1. Ikhalenoni imoca ya Yesu intepa woonannya? Nhimye ntakihero.

IKHALELO imoca yootepa woonannya ya Yesu uri ucuwela marikariko anaaphwanya apinaatamu oopahuwa. Ukati Yesu waaryaawe watuninyani, ahokhitiri ‘waathyaana ale yaathyaa’ ni ‘uwunlana ale yonla’. (Aroo. 12:15) Wootakihera, ukati atthari a Yesu 70 waaturuwalyaaya wuulalyaani, yanhimyeraka Yesu inanna caakhitinryaaya uvara nteko ratta, Yesu “ahotteeliya cinene.” (Luka 10:17-21) Masi, ukati Laazaru waakhwilyaawe ni Yesu woonalyaawe masukhuli yaarinaaya atthu yanfenta Laazaru, Yesu “wahomwiira uthunku ni ahokhala ni masukhuli.”—Joau 11:33.

2. Kontha isiyani Yesu, hataa akhalaka oohipahuwa, aanaakhitiri waawacera atthu?

² Hataa Yesu akhalaka oohipahuwa, uyo aanawaawacera ratta apinaatamu oopahuwa. Kontha isiyani Yesu aanaakhitiri upanka commo? Woopacera, kontha Yesu aanawaafenta atthu. Ni toko cithoonyenryaaya mwaha woosomiya uvinre, Yesu itthu ‘yaatepa uncivela yaari apinaatamu.’ (Miru. 8:31) Nno nifentonno nahonkhitiriha Yesu ucuwela ratta moopuwelelo aapinaatamu. Apostolu Joau hohimya eeraka: “Aanaacuwela iri nhina mwa apinaatamu.” (Joau 2:25) Yesu aanawaawacera atthu ni nifento. Atthwaayo yoonaka wiira yaanaafentiya ni Yesu, yaanaatthuna unviriyana Yesu ukati waalalyaawe ihapari co Umwene. Hiiva ciicammo natepaka waafenta atthu, ntekweehu woolalyeera unaahala uneettela ratta.—2 Tim. 4:5.

3-4. a) Wakhalaka wiira ninawaawacera atthu, ninhala ulalyaa manannani? b) Isiyani inhaleehu usoma nhina ula mwahoola?

³ Apostolu Paulu aanaacuwela wiira aahaana alalyaaka. Ni hiiva ciicammo ninaacuwela wiira nihaana nilalyaaka. (1 Akor.  9:16) Masi wakhalaka wiira ninawaawacera atthu, khaninhala ulalyaa paasi nlattu woocuwela wiira nihaana nilalyaaka, ninhala ulalyaa kontha ninawaafenta atthu. Ninaapheela waakavihera atthu kontha ninawaawacera. Ninaacuwela wiira “uvaha unaatteeliha nrima cinene uvirikana ni waakhelela.” (Mite. 20:35) Nalalyaaka nlattu woopheela waakavihera atthu, ninaahala utteeliya cinene wuulalyaani.

⁴ Nhina ula mwahoola, ninaahala wiitthuca mananna owaawacera atthu anhaleehu waapanka eetthuci. Woopacera, ninaahala wiitthuca mananna Yesu caawaceraawe atthu wuulalyaani. Vano, ninaahala usoma mananna macese ninlamuliyeehu untakiha Yesu.—1 Pet. 2:21.

5-6. a) Atthuni Yesu yaawacenryaawe? b) Kontha isiyani Yesu ahowoonela uthunku ale atthwaale, toko cineeraaya ilivuru ya Isaiya 61:1, 2?

⁵ Moone itthu inthoonyera wiira Yesu aanawaawacera atthu. Nkwaha mmoca, Yesu ni attharyaawe yaanowoocya cinene nlattu wooviriha ukati mwinci wuulalyaani. Ayo “khayaarina ukati, nanka woopheela ulya.” Phimaana Yesu ahaarwaana attharyaawe “nipuro nowiipithya” wiira ‘yamumule vakaani.’ Masi atthu enci yahontthara Yesu ni attharyaawe. Ukati Yesu waaphiilyaawe, awoonaka ale atthwaale, aakhanle cani ni aapankale isiyani? Yesu “ahowoonela uthunku, * kontha yaari toko ikhontwaa coohikhalana makampuci. Ni ahancera weetthuciha citthu cinci.”—Mark. 6:30-34.

⁶ Kontha isiyani Yesu aanaawoonela uthunku, awula aanawaawacera atthu? Ibiiblya ineera wiira ale atthwaale “yaari toko ikhontwaa coohikhalana makampuci.” Atthunaka Yesu ahoona wiira iriyari ale atthwaale, yahaavo amasikhini ni yahaana yavaraka nteko cinene wiira yaalihere amucyaaya. Atthu akina pooti yaanaahuva nlattu wookhwa ntthu yanfentaaya. Yesu aanaakhitiri ucuwela citthu caakhumelela ale atthwaale. Khampa cithoonyenryaaya mwaha woosomiya uvinre, Yesu pooti yahonkhumelela masakha toko  ayo. Yesu aanawaawacera atthu, phimaana aanaapheela cinene waahimyera ihapari caahala waamaaliha.—Nsome Isaiya 61:1, 2.

7. Ninlamuliya untakiha cani Yesu?

⁷ Ntakihero na Yesu ninniitthuciha isiyani? Toko Yesu, hiiva ciicammo ninoorukureeriya ni atthu ari “toko ikhontwaa coohikhalana makampuci.” Ayo ahaana masankiho menci. Masi hiiva nihaana itthu impheelaaya ayo atthwaayo—ihapari co Umwene. (Apoka. 14:6) Phimaana, nintakihaka Yesu, ninaalalya ihapari comaana kontha ninaamoonela “uthunku ule owiiyeviha ni masikhini.” (Isaa. 72:13) Hiiva ninaawoonela uthunku atthu ni ninaapheela cinene upanka itthu wiira naakavihere.

8. Manannani ninlamuliyeehu waawacera atthu wuulalyeerani? Ntakihere.

⁸ Ninlamuliya waawacera cani atthu wuulalyeerani? Nihaana nuupuwelaka itthu inwiira ni inoopuwelaaya atthu anaaphwanyeehu wuulalyaani, ni nihaana naawaceraka khampa caahaleehu upheela wiira niwaceriye yaaniphwanyale masakha arinaaya ayo atthwaayo. * (Mat. 7:12) Ninaahala woopela mwaha mananna macese oopanka iyo. Yoopacera: muupuwele itthu impheelaawe khula ntthu. Ntekweehu woolalyeera unaalattanaca ni nteko wa meetiku. Meetiku omaana mpaca wuupuwela itthu impheelaawe nretta nontafityaawe. Uyo nankohakoha nretta ni nanviriyana ratta ukati unhimyaawe itthu immwiira. Meetiku omaana khanaakuvela umwantikhela mirette nretta, hinaaya umwiiwaca. Pooti ukhala wiira uyo naaweherera mpaka acuweleke ratta itthu immwiira nretta. Vano phimmwantikhelaawe nretta mirette comaana. Inanna imoca, hiiva nihaana nipacaka wuupuwela itthu inonkhumelela ni itthu inoopuwelaawe khula ntthu. Wuulalyeerani, khaninlamuliya woopa mwaha mmocaaru naatthu otheene ampheela uniiwelela.

9. Isiyani ihinlamuliyeehu upanka ukati wonlalyeera ntthu? Itthuni inreera upanka?

⁹ Wakhala wiira nnaapaceriha umoopana mwaha ntthu wuulalyeerani, nhaakuve wuupuwela wiira nnaacuwela citthu cinonkhumelela, citthu cinkupalyaawe ni nlattuni nokupalyaawe. (Miru. 18:13) Uhiya commo, munkohakohe ratta wiira muncuwele saana. (Miru. 20:5) Wakhala wiira iyo itthu impankesiya ncoko unkhaleenyu, munlepele wiira oohimyacereni vakaani nteko unvaraawe, amucyaawe, citthu cipacale unkhumelela ni mananna cinoopuwelaawe. Ayo makohwaayo anaanikavihera ucuwela nlattuni uyo ntthuuyo mpheelelaawe ihapari comaana. Nacuwelaka iyo, nihaana untakiha Yesu ni waawacera atthu. Ninaahala wuupuwela citthu cimpheelaaya ni waakavihera.—Nwehe ciicammo 1 Akorintu 9:19-23.

10-11. Toko cineeraaya 2 Akorintu 4:7, 8, inannani yonayeeli ninlamuliyeehu waawacera atthu? Nhimye ntakihero.

 ¹⁰ Yonayeeli: mmananihe wuupuwela citthu cinaakhumelela atthu muukumini waya. Pooti ukhalaka wiira hiiva anaanikhumelela awula ahopaca unikhumelela masakha anaakhuna atthu enci. Kontha otheene cihu naatthu oopahuwa ni anaanikhumelela masakha mamocaaru. (1 Akor. 10:13) Hiiva ninaacuwela wiira makhalelo ontuninyani anaarikarika. Ni ninkhitiri uvilela kontha Yehova naanikavihera. (Nsome 2 Akorintu 4:7, 8.) Masi moopuwele ale ahinoncuwela Yehova. Ankhitiri cani waanana marikariko ontuninyani woohikaviheriya ni Yehova? Nawoonelaka uthunku atthu, toko Yesu, ninaahala upheela waahimyera “ihapari comaana co itthu yootepa ureera.”—Isai. 52:7.

¹¹ Mmuupuwele muulupaleehu Botankin. Hinaaya wiitthuca ikhweeli, Botankin ari oomaala cinene ni waananrikela uwuulumana atthu. Nuukatyaaya, uyo ahotthuna usomihiya Ibiiblya. Botankin neera: “Waasomaka Ibiiblya, kaheetthuca wiira makristau ahaana waahimyera akhwaaya citthu cinaaminnyaaya. Khweeliini, mi akaakupali wiira kaanaahala ukhitiri upanka iyo.” Hataa ukhalaka commo, Botankin aanaawuupuwela atthu ahinatoko thanku wiiwa ikhweeli ni aanawuupuwela mananna ayo atthwaayo cinaarikelaaya makhalelo nlattu woohincuwela Yehova. Uyo neera: “Citthu conaanaano ceetthucaaka caanaakitteeliha ni caanaakitaphula nrima. Mi kaanaacuwela wiira atthu akina ciicammo yaanaapheela wiitthuca nnyo ikhweelinnyo.” Ukati Botankin aawoonelaawe uthunku atthu, aanaatepa ulipa nrima wiira alalye. Botankin naamalihera eeraka: “Waahimyera atthu myaha combiiblyani uhokikavihera utaphuwa. Ciicammo uholipihaca wanrimani waka citthu cancalyaaka ukupali.” *

12-13. Kontha isiyani nihaana waavilela atthu anaaphwanyeehu wuulalyeerani? Ntakihere.

¹² Yoneeraru: nvilele ukati uneetthuciheenyu. Hiiva ninaacuwela ratta ikhweeli  combiiblyani. Masi atthu enci khancuwela. Ni atthunaka ayo anaavaresesa cinene citthu cinkupalyaaya. Uhiya commo, atthu enci nlattu wottiini ineettelaaya, anawaavaresesa cinene amucyaaya, ilema caya ni atthu o ncoko unkhalaaya. Ninhala waakavihera cani ayo atthwaayo?

¹³ Muupuwele nna ntakiheronna: Isiyani impankiya wakhalaka wiira nthato unookwanyuwaca ni umpheela utekiya nthato nkina? Imaara cinci, unaatekiya nthato wophiyaaru, nanlelo waviriyakoono wanthatoni wokhalayi. Wamalaka utekiya nthato wophiyaaru, nthato wokhalayuuyo unaamarulaciya. Inanna imoca, nihinaaya umwiirela ntthu wiira ahiye ukupali citthu “cokhalayi” caakupalyaawe, nihaana unkavihera wiira acuwele ni cincivele ikhweeli “cophiyaaru”—awula, citthu cineetthucihaaya Ibiiblya cahaacuwelaawe khalayi. Ntthu nonsomiheehu Ibiiblya anceraka uncivela ikhweeli combiiblyani, phinhalaawe ukhitiri uhiya ukupali citthu caakupalyaawe khalayi. Masi pooti uvira ukati mwinci wiira arukunuse moopuwelelwaawe.—Aroo. 12:2.

14-15. Ninhala unkavihera cani ntthu ucuwela niweherero noorwaa ukhala upeephoni watuninyani? Ntakihere.

¹⁴ Khaninlamuliya uweherera wiira nihuku noopacera ninwuupaneehu mwaha atthu, anaahala wiiweeha ni utthuna ikhweeli combiiblyani. Nihaana waavilela ni waawacera ayo atthwaayo, naakaviheraka vakaani-vakaani wuupuwela citthu cineetthucihaaya Ibiiblya. Wootakihera, muupuwele mananna ninhaleehu unkavihera ntthu ucuwela niweherero noorwaa ukhala upeephoni watuninyani. Atthu enci khancuwela, awula khancuweleeha ratta uyo mwahooyo. Ayo pooti anoopuwela wiira ntthu akhwaaka, khiivo-tho inwehereraawe, awula anoopuwela wiira atthu omaana otheene anrwaa wiirimu. Ninhala waakavihera cani?

¹⁵ Muulupaleehu mmoca hohimya itthu impankesaawe ukati wonhimyera ntthu niweherero noopeephoni. Woopacera, uyo naasoma Uphattuwaca 1:28. Vano, nankoha ntthu nomuulumanaawe: “Woonela winyu, Nluku aapheela wiira apinaatamu akhaleke nipuroni ni aapheela wiira akhaleke manannani?” Atthu enci anaakhula wiira Nluku aapheela wiira atthu akhale watuninyani ni aapheela wiira akhalaneke ukumi womaana. Vano muulupaleehu naasoma ilivuru ya Isaiya 55:11 ni nankoha ntthuuyo wakhala wiira Nluku horukunusa itthu yaapheelaawe. Imaara cinci, ntthuuyo naakhula wiira mena. Woomalihera, muulupaleehu naasoma Isaalimu 37:10, 11 ni nankoha ntthuuyo wiira wahoolo atthu anhala ukhala cani. Avarelaka nteko nnyo iveerusunnyo, muulupaleehu haacuweliha atthu enci wiira Nluku nanlelo naapheela wiira atthu omaana akhalane ukumi woohimala upeephoni watuninyani.

16-17. Toko cineeraaya ilivuru ya Miruku 3:27, manannani ninlamuliyeehu uthoonyera wiira ninawaawacera atthu? Nhimye ntakihero.

¹⁶ Yoneecese: mpanke itthu inthoonyera wiira nnawaawacera atthu. Wootakihera,  isiyani ninlamuliyeehu upanka naphiyaka wapuwani wa ntthu namoonaka wiira kharina ukati? Nihaana unlepela nsammaha ni umwiirela wiira ninaahala umootola ukati nkina. Ni pooti ukhalaka wiira ntthuuyo ri ni nteko mwankani ni mpheela ukaviheriya, awula khankhitiri ukhuma wapuwani ni nontotha ntthu oohala unkavihera. Ninlamuliya upanka isiyani? Wakhalaka commo, pooti umananiha unkavihera ntthuuyo.—Nsome Miruku 3:27.

¹⁷ Hataa citthu cinooneehu ukhala cankani, pooti unikavihera. Wootakihera, nrokorihu ahocuwela wiira mwaana mmoca hokhwa. Ukhala wiira ahowoonela uthunku amucyaawe mwaanoole, ahantikha nwarakhani iveerusu combiiblyani caahala waamaliha. Amucyaawe mwaanoole yoonenle cani? Anumwaane mwaana yaheera: “Ncana kaari ooripiya nrima cinene. Iwarakha inantikhenlyaa ihonimaaliha cinene. Akirina yowuuluma wiira kuusukhuru ni koonihere mananna cinimaalihalyaa. Kinoona toko ncana kihosoma iwarakha ikivahalyaa imaara 20. Nihokhala ootikhinihiya ni moolumwaa omaana ni oolipiha makhuva. Ninaasukhuru cinene ni nrimeehu wotheene.” Unawoonannya wiira noopuwelaka mananna cinaarikelaaya makhalelo ale anhuva ni namananihaka waakavihera, ntekweehu unaaneettela ratta.

18. Toko cineeraaya 1 Akorintu 3:6, 7, ninlamuliya uwehera cani ntekweehu woolalyeera?

¹⁸ Unaareera uwehera ratta ntekweehu woolalyeera. Ninaacuwela wiira ninawaakavihera atthu wiitthuca myaha ca Nluku, masi khahi thi hiiva nimpanka nteko muulupale. (Nsome 1 Akorintu 3:6, 7.) Yehova phinwiihana atthu. (Joau 6:44) Nrimaawe ntthu phinhala umwiiriha utthuna awula ukhotta ihapari comaana. (Mat. 13:4-8) Muupuwele wiira atthu enci yahokhotta ihapari Yesu caalalyaawe—ni Yesu phaavirihenle usomiha ratta! Phimaana, nhikhale ni masukhuli wakhala wiira atthu enci ampheeleenyu waakavihera anaakhotta ihapari comaana.

19. Waawacera atthu wuulalyaani urina ifayitani?

¹⁹ Waawacera atthu wuulalyaani uhaana ifayita cinene. Naawaceraka atthu, nteko woolalyeera khunnyoonya. Ninaahala utteeliya cinene kontha uvaha unaatteeliha nrima cinene uvirikana ni uvahiya. Ni ninaahala waakavihera ale ‘otheene anoonihera uratteene uphavela ukumi woohimala’ wiira atthune ihapari comaana. (Mite. 13:48) Phimaana, “nakhalana ukati, naapankele citthu comaana atthu otheene.” (Akalas. 6:10) Napanka commo, ninaahala utteeliya nrima nlattu woocuwela wiira nihaattitthimiha aPaapeehu o wiirimu, Yehova.—Mat. 5:16.