MWAHA WOOSOMIYA 23
Ayari—Mwaakavihere asaaniinyu unfenta Yehova
“Unfente Yehova, Nlukwaa ninrimaa wotheene, niiroohwaa yotheene ni nimuupuwelelwaa otheene.”—MAT. 22:37.
NCIPO 134 Asaana ankhala iparakha inkhuma wa Nluku
NINHALA WIITTHUCANI? *
1-2. Ntaphulele isiyani inniiriha uwehera nimananna makhwaawe ikano co mbiiblyani.
NIHUKU noothelaniya ikacamentu, nlopwana ni nthiyana anthelana anaaviriyana sana-saana mwaha wokacamentu. Ikano cinhimyeeriyaaya nhina uyo mwahooyo, khacinakhala ikano cimpacerihaaya wiiwa. Masi ukhuma nno nihukunno mpaka uhoolo, nnyo ikanonnyo cinaatepa waavara nrima. Kontha isiyani? Kontha ayo anaahala upheela weettela nnyo ikanonnyo.
2 Iyo phi itthu ineerannya anamathelana yaayaraka asaana. Pooti ukhalaka wiira waaryaaya ahinaayara asaana, ayo aheewa ikano cinci cinhimya mananna owaalaka asaana. Masi yaayaraka asaana, nnyo ikanonnyo cinaatepa waavara nrima ukhala wiira vano ahaana nrintti muulupale wo waalaka asaanaaya. Iyo itthwiiyo inthoonyera wiira citthu cikhwaawe cinnikhumelela, cinaaniiriha uwehera nimananna makhwaawe ikano co mbiiblyani. Phimaana, otheene nihaana niikurumicaka upanka itthu yaakurumiciye mamwene o Isarayeli: nihaana nisomaka nuulumo na Nluku “mahuku otheene.”—Deut. 17:19.
3. Ninhala wiitthucani nhina ula mwahoola?
3 Ayari, nyuuva nhaana iparakha yuulupale: waakavihera asaaniinyu uncuwela Yehova. Masi khuntosa paahi uwiitthuciha asaaniinyu myaha ca Yehova. Nyuuva nhaana ciicammo mwaakaviheraka asaaniinyu unfenta Yehova ninrimaaya wotheene. Masi isiyani inhala wuukaviherani upanka iyo itthwiiyo? Nhina ula mwahoola, ninaahala woona ikano 4 cinhala wuukaviherani. (2 Tim. 3:16) Ciicammo ninaahala woona ifayitani ciphwanyilyaaya ayari yeettenle nnyo ikanonnyo.
IKANO 4 CINHALA WAAKAVIHERA AYARI
Ifayitani inhalaaya uphwanya asaaniinyu mweekurumicaka utotha malakihero a Yehova ni waavaha asaaniinyu ntakihero nomaana? (Nwehe iparaagarafu 4, 8)
4. Ikanoni ayari inlamuliyaaya utthara wiira yaakurumice asaanaaya unfenta Yehova? (Nwehe Tiyaku 1:5.)
4 Ikano 1: Ntothe malakihero a Yehova. Munlepele Yehova wuuvahani ucuwelaca wiira nkhitiri waakurumica asaaniinyu unfenta. (Nsome Tiyaku 1:5. *) Khaavo ntthu nkiina nohala wuukaviherani unvikana Yehova. Nlattuni? Nlattu wo citthu piili. Yoopacera, khaavo nnyari nkhwaawe oocuwelaca nonvikana Yehova. (Isaa. 36:9) Ni yonayeeli, utthara ikano ca Yehova unaaniphwanyiha ifayita ukati wotheene.—Isai. 48:17.
5. a) Mphwinko woothotokanihiya wa Yehova unaakavihera cani ayari? b) Nhina ividiyu ineera “Yehova honikavihera uwiitthuciha asaaniihu,” ntakihero na amunna Amorim ni amwaaraya niwiitthucihileni isiyani?
5 Mbiiblyani ni mumphwinkoni wawe woothotokanihiya, Yehova nawaavaha ayari malakihero otheene anhala waakavihera waakurumica asaanaaya unfenta. (Mat. 24:45) Wootakihera, nyuuva nnaahala uphwanya malakihero menci mphantte uneehaniya “Ajuda Para a Família” waakumiheriya khalayi nrevistani Despertai!, ni nna co umphwanyannya nsayitini jw.org. Ni ividiyu cinci cimphwanyannya nsayitini jw.org pooti waathoonyera ayari mattharelelo o mbiiblyani anhala waakavihera uwuunuwiha ratta asaanaaya. *—Miru. 2:4-6.
6. Amunna Joe ni amwaaraya aneecoona cani nlattu wo malakihero otheene anvahiyaaya mumphwinkoni wa Yehova?
6 Ayari enci anansukhuru cinene Yehova nlattu wo malakihero otheene anvahiyaaya mumphwinkoni wawe. Nnyari mmoca neehaniya Joe neera: “Waakavihera asaana araru unfenta Yehova ikhanle itthu yoorika. Mi ni amwaaraka khaninhiya unlepela Yehova wiira anikavihere. Ikwaha cinci, ninnoonaka wiira nakhalanaka marikariko, unaakumiheriya mwaha awula ividiyu innikavihera uviriha ayo marikarikwaayo. Unari wiira Yehova khannivaha ayo malakiherwaayo, hi khanaahala ukhitiri uwuunuwiha ratta asaaniihu.” Amunna Joe ni amwaaraya annoona wiira nnyo myahannyo ni nnyo ividiyunnyo cinawaakavihera asaanaaya ukhalana upatthani womaana ni Yehova.
7. Kontha isiyani ayari ahaana yiikurumicaka waavaha asaanaaya ntakihero nomaana? (Nwehe Arooma 2:21.)
7 Ikano 2: Mwaavahe asaaniinyu ntakihero nomaana. Asaana anaaweha ni anaatakiha citthu cimpankaaya athumwanaya ni anumwanaya. Ninaacuwela wiira khaavo nnyari hinvonya. (Aroo. 3:23) Unookhalaru commo, ayari ahaana yiikurumicaka waavaha asaanaaya ntakihero nomaana. (Nsome Arooma 2:21. *) Moone itthu yuulumilyaawe nnyari mmoca. Uyo enre co: “Asaana ankhala khampa nsawu. Khampa nsawu cinnuulaaya maaci, asaana anaatakiha citthu cinwoonaaya athumwanaya ni anumwanaya yapankaka. Ni asaana yoonaka wiira khanimpanka citthu cinoolumeehu, ayo anaanihimyeera.” Phimaana, napheelaka wiira asaaniihu anfente Yehova, hiiva nihaana nipaceraka unfenta Yehova cinene wiira asaaniihu aniitthucere.
8-9. Itthu yuulumilyaawe Andrew ni Emma iwiitthucihileni isiyani?
8 Ahaavo mananna menci owaakurumica asaana unfenta Yehova. Mwiiwe itthu yuulumilyaawe mmirawo neehaniya Andrew rina myaakha 17. Uyo enre: “Ukhuma nenne nokhalayi, apaapa ni amaama ahokiitthuciha wiira ulompa ikhanle itthu yofayita. Khula nihuku kihinaaya urupa, apaapa yaanaalompa nkhayi ni mi, hataa ukhalaka wiira miivano kaholompa. Apaapa yaaniirelaka co: ‘Weeva pooti umuulumana Yehova khula ukati unhalaa upheela.’ Phimaana, ulompa kinoona ukhala itthu yuulupale muukumini waka. Ni nna co, mi khunkirika unlompa Yehova ni kimmoona khampa Apaapaaka ookifenta.” Ayari, nhiliyale wiira unfenta winyu Yehova pooti waakurumica asaaniinyu wiira ciicammo anfente.
9 Moone ntakihero nikhwaawe na nrokorihu neehaniya Emma. Athumwaane yahokopha nsurukhu mwinci, uthama wapuwani ni waahiyera anumwaane wiira alive uyo nsurukhuuyo. Emma neera: “Amaama yaheekurumica cinene wiira alive nsurukhu waakophalyaaya apaapa ni wiira anaaverye iyoolya, ni yaaniirelaka wiira Yehova khanhiya waawacera atthu anonswalela. Mi kaanaakhitiri woona wiira ayo khweeliini yaanaakupali iyo itthwiiyo. Citthu cotheene caaniitthucihaaya, ayova yaanaapanka.” Iyo itthwiiyo inniitthuciha isiyani? Inniitthuciha wiira ayari pooti waavaha asaanaaya ntakihero nomaana, hataa yakhalanaka masakha menci.—Akalas. 6:9.
10. Ukatini ayari asarayeli waalamuliyaaya wuuluma myaha ca Yehova nkhayi naasaanaaya? (Nwehe Deuteronomiyu 6:6, 7.)
10 Ikano 3: Nhihiye uwoopana mwaha asaaniinyu. Yehova ahaakurumica ayari o Isarayeli wuuluma myaha cawe khula ukati waakhalaaya naasaanaaya. (Nsome Deuteronomiyu 6:6, 7. *) Khalayi, ayari yaanaakhalana ukati mwinci woowoopana mwaha asaanaaya ni uwiitthuciha unfenta Yehova. Wootakihera, mwaana mwanlopwana aanaaviriha ukati mwinci nari umattani naathumwaane, yaalaka awula yahephaka icoolya. Ni mwaana mwanthiyana aanaaviriha ukati mwinci aakaviheraka anumwaane uvara miteko co wapuwani. Ayari yaalamuliya uvarela nteko uyo ukatyuuyo wiira yuulume naasaanaaya myaha cofayita. Ayo pooti woopelaaya mwaha makhalelo omaana a Yehova ni mananna Yehova caakaviheraawe itthokwaaya.
11. Ukatini ayari unlamuliyaaya uwoopana mwaha asaanaaya?
11 Ninaacuwela wiira mananna cinkhaliyaaya mahukwaala anaavirikana nimananna caakhalaaya atthu okhalayi. Ilapo cinci, ayari khankhitiri uviriha ukati mwinci anari naasaanaaya. Ayari ankhalaka untekoni ni asaana ankhala ucikolani. Phimaana, ayari ahaana yatothaka ukati woowoopana mwaha asaanaaya. (Efesu 5:15, 16; Afili. 1:10) Ni ukati unreera uwoopana mwaha asaana, unkhala uhiyu wo uswali waamuci. Mmirawo mmoca neehaniya Alexander neera: “Apaapa khanhiya uhoolela uswali wihu waamuci khula isumana. Ni namalihaka usomasoma, ninawoopaca mwaha.”
12. Isiyani ayari inlamuliyaaya wuupuwela ukati woohoolela uswali waamuci?
12 Wakhala wiira nyuuva mwaayari, isiyani inlamuliyeenyu upanka wiira ncivihace uswali winyu waamuci ni asaana otheene waacivele? Nnoonela cani usoma ilivuru yo phiyaaru Mphwanye Utteeliya Uhimmala!? Iyo ilivurwiiyo inaahala wuukaviherani uwoopana mwaha asaaniinyu. Ni nhiliyale wiira itthu impheeleenyu uyo ukatyuuyo ukhanle waaviriyana asaaniinyu yuuhimyeerakani citthu cinaahela isukhuli ni mananna cineecoonaaya. Phimaana, nhivarele nteko ukati wo uswali waamuci wiira mwaapwapele asaaniinyu ni wiira mwaalake nlattu wo itthu ihipankilyaaya ratta. Ni mwaninyu oolumaka itthu inoopuwelaawe invirikaniha itthu inhimyaaya Ibiiblya, mwiivarace wiira nhirusiye. Masi wuutteeleni nrima nlattu mwaninyu woohivitha itthu immwiira ni inoopuwelaawe. Ni munkurumice mwaninyu wuuhimyeerani itthu inoopuwelaawe khula ukati unhalaawe upheela. Nyuuva nnohala ukhitiri waakavihera asaaniinyu, mwacuwelaka itthu inoopuwelaaya ni inwiira.
Manannani ayari cinhalaaya uvarela nteko citthu cumpilyaawe Yehova wiira awiitthucihe asaanaaya makhalelwaawe? (Nwehe iparaagarafu 13)
13. Niireke ayari ahaana yawehereraka uphiya ukati unaasomihaaya asaanaaya wiira yuulume naayo myaha ca Yehova? Ntaphulele.
13 Nvarele nteko khula ukati unkhalaneenyu wiira muulume myaha ca Yehova nkhayi naasaaniinyu. Nhiweherere uphiya ukati unaasomiheenyu asaaniinyu wiira muulume myaha ca Yehova nkhayi naayo. Nviriyane itthu yuulumilyaaya ayari aneehaniya Lisa. Ayo aneera: “Hi ninaavarela nteko khula itthu inooneehu wiira niwiitthucihe asaaniihu myaha ca Yehova. Wootakihera, mwalapweehu apankaka itthu yooteehaca, hi nanvarela nteko iyo itthwiiyo wiira niwiitthucihe asaaniihu wiira Yehova cinancivela citthu cooteehaca ni unancivela ukumi khampa hiiva cinnicivelaaya.”
Ayari, nyuuva munnaacuwela atthu anaathukana asaaniinyu? (Nwehe iparaagarafu 14) *
14. Kontha isiyani ayari ahaana yaakaviheraka asaanaaya ukhalana apatthani omaana? (Nwehe Miruku 13:20.)
14 Ikano 4: Mwaakavihere asaaniinyu ukhalana apatthani omaana. Ibiiblya inthoonyera wiira atthu anaapatthananeehu pooti urukunusa makhalelweehu ni unikhaliha atthu omaana awula oohinamaana. (Nsome Miruku 13:20. *) Ayari, nyuuva munnaacuwela atthu asaaniinyu anaapatthananaaya? Nhopaca uviriha ukati naayo wiira mwaacuwele? Nnohala waakavihera cani asaaniinyu ukhalana apatthani ciicammo anonfenta Yehova? (1 Akor. 15:33) Wiira mwaakavihere asaaniinyu ukhalana apatthani omaana, nyuuva pooti waalattula uwannyu mayamunna arina upatthani womaana ni Yehova wiira mwaathukane awula mpanke itthu ikhwaawe nkhayi naasaaniinyu.—Isaa. 119:63.
15. Ayari anhala waakavihera cani asaanaaya ukhalana apatthani omaana?
15 Moone ntakihero na nnyari neehaniya Tony. Uyo naahimya itthu yaapankilyaawe nkhayi ni amwaarawe wiira yaakavihere asaanaaya ukhalana apatthani omaana: “Ukhuma nenne nokhalayi, hi unaanicivela waalattula mayamunna ni miyanuunu amirawo ni oolupale wiira yoopanke itthu nkhayi ni hi uwannyihu. Uhaavo ukati waalyeehu itthu nkhayi ni namalihaka, naanaapanka uswali waamuci. Iyo itthwiiyo yahonikavihera waacuwela ayo mayamunnaayo, anonfenta Yehova ni anonswalela waatteelaka nrima. Hi nahokhalana iparakha yo waalukamiha wapuwani wihu mamootoli osirikwiitu, mamisiyonaariyu ni mayamunna akhwaawe. Asaaniihu ahowiitthucera ayo mayamunnaayo wiikurumica waya, ucuwelaca waya ni ntakihero naya. Ni iyo itthwiiyo yahaakavihera asaaniihu utepa umpatthanana Yehova.” Ayari, nlakele waakavihera asaaniinyu ukhalana apatthani omaana.
NHOOCYE NI NKHALANE NWEHERERO!
16. Isiyani ayari inlamuliyaaya wuupuwela mwanaya eeraka wiira khampheela unswalela Yehova?
16 Pooti ukhalaka wiira nyuuva nheekurumica cinene, masi mwaninyu neera wiira khampheela unswalela Yehova. Yowiirannyeelakani iyo itthwiiyo, nhuupuwele wiira nyuuva nkhanle nnyari oohinamaana. Yehova honivaha otheene cihu utaphuwa. Iyo itthwiiyo maanaaya wiira mwaninyu phinhala uthanla unswalela Yehova awula mena. Ni mwaninyu ahiyaka unswalela Yehova, nhihiye uweherera wiira wanihukuni, uyo pooti uturuwela unswalela. Muupuwele ntakihero na mwaana aathamile wapuwani waathumwaane. (Luka 15:11-19, 22-24) Nhina nno nlattaniheronno, mwaana aathamale wapuwani waathumwaane ahopanka citthu cinci coohinamaana. Waanookhalaru commo, wahoolo ahohokolya. Masi, ahaavo aneera co: “Nno ntakihero paasi. Iyo itthwiiyo pooti wiirannya khweeliini?” Iyee, pooti wiirannya! Moone itthu yankhumelenle nlopwana mmoca neehaniya Elie.
17. Itthu yankhumelenle Elie inoolipihani manannani?
17 Elie neera co: “Apaapa ni amaama yahopanka ikuru wiira akikavihere unfenta Yehova ni wiira ikicivele Ibiiblya. Masi ukati woonuwilyaaka, kahancera uhiwiiwelela.” Elie ahancera upanka citthu cootakhala. Ukati athumwaane ni anumwaane waamananihilyaaya unkavihera, uyo khaatthunale. Nuuwakatyaaya, uyo ahothama wapuwani ni ahancera upanka citthu coohinamaana. Waanookhalaru commo, uyo aanawuulumaka myaha co mbiiblyani nimpwanaawe. Elie neera: “Uyo uwakatyuuyo mi kahoona wiira koolumaka myaha ca Yehova nimpwanaaka, kaanaatepa umuupuwela Yehova. Vakaani-vakaani, myaha co mbiiblyani apaapa ni amaama caakiitthucihilyaaya cahancera wuunuwa wanrimani waka.” Wahoolo, uyo ahoturuwela unswalela Yehova. * Athumwaane ni anumwaane wahaatteela nrima cinene nlattu woomwiitthuciha mwanaya unfenta Yehova ikhumelo inamwannyaawe!—2 Tim. 3:14, 15.
18. Nneecona cani mwawoonaka ayari aneekurumica cinene wiira yaakavihere asaanaaya unfenta Yehova?
18 Ayari, nyuuva nhaana iparakha yuulupale yoowuunuwiha asaaniinyu wiira akhale aswali a Yehova. (Isaa. 78:4-6) Uyo ukhanle nteko woorika ni unawuuphwanelani uttottopeliya nlattu wo wiikurumica winyu wiira mwaakavihere asaaniinyu. Mwaahihiyeke wiikurumica waakavihera asaaniinyu wiira anfente Yehova ni amwiiwelele, pooti wankupaliinyu wiira Apaapeehu Yehova unaahala waatteela nrima cinene nlattu woowoonani mpankaka commo.—Efesu 6:4.
NCIPO 135 “Sê Sábio, Meu Filho”
^ Ayari makristau anawaafenta venci asaanaaya. Ayo anawiikurumica waawacera ratta asaanaaya wiira akhale saana. Masi ciicammo, ayari anawiikurumica upanka yotheene inkhitiryaaya wiira yaakavihere asaanaaya unfenta Yehova. Nhina ula mwahoola, ninaahala woona ikano 4 cinhala waakavihera ayari ukhitiri upanka iyo itthwiiyo.
^ Tiyaku 1:5 Wakhala wiira haavo ntthu hirina ucuwelaca, hihiye unlepela Nluku ni uyo ntthuuyo naahala uvahiya ucuwelaca, kontha Nluku nawaavaha atthu otheene woohimatthepwa ni woohaattekutta.
^ Moone ividiyu Yehova honikavihera uwiitthuciha asaaniihu nhina jw.org.
^ Arooma 2:21 We unaasomiha akhunananaa, uhineesomiherani mwaaneennyaa? We unonlalyeera nkhunananaa wiiraka: “Uhinnye,” unennyerani?
^ Deuteronomiyu 6:6 Moolumo anoohimeryaakani ilelo, nhaana nsunkaka wanrimani winyu, 7 ni nhaana mwalipiheraka uwiitthuciha asaaniinyu ni waahimyeera nnonkomale wapuwani winyu, mweettaka niiparapaara, ukati woorwaa urupa ni ukati unonweenyu.
^ Miruku 13:20 Ntthu neetta naatthu ankhili omaana, nuuyo nhala ukhala ntthu ankhili omaana, masi ule neettana atthu oohankhili omaana naahala uttharuwa.
^ Nwehe mwaha “Ibiiblya inaarukunusa makhalelo aatthu” nrevistani Ukhalenla 1 yo Abril yo 2012.
^ ILATARATO: Nnyari anttikhakana basquete mwanawe ni mpwanaawe mwanawe. Iyo itthwiiyo inankavihera waacuwela atthu anonthukana mwanawe.
