MWAHA WOOSOMIYA 44
Nifento nookhuluvelya na Yehova ninoophwanyihani ifayitani?
“Munsukhuru Yehova . . . Nifento nawe nookhuluvelya khaninhala umala.”—ISAA. 136:1.
NCIPO 108 O Amor Leal de Jeová
NINHALA WIITTHUCANI? *
1. Isiyani Yehova innikurumicaawe upanka?
YEHOVA ninancivela nifento nookhuluvelya. (Ose. 6:6) Ni nawaakurumica aswalyaawe wiira naayo naacivele nifento nookhuluvelya. Yehova ahonruma porofeeta Mikeya wiira co: “Uvaresese nifento nookhuluvelya.” (Mik. 6:8, niwehero noneeraru) Masi wiira ninicivele nno nifentonno, nihaana nicuwelaka nifento nookhuluvelya isiyani.
2. Nuulumo “nifento nookhuluvelya” ninhimya isiyani?
2 Nifento nookhuluvelya isiyani? NhinaTradução do Novo Mundo da Bíblia Sagrada nuulumo “nifento nookhuluvelya” ninaaromoliya imaara 230. Toko cinttonkaciyaaya nhina “Glossário de Termos Bíblicos” yo mbiiblyani Tradução do Novo Mundo, nuulumo nifento nookhuluvelya ninaaciya “nifento ninthoonyera ulakela uhimmwalanana ntthu, unvaresesa uyo ntthuuyo ni ukhuluvelya. Nuulumo nifento nookhuluvelya, ikwaha cinci ninaaciya nifento Nluku nirinaawe naapinaatamu, masi ciicammo ninaaciya nifento nirinaawe ntthu ni ntthu nkiina.” Ukhala wiira Yehova phinthoonyera sana-saana nifento nookhuluvelya, nhina ula mwahoola ninaahala woona mananna uyo cinaathoonyiheraawe apinaatamu nno nifentonno. Ni nhina mwaha nkiina unttharanaca nuula ninaahala woona manannani hiiva ninlamuliyeehu untakiha Yehova woowoonihera akhunanihu nno hinnifentonno.
YEHOVA KHANLE NLUKU “OOMWINCIVA NIFENTO NOOKHULUVELYA”
3. Isiyani Yehova yanhimenryaawe Moceesi?
3 Uvira waya ukati vakaani asarayeli anakhumile Wiciipitu, Yehova ahonhimyeera Moceesi citthu cooluma ncina Nawe ni makhalelwaawe. Nluku enre co: “Yehova, Yehova, Nluku okiriri ni nathunku, oovilela ni oomwinciva nifento nookhuluvelya ni ikhweeli, nwoonihera nifento nookhuluvelya atthu imiliyawu cene, aalevelelaka makoosi, uvonyaniha waya, ni matampyaaya. Masi khanhala unhiya woohinhukhumu ule tthekale, kontha naahala waawiihera nttaruso ayari, asaana, ni ucuulu.” (Nkw. 34:6, 7) Naala moolumo ootepa ureeraayo, Yehova ahonhimyeera Moceesi itthu imoca intepa wiithoonya nnifentoni nawe nookhuluvelya. Itthuni?
4-5. a) Yehova oolumile cani ikhalelo irinaawe yo nifento nookhuluvelya? b) Makohoni anhaleehu waakhula nhina ula mwahoola?
4 Yehova kheerale paahi wiira haana nifento nookhuluvelya, masi uyo eerale wiira uyova Nluku “oomwinciva nifento nookhuluvelya.” Ila itthu yootepa woonannyeela, inaahimiya-tho mbiiblyani ikwaha 6. (Man. 14:18; Nem. 9:17; Isaa. 86:15; 103:8; Jow. 2:13; Jonas 4:2) Ikwaha cotheene ninoolumiyaaya mbiiblyani nuulumo nineera “oomwinciva nifento nookhuluvelya,” khiivo ikwaha inaaciyaawe pinaatamu, masi naaciya Yehova paahi. Maweherweenyu, khutepale ureera umwiiwa Yehova ahimyaka iyo ikhalelo irinaaweeyo? Unawoonannya wiira Yehova nawoona nifento nookhuluvelya ukhalana ifayita cinene. * Phimaana mwene Davidi ahaana isariya yo wantikha co: “Pwiiya Yehova, nifento nookhuluvelya nirineenyu ninci mpaka ninaaphiya wiirimu . . . Cinreeraaya nifento ninyu nookhuluvela, Apwiiya Nluku! Asaana aapinaatamu anaatotha ukhikiceriya vathi mapupheenyu.” (Isaa. 36:5, 7) Mwene Davidi aanansukhuru Nluku cinene nlattu wo nifento nawe nookhuluvelya. Niireeke hiiva ciicammo ninansukhuru?
5 Wiira nicuweleehe nifento nookhuluvelya isiyani, nttwee naakhule makoho meeli: Phaapani Yehova naathoonyiheraawe nifento nookhuluvelya? Ni manannani nifento nookhuluvelya na Yehova cinniphwanyihaaya ifayita?
PHAAPANI YEHOVA NAATHOONYIHERAAWE NIFENTO NOOKHULUVELYA?
6. Phaapani Yehova anaathoonyiheraawe nifento nookhuluvelya?
6 Phaapani Yehova naathoonyiheraawe nifento nookhuluvelya? Yehova khanonthoonyera nifento nookhuluvelya khula ntthu nomoonaawe. Uyo naathoonyihera nifento nookhuluvelya paahi ale arina upatthani woolipa nuuyova. Nlukwiihu nawaavaresesa cinene apatthannyaawe. Uyo nopheela umpankela citthu comaana khula ntthu nompatthananaawe ni khanhala uhiya unfenta.
Yehova nawaavaha citthu comaana apinaatamu otheene hataa ni ale ahinonswalela (Nwehe iparaagarafu 7) *
7. Yehova aathoonyihenre cani nifento atthu otheene?
7 Yehova haathoonyihera nifento apinaatamu otheene. Yesu ahomwiirela nlopwana mmoca eehaniya Nicodemos: “Nluku haafenta cinene apinaatamu, phimaana haavaha Mwanawe mmoca, wiira ntthu nhala umwaamini hitankanyiye, masi aphwanye ukumi woohimala.”—Joau 3:1, 16; Mat. 5:44, 45.
Khampa cuulumalyaawe mwene Davidi ni porofeeta Daniele, Yehova naathoonyihera nifento nookhuluvelya ale anoncuwela, ammoova, anonfenta ni aneettela malamulwaawe (Nwehe iparaagarafu 8-9)
8-9. a) Kontha isiyani Yehova naathoonyiheraawe nifento nookhuluvelya atthu anonswalela? b) Isiyani impheeleehu woopela mwaha?
8 Masi, toko ciitthucileehu, nifento nookhuluvelya Yehova naathoonyihera paahi ale arina upatthani nuuyova—atthu anonswalela. Iyo itthwiiyo inawoonannya nhina moolumo mwene Davidi ni porofeeta Daniele yantikhilyaaya. Mwene Davidi aheera: “Uhihiye waathoonyihera nifento nookhuluvelya ale anoocuwela.” “Yehova khanhala uhiya waathoonyihera nifento nookhuluvelya atthu ammoova.” Ni porofeeta Daniele aheera: “Yehova, Nluku eekhweeli, . . . naathoonyihera nifento nookhuluvelya ale anonfenta ni aneettela malamulwaawe.” (Isaa. 36:10; 103:17; Dan. 9:4) Toko cinthoonyeraaya nnya iveerusunnya, Yehova nawaathoonyihera nifento nookhuluvelya atthu anonswalela kontha ayo anancuwela, anaamoova, ananfenta ni anaweettela malamulwaawe. Nifento nookhuluvelya ikhanle ikhalelo Yehova inaathoonyiheraawe paahi apoovwaawe awula aswalyaawe eekhweeli.
9 Nihinaaya ulakela uswalela Yehova, uyo annifenta khampa cinaafentaawe apinaatamu otheene. (Isaa. 104:14) Masi ukhala wihu aswalyaawe, Yehova hancera unithoonyihera ninfento nookhuluvelya. Yehova nawaakhuluveliha ale anonswalela co: “Mi akinhala uhiya wuuthoonyihera nifento naka nookhuluvelya.” (Isai. 54:10) Ni mwene Davidi ahooneeha mwaaneennyaawe wiira iyo itthwiiyo ikhanle ikhweeli. Uyo aheera co: “Ncuwele wiira Yehova naahala unwacera saana ule nonvaresesa.” (Isaa. 4:3) Ukhala wiira Yehova naaniwacera saana, isiyani inlamuliyeehu wiikurumica upanka? Nasaalimu ahantikha co: “Ntthu ankhili naahala weesa wanrimani nnya citthunna ni naahala wuupuwela cinene citthu Yehova cimpankaawe ninifento nookhuluvelya nirinaawe.” (Isaa. 107:43) Wiira niiweehe itthu inhimyaaya iyo iveeruswiiyo, nttwee noopele mwaha mananna mararu aswali eekhweeli cimphwanyeraaya ifayita nifento nookhuluvelya na Yehova.
NIFENTO NOOKHULUVELYA NA YEHOVA NINNIPHWANYIHA CANI IFAYITA?
Yehova naatepa waavaha citthu cooreera ale anonswalela (Nwehe iparaagarafu 10-16) *
10. Ucuwela wiira nifento nookhuluvelya na Nluku khanimmala unniphwanyiha ifayitani? (Nwehe Isaalimu 31:7)
10 Nifento nookhuluvelya na Nluku khanimmala. Iyo phi itthu yuulupale inoolumiya ikwaha 26 nhina Isaalimu 136. Iveerusu yoopacera yo iyo isaalimwiiyo ineera: “Munsukhuru Yehova, kontha uyo namaana; Nifento nawe nookhuluvelya khaninhala umala.” (Isaa. 136:1) Iveerusu 2 mpaka 26 cihaana moolumo aneera: “Kontha nifento nawe nookhuluvelya khaninhala umala.” Ni nasomaka iveerusu cikiina co iyo isaalimwiihu, ninaakhitiri woona mananna menci Yehova cinthoonyeraawe nifento nookhuluvelya—ni unaareera ucuwela wiira uyo khanhala uhiya uthoonyera nno nifentonno. Moolumo “Kontha nifento nawe nookhuluvelya khaninhala umala” anaanikhuluveliha wiira Nluku khanhala uhiya waathoonyihera apoovwaawe nifento nawe nookhuluvelya. Unaanitteela nrima ucuwela wihu wiira Yehova khanwoocya atthu anonswalela, masi nawaavaresesa ale ampheela unswalela ni naakhala wamoca naayo, venci-venci ukati unkhalaaya nimasankiho. Ifayitani imphwanyeehu: Ucuwela wiira Yehova naanivaresesa unaanitteeliha nrima ni univaha ikuru coonikavihera uvilela masakheehu ni uhihiya weettela ikhweeli..—Nsome Isaalimu 31:7. *
11. Toko cinhimyaaya Isaalimu 86:5, isiyani immwiiriha Yehova unilevelela matampiihu?
11 Nifento nookhuluvelya Nluku nirinaawe ninaamwiiriha ulevelela matampiihu. Yehova nawoona wakhalaka wiira ntthu vanre itampi hottharuwa khweeliini ni hohiya uvara itampi. Yeerannyaaka iyo itthwiiyo, nifento nawe nookhuluvelya ninaamwiiriha unlevelela uyo ntthuuyo. Amwaacaka Yehova, mwene Davidi aheera: “Uyo khannipanka citthu coohiloka nlattu wo matampiihu; ni khannittarusa hataa ukhalaka wiira unaaniphwanela uttarusiya nlattu woottheka wihu.” (Isaa. 103:8-11) Davidi mwaaneennyaawe ahooneeha mananna cinweryaaya nrima nlattu woovara matampi. Mas Davidi ciicammo ancuwela wiira Yehova ‘khula ukati naatthuna ulevelela.’ Isiyani immwiiriha Yehova unilevelela itampi cihu? Isaalimu 86:5 * inawaakhula. (Nsome) Toko Davidi cinryaawe, Yehova nonilevelela itampi cihu kontha nawaathoonyihera cinene nifento nookhuluvelya atthu otheene anlepela uleveleliya nuuyo.
12-13. Isiyani inhala unikavihera nakhalaka ooriipiya nrima nlattu wo matapi avanreehu khalayi ni attharuwileehu?
12 Navaraka itampi unaareera ni khweeliini inkhala itthu yomaana nrimeehu waniriipaka nlattu wo matampi avanreehu. Ayo makhalelwaayo pooti unikavihera uttharuwa ni wiikurumica urehererya ile ivonyanihaleehu. Hataa ukhalaka commo, aswali enci a Nluku khunaahiya waariipa nrima cinene nlattu wo matampi avanryaaya khalayi ni aattharuwilyaaya. Ayo anoopuwela wiira Yehova khanhala waalevelela-tho hataa yattharuwaka manannani. Nhotoka wiicoona iyo inanneeyo? Wakhala wiira nhotoka wiicoona commo, muupuwele wiira Nluku naatthuna ukati wotheene waathoonyihera nifento nookhuluvelya aswalyaawe.
13 Ifayitani imphwanyeehu: Hataa nikhalanaka ipahuwa, hiiva pooti ukhitiri unswalela Yehova unanitaphuwale nrima ni nitteeliyaka. Iyo itthwiiyo pooti uniirannyeela kontha “iphome ya Yesu, Mwaana a Nluku, inaanirapiha matampiihu otheene.” (1 Jo. 1:7) Mwakhalaka nnariipiye nrima nlattu wo itthu ivonyanihileenyu, nhihiye wuupuwela wiira Yehova khampheela paahi unlevelela ntthu vanre itampi, uyo naaweherera cinene upanka iyo. Moone mananna mwene Davidi cilattanihacilyaawe nifento nookhuluvelya ni ulevelela. Uyo hantikha co: “Kontha, khampa irimu iryaaya uculu itthaya, nifento nawe nookhuluvelya ninwooniherawe ale ammoova, nikhanle nuulupale. Toko cittalivannyaaya unkhuma ncuwa ni unkela ncuwa, ciicammo uyo hottikhela uttayi matampiihu.” (Isaa. 103:11, 12) Coo, unawoonannya wiira Yehova naapheela ‘unilevelela niiraati.’—Isai. 55:7.
14. Mwene Davidi ttonkacile cani mananna cinnikhikiceraaya nifento nookhuluvelya na Yehova?
14 Nifento nookhuluvelya na Nluku ninaanikhikicera mminepani. Mwene Davidi ahonhimyeera Yehova alompaka co: “Weeva ukhanle ntthawelelo naka; Unaahala ukikhikicera kasankaka. Kinaahala utthapa nlattu weeva wookoopola . . . Ule nonkhuluvela Yehova naakhala saana nlattu wo nifento Nawe nookhuluvelya.” (Isaa. 32:7, 10) Isittatti cokhalayi caakhalaka coorukureriya niimuuru caakhikicera apoovu onsittatti ukati wo waana ikhotto naawanannyaaya. Inanna imocaaru, nifento nookhuluvelya na Yehova ninkhala toko imuuru yuulupale innikhikicera wiira ihikhale hataa itthu inhala utankanya upatthaniihu ni Yehova. Uhiya commo, nifento nookhuluvelya nirinaawe Yehova ninaamwiiriha uyova uniihana mphanttyaawe.—Jer. 31:3.
15. Kontha isiyani nifento nookhuluvelya na Yehova ninaalattanihiya ni nikhuku nookhuluvelya?
15 Woothoonyera mananna Yehova cinaakhikiceraawe apoovwaawe, mwene Davidi aholikaniha ninfento nookhuluvelya na Yehova niitthu ikhwaawe. Uyo hantikha co: “Nluku nokhala khampa nipuro nookhikicera nintthawelaaka kasankaka.” Davidi ciicammo aheera: “Uyo phinkithoonyihera nifento nookhuluvelya, uyo phi nikhuku naka nookhuluvelya, phinkikhikicera ni phinkoopola, khanle nikhikicero naka ni ntthawelo naka.” (Isaa. 59:17; 144:2) Kontha isiyani Davidi ulattanihalyaawe nifento nookhuluvelya na Yehova ni nikhuku nookhuluvelya naatthawelaawe wiira akhikiceriye? Kontha hataa nikhalaka nipuroni va watuninyani va, Yehova hokhuluveliha wiira naahihiyeke unswalela, uyo naahala ukhikicera upatthani urineehu nuuyova. Nno nikhuluvelihonno ciicammo ninaaphwanyannya nhina Isaalimu 91. Iyo isaalimwiiyo ineera: “Kinaamwiirela Yehova: ‘Weeva mwiikitthwaaka ni nlipiho naka.’” (Isaa. 91:1-3, 9, 14) Moceesi ciicammo ahonlattaniha Yehova nimwiikittho awula nipuro nootthawela ule nothotha ukhikiceriya. (Isaa. 90:1, niwehero) Ni wahoolo, Moceesi hinaaya ukhwa aheera-tho co: “Ukhuma nenne nokhalayi Nluku khanle nipuro nintthawelaka wiira kaavye ukhikiceriya, myoono cawe cihimmalela ciri vathi waa.” (Deut. 33:27) Moolumo aneera “myoono cawe cihimmalela ciri vathi waa” anniitthuciha isiyani?
16. Iparakhani piili cirineehu? (Nwehe Isaalimu 136:23)
16 Nampankaka Yehova khampa ntthawelo nihu, uyo naanikhikicera. Hataa ukhalaka commo, ahaavo mahuku anhaleehu ukhala nimasukhuli menci ni wuupuwela wiira khaninhala ukhitiri wunwa-tho. Uyo ukatyuuyo, isiyani Yehova impankaawe wiira anikavihere? (Nsome Isaalimu 136:23. *) Yehova naweesa myoono cawe vathi wihu, ni naanikavihera wunwa aniwusaka vakaani-vakaani. (Isaa. 28:9; 94:18) Ifayitani imphwanyeehu: Ucuwela wiira Nluku naahala unikavihera unaanuupusera iparakha piili cirineehu. Yoopacera, hiiva pooti ukhuluvela wiira Yehova naahala unikhikicera hataa nikhalaka nipuroni. Yonayeeli, Apaapeehu o wiirimu anaaniwacera otheene cihu.
NIFENTO NOOKHULUVELYA NA YEHOVA NINAANIPHWANYIHA UKHULUVELA
17. Nifento nookhuluvelya na Nluku ninnikhuluveliha isiyani? (Nwehe Isaalimu 33:18-22)
17 Khampa coopenleehu mwaha, hiiva pooti ukhuluvela wiira hataa nikhalanaka masakhani Yehova naahala univara moono ni unikavihera uhinhiya unvaresesa. (2 Akor. 4:7-9) Porofeeta Jeremiya aheera co: “Nlattu wo nifento nookhuluvelya na Yehova hiiva khanitankanyiye, ukhala wiira mathoonyiherwaawe ikiriri khammala.” (Ucuk. 3:22) Hiiva pooti wankhuluveleehu wiira Yehova khanhala uhiya unithoonyihera nifento nawe nookhuluvelya, kontha nasaalimu naanikhuluveliha co: “Miitho a Yehova anawaakhalenla ale ammoova, anweherera nifento nawe nookhuluvelya”—Nsome Isaalimu 33:18-22. *
18-19. a) Isiyani ihinlamuliyeehu uliyala? b) Isiyani inhaleehu wiitthuca nhina mwaha nkiina unttharanana nuula?
18 Isiyani ihinlamuliyeehu uliyala? Nihinaaya ulakela unswalela Yehova, uyo aanaanifenta khampa cinaafentaawe apinaatamu otheene; masi ukhala wihu aswalyaawe, Yehova hancera unithoonyihera nifento nookhuluvelya. Nlattu wo nifento nawe, Yehova naanaakhelela ni matata meeli. Uyo khanhala unihiya veekha ni naahala wiirannyeeha inatiri cawe cotheene. Nopheela unoona nikhalaka saana! (Isaa. 46:1, 2, 7) Phimaana, hataa nikhalanaka masakhani, Yehova naahala univaha ikuru cimpheeleehu wiira nihinhiye unvaresesa.
19 Mpaka va, niheetthuca wiira Yehova nawaathoonyihera nifento nookhuluvelya aswalyaawe ni noweherera wiira nihiiva nithoonyiherane nifento nookhuluvelya. Ninhala upanka cani iyo itthwiiyo? Mwaha nkiina unhaleehu usoma unaahala wuuluma uyo mwaha wofayitooyo.
NCIPO 136 Jeová Vai Recompensar-te
^ par. 5 Nifento nookhuluvelya na Yehova isiyani? Tipani nhala uphwanyera ifayita? Ni manannani amphwanyeraaya ifayita ale anthoonyiheriya ni Yehova nifento nookhuluvelya? Maakhuleliyo ala makohwaala anhala uttonkaciya nhina ula mwahoola ni nhina mwaha nkiina unttharananaaya.
^ par. 4 Cihaavo iveerusu cikhwaawe cinooluma winciva wo nifento nookhuluvelya na Yehova.—Nwehe Nemiya 13:22; Isaalimu 69:13; 106:7; ni Ucukulaca 3:32.
^ par. 10 Isaalimu 31:7 Unaahala ukitteela nrima cinene nlattu wo nifento naa nookhuluvelya, kontha weeva unawoona masukhulyaaka; unaacuwela cinkiriipaaya nrima.
^ par. 11 Isaalimu 86:5 Kontha weeva, Yehova, ukhanle namaana ni khula ukati unaatthuna ulevelela; nikhanle nuulupale nifento nookhuluvelya ninwooniheraa atthu otheene anooswalela.
^ par. 16 Isaalimu 136:23 Uyo honuupuwela mmasakhani wihu, kontha nifento nawe nookhuluvelya khanimmala.
^ par. 17 Isaalimu 33:18 Moone! Miitho a Yehova anawaakhalenla ale ammoova, anweherera nifento nawe nookhuluvelya, 19 wiira ukhwa uhaahonone ni wiira oopole ukumyaaya uwakati wotala. 20 Hi ninonweherera Yehova. Uyo nokhala nikavihero ni nikhikicero nihu. 21 Nrimeehu unkhala unitteelaka nlattu wawawe, kontha ninaakhuluvela ncina nawe nowaarya. 22 Nifento naa nookhuluvelya nihinihiye, oo Yehova, ukati unkhaleehu nuuwehereraka.
^ par. 58 ILATARATO: Ahaavo mananna menci Yehova naathoonyiheraawe nifento apinaatamu otheene ni hataa aswalyaawe. Ilatarato coorukurerya ciri uculu waya atthu, cinoonihera mananna Yehova naathoonyiheraawe nifento atthu otheene ni hataa aswalyaawe. Ni inanna yuulupale Yehova thoonyihenryaawe nno nifentonno ukhanle unvaherera Mwanawe wiira anoopole.
^ par. 66 ILATARATO: Atthu akhanle aswali a Yehova ni anaamini woopoliya wihu ni Yesu anaawaceriya ni Nluku niinanna yoovirikana. Uhiya paahi waathoonyihera nifento khampa cinaafentaawe apinaatamu otheene, Yehova ciicammo nawaathoonyihera nifento nawe nookhuluvelya. Ilatarato coorukurerya ciri uculu waatthu, cinoonihera mananna Yehova naathoonyiheraawe nifento nookhuluvelya ale anonswalela.
