1. Isiyani atthunaka ineekohakeehu ukati nkiina?

NYUUVA unnoophwanyakani woova moopuwelaka citthu cinhala wiirannya wahoolo, toko ukwanyulaciya ittiini cowootha, utupheliya apoovu a Yehova ni Gogue ni ikhotto yo Harmacetom? Atthunaka uhaavo ukati uneekoheenyu co: ‘Kinaahala ukhitiri ulipa ukati unhalaaya wiirannya nnyo citthunnyo?’ Mwanceraka woova nlattu wo wuupuwela nnyo citthunnyo, moolumo a Yesu anlipihera ula mwahoola pooti wuukaviherani. Yesu aawiirenle attharyaawe co: “Nhikhale nimasukhuli wanrimani winyu. Moonihere waamini.” (Joau 14:1) Waamini wihu wakhalaka woolipa, khaninhala utepa woova citthu cowoopiha cinhala ukhumelela wahoolo.

2. Manannani ninlamuliyeehu ulipihaca waamini wihu, ni isiyani impheeleehu woopela mwaha nhina ula mwahoola?

² Inanna imoca oolipihaca waamini wihu ilelo wiira nakhitiri urwaa uvilela ukati wo masakha moolupale, ukhanle utotha ucuwela wakhala wiira ninnovilela awula mena masakha annikhumelela ilelo. Napankaka commo, ninaahala ukhitiri ucuwela malipihacero waamini wihu. Khula ukati unvileleehu masankiho, waamini wihu unaalipa. Ni waamini wihu walipaka nennaco, ninaahala ukhitiri uvilela masankiho oohoolo. Nhina ula mwahoola, ninaahala wuupuwelaca citthu cese caakhumelenle atthari a Yesu ni caathoonyenre wiira waamini waya waanaapheela ulipihiya. Ciicammo, ninaahala wiitthuca mananna oovilela masakha toko ayo ni woona manannani ayo masakhaayo cinnitthenkacaaya wiira nirwee nalipe wahoolo.

3. Toko cinhimyaaya Matewus 6:30, 33, isiyani Yesu ilipihenryaawe uhimya nhina waamini?

³ Khunnanara nhooleli itthoko apheelaka uwaaverya amwaarawe ni asaanaawe iyoolya, ikuwo ni inupa. Masi ula ukati wookhiceroola unaarika cinene uphwanya nnyo citthunnyo woohilipalipela. Ahaavo mayamunneehu ahirina-tho nteko ni ahinkhitiri uphwanya nteko nkiina hataa yiikurumicaka cinene. Ni ahaavo akhottile miteko nlattu wookhala miteko cihinlamuliyaawe nkristau uvara. Canikhumelelaka citthu  toko nnyo, nihaana naaminiki cinene wiira Yehova naahala unikavihera uphwanya iyoolya ni citthu cikhwaawe amuciihu cimpheelaaya. Yesu aholipihera waahimyeera attharyaawe iyo itthwiiyo. (Nsome Matewus 6:30, 33. *) Nakupaliki wiira Yehova khanhala unihiya nikhwaaka itala, ninaahala ukhitiri uhoolelihera muukumini wihu itthu yofayita cinene—nteko wo Umwene wa Nluku. Ni namoonaka Yehova anikaviheraka uphwanya iyoolya ni citthu cikhwaawe, ninaatepa ukupali wiira uyo khweeliini haavo ni waamini wihu unaatepa ulipa.

4-5. Isiyani yaakavihenre amuci aamunna Miguel umaliha iwasiwaasi caakhalanaaya wiira aphwanye iyoolya?

⁴ Moone mananna Yehova cankavihenryaawe munna Miguel nokhala u Venezuela wamoca naamucyaawe. Uyo munnooyo naamucyaawe yahaana imatta yankaani waalimaaya wiira akhitiri wiilihera. Masi nihuku nimoca, ikhurupu yaanamaakeela citthu caakhunanaya yahaakeela iyo imatteeyo ni yahowoomola. Munna Miguel neera: “Nnaco wiira nikhitiri uphwanya iyoolya, ninkhuluvela imatta yankaani yaacimiyeehu. Mi konwaka khula nihuku kinanlepela Yehova wiira anikavihere uphwanya iyoolya nno nihukunno.” Munna Miguel ni amucyaawe hataa yahuvaka venci, masi anaakupali wiira Apaapeehu o wiirimu anaahala waavaha iyoolya ni citthu cikhwaawe cinaathwa. Phimaana, amuci otheene anaakhitiri uhilova umikutthaanoni ni wulalyaani ihapari ca Nluku. Ayo anaahoolelihera muukumini waya citthu co Umwene wa Nluku, ni Yehova nawaavaha citthu cotheene cinaahaleela.

⁵ Uyo ukati woorikooyo, munna Miguel naamwaarawe aneehaniya Yurai, yahoona mananna Yehova caawaceraawe. Ukati nkiina, Yehova nawaakurumica mayamunna o wanlokoni wiira yaavahe ayo amucyaayo citthu cimpheelaaya ni wiira ankavihere munna Miguel uphwanya nteko. Ikwaha cinci, Yehova nawaakavihera ayo amucyaayo ninteko untthenkacaaya mayamunna o Peteli wiira akaviheriye ale yaakhumelenle ihasara. Khweeliini, Yehova khaahiile amucyaawe munna Miguel yakhwaaka itala. Nlattu wo iyo, waamini waya unaavira utepaka ulipa. Ikwaha imoca, mwanaya omuulupale neehaniya Yoselin aheera: “Unaanitteela nrima nacuwelelaka mananna Yehova cinnivaraawe moono. Mi kimmona Yehova ukhala mpatthannyaaka ni kinaacuwela wiira uyo khanhala uhiya ukikavihera.” Ni ciicammo aheera: “Masakha anikhumelenle ahonitthenkaca wiira nirwee nalipe yanikhumelelaka marikariko moolupale wahoolo.”

6. Nnohala ulipihaca cani waamini winyu mwakhalaka niiwasiwaasi nlattu wo wuuthwaani nsurukhu?

⁶ Nyuuva nnokhala niiwasiwaasi nlattu wo wuuthwaani nsurukhu? Mwaakhula iyee, khweeliini nnokhala nimasukhuli menci. Hataa ukhalaka commo, nvarele nteko saana ukati unkhaleenyu nrikarikiyaka wiira nlipihace waamini winyu. Munlompe Yehova, nsome moolumo a Yesu nhina Matewus 6:25-34 ni muupuwele cinene ayo moolumwaayo. Muupuwele citthu ciwiirannyenle mayamunna akhwaawe cithoonyenre wiira Yehova nawaawacera ale anhoolelihera uvara ntekwaawe. (1 Akor. 15:58) Upanka commo, unaahala wuukaviherani ukhuluvela wiira Apaapeenyu o wiirimu anaahala wuukaviherani khampa caakavihenryaaya mayamunna akhwaawe waathweele nsurukhu. Yehova naacuwela citthu cinoothwaani ni naacuwela mananna  owuuphwanyihani nnyo citthuunnyo. Moonaka wiira Yehova nawuukaviherani, umwaamini winyu unaahala utepa ulipa ni iyo ikhanle itthu inhala wuutthenkacani wiira mwalipe yookhumelelakani masakha wahoolo.—Habak. 3:17, 18.

7. Toko cineeraaya Matewus 8:23-26, “naphuvu muulupale” aattehile cani waamini waatthari a Yesu?

⁷ Uwakati Yesu nkhayi naattharyaawe waaryaaya nkalawani, ahaakhumelela naphuvu muulupale. Yesu ahopheela cinene waakavihera attharyaawe woona wiira yanhala upheela ukhalana waamini woolipa wiira akhitiri uvilela masakha moolupale. (Nsome Matewus 8:23-26. *) Naphuvu aakhumelenle ahovira oonuwaka mpaka uwusa mawimpi moolupale ni ucariha maaci nkalawani, masi Yesu anrupa woohituthuwa. Attharyaawe yahoova cinene ni yahonlepela wiira awoopole. Yesu ahaakoha co: “Nnotepelani woova commo, alopwana ookhalana waamini vakaani?” Atthari a Yesu yaalamuliya wuupuwela wiira Yehova anhala unkhikicera Yesu ni atthu otheene yaarinaawe. Nnokhitiri woona va itthu ineetthuceehu? Waamini woolipa pooti unikavihera unvilela “naphuvu muulupale” ni ciicammo masakha oorika cinene annikhumelela anlikanaca ni naphuvu.

8-9. Masakhani yaattehale waamini waanuunwiihu Anel, ni isiyani yaakavihenre uvilela?

⁸ Muupuwele itthu yaakhumelenle anuunwiihu aneehaniya Anel ankhala u Porto Rico. Ayo yahaakhumelela masakha oorika cinene yaalipihale waamini waarinaaya. “Naphuvu muulupale” aaphwanyale aari ophyoo coniiniini. Uyo naphuvuuyo eehaniya Maria, eerannyeele mwaakha wo 2017 ni ahokwanyulaca inupa yaanuunu Anel. Ciicammo, nlattu wo uyo naphuvuuyo, ayo yahokhala woohinteko. Ayo aneera: “Uyo ukati wo marikarikooyo, mi kahokhala nimasukhuli, masi kaheetthuca unkhuluvela Yehova kinlompaka ni uhihiya ayo masukhulyaayo yalolovihaka waamini waka.”

⁹ Anuunwiihu Anel anawuupuwela itthu ikhwaawe-tho yaakavihenre ule ukati wo masakhoole—wiiwelela. Ayo aneera: “Wiiwelela malakihero yaavahiyeehu ni mphwinko woothotokanihiya wa Yehova, wahokikavihera uhitepa ukhala nimasukhuli. Mi kaanoona ntata na Yehova nikimaalihaka aavarelaka nteko miyamunna. Ayo yahokilipiha makhuva ni yahokivaha citthu cotheene caapheelaaka ule ukatyuule. Yehova hokivaha citthu cinci uvikana citthu canlepelaaka ni waamini waka uhokhala woolipa.”

10. Isiyani inlamuliyeenyu upanka wakhala wiira nnomwaanana “naphuvu muulupale” muukumini winyu?

¹⁰ Nyuuva ciicammo nri ni naphuvu muulupale? Atthunaka nnaahuva nlattu wohasara ikhumelenle ncoko unkhaleenyu. Awula atthunaka nnokhala nimasukhuli nlattu woretta yuulupale inaananeenyu. Nlattu wo citthu cotheenennyo, nyuuva pooti ukhala niiwasiwaasi cinene, masi nhihiye nnyo iwasiwaasinnyo cuuhiihakani unkhuluvela Yehova. Munlompe ninrimeenyu wotheene. Nlipihace waamini winyu muupuwelaka ikwaha cotheene Yehova ookavihenryaaweni. (Isaa. 77:11, 12) Nkupali wiira Yehova khanhala wuuhiyani veekha ilelo ni wahoolo.

11. Kontha isiyani nihaana nilakelaka uwiiwelela ale avahaceriye unihoolela wanlokoni?

 ¹¹ Isiyani-tho inhala unikavihera uvilela masakha annikhumelela? Toko cithoonyenryaaya anuunwiihu Anel, wiiwelela ikhanle itthu inhala unikavihera cinene. Mwiitthuce waakhuluvela alopwana anaakhuluvelaawe Yehova ni Yesu. Ikwaha cikiina, ayo alopwanaayo atthunaka pooti univaha malakihero hiiva ahinooneehu ureerana ni ucuwannyaaca. Masi Yehova khanhiya waacaaliha atthu owiiwelela. Ihantisi co mbiiblyani ni hataa citthu caakhumelenle mayamunna enci ilelo cinthoonyera wiira wiiwelela unawoopola ukumi. (Nkw. 14:1-4; 2 Ikor. 20:17) Muupuwele ayo matakiherwaayo. Upanka commo unaahala wuukaviherani wiiwelela malakihero anhaleehu uvahiya mumphwinkoni woothotokanihiya wa Yehova ula ukatyuula ni anhaleehu uvahiya wahoolo. (Mabere. 13:17) Ciicammo, nnaahala ukhitiri ulipa nrima ukati wo naphuvu muulupale aattamenle ni hinatoka thanku wiirannya.—Miru. 3:25.

12. Nlattanihero na Yesu niri nlivuruni ya Luka 18:1-8, ninnikavihera cani woona mananna waamini unkaviheraaya uvilela?

¹² Yesu anaacuwela wiira waamini waattharyaawe wanhala uttehiya ni citthu coohimamaana caahalaaya upankiya. Wiira aakavihere uvilela, Yesu ahaattonkacera ntakihero nimoca nimphwanyannya nlivuruni ya Luka. Mmo, Yesu naattonkaca ihantisi ya nankhweli nthiyana anlepenle suwiisi uwacera nlattwaawe. Uyo nankhwelyuuyo aanaakupali wiira aahihiyerereke unlepela suwiisi, ula anhala unviriyana. Ni iyo phi itthu yiirannyeele. Yehova khanakhala suwiisi nolattanaca ni suwiisi oolumiye muntakiheroni. Phimaana Yesu aheera: “Khweeliini, niireke Nluku khanhala upanka wiira awaceriye niisariya ale yaathanlalyaawe anonlepela isontte-sontte uthana ni uhiyu, ukati uyova unaavilelaawe?” (Nsome Luka 18:1-8. *) Ni Yesu aheera-tho: “Uwakati unhalaawe uwa Mwaana a Pinaatamu, naahala uphwanya uthoonyiheriyaka waamini toko ula watuninyani?” Isiyani ineetthuceehu? Napankiyakaka citthu coohinamaana, nihaana nikhalanaka waamini woolipa khampa nankhweli aamulumalyaawe Yesu. Ninthoonyera ukhalana waamini toko uyo napisaka nrima ni navilelaka. Nwo waamininwo pooti unikavihera ukhuluvela wiira wanihukuni Yehova naahala unaakiha. Ciicammo, nihaana nikupaliki wiira ulompa uhaana ikuru. Ukati nkiina, ulompa wihu pooti waakhuliya niinanna yahaaweherereehu.

13. Ulompa waakavihenre cani amuci yaapheela upankiya citthu coohinamaana?

¹³ Moone ntakihero naanuunwiihu aneehaniya Vero ankhala u República Democrática do Congo. Anuunwiihu Vero, awannyaya ni mwanaya  mwanthiyana rina myaakha 15 yahotthawa uwakati ikhurupu yaanatoropa waakenlyaaya aliteeyaaya. Yatthawakooko, ayo yaheemesiya naanatoropa ni yahoopopihiya wiiviya. Ukati anuunwiihu Vero wancenryaaya wunla, mwanaya aholompa akumiheraka ncu nawe vate wiira aamaalihe, ni ukati waalompaawe ahoromola ncina na Yehova ikwaha cinci. Umaliha wawe ulompa, nlopwana aahoolela ikhurupu yaanatoropa ahonkoha: “We, tipani wiitthucihile ulompa?” Mwanaya anuunwiihu Vero ahaakhula: “Amaama phikiitthucihile yattharaka nivekelo niri nhina Matewus 6:9-13.” Vano uyo nlopwanooyo aheera: “Pooti urwaa nkhayi naathumwana ni anumwana, ni Yehova Nlukwiinyu ookhikicereni!”

14. Isiyani atthunaka yaahala utteha waamini wihu, ni isiyani inhala unikavihera uvilela?

¹⁴ Citthu ciirannyeele toko nnyo cinaaniitthuciha uhivyaavyeeha ulompa. Vano, ninhala upankani noonaka wiira Yehova khanaakhula ulompa wihu woowaakuvyaaca ni niinanna yootikhiniha? Nkhanyerere ulompa, khampa nankhweli aamuulumalyaawe Yesu munlattaniheroni? Nkhuluvele wiira Yehova khanhala wuuhiyani veekha ni mwaamini wiira uyo naahala waakhula ulompa winyu. Nhihiye unlepela wuuvahani nnepaawe wowaarya. (Afili. 4:13) Muupuwele wiira Yehova naahala wuuvahani iparakha cinci mpaka nyuuva nnaahala uliyala uhuva wotheene wuukhumelenleni. Mwavilelaka niikuru cinhalaawe wuuvahani Yehova, nyuuva nnaahala ulipa ni ukhala owiitthenkaceene wiira mwavilele citthu cinhala utteha waamini winyu wahoolo.—1 Pet. 1:6, 7.

15. Toko cinthoonyeraaya Matewus 17:19, 20, marikarikoni yaakhumelenle atthari a Yesu?

¹⁵ Yesu ahowiitthuca attharyaawe wiira waamini wanhala waakavihera uvilela marikariko. (Nsome Matewus 17:19, 20. *) Ikwaha cinci, atthari a Yesu yahokhitiri woomola maciini; masi ihaavo ikwaha yahaakhitinryaaya woomola maciini. Nlattuni? Yesu ahohimya wiira waari nlattu woohikhalana waamini woolipa. Yesu ahowiirela attharyaawe wiira anarina waamini woolipa, ayo yanhala ukhitiri utamiha myaako; iyo maanaaya wiira ayo yanhala ukhitiri utthema marikariko moolupale cinene! Ilelo, hiiva ciicammo ukati nkiina ninaakhalanaka marikariko oorika uvilela.

16. Waamini waakavihenre cani anuunwiihu Geydi uvilela ukati weeviyaaya awannyaya?

¹⁶ Moone ntakihero naanuunweehu aneehaniya Geydi ankhala u Guatemala. Awannyaya aneehaniya Edi yaheeviya naanammalukuni ukati waaturuwaaya umikutthaanoni. Waamini waakavihenre cani anuunwiihu Geydi uvilela ayo masakhaayo? Ayo aneera: “Ulompa wahokikavihera unttikhela Yehova masukhulyaaka, ni mi kahokhalana nnema wanrimani waka. Mi kahoona wiira Yehova ankiwacera aavarelaka nteko amucyaaka ni apatthannyaaka o wanlokoni. Wiikurumica uvara nteko wa Yehova wahokikavihera uhitepa ukhala nimasukhuli nlattu wo wuupuwela manannani cinhalaaka ukhala nihuku nomeelo. Masakha otheene akikhumelenle ahokiitthuciha wiira hataa yakikhumelelaka isiyani wahoolo, mi kinaahala ukhitiri uvilela kontha kinaahala ukaviheriya ni Yehova, Yesu ni mphwikweehu woothotokanihiya.”

17. Isiyani inlamuliyeehu upanka yanikhumelelaka marikariko moolupale toko mwaako?

 ¹⁷ Unawuuriipani nrima nlattu wookhwa ntthu anfenteenyu cinene? Paahi nkumihe ukati woolipihaca waamini winyu nsomaka ihantisi co mbiiblyani cinwuuluma aswali a Nluku yonwelelihiye. Nnokhala ncukulacaka nlattu wookumihiya wanlokoni mmuciinyu vanre matampi woohittharuwa? Nsome myaha cinhala wuukaviherani ukupali wiira ulakiya ni Yehova uhaana ifayita. Hataa yuukhumelelakani marikarikoni, mwiikurumice ulipihaca waamini winyu ukati wowuukhumelelani ayo marikarikwaayo. Munhimyeere Yehova yotheene inwiirani wanrimani winyu. Nhimananihe ukhala veekha, masi ntothe ukhala wamoca ni mayamunneenyu ni miyanuunwiinyu o wanlokoni. (Miru. 18:1) Nvare miteko cinhala wuukaviherani uvilela, hataa ukhalaka wiira nnohala uvara nnyo mitekonnyo yuukhumakani minthori nlattu wo masakha arineenyu. (Isaa. 126:5, 6) Nhihiye urwaa khula isumana umikutthaanoni, wuulalyeerani ni usoma Ibiiblya. Ni ciicammo, nhihiye wuupuwela iparakha coohoolo Yehova cikhuluvelihilyaawe. Ukati unooneenyu wiira Yehova nawuukaviherani, waamini winyu unaahala utepa ukhala woolipa.

18. Moonaka wiira waamini winyu khulipile, isiyani inlamuliyeenyu upanka?

¹⁸ Moonaka wiira masakha anookhumelelani nnaco ni yookhumelenleni khalayi anthoonyera wiira waamini winyu khulipile, nhikhale nimasukhuli. Nwehere iyo itthwiiyo khampa ukati unlamuliyeenyu ulipihaca waamini winyu. Nlepele khampa maapostolu caalepenlyaaya ukati wenryaaya co: “Nnivahe waamini venci.” (Luka 17:5) Ciicammo, nwuupuwele miyamunna ni miyanuunu awoopenleehu mwaha. Khampa munna Miguel ni amwaarawe aneehaniya Yurai, muupuwele ikwaha cotheene Yehova ookavihenryaaweni. Khampa mwaana aanuunu Vero ni anuunu Anel, munlompe Yehova ninrimeenyu wotheene. Ni toko anuunwiihu Geydi, nkhuluvele wiira Yehova naahala wuukaviherani aavarelaka nteko amuciinyu awula apatthaniinyu. Mwatthunaka wiira Yehova ookavihereni uvilela masakha anookhumelelani ilelo, nyuuva nnaahala utepa ukhuluvela wiira uyo ciicammo naahala wuukaviherani ulipa ukati wo khula masakha anhala wuukhumelelani wahoolo.

19. Isiyani Yesu yaakhuluvelaawe wiira yanhala wiirannya, ni isiyani nyuuva inlamuliyeenyu ukhuluvela?

¹⁹ Cihaavo ikwaha Yesu caawiirenlyaawe attharyaawe wiira yahaana yalipihacaka waamini waya, masi uyo ankupali wiira yakaviheriyaka ni Yehova, ayo yanhala ukhitiri ulipa ukati wo masakha yaahala waakhumelela wahoolo. (Joau 14:1; 16:33) Ni Yesu ankhuluvela wiira wahoolo wanhala ukhala mphwinko muulupale waatthu anhala woopwa mmasakhani moolupale nlattu wo waamini waya. (Apoka. 7:9, 14) Nyuuva nnaahala ukhala nhina uyo mphwinkooyo? Nlattu wo maana oonironya annooniheraawe Yehova, nyuuva pooti nnaahala ukhala nhina uyo mphwinkooyo. Masi wiira nrwee mwakhale, nhiviriihe ukati urineenyu ilelo wookhalana ni ulipihaca waamini winyu!—Mabere. 10:39.