MWAHA WOOSOMIYA 46
Nyuuva nthelanne phiyaaru—Nhoolelihere muukumini winyu uvara nteko wa Yehova
“Yehova khanle ikurwaaka . . . Nrimaaka unonkhuluvela uyova.”—ISAA. 28:7.
NCIPO 131 ‘Ikumaanihalyaawe Nluku’
NINHALA WIITTHUCANI? *
1-2. a) Kontha isiyani ale athelanne phiyaaru ahaana yankhuluvelaka Yehova? (Nwehe Isaalimu 37:3, 4.) b) Isiyani inhaleehu wiitthuca nhina ula mwahoola?
NYUUVA nnopheela uthela awula utheliya mphiyaaruni? Awula khunavira ukati mwinci mwathelanneru? Nyuuva khweeliini nnopheela ulawa ukumi wamoca nintthu nonfenteenyu cinene. Masi uthelana pooti uwaana masankiho. Ale athelanne phiyaaru ahaana yalakelaka citthu cuulupale; ni mananna cinwaceraaya ayo marikarikwaayo pooti waatteeliha awula waariipiha nrima mpaka wattayi. Nlopwana ni nthiyana athelanne phiyaaru yankhuluvelaka Yehova, anaalakela citthu comaana, uthelanaca waya unaakhala woolipa ni unawaatteela nrima cinene. Masi yaahiwacereke moopuwelo a Nluku, ayo atthunaka anaahala ukhalana itafaawuti cinci ni khanhala utteeliya nrima.—Nsome Isaalimu 37:3, 4. *
2 Ula mwahoola yantikheliye ale athelanne phiyaaru, masi unaahala woopela mwaha marikariko anaananaaya anamathelana otheene. Unaahala wuuluma isiyani inniitthucihaaya alopwana ni athiyana ookhuluvelya okhalayi. Ihantisi caya ayo atthwaayo cinaahala uniitthuciha ikano cinlamuliyeehu weettela muukumini wihu ni muuthelanani wihu. Ciicammo ninaahala woona isiyani cinniitthucihaaya citthu caakhumelenle anamathelana o ala mahukwaala.
MARIKARIKONI ANKHALANAAYA ALE ATHELANNE PHIYAARU?
Citthuni caahala waahiiha anamathelana uvara cinene nteko wa Yehova? (Nwehe iparaagarafu 3-4)
3-4. Marikarikoni atthunaka anaananaaya ale athelanne phiyaaru?
3 Atthu enci anawaakurumica ale athelanne phiyaaru ukhala toko cinkhalaaya atthu enci ilelo. Wootakihera, asithumwanaya awula asimucyaaya akhwaawe pooti waakhanyereriha ale athelanne phiyaaru waayara asaana woohiweherera uvira ukati mwinci. Ni pooti ukhalaka wiira asipatthannyaaya awula asimucyaaya anawaakurumica uthuma inupa ni mihakhu cinci wiira apuhe.
4 Ale athelanne phiyaaru yeetthalaka, pooti vakaani-vakaani ukophakopha cinene misurukhu. Vano, nlopwana ni nthiyana athelanne phiyaaru pooti upheela wancera uvara nteko cinene wiira alive misurukhu cinlokihiyaaya. Nuuwakatyaaya, ayo pooti uhikhalana-tho ukati mwinci wiira asome Ibiiblya veekha, wiira apanke uswali waamuci ni wiira arwee wuulalyeerani. Ni mpaka pooti wancera ulova umikutthaanoni nlattu wooviriha ukati mwinci untekoni wiira aliviye nsurukhu mwinci awula wiira ahikumihiye nteko. Nlattu wo iyo, ayo anaahala uhaleela uvara miteko cuulupale cootteeliha nrima mumphwinkoni wa Yehova.
5. Itthu yaakhumelenle amunna Klaus naamwaaraya inniitthuciha isiyani?
5 Nahooleliheraka muukumini wihu utotha nsurukhu ni mihakhu, khunhala unitteela nrima. Moone itthu yiitthucalyaawe munna Klaus ni Marisa, amwaarawe. * Ukati waathelannyaaya phiyaaru, ooyeeli yaanaaviriha ukati mwinci mmamitekoni caya wiira aphwanye nsurukhu mwinci ni apuhe. Masi nuuwakatyaaya, ayo yahoona wiira khawaatteela nrima khweeliini. Munna Klaus neera: “Hi nahaana mihakhu cinci, masi khanaarina nanka mpika mmoca woominepani weehelenleehu. Makhalelweehu yahokhala oorikarikaca ni naakhala niiwasiwaasi cinene.” Nyuuva ciicammo atthunaka nhoona wiira uhoolelihera muukumini winyu utotha nsurukhu ni mihakhu khumphwanyiha utteeliha nrima weekhweeli. Wakhala wiira iyo phi itthu inwiirani, nhikhale nimasukhuli. Matakihero aatthu akhwaawe pooti wuukaviherani. Nihinaaya woona ayo matakiherwaayo, nttwee nipacere woona isiyani atheli ineetthuceraaya ntakihero na mwene Yehosafaa.
KHAMPA MWENE YEHOSAFAA, MUNKHULUVELE YEHOVA
6. Ukati mwene Yehosafaa wankhumelenlyaaya marikariko, eettenle cani ikano imphwanyannya nhina Miruku 3:5, 6?
6 Wakhala wiira nyuuva mwaalopwana oothela, nnaakhalaka nimasukhuli nlattu wo mirintti cuulupale cirineenyu watthokoni? Wakhala wiira iyee, mmuupuwele mwene Yehosafaa. Nlattu wookhala mwene, Yehosafaa ahovahiya nritti muulupale wo waawacera apoovu otheene. Yehosafaa aawacenre cani uyo nritti muulupalyooyo? Uyo ahopanka yotheene yaakhitinryaawe wiira aakhikicere apoovu. Uyo ahoteka isittatti comuuru u Yuuta ni ahaatthenkaca anatoropa oopwaha 1.160.000. (2 Ikor. 17:12-19) Wahoolo, mwene Yehosafaa yahonkhumelela itthu yoosankiha. Anatoropa enci maamonita, mamoabita ni alopwana o ncoko wo Seir yaholakela urwaa umwaanana ikhotto Yehosafaa nkhayi naamucyaawe ni apoovu otheene. (2 Ikor. 20:1, 2) Uyo ukatyuuyo, mwene Yehosafaa aapankile isiyani? Uyo ahototha ukaviheriya ni uvahiya ikuru ni Yehova. Itthu yaapankilyaawe khweeliini phi itthu inhimyaaya ikano imphwanyannya nhina Miruku 3:5, 6. * (Nsome.) Ulompa woothoonyera wiiyeviha wa mwene Yehosafaa wantikhiye nhina 2 Ikoronika 20:5-12, unaathoonyera inanna uyo mwennyooyo cankhuluvelaawe Yehova, Athumwaane o wiirimu. Yehova aakhunle cani ulompa wa Yehosafaa?
7. Yehova aakhunle cani ulompa wa Yehosafaa?
7 Yehova woomwaakhula mwene Yehosafaa, ahonruma nlevita eehaniya Jaaziel urwaa umwiirela Yehosafaa co: “Mwiitthenkace, mweemele paasi ni moone inanna Yehova cinhalaawe uwoopolani.” (2 Ikor. 20:13-17) Malakihero yaavahiyaawe mwene Yehosafaa ihinancera iyo ikhottweeyo, yaari malakihero yahaawehereraawe! Masi ayo khayaari malakihero a pinaatamu; yaari malakihero a Yehova Nluku. Mwene Yehosafaa ahonkhuluvela Nlukwaawe ni aheettela malakihero yaavahiyaawe. Ukati mwene Yehosafaa waarweelyaawe wamoca naapoovu uwaattakanana awanannyaawe, khaaweesile uhoolo anatoropa ookhomaala cinene yaarinaawe, masi aawesile uhoolo alopwana yeepa icipo ni yahaarina hataa ikaruma yokhotto. Yehova ahopanka khampa cankhuluvelihilyaawe Yehosafaa; ahaatthema ayo awanannyaayo.—2 Ikor. 20:18-23.
Ale athelanne phiyaaru anhoolelihera nteko wa Yehova muukumini waya yalompaka ni yasomaka Ibiiblya nkhayi (Nwehe iparaagarafu 8, 10)
8. Ntakihero na mwene Yehosafaa ninwiitthuciha isiyani atheli?
8 Atheli, ntakihero na mwene Yehosafaa ninaawiitthucihani citthu cinci. Thi nyuuva nrennye nrintti woowacera itthoko cinyu; phimaana, nyuuva nnawiikurumica waakhikicera ni waakavihera atthu o watthokoni winyu. Nlattu wo iyo itthwiiyo, yookhumelelakani masakha, nyuuva atthunaka pooti wuupuwela wiira nnaahala ukhitiri umaliha veekha ayo masakhaayo. Masi nhikhuluvele ikuru cinyu. Uhiya commo, munlompe Yehova ninrimeenyu wotheene mwakhalaka veekha cinyu ni naamwaarinyu. Ntothe malakihero a Yehova mbiiblyani ni mmalivuruni co mumphwinkoni wawe. Ciicammo, mweettele malakihero anhaleenyu uphwanya. Mwalakelaka itthu nttharaka malakihero o mbiiblyani, atthu akhwaawe pooti uhaacivela ni mpaka pooti uwiirelani nyuuva wiira nhovahuwa. Ayo atthwaayo pooti ciicammo uwiirelani wiira nsurukhu ni mihakhu phi citthu cinhala khweeliini waakhikicera amuciinyu. Masi mmuupuwele-tho Yehosafaa; uyo ahonkhuluvela Yehova ni ahopanka citthu caathoonyera khweeliini wiira aanankhuluvela. Yehova khanhiile Yehosafaa ni ciicammo khanhala wuuhiyani nyuuva. (Isaa. 37:28; Mabere. 13:5) Isiyani-tho anamathelana inlamuliyaaya upanka wiira akhalane utteeliya weekhweeli?
NHOOLELIHERE MUUKUMINI WINYU NTEKO WA YEHOVA, KHAMPA POROFEETA ISAIYA NAAMWAARAWE
9. Isiyani porofeeta Isaiya ni amwaarawe yaahooleliheraaya uvara?
9 Porofeeta Isaiya naamwaarawe yanhoolelihera nteko wa Yehova khampa itthu yuulupale cinene muukumini waya. Isaiya aavara nteko weeporofeeta ni amwaarawe atthunaka cihaavo miteko ca Nluku caavaraaya, ukhala wiira mbiiblyani ayo ciicammo aneehaniya “porofeeta.” (Isai. 8:1-4) Unawoonannya wiira porofeeta Isaiya wamoca ni amwaarawe yaahoolelihera uvara miteko ca Yehova. Ni anamathelana ilelo pooti wiitthucera cinene ntakihero naya!
10. Usoma inatiri co mbiiblyani unhala waakavihera cani anamathelana?
10 Anamathelana ilelo anontakiha porofeeta Isaiya naamwaarawe yeekurumicaka uvara cinene nteko wa Yehova. Ayo pooti usoma nkhayi inatiri co mbiiblyani ni woona mananna ciirannyaalyaaya wiira alipihace unkhuluvela waya Yehova. * (Titu 1:2) Unaareera ciicammo ooyeeli wuupuwelaca isiyani inlamuliyaaya upanka wiira akavihere wiirannya inatiri cikhwaawe co mbiiblyani. Wootakihera, ayo pooti ukavihera wiirannya inatiri ya Yesu inooluma ulalennya ihapari comaana ntuninyani motheene. (Mat. 24:14) Nlopwana ni nthiyana athelanne yasomaka nkhayi inatiri co mbiiblyani ni yooneehaka wiira nnyo inatirinnyo khacinhiya wiirannya, anaalakela wiikurumica uvara cinene nteko wa Yehova.
NHOOLELIHERE MUUKUMINI WINYU UMWENE WA YEHOVA, KHAMPA AKILA NI PIRISILA
11. Isiyani Akila ni Pirisila yaakhitinryaaya upanka, ni nlattuni?
11 Ale athelanne phiyaaru pooti ciicammo uwiitthucera anamathelana yeehaniya Akila ni Pirisila yaakhala khalayi isittatti yo Roma. Ayo yaheetthuca ihapari comaana caamuuluma Yesu ni yahokhala makristau. Khweeliini ayo yaanaacivela makhalelo yaarinaaya. Masi ukati nhooleli Cláudio waawoomonlyaawe u Roma ayuuta otheene, makhalelo a Akila ni Pirisila yahorukunuwa. Moone itthu yaakavihenre uyo ukatyuuyo. Woopacera, ayo yahaana yathamaka ncoko waalemalenlyaaya, utotha inupa ikhwaawe ni unturuwela nakoswaaya o waapanka aheema. Uthama waya u Roma, ayo yaathamenle u Korintu. Nwo, Akila ni Pirisila yahancera ukavihera cinene miteko co wanlokoni ni yahovara nteko nkhayi ni apostolu Paulu, wiira yaalipihe mayamunna o wanlokoni naya nophiyaaru. Nuuwakatyaaya, ayo yahothamela isittatti cikhwaawe yaapheeliya anamalalyeera. (Mite. 18:18-21; Aroo. 16:3-5) Unawoonannya wiira ayo yaakhala ninteko mwinci, masi yahaakhela iparakha cinci! Nyuuva atthunaka nnaacuwela ihantisi ya Akila ni Pirisila, masi nhopaca weemela ni wiikoha nlattuni waakhitinryaaya upanka citthu cotheenennyo? Nlattu woohihiya uhoolelihera umwene wa Nluku muukumini waya hataa makhalelwaaya yarukunuwaka ukati wahaawehereraaya.
12. Kontha isiyani anamathelana ahaana yiihelelaka mipika coominepani?
12 Anamathelana ilelo anantakiha Akila ni Pirisila yahooleliheraka muukumini waya Umwene wa Nluku. Ukati wooreera anamathelana usikisana ni woopela mwaha mipika caya comunnepani ukhanle ukati uncuwelanaaya ahinaaya uthelana. Unaareera cinene anamathelana yalakelaka citthu cotheene nkhayi ni ooyeeli yeekurumicaka ukhalana mipika coominepani cimocaaru. Yapankaka commo, anaahala ukhitiri woona wiira Yehova nawaacaaliha. (Ekles. 4:9, 12) Muupuwele ntakihero na munna neehaniya Russell ni amwaarawe aneehaniya Elizabeth. Munna Russell neera: “Ukati waacuwelaneehu nihinaaya uthelana naanawoopelaka mwaha mipika cihu coominepani.” Arokorihu Elizabeth aneera: “Hi naasikisana nnyo citthunnyo wiira wahoolo nihirwee ulakela citthu caahala unihiiha wiirannyeeha mipika cihu coominepani.” Munna Russel ni Elizabeth yahokhitiri uthamela u Micronésia wiira akavihere nloko nahaarina anamalalyeera enci.
Ale athelanne phiyaaru anhoolelihera nteko wa Yehova muukumini waya yeehelelaka mipika coominepani (Nwehe iparaagarafu 13)
13. Toko cinhimyaaya Isaalimu 28:7, isiyani inhala uniirannyeela wanrimani nankhuluvelaka Yehova?
13 Khampa munna Russell ni Elizabeth, anamathelana enci ahothanla ukhalana makhalelo anhala waakhitiriha uvara cinene nteko woolalyeera ni wiitthuciha moolumo a Nluku. Anamathelana yiihelelaka mipika wiira avare cinene nteko wa Yehova ni yeekurumicaka nkhayi wiirannyeeha nnyo mipikannyo, anaaphwanya ifayita cinci. Ooyeeli anaahala ukhitiri umoona Yehova aawaceraka. Nlattu wo iyo, anaahala utepa unkhuluvela Yehova ni unaahala waatteela nrima cinene.—Nsome Isaalimu 28:7. *
NKHULUVELE INATIRI CA YEHOVA, KHAMPA APOSTOLU PETURU NAAMWAARAWE
14. Apostolu Peturu naamwaarawe yaathonyenre cani ukhuluvela inatiri imphwanyannya nhina Matewus 6:25, 31-34?
14 Anamathelana ilelo pooti wiitthuca citthu cinci yoopuwelaka ntakihero na apostolu Peturu naamwaarawe. Nhina myeeri siita awula mwaakha mmoca apostolu Peturu caavirihalyaawe nancuwenleene Yesu, uyo ahaana alakelaka upanka itthu yuulupale cinene. Wiira aphwanye iyoolya ni citthu cikhwaawe, Peturu ankhuluvela nakoswaawe oomenca ni utumiha ihopa. Masi vano aholattuliya ni Yesu wiira anvarane nteko ukati wotheene. Peturu ahaana oopuwelaka isiyani yaahalaawe ulakela upanka, woohaaliyala amucyaawe. (Luka 5:1-11) Peturu ahothanla unvarana nteko Yesu ni itthu yaathanlalyaawe yaari yomaana! Ni unawoonannya wiira amwaarawe yahaamini itthu yaalakenlyaawe. Ibiiblya inthoonyera wiira Yesu wunwelelihiya wawe, Peturu ahoveleeliya naamwaarawe mapuro yaarweelyaawe ulalya ihapari ca Nluku. (1 Akor. 9:5) Khweeliini, amwaara a Peturu yaari athiyana ooreera nrima, atthunaka phimaana Peturu waakhitinryaawe waavaha ikano atheli ni athiyana ootheliya woohimuula muru. (1 Pet. 3:1-7) Yehova ahohimya wiira anhala waawacera ale yaahala uhoolelihera umwennyaawe muukumini waya. Unawoonannya wiira Peturu ni amwaarawe yahokhuluvela iyo inatiriiyo.—Nsome Matewus 6:25, 31-34. *
15. Itthu imwiirannyenle amunna Tiago naamwaaraya inniitthuciha isiyani?
15 Wakhala wiira nhoviriha myaakha cinci nnathelanne, isiyani inlamuliyeenyu upanka wiira nyuuva naamwaarinyu wuuciveleni cinene ulalya ihapari? Itthu imoca inhala wuukaviherani ukhanle wiitthucera ntakihero naanamathelana akhwaawe. Wootakihera, nyuuva pooti wansomeenyu myaha cineera “Eles ofereceram-se”. Nnyo myahannyo cahonkavihera munna Tiago nokhala u Brasil ni amwaarawe aneehaniya Esther upheela ulalyeera cinene nipuro anthwa anamalalyeera. Munna Tiago neera: “Usoma mananna Yehova cinaakaviheraawe aswalyaawe ilelo unaanikavihera woona mananna Yehova cinnikaviheraawe ni cinniwaceraawe hiiva ciicammo.” Munna Tiago ni amwaarawe yahothamela u Paraguai, unkaviheraaya nloko neekunya ukhuma mwaakha wo 2014. Nrokorihu Esther neera: “Iveerusu yo mbiiblyani innicivela cinene ikhanle Efesu 3:20. Hi ninawoona ikwaha cinci iniirannyeelaka itthu inhimyaaya iyo iveeruswiiyo.” Nhina iyo iveeruswiiyo, apostolu Paulu ahaahimyeera makristau o Efesu wiira Yehova anhala waapankela citthu cuulupale uvikana citthu canlepelaaya. Ni iyo ikhanle ikhweeli!
Ale athelanne phiyaaru anhoolelihera nteko wa Yehova muukumini waya yaalepelaka ankhili makristau ookhomaala (Nwehe iparaagarafu 16)
16. Wakhala wiira anamathelana anawuupuwela wiihelela mipika comunnepani, alamuliyaaya waalepela apani ankhili?
16 Ale athelanne phiyaaru pooti uwiitthucera cinene anamathelana akhwaawe yiitthucile unkhuluvela Yehova. Anamathelana enci ahoviriha myaakha cinci yavaraka nteko wa Yehova ukati wotheene. Wakhala wiira nnawuupuwelaka wiihelela mipika comunnepani, nnoonela cani uwuulumana ayo anamathelanaayo? Upanka commo, ankhala mananna oothoonyera wiira nnankhuluvela Yehova. (Miru. 22:17, 19) Mahumu ciicammo pooti waakavihera ale athelanne phiyaaru wiihelela mipika comunnepani.
17. Isiyani yaawiirannyenle amunna Klaus naamwaaraya, ni ntakihero naya ninniitthuciha isiyani?
17 Ukati nkiina, narukunusaka makhalelweehu wiira nivare cinene nteko wa Yehova, pooti unikhumelela itthu yahaaweherereehu. Moone itthu yankhumelenle Klaus ni Marisa, aromoliye wiipaceroni. Uvira waya myaakha miraru anathelanne, ayo yahothamela u Finlândia wiira yakavihere nteko wootekateka. Masi uphiya waya, ayo yahohimyeeriya wiira khayaalamuliya uvikaniha myeeri 6 anari iyo ilapweeyo. Wiipaceroni, ayo yahonyoonyiya. Masi nuuwakatyaaya, ayo yaholattuliya upanka ikuurusu yo wiitthuciya iluuka ikhiyaarabu. Nna co, ayo ahothamela ilapo ikhwaawe ni ankavihera nloko ninoolumiya iluuka ikhiyaarabu. Oopuwelaka uttuli, nrokorihu Marisa neera: “Ntthu pooti woova oopuwelaka uthama nipuro nilemalenlyaawe ni unkhuluvela Yehova paasi wiira naahala unwacera. Masi mi mwaaneennyaaka kihomoona Yehova akikaviheraka nimananna yahaawehereraaka. Citthu cotheene cinikhumelenle cihonikavihera utepa unkhuluvela Yehova.” Khampa cinthoonyeraaya nno ntakiheronno, nyuuva pooti wankupaliinyu wiira Yehova naahala wuucaalihani ni wuutthuvelani mwankhuluvelaka.
18. Isiyani anamathelana inlamuliyaaya upanka wiira ahihiyerere uhoolelihera nteko wa Yehova muukumini waya?
18 Uthelana ikhanle itthuvo ya Yehova. (Mat. 19:5, 6) Yehova nopheela wiira iyo itthuvweeyo yaatteelihe nrima anamathelana. (Miru. 5:18) Nyuuva nthelanne phiyaaru, nheemela wiira nweheehe makhalelweenyu? Munneekurumica unthoonyera Yehova wiira nnaasukhurweela citthu cotheene cuupankenlyaaweni? Mmuulumane Yehova. Ntothe mbiiblyani mattharelelo anhala wuukaviherani uhoolelihera nteko wa Yehova muukumini winyu. Mwaphanyaka ayo mattharelelwaayo, mweettele. Pooti wankupaliinyu wiira mwapankaka commo, nnaahala uphwanya utteeliya weekhweeli ni iparakha cinci nlattu wooholelihera nteko wa Yehova muukumini winyu!
NCIPO 132 Nós Somos Um
^ par. 5 Citthu cikiina cinlakeleehu upanka muukumini wihu pooti unikhitiriha uvara nteko wa Yehova cinene awula vakaani. Citthu cinlakelaaya ale athelananne phiyaaru pooti urukunusa cinene makhalelwaaya. Ula mwahoola unaahala waakavihera ulakela citthu comaana cinhala waatteeliha nrima.
^ par. 1 Isaalimu 37:3 Unkhuluvele Yehova ni upanke citthu comaana; ukhale watuninyani ni ukhale ookhuluvelya. 4 Uphwanyihiye ni Yehova utteeliya wooverihela, ni uyo naahala wuuphwanyiha cimpheelaa wanrimani waa.
^ par. 5 Macina makiina ahaakakhanihiya.
^ par. 6 Miruku 3:5 Unkhuluvele Yehova ni nrimaa wotheene; uhikhuluvele ankhilyaa. 6 Umuupuwele mmittalani caa cotheene, ni uyo naahala wookolela iphiro caa.
^ par. 10 Anamathelana pooti usoma nkhayi citthu cineetthucihaaya ikapiitulu 6, 7, ni 19 co nlivuruni A Adoração Pura de Jeová É Restaurada!
^ par. 13 Isaalimu 28:7 Yehova khanle ikurwaaka ni nikhikicero naka; nrimaaka unonkhuluvela uyova. Mi kihokaviheriya nuuyo ni nrimaaka unaakitteela; phimaana, kinaahala unttottopela kimwiipelaka ncipo.
^ par. 14 Matewus 6:25 Phimaana, kinwiirelani coo: Nhiye utepa ukhala ni masukhuli muukumini winyu, mwapheelaka yooliya awula yoowurya, ni yoohala uwara. Ukumi ni iyoolya yuulupale isiyani? Irutthu ni ikuwo yuulupale isiyani? 31 Phimaana, nhikhale niiwasiwaasi, mwiiraka: ‘Ninhala ulyani?’ awula: ‘Ninhala uwuryani?’ awula ‘Ninhala uwarani?’ 32 Kontha citthu cotheenennyo phi citthu atthu o ntuninyani cineekurumicaaya cinene utotha. Athumwaninyu o wiirimu anaacuwela wiira nyuuva nnaapheela citthu cotheenennyo. 33 Phimaana, nhihiye uhoolelihera Umwene wa Nluku ni isariyaawe; ni nnya citthu cikhwaawe cotheenennya nnahala uphwanyihiya. 34 Coo, nhikhale niiwasiwaasi nlattu wo citthu co meelo, kontha nihuku no meelo niri niiwasiwaasi caya.
