MWAHA WOOSOMIYA 45
Manannani Yehova nnikaviheraawe uvara nteko woolalyeera?
“Ayo khweeliini anaahala ucuwela wiira ahaavo porofeeta iriyaryaaya.”—EZEK. 2:5.
NCIPO 67 Eu Vou Pregar!
NINHALA WITTHUCANI? a
1. Isiyani inweherereehu uniirannyeela, masi isiyani inlamuliyeehu ukupali?
HI NINAACUWELA wiira pooti ulupatthiya ukati unvareehu nteko woolalya ihapari ca Nluku. Ni nwo ulupatthiyanwo atthunaka unaahala utepaca wahoolo. (Dan. 11:44; 2 Tim. 3:12; Apoka. 16:21) Masi hi pooti wankupaliihu wiira Yehova naahala unikavihera. Kontha isiyani? Kontha ukhuma nenne nokhalayi Yehova nawaakavihera aswalyaawe uvara miteko cinaarumaawe—hataa yakhalanaka marikariko moolupale. Wiira nooneehe iyo itthwiiyo, ninaahala woopela mwaha citthu cankhumelenle porofeeta Ezekiyeli aalalyenre ayuuta yaarwaaniye u Babilooniya.
2. Atthu porofeeta Ezekiyeli yaalamuliyaawe waalalyeera yaari cani? Ni isiyani inhaleehu wiitthuca nhina ula mwahoola? (Nwehe Ezekiyeli 2:3-6.)
2 Atthuni porofeeta Ezekiyeli yaalamuliyaawe waalalyeera? Yehova aheera wiira yaari atthu “oohihisima,” “ootakhala nrima” ni “oohunya maaru.” Waakhala khampa Ezekiyeli aanoorukureeriya nimiiwa ni niikhavi. Phimaana, ikwaha cinci Yehova ahomwiirela co: “Uhoove”! (Nsome Ezekiyeli 2:3-6. b) Porofeeta Ezekiyeli aakhitinri uvara nteko wo waalalyeera ayo atthwaayo kontha (1) Yehova phanrumale, (2) Nnepa wowaarya wa Nluku wahonvaha ikuru caapheelaawe ni (3) nuulumo na Nluku naholipihaca waamini wawe. Manannani nnyo citthu tthaaru nnyo cankavihenryaaya Ezekiyeli ni manannani cinhalaaya unikavihera hiiva ilelo?
YEHOVA AHONRUMA POROFEETA EZEKIYELI
3. Moolumoni atthunaka yanlipihile Ezekiyeli, ni manannani Yehova caathoonyenryaawe wiira aari nuuyova?
3 Yehova ahomwiirela Ezekiyeli co: “Miiva kinawuuruma.” (Ezek. 2:3, 4) Ayo moolumwaayo atthunaka yahonlipiha cinene Ezekiyeli. Nlattuni? Pooti ukhalaka wiira Ezekiyeli ahoopuwela wiira Yehova ahooluma itthu toko iyo ukati wanvahacenryaawe uporofeeta Isaiya ni Moceesi. (Nkw. 3:10; Isai. 6:8) Ezekiyeli ciicammo ancuwela wiira Yehova ahaakavihera ayo maporofeeta meelyaayo utthema marikariko moolupale. Phimaana, ukati Yehova waamwiirenlyaawe porofeeta Ezekiyeli ikwaha piili: “miiva kinawuuruma,” uyo ahokupali wiira aanaahala ukaviheriya ni Yehova. Ciicammo, nlivuruni ya Ezekiyeli ikwaha cinci ninaaphwanya moolumo aneera co: “Kihaakhela nna nuulumonna ninkhuma wa Yehova.” (Ezek. 3:16) Ni mapuro menci Ezekiyeli hantikha co: “Kihaakhela tootho nna nuulumonna ninkhuma wa Yehova.” (Ezek. 6:1) Khweeliini, Ezekiyeli aanaakupali wiira aarumiya ni Yehova. Ezekiyeli ciicammo aari mwaana a nankuttho, ni atthunaka ikwaha cinci ahowiiwa athumwaane yeeraka wiira Yehova ukhuma nenne nokhalayi nawaakhuluveliha maporofeetaawe wiira khanhala waahiya veekha. Itthu imoca inthoonyera iyo phi ile Yehova yaamwiirenlyaawe Isaiya, Yakopi ni Jeremiya. Uyo ahowiirela co: “Mi kiri ni weeva.”—Upha. 26:24; 28:15; Jer. 1:8.
4. Moolumoni a Yehova atthunaka yanlipihile porofeeta Ezekiyeli?
4 Asarayeli yaahala uwehera cani nteko woolalya waahalaawe uvara porofeeta Ezekiyeli? Yehova aheera: “Nloko no Isarayeli khaninhala upheela uwiiwelela, kontha khanimpheela ukiiwelela miiva.” (Ezek. 3:7) Apoovu o Isarayeli unkhotta waya porofeta Ezekiyeli, ayo khweliini yankhotta Yehova. Moolumo a Yehova yahonkhuluveliha Ezekiyeli wiira ukhottiya naapoovu o Isarayeli khawaathoonyera wiira khaavanre ratta ntekwaawe weeporofeeta. Yehova ciicammo ahonkhuluveliha Ezekiyeli wiira inatiri caalalyaawe canceraka wiirannya, ayo yaanaahala ucuwela wiira “ahaavo porofeeta iriyaryaaya.” (Ezek. 2:5; 33:33) Khweeliini, moolumo a Yehova yahonvaha Ezekiyeli ikuru caapheelaawe wiira avare nteko woolalya waarumiyaawe.
YEHOVA NAANIRUMA ILELO
Khampa porofeeta Ezekiyeli, atthu anaalalyeereehu pooti uhipheela univiriyana ni pooti unilupattha, masi ninaacuwela wiira Yehova ri nihiiva (Nwehe iparaagarafu 5-6)
5. Toko cinthoonyeraaya Isaiya 44:8, isiyani innilipiha nrima?
5 Khampa porofeeta Ezekiyeli, hiiva ciicammo ninaalipa nrima wiira nilalye ihapari ca Nluku, kontha ninaacuweela wiira Yehova phinirumale. Yehova honithanla wiira nikhale ‘masaahityaawe.’ (Isai. 43:10) Ni iyo itthwiiyo ikhanle iparakha yuulupale! Khampa Yehova caamwiirenlyaawe Ezekiyeli: “uhoove,” Yehova ilelo naaniirela co: “nhikhale owoova.” Kontha isiyani khaninlamuliya uwoova atthu annilupattha? Hi khaninlamuliya uwoova ayo atthwaayo kontha, khampa porofeeta Ezekiyeli, hi nirumiye ni Yehova ni uyo khanhiya unikavihera.—Nsome Isaiya 44:8. c
6. a) Moolumooni a Yehova annikhuluveliha wiira uyoova naanikavihera? b) Isiyani innimaaliha ni innivaha ikuru?
6 Yehova naakhuluveliha wiira naahala unikavihera. Wootakihera, uyo hinaaya wiira: “Nyuuva nkhanle masaahityaaka,” aapacenre wiira co: “Ukati weeva unhalaa ulapuwa maaci, mi kinhala ukhala niweeva; ni ukati woolapuwa myooloko, weeva khunhala uttittha. Weeva weettaka wamooroni, khunhala uvya ni mooro khunhala wuupaha.” (Isai. 43:2) Ukati woolalyeera, ikwaha cinci anaanikhumelela marikariko oolattanaca nimaaci ni nimooro. Hataa ukhalaka commo, Yehova nanikavihera uhihiya ulalya. (Isai. 41:13) Khampa uwakati wa porofeeta Ezekiyeli, atthu enci ilelo anaakhotta wiiwelela ihapari ca Nluku cinlalyeehu. Masi, ukhotta waya ayo atthwaayo khunthoonyera wiira hiiva khaninakhala masahiti omaana a Nlukwiihu. Itthu innimaaliha ni innivaha ikuru ukhanle ucuwela wiira Yehova naatteeliya anoonaka nihihiyaka ulalya ihapari cawe. Apostolu Paulu aheera: “Khula ntthu naahala uvahiya itthuvo uweheriyaka nteko uvanryaawe.” (1 Akor. 3:8; 4:1, 2) Arokorihu avirihale myaakha cinci yavaraka nteko weepiyoneeru aheera co: “Itthu inkitteeliha nrima ukhanle ucuwela wiira Yehova naacaliha wiikurumica wihu.”
NNEPA WOWAARYA WA NLUKU WAHONLIPIHA EZEKIYELI
Porofeeta Ezekiyeli ahoona ikaaro yo wiirimu ya Yehova. Iyo itthwiiyo yahonkavihera ukhuluvela wiira Yehova aanaahala unkavihera uvara ntekwaawe (Nwehe iparaagarafu 7)
7. Porofeeta Ezekiyeli aakhala cani oopuwelaka iwooni yaathoonyiheriyaawe? (Nwehe ilatarato yo wakaapani.)
7 Porofeeta Ezekiyeli ahoona wiira nnepa wowaarya wa Nluku uhaana ikuru cinci. Iwooni yaathoonyiheriyaawe porofeeta Ezekiyeli yahonkavihera woona wiira nnepa wowaarya wa Nluku waanaavaha ikuru malayika ni waanaweettiha maroota okaaro yuulupale yo wiirimu. (Ezek. 1:20, 21) Uyo ukatyuuyo Ezekiyeli akhanle cani? Uyo hantikha itthu yeeranyeele: “Miiva woona waka iyo itthwiiyo, kahokhoroma vathi.” Porofeeta Ezekiyeli ahokhala otikhinihiya cinene niitthu yonnyaawe mpaka ahomorela vathi. (Ezek. 1:28) Wahoolo, khula ikwaha porofeeta Ezekiyeli yoopuwelaawe iwooni yonnyaawe, anaakhala oolipihiya nlattu woocuwela wiira nnepa wowaarya wa Yehova wanhala unkavihera uvara nteko wa Nluku.
8-9. a) Isiyani Yehova yanrumilyaawe Ezekiyeli? b) Isiyani-tho Yehova yaapankilyaawe wiira ankavihere Ezekiyeli uvilela marikariko yaahala unkhumelela ukati waahalaawe uvara nteko woolalya?
8 Yehova ahomwiirela Ezekiyeli: “Mwaana a pinaatamu, wunwe wiira kiwuulumane.” Ayo moolumwaayo ni nnepa wowaarya wa Nluku phanvahale Ezekiyeli ikuru caapheelaawe wiira akhitiri wunwa. Ezekiyeli hantikha co: “Nnepa wowaarya wahokela mwiirutthuni waka ni wahokikhitiriha wunwa.” (Ezek. 2:1, 2) Ukhuma uyo ukatyuuyo ni ukati wotheene ukhanlyaawe avaraka nteko wa Nluku, Ezekiyeli ahohooleliya ‘nintata’ na Nluku, awula ninnepa wowaarya wa Nluku. (Ezek. 3:22; 8:1; 33:22; 37:1; 40:1) Nnepa wowaarya wa Nluku wahonlipiha Ezekiyeli wiira akhitiri uvara nteko waavahiyaawe: waalalyeera “atthu oolipa nru ni ootakhala nrima.” (Ezek. 3:7) Yehova ahomwiirela Ezekiyeli: “Kiholipiha ikhovyaa khampa ayova cikhanlyaaya atthu oolipa ikhove ni kiholipiha iyuucyaa khampa ayova cilipalyaaya iyuuci. Kihokhaliha iyuucyaa khampa idiamante, yoolipa cinene uvikana nluku. Uhiwoove ayo atthwaayo ni uhikhale owoopihiya yatthukaka iyuucyaaya, kontha akhanle nloko noohunya maaru.” (Eze. 3:8, 9) Waakhala khampa Yehova aamwiirela Ezekiyeli co: “Uhihiye uhunya maaru waya ayo atthwaayo wuulolovihaka makhuva; mi kinaahala wuulipiha.”
9 Wahoolo, nnepa wowaarya wa Nluku wahonveleela Ezekiyeli mapuro otheene yaavinryaawe alalyaaka moolumo a Nluku. Ezekiyeli hantikha co: “Ntata na Yehova naari noolipa mwiirutthuni waka.” Yahovira isumana imoca Ezekiyeli hineeweeha moolumo yaalamuliyaawe ulalya alipaka nrima. (Ezek. 3:14, 15) Phimaana, Yehova ahomwiirela wiira arwee nipuro, ni aphiyaka nno nipuronno ‘nnepa wowaarya waahala ukhala nuuyoova.’ (Ezek. 3:23, 24) Wiirannyaa waya iyo itthwiiyo, Ezekiyeli aheetthenkaca ni aholikaneliya wiira ancere uvara nteko waarumiyaawe.
NNEPA WOWARYA UNAANILIPIHA
Khampa porofeeta Ezekiyeli, isiyani inhala unikavihera uhihiya uvara nteko woolalyeera? (Nwehe iparaagarafu 10)
10. Isiyani inhala unikavihera ukhitiri ulalya, ni nlattuni?
10 Isiyani inhala unikavihera uvara nteko woolalyeera? Wiiraa naakhule, muupuwele itthu yaamwiirannyenle porofeeta Ezekiyeli. Hinaaya wancera uvara nteko woolalya, nnepa wowaarya wahonvaha ikuru caapheelaawe wiira akhitiri uvara uyo ntekooyo. Ilelo, khampa porofeeta Ezekiyeli caakaviheriyaawe, otheene cihu ninhala ukhitiri uvara nteko woolalya nakaviheriyaka ninnepa wowaarya wa Nluku. Kontha isiyani? Kontha Sotwani naanaattakanana ni mpheela unihiiha ulalya moolumo a Nluku. (Apoka. 12:17) Maweherwaawe pinaatamu, unkhala khampa hiiva khaavo ntthu oonaakiha wiira Sotwani hinikhitiri. Masi, nlattu woohihiya uvara nteko woolalya ihapari ca Nluku, hiiva ninantthema Sotwani! (Apoka. 12:9-11) Manannani? Neekurumicaka uvara nteko woolalyeera, hiiva ninthoonyera wiira khanimmoova Sotwani. Khula ikwaha hiiva ninlalyeehu, ninantthema Sotwani. Vano ukhitiri wihu ulalyeera hataa nilupatthiyaka unthoonyera isiyani? Unthoonyera wiira ninanciveliha Yehova ni uyo naanikavihera ninnepaawe wowaarya.—Mat. 5:10-12; 1 Pet. 4:14.
11. Manannani nnepa wowaarya wa Nluku cinhalaaya unikavihera, ni isiyani ninlamuliyeehu upanka wiira Yehova hihiye univaha uyo nnepooyo?
11 Yehova aholipiha ikhove ni iyuuci ya Ezekiyeli khampa cinlipaaya nluku. Iyo itthwiiyo innikhuluveliha isiyani? Innikhuluveliha wiira nnepa wowaarya wa Nluku pooti unilipiha wiira nikhitiri utthema khula masakha ni marikariko anhala unikhumelela wuulalyaani. (2 Akor. 4:7-9) Masi isiyani inlamuliyeehu upanka wiira Yehova hihiye univaha nnepaawe wowaarya? Hiiva nihaana nihihiyaka ulompa ni ukhuluvela wiira Yehova naahala uniiwa ni univaha nnepaawe wowaarya. Yesu ahowiirela attharyaawe co: “Nhihiyerere ulepela, . . . nhihiyerere waavya, . . . ni nhihiyerere waatta nkhora.” Napankaka commo, Yehova “naahala waavaha nnepa wowaarya ale anonlepela.”—Luka. 11:9, 13; Mite. 1:14; 2:4.
NUULUMO NA NLUKU NAHOLIPIHA WAAMINI WA EZEKIYELI
12. Toko cinthoonyeraaya Ezekiyeli 2:9—3:3, iroolu yaavahiyaawe Ezekiyeli yaakhuma vayi, ni isiyani yantikhiye nhina waya?
12 Nnepa wowaarya wa Nluku wahonvaha Ezekiyeli ikuru ni ulipa nrima waapheelaawe wiira akhitiri ulalya. Masi kahi iyo paahi. Nuulumo na Nluku ciicammo naholipiha waamini wa porofeeta Ezekiyeli. Nhina iwooni yaathoonyiheriyaawe Ezekiyeli, uyo ahoona ntata naacisale iroolu yowantikhaciya. (Nsome Ezekiyeli 2:9—3:3. d) Iyo iroolwiiyo yaakhuma vayi? Isiyani yantikhiye nhina waya? Ni manannani caalipihacalyaaya waamini wa Ezekiyeli? Iyo iroolwiiyo yaakhuma wahiceni wa Yehova. Pooti ukhalaka wiira Yehova ahothanla nlayikha nimoca iriyari wo malayikha macese yoonalyaawe Ezekiyeli, ni uyo ahoruma nno nlayikhanno wiira ninvahe iroolu Ezekiyeli. (Ezek. 1:8; 10:7, 20) Nhina iyo iroolwiiyo yantikhiye moolumo a Nluku—moolumo menci yaahimya ihukhumu ca Nluku Ezekiyeli caalamuliyaawe waalalyeera apoovu oohunya maaru yaarwaaniye u Babilooniya. (Ezek. 2:7) Ayo moolumwaayo yantikhiye uhoolo ni uttuli iroolu.
13. Isiyani Yehova yaamwiirenlyaawe Ezekiyeli wiira apanke ni nlattuni iroolu waaryaaya yooviyola?
13 Yehova ahomwiirela porofeetaawe wiira akhuure iroolu ni acarihe munthuukwani wawe iyo iroolwiiyo. Ezekiyeli aheewelela ni ahokhura iroolu yotheene. Masi iyo itthwiiyo maanaaya isiyani? Ukhuura iroolu maanaaya wiira Ezekiyeli ahaana wiiweeha ratta-raatta moolumo yaahaalaawe urwaa ulalya. Uyo ahaana akupaliki ayo moolumwaayo ni ukhitiri ulalya athoonyeraka wiira aanaakupali itthu inhimyaaya. Vano yaheeranyaa itthu porofeeta Ezekiyeli yahaawehereraawe. Uyo ahoonelela wiira iyo iroolwiiyo “yaari yooviyola khampa uraavo.” (Ezek. 3:3) Porofeeta Ezekiyeli oona ukhala iparakha yuulupale ulalya moolumo a Yehova. Uyo aawehera iyo iparakheeyo khampa itthu yooviyola ni yoociva. (Isaa. 19:8-11) Uyo aanansukhuru cinene Yehova nlattu wonthanla ukhala porofeetaawe.
14. Isiyani yankavihenre porofeeta Ezekiyeli utthuna nteko waarumiyaawe ni Nluku?
14 Wahoolo, Yehova ahomwiirela porofeeta Ezekiyeli co: “Utthune wanrimani waa ni uviriyane moolumo otheene anoohimyeeraaka.” (Ezek. 3:10) Wiira wawe commo, Yehova aapheela unhimyeera Ezekiyeli wiira asunke mmuru wawe citthu cantikhiye nrooluni ni oopuwele nnyo citthunnyo. Upanka commo waanaahala ulipihaca waamini wawe. Ciicammo, ayo yaari moolumo ofayita yaalamuliyaawe waahimyeera apoovu. (Ezek. 3:11) Weesa wawe wanrimani ni wamalakuni moolumo a Nluku, porofeeta Ezekiyeli ahokhitiri ulalya ayo moolumwaayo ni uvara ratta nteko waarumiyaawe ni Nluku.—Nwehe ciicammo Isaalimu 19:14.
NUULUMO NANLUKU NINAALIPIHACA WAAMINI WIIHU
15. Wiira nikhitiri uvilela wuulalyaani, isiyani ninlamuliyeehu “utthuna wanrimani wihu”?
15 Wiira nikhitiri uvilela wuulalyaani, nihaana nilipihacaka waamini wihu ni nihaana nisomaka Nuulumo na Nluku. Hiiva nihaana “nitthunaka wanrimani wiihu” citthu cotheene Yehova cinnihimyeeraawe. Ilelo, Yehova nonuulumana mbiiblyani. Isiyani hiivano inlamuliyeehu upanka wiira Nuulumo na Nluku nihihiye weettihera raatta moopuwelweehu ni citthu cinniira wanrimani wihu?
16. Isiyani ninlamuliyeehu upanka wiira niiweehe ratta Nuulumo na Nluku?
16 Hiiva nalyaaka iyoolya ni yasiliyaka mmirimani wihu, irutthwiihu inaakhala yookhomaala ni ninaakhalana ukumi woomaana. Inanna imocaaru, nasomaka Nuulumo na Nluku ni noopuwelaka ratta citthu cinsomeehu, waamini wihu unaatepa ukhala woolipa. Iyo phi itthu Yehova impheelaawe unuupusera nhina iwooni yoroolu. Yehova nopheela wiira hiiva ‘nicarihe mmirimani wihu’ nuulumo nawe. Maanaaya wiira uyo nopheela wiira niiweehe ratta-raatta Ibiiblya. Wiira nikhitiri wiiweeha, hiiva nihaana nilompaka, usoma Ibiiblya ni wuupuwela ratta citthu cinsomeehu. Woopacera, hiiva ninaalompa wiira nitthenkace nrimeehu ni wiira nikhitiri wiiweeha moopuwelo a Nluku. Vano, ninaasoma mphantte wo mbiiblyani. Namalihaka usoma, ninaweemela wiira nuupuwele citthu caasomeehu. Isiyani ineerannya napankaka commo? Nakumihaka ukati wiira nuupuwele citthu cinsomeehu, ninaatepa wiiweeha nuulumo na Nluku ni neeweehaka nuulumo nawe, waamini wihu unaakhala woolipa.
17. Nlattuni ukhanlyaaya itthu yofayita cinene wuupuwela citthu cinsomeehu mbiiblyani?
17 Nlattuni ikhanlyaaya itthu yofayita usoma Ibiiblya ni wuupuwela citthu cinsomeehu? Upanka commo phi itthu inhala univaha ikuru wiira nikhitiri uvara nteko woolalya ihapari ca Nluku ni wiira wahoolo nikavihere nteko woolalya ihukhumu ca Nluku. Ciicammo, noopuwelaka makhalelo omaana a Yehova, upatthaniihu nuuyo unaatepa ukhala woolipa. Upanka commo unaahala uniphwaanyiha itthu yooviyola awula yoociva—nnema wanrimani wihu ni utteeliya weekhweeli.—Isaa. 119:103.
IKHURU WIIRA NIKITIRI UVILELA
18. Isiyani atthu o ncoko unlalyeehu inhalaaya ukupaleela, ni nlattuni?
18 Ezekiyeli aari porofeeta, masi hi khaninakhala maporofeeta. Unookhalaru commo, hi niholakela uhihiya ulalya moolumo Yehova ahiilyaawe mbiiblyani mpaka ukati unhalaawe uhimya wiira uyo ntekooyo uhomala. Waphiyaka ukati Yehova wo waahukhumu atthu, khaavo ntthu o ncoko unlalyeereehu nohala wiira khaahimyaceriye ni aanooliyaliya ni Nluku. (Ezek. 3:19; 18:23) Uhiya commo, ayo atthwaayo anaahala ukupaleela wiira ihapari hiiva cinlalyeehu cinkhuma wa Nluku.
19. Isiyani inhala univaha ikuru wiira nikhitiri uvara nteko woolalyeera?
19 Isiyani inhala univaha ikuru wiira nikhitiri uvara nteko woolalyeera? Citthu tthaaru cankavihenre porofeeta Ezekiyeli ciicammo phinhala unikavihera hiiva. Hi ninkhitiri uvara nteko woolalyeera nlattu wookupali wiira Yehova phinirumale uvara uyo ntekooyo, nlattu woolipihiya ninnepa wowaarya ni nlattu woovahiya ikuru ninuulumo na Nluku. Nikaviheriyaka ni Yehova, hi ninaakhitiri ukhalalana ikuru wiira nihihiye uvara nteko woolalyeera ni wiira nivilele “mpaka umwiiso.”—Mat. 24:13.
NCIPO 65 Confiantes, Nós Vamos Continuar!
a Nhina ula mwahoola, ninaahala woona citthu tthaaru cankavihenre porofeeta Ezekiyeli uvara nteko waavahiyaawe ni Nluku. Wuupuwela mananna Yehova cankavihenryaawe porofeetaawe unaahala unikavihera utepa ukhuluvela wiira Yehova naahala unikavihera uvara nteko woolalyeera khampa cankavihenryaawe porofeeta Ezekiyeli.
b Ezekiyeli 2:3 Uyo ahokiirela: “Mwaana a pinaatamu, miiva kinawuuruma waapoovu o Isarayeli, ilapo ca atthu oohunya maaru ahiile ukiiwelela. Ayo atthwaayo ni anhinyataataaya anaakitthekela ukhuma nenne nokhalayi mpaka nihuku nolelo. 4 Miiva kinawuuruma waasaana oohihisima ni ootakhala nrima. Urwee wawiirele co: ‘Cole phineeraawe Nkhulupale Pwiiya Yehova.’ 5 Hataa ayova yawiiwelelaka awula yakhottaka uwiiwelela—ukhala wiira akhanle nloko noohiiwa uhimyeeriya —, ayo khweeliini anaahala ucuwela wiira ahaavo porofeeta iriyaryaaya. 6 Masi weeva, mwaana a pinaatamu, uhiwoove ni uhoove nlattu wo citthu cinoolumaaya, hataa ukhalaka toko wiira weeva cinowuurukureerya miiwa ni miri coohoma ni unkhala niikhavi. Uhoove citthu cinoolumaaya ni uhikhale owoopihiya ayo atthwaayo yootthukelaka iyuuci, kontha akhanle nloko noohunya maaru.”
c Isaiya 44:8 Nhikhale owoova ni nhisanke. Mi akuuhimyeeraleni otheene cinyu ni akincuwelihale khalayiiru? Nyuuva nkhanle masaahityaaka. Haavo Nluku nkhwaawe kihikhanle miiva? Mena, khuuvo Mwala nkhwaawe. Khuuvo mwala nkiina mi uncuwelaaka wiira uhaavo.
d Ezekiyeli 2:9 Ukati waawehalyaaka, mi kahoona ntata nineetaphulenle mphantte waaryaaka ni nno ntatanno naacisile iroolu yowantikhaciya. 10 Uyo ahotaphula iroolu uhoolo waka ni iyo iroolwiiyo yahantikhaciya uhoolo waya ni uttuli waya. Nrooluni cantikhaciye icipo co wuusikhani, coothoonyera ucukulaca ni utakhaliya. 3:1 Vano, uyo ahokiirela co: “Mwaana a pinaatamu, ukhuure itthu iri uhoolo waa. Ukhuure ila iroolwiila ni urwee, uwuulumane atthu o nloko no Isarayeli.” 2 Phimaana, mi kahaathama ni uyo ahokikhuuriha ile iroolwiile. 3 Uyo ahokiirela-tho: “Mwaana a pinaatamu, ukhuure ila iroolu inoovahaakeela ni ucarihe munthuukwani naa.” Vano, mi kahancera ukhuura, ni mmwano waka iyo yaari yooviyola khampa uravo.