Mayamunna akiina anaavarela nteko aplikatiivu ooveleelihera imensagem wiira awuulumane amucyaaya awula mayamunna akhwaawe. Masi nkristau ookhomaala haana oopuwelaka ila ikanweela: “Ntthu ankhili oonaka itthu yowoopiha nawiipitha, masi atthu oohankhili anaarwaa uhoolo ni anaattharuwa.”—Miru. 27:12.

Ninaacuwela wiira Yehova nopheela unikhikicera. Phimaana, khaninaapatthanana atthu owaacivela waakawaniha akhwaaya, atthu akumihiye wanlokoni awula atthu anhimya citthu cinvirikana ni citthu cineetthucihaaya Ibiiblya. (Aroo. 16:17; 1 Akor. 5:11; 2 Jo. 10, 11) Ciicammo, atthu akiina anrwaa umikutthaanoni cihu, pooti ukhalaka wiira khaneettela malamulo a Yehova. (2 Tim. 2:20, 21) Ni unaarika waathanla apatthani omaana nawuulumanaka paahi naavarelaka nteko aplikatiivu ooveleeliheraniya imensagem.

Khaninlamuliya wiitthaala, venci-venci wakhalaka wiira ikhurupu inveleeliheraniya imensagem, inkhanle yaatthu enci. Ahaavo mayamunneehu yaakenle nnyo ikhurupunnyo, masi wahoolo yahottharuwa. Ikhurupu inveleeliheraniya imensagem yatepaka ukhala yaatthu enci, unaarika waacuwela saana atthu otheene ari nhina iyo ikhurupwiiyo ni ucuwela mananna ciryaaya upatthannyaaya ni Yehova. Niireke ntthu ri ikhurupu toko nnyo nawiikhikicera? Isaalimu 26:4 ineera: “Akinaakhalakhalana alopwana owootha ni kinawaahuluwa ale anttiyelelaca meettelwaaya.” Ila iveeruswiila inthoonyera wiira yaahala ukhala itthu yooreera cinene waaveleelihera imensagem paahi atthu anaacuweleehu.

Hataa ukhalaka wiira ikhurupu inveleeliheraniya imensagem ikhanle yaatthu vakaani, nkristau haana iikohaka: Myahani cinoolumiya nhina ila ikhurupwiila? Kinaarihakaca ukati mwinci kisomaka awula kiveleelihaka imensagem? Nhina nnyo ikhurupunnyo pooti wuulumiya myaha cinci, masi khannolamuliya wiicoona ukhanyererihiya ukela awula waakhula khula mwaha unhala wuulumiya. Paulu ahonhimerya Timotiyu wiira aahuluwe atthu ‘owaapa ni owiikelakeliha myaha caakhwaaya.’ (1 Tim. 5:13) Mahukwaala, ayo atthwaayo ciicammo pooti waaphwanya mwinternetini.

Khaavo nkristau ookhomaala aahala umuuluma pusya munna nkhwaawe awula wuuluma myaha cawe cosiiri, ni khaahala uwacera myaha toko nnyo. (Isaa. 15:3; Miru. 20:19) Uyo ciicammo khaahala woopela mwaha ihantisi cootepihereriya awula coohikhweeli. (Efesu 4:25) Khweeliini, isayitiihu jw.org ni iporokaraama co khula mweeri co JW Broadcasting^® cinoocarana myaha co mbiiblyani ni ihapari co naanaano.

Mayamunna akhwaawe anaavarela nteko aplikatiivu omensagem wiira aaweecihere mayamunna nteko awula nakoswaaya. Nnyo cikhanle citthu conakoso ni khacinvaranaca nunswalela wihu Yehova. Nkristau nopheela ukhala ‘woohinciva nsurukhu’ khanhala upheela waaphwanyera iluukuru mayamunnaawe.—Mabere. 13:5.

Niireke wanhala ureera waavarela nteko aplikatiivu omensagem wiira nilepele nsurukhu wiira naakavihere mayamunna oothwennya awula yaakhumelenle ihasara? Hi ninawaafenta mayamunneehu ni ninaapheela waakavihera ukati umpheelaaya ukaviheriya. (Tiya. 2:15, 16) Masi umananiha upanka iyo nivarelaka nteko aplikatiivu omensagem pooti urikarikiha nteko unvariya u Peteli awula wanlokoni wiira akaviheriye ale ampheela. (1 Tim. 5:3, 4, 9, 10, 16) Ni khweeli, khanimpheela ukhala toko wiira nihoorumiya waakavihera ayo mayamunnaayo.

Hiiva nimpheela upanka citthu cinonttitthimiha Yehova. (1 Akor. 10:31) Phimaana, nihinaaya ulakela waavarela nteko aplikatiivu omensagem awula ikaruma ikhwaawe, nihaana nipacaka wuupuwela ratta.