MAYAMUNNEEHU ni asirokorihu enci yaathamenle ilapo cikhwaawe coopuhiya, aholakela uturuwela ilapwaaya. Nlattu wonfenta Yehova ni wo waafenta akhunanaya, ayo ahothamela mapuro ahirivo anamalalyeera enci. (Mat. 22:37-39) Citthuni cilevalyaaya wiira apanke iyo, ni iparakhani caakhenlyaaya? Wiira nicuwele, nttwee noone itthu yaakhumelenle mayamunneehu o Camarões, mphantte unkela ncuwa wo África.

Mwaakha wo 1998, munneehu mmoca neehaniya Onésime ahothama ilapwaawe, Camarões, ni cahovira myaakha 14 akhalaka ilapo ikhwaawe. Nari ilapo yaathamenlyaawe, nihuku nimoca aheewa wankutthaanoni ntakihero noopela mwaha nteko woolalyeera. Munna aataphulela mwaha wankutthaanoni aheera: “Nwuupuwele alopwana eeli oopatthanaca ammenca ihopa mapuro oovirikana. Nlopwana mmocooyo naavara ihopa cinci, masi nkiinooyo khanvara. Ule hinvara ihopa cinci nohala upankani? Khawaahala ureera uyo urwaa umenca nipuro niri mpatthannyaawe wiira ciicammo avare ihopa cinci?”

Nno ntakiheronno nahomwiiriha Onésime wuupuwela uturuwela u Camorões, kontha iyo ilapweeyo ahaavo atthu enci ampheela wiitthucihiya Ibiiblya. Masi uyo ahokhala ni masukhuli. Ukhala wiira cahovira myaakha cinci akhalaka ilapo ikhwaawe, uyo aaneekoha wakhala wiira anhala ukhitiri wiilemaleliha tootho makhalelo olapo yaakhumaawe. Wiira acuwele wakhala wiira anhala ukhitiri, Onésime ahotteherera uviriha myeeri 6 akhalaka u Camarões. Mwaakha wo 2012, uyo aholakela uthamela nwo.

Onésime naattonka: “Kahaana kituruwelaka wiilemaleliha uviheriya nttukuttha ni makhalelo makiina onlaponi waka. Ni kahaana kituruwelaka wonkomela ipanku coottotta Usalau yo Umwene.” Ni athyaathyaaka, uyo aheera: “Masi keekurumicaka uviriyana nkutthaano woohuupuwela citthu cikiina, kaanaakhitiri uliyala ikhatera coocivaciva caahiilyaaka uttuli.”

Mwaakha wo 2013, Onésime hothelanaca ni Géraldine. Uyo ciicammo ahooturuwela u Camarões uvira waya myaakha 9 akhalaka u França. Ayo ahohoolelihera miteko co Umwene muukumini waya. Iparakhani caakhenlyaaya? Onésime naattonka: “Nihaakhela iparakha yoosoma Icikola ya Anamalalyeera Umwene ni uvara nteko u Peteli. Mweecana, atthu 20 yaasomihiya Ibiiblya wanlokoni wihu ahopattisiya. Nna va kinaakhitiri woona wiira kiri nipuro nooreera uvara nteko ‘woomenca.’” (Mark. 1:17, 18) Géraldine ciicammo heera: “Mi kihaakhela iparakha cinci cahoopuwelaaka wiira kanhala waakhela.”

Judith ahothamela u Estados Unidos, masi aapheela uvara cinene nteko wa Yehova. Uyo naattonka: “Khula ukati waarwaaka uwootola amucyaaka u Camarões, mi kaaturuwaka kunlaka. Wankiwerya  waahiya atthu yancenryaaka waasomiha Ibiiblya.” Masi Judith ancuwela wiira wanihukuni anhala uturuwela u Camarões. U Estados Unidos, uyo ampokherya nsurukhu mwinci wankavihera waathumela mirette athumwaane yaawerennya u Camarões. Judith ahonkhuluvela Yehova ni aholakela uturuwela u Camarões. Uyo naattonka wiira yaanannukhela cinene makhalelo oopuhiya o Estados Unidos. Masi ahonlompa Yehova wiira ankavihere wiilemaleliha makhalelo makiina ni aholipihiya ni mootoli osirikwiitu naamwaarawe.

Judith naattonka: “Nhina myaakha miraru, mi wahokitteela nrima nlattu wo waakavihera atthu acese ukhala atthari a Kristu.” Judith ahancera uvara nteko weepiyoneeru owiivaherera, ni ilelo, uyo naawannyawe aneehaniya Sam-Castel, anvara nteko wo wootola maloko. Vano isiyani yaakhumelenle athumwaane Judith? Isipiritaali yolapo ikhwaawe yahaalivela athumwaane Judith wiira yooperariye, ni ayo ahooperariya sana-saana.

Munneehu mmoca neehaniya Victor ahothamela u Canadá. Usoma wawe mphantte worevista Ukhalenla woopenle mwaha usoma wuuniversidade, uyo ahancera wuupuwelaca ikuurusu yaasomaawe wuuniversidade. Uyo aholakela uhiya usoma wuuniversidade ni ahancera usoma icikola ikhwaawe yankavihenre wiitthuca nteko wo mmatatani. Victor neera: “Upanka commo, uhokikavihera waakuva uphwanya nteko ni uhokikavihera wancera uvara nteko waapheelaaka cinene uvara—nteko weepiyoneeru.” Wahoolo, Victor hothelanaca ni Caroline, ni ooyeeli yahorwaa weettakaca u Camarões. Ukati waathotolaaya iPeteli, ayo yahokurumiciya uthamela u Camarões wiira akavihere miteko ca Yehova. Victor naattonka: “Hi khanaarina isariya yookhotta. Ukhala wiira naahoolelihera uvara miteko ca Yehova muukumini wihu, hi nahotthuna.” Waanookhalaru wiira Caroline anweryaaciya, ooyeeli yahaamini uthamela u Camarões.

Ukhala wiira yahaavo atthu enci yaapheela wiitthucihiya Ibiiblya, Victor ni Caroline yaholakela wancera uvara nteko weepiyoneeru owiicaaverya. Wiipaceroni, ayo yahokhitiri wiilihera yavarelaka nteko nsurukhu waasunkalyaaya. Masi wiira ahihiyerere uvara nteko weepiyoneeru u Camarões, ayo yahorwaa ukhala myeeri vakaani u Canadá yavaraka nteko wiira aphwanye ipooso. Iparakhani caakhenlyaaya? Ayo ahosoma Icikola ya Anamalalyeera Umwene, ahovara nteko weepiyoneeru owiivaherera ni ilelo ankavihera nteko wootekateka mapuro anvariya miteko ca Yehova. Victor neera: “Uthama nipuro naalemalenleehu ukhala uhonikaviheera umoona Yehova anikaviheraka.”

Alain aasoma wuuniversidade u Alemanha ni mwaakha wo 2002, ahosoma ifolyetu Jovens—Como Usarão Sua Vida? Iyo yahonkavihera ulakela citthu coohala uvara wahoolo wiira akavihere miteko ca Yehova. Mwaakha wo 2006, uyo ahosoma icokola ineehaniya Escola de Treinamento Ministerial ni ahoveleelihiya u Camarões, ilapo yaakhumaawe.

Uphiya wawe u Camarões, Alain ahokhitiri uphwanya nteko. Wahoolo, uyo ahophwanya nteko nkiina waapokheraawe nsurukhu mwinci. Masi uyo ahoona wiira uyo ntekooyo khawaahala unkavihera ukhalana ukati wiira avare nteko woolalyeera ni wo wiitthuciha. Phimaana, ukati Alain waalattuliyaawe uvara nteko weepiyoneeru owiivaherera, uyo khoopuwenle imaara piili—ahotthuna wowaakuvya. Apatarawaawe yahomwiirela wiira yanhala umuncerera nsurukhu waapokheraawe, masi hataa ukhalaka commo, uyo ahohiya uyo ntekooyo. Wahoolo, Alain ahothelanaca ni Stéphanie, aavirihale myaakha cinci akhalaka u França. Marikarikoni Stéphanie yaakhalannyaawe uthamela wawe u França?

 Stéphanie neera: “Kahoweryaaciya, masi nna va kihovona ni kinawiicoona ratta.” Yehova haacaaliha ayo anamathelanaayo nlattu woovilela waya. Alain neera: “Ukati waalalyeereehu nipuro noottayi nineehaniya Katé, nahaaphwanya atthu enci yancenreehu waasomiha Ibiiblya. Wahoolo, hi nahokela waasomiha ni telefooni. Atthu eeli yaasomiheehu Ibiiblya ahopattisiya, ni ihaavo ikhurupu yaanamalalyeera ule ncokoole.” Stéphanie ciicammo heera: “Khiivo itthu ikhwaawe yoonitteeliha nrima cinene uvikana waakavihera akhwiihu uvaherera ukumyaaya wa Yehova. Ukati ukhanleehu nivaraka nteko uno, ikwaha cinci uhonitteela nrima nlattu wo waakavihera atthu uvaherera ukumyaaya wa Yehova.” Ilelo, Alain ni Stéphanie anvara nteko wo wootola maloko.

Gisèle pattisiye u Itália ukati waasomaawe wiira akhale meetika. Uyo aasomihiye Ibiiblya naanamathelana mapiyoneeru ni ankhala ootikhinihiya oonaka makhalelo ayo yaarinaaya. Woona mananna ayo caahooleliheraaya miteko co Umwene wahomwiiriha Gisèle upheela waatakiha. Phimaana uyo ahokhala piyoneera owiicaaverya amalihakoono ikuurusu yaapankaawe.

Gisèle aapheela uturuwela u Camarões wiira avare cinene nteko wa Yehova. Masi cihaavo citthu cankhaliha ni masukhuli. Uyo naattonka: “Mi kahaana kihiyaka ukhala u Itália ni kahaana kikhalaka uttayi naasipatthannyaaka ni naamucyaaka.” Waanookhalaru commo, Gisèle ahoturuwela u Camarões mweeri wo Maio wo 2016. Wahoolo, Gisèle ahothelanaca ni Léonce. Ipeteli yo Camarões yahaalepela uthamela isittatti yahaarivo anamalalyeera enci ineehaniya Ayos.

Makhalelo o Ayos yaari cani? Gisèle naahimya itthu inoopuwelaawe: “Canviraka isumana cinci woohiluusu. Ni khanaakhalana mananna owaakarekari atelefooniihu. Ukati mwinci yaakhala anattiphyaale. Mi kiheetthuca waapyaaca wamatthuwani. Nahaana nirwaaka urika maaci uluusi, masi naaphwanyaka unacaraniye. Phimaana, naarwaaka uhiyu ni naacisaka ikariinyu commatatani caatthukelenleehu ilanterna.” Isiyani yaakavihenre uvilela ayo marikarikwaayo? Gisèle naahimya: “Nnepa wowaarya wa Yehova uhonilipiha wiira nikhitiri uvilela. Mi ni Léonce khaninhiya ukaviherana. Amuciihu ni asipatthaniihu phaanilipiha ni mpaka uhaavo ukati waanivahaaya nsurukhu wiira anikavihere.”

Niireke Gisèle unantteela nrima nlattu wooturuwela ilapwaawe? Uyo mwaneene nawaakhula, eeraka: “Iyee! Unaakitteela nrima cinene! Wiipaceroni, nahaana marikariko ni nahokhala ni masukhuli. Masi ninankhuluvela Yehova ni nihotepa umpatthanana. Waakhitinriihu uvilela ayo marikarikwaayo, nihoona wiira itthu ipankileehu phi itthu yaalamuliyeehu upanka.” Léonce ni Gisèle ahosoma Icikola ya Anamalalyeera Umwene ni ilelo ayo akhanle mapiyoneeru owiivaherera.

Namamenca ihopa naalipa nrima ni naavilela marikariko wiira avare ihopa cinci. Inanna imoca, ale anturuwela ilapwaaya anaaleva citthu cikhwaawe wiira ‘yaamence’ atthu enci ampheela wiitthuca myaha co Umwene. Yehova khweeliini khanhala uliyala wiikurumica waya ayo anamalalyeeraayo ni mananna cinfentaaya ncina nawe. (Nem. 5:19; Mabere. 6:10) Wakhala wiira nyuuva nnokhala ilapo ikiina, ni ilapo inkhumeenyu anaapheeliya anamalalyeera, nnoonela cani uturuwela ilapweenyu wiira nrwee mwakavihere? Mwapankaka iyo, Yehova naahala wuuvahani iparakha cinci!—Miru. 10:22.