya uno-nuuno, ninaakela mwiirutthuni mpaka wakumanne makhuva ni nhina waya ayo makhuvaayo; ninaakhitiri ucuwela citthu cinoopuwelaawe ni cirinaawe ntthu wanrimani.
^ par. 17 Eklesyaste 11:6 Waale uwicisu itthakaa ni uhimumulihe matataa mpaka uhiyu; kontha khuncuwela itthakani inhala umela ni wiimiha nhokorokho, pooti ukhala ila vaa awula ikinaku, awula itthaka cotheene cinaahala umela ni wiimiha nhokorokho.
