MWAHA WOOSOMIYA 19
Apokalipise—Isiyani innihimyeeraaya mahukwaala?
“Ootteeliya thi ule nosoma moolumo o ila inatiriila akumiheraka ncu vate.”—APOKA. 1:3.
NCIPO 15 Louva o Filho de Jeová!
INHALA WIITTHUCANI? *
1-2. Nlattuni umpheeleehu uweheeha itthu inhimyaaya ilivuru yo Apokalipise?
MPATTHANIINYU awula ntthu nkhwaawe hopaca wuuthoonyiherani ifootu cawe cokhalayi? Ukati wooweha, nyuuva atthunaka nnawoona nhina nnyo ifootunnyo atthu enci ahinaacuweleenyu. Masi vano nnaaphwanya ifootu inhala uwiirihani weemela wiira nweheehe saana. Kontha isiyani? Kontha nyuuva nnaayoona nhina iyo ifootwiiyo. Nweheehaka, nyuuva nnaamananiha wuupuwela ukatini ni nipuroni mwaakumihiyeenyu iyo ifootwiiyo. Ni nnaamananiha uwuupuwela atthu mwaakhumanneenyu. Iyo ifootwiiyo inaawuuhimyeerani ni inaawuupuserani citthu cinci.
2 Ilivuru ya Apokalipise inkhala toko iyo ifootwiiyo. Nlattuni? Nlattu wo citthu piili. Yoopacera, iyo ilivurwiiyo nantikheliye hiiva. Iveerisiikulwaaya yoopacera ineera co: “Moolumo a Yesu Kristu yaahimeeriyaawe ni Nluku, wiira oonihere ipottha ca Nluku citthu cinhala wiirannya woohipica.” (Apoka. 1:1) Unawoonannya wiira iyo ilivurwiiyo khayantikheliye atthu otheene, masi yantikheliye aswali a Nluku. Hiiva ninaacuwela sana-saana wiira ninaaromoliya nhina inatiri cinci co Apokalipise cineerannya mahukwaala. Unkhala khampa hiiva ninawiicoona “nfootuni.”
3-4. Inatiri co nlivuruni yo Apokalipise caahala upacera wiirannya yaakhani, ni isiyani inlamuliyeehu upanka nlattu wo iyo itthwiiyo?
3 Itthu yonayeeli inniiriha upheela ucuweleeha inatiri co nlivuruni yo Apokalipise, ukhanle ukati uhimiye wiira phinhalaaya wiirannya nnyo inatirinnyo. Apostolu Joau ahohimya ukati waahalaaya wiirannya nnyo inatirinnyo: “Nnepa wowaarya wahokoonihera citthu cinhala wiirannya nihuku na Apwiiya.” (Apoka. 1:10) Apostolu Joau antikhile ayo moolumwaayo mwaakha wo 96 nawile Kristu ni uyo ukatyuuyo, “nihuku na Apwiiya” nanlelo naari uttayi cinene. (Mat. 25:14, 19; Luka 19:12) Inatiri co mbiiblyani cinthoonyera wiira nihuku na Apwiiya nipacenre mwaakha wo 1914, ukati Yesu waakhanlyaawe Mwene wiirimu. Ukhuma uyo mwaakhooyo, cihancera wiirannya inatiri co nlivuruni yo Apokalipise cinwaaca apoovu a Yehova. Phimaana, mahukwaala hiiva ninkhala “nihuku na Apwiiya”!
4 Ukhala wiira ninkhala ukati uneerannyaaya citthu cootikhiniha, nihaana neesereraka nuutta ikano yomaana ivahiyeehu nhina Apokalipise 1:3, ineera: “Ootteeliya thi ule nosoma moolumo o ila inatiriila akumiheraka ncu vate ni ootteeliya phaale aneewelela ni aneettela citthu cantikhiye nhina waya, ukhala wiira ukati wowiirannya nnyo citthunnyo uri wakhiviru.” Phimaana, nihaana ‘nisomaka nikumiheraka ncu nihu vate,’ ‘wiiwelela’ moolumo o iyo inatiriiyo ni ‘weettela’ citthu cantikhiye nhina waya. Masi moolumoni o iyo inatiriiyo anlamuliyeehu weettela?
YEHOVA NAATTHUNA USWALI WINYU?
5. Ilivuru yo Apokalipise inthoonyera cani wiira nihaana ninswalelaka Yehova khampa cimpheelaawe?
5 Ukhuma ikapiitulu yoopacera yo nlivuruni yo Apokalipise, unawoonannya wiira Yesu naacuwela citthu cotheene cineerannya mmalokoni eekristau. (Apoka. 1:12-16, 20; 2:1) Iyo itthwiiyo inawoonannya nhina moolumo Yesu yaavahalyaawe maloko saapa o Ásia Menor. Yesu ahovaha ikano ayo malokwaayo wiira aakavihere makristau oopacera unswalela Yehova toko cimpheelaawe. Ni ikano Yesu caavahilyaawe ayo makristau oopaceraayo ciicammo cinawaakavihera apoovu a Nluku o mahukwaala. Isiyani ineetthuceehu? Nineetthuca wiira Nhooleliihu Yesu Kristu naacuwela mananna ciryaaya upatthaniihu ni Yehova. Uyo naanivaka ikano ni naanikhikicera. Uyo naacuwela citthu cotheene cineerannya. Uyo ciicammo naacuwela isiyani inlamuliyeehu upanka wiira nihihiye untteeliha nrima Yehova. Ikanoni Yesu cinivahilyaawe nlivuruni yo Apokalipise cinlamuliyeehu weettela?
6. a) Toko cinthoonyeraaya Apokalipise 2:3, 4, isiyani yaahaleela mayamunna o nloko no Efesu? b) Isiyani iyo itthwiiyo inniitthucihaaya?
6 Nsome Apokalipise 2:3, 4. * Khaninlamuliya uhiya nifento nanthoonyihereehu Yehova wiipaceroni. Ikano Yesu caavahilyaawe mayamunna o nloko no Efesu cinthoonyera wiira ayo mayamunnaayo yahovilela ni khayaahiile unswalela Yehova hataa yaakhumelelaka masakha menci. Masi ihaavo itthu yaahaleela. Ayo yahohiya unfenta Yehova khampa canfentaaya wiipaceroni. Phimaana, ayo yahaana yaturuwelaka unfenta Yehova khampa canfentaaya wiipaceroni. Yapankaka commo, Yehova phaahalaawe utthuna uswali waya. Inanna imocaaru, khuntosa uvilela paasi masakha annikhumelela. Nihaana nivilelaka nlattu wonfenta Yehova. Nlukwiihu Yehova nopheela woona kahi paahi citthuni cimpankeehu, masi uyo nopheela woona nlattuni nimpankeehu nnyo citthunnyo. Yehova nopheela unoona ninswalelaka nlattu wonfenta ni nlattu wonsukhuru uyova wanrimani wihu.—Miru. 16:2; Mark. 12:29, 30.
7. a) Toko cinthoonyeraaya Apokalipise 3:1-3, isiyani yahaapankaaya mayamunna o nloko no Sardes? b) Isiyani hiiva inlamuliyeehu upanka?
7 Nsome Apokalipise 3:1-3. * Nihaana nihiitthaalaka. Itthu yahaapankaaya mayamunna o nloko no Sardes yaari ikiina. Ayo yaheekurumica unswalela Yehova ratta-raatta khalayi. Masi vano, yaheetthaala. Phimaana Yesu waawiirenlyaawe wiira yahaana ‘yunwaka.’ Iyo itthwiiyo inniitthuciha isiyani? Ninaacuwela wiira Yehova khanhala uliyala nteko unvarenleehu khalayi. (Mabere. 6:10) Hataa ukhalaka commo, nihuupuwele wiira pooti wanvukuleehu nteko unonvareleehu Yehova kontha nihonvarela nteko cinene khalayi. Hataa nihikhalanaka ikuru cinene khampa caarineehu khalayi, nihaana niikurumicaka uvara nteko wa Apwiiya wiira nihiitthaale mpaka umwiiso.—1 Akor. 15:58; Mat. 24:13; Mark. 13:33.
8. Itthu Yesu yaawiirenlyaawe mayamunna o Laodiceia nhina Apokalipise 3:15-17 inniitthuciha isiyani?
8 Nsome Apokalipise 3:15-17. * Nihaana niikurumicaka unswalela Yehova ninrimeehu wotheene. Ikano Yesu caavahilyaawe mayamunna o nloko no Laodiceia cahothoonyera itthu ikhwaawe yaahaleela. Ayo yaari khampa ‘maaci oohiviha ni oohiririya,’ awula khayaakhalela nthiti citthu co mminepani. Nlattu wo iyo itthwiiyo, Yesu aheera wiira ayo yaari atthu ‘ootakhaliya ni ahuvi.’ Ayo yahaana yaturuwelaka wiikurumica unswalela Yehova ninrimaaya wotheene. (Apoka. 3:19) Iyo itthwiiyo inniitthuciha isiyani? Noonaka wiira nihohiya wiikurumica unswalela Yehova ninrimeehu wotheene, nihaana nithoonyeraka usukhuru citthu comaana cotheene Yehova cinnivahaawe. (Apoka. 3:18) Khanimpheela wiitthaala nlattu woohoolelihera utotha mihakhu cinci, mpaka unswalela wihu Yehova uhiya ukhala itthu yoopacera muukumini wihu.
9. Toko cinthoonyeraaya ikano Yesu caavahilyaawe mayamunna o Pérgamo ni o Tiatira, isiyani inlamuliyeehu unyema?
9 Nihiwiiwelele atthu anrukunuwenle Yehova. Yesu ahaapwapwela mayamunna akhwaawe o Pérgamo kontha ayo yaanaakawaniha nloko. (Apoka. 2:14-16) Masi uyo ahaattottopela mayamunna o nloko no Tiatira yaanyemale “citthu cuulupale ca Sotwani” ni ahaakurumica ‘uvaresesa’ ikhweeli ca Nluku. (Apoka. 2:24-26) Mayamunna yancenre uttharatthara citthu cowoothiya ceetthucihiya yahaana yattharuwaka. Iyo itthwiiyo inniitthuciha isiyani? Nihaana nikhottaka khula itthu ineeweehu yiitthucihiyaka invirikaniha ikhweeli ca Nluku. Atthu anrukunuwenle Yehova pooti “ukhala owiipanka unswalela Nluku,” awula ukhala toko cinawaacivela citthu cinhimyaaya Ibiiblya, masi meettelwaaya anthoonyera wiira ayo akhanle afaalusu. (2 Tim. 3:5) Wiira nicuwelele citthu cowoothiya cineetthucihiya, nihaana niilemalelihaka usoma Nuulumo na Nluku, Ibiiblya.—2 Tim. 3:14-17; Yuda 3, 4.
10. Isiyani-tho cinniitthucihaaya ikano Yesu caavahilyaawe mayamunna o Pérgamo ni o Tiatira?
10 Nikhotte khula inanna yooraruwa. Ihaavo itthu ikhwaawe-tho yaahaleela mayamunna o Pérgamo ni o Tiatira. Yesu ahaahukhumu mayamunna akhwaawe o ayo malokwaayo kontha khayaakhotta uraruwa. (Apoka. 2:14, 20) Iyo itthwiiyo inniitthuciha isiyani? Khaninlamuliya wuupuwela wiira pooti wanraruweehu ni Yehova naahala unilevelela nlattu hiiva wookhala myaakha cinci nanswalelaka awula nlattu woovahaceriya miteko cuulupale wanlokoni. (1 Sam. 15:22; 1 Pet. 2:16) Meettelo aatthu o ntuninyani anvira yatepaka ukhala oohinamaana. Masi Yehova khampheela unoona nikhalaka toko ayo atthwaayo. Uyo nopheela unoona nithoonyeraka makhalelo omaana.—Efesu 6:11-13.
11. Isiyani yiitthucileehu mpaka va? (Nwehe ciicammo ikwaaturu “ Citthu cineetthuceehu mahukwaala.”)
11 Isiyani yiitthucileehu mpaka va? Niheetthuca wiira nihaana ninswalelaka Yehova khampa uyova cimpheelaawe. Wakhalaka wiira ihaavo itthu yonrusa Yehova impankeehu, nihaana nihiyaka upanka iyo itthwiiyo woohipicapica wiira Yehova atthune uswali wihu. (Apoka. 2:5, 16; 3:3, 16) Masi Yesu ahovaha ikano cikhwaawe nhina ilivuru yo Apokalipise. Ikanoni?
MWIITTHENKACE WIIRA NVILELE MWALUPATTHIYAKA
Sotwani woomoliya wawe wiirimu, manannani caalupatthalyaawe apoovu a Nluku? (Nwehe iparaagarafu 12-16)
12. Ikano Yesu caavahilyaawe mayamunna o Esmirna ni o Filadélfia inniitthuciha isiyani? (Nwehe Apokalipise 2:10.)
12 Vano nttwee noone ikanoni Yesu caavahilyaawe nloko no Esmirna ni no Filadélfia. Uyo ahowiirela mayamunna o ayo malokwaayo wiira ahoove ulupatthiya, kontha Yehova anhala waatthuvela yaahihiyeke umwiiwelela. (Nsome Apokalipise 2:10; * 3:10) Isiyani ineetthuceehu? Hi ninaahala ulupatthiya. Phimaana, nihaana niitthekacaka wiira nirwee navilele nalupatthiyaka. (Mat. 24:9, 13; 2 Akor. 12:10) Nlattuni unreeraaya uhiliyala iyo itthwiiyo?
13-14. Isiyani inwiirannyeela apoovu a Nluku nlattu wo citthu cinhimiya nhina Apokalipise ikapiitulu 12?
13 Ilivuru yo Apokalipise ineera wiira apoovu a Nluku yanhala ulupatthiya “nihuku na Apwiiya”—ula ukati unkhaleehuula. Apokalipise ikapiitulu 12 inhimya wiira Yesu ukhalihiya wawe Mwene, yahokhumelela ikhotto yuulupale wiirimu. Mikeli—khanle Yesu Kristu—wamoca ni malayikhaawe yahomwaattakanana Sotwani ni maciinnyaawe. (Apoka. 12:7, 8) Ayo awanani a Nlukwaayo yahotthemiya ni yahoomoleliya va watuninyani va. Phimaana, va watuninyani va unaahuviya venci ni cinaakhumelela citthu cinci coohinamaana. (Apoka. 12:9, 12) Masi isiyani inwiirannyeela apoovu a Nluku nlattu wo citthu cotheenennyo?
14 Ilivuru yo Apokalipise yahohimya mananna Sotwani caahalaawe ukhala ukati waahalaawe woomoliya wiirimu. Sotwani woomoliya wawe, uyo khankhitiri-tho uturuwela wiirimu uri Yehova. Phimaana, urusiya wotheene urinaawe, uyo naamalamalihera aswali oothanliya a Yehova va watuninyani va. Ayo makristau oothanliyaayo antthara Umwene wa Nluku ni “anvara nteko woovaha usaahiti wa Yesu.” (Apoka. 12:17; 2 Akor. 5:20; Efesu 6:19, 20) Citthu cotheenennyo cineerannya cani mahukwaala?
15. “Masaahiti meeli” anhimiya nhina Apokalipise ikapiitulu 11 yaari phaapani, ni isiyani yaawiirannyenle?
15 Sotwani ahaavaha ikuru awanani a Nluku va watuninyani va wiira yaalupatthe mayamunna yaari makristau oothanliya yaahoolela nteko woolalya ihapari ca Nluku. Ayo alopwanaayo phaari “masaahiti meeli” anttonkiya nlivuruni yo Apokalipise wiira yaheeviya. * (Apoka. 11:3, 7-11) Mwaakha wo 1918, mayamunna 8 yaahoolela nteko woolalya ihapari yahovariya ni yahohukhumwiya utthukeliya myaakha cinci nkhattya. Atthu enci yahoopuwela wiira nteko waavaraaya ayo makristau oothanliyaayo khawaahala urwaa uhoolo.
16. Isiyani yaakhumelenle mweeri wo Março wo 1919? Masi isiyani Sotwani ihihiilyaawe upanka?
16 Inatiri yo Apokalipise ikapiitulu 11 inaahimya-tho wiira “masaahiti meeli” yeeviye yanhala wunwelela uhinavira ukati mwinci. Iyo inatiriiyo yiirannyeele uvira waya mwaakha mmoca paasi ale mayamunnaale anatthukiye. Mwaakha wo 1919, mweeri wo Março, ale makristau oothanliya yaatthukiyaale yahotthukuliya nkhattya. Woohivira ukati mwinci, ayo mayamunnaayo yahoturuwela uhoolela nteko woolalya ni wiitthuciha ihapari comaana. Masi iyo itthwiiyo khayanhiihile Sotwani waalupattha apoovu a Yehova. Ukhuma uyo ukatyuuyo mpaka mahukwaala, Sotwani neera atepaka waalupattha apoovu a Nluku. (Apoka. 12:15) Phimaana, otheene cihu nihaana ‘nivilelaka ni umwaamini’ Yehova.—Apoka. 13:10.
MWIIKURUMICE UVARA NTEKO YEHOVA UNIVAHILYAAWE
17. Manannani apoovu a Yehova cinkaviheriyaaya yalupatthiyaka?
17 Apokalipise ikapiitulu 12 inthoonyera wiira apoovu a Nluku yanhala ukaviheriya niinanna yahaawehereraaya. Itthaya yanhala wiihula ni umirya mooloko unthoonyera ulupatthiya wa apoovu a Nluku. (Apoka. 12:16) Ni iyo phi itthu yiirannyeele. Ukati nkhwaawe, atthu akiina o ntuninyani ya Sotwani, toko itiripunaali ni atthu anoolumacera milattu, anaathoonyera ureera nrima ni anawaakavihera apoovu a Nluku yalupatthiyaka. Ikwaha cinci, apoovu a Yehova coolumaceriyaka milattu caya mmatiripunaali, anaavahiya isariya ni anaatthuniheriya unswalela Nluku. Isiyani aswali a Yehova impankaaya yatthuniheriyaka uswali woohilupatthaciya? Ayo khanviriiha utaphuwa waya wiira avare nteko Yehova univahilyaawe. (1 Akor. 16:9) Masi ntekoni yooyo?
Moolumoni meeli oovirikana apoovu a Nluku anlalyaaya? (Nwehe iparaagarafu 18-19)
18. Ntekoni muulupale unlamuliyeehu uvara ala mahuku ookhiceraala?
18 Yesu ahohimya wiira apoovu a Nluku yanhala ulalya ‘ihapari comaana co Umwene wa Nluku’ ntuninyani motheene ihinaaya umalamalihiya ituninya ya Sotwani. (Mat. 24:14) Wiira akhitiri uvara uyo ntekooyo, ayo yanhala ukaviheriya ninlayikha awula niikhurupu yo malayikha. Ayo malayikhaayo ahaana ‘ihapari comaana coohimala wiira yaalalyeere atthu ankhala watuninyani, olapo cotheene, o maloko otheene, oluuka cotheene, ni apoovu otheene.’—Apoka. 14:6.
19. Moolumoni-tho anlamuliyaaya ulalya ale anonfenta Yehova?
19 Apoovu a Nluku khanlalya ihapari comaana paasi. Ayo ciicammo anaakavihera nteko unvaraaya malayikha unhimiya nhina Apokalipise ikapiitulu 8 mpaka 10. Ayo malayikhaayo anaahimya masakha menci anhala waaphwanya ale ahintthuna umwiiwelela Nluku. Phimaana, Masaahiti a Yehova anaalalya moolumo anlattanaca niipula yo maluku ni yo mooro, kontha ayo moolumwaayo akhanle ihukhumu Nluku inhalaawe uwaanela ila ituninya yoohinamaaneela. (Apoka. 8:7, 13) Atthu ahaana yacuwelaka wiira ila ituninyeela ihanle vakaani umala ni ahaana yarukunusaka meettelwaaya yapheelaka woopwa nihuku noorusiya Yehova. (Sof. 2:2, 3) Masi atthu khunaacivela uniiwa nilalyaaka ayo moolumo ohukhumwaayo. Phimaana, nihaana nilipaka nrima wiira nilalye. Ukati wo masakha moolupale phuukati unhaleehu utepa ulalya moolumo ohukhumu woohaakhuwakhuwa atthu.—Apoka. 16:21.
MWIIWELELE MOOLUMO ONATIRI CO APOKALIPISE
20. Ninhala wiitthucani nhina myaha miili cinttharanaca nuula mwahoola?
20 Hiiva nihaana niiwelelaka “moolumo o ila inatiriila” kontha ninaapanka mphantte nhina inatiri co Apokalipise cineerannya mahukwaala. (Apoka. 1:3) Masi isiyani inlamuliyeehu upanka wiira nihihiye umwiiwelela Yehova hataa nilupatthiyaka, ni wiira nihihiye ulipa nrima wiira nilalye? Cihaavo citthu piili cinhala unikavihera. Yoopacera, ucuwela citthu cinhimiya nlivuruni yo Apokalipise wiira phinhala uwiirannyeela awanani a Nluku. Ni yonayeeli, ucuwela iparakha cinhaleehu waakhela uhoolo naahihiyeke umwiiwelela Yehova. Nnya phi citthu cinhaleehu wiitthuca nhina myaha miili cinttharanaca nuula mwahoola.
NCIPO 32 Escolhe o Lado de Jeová!
^ Ninkhala ukati uneerannyaaya citthu cootikhiniha! Mahukwaala, ninnoona ciirannyaaka inatiri co nlivuruni ya Apokalipise. Masi nnyo inatirinnyo isiyani impheelaaya unihimyeera? Nhina ula mwahoola ni myaha miili cinttharana nuula, ninaahala woona citthu cineetthuceehu nlivuruni ya Apokalipise. Ninaahala woona wiira Yehova nohala utthuna uswali wihu neettelaka citthu cantikhiye nhina iyo ilivurwiiyo.
^ Apokalipise 2:3 Nyuuva khamoocyaale ni nhovilela citthu cinci nlattu wo ncina naka. 4 Masi, ihaavo inwoonaakani ihinkicivela: nyuuva nhohiya nifento narineenyu wiipaceroni.
^ Apokalipise 3:1 Nlayikha no nloko no Sardes, wantikhele co: Nnya citthunnya nohimya ule rina minepa saapa ca Nluku ni rina itthonttwa tthaaru. Uyo neera co: ‘Kinaacuwela citthu cimpankaa ni kinaacuwela wiira weeva uncuweliya ukhala ntthu nkumi, masi khweeliini weeva untthu ookhwa. 2 Uhiitthaale ni ulipihace ile ihalannya ni ihanle vakaani ukhwa, kontha mi kihoona wiira khunvarenle nteko Nluku ratta-raatta. 3 Phimaana, uhihiye wuupuwela citthu caakhenlya ni ciiwilyaa. Uhihiye usunka nnyo citthunnyo ni uttharuwe. Weekhweeli, waahunweke, mi kinhala wuuphwanya khampa latarawu, ni khunhala ucuwelela iwoora inhalaaka uwa.’
^ Apokalipise 3:15 Mi kinaacuwela citthu cimpankaa ni kinaacuwela wiira weeva khunakhala ooririya awula ooviha. Phataari unari ooririya awula ooviha. 16 Masi ukhala wiira unlikana nimaaci ookuttihiya, awula khuririile ni khuvihile, mi kinaahala wuuraphya mmalakuni waka. 17 Kontha weeva uneera: “Kithaciri, kihophwanya maali menci ni khiivo itthu inkithwa,” masi khuncuwela wiira weeva ukhanle ntthu ootakhaliya, nhuvi, masikhini, oohoona ni uri pwitipwiti.
^ Apokalipise 2:10 Uhoove masakha ampheela wuukhumelela. Tiyapu khanhala uhiyerera waarweeha nkhattya atthu akiina ari iriyariinyu, wiira nyuuva nttehiye cinene, ni nnaahala waanana masakha mahuku 10. Ukhale ookhuluvelya mpaka wuukhwani, ni miiva kinaahala wuutthuvela ukumi.
^ Nwehe “Makoho Aanamasoma nhina irevista” Ukhalenla 15 yo Novembro yo 2014, ipaagina 30.
