MWAHA WOOSOMIYA 21
Apokalipise—Isiyani inhimyaaya wiira phinhala uwiirannyeelani nyuuva wahoolo?
“Amem! Nwe, Apwiiya Yesu.”—APOKA. 22:20.
NCIPO 142 A Esperança Que Nos Dá Coragem
NINHALA WIITTHUCANI? *
1. Itthuni yuulupale atthu otheene inlamuliyaaya ulakela?
KHULA ntthu haana alakelaka itthu yuulupale: ukhala mphantte wa Yehova Nkhulupale o ntuninyani motheene, awula uthanla mphantte wa Sotwani Tiyapu, nwanani muulupale a Yehova. Khula ntthu haana athanlaka mphantte umpheelaawe ukhala. Mphantte unhalaawe uthanla pooti umphwanyiha ukumi woohimala awula ukhwa. (Mat. 25:31-33, 46) Ukati wo “masakha moolupale” atthu otheene anaahala waawanyanihiya wiira yoopoliye ni akhwaawe amalamalihiye.—Apoka. 7:14; 14:9-11; Ezek. 9:4, 6.
2. a) Maberewu 10:35-39 innikurumica upanka isiyani? b) Ilivuru yo Apokalipise inhala unikavihera cani?
2 Nsome Maberewu 10:35-39. * Wakhala wiira nyuuva nhothanla ukhala mphantte wo Umwene wa Nluku, nhothanla itthu yomaana. Ni khweeliini nyuuva nnaapheela waakavihera atthu akhwaawe wiira ciicammo athanle iyo itthu yomaaneeyo. Wiira mwaakavihere, nyuuva pooti waathoonyera itthu inhimyaaya ilivuru yo Apokalipise. Iyo ilivurwiiyo inaathoonyera isiyani inhala uwiirannyeela awanani a Yehova, masi ciicammo inawuuluma iparakha cotheene cinhalaaya uvahiya ale ahinhiya umwiiwelela Yehova. Nnyo cikhanle myaha cofayita cinlamuliyeehu usoma, kontha nasomaka phinhaleehu utepa ulakela uhihiya umwiiwelela Yehova. Ciicammo, ninaahala waathoonyera akhunanihu citthu cinhaleehu wiitthuca wiira naakavihere uthanla itthu yomaana ni uhihiya unswalela Yehova.
3. Ninhala wiitthucani nhina ula mwahoola?
3 Nhina ula mwahoola, ninaahala waakhula ala makohwaala: Iparakhani inhalaaya uvahiya ale ankhala mphantte wo Umwene wa Nluku? Ni isiyani inhala uwiirannyeela ale ankavihera nsene nookhwiila ninoolumiya nlivuruni yo Apokalipise?
ISIYANI INHALA UWIIRANNYEELA ALE AHINHIYA UMWIIWELELA YEHOVA?
4. Phaapani Joau yaawonnyaawe aneemenle nkhayi ni Yesu wiirimu?
4 Apostolu Joau ahoona ikhurupu piili ca atthu ari mphantte wokuvernu ya Yehova ni anhala uvahiya ukumi woohimala. Ikhurupu yoopacera, ikhanle yo atthu 144.000. (Apoka. 7:4) Ayo atthwaayo athanliye watuninyani wiira yakhale wiirimu muumweneni wa Nluku nkhayi ni Yesu. Wiirimu, ayo atthwaayo anhala ukhala mamwene ni anaahala ulamulela ituninya. (Apoka. 5:9, 10; 14:3, 4) Nhina iyo iwooniiyo, apostolu Joau aawoonale atthu 144.000 wiirimu aneemenle nkhayi ni Yesu uculu Mwaako Siyau.—Apoka. 14:1.
5. Isiyani inhala uwiirannyeela makristau oothanliya anhala uhala watuninyani?
5 Ukhuma ukati wo maapostolu mpaka mahukwaala, atthu enci ahothanliya wiira akhale nkhurupuni yo atthu 144.000. (Luka 12:32; Aroo. 8:17) Masi Joau ahoona wiira nhina atthu oothanliya 144.000, vakaani paahi phaahala ‘uhala’ watuninyani ukati wo mahuku ookhicera. Ayo atthu anhala uhalaayo anaahala utthittiya wiira yoopoliye uhalaka vakaani uphiya ukati wo masakha moolupale. (Apoka. 7:2, 3; 12:17) Vano wanceraka ukati wo masakha moolupale, ayo anaahala ucisiya ni urwaaniya wiirimu. Yaphiyaka wiirimu, ayo anaahala waaphwanya makristau oothanliya akhunanaya yahaahiyale umwiiwelela Yehova mpaka waakhwilyaaya. Nwo, ayo anaahala ulamulela nkhayi ni Yesu Kristu muumweneni wa Nluku.—Mat. 24:31; Apoka. 5:9, 10.
6-7. a) Apostolu Joau umaliha wawe woona ikhurupu yo atthu 144.000, ikhurupuni-tho yonnyaawe, ni isiyani incuweleehu nhina iyo ikhurupwiiyo? b) Kontha isiyani makristau oothanliya ni atthu o “mphwinko muulupale” ihaana yaacivelaka itthu inhimyaaya Apokalipise ikapiitulu 7?
6 Umaliha wawe woona ikhurupu ya atthu oothanliya anrwaa wiirimu, Joau ahoona “mphwinko muulupale” wo atthu enci. Ula mphwinkoola unaavirikana niikhurupu ya atthu 144.000 kontha khaninhimiya nummeru naya. (Apoka. 7:9, 10) Masi isiyani incuweleehu nhina uyo mphwinko muulupalyooyo? Apokalipise 7:14 ineera co: “Alaca phaale ankhuma mmasakhani moolupale. Ala ahokattha ihancu caya ni ahotteeliha mphomeni wo Mwaana Okhontwaa.” Atthu o mphwinko muulupale yoopwaaka ukati wo masakha moolupale, ayo anaahala ukhala va watuninyani va ni uvahiya iparakha cinci coohimala.—Isaa. 37:9-11, 27-29; Miru. 2:21, 22; Apoka. 7:16, 17.
7 Wakhala wiira nyuuva nnoweherera urwaa ukhala mwene nkhayi ni Yesu wiirimu awula nnoweherera ukhalana ukumi woohimala va watuninyani va, munnokhitiri wiicuupuwela mwaakhelaka iyo iparakheeyo inhimiya nlivuruni yo Apokalipise ikapiitulu 7? Nihaana nuupuwelaka iyo itthwiiyo. Atthu okhurupu coopiili unaahala waatteela nrima. Khweeliini ninaahala woona wiira nipankile itthu yomaana uthanla wihu ukhala mphantte wokuvernu ya Yehova. Masi isiyani-tho ilivuru yo Apokalipise inhimyaaya wiira phinhala wiirannya ukati wo masakha moolupale?—Mat. 24:21.
ISIYANI INHALA UWIIRANNYEELA AWANANI A NLUKU?
8. Isiyani inhala ukolokoca masakha moolupale, ni atthu enci anhala upankani?
8 Khampa ciitthucileehu nhina mwaha uvinre, ikuvernu co watuninyani cinaahala utuphela Ibabilooniya Yuulupale, cikhanle ittiini cowootha cotheene. (Apoka. 17:16, 17) Iyo ikhottweeyo phinhala ukolokoca masakha moolupale. Niireke iyo itthwiiyo inaahala uwiiriha atthu enci upheela unswalela Yehova? Mena. Masi, toko cinthoonyeraaya Apokalipise ikapiitulu 6, uyo ukati wo masakhooyo atthu ahinonswalela Yehova anhala utotha ukhikiceriya naanasiyaasa ni ananakoso o watuninyani, anlattanihiya ni myaako. Ukhala wiira ayo atthwaayo khanhala uthanla ukhala mphantte wo Umwene wa Nluku, ayo anhala ukhala awanani a Yehova.—Luka 11:23; Apoka. 6:15-17.
9. Kontha isiyani aswali a Yehova anaahala utepa woonannya, ni isiyani inhala ukhumelela nlattu wo iyo itthwiiyo?
9 Ukati wo masakha moolupale, aswali a Yehova anaahala utepa woonannya, kontha phinhala ukhala ikhurupu imoca paahi inhala unswalela Yehova ni ihinhala ukhala mphantte wo “nsene.” (Apoka. 13:14-17) Unvaresesa waya Yehova unaahala waanyoonyiha awanannyaaya. Nlattu wo iyo itthwiiyo, atthu o ntuninyani anaahala usikisana ni waatuphela apoovu a Yehova wiira yaamalamalihe ntuninyani motheene. Ibiiblya ineehana iyo itthwiiyo ikhotto ya Gogue o Magogue.—Ezek. 38:14-16.
10. Toko cinthoonyeraaya Apokalipise 19:19-21, Yehova nohala upankani awoonaka apoovwaawe yatupheliyaka?
10 Yehova nohala ukhala cani awoonaka apoovwaawe yatupheliyaka ntuninyani motheene? Yehova mwaneene enre co: “Mi kinaahala urusiya cinene.” (Ezek. 38:18, 21-23) Apokalipise ikapiitulu 19 inaahimya itthu inhala wiirannya uyo ukatyuuyo. Yehova naahala unruma Mwanawe wiira aakhikicere apoovwaawe ni aamalamalihe awanannyaawe. Malayikha ookhuluvelya ni makristau oothanliya wamoca ni Yesu anaahala umwaattakanana Gogue o Magogue. (Apoka. 17:14; 19:11-15) Isiyani inhala ukhumelela nlattu wo iyo ikhottweeyo? Apinaatamu ni miphwinko cotheene cihinthanla ukhala mphantte wa Yehova, cinaahala umalamalihiya!—Nsome Apokalipise 19:19-21. *
UTHELANIYA YAMALAKA IKHOTTO
11. Inatirini yo nlivuruni yo Apokalipise intepa woonannya?
11 Muupuwele mananna aswali a Yehova cinhalaaya waatteela nrima nlattu wo woopoliya ukati unhalaaya umalamalihiya awanani a Yehova. Khweeliini, ayo unaahala waatteela nrima venci. Umalamalihiya Ibabilooniya Yuulupale unaahala waatteeliha nrima otheene ankhala wiirimu. (Apoka. 19:1-3) Ihaavo itthu ikhwaawe yootteeliha nrima inhala wiirannya: ‘ikacamentu yo Mwaana Okhontwaa.’ Iyo phi inatiri yootepa woonannya yo nlivuruni yo Apokalipise.—Apoka. 19:6-9.
12. Toko cinthoonyeraaya Apokalipise 21:1, 2, ikacamentu yo Mwaana Okhontwaa inhala wiirannya yaakhani?
12 Iyo ikacamentwiiyo inhala wiirannya yaakhani? Makristau 144.000 otheene anhala ukhala wiirimu wiira yaane ikhotto yo Harmacetom. Masi uyo kahi phuukati unhalaaya wiirannya ikacamentu yo Mwaana Okhontwaa. (Nsome Apokalipise 21:1, 2. *) Ikacamentu yo Mwaana Okhontwaa inhala wiirannya yamalaka ikhotto yo Harmacetom ni yamalamalihiyaka awanani a Nluku otheene.—Isaa. 45:3, 4, 13-17.
13. Isiyani inhala wiirannya ukacamentuni yo Mwaana Okhontwaa?
13 Isiyani inhala wiirannya ukacamentuni yo Mwaana Okhontwaa? Ikacamentu inankumaniha nlopwana ni nthiyana wiira akhalakhale wamoca. Inanna imocaaru, ikacamentu yo Mwaana Okhontwaa inaahala unkumaniha Mwene Yesu Kristu ni ‘nthiyana mpakanenlyaawe,’ makristau 144.000. Iyo itthu yuulupaleeyo yeerannyaaka, inaahala ukhumeleliha ikuvernu yo naanaano inhala ulamulela ituninya myaakha 1.000.—Apoka. 20:6.
ISITTATTI YOOREERA INTHOONYERA ITTHU INHALA UWIIRANNYEELANI WAHOOLO
Apokalipise ikapiitulu 21 inawuuluma isittatti ineehaniya Yerusalemu yo Naanaano, “ikhuma- ka wiirimu wa Nluku.” Ukati wo myaakha 1.000 unhalaawe ulamulela Kristu, iyo isittattiiyo inaahala waawaanela apinaatamu iparakha cinci (Nwehe iparaagarafu 14-16)
14-15. Ikapiitulu 21 yo Apokalipise inaalattaniha atthu 144.000 niisiyani? (Nwehe ilatarato yo wakaapani.)
14 Yamalaka ikacamentu yo Mwaana Okhontwaa, ikapiitulu 21 yo Apokalipise inawaalattaniha atthu 144.000 niisittatti yooreera ineehaniya “Yerusalemu yo Naanaano.” (Apoka. 21:2, 9) Iyo isittattiiyo itekiye wamalukuni 12 yantikhaciye “macina o maapostolu 12 a Mwaana Okhontwaa.” Iyo itthwiiyo atthunaka yahomwiiriha Joau weemela ni wuupuwela. Kontha isiyani? Kontha uyo ahoona ncina nawe ninantikhiye waculu ayo malukwaayo. Iyo yaari iparakha yuulupale yaakhalannyaawe!—Apoka. 21:10-14; Efesu 2:20.
15 Iyo isittattiiyo inaavirikana niisittatti cikhwaawe cotheene. Iparapaara yuulupale yo iyo isittattiiyo ikhanle yowooru. Iyo isittattiiyo ihaana mikhora 12 cuulupale coopankiya nimaluku oopharela. Aliseerisyaaya ni imuuru caya citekiye nimaluku menci oopharela ni ulikaciya waya khanivo nipuro nivonyanihiyaaya. (Apoka. 21:15-21) Masi Joau ahoona wiira ihaavo itthu yaahaleela nhina iyo isittattiiyo. Uyo enre: “Mi akonne itempulu nhina iyo isittattiiyo, kontha Yehova Nluku, Nakuru-Cotheene, wamoca ni Mwaana Okhontwaa, phiri itempulwaaya. Iyo isittattiiyo khimpheela umwaleeliya nincuwa awula ni mweeri, kontha waarya wa Nluku phimmwaleela, ni Mwaana Okhontwaa phiri iluuswaaya.” (Apoka. 21:22, 23) Ale ampanka mphantte nhina Yerusalemu yo Naanaano anhala ukhala ni Yehova. (Mabere. 7:27; Apoka. 22:3, 4) Phimaana, Yehova ni Yesu phiri itempulu yo iyo isittattiiyo.
Tipani nohala waakhela iparakha cinlattanihiya ‘nimooloko’ ni ‘miri’? (Nwehe iparaagarafu 16-17)
16. Isiyani inhala uwiirannyeela apinaatamu ukati wo myaakha 1.000 unhalaawe ulamulela Yesu?
16 Khweeliini, makristau oothanliya anaakhala ootteeliya yoopuwelaka iyo isittattiiyo. Ale anweherera ukhalana ukumi woohimala watuninyani ciicammo ahaana yaweheraka iyo isittattiiyo khampa itthu yofayita. Kontha isiyani? Kontha ukati wo myaakha 1.000 Yesu unhalaawe ulamulela ituninya, iyo isittattiiyo inaahala uwaana iparakha cinci watuninyani. Apostolu Joau ahoona “mooloko wo maaci ookumi” unthoonyera nnyo iparakhannyo. Miphantte coomiili co uyo moolokooyo khacimala “miri cookumi” ni mataakhurwaaya nnyo mirinnyo “anawaavoniha atthu olapo cotheene.” (Apoka. 22:1, 2) Atthu otheene anhala ukhala watuninyani anaahala waakhela nnyo iparakhannyo. Vakaani-vakaani, apinaatamu ahinhala uhiya umwiiwelela Nluku anaahala ukhala oohipahuwa. Khacinhala ukhala-tho iretta, uhuva ni uriipiya nrima.—Apoka. 21:3-5.
17. Toko cinthoonyeraaya Apokalipise 20:11-13, tipani nohala waakhela iparakha ukati wo myaakha 1.000 unhalaawe ulamulela Yesu?
17 Tipani nhala waakhela nnyo iparakhannyo? Otheene ale anhala woopwa ukhottoni yo Harmacetom ni asaana atthunaka anhalaaya waayara upeephoni. Masi ikapiitulu 20 yo Apokalipise inaahimya wiira atthu yaakhwile anaahala wunwelelihiya. (Nsome Apokalipise 20:11-13. *) Aswali a Yehova “yeettenle isariya” akhwile anaahala wunwelelihiya wiira akhale watuninyani wamoca naatthu “yaheettenle isariya” ni yahaakaviheriye uncuwela Yehova. (Mite. 24:15; Joau 5:28, 29) Masi niireke iyo itthwiiyo maanaaya wiira atthu otheene akhwile anaahala wunwelelihiya wiira akhale watuninyani ukati wo myaakha 1.000 unhalaawe ulamulela Yesu? Mena. Ale yaakhottile imweeni unswalela Yehova khanhala wunwelelihiya. Ayo yahokhalana ukati woncuwela Yehova masi ahothoonyera wiira khunaaphwanela ukhala upeephoni watuninyani.—Mat. 25:46; 2 Atesal. 1:9; Apoka. 17:8; 20:15.
UTTEHIYA WOOMALELA
18. Waviraka ukati wo myaakha 1.000, atthu anhala ukhala cani?
18 Wamalaka ukati wo myaakha 1.000, atthu otheene anhala ukhala watuninyani anhala ukhala oohipahuwa. Itampi ya Atamu inyarelaniyeehu khinhala ukhala-tho. Khaavo nohala uhuva nlattu wo iyo itampiiyo. (Aroo. 5:12) Caviraka myaakha 1.000, atthu otheene anaahala ukhala oohipahuwa.—Apoka. 20:5.
19. Sotwani atthukuliyaka, khula ntthu naahala ukhalana ukati woopanka isiyani?
19 Hi ninaacuwela wiira Yesu aholipa ni khaahapusiye ni Sotwani. Hataa attehiyaka, Yesu khaahiile umwiiwelela Yehova. Masi niireke wiira iyo phi itthu yaahalaawe upanka khula pinaatamu oohipahuwa, hataa attehiyaka ni Sotwani? Khula ntthu naahala ukhalana ukati woonvaresesa Yehova Sotwani atthukuliyaka wiimaleloni ukati wo myaakha 1.000. (Apoka. 20:7) Ale ahinhala uhiya umwiiwelela Yehova uyo ukatyuuyo, anaahala uvahiya ukumi woohimala ni unaahala waataphuwa nrima. (Aroo. 8:21) Masi ale anhala uhimwiiwelela Yehova, anaahala umalamalihiya nkhayi ni Sotwani ni maciinnyaawe.—Apoka. 20:8-10.
20. Nyuuva nnoonela cani inatiri cimphwanyeehu nlivuruni yo Apokalipise?
20 Woopela wihu mwaha vakaani ilivuru yo Apokalipise, nyuuva nneecoona cani? Khunootthapani nrima nlattu woocuwela wiira nyuuva nnaakela nhina nnyo inatirinnyo? Ucuwela iyo itthwiiyo khunwiirihani upheela waakavihera akhunaninyu unswalela Yehova toko cimpheelaawe? (Apoka. 22:17) Khweeliini, nnya myahannya cihonitteeliha nrima venci nlattu woonuupusera iparakha cinweherereehu wahoolo. Ni khampa apostolu Joau, nnyo inatirinnyo cinaanikurumica wiira co: “Amem! Nwe, Apwiiya Yesu.”—Apoka. 22:20.
NCIPO 27 A Vitória dos Filhos de Deus
[Mawehero o vathi]
^ Ula ukhanle mwaha woneeraru ni woomalela nhina myaha coottharanaca cinooluma ilivuru yo Apokalipise. Nhina ula mwahoola, ninaahala woona wiira atthu ahinhala uhiya umwiiwelela Yehova ankookhalana ukumi womaana wahoolo. Masi ale anhala ukhotta Umwene wa Nluku, anaahala umalamalihiya.
^ Maberewu 10:35 Phimaana, nhihiye ukhala oolipa nrima. Nyuuva nnaahala utthuviya venci. 36 Nyuuva nhaana nvilelaka, wiira mwapankaka intthunaawe Nluku, mwaakhele itthu ikhuluvelihiyeenyu. 37 Ni “unhaleela ukati vakaani paasi,” ni “ule nowa naahala uwa ni khanhala upicapica.” 38 “Masi ntthwaaka neettela isariya, phinhala ukhala nkumi nuwaamini wawe” ni “wakhala wiira uyo naahokoleela uttuli, mi akinhala uciveliya ni uyo”. 39 Hiiva khaninakhala atthu anhokoleela uttuli wuutankanyiyani, masi nikhanle atthu owaamini, wiira noopole ukumiihu.
^ Apokalipise 19:19 Ni kahoona nsene ni mamwene owatuninyani anathukumanne wamoca naanakhottwaaya wiira amwaanane ikhotto ule aari nkhavaluni ni ciicammo anakhottwaawe. 20 Nsene nahovariya wamoca ni porofeeta owootha, aapanka uhoolo wo nsenenno mitikhiniho caathepya ale yaakhenle ntthitto no nsene ni yaaswalela ilataratwaaya. Anaryeene akumi, ooyeeli waya yahottikheliya muntthiyani no mooro. 21 Masi, akiina yaahanle yaheeviya niikatana yoorekama yaakhuma wamalakuni wawe ule onkomile wakhavaluni. Ni inuni otheene cahokhuura irutthu caya ayo atthwaayo ni cahovona.
^ Apokalipise 21:1 Mi kahoona irimu yo naanaano ni itthaya yo naanaano, kontha irimu yokhalayi ni itthaya yokhalayi cahovira, ni ipahari khayaaphwanyannya. 2 Ciicammo, kahoona isittatti yo waarya ineehaniya Yerusalemu yo Naanaano, ikhumaka wiirimu wa Nluku, yooreerihaciya khampa nthiyana oopakaneliya cinreerihaciyaawe wiira awaakhelele awannyawe.
^ Apokalipise 20:11 Kahoona ihice yuulupale yootteela ni kahomoona Ule onkomenle iyo ihiceeyo. Itthaya ni irimu cahontthawa, ni khacoonannyaale-tho. 12 Kahowoona atthu ookhwa, oolupale ni anamwane, aneemenle uhoolo wohice. Vano cahotthukuliya iroolu. Ciicammo, yahotthukuliya iroolu ikhwaawe: yaari iroolu yookumi. Atthu ookhwa yahohukhumwiya nicitthu cantikhiye mmarooluni yattharihiyaka meettelwaaya. 13 Ipahari yahaahokolosa atthu yaakhwenle mommo, ukhwa ni mahiye yahaahokolosa atthu ookhwa yaarinaaya; ni ala yahohukhumwiya khula ntthu aweheriyaka miteko cawe.
